1. Thenge la Mataio 7:13, 14, pine nemene matre kola aceitunëne la mele ne la Keresiano memine la kola ihamë?

 IJIJE hi tro sa aceitunëne la mele ne la Keresiano memine la kola ihamë. Ekaa la hne së hna tro kow? Easa tro kowe la fene ka hnyipixe hna musinën hnei Iehova, Akötresie ka tru ihnimin. Easë palahi a thele troa lapa ngöne la gojeny ka tro kowe la mel ka pë pun. Hnei Iesu hna qaja ka hape, ka ilitre la gojeny nge jole troa trongën. (E jë la Mataio 7:13, 14.) Ketre, tha ka pexeje kö së, matre canga tro hi sa jea qa ngöne la gojenyi ne mel.—Gal. 6:1.

2. Nemene la hne së hna troa ce wang ngöne la tane mekun celë? (Wange ju la hna eköhagen hna hape, “ Troa Hetre Hni Ne Ipië Matre Lapa Ngöne La Gojeny Ka Ilitr.”)

² Maine easa ajane troa lapa ngöne la gojenyi ne mel, loi e tro sa saze la mekuna së me aqane ujë së. Hnei Paulo hna ithuecatre kowe la itre Keresiano ne Korinito troa “wenë amekötine la itre mekuna” i angatr. (2 Kor. 13:11) Ketre eamo lai ka lolo koi së enehila. Ame ngöne la tane mekun celë, tro sa ce wang la aqane tro la Tusi Hmitrötr a xatua së troa saze, memine la aqane troa xatua së hnene la itre Keresiano ka macaj troa lapa ngöne la gojenyi ne mel. Tro fe sa ce wang la itre ijine ka jole koi së troa trongëne la itre hna amekötin hnene la organizasio i Iehova. Nge tro sa qejepengöne la ketre thiina ka lolo, ene la troa hetre hni ne ipië. Ej a troa xatua së troa madrin ngacama easa saze la mele së.

3. Nemene la aqane troa xatua së hnei Tusi Hmitrötr?

³ Tha ka hmaloi kö koi së troa waipengöne la itre mekuna së me itre aliene hni së. Pine nemen? Pine laka, ka iaö la hni së. Thatre kö së ka hape, ka loi maine ka ngazo la hne  së hna kuca. (Iere. 17:9) Ijije hi troa amenu së hnene la “itre mekune ka tria.” (Iako. 1:22) Celë hi matre nyipiewekë tro sa isa waipengö së jëne la Tusi Hmitrötr. Ej a amamane la “itre mekun me itre aja ne la hni” së. (Heb. 4:12, 13) Tune la ketre scanner, Tusi Hmitrötr a amamane la itre ewekë ka ej e kuhu hni së. Ngo loi e tro sa hetre hni ne ipië matre kepe thangane qa ngöne la itre eamo hna hamën hnei Tusi Hmitrötr maine itre hna acil hnei Akötresie.

4. Nemene la ka amamane laka, ka pi tru Saulo?

⁴ Nemene la ka traqa e pëkö hni ne ipië së? Tro sa ce wang la tulu i Saulo joxu. Ka pi tru Saulo joxu matre ame koi angeic, tha nyipiewekë kö tro angeic a saze la itre mekun, me aqane ujë, me itre ewekë ka ej e kuhu hni angeic. (Sal. 36:1, 2; Hab. 2:4) Kola mama la thiina ka ngazo i Saulo joxu thupene la angeic a lep la angetre Amaleka. Hnei Iehova hna hamëne la itre hna amekötin, ngo tha hnei angeice kö hna trongëne itre ej. Nge ame la kola wenë ameköti angeic hnei Samuela perofeta, tha hnei angeice kö hna kapa la ihaji. Hnei angeic hna wangacone la ngazo hna kuca me upezö itre xan. (1 Sam. 15:13-24) Hnei angeic palahi hna majemine kuca tun. (1 Sam. 13:10-14) Tha hnei angeice kö hna saze la thiina i angeic ka pi tru. Pine laka tha canga wenë amekötine kö Saulo la itre mekuna i angeic, matre hnei Iehova hna haji angeic me nuetriji angeic.

5. Nemene la ini hne së hna xom qa ngöne la tulu i Saulo?

⁵ Loi e tro sa xomi ini qa ngöne la tulu i Saulo, me hnying ka hape: “Hapeu, eni a kö a thele kepin matre tha tro kö a trongëne la itre trepene meköti ne la Tusi Hmitrötr? Eni kö a wangacone la ngazo hnenge hna kuca, maine upezö itre xan pena?” Maine eje hi, loi e troa saze la itre mekuna së me aqane ujë së. Maine tha thupëne kö së, tro hë sa pi tru nge tro ha nuetriji së hnei Iehova.—Iako. 4:6.

6. Nemene la eisapengönene la aqane ujë i Saulo joxu me Dravita joxu?

⁶ Isapengöne kö la aqane ujë i Saulo joxu me Dravita joxu. Ame Dravita, angeic a wangatrune “la wathebo i Iehova.” (Sal. 1:1-3) Atre hi angeic laka, Iehova a amelene la itre ka hni ne ipië me methinëne la itre ka pi tru. (2 Sam. 22:28) Celë hi matre, hnei angeic palahi hna nue la wathebo i Akötresie troa wenë amekötine la itre mekuna i angeic. Öni angeic: “Tro ni a atrunyi Iehova la ate eamo ni; nge hna haji ni hnene la hning’ e ite jid.”—Sal. 16:7.

7. Nemene la hne së hna troa kuca e hetre hni ne ipië së?

⁷ Maine ka hetre hni ne ipië së, tro hë sa nue la Tusi Hmitrötr troa wenë amekötine la aqane mekuna së, wanga tro sa tria. Tro hë ej a qaja ka hape: “Hane hi la gojeny.” Ketre, ej a hmekë së wanga troa ajeanyi së qa ngöne la nyipi gojeny. (Is. 30:21) Nyimutre la itre eloine la troa drengethenge Iehova. (Is. 48:17) Eje hi, tha tro kö a ameköti së hnene la ketre trejin. Nge tro hë sa easenyi koi Iehova ke, Nyidrëti a hnimi së ceitu me itre nekö i Nyidrë.—Heb. 12:7.

8. Thenge la Iakobo 1:22-25, pine nemene matre hna aceitunëne la Tusi Hmitrötr memine la ketre ithulu?

⁸ Hna aceitunëne la Tusi Hmitrötr memine la ketre ithulu. (E jë la Iakobo 1:22-25.) Ame e nöjei hmakany, easa pane ithulu qëmekene troa tro. Celë hi ka aijijë së troa goeëne la nyine troa saze, wanga öhne jë hnei itre xan. Ketre tune fe, maine  tro sa e Tusi Hmitrötr e nöjei drai, tro hë sa öhne la itre nyine troa saze ngöne la aqane mekun me aqane ujë së. Ame itre xan, angatr a e la topik ne la drai e nöjei hmakany. Angatr a wenë amekötine la itre mekuna i angatr thenge la hna e, me thele troa trongën. Celë hi matre, loi e tro sa e Tusi Hmitrötr e nöjei drai me lapa mekune ej. Maine jë, ka hmaloi hi troa kuca, ngo ka nyipiewekë matre troa lapa ngöne la gojenyi ne mel.

9. Eu la ijine kola hamë eamo hnene la ketre sinee?

⁹ Hapeu, hnei epuni kö hna kuca la ketre ewekë ka ananyi epun qaathei Iehova? (Sal. 73:2, 3) Maine jë, hnene la ketre trejin ka macaj hna hamë eamo koi epun. Hapeu, hnei epuni kö hna kapa? Maine eje hi, ka lolo catr. Maine jë, hnei epuni hna olene kowe la sinee i epun.—Ite Edomë 1:5.

10. Nemene la nyine tro sa kuca ngöne la kola haji së hnene la ketre sinee?

¹⁰ Öni Tusi Hmitrötr: “Nyipici la ite eate hnene la ate ihnimi.” (Ite Edomë 27:6) Tro sa pane xome la ketre ceitune matre trotrohnine la xötr celë. Pane mekune jë laka, epuni a treqene troa tro kowe la ketre pala gojeny. Ngo ho jë hi lai telefon, matre epuni a tro ngo tha goeëne pe la loto. E cili, kola hul a bëeke epun hnene la sinee i epun. Angeic a ea catrëne la ime i epun. Ngacama kola akötr, ngo hnei angeic hna amele epun. Hapeu, tro kö epuni a wesitr koi angeic? Waea. Epuni pe a olene koi angeic la hna xatua epun. Ketre tune fe, kola akötrë së ngöne la kola haji së hnene la ketre sinee. Ngo tha tro kö sa wesitr koi angeic. (Ate cai. 7:9) Loi e tro pe sa hetre hni ne ole koi angeic.

11. Pine nemene matre tha kapa kö ketre atr la eamo hna hamën hnene la ketre sinee?

¹¹ Pine nemene matre tha hna kapa kö hnei ketre atr la eamo hna hamën hnene la sinee i angeic? Pine laka ka pi tru angeic, matre angeic a ajane troa ‘qaloth la itre hnangenyë i angeic.’ Angeic a “xele ma drenge la nyipici.” (2 Tim. 4:3, 4) Ketre, angeic a sipu wangatrunyi angeice kö. Öni Paulo: “Maine tro ketre a mekune ka hape, ka sisitria angeic ngo tha eje pe, angeice hi lai a amenu angeice kö.” (Gal. 6:3) Celë fe hi lai hna qaja hnei Solomona joxu. Öni angeic: “Loi la nekö trahmanyi ka pë ewekë nge ka inamacane hune la joxu qate nge ka hmo, lo ate xele ma denge e troa hajin.”—Ate cai. 4:13.

12. Thenge la Galatia 2:11-14, nemene la aqane ujë i Peteru ngöne la kola haji angeic hnei Paulo?

¹² Tro sa ce wang la tulu i Peteru aposetolo. Hnei Paulo hna haji Peteru. (E jë la Galatia 2:11-14.) Maine ju, tro angeic a wesitr ke, hna ithanata koi angeic qëmekene la nöjei atr, nge catr la aqane ithanata i Paulo. Ngo inamacane la aqane ujë i Peteru. Hnei angeic hna kapa la eamo nge tha hnei angeice kö hna thele troa itëkeun. Hnei angeic hna qeje Paulo ka hape, “trejine hnimina.”—2 Pet. 3:15.

13. Nemene la nyine tro sa pane mekun qëmekene troa hamë eamo kowe la ketre atr?

¹³ Nemene la nyine tro sa pane mekun qëmekene troa hamë eamo kowe la ketre sinee? Qëmekene troa ithanata koi angeic, loi e tro sa isa hnying ka hape: ‘Eni kö a “thina ka meköti cat”?’ (Ate cai. 7:16) Ame la atr ka nyi ka meköt ke, angeic a amekötin la itre xan thenge la sipu inamacane i angeic, ngo tha thenge kö la itre hna amekötin hnei Iehova. Ketre, ka catre la aqane ujë i angeic koi  angatr. Maine easë palahi a ajane troa ithanata koi angeic, loi e tro sa qaja hnyawane koi angeic la jol me hnying matre xatua angeic troa trotrohnine laka, ka ngazo la hnei angeic hna kuca. Loi e troa hamë eamo thenge la Tusi Hmitrötr. Ketre, tha tro kö a thëthëhmine laka, Iehova hi la ka troa ameköti angeic ngo tha easë kö. (Rom. 14:10) Loi e tro sa nue la Tusi Hmitrötr troa eatrongë së, nge tui Iesu, loi e tro sa ihnim. (Ite Edomë 3:5; Mat. 12:20) Pine nemen? Pine laka, Iehova a troa ujë koi së tune la aqane ujë së koi itre xan.—Iako. 2:13.

14. Nemene la aqane ini së hnene la organizasio i Akötresie?

¹⁴ Jëne la organizasio i Nyidrë e celë fen, Iehova a eatrongë së ngöne la gojenyi ne mel. Nyidrëti a ini së jëne la itre video, itre itus, me jëne la itre icasikeu ka xatua së troa trongëne la hna qaja hnine la Trengewekë i Akötresie. Hna nyitrepene la itre ini cili hnene la Tusi Hmitrötr. Ketre, hnene la Lapa Ne Xomi Meköt hna sipone la uati hmitrötr, matre thele la aqane troa cainöj. Angatr palahi a saze aqane kuca. Pine nemen? Pine laka, “kola saze la pengöne la fene celë.”—1 Kor. 7:31.

15. Nemene la itre xaa ewekë ka saze hna kapa hnene la itre trejin?

¹⁵ Easa canga kapa ngöne la organizasio a hamë eamo göne la aqane mel, maine hamë ini ka hnyipixe. Ngo tune kaa la itre xaa mekun ka hetre thangane kowe la mele së? Eje hi, kola elë la thupene mo matre jole hë troa xupe me nyihnyawane la itre Uma Ne Baselaia. Celë hi matre, hnene la Lapa Ne Xomi Meköt hna upi së troa huliwane hnyawa itre ej. Hna acasine la itre xaa ekalesia nge hna salemëne la itre xaa Uma Ne Baselaia. E cili, hna xom la manie matre troa xupi Uma Ne Baselaia ngöne la itre nöj ka aja ixatua. Eje hi laka, jole koi së troa saze ekalesia. Ame la itre xaa trejin, nanyi hë la Uma Ne Baselaia qa ngöne la hnalapa i angatr. Ame la itre xan, hnei angatr hna nue trengecatr matre troa xup me nyihnyawane la Uma Ne Baselaia, matre tha trotrohnine kö angatr la kepin matre kola salemën ej. Maine jë ame koi angatr, ka gufa la traem me trengecatr  hnei angatr hna nue. Ame pe, loi e tro sa qaja aloinyi angatr ke, angatr a kapa madrin la itre ewekë ka saze.

16. Thenge la Kolose 3:23, 24, nemene la ka troa hamë madrine së?

¹⁶ Maine tro sa lapa mekun laka, easa huliwa koi Iehova, nge Nyidrëti laka, xomiujine la huliwa la organizasio i Nyidrë, tro hë sa madrin. (E jë la Kolose 3:23, 24.) Ame ngöne la Dravita joxu a hnëkë manie thatraqane la ene, tre lolo la aqane waiewekë i nyidrë. Ame la nyidrë a thithi koi Iehova, öni nyidrë: “Drei ni? Nge drei la nöjeng matre tro huni a hamëne la itre ahnahna ka tune la? Ke, qaathei nyipë nge qaathene la ime i nyipë la itre hne huni hna hamën.” (1 A. l. ite jo. 29:14) Ketre tu së fe, ame la easa kuië ahnahna, easë hmaca a hamëne koi Iehova la hnei Nyidrëti hna hamë së. Ame pe, ka tru koi Nyidrë la traem me trengecatr me itre mo hne së hna nue kowe la huliwa i Nyidrë.—2 Kor. 9:7.

17. Pine nemene matre tha tro kö sa kucakuca e hetre nyine tro palakö sa saze?

¹⁷ Maine easa ajane troa lapa ngöne la gojenyi ne mel, nyipiewekë tro sa nyitipu Iesu. (1 Pet. 2:21) Maine epuni a öhn laka, hetre nyine tro palakö a saze ngöne la aqane mekun me aqane ujë i epun, the kucakuca kö. Kolo lai a amamane laka, epuni a ajane troa amadrinë Iehova. Eje hi, atre hi Nyidrë laka, tha ka pexeje kö së nge tha ijiji së palakö troa pexej tui Iesu.

18. Nemene la nyine tro sa kuca matre traqa kowe la fene ka hnyipixe?

¹⁸ Catre pi së lapa mekun la mel elanyi hna thingehnaean hnei Akötresie. Ketre, loi e tro palahi sa thel troa saze aqane mekun me aqane ujë. (Ite Edomë 4:25; Luka 9:62) Loi e tro sa hetre hni ne ipië, me ‘madrin, me wenë amekötine la itre mekuna së.’ (2 Kor. 13:11) E cili, “tro hë la Akötresie ne ihnim me tingeting a ce me [easë].” Tro hë sa mele madrin enehila me traqa elany kowe la fene ka hnyipixe.