1. Asegun na Mateo 7:13, 14, porque kita puede habla que ta viaja kita?

TODO kita ta viaja. El diaton destinacion o goal amo que vivi na nuevo mundo bajo na amable rulanza de Jehova. Cada dia, ta pricura kita sigui na camino que ta guia para na vida. Pero, como cosa ya habla si Jesus, diutay el camino y tiene vez dificil con ese sigui. (Le con el Mateo 7:13, 14.) Imperfecto kita y facil lang para kanaton que disvia na este camino.​—Gal. 6:1.

2. Cosa kita hay considera na este articulo? (Mira tambien con el cajon “ El Humildad Ta Ayuda Kanaton Esta na Diutay Camino.”)

² Si quierre kita esta na diutay camino para na vida, debe kita preparao hace cambio na diaton pensamiento, custumbre y accion. Si apostol Pablo ya anima con el maga Cristiano na Corinto que “hace maga necesita cambio.” (2 Cor. 13:11, NWT) Aplicable tambien ese consejo kanaton. Na este articulo hay considera kita si paquemodo el Biblia puede ayuda kanaton hace maga cambio y si paquemodo el mature amigo puede ayuda kanaton para esta na camino para na vida. Hay considera tambien kita si cosa posible hace dificil para kanaton que sigui con el direccion que ya dale el organizacion de Jehova. Mira kita si paquemodo el humildad puede ayuda kanaton hace maga cambio y mentena con el diaton alegria na servicio con Jehova.

3. Paquemodo contigo puede ayuda el Palabra del Dios?

³ Gendeh facil para kanaton que examina con el diaton pensamiento y sentido. Porque? Cay traidor el diaton corazon y dificil para kanaton sabe si onde este ta guia kanaton. (Jer. 17:9) Facil lang que ‘engaña kanaton el diaton mismo cuerpo.’ (Sant. 1:22) Poreso, debe kita usa con el Palabra del Dios para examina con el diaton mismo cuerpo. El Biblia ta revela si quien  gayot kita, el diaton “maga pensamiento y maga intencion del corazon.” (Heb. 4:12, 13) Puede compara con el Palabra del Dios na un X-ray machine que ta ayuda kanaton mira si cosa el talli adentro kanaton. Pero debe kita queda humilde para beneficia kita na consejo estaba na Biblia o na maga representante del Dios.

4. Cosa ta dale mira que ya queda orgulloso si Rey Saul?

⁴ El ejemplo de Rey Saul ta dale mira si cosa posible sucede si gendeh kita humilde. Ya queda bien orgulloso si Saul y gane gendeh le ta admiti maskin na de suyu mismo cuerpo que necesita le cambia con el de suyu pensamiento y accion. (Sal. 36:1, 2; Hab. 2:4) Ya queda este claro cuando si Jehova ya dale especifico direccion con Saul si cosa le debe hace despues hace perde con el maga Amalequita. Pero, nuay obedece si Saul con Jehova. Y cuando ya converza con ele si profeta Samuel acerca con ese, nuay admiti si Saul con el kamali que ya hace le. Sino ya pricura pa le man razon, ya habla que gendeh quel bien serioso cosa y ya menta con otro. (1 Sam. 15:13-24) Antes pa con ese, ya hace ya si Saul igual ansina. (1 Sam. 13:10-14) Maka-triste que ya permiti le con el de suyu corazon queda orgulloso. Nuay le corecta con el de suyu pensamiento poreso ya disciplina con ele y ya hace le perde el favor de Jehova.

5. Cosa kita puede aprende na ejemplo de Saul?

⁵ No quierre kita queda igual con Saul, poreso debe kita pregunta con el diaton mismo cuerpo: ‘Si ta le yo un consejo na Palabra del Dios ta busca ba yo razon para gendeh aplica con ese? Ta pensa ba yo que gendeh gayot malo el cosa yo ta hace? Ta menta ba yo con otro na cosa yo ta hace?’ Si oo el diaton contestacion na uno de ese maga pregunta, debe kita hace cambio na diaton pensamiento y custumbre. Cay si gendeh kita se hace, posible queda orgulloso el diaton corazon y gendeh mas kanaton acepta si Jehova como de suyu amigo.​—Sant. 4:6.

6. Cosa el diferencia de Rey Saul con Rey David?

⁶ Nota con el diferencia de Rey Saul con el quien ya releva con ele, si Rey David, un gente quien ta ama con el “ley de Jehova.” (Sal. 1:1-3) Sabe si David que si Jehova ta salva con el maga humilde pero ta odia con el maga orgulloso. (2 Sam. 22:28) Poreso, ya permiti si David con el ley del Dios que cambia con el de suyu pensamiento. Ele ya escribi: “Hay alaba yo con Jehova, quien ta dale conmigo consejo. Maskin durante el noche, el de con todo hondo pensamiento de mio ta corecta conmigo.”​—Sal. 16:7.

7. Cosa kita hace si humilde kita?

⁷ Si humilde kita, hay permiti kita con el Palabra del Dios que corecta con el diaton gendeh justo pensamiento antes kita actua con ese. El Palabra del Dios puede compara na un voz que ta habla kanaton: “Este el camino. Camina ustedes aqui.” Hay dale este aviso kanaton si ta disvia ya kita na camino​—para na izquierda o para na derecha. (Isa. 30:21) Si oi kita con Jehova, hay beneficia kita na manada manera. (Isa. 48:17) Por ejemplo, puede kita evita que man huya cay tiene kanaton quien ya corecta. Y hay mas queda kita cerca con Jehova cay sabe kita que ta cuida le kanaton como un amable tata.​—Heb. 12:7.

8. Como cosa ya menciona na Santiago 1:22-25, paquemodo kita usa con el Palabra del Dios como un espejo?

⁸ El Palabra del Dios puede queda igual na un espejo. (Le con el Santiago 1:22-25.) Mayoria kanaton ta mira na espejo antes sale na casa. Poreso, puede kita mira si cosa necesita hace cambio antes mira el otro kanaton. Na igual manera, si ta le kita con el Biblia cada dia, puede kita mira si cosa necesita hace  cambio na diaton pensamiento y custumbre. Manada el ya puede realiza que ta puede ayuda kanila si ta le sila con el texto del dia cada aga antes sale na casa. Ta permiti sila que afecta na diila pensamiento el cosa sila ta le. Na entero dia, ta busca sila manera si paquemodo aplica con el consejo estaba na Palabra del Dios. Debe tambien kita estudia con el Biblia cada dia. Dol simple lang este, pero uno este na de con todo importante cosa que puede kita hace para ayuda kanaton esta na diutay camino para na vida.

9. Cuando posible corecta contigo el de tuyu amigo?

⁹ Ya pruba ya ba tu camina na camino que ta hace contigo lejos con Jehova? (Sal. 73:2, 3) Si el un mature amigo ya tiene el coraje para corecta contigo, ya oi ba tu con ele y ya aplica con el de suyu consejo? Si ansina, justo el cosa tu ya hace y asigurao ta aprecia gayot tu con el consejo que ya dale el de tuyu amigo.​—Prov. 1:5.

10. Cosa tu debe hace si el de tuyu amigo ya corecta contigo?

¹⁰ El Palabra del Dios ta hace acorda kanaton: “El maga irida que ya causa el un amigo amo un señal de lealtad.” (Prov. 27:6) Na cosa manera este deverasan? Considera con este ilustracion: Imagina que para travesa tu na calzada y ya queda tu busy na de tuyu cellphone. Ya principia tu cruza que gendeh ta mira. Pero, bigla contigo ya hala el de tuyu amigo para na urilla. Cay todas le ya hala contigo, ya dinigri el de tuyu brazo, pero por causa na cosa le ya hace, nuay tu man bangga. Maskin pa ya duele el de tuyu brazo por cuanto dia, hay rabia ba tu con el de tuyu amigo cay ya hala le contigo? Siempre gendeh! Hay aprecia gayot tu con el de suyu ayuda. Na igual manera, si el de tuyu amigo ya habla contigo que el de tuyu palabra y accion gendeh uyun na principio del Dios, posible sinti tu duele na primero. Pero no rabia que ya conseja le contigo. Gendeh gayot se justo para hace. (Ecl. 7:9) Sino, rindi gracias cay ya tiene animo el de tuyu amigo que man cuento contigo.

11. Cosa posible el causa que el un persona gendeh acepta con el buen consejo del un amigo?

¹¹ Cosa posible el causa que el un persona gendeh acepta con el consejo del un amable amigo? Orgullo. El maga orgulloso gente quierre lang oi ‘el cosa sila quierre oi y ta bira cara con el verdad.’ (2 Tim. 4:3, 4, El Nuevo Testamento) Ta mira sila con el diila mismo cuerpo que mas sabe y mas importante que con otro. Pero, si apostol Pablo ya escribi: “El gente quien ta pensa que ele importante, maskin gendeh le importante, ta engaña con el disuyo mismo cuerpo.” (Gal. 6:3) Si Rey Solomon claro ya explica acerca con este. Ele ya escribi: “Mas bueno pa el un pobre bata pero sabio que con el viejo rey pero nuay juicio y gendeh ta oi consejo.”​—Ecl. 4:13.

12. Cosa kita puede aprende na ejemplo de apostol Pedro como cosa escribido na Galacia 2:11-14?

¹² Nota con el buen ejemplo que ya dale mira si apostol Pedro cuando ya corecta con ele si apostol Pablo na publico. (Le con el Galacia 2:11-14.) Puede era rabia si Pedro na cosa ya habla si Pablo por causa na manera si paquemodo le ya habla con este y si onde le este ya habla. Pero sabio si Pedro. Ya acepta le con el consejo y nuay man sentimiento con Pablo. Gane, ya llama le con Pablo na uliji como un “estimao hermano na fe.”​—2 Ped. 3:15, El Nuevo Testamento.

13. Cosa tu debe pone na pensamiento si ta dale consejo con otro?

¹³ Si ta sinti tu que necesita tu dale consejo con el de tuyu amigo, cosa tu debe pone na pensamiento? Antes atraca con el de tuyu  amigo, pregunta na de tuyu mismo cuerpo, ‘Iyo ba “sobra de recto”?’ (Ecl. 7:16) El un persona que sobra de recto, ta juzga con otro gendeh base na principio de Jehova, sino na de suyu mismo y posible gendeh le lastimoso. Si despues examina con el de tuyu mismo cuerpo y ya mira tu que necesita tu siempre converza con el de tuyu amigo, habla con ele claro si cosa el problema y usa maga pregunta que puede ayuda con el de tuyu amigo realiza si cosa el de suyu kamali. Asigura que el cosa tu hay habla amo base na Escritura y acorda que el de tuyu amigo responsable con Jehova y gendeh contigo. (Roma 14:10) Confia con el sabeduria que puede incuntra na Palabra del Dios y si ta dale consejo, imita con el compasion de Jesus. (Prov. 3:5; Mat. 12:20) Porque? Cay trata kanaton si Jehova igual si paquemodo kita ta trata con otro.​—Sant. 2:13.

14. Cosa ta dale kanaton el organizacion del Dios?

¹⁴ Si Jehova ta guia kanaton na camino para na vida por medio del de suyu organizacion aqui na tierra que ta dale kanaton maga video, publicacion y miting que ta ayuda kanaton todo para aplica con el consejo na Palabra del Dios. Puede confia con este maga informacion cay base este na Biblia. Si ta hace decision si paquemodo mas puede cumpli con el trabajo predicacion, el Cuerpo Gobernante ta depende na sagrao espiritu. Maskin pa ansina, el Cuerpo Gobernante regular tan repaso con el maga decision acerca si paquemodo ta organiza con este trabajo. Porque? Cay “el condicion de este mundo ta cambia” y el organizacion del Dios debe man adjust na maga nuevo circumstancia.​—1 Cor. 7:31, NWT.

15. Cosa maga dificultad ya enfrenta el cuanto maga publisher?

¹⁵ Asigurao ta aplica kita dayun con el direccion que ta ricibi kita acerca na un enseñanza na Biblia o acerca na moralidad. Pero cosa kita hace si el organizacion del Dios ya hace un decision que hay afecta con el otro aspeto del diaton vida? Por ejemplo, ya queda bien subido el gasto na construida y mentenada del maga lugar de adoranza del reciente maga año. Poreso, el Cuerpo Gobernante ya dale direccion que manada congregacion el quien usa con el un Kingdom Hall. Como resulta de este cambio, ya hace junto con el cuanto congregacion y ya vende con el cuanto  maga Kingdom Hall. Ya usa con el sen para ayuda planta maga Kingdom Hall na maga lugar que mas necesita con este. Si ta queda tu na lugar que donde ya vende con el Kingdom Hall y el de ustedes congregacion ya hace junto na otro, posible man dificil tu na de tuyu nuevo circumstancia. El cuanto publisher necesita ya viaja mas lejos para atende na maga miting. El otro quien ya ayuda construi y mentena con el Kingdom Hall, posible pensa si porque vende con este. Posible sila sinti que sayang lang el diila tiempo y esfuerzo. Maskin pa ansina, ta coopera sila na este nuevo arreglamiento y debe kanila comenda.

16. Na cosa manera puede kita mentena con el diaton alegria si aplica kita con el consejo na Colosa 3:23, 24?

¹⁶ Hay mentena kita con el diaton alegria si acorda kita que ta trabaja kita para con Jehova y ele el quien ta guia con el de suyu organizacion. (Le con el Colosa 3:23, 24.) Ya dale buen ejemplo si Rey David cuando ya dona le para na templo. Ele ya habla: “Quien ba yo y quien el de mio maga gente para hace voluntario ofrecimiento igual con este? Cay el todo cosas estaba con uste y ya dale kame con uste el cosa que estaba na de uste mismo mano.” (1 Cron. 29:14) Si ta dale kita donacion, ta dale lang kita con Jehova el cosa le ya dale kanaton. Maskin pa ansina, ta aprecia si Jehova con el diaton tiempo, fuerza y sen que ta dale kita para suporta con el trabajo que quierre le cumpli.​—2 Cor. 9:7.

17. Porque gendeh tu debe man luya si necesita tu man adjust con el de tuyu paso?

¹⁷ Para esta kita na diutay camino para na vida, todo kita debe sigui con el paso de Jesus. (1 Ped. 2:21) Maskin pa que dol necesita tu man adjust con el de tuyu paso, no man luya. Cay sabe tu que necesita tu hace cambio, indicacion se que quierre tu sigui con el direccion de Jehova. Acorda que sabe si Jehova que maga imperfecto kita, poreso gendeh le ta expecta que hace kita exacto igual na cosa ya hace si Jesus.

18. Cosa kita debe hace para alcanza na diaton destinacion?

¹⁸ Ojala, todo kita man focus na futuro y queda preparao que hace cambio na diaton pensamiento, custumbre y accion. (Prov. 4:25; Luc. 9:62) Esta kita humilde y “continua queda alegre, hace maga necesita cambio.” (2 Cor. 13:11, NWT) Si hace kita se, “el Dios de amor y paz hay man junto [kanaton].” Y gendeh lang kita alcanza na diaton destinacion, sino hay queda tambien kita alegre mientras tan viaje.