1. Dapre Matye 7:13, 14, dan ki sans nou lo en vwayaz?

NOU tou nou lo en vwayaz. Nou tou nou pe travay dir pour servi Zeova pour nou kapab viv dan nouvo lemonn anba dominasyon Zeova. Sak zour, nou esey mars lo sa semen ki anmenn ver lavi. Zezi ti dir ki parfwa sa semen i difisil pour mars lo la. (Lir Matye 7:13, 14.) Vi ki nou enparfe, i fasil pour nou kit sa semen.​—Gal. 6:1.

2. Ki nou pou diskite dan sa lartik? (Vwar bwat “ Ler nou annan limilite sa i kapab ed nou fer bann sanzman.”)

² Si nou anvi reste lo sa semen difisil ki anmenn ver lavi, nou devret pare pour sanz nou fason panse, latitid ek aksyon. Zapot Pol ti ankouraz bann Kretyen ki ti pe reste Korent, pour kontinyen “les zot ganny redrese.” (2 Kor. 13:11) Sa konsey i osi aplik pour nou. Dan sa lartik, nou pou diskit lo ki mannyer Labib i kapab ed nou pour fer bann sanzman e ki mannyer nou bann zanmi ki matir spirityelman i kapab ed nou reste lo sa semen ki anmenn ver lavi. Nou pou osi vwar kwa ki kapab fer li difisil pour nou swiv lenstriksyon sorti kot lorganizasyon Zeova. Nou pou vwar ki mannyer ler nou annan limilite, sa i kapab ed nou fer bann sanzman san ki nou perdi nou lazwa.

3. Ki mannyer Parol Bondye i kapab ed ou?

³ I pa fasil pour nou egzamin nou prop panse ek santiman. Akoz? Parski nou leker i tret e sa i kapab fer li difisil pour nou konnen kwa ki i pou motiv nou pour fer. (Zer. 17:9, NWT) I fasil pour anbet nou lekor avek bann “fo rezonnman.” (Zak 1:22) Alor, nou bezwen servi Parol Bondye pour egzamin nou lekor. Parol Bondye i kapab ed  nou konn nou “panse ek lentansyon” pli profon. (Ebr. 4:12, 13) Parol Bondye i kapab ganny konpare avek en masin ki fer X-ray parski i permet nou vwar bann keksoz ki nou pa kapab vwar avek nou lizye. Me pour nou kapab aplik bann konsey ki sorti dan Labib oubyen ki nou gannyen avek bann ki pe reprezant Bondye, nou bezwen annan limilite.

4. Kwa ki montre ki Lerwa Sail ti vin orgeye?

⁴ Legzanp Lerwa Sail i montre nou ki i kapab arive ler nou napa limilite. Sail ti vin sitan orgeye ki i pa ti oule admet ki i ti bezwen sanz son fason panse ek aksyon. (Ps. 36:1, 2, NWT; Aba. 2:4) Par egzanp, ler Zeova ti dir Sail ki i devret fer apre ki in ranport laviktwar lo bann Amalekit, Sail pa ti obei Zeova. Ler Samyel ti koz avek li konsernan sa ki i ti’n fer, Sail pa ti oule admet ki i ti’n fer en fot. O kontrer, i ti esey zistifye son aksyon e blanm lezot. (1 Sam. 15:13-24) Pli boner, Sail ti’n fer en keksoz parey. (1 Sam. 13:10-14) Malerezman, i ti les lorgey devlope dan son leker. I pa ti sanz son fason panse alor Zeova ti reprimann li e rezet li.

5. Ki nou kapab aprann avek legzanp Sail?

⁵ Vi ki nou pa anvi vin parey Sail, nou devret demann nou lekor sa bann kestyon swivan: ‘Ler mon lir Parol Bondye, eski mon rod leskiz pour pa aplik sa ki mon’n lir? Eski mon krwar ki sa ki mon pe fer pa sitan mal? Eski mon blanm lezot pour sa ki mon pe fer?’ Si nou larepons pour sa bann kestyon i wi, nou devret sanz nou fason panse. Si nou pa fer sa, nou kapab vin sitan arogan ki Zeova i rezet nou konman son zanmi.​—Zak 4:6.

6. Ki diferans i annan ant Lerwa Sail ek Lerwa David?

⁶ Annou vwar diferans ant Lerwa Sail ek Lerwa David. David ti kontan “lalwa [Zeova].” (Ps. 1:1-3) David ti konnen ki Zeova i sov bann ki annan limilite me i opoz bann ki arogan. (2 Sam. 22:28, NWT) Alor David ti les lalwa Bondye sanz son fason panse. I ti ekri: “Mon loue [Zeova] ki konsey mwan. Mon konsyans i gid mwan, menm dan lannwit.”​—Ps. 16:7.

7. Si nou annan limilite, ki nou pou fer?

⁷ Si nou annan limilite, nou pou les Parol Bondye sanz nou bann move panse avan ki nou fer bann move aksyon. Parol Bondye pou parey en lavwa ki dir nou: “La semen; swiv li.” I pou averti nou si nou konmans fer en keksoz mal. (Iza. 30:21) Ler nou ekout Zeova nou ganny bokou byenfe. (Iza. 48:17) Par egzanp, nou pa pou anbarase akoz en lot dimoun i bezwen koriz nou. Osi, nou pou vin pli pros avek Zeova akoz i pran swen avek nou parey en papa ki kontan nou.​—Ebr. 12:7.

8. Dapre Zak 1:22-25, ki mannyer nou kapab servi Parol Bondye parey en laglas?

⁸ Parol Bondye i kapab parey en laglas pour nou. (Lir Zak 1:22-25.) Laplipar nou i get dan laglas tou le bomaten avan nou kit kot nou. Sa i permet nou vwar si nou bezwen sanz en keksoz avan ler lezot dimoun i vwar nou. Pareyman, ler nou lir Labib toulezour, nou pou vwar bann fason ki nou kapab sanz nou fason panse ek latitid. Bokou dimoun i vwar ki zot in ganny bann byenfe ler zot lir teks pour lazournen dan bomaten avan ler zot kit kot zot. Zot les sa ki zot lir annan en lefe lo zot fason panse. Apre, pandan lazournen zot rod fason pour aplik sa konsey sorti dan Parol Bondye. Osi, nou bezwen etidye e medit lo Parol Bondye toulezour. Sa i kapab paret fasil pour fer me i enn bann keksoz pli enportan ki nou  kapab fer pour ed nou reste lo sa semen difisil ki anmenn ver lavi.

9. Akoz en zanmi pou konsey ou?

⁹ Eski ou’n deza konmans fer bann keksoz ki ti pe gat ou lanmitye avek Zeova? (Ps. 73:2, 3) Si en zanmi ki matir spirityelman in annan kouraz pour donn ou en konsey, eski ou ti ekout li e aplik son konsey? Si ou’n fer li, ou’n fer en bon keksoz e san dout, ou rekonesan ki ou zanmi in averti ou.​—Prov. 1:5.

10. Ki mannyer ou devret reakte si ou zanmi i donn ou en konsey?

¹⁰ Parol Bondye i dir: “Menm si i bles ou, konsey en zanmi i montre ki i fidel.” (Prov. 27:6, NWT) Ki sa i vedir? Annou vwar en legzanp: Meton ou pe al koup semen kot i annan bokou trafik e ou pe get lo ou telefonn. Ou konmans koup semen san get otour ou. En sel kou, en zanmi i tyonbo ou lebra e i redi ou lo trotwar. I’n tyonbo ou sitan for ki ou lebra i fermal me son aksyon in anpes ou ganny tape avek en loto. Menm si ou lebra i fermal pour detrwa zour, eski ou pou ankoler avek ou zanmi? Definitivman non! Ou pou rekonesan pour son led. Pareyman, si en zanmi i dir ou ki ou parol oubyen ou aksyon pa an armoni avek bann standar drwat Bondye, i kapab ki sa pou bles ou. Me pa ankoler oubyen ofanse akoz i’n donn ou sa konsey. Sa ti pou en keksoz bet pour fer. (Ekle. 7:9) O kontrer, ou devret rekonesan ki ou zanmi in annan kouraz pour koz avek ou lo la.

11. Kwa ki kapab fer en dimoun rezet en bon konsey sorti kot en zanmi?

¹¹ Kwa ki kapab fer en dimoun rezet en bon konsey sorti kot en zanmi ki kontan li? Lorgey. Bann dimoun ki orgeye i kontan ler dimoun i dir zot “sa ki zot oule tande.” Zot “aret ekout laverite.” (2 Tim. 4:3, 4) Zot krwar ki zot pa bezwen konsey akoz dapre zot, zot pli saz oubyen pli enportan ki lezot. Par kont, zapot Pol ti ekri: “Si en dimoun i krwar i enportan me i en nanryen ditou, i pe anbet son prop lekor.” (Gal. 6:3) Lerwa Salomon ti eksplik sa byen, ler i ti dir: “Plito en zenn garson pov me saz, ki en vye lerwa fou ki nepli kapab ekout konsey.”​—Ekle. 4:13.

12. Ki nou kapab aprann avek legzanp zapot Pyer ki dan Galat 2:11-14?

¹² Annou vwar legzanp zapot Pyer ler zapot Pol ti koriz li an piblik. (Lir Galat 2:11-14.) Pyer ti’n kapab ankoler avek sa ki Pol ti’n dir akoz lafason ek landrwa ki Pol ti’n koz avek li. Me Pyer ti saz. I ti aksepte sa konsey e i pa ti gard rankin avek Pol. O kontrer, pli tar ler i ti pe koz lo Pol, i ti dir: “Nou frer Pol ki nou kontan.”​—2 Pyer 3:15.

13. Ki ou bezwen gard antet ler ou pe donn konsey en dimoun?

¹³ Ki ou bezwen gard antet si ou santi ki ou bezwen donn konsey en zanmi? Avan ou koz avek ou zanmi, demann ou lekor: ‘Eski mon pe azir “tro zis”?’ (Ekle. 7:16) En dimoun ki tro zis i ziz lezot dapre son prop standar e pa dapre standar Zeova. I kapab ki en dimoun koumsa napa pitye pour lezot. Si apre ki ou’n egzamin ou prop lekor ou vwar ki ou ankor bezwen konsey ou zanmi, dir li ki problenm e demann bann kestyon ki pou ed li konpran kwa ki i’n fer ki mal. Fer sir ki sa ki ou dir i sorti dan Labib e gard antet ki ou napa drwa ziz ou zanmi me ou devret ed li konpran ki mannyer Zeova i santi  konsernan sa ki i pe fer. (Rom. 14:10) Depan lo lasazes ki sorti dan Labib e ler ou pe konsey en dimoun, swiv legzanp Zezi e demontre konpasyon. (Prov. 3:5; Mat. 12:20) Akoz nou bezwen fer sa? Parski Zeova pou azir avek nou dan menm fason ki nou, nou azir anver lezot.​—Zak 2:13.

14. Ki lorganizasyon Bondye i donn nou?

¹⁴ Zeova i servi sa parti son lorganizasyon ki lo later pour gid nou lo sa semen ki anmenn ver lavi. Son lorganizasyon i servi bann video, piblikasyon ek renyon pour ed nou tou aplik bann konsey ki sorti dan Parol Bondye. Sa bann lenformasyon i diny konfyans akoz zot baze lo bann verse Labib. Ler Konsey Direkter i fer bann desizyon konsernan sa pli bon fason pour fer sa travay predikasyon, zot depan lo led lespri sen. Kantmenm sa, Konsey Direkter i revwar sa bann desizyon regilyerman pour vwar si zot bezwen fer serten sanzman konsernan sa travay predikasyon. Akoz sa? Parski lemonn pe sanze e lorganizasyon Bondye i bezwen adapte avek bann nouvo sirkonstans.​—1 Kor. 7:31.

15. Ki difikilte serten proklanmater in fer fas avek?

¹⁵ Ler lorganizasyon Bondye i donn nou bann leklersisman konsernan bann lansennyman ki dan Labib oubyen bann lenstriksyon konsernan standar moral, nou aksepte e aplik li. Me ki nou fer ler lorganizasyon Bondye i fer en sanzman ki annan lefe lo lezot laspe nou lavi? Par egzanp, dan sa bann dernyen lannen in vin pli ser pour konstri e mentenir bann landrwa ladorasyon. Alor Konsey Direkter in demande ki bann Lasal Rwayonm i ganny servi par plis kongregasyon posib. I pour sa rezon akoz plizyer kongregasyon in zwenn ansanm e serten Lasal Rwayonm in ganny vann. Sa larzan i ganny servi pour ede konstri bann lasal dan bann landrwa ki pli dan bezwen. Si ou reste dan en landrwa kot bann lasal pe ganny vann e bann kongregasyon pe zwenn ansanm, ou kapab vwar li difisil pour adapte avek sa bann sanzman. Akoz sa bann sanzman, serten proklanmater i bezwen vwayaz pli lwen pour asiste renyon. Lezot ki’n travay dir pour  konstri oubyen mentenir en Lasal Rwayonm i kapab demande akoz sa lasal pe ganny vann. Zot kapab santi ki zot in gaspiy zot letan ek lenerzi. Me kantmenm sa, zot aksepte sa nouvo laranzman e nou devret felisit zot pour sa.

16. Ki mannyer ler nou aplik sa konsey dan Kolosyen 3:23, 24, sa i kapab ed nou pour kontinyen reste zwaye?

¹⁶ Nou pou kontinyen reste zwaye si nou gard antet ki tou sa travay ki nou fer i pour Zeova e ki i pe diriz son lorganizasyon. (Lir Kolosyen 3:23, 24.) Lerwa David ti kit en bon legzanp pour nou ler i ti donn larzan pour konstri tanp. I ti dir: “Ki mon ete e ki mon pep i ete pour ki nou kapab fer lofrann volonter koumsa? Parski tou keksoz i sorti kot ou e sa ki nou’n donn ou, i sorti dan ou prop lanmen.” (1 Kron. 29:14, NWT) Ler nou fer kontribisyon volonter, nou osi nou pe donn Zeova sa ki li menm in donn nou. Zeova i kontan ler nou donn nou letan, lenerzi ek resours pour fer son travay.​—2 Kor. 9:7.

17. Akoz ou pa devret dekouraze si ou bezwen redres ou lekor?

¹⁷ Pour nou kapab reste lo sa semen ki anmenn ver lavi, nou tou nou bezwen swiv legzanp Zezi fidelman. (1 Pyer 2:21) Si ou vwar ki ou bezwen redres ou lekor, pa dekouraze. Sa i en bon siny parski i montre ki ou anvi swiv gidans Zeova. Pa oubliye ki Zeova i konnen ki nou enparfe. Alor i pa ekspekte ki nou swiv legzanp Zezi parfetman.

18. Ki nou bezwen fer pour atenn nou lobzektif?

¹⁸ Nou tou annou konsantre lo lavenir e pare pour sanz nou fason panse, nou latitid ek nou bann aksyon. (Prov. 4:25, NWT; Lik 9:62) Annou kontinyen annan limilite, ‘kontinyen gard nou lazwa, kontinyen les nou ganny redrese.’ (2 Kor. 13:11) Si nou fer sa, “Bondye lanmour ek lape i ava avek [nou].” I pou ed nou pour annan lazwa la konmela e i pou donn nou lavi eternel dan sa nouvo lemonn.