1. Menurut Matius 7:13, 14, engkai maka banci sikataken adi kita sangana bas perdalanen?

TUJUNTA eme nggeluh bas doni si mbaru i bas pemerentahen Dibata si perkeleng. Tiap wari, siusahaken erdalan bas dalan si nuju ku kegeluhen. Tapi, bagi nina Jesus, dalan e sempit janah mon-mon mesera siakap ndalanisa. (Baca Matius 7:13, 14.) Perban la sempurna, banci saja la sisadari enggo ndarat kita arah dalan e nari.​—Gal. 6:1.

2. Kai kari si man bahasenta bas artikel enda? (Nen ka kotak “ Sipat si Meteruk Ukur Nampati Kita Erban Perubahen.”)

² Adi tetap ateta erdalan bas dalan si sempit si nuju ku kegeluhen, arus kita nggit ngubah carata rukur, pilihenta, bage pe perbahanenta. Iiahken Rasul Paulus kalak Kristen si tading bas Korinti gelah terus ‘erban perubahen si iperluken.’ (2 Kor. 13:11) Pedah e pe erguna ka man banta. Bas artikel enda, lit kari piga-piga si man bahasenta. Si pertama, uga Pustaka nampati kita erban perubahen. Si peduaken, uga turang senina sada kiniteken nampati kita gelah tetap erdalan i bas dalan si nuju ku kegeluhen. Si peteluken, kai si erbanca maka mesera siakap ngikutken petunjuk arah organisasi Jahwe nari. Janah si terakhir, uga sipat meteruk ukur banci nampati kita tetap ermeriah ukur sanga ngelayani Jahwe aminna pe lit perubahen.

3. Uga Kata Dibata banci nampati kam?

³ La menukah mereksa pusuh ras perukurenta. Engkai? Perban pusuhta licik, banci saja mesera siakap metehsa ku ja kita ibabaina. (Jer. 17:9) Menukah kel siakap nipu dirita alu “perukuren si salah.” (Jak. 1:22) Emaka, arus sigunaken Kata Dibata i bas mereksa dirita. Icidahken Kata Dibata uga kin kita situhuna, uga ‘perukuren ras sura-surata.’ (Heb. 4:12, 13) Kai maksudna? Kata Dibata bali bagi mesin ronsen  si banci ngidah uga kin dirita situhuna. Tapi, gelah banci sidalanken pedah si ibereken Kata Dibata bage pe si ibereken turang senina si paguh kinitekenna, arus kita tuhu-tuhu meteruk ukur.

4. Kai buktina Saul jadi meganjang rukur?

⁴ Arah contoh Raja Saul siteh kai si terjadi adi la kita meteruk ukur. Perban ia jadi meganjang rukur, la iakuina maka perlu ibanna perubahen. (Msm. 36:2, 3; Haba. 2:4) Contohna, sanga ikataken Jahwe kai si arus ilakoken Saul kenca italukenna kalak Amalek, la nggit Saul matuhi perentah Jahwe. Janah, sanga ipersingeti Samuel kerna si e, la iakuina kesalahenna e. Tapi, iusahakenna mbela dirina, ikatakenna adi e labo masalah si serius. Janah ikatakenna ka, kalak si deban nge si maksa ia. (1 Sam. 15:13-24) Mbarenda pe, pernah bagenda kesalahen Saul. (1 Sam. 13:10-14) Seh kel sayangna, la mis iambekkenna sipat meganjang rukur e. La ia nggit mperobahi carana rukur. Emaka, merawa Jahwe man bana janah itulakna ia jadi raja.

5. Kai si banci sipelajari arah contoh Saul?

⁵ Pasti la ateta bagi Saul, emaka perlu siukuri penungkunen-penungkunen enda: ‘Sanga kubaca nasehat bas Kata Dibata, kudarami nge alasen gelah la kudalanken nasehat e? Sepele nge kuakap kesalahen si enggo kuban? Kalak si deban nge kusalahken kerna kai si enggo kulakoken?’ Adi ue jawapenta man kerina penungkunen e, arus siperubahi carata rukur. Adi lang, banci dungna kita meganjang rukur. Alu bage, lanai kita banci jadi teman Jahwe.​—Jak. 4:6.

6. Kai bedana Raja Saul ras Raja Daud? Jelasken.

⁶ Cuba perdiateken kai bedana Raja Saul ras raja si nggantiken ia eme Raja Daud. Raja Daud e raja si keleng kel atena “undang-undang [Jahwe].” (Msm. 1:1-3) Iteh Daud maka iselamatken Jahwe kalak si meteruk ukur tapi kalak si meganjang rukur itentangNa. (2 Sam. 22:28) Emaka, iubahna carana rukur sue ras undang-undang Jahwe. Nina, “Kupuji [Jahwe], erkiteken Ia kap si mabai aku, dingen pusuh peratenku ngajari aku tupung berngi.”​—Msm. 16:7.

7. Kai nge silakoken adi kita meteruk ukur?

⁷ Adi kita meteruk ukur, nggit kita ipekena Kata Dibata carata rukur, alu bage la sempat silakoken perbahanen si la mehuli. Kata Dibata banci ipeseri ras sada sora si ngataken, “Arah enda kap dalan. Ikutkenlah.” Ipersingeti Kata Dibata kita gelah ula sempat silakoken si salah. (Jes. 30:21) Melala kel manpaatna adi sibegiken Kata Dibata. (Jes. 48:17) Contohna, perban siikutken Kata Dibata, la perlu inasehati kalak kita, alu bage la lit si erbanca kita mela. Selain si e, reh rembakna ka kita ras Jahwe perban siteh ermediate kel Ia man banta bali bagi sekalak bapak si perkeleng.​—Heb. 12:7.

8. Menurut Jakup 1:22-25, uga carata nggunaken Kata Dibata bagi cermin?

⁸ Kata Dibata banci ipeseri ras cermin. (Baca Jakup 1:22-25.) Tiap erpagi-pagi, ope denga berkat rumah nari ntah pe ope denga jumpa ras kalak pasti erkaca kita lebe. Alu bage, banci siteh kai si perlu man pesikapen. Mbaca Pustaka pe bage ka nge, adi sibaca Pustaka tiap wari banci siteh kai si man perubahen arah carata rukur bage pe perbahanenta. Enterem kalak mbaca ayat harian tiap erpagi-pagi ope denga ia berkat rumah nari. Melala manpaat si datna perban mbaca ayat harian. Kai si ibacana e banci mpengaruhi carana rukur, alu bage bas wari e banci idalankenna pedah si enggo idatna arah Kata Dibata. Selain si e, arus ratur kita mbaca Pustaka ras ngukurisa tiap wari. Aminna pe tempa-tempa menukah ngelakokenca, tapi situhuna mbelin  kel manpaatna perban banci mabai kita tetap erdalan i bas dalan si sempit si nuju ku kegeluhen.

9. Engkai maka banci saja perlu ipersingeti temanndu kam?

⁹ Pernah nge ilakokenndu kai si banci ncedai hubungenndu ras Jahwe? (Msm. 73:2, 3) Adi lit temanndu si paguh kinitekenna pang mere persinget man bandu, begikenndu nge ia janah idalankenndu nge nasehatna e? Adi ue, mehuli si ilakokenndu e janah pasti ngata bujur kam man bana perban ipersingetina kam.​—Kua. 1:5.

10. Kai nge si arusna ilakokenndu adi ipersingeti temanndu kam?

¹⁰ Nina Kata Dibata, “Luka-luka si iban teman mbuktiken kesetianna.” (Kua. 27:6, Terjemahan Dunia Baru [NW]) Kai maksudna? Cuba ukuri perumpaman enda: Bayangken sangana nyebrang atendu janah melala kel motor lewat bas dalan. Tapi, sibuk kel kam ngenen HP-ndu. Sanga kam nyebrang la inenndu ku kiri ntah pe ku kanan. Reh me sekalak temanndu, mekeskes ijemakna tanndu janah itarikna kam gelah la surung nyebrang. Mesui kel akapndu tanndu tapi e erbanca la surung kam tabrak motor. Amin pe mesui kel iakapndu tanndu, janah lit piga-piga wari dekahna kapndu mesui, nembeh nge atendu ia perban enggo itarikna kam? Pasti lang! Ngata bujur kel kam perban enggo isampatina. Bage ka me sanga lit temanta si mpersingeti kita adi lit ranan ras perbahanenta si la cocok menurut Kata Dibata. Banci saja tangtangna kitik ukurta. Tapi ula kam merawa perban persingetna e. Motu perbahanen si bage. (Peng. 7:9) Arusna ngata bujur kel kam man temanndu e perban enggo pang ia mpersingeti kam.

11. Kai nge si erbanca maka la kalak nggit ngaloken nasehat si mehuli arah temanna?

¹¹ Kai nge si erbanca maka la kalak nggit ngaloken nasehat si mehuli arah temanna si perkeleng? Sipat meganjang rukur. Kalak si meganjang rukur meriah akapna “megiken kai si ntabeh akap cupingna megikenca.” Emaka, “lanai kalak e nggit megiken kebenaren.” (2 Tim. 4:3, 4) La iakapna perlu ia inasehati perban pentaren iakapna bana ntah pe pentingen asangken kalak si deban. Tapi, itulis Rasul Paulus, “Adi lit si erpengakap maka dirina penting, padahal kai pe ia lang, nggo itipuna dirina.” (Gal. 6:3) Ijelasken Raja Salomo ka alu mehuli kerna si e, nina, “Ulin anak si nguda denga si mesera tapi pentar, asangken raja si enggo metua tapi motu, si la nggit ipersingeti.”​—Peng. 4:13, NW.

12. Kai si banci sipelajari arah Rasul Petrus bagi si icatat bas Galati 2:11-14?

¹² Cuba ukuri kai si ilakoken Petrus sanga ipersingeti Rasul Paulus ia i lebe-lebe jelma si enterem. (Baca Galati 2:11-14.) Situhuna, banci nge Petrus e merawa man Paulus perban la kapna pas cara Paulus mpersingeti ia janah ipersingeti Paulus ka ia i lebe-lebe jelma si enterem. Tapi Petrus e pentar, ialokenna pedah Paulus e janah la ia dendam man bana. Sebalikna, ikatakenna maka Paulus e ‘turang senina si ikelengi.’​—2 Pet. 3:15.

13. Kai si arus siukuri sope mere nasehat man kalak?

¹³ Adi berekenndu atendu nasehat man temanndu, kai nge si perlu iukurindu? Ope kam ngerana ras ia, cuba ukurindu penungkunen enda, ‘Kalak si seh kel ulina nge kuakap aku?’ (Peng. 7:16) Kalak si mehuli kel iakapna bana, ipersingetina kalak si deban labo menurut patoken Jahwe tapi menurut dirina sendiri janah kalak si bage banci saja la mekuah atena kalak si deban. Kenca  enggo tuhu-tuhu iukurindu kerna engkai iberekenndu nasehat man temanndu janah perlu denga iakapndu iberekenndu nasehat e, kataken man bana kai kesalahenna. Gunaken penungkunen-penungkunen si banci nampati ia ngangkai kai kin salahna. Pastiken gelah kai si ikatakenndu e erpalasken Kata Dibata janah ingetlah tugasndu labo nghakimi ia, tapi nampati ia ngangkai uga perasan Jahwe nandangi kai si enggo ilakokenna. (Rom. 14:10) Gunaken lalap Kata Dibata janah sanga inasehatindu ia, usihlah sipat Jesus si perkuah. (Kua. 3:5; Mat. 12:20) Engkai? Perban uga carandu erurusen ras kalak si deban, bage ka nge cara Jahwe erurusen ras kam.​—Jak. 2:13.

14. Kai si ibereken organisasi Dibata man banta?

¹⁴ Igunaken Jahwe organisasiNa si lit bas doni guna nampati kita gelah tetap erdalan bas dalan si nuju ku kegeluhen. Ibereken organisasiNa melala video, baca-bacan ras perpulungen si erpalasken Pustaka si Badia guna nampati kita ndalanken pedah-pedah si lit i bas Pustaka. Sanga iban Badan Pinpinen atena keputusen kerna uga cara si mehulina i bas erberita, ipindo kalak e penampat kesah si badia. Tapi, alu ratur ipereksa kalak e mulihi keputusen si enggo ibanna. Engkai? Perban “keadan si lit i bas doni enda sangana berubah,” emaka arus isesuaiken organisasi Dibata keputusen si enggo ibanna ras keadan si mbaru.​—1 Kor. 7:31.

15. Tentangen kai saja si iadapi piga-piga perberita?

¹⁵ Sanga ibereken organisasi Dibata pemeteh si mbaru kerna ajaren Pustaka bage pe kerna uga arusna perbahanenta, mis sialoken janah sidalanken. Tapi, kai nge si arus silakoken adi petunjuk si ibereken organisasi e mpengaruhi kegeluhenta? Contohna, piga-piga tahun enda naik kel erga bangunen janah biaya guna ngurus Bale Kerajan pe seh kel ergana. Emaka, iaturken Badan Pinpinen gelah reh buena runggun nggunaken Bale Kerajan si seri. Dungna, ipersada me piga-piga runggun janah piga-piga Bale Kerajan idayaken. Senna ipake guna mbangun Bale Kerajan i bas ingan si lebih merluken. Adi Bale Kerajan bas inganndu tading idayaken janah runggun-runggun si lit i je ipersada, banci saja mesera iakapndu erban penyesuaien. Misalna, piga-piga perberita reh dauhna ia ku perpulungen.  Piga-piga si pernah kerja keras mbangun ras ngurus Bale Kerajan tersungkun-sungkun engkai maka Bale e idayaken, janah banci saja sia-sia iakapna waktu ras gegeh si enggo iberekenna sedekah enda. Tapi, nggit kalak e ngikutken pengaturen e. Emaka perlu kel sipuji kalak e.

16. Menurut Kolose 3:23, 24, uga carana gelah tetap kita ermeriah ukur?

¹⁶ Perlu siinget maka kerina si enggo silakoken eme man Jahwe janah Ia ka me si ngaturken organisasiNa. Adi terus siinget enda, banci kita tetap ermeriah ukur. (Baca Kolose 3:23, 24.) Raja Daud jadi usihen si mehuli man banta. Melala kel iberekenna sen guna mbangun rumah pertoton, nina, “Sabap bangsangku ras aku tuhu-tuhu la ngasup mere man baNdu, sabap kerina ialoken kami i bas Kam nari nge, janah kami ngulihkenca ngenca man baNdu kai si enggo iberekenNdu man kami.” (1 Kro. 29:14) Sanga sibereken sumbangen man Jahwe, situhuna sumbangen e i bas Ia nari. Aminna pe bage, meriah kel ukurNa sanga sibereken waktu, gegeh, ras senta guna ndukung pendahinNa.​—2 Kor. 9:7.

17. Engkai maka ula kitik ukurta adi perlu siban perubahen?

¹⁷ Gelah tetap kita bas dalan si sempit si nuju ku kegeluhen, arus siusih Jesus. (1 Pet. 2:21) Adi perlu iakapndu kam erban perubahen, ula kitik ukurndu. Banci saja e buktina nggit kam ngikutken petunjuk Jahwe. Ingetlah iteh Jahwe maka kita la sempurna, emaka labo iarapkenNa gelah siusih Jesus alu sempurna.

18. Kai si arus silakoken gelah banci kita seh ku tujunta?

¹⁸ Mbera-mbera terus siukuri wari si pepagi, janah nggit kita erban perubahen i bas carata rukur, pilihenta, bage pe perbahanenta. (Kua. 4:25; Luk. 9:62) Teruslah kita meteruk ukur, ‘teruslah kita ermeriah ukur, teruslah siban perubahen si iperluken.’ (2 Kor. 13:11) Adi bage siban, “Dibata si dem kekelengen ras dem kedamen terus ras [kita].” Alu bage, isampati Jahwe kita gelah tetap ermeriah ukur. IsampatiNa ka kita gelah banci seh ku tujunta eme nggeluh bas doni si mbaru.