1. Kulita ni Mateu 7:13, 14, mumu liaka mutuhasa kwamba ngwetu tuli mu umwe wenyi?

YETWESWE tuli mu umwe wenyi. Songo lia wenyi wetu lili kunjila mu chifuchi chaha ni kutwama mu unguvulu wa Yehova. Hita tangwa, twakusa tachi hanga twende mu jila yize yakutwala ku mwono. Alioze ngwe chize Yesu ambile, jila yacho yikehe kashika ha mashimbu amwe hi chashi ko kwendamo. (Tanga Mateu 7:13, 14.) Amu tuli yihenge, kashika muchihasa kupwa chashi kukondoloka mu jila yacho.—Ngala. 6:1.

2. Yika mutulilongesa ha mutwe uno? (Tala mushete, “ Kulikehesa Muchihasa Kutukwasa Kwalumuna Yitanga Yetu.”)

² Nyi tunazange kununga mu jila yikehe, twatamba kutayiza kwalumuna manyonga jetu, kupwa chetu ni yitanga yetu. Postolo Paulu kakolwezele akwa-Kristu mu Korindu hanga anunge ni kwalumuna yimwe ku mwono wo. (2 Kori. 13:11) Utowezo uno unatale nawa hali yetu musono. Ha mutwe uno, mutulilongesaho chize Mbimbiliya muyihasa kutukwasa kwalumuna yimwe ku mwono wetu, ni chize masepa waze ajama mahasa kutukwasa kununga mu jila ya mwono. Mutulilongesa nawa yize muyihasa kukaliwisa kukaula usongwelo uze Yehova akutwaha kupalikila mu ululikiso wenyi. Mutumona chize kulikehesa muchisa kutukwasa kwalumuna yimwe ku mwono wetu, chakuhona kutokesa uwahililo mu mulimo wa Yehova.

3. Kuchi Liji lia Zambi mulihasa kutukwasa?

³ Hi chashi ko kuhengwola manyonga jetu ni chize twakwivwa. Mumu liaka? Mumu mbunge yetu kuyakwonga, kashika muchihasa kupwa chikalu kunyingika kuze mbunge yetu yinatutondekeza. (Jere. 17:9) Chikwo nawa, chili chashi ‘kulionga yetwene.’  (Tia. 1:22) Kashika, twatamba kuzachisa Liji lia Zambi hanga litukwase kulihengwola. Liji lia Zambi kuliakusolola chize twapwa mu mbunge “kuliakusa chinyingi ha manyonga ni kuhala cha mu mbunge.” (Hepre. 4:12, 13) Mbimbiliya yakutukwasa kumona yuma yize kutushi kuhasa kumona ni meso. Alioze, nyi tunazange kuyuka ha yiyulo ya mu Mbimbiliya ni yize twakutambula kuli waze akumanyinako Zambi, twatamba kupwa akwa-kulikehesa.

4. Kuchi tunanyingika ngwetu, Mwanangana Saulu kapwile mukwa-kulizata?

⁴ Chilweza cha Mwanangana Saulu chinasolola yize muyihasa kulingiwako nyi kutushi kulikehesa. Kulizata chatwalile Saulu kuhona kutayiza ngwenyi, te kanafupiwa kwalumuna yimwe ku mwono wenyi. (Samu 36:1, 2; Haba. 2:4) Chino chasolokele muze Yehova ahanyine kuli Saulu usongwelo uze te atamba kukaula hanyima lia kukumba jita ni A-Amaleke. Alioze, Saulu yecha kwononokena Yehova. Muze profeta Samuele ahanjikile nenyi hakutwala ku chikuma chacho, Saulu yalikala uhenge uze alingile. Iye yalelesa upi uze alingile ni kulamikiza akwo ngwenyi, o e amushinjilile kulinga chuma chacho. (1 Samue. 15:13-24) Chino hi chisuho chitangu ko chize Saulu alingile chuma chamutapu au. (1 Samue. 13:10-14) Saulu kechele kulizata hanga chinunge mu mbunge yenyi, nawa kakatayijile kwalumuna manyonga jenyi, hachino Yehova yalitunayo.

5. Yika mutuhasa kulilongesa ha chilweza cha Saulu?

⁵ Nyi kutwazangile kupwa ngwe Saulu twatamba kulihula ngwetu: ‘Muze nakutanga Mbimbiliya, shina nakufupa uchinyino hanga nguhone kukaula yize ngunatange? Nakulelesa yuma yipi yize nakulinga ni kunyonga ngwami hi yipi ko? Nakulamikiza akwetu ha yuma yize nakulinga?’ Nyi ngwe twakumbulula chimwe cha ku yihula yino ngwetu ewa, twatamba kwalumuna manyonga ni yitanga yetu. Nyi ka, mbunge yetu muyizala too ni kulizata, hachino Yehova kechi kututayiza kupwa masepa jenyi.—Tia. 4:6.

6. Lumbununa kalisa uli hakachi ka Saulu ni Ndawichi.

⁶ Tutalenu kalisa hakachi ka Saulu ni Ndawichi yoze wamusalakanyine. Ndawichi kapwile lunga yoze te wakuzanga “shimbi ja Yehova.” (Samu 1:1-3) Ndawichi kanyingikine ngwenyi, Yehova kakulamwina atu waze alikehesa, alioze kakulimika ni akwa-kulizata. (2 Samue. 22:28) Ndawichi kechele shimbi ja Zambi hanga jalumune manyonga jenyi. Yasoneka ngwenyi: “Mungusakwilila Yehova, yoze hanangulongesa mana: chipwe ha ufuku mbunge yami kuyakungufumba.”—Samu 16:7.

7. Nyi twapwa akwa-kulikehesa yika mutulinga?

⁷ Nyi twapwa akwa kulikehesa, mutwecha hanga Liji lia Zambi lilulamise manyonga jetu api shimbu kanda atutwala kulinga yuma yipi. Nyi twachilinga, Mbimbiliya muyipwa ngwe liji lize liakutulweza ngwo: “Ye jila yino; endelenumo.” Mbimbiliya muyitutoweza muze tunambe kukondoloka ku chindume hanji ku chimeso. (Iza. 30:21) Nyi twapanjika Yehova, mutuyuka chinji. (Iza. 48:17) Chakutalilaho, mutwehuka kwivwa sonyi ja kutufumba kuli akwetu. Mutukundama kuli Yehova mumu tunanyingika ngwetu, iye kakutuzanga ngwe Tata wa zango.—Hepre. 12:7.

8. Ngwe chize anasolola ha Tiangu 1:22-25, kuchi mutuhasa kuzachisa liji lia Zambi ngwe katalilo?

⁸ Mbimbiliya muyihasa kupwa ngwe katalilo kuli yetu. (Tanga Tiangu 1:22-25.) Anji a kuli yetu twakulitala ha katalilo chimenemene shimbu kanda tukatuka ku zuwo. Chino chakutukwasa kululieka haze hanapiha, shimbu akwetu kanda achitumona. Chizechene nawa, nyi twatanga Mbimbiliya hita tangwa, mutumona jila yakululiekelamo manyonga ni yitanga yetu. Amwe kakuzanga kutanga chisoneko cha ha tangwa chimenemene shimbu kanda achikatuka ku zuwo. Ayo kakwecha hanga yize anatange yikwate ha manyonga jo. Hachino, ha kupalika cha tangwa, o kakufupa majila a kusa mu yitanga  yize atanganga mu liji lia Zambi. Chikwo nawa, twatamba kupwa ni chako cha kutanga Mbimbiliya hita tangwa ni kupukuna ha yize twakutanga. Chino muchihasa kusoloka ngwe chuma chamokomoko, alioze chili chuma chilemu chinji chize twatamba kulinga mba tuhase kununga mu jila ya mwono.

9. Ha shimbu lika sepa lie mahasa kukwaha chiyulo?

⁹ Shina hiunalingi chimwe chuma chize chambile kupihisa usepa we ni Yehova? (Samu 73:2, 3) Nyi umwe sepa lie wajama kahamukine ni kukukwasa, shina wakawile chiyulo chenyi? Nyi chenacho, walingile chuma chalita. Chikwo nawa, kota unakasakwilila ha ukwaso uze akuhele kuli sepa lie.—Yishi. 1:5.

10. Yika watamba kulinga nyi umwe sepa makwaha chiyulo?

¹⁰ Mbimbiliya yakutwiwulula ngwo: “Mbandu ja kasendo kujapwa ja kukwasa, alioze mbeju ja mukwa kole kujapwa ja kwonga.” (Yishi. 27:6) Maliji wano yika analumbunuka? Tutalenu chilweza chino: Achinyonga ngwe unazange kutangunuka tapalo muze mwakupalika mashinyi anji, alioze yena unalaluka ni telefone. Hachino munjila mu tapalo chakuhona kutala sali-ni-sali, mba sepa lie makukwata ku kwoko makukokela ku sesa lia tapalo. Amu akukwatanga ni tachi, kwoko lie yilihikuka, alioze chuma chize iye alinga chalamwina mwono we ku mashinyi waze ambanga kukuwonda. Chipwe ngwe kwoko lie liahikukanga ha kukukoka, shina mulivutula ni sepa lie yoze wakuchizanga mu tapalo? Ka! Yena musakwilila ha ukwaso wenyi. Chizechene nawa, nyi umwe sepa makutoweza hakutwaka ku yitanga yize kuyalitele ni shimbi ja Zambi, ku uputukilo muhasa kwivwa chinyengo. Alioze kuwatambile kwivwa uli mumu lia chiyulo chize akwaha. Kulinga chino chili uhepuke. (Chilu. 7:9) Watamba kusakwilila sepa lie ha kuhamuka hanga ahanjike ni yena.

11. Yika muyihasa kutwala umwe mutu kulituna chiyulo cha sepa lienyi?

¹¹ Yika muyihasa kutwala umwe mutu kulituna chiyulo cha sepa lienyi? Kulizata. Atu waze akulizata kakwete “matwi a kuzwa.” Ayo kakutewulula “matwi jo ku umwenemwene.” (2 Timo. 4:3, 4) Ayo kakumona ngwe kafupiwile chiyulo cha akwo mumu kakulimona ngwe kalongoloka chinji kuhiana akwo hanji ngwo kali alemu chinji. Kashika postolo Paulu asonekene ngwenyi: “Nyi kachi mutu malishinginyeka kupwa chimwe, muze iye hi chimwe ko, kanaliongo iye mwene.” (Ngala. 6:3) Mwanangana Solomone kalumbunwine kanawa chikuma chino. Yamba ngwenyi: “Mukweze chiswale ni mana shinaho, mwanangana mukulwana kunyima nyi mapwa chihepuke keshi kutaa kumulongesa nawa.”—Chilu. 4:13.

12. Yika mutuhasa kulilongesa ha chilweza chize postolo Petulu ahichikile, ngwe chize anasolola ha A-Ngalashia 2:11-14?

¹² Achinyonga ha yize postolo Petulu alingile muze postolo Paulu amuhele chiyulo kulutwe lia atu akwo. (Tanga A-Ngalashia 2:11-14.) Petulu kachi kevwile uli ha yize Paulu ambile ni kulihulikila ha chize amukumikine kumeso ja mbunga. Alioze Petulu kapwile mukwa-mana. Iye yatayiza chiyulo, kevwilile Paulu uli hanji kulihulikila ha chize amuhele chiyulo chacho. Kulutwe Petulu yavuluka Paulu ngwenyi: “Ndumbwetu wa zango.”—2 Petu. 3:15.

13. Yuma yika twatamba kwiwuluka shimbu kanda tuhana chimwe chiyulo?

¹³ Nyi ngwe unazange kuhana chimwe chiyulo kuli sepa lie, yika watamba kunyonga chitangu? Shimbu kanda uchiya ni kuhanjika ni sepa lie, lihule ngwe: ‘Shina ngunapu chinji “mukwa ululi”?’ (Chilu. 7:16) Mutu yoze wapwa chinji mukwa-ululi, kakupatwila akwo, keshi kuchilinga ni shimbi ja Zambi alioze ni shimbi jenyi mwene. Kanji-kanji atu apwa chize keshi keke. Nyi walihengwola kanawa mba mumona ngwe nihindu chinafupiwa kuhanjika ni  sepa lie, mulweze chikuma chacho ni kumuhula yihula yize muyimukwasa kumona ngwo chuma chize alinga chili chipi. Alioze pwako ni shindakenyo ngwe yize muhanjika yinakatuka mu Mbimbiliya, chikwo nawa iwuluka ngwe kuushi ni chiteli cha kupatwila sepa lie, alioze cha kumukwasa kumona chize Yehova evwa ha yuma yize alinga. (Roma 14:10) Jikijila ha mana a mu Liji lia Zambi, chikwo nawa muze muhana chiyulo kuli mukwenu, imbulula keke ya Yesu. (Yishi. 3:5; Mateu 12:20) Mumu liaka? Mumu Yehova makalinga ni yetu chizechene twakulinga kuli akwetu.—Tia. 2:13.

14. Yuma yika ululikiso wa Yehova wakutwaha?

¹⁴ Yehova kakutusongwela mu jila ya mwono kupalikila mu ululikiso wenyi, uze wakutwaha yinema, mikanda ni kukunguluka chize chakutukwasa kukaula shimbi ja mu Liji lienyi. Mutuhasa kufuliela ha ukwaso uno mumu wakukatuka mu Mbimbiliya. Muze Chizavu cha Tusongo chakukwata yiyulo ya chize mulimo wa kwambujola watamba kwenda, ayo kakwita ukwaso wa spiritu yisandu ya Zambi. Chipwe chocho, Chizavu cha Tusongo chakuhengwola hanga atale nyi kuli yimwe yize yinafupiwa kwalumuna. Mumu liaka? “Mumu che kupwa cheswe cha hashi kuchinayi nikuhwa.” Kashika, ululikiso wa Yehova watamba kwalumuna yuma kulita ni mashimbu.—1 Kori. 7:31.

15. Kapinda muka akwa-kwambujola amwe akupwa nenyi?

¹⁵ Yetu twakutayiza ni kukaula kwalumuka cheswe chize chakulingiwa mu ululikiso wa Yehova hakutwala ku malongeso a mu Mbimbiliya hanji yuma yikwo. Alioze yika twakulinga muze ululikiso wa Yehova wakwalumuna yuma yimwe yize muyihasa kukwata ku mwono wetu? Chakutalilaho, ha miaka yino kutunga ni kutungulula Mazuwo ja Wanangana chinapu ni kufwika mbongo jinji. Kashika, Chizavu cha Tusongo chahanyine usongwelo hanga yikungulwila yinji yizachise Zuwo limuwika lia Wanangana. Hachino, yikungulwila yimwe yiyilichinga mu Zuwo limuwika lia Wanangana, akwo yaalanjisa. Mbongo jize jejileko kakujizachisa hanga atunge Mazuwo a Wanangana ku yihela kuze kunafupiwa Mazuwo a Wanangana. Nyi watwama ku yihela yize Mazuwo a Wanangana anapu kulanjisa ni kuchinga yikungulwila, muchihasa kupwa chikalu kukaula usongwelo wacho. Haliapwila, akwa-kwambujola amwe kakwenda tando jisuku mba ahete ku Zuwo lia Wanangana. Alioze mandumbu waze akusa tachi hanga atunge  ni kutungulula Mazuwo ja Wanangana mahasa kulihula nyi mumu liaka anapu kulanjisa. Mahasa kumona ngwe mashimbu ni tachi jo jalitokela. Chipwe chocho, ayo kakutayiza ni kukwasa kwalumuka chacho, kashika twatamba kwachichimieka.

16. Kuchi kukaula chiyulo chili ha A-Kolosu 3:23, 24, muchitukwasa kununga ni kuwahilila?

¹⁶ Alioze nyi twewuluka ngwetu twakukalakalila Yehova, nawa ngwetu iye mwe unasongwela ululikiso wenyi, mutununga ni kuwahilila. (Tanga A-Kolosu 3:23, 24.) Mwanangana Ndawichi kahichikile chilweza chipema hakuhana milambu hanga atungise tembele. Yamba ngwenyi: “Yami kuchi napwa, ni atu jami kuchi apwa hinwatuhashisa kuhana ni mbunge milambu yipwahaha? Mumu yuma yeswe kuli yenu yinakatuka, kashika upite wa yenu ene hitwanuhilwisawo.” (1 Sango 29:14) Muze twakuhana milambu, twakuhilwisa yize Yehova hanatwehe. Chipwe chocho, Yehova kakuwahilila ha mashimbu, tachi ni milambu yetu yize twakuhana hanga tukwase mulimo wenyi.—2 Kori. 9:7.

17. Mumu liaka kuwatambile kuhonga nyi munyingika ngwe watamba kwalumuna yimwe ku mwono we?

¹⁷ Mba tununge mu jila ya mwono, tulieswe twatamba kwimbulula chilweza cha Yesu. (1 Petu. 2:21) Nyi mumona ngwe unafupiwa kwalumuna yimwe ku mwono we, kanda uhonga. Kunyingika ngwe unafupiwa kwalumuna yimwe ku mwono we, chakusolola ngwo unazange kwenda mu jila ya mwono. Kanda uvulama ngwe Yehova kananyingika ngwenyi yetu tuli yihenge, kashika iye keshi kushimbwila hanga twimbulule chilweza cha Yesu ni ungunu weswe.

18. Yika twatamba kulinga mba tumanunune wenyi wetu?

¹⁸ Tulieswe tusenu tachi hanga tulihulikile ku yuma ya kulutwe lia matangwa ni kununga ni kwalumuna manyonga jetu, kupwa chetu ni yitanga yetu. (Yishi. 4:25; Luka 9:62) Tunungenu ni kulikehesa, ‘kuwahilila ni kupwa atu aze hakola” ha kwalumuna mwono wetu. (2 Kori. 13:11) Nyi twachilinga, “Zambi ya zango ni sambukila kumakapwa hamwe ni [yetu].” Chikwo nawa, mutuwahilila mu wenyi wetu ndo mu chifuchi chaha.