1. Según Matéu 7:13, 14, ida liña ítara lan habagari kristiánugu kamá wéiyaasu?

SUN wagía kristiánugu, ítarati wabagari kei wéiyaasu. Sun wagía busentiwa wawinwandun lidan iseri ubóu lábugiñe Larúeiha Heowá Bungiu le hínsiñehabubei. Sagü weyu wáfaagun lun woudin luéigiñe üma le anügübei gürigia lidoun ibagari. Kei lariñaguni Hesusu bürüraüti üma le, ani anihein dan hénrenguti leibugún luéigiñe (aliiha huméi Matéu 7:13, 14). Kei chará wabéi, anihein dan aba wáfuridun lídangiñe üma (Gal. 6:1).

2. Kaba wariha lidan arütíkulu le? (Ariha huméi giñe rekuáduru “ Íderagua lumutiwa ǘnabuguni lun wabuiduragüdüni wamadagua luma Bungiu”).

² Lun werederun lidan üma le bürüraübei le anügübei lidoun ibagari magumuchaditi, lunti aranseñu wamá lun wasansiruni ligaburi wasaminan, wóuserun luma wagaburi. Luagu meha le layanuhan apostolu Pábulu dan le línchahanbaliña kristiánugu ha Korintuna lun ‘habuiduragüdüni’ hagaburi (2 Ko. 13:11). Ligiamémegili adundehani le uguñe weyu. Lidan arütíkulu le, warihibei ida luba lan tíderaguniwa Bíbülia lun wabuiduragüdüni wagaburi luma ida luba lan híderaguniwa íbirigu ha derebuguti hafiñen lun wakipuragun woungua lidan üma le anügübei lidoun ibagari. Warihibei giñe ka lan ida hénrengubei lan woun wafalaruni adundehani le tíchugubei lóundarun Heowá. Ani wakutihabei lisudinin ǘnabuguni anhein busén wabéi wadügün asansiruni luma lun wasigirun eseriwida lun Heowá gúndaañu.

3. Ida liña tíderaguniwa Bíbülia?

³ Mama aban katei ménrengunti wakutihani wasaminan luma le wasandirubei. Ka uagu? Ladüga gayaraati teyeeduniwa wanigi, ani hénrenguti lasubudiruniwa halíaba lan tanügawa (Her. 17:9). Héchutiwa  “eyeedagua woungua” (Sant. 1:22). Ligía súdini lubéi lun wayusurunu Lererun Bungiu lun wakutihani ida waña lan. Íderagua tumutiwa Bíbülia lun wasubudiruni ida waña lan múnadagiñe wabiti ani afuranguagüda “tumuti sun waritagun luma sun le wabusenrubei” (Ebü. 4:12, 13). Lidan amu dimurei ítara tiña kei aban máhina le gíribei rayos X le huubei lun larihín le múnadabei wabiti. Ligíati anhein busén wabéi wasagarun buiti lídangiñe adundehani le tídanbei Bíbülia luma le híchugubei lóunagülegu Bungiu, lunti ǘnabugu wamá.

4. Ida liña wasubudiruni aba lan lagumeserun Saulu anaagua lungua?

⁴ Arufuda lumuti lani urúei Saulu hénpulu ka lan gayaraabei lasuseredun anhein marufudun wamá ǘnabuguni. Barüguati meha Saulu lungua darí lun lasaminarun memegeirunti lan lun lasansirun (Sal. 36:1, 2; Abak. 2:4). Arihúati le dan meha le líchugunbei Heowá adundehani lun luagu ka lan lunbei ladügüni lárigiñe lagañeiruniña amaléküna. Gama lumoun, maganbaditi meha Saulu lun Heowá. Dan meha le layanuhabei profeta Samueli lun mabusenrunti meha Saulu lariñagun charaali lan. Lubaragiñe lira aba lariñagun ni kata lan le ladügübei ani aba líchuguni duru hawagun amu (1 Sam. 15:13-24). Mama meha furumiñe wéiyaasu larufuduni Saulu igaburi le (1 Sam. 13:10-14). Híruti aba lan lígiraguagüdün Saulu lungua lun íñuguni. Masansirun lumuti ligaburi lisaminan, ligíati aba lubéi lererehan Heowá lun ani aba lamahadun Heowá lun, lun lasigirun kei urúei.

5. Ka wafurendeirubei lídangiñe lani Saulu hénpulu?

⁵ Lun wafurendeirun lídangiñe le ladügübei Saulu gayaraati wálügüdagun woungua: “Dan le naliiha adundehani tídangiñe Lererun Bungiu álugatina san lun madügün nani? Saminatina san maweirin lan luriban katei le nadügübei? Ru numuti san duru hawagu amu?”. Anhein anha lubéi wóunabagüleibei lun aban lídangiñe álügüdahani le mosu wasansiruni ligaburi wasaminan. Ladüga anhein madügün wamá, gayaraabei wagumeseruña lan arufuda íñuguni ani ábame lamahadun Heowá woun lun lumadagu wamá (Sant. 4:6).

6. Ida liña amu lan ligaburi urúei Saulu luéi ligaburi urúei Dawidi?

⁶ Ariha waméi amu lan meha ligaburi urúei Saulu luéi ligaburi urúei Dawidi le meha hínsiñebei ‘lilurudun Heowá’ lun (Sal. 1:1-3). Subudi lumuti meha Dawidi sefu lumutiña lan Heowá gürigia ha ǘnabugubaña ani máhati lan Heowá houn ha íñugubei hanaagun houngua (2 Sam. 22:28). Ligíati, aba lígiraguagüdün Dawidi lungua lun lasansiruni lilurudun Bungiu ligaburi lisaminan. Ariñagati: “Nalawahabei Nabureme, ladüga ligía adundehabalina, íbini áriebu arufudahati nun tidoun tilulin-agei nanigi” (Sal. 16:7).

7. Kaba wadüga anhein ǘnabugu wabéi?

⁷ Anhein ǘnabugu wabéi wígiraguagüdüba woungua lun tasansiruni Lererun Bungiu luriban wasaminan lun madügün wamani katei wuribati le uágubei wasaminara. Ítara tuba Lererun Bungiu kei aban umalali le ariñagubei woun “Anihán ǘmabei, ñéingiñela hidin” (Isa. 30:21). Teweridirunbadiwa ánhawa adüga somu katei wuribati (Isa. 48:17). Buídubei lidin woun ánhawa aganbei Heowá. Kéiburi, masandirun wabéi busiganu le lanügübei hererehan amu woun. Ani yarafatimabadiwa lun Heowá ladüga subudi wamuti berese lan wau kei aban úguchili hínsiñehabuti (Ebü. 12:7).

8. Según Santiagu 1:22-25, ida luba wayusurunu Lererun Bungiu kei aban isubusei?

⁸ Gayaraati ítaratiña lan Lererun Bungiu woun kei aban isubusei (aliiha huméi Santiagu 1:22-25). Saragu wádangiñe aríaguatiwa woungua tidan aban isubusei lubaragiñe wáfuridun wábiñegiñe sagü binaafin. Ítara luba wasubudiruni anhein mosu lubéi wadügün somu asansiruni lubaragiñe harihiniwa amu. Ítarameme, dan le waliihanu Bíbülia sagü weyu ítara luba warihini anhein mosu lubéi wasansiruni wasaminan luma wagaburi. Íderagua lumutiña saragu íbirigu hakutihanu  garüdia Taturiahóun Lererun Bungiu sagü weyu, sagü binaafin, lubaragiñe háfuridun hábiñegiñe. Ítara, ígiratiña lun ladundehani bérusu burí le hasaminan. Lau awansereina lan weyu áfaaguatiña lun hadügüni le tariñagubei Lererun Bungiu. Mosu giñe waturiahanu Bíbülia ani ráramagua wagíame asaminara tuagu sagü weyu. Másiñati ménrengun lan laganbun dimurei burí le, gama lumoun, ligía aban lídangiñe katei súdinitimabei lun wadügüni lun werederun luagu üma bürüraüti le anügübei lidoun ibagari.

9. Ka ida megei wamá lun lererehan aban umadaü woun?

⁹ Gumeseñahadiwa san adüga somu katei le adügübei lun wadisedun luéi Heowá? (Sal. 73:2, 3). Anhein ganigi lubéi aban wamada le derebuguti lafiñen lun lererehan woun, aganba wamuti san ani adüga wamuti san le lariñagubei? Anhein ítara liña lubéi buiti le wadügübei, ani chóuruti gunda wamá lau ayanuha lan wama (Ari. 1:5).

10. Ka lunbei wadügüni anhein erereha aban wamada woun?

¹⁰ Haritaguagüda tumutiwa Lererun Bungiu: “Gayaraatimati lemenigidúniwa hawagu umadagu ha agañidagüdütiña” (Ari. 27:6). Ka mini lubéi le? Samina wamá luagu sügǘ le: Samina wamá luagu awanha lan agurabaha wáhiñuragun lídangiñe aban üma le ñéingiñe lubéi tásüha saragu karü ani awahán etenira lun wagagamurun. Aba wagumeserun ánhiñuraguei üma marihin wagía ka lan ñǘbuinbei, sódini aba lachawaruniwa aban wamada warigóun luéigiñe warüna. Ladüga lachawaruniwa lau sun lere aba labuleseirun warüna. Gama lumoun, ladüga furese lan lachawaruniwa sefu lumutiwa luéi tachuiruniwa karü. Íbini gáriti lan warüna luagu fiu weyu, wagañiduba hamuga san luma wamada ladüga lachawaruni warüna? Uá. Lubaragiñe lira gúndaabadiwa ladüga líderaguniwa. Ítarameme, ánhawa leweridira aban wamada magundanti lan Heowá lau ligaburi wayanuhan luma ligaburi wadügün somu katei, másiñati wuribabei lan wasandiragun woungua. Magañida wamá ladüga lererehan wamada woun. Ábanbei hamuga libidiounigan au lira (Apur. 7:9). Le linarün katei, lunti wíchugun seremei lun wamada ladüga ganigi lan lun layanuhan wama.

11. Ka adügübei lun lamahadun aban gürigia lun adundehani lúmagiñe lumada?

¹¹ Ka gayaraabei ladügün lun lamahadun aban gürigia lun ererehani lúmagiñe aban umadaü buiti? Pantaü. Gürigia ha pántabaña hínsiñeti houn lun haganbuni le habusenrunbei haganbun, ru hamuti “hanagan luagu inarüni” (2 Tim. 4:3, 4). Saminatiña memegeiruntiña lan adundehani ladüga samina hamá chútimaati lan hau ani súdinitimatiña lan hawéi amu. Gama lumoun, abürühati apostolu Pábulu: “Lugundun anhein asaminara gürigia luougua luagu wéirigu lan ani ni kata ligía, leyeedaguña lungua” (Gal. 6:3). Afuranguagüda lumuti urúei Salomón katei le buidu. Ariñagati: “Buítimati nibureingili le gudemeti ani chuti lau sügǘ lau urúei wéiyaali gama lumoun ibidiouguati lau, ladüga máhaali lun lererehóuniwa lun” (Apur. 4:13).

12. Ka wafurendeirubei lúmagiñe Féduru lárigiñe waliihani Galasiana 2:11-14?

¹² Samina wamá luagu le ladügübei Féduru dan le meha lererehanbei Pábulu lun hagibugiñe amu (aliiha huméi Galasiana 2:11-14). Gayaraati hamuga lagañidun Féduru luma Pábulu ladüga ligaburi lererehan lun luma luagu ladügüni hagibugiñe amu. Gama lumoun, arufudati Féduru lichú au. Ánhati meha Féduru lun ererehóuni lúmagiñeti Pábulu ani mareidahati meha igarihabu lubá Pábulu. Lubaragiñe lira ariñagarügüti luagu, “waduhe Pábulu le hínsiñebei woun saragu” (2 Fe. 3:15).

13. Ka lunbei gabaroun wamani dan le wíchugun adundehani houn amu?

¹³ Anhein wasaminaruña lubéi wíchugun adundehani lun aban umadaü ka lunbei gabaroun wamani? Lubaragiñe wayanuha luma álügüdagua  wamá woungua: ‘Lásügürüña san lueirin nubuidun’? (Apur. 7:16). Aban gürigia le sügüyati lubuidun, aguseragüdati amu según lisaminan mama según lilurudun Heowá, másiñati marufudun lan gudemehabu. Anhein saminaadiwa lubéi buidu buidu luagun lébuna busén wamá wíchugun adundehani lun wamada ani saminagidiwa mosu lan wadügüni, ariñaga waméi houn ka lan turobulibei ani yusu wamá álügüdahani lun wíderaguniña lun gunfuranda hamani ka lan hacharabei. Lunti wachoururuni wayusurunu Bíbülia dan le wíchigun adundehani houn ani aritagua waméi mama lan woun yu lan waguseragüdüniña wamada lubaragiñe lira íderagua wamaña lun gunfuranda hamani ka lan lasandirubei Heowá luagu le hadügübei (Rom. 14:10). Yusu waméi lichú au le adarirúbei tidan Lererun Bungiu dan le wíchugun adundehani houn gürigia ani áyeiha waméi lugudemehabu Hesusu (Ari. 3:5; Mat. 12:20). Ka uagu? Ladüga lóuserubadiwa Heowá kei ligaburi wóuseruniña amu (Sant. 2:13).

14. Ka tíchugubei lóundarun Heowá woun?

¹⁴ Yusu lumuti Heowá fánreinti le tani lóundarun to yaaboun ubouagu lun ladundehaniwa lidoun üma le anügübei lidoun ibagari. Adügatu lóundarun Heowá bidéu burí, agumeiraguagüdüni luma adamuridaguni le íderagubadiwa lun wawinwanduni adundehani le ñǘbuinbei tídangiñe Lererun. Gayaraati wafiñerun luagu ariñahani le ladüga tídangiñe Bíbülia liabin. Dan le lanúadiruni Musu Úaraguati igaburi le buídutimabei lun wapurichiha adüga lumuti lau lídehan lani Heowá sífiri sandu. Íbini ítara, anihein dan akutiha lumuti le meha lanúadirubei lun larihini anhein anihein lubéi asansiruni le lunbei ladügǘn. Ka uagu? Ladüga ubóu le “lagumuchaguba” ani mosu asansireina tani lóundarun Heowá ligaburi tadügüni katei según leibugún katei ubouagu (1 Ko. 7:31).

15. Ka sügǘ úmabei hagagibudagua fiu íbirigu?

¹⁵ Dan le tíchugun lóundarun Heowá iseri adundehani libügürü ligaburi lafuranguagüdüniwa aban arufudahani tídangiñeti Bíbülia o tíchugun adundehani luáguti laruman ibagari ánhatiwa lun ani adüga wamuti le tariñagubei. Gama lumoun, ka wadügübei dan le tadügün lóundarun Heowá asansiruni le gánibei luma ligaburi wawinwanduni wabagari? Kei hénpulu, lidan burí irumu le ásügürübei serutimahali lebegi tábunawagun luma tounigirún muna burí to wayusuruboun lun wáhuduragun lun Heowá. Ligía líchugubei Musu Úaraguati adundehani libügürü tayusurún Luban Adamuridaguni buidu buidu. Ligíati aba lubéi lóundarun fiu damuriguaü lumoun amu damuriguaü ani aba talugurahóun fiu  Luban Adamuridaguni. Seinsu le asagarúbei lídangiñe talugurún Luban Adamuridaguni burí to, yúsuati lun tábunawagun iseri Luban Adamuridaguni lidan burí fulasu le ñéintima lubéi temegeirúa. Anhein wawinwanduña lubéi lidan aban fulasu le ñein lubéi talugurahóuña lan burí Luban Adamuridaguni ani mosu wóundaragun lumoun amu burí damuriguaü, másiñati hénrengubei lan woun lun wéchudun luagu iseri asansiruni le. Añahein íbirigu, guentó mosu háfayahan dise lun houdin adamuridagua. Íbirigu ha meha ídehabaña lidan tabunawagún o lidan tounigirún aban Luban Adamuridaguni, háfuga álügüdaguatiña houngua ka lan uagu talugurahóuña lubéi. Másiñati samina hamá wesi hamuti lan hadaani lidan hídeha lidan tabunawagún o tounigirún. Íbini ítara ánhatiña lun iseri aransehani le ani lunti wariñagun houn buiti lan hadüga.

16. Ida liña líderaguniwa Kolosana 3:23, 24, lun meferidirun wamani wagundan?

¹⁶ Aban katei le gayaraabei líderaguniwa lun meferidirun wamani wagundan waritagun luagu lun lan Heowá wawadigimarida ani ligía lan adundehabarun lóundarun (aliiha huméi Kolosana 3:23, 24). Ruti meha urúei Dawidi aban lubuidun hénpulu dan le meha líchugubei budagia lun tábunawagun ténpulu. Ariñagati: “Kátañadinagia ani kátañanu numutuniña lun wíchuguba lan katei gíbeti bun? Lidan linarün katei, búmagiñe liabin sun katei, le wibihibei búmagiñe ligía wíchugubei bun” (1 Kro. 29:14). Dan le wíchugun budagia wíchuguña lun Heowá lídangiñe le ru laalibei woun. Íbini ítara gúndaati Heowá dan le wíchuguni wadaani, were luma waseinsun lun wadügüni wadagimanu le labusenrunbei wadügün (2 Ko. 9:7).

17. Ka uagu moun lumuti lubéi wírudagun anhein mosu lubéi wadügün asansiruni?

¹⁷ Lun werederun lidan üma le bürüraübei le anügübei lidoun ibagari mosu wáyeihani Hesusu (1 Fe. 2:21). Mírudagua wamá anhein genege lunbei mosu lan wadügün asansiruni. Buiti katei le, ladüga arufudati busén wamá lun wasigiruni ladundehan Heowá. Subudi lumuti Heowá charatiwa lan ligía magurabun lubéi wafalarubei lan lani Hesusu hénpulu machararunga.

18. Ka lunbei wadügüni lun wibihini ibagari magumuchaditi?

¹⁸ Ligíati, teni wamá lun le lunbei lasuseredun ámuñegü ani aranse wamá lun wadügün asansiruni lidan ligaburi wasaminarun, wagaburi luma ligaburi wadügüni katei (Ari. 4:25; Luk. 9:62). Ítarameme wamá arufuda ǘnabuguni ani adüga waméi le lariñagubei 2 Korintuna 13:11, le ariñagubei: “Gunda humá. Áluga humá lun habuidurun sunsuinagubei lidan higaburi”. Anhein wadüga lira, lúmabadiwa “Bungiu lau lidarangilaü luma línsiñehabu”. Ani líderagubadiwa lun gunda wamá guentó ani líchuguba giñe ibagari magumuchaditi woun lidan iseri ubóu le lunbei liabin.