1. Ka kɛɲɛ ni Matiyo 7:13, 14 ye, mun na an be se k’a fɔ ko an be voyazi dɔ lo kɛra?

AN BƐƐ be voyazi dɔ lo kɛra. An tagayɔrɔ, o kɔrɔ, an ka laɲinita ye ka ɲɛnamaya kɛ duniɲa kura kɔnɔ Jehova ka kuntigiya kɔrɔ, a b’o min kɛ ni kanuya ye. Loon o loon, an b’an jija ka tagama ɲɛnamaya sira kan. Nka i ko Yezu y’a fɔ cogo min na, o sira ka dɔgɔ ani tuma dɔw la a man nɔgɔ ka tagama a kan (Matiyo 7:13, 14 kalan). An ye dafabaliw ye minkɛ, an ka teli k’o sira bila.—Gal. 6:1.

2. An bena mun lo lajɛ barokun nin na? (Koorilen nin fana lajɛ: “ N’an majiginin lo, o bena an dɛmɛ ka yɛlɛmaniw kɛ.”)

² N’an b’a fɛ ka to ɲɛnamaya sira kan o min ka dɔgɔ, an ka ɲi ka sɔn ka yɛlɛmani don an miiricogo n’an ka kɛwalew la. Ciden Pol ye Korɛnti kerecɛnw jija ko u “ka to ka yɛlɛmaniw kɛ.” (2 Kor. 13:11, NW). O ladili ɲɛsinna an fana ma. Barokun nin na, an bena a ye Bibulu be se k’an dɛmɛ cogo min na ka yɛlɛmaniw kɛ. An teri minw ye ɲɛyirali ɲumanw ye, an bena a ye fana olu be se k’an dɛmɛ cogo min na ka to ɲɛnamaya sira kan. Ka fara o kan, an bena a ye fɛɛn min kama a be se ka gwɛlɛya an ma ka Jehova ka ɔriganisasiyɔn ka cikanw labato. N’an majiginin lo, o bena an dɛmɛ cogo di ka yɛlɛmaniw kɛ ani ka to ka Jehova sago kɛ ninsɔndiya la? An bena o fana lajɛ.

3. Ala ka Kuma be se k’an nafa cogo di?

³ A man nɔgɔ an ma k’an ka miiriyaw n’an dusukunnakow sɛgɛsɛgɛ. Mun na do? Sabu an dusukun ye janfanci ye ani a be se ka gwɛlɛya an ma k’a lɔn a bena an lasun ka min kɛ (Zer. 17:9). An ka teli k’an “yɛrɛ nigɛ” ni miiriya tilenbaliw ye (Zaki 1:22). O kama, an ka ɲi ka basigi Ala ka Kuma kan  k’an yɛrɛ sɛgɛsɛgɛ. Ala ka Kuma b’a yira an ye mɔgɔ sifa min ye, o kɔrɔ, an “kɔnɔnako” n’an ŋaniyaw ye minw ye (Eburuw 4:12, 13). Dɔgɔtɔrɔw ka arajo b’a to an b’a lɔn min b’an fari kɔnɔ. O cogo kelen na, Ala ka Kuma b’an dɛmɛ k’a lɔn min b’an kɔnɔ. Nka, an be ladili minw sɔrɔ Ala ka Kuma kɔnɔ wala Ala ka lasigidenw fɛ, n’an b’a fɛ o k’an nafa, fɔɔ an ka kɛ mɔgɔ majigininw ye.

4. Mun lo b’a yira ko masacɛ Sayuli kɛra kuncɛba ye?

⁴ Masacɛ Sayuli ka koo b’a yira an na min be se k’an sɔrɔ n’an majiginin tɛ. Sayuli tun ye kuncɛba ye fɔɔ a tun tɛ sɔn a ma ko a ka ɲi k’a miiricogo n’a ka kokɛcogow yɛlɛma (Zab. 36:2, 3; Abak. 2:4). O yirala ka gwɛ tuma min na Jehova ye cikan tigitigi dɔ di Sayuli ma. A tun y’a fɔ a ye a tun ka ɲi ka min kɛ n’a ye see sɔrɔ Amalɛkiw kan. Nka, Sayuli ma mɛnni kɛ Jehova fɛ. Tuma min na kira Samuyɛli kumana Sayuli fɛ o koo la, a ma sɔn a ma ko ale filila. A y’a ɲini ka joo di a yɛrɛ ma. A y’a yira ko a ye min kɛ o tɛ koo jugu ye ani ko jama lo y’ale waajibiya k’o kɛ (1 Sam. 15:13-24). Sayuli tun kɔnna k’o ɲɔgɔn kɛ (1 Sam. 13:10-14). A fɔ man di nka Sayuli kɛra kuncɛba ye. A m’a ka miiriya yɛlɛma, o kama Jehova y’a jalaki ani a banna a la.

5. An be kalan juman sɔrɔ Sayuli ka koo la?

⁵ An t’a fɛ ka kɛ komi Sayuli. O kama, a ka ɲi an k’an yɛrɛ ɲininga ko: “Ni n’ ye ladili dɔ kalan Bibulu kɔnɔ, yala n’ ka teli ka joo di n’ yɛrɛ ma wa? Yala n’ b’a miiri ko n’ be min kɛra o tɛ koo jugu ye wa? Yala n’ be tɔɔw jalaki n’ ka kɛwalew kosɔn wa?” N’an y’o ɲiningali dɔ jaabi ko ɔnhɔn, an ka ɲi ka yɛlɛmani don an ka miiricogo n’an ka kokɛcogow la. N’o tɛ, an bena kɛ kuncɛbaw ye ani Jehova tɛna sɔn an ka kɛ a teriw ye tugun.—Zaki 4:6.

6. Faranfasi juman be masacɛ Sayuli ni masacɛ Dawuda cɛ?

⁶ Masacɛ Dawuda sigira masaya la Sayuli nɔɔ na. A kɔrɔsi faranfasi min b’u fila cɛ. “Masaba ka sariya” koo tun ka di masacɛ Dawuda ye (Zab. 1:1-3). Dawuda tun b’a lɔn ko Jehova be mɔgɔ majigininw kisi, nka kuncɛbaw koo man di a ye (2 Sam. 22:28). O kama, Dawuda y’a to Ala ka sariya k’a ka miiriya yɛlɛma. A y’a sɛbɛ ko: “Ne be barika la Masaba ye kosɔbɛ, ale min ye ne ladibaga ye. Hali sufɛ, ne be la ka miiri.”—Zab. 16:7.

7. An bena mun lo kɛ n’an majiginin lo?

⁷ N’an majiginin lo, an bena a to Ala ka Kuma k’an ka miiriya juguw yɛlɛma yanni u k’an bila kojugukɛ la. Ala ka Kuma bena kɛ i n’a fɔ kumakan dɔ min b’a fɔ an ye ko: “Sira ye nin ye, aw k’a minɛ.” Ala ka Kuma bena an lasɔmi n’an y’a daminɛ ka sirajugu ta (Ezayi 30:21). N’an be mɛnni kɛ Jehova fɛ, an bena nafa caaman sɔrɔ o la (Ezayi 48:17). Ɲɛyirali fɛ, mɔgɔ be maloya cogo min na n’u y’a kolo, an bena an yɛrɛ tanga o ma. An bena an magwɛrɛ kosɔbɛ Jehova la fana sabu an b’a lɔn ko a b’a janto an na i ko faa kanutigi.—Eburuw 12:7.

8. Ka kɛɲɛ ni Zaki 1:22-25 ye, an be se ka baara kɛ cogo di ni Ala ka Kuma ye i n’a fɔ dugalen?

⁸ Ala ka Kuma be se ka kɛ i n’a fɔ dugalen an fɛ (Zaki 1:22-25 kalan). An fanba b’an yɛrɛ filɛ dugalen na loon o loon sɔgɔma ka sɔrɔ ka bɔ soo. O la, an b’a lɔn n’an ka ɲi k’an yɛrɛ ladon yanni mɔgɔw k’an ye. O cogo kelen na, n’an be Bibulu kalan loon o loon, an bena a lɔn an ka ɲi ka yɛlɛmani minw don an miiricogo n’an ka kokɛcogow la. Mɔgɔ caaman y’a ye ko nafa b’a la ka tilera kalan lajɛ loon o loon sɔgɔma ka sɔrɔ  ka bɔ soo. U ye min kalan, u b’a to o ka nɔɔ to u ka miiriya kan. U ye ladili minw sɔrɔ Ala ka Kuma kɔnɔ, tile kuru bɛɛ la, u b’a filɛ u be se k’o sira tagama cogo min na. Ka fara o kan, an ka ɲi ka Ala ka Kuma kalan loon o loon ani ka miiri a kan. An be se k’a miiri k’o ka nɔgɔ. Nka o ye koo kɔrɔtaninba dɔ ye an be se ka min kɛ walisa ka to ɲɛnamaya banbali sira kan, o min ye sira fitinin ye.

9. Mun na i teri ka ɲi k’i ladi?

⁹ Yala i delila ka sira jugu dɔ ta min tun b’i yɔrɔ janyana Jehova la wa? (Zab. 73:2, 3). N’i teri kolɔnbaga dɔ y’a jaa gwɛlɛya k’i ladi, yala i y’a lamɛn ani k’a ka ladili sira tagama wa? N’o lo, i ye koo ɲuman lo kɛ ani siga t’a la, i b’i teri waleɲuman lɔn sabu a y’i lasɔmi.—Talenw 1:5.

10. N’i teri dɔ y’i ladi, i ka ɲi k’o koo ta cogo di?

¹⁰ Ala ka Kuma b’a fɔ ko: “Teri ka ladiligwɛlɛnw le b’a ka tilenninya yira.” (Talenw 27:6). O kumaw kɔrɔ ko di? Miiri k’a filɛ: I b’a fɛ ka sira tigɛ yɔrɔ min na bolifɛn caaman be tɛmɛ ani i b’i ka telefɔni digi digira. I b’a daminɛ ka sira tigɛ hali i tɛ filɛri kɛ. Nka i teri dɔ be sin k’i bolo minɛ k’i sama ka bɔ sira kan. A y’i dɛrɛ kojugu fɔɔ i bolo mandimina. Nka a sinna ka min kɛ, o y’i niin kisi. N’o tɛ, mobili dɔ lo tun bena i gosi. Hali n’o joli y’i sɛgɛn tile caaman kɔnɔ, yala i bena dimi i teri kɔrɔ sabu a y’i bolo dɛrɛ wa? Ayi dɛ! I bena a waleɲuman lɔn a ka dɛmɛ kosɔn. O cogo kelen na, n’i teri dɔ y’i lasɔmi ko i ka kuma wala i ka kɛwalew bɛnnin tɛ ni Ala ka sariya tilenninw ye, a daminɛ na, o be se k’i kɔnɔ gwan. Nka kana dimi a kɔrɔ sabu a y’i ladi. N’i y’o kɛ, o ye hakilintanyako le ye (Waaj. 7:9). Nka, i teri waleɲuman lɔn sabu a y’a jaa gwɛlɛya ka kuma i fɛ.

11. Mun lo be se k’a to dɔ be ban a teri ka ladili ɲuman na?

¹¹ Fɛɛn min be se k’a to dɔ be ban a teri sɔbɛ ka ladili ɲuman na, o ye kuncɛbaya lo ye. Kuncɛbaw be “koo minw fɛ” u b’a fɛ u k’o lo fɔ u ye. U tɛ “sɔn tiɲɛ ma.” (2 Tim. 4:3, 4). U b’a miiri ko u mako tɛ mɔgɔ ka ladili la sabu u b’a jati ko u be koo lɔn ka tɛmɛ tɔɔw kan wala u ka fisa ni tɔɔw ye. Nka ciden Pol y’a sɛbɛ ko: “Ni mɔgɔ dɔ be miiri ko ale ka fisa, k’a sɔrɔ a te foyi ɲa, a b’a yɛrɛ nigɛra le.” (Gal. 6:3). Masacɛ Solomani y’o ɲɛfɔ ka ɲɛ. A y’a sɔbɛ ko: “Denmisɛn dɛsɛbagatɔ hakilitigi ka fisa ni masa cɛkɔrɔba naloman ye, min te sɔn ladili ma tugu.”—Waaj. 4:13.

12. An be kalan juman lo sɔrɔ ciden Piyɛri ka koo la min lakalila Galatikaw 2:11-14 kɔnɔ?

¹² Miiri k’a filɛ ciden Piyɛri ye koow ta cogo min na tuma min na ciden Pol y’a ladi jama ɲɛɛ na (Galatikaw 2:11-14 kalan). Piyɛri tun be se ka dimi Pol ka kumaw kosɔn. A tun be se k’a fɔ ko a y’o fɔ cogo min na o bɛnnin tɛ ani ko a y’o fɔ jama ɲɛɛ na. Nka Piyɛri ye koow kɛ ni hakilitigiya ye. A sɔnna Pol ka ladili ma ani a ma dimi mara a kɔnɔ. Kɔfɛ, a yɛrɛ y’a fɔ ko Pol ye ale ‘balimacɛ n’a tericɛ’ ye.—2 Piyɛri 3:15.

13. An ka ɲi ka mun lo to an hakili la n’an b’a fɛ ka ladili di mɔgɔ dɔ ma?

¹³ N’i y’a ye ko i ka ɲi ka ladili di i teri dɔ ma, i ka ɲi ka mun lo to i hakili la? Sanni i ka taga kuma i teri fɛ, i yɛrɛ ɲininga ko: “Yala n’ be n’ yɛrɛ ‘jati mɔgɔtilennin ye ka tɛmɛ’ wa?” (Waaj. 7:16). Mɔgɔ min tilennin lo k’a dama tɛmɛ, ale tɛ tɔɔw minɛ ka kɛɲɛ ni Jehova ka sariyaw ye. Nka, a be basigi a yɛrɛ ka koow jaticogo lo kan ani a tɛ makari kosɔbɛ. N’a sɔrɔ i ye i yɛrɛ sɛgɛsɛgɛ ani i bele y’a ye ko i ka ɲi ka  kuma i teri fɛ. N’o lo, a fɔ a ye a ye min kɛ ani ɲiningaliw kɛ walisa k’a dɛmɛ a k’a faamu ko a ye min kɛ o man ɲi. I janto ka basigi Bibulu kan k’a ladi. A to i hakili la ko Jehova lo ka ɲi k’i teri kiti, ele tɛ (Ɔrɔm. 14:10). Hakilitigiya min be sɔrɔ Ala ka Kuma kɔnɔ, basigi o kan ani n’i be mɔgɔ ladira, Yezu ladegi i kɛtɔ ka makari a tigi la (Talenw 3:5; Mat. 12:20). Mun na do? Sabu an be tɔɔw minɛ cogo min na, Jehova fana bena an minɛ o cogo lo la.—Zaki 2:13.

14. Ala ka ɔriganisasiyɔn be mun lo di an ma?

¹⁴ Jehova ka ɔriganisasiyɔn faan min be dugukolo kan, a be tɛmɛ o fɛ k’an ɲɛminɛ ɲɛnamaya sira kan. O ɔriganisasiyɔn be videwow, sɛbɛw ani lajɛnw labɛn minw b’an bɛɛ dɛmɛ ka Ala ka Kuma ka ladiliw sira tagama. O kalanw bɛɛ basiginin lo Bibulu kan. Ni Koow Ɲɛnabɔla Jɛnkulu be desizɔn tara waajuli baara kɛcogo ɲuman koo la, u be hakili senu deli Ala fɛ. O bɛɛ n’a ta, tuma o tuma Koow Ɲɛnabɔla Jɛnkulu be segi o desizɔn kan k’a filɛ n’u ka ɲi ka yɛlɛmaniw kɛ. Mun na do? Sabu “duniɲa nin ka koow cogoya be yɛlɛmana” ani Ala ka ɔriganisasiyɔn ka ɲi ka koow kɛ ka kɛɲɛ n’o ye.—1 Kor. 7:31, NW.

15. Weleweledala dɔw ye gwɛlɛya jumanw lo sɔrɔ?

¹⁵ Ni Ala ka ɔriganisasiyɔn ye yɛlɛmani dɔ don Bibulu ka kalan dɔ faamuyali koo la ani n’a ye cikan dɔ di an ma tagamacogo ta fan fɛ, an be sɔn o ma ani an b’o sira tagama. Nka an be koow ta cogo di ni Ala ka ɔriganisasiyɔn ye yɛlɛmani dɔ kɛ min be nɔɔ to an a ka ɲɛnamaya faan wɛrɛw kan? Ɲɛyirali fɛ an mako be wari hakɛ min na walisa ka Masaya Boonw lɔ ani k’u ladon, saan tɛmɛninw na, dɔ farala o hakɛ kan kosɔbɛ. O kama, Koow Ɲɛnabɔla Jɛnkulu ye cii di ko kafo caaman ka ɲɔgɔn lajɛn Masaya Boon kelen kɔnɔ. O kosɔn, Kafo dɔw fara farala ɲɔgɔn kan ani u ye Masaya Boon dɔw feere. O wari kɛra ka Masaya Boonw lɔ yɔrɔ minw na balimaw mako gwɛlɛ b’u la. N’a sɔrɔ i be yɔrɔ min na, u ye Masaya Boon dɔw feere ani kafo dɔw farala ɲɔgɔn kan. N’o lo, a be se ka gwɛlɛya i ma ka koow kɛ ka kɛɲɛ n’o yɛlɛmaniw ye. Weleweledala dɔw ka ɲi ka bɔ yɔrɔjan walisa ka taga lajɛnw na. Mɔgɔ minw ye baara gwɛlɛ kɛ walisa ka Masaya  Boon dɔ lɔ wala k’a ladon, olu be se k’u yɛrɛ ɲininga fɛɛn min kama ɔriganisasiyɔn b’o Masaya Boon feerela. U be se k’a miiri ko u y’u ka wagati tiɲɛ ani ko u ka jijali kɛra fuu ye. O bɛɛ n’a ta, o balimaw be sɔnna ka dɛmɛ don o labɛn kura la. O kama, u ka kan ni tandoli ye.

16. Ladili min be sɔrɔ Kɔlɔsikaw 3:23, 24 kɔnɔ, n’an b’o sira tagama, o bena an dɛmɛ cogo di an ninsɔn diyanin ka to?

¹⁶ An ninsɔn diyanin bena to n’an y’a to an hakili la ko an be Jehova ka baara lo kɛra ani ko ale lo b’a ka ɔriganisasiyɔn ɲɛminɛna (Kɔlɔsikaw 3:23, 24 kalan). Masacɛ Dawuda ye ɲɛyirali ɲuman to an ye tuma min na a ye wari di Alabatosoba lɔli kama. A ko: “Ne ye jɔn ye? N ka jama fana ye mun ye, fɔɔ an sera ka e boɲa ten? Fɛɛn bɛɛ be sɔrɔ e le barika la, e le y’o d’an ma an ka sɔrɔ k’o d’i ma.” (1 Til. Kib. 29:14). N’an be nili kɛ, Jehova ye min di an ma, an b’o dɔ lo dira a ma. O bɛɛ n’a ta, n’an b’an ka wagati, an faga ani an ka wari kɛ ka dɛmɛ don Jehova ka baara la, o b’a ninsɔn diya kosɔbɛ.—2 Kor. 9:7.

17. N’i ka ɲi ka yɛlɛmaniw don i ka kokɛcogow la, mun na i man ɲi k’i fari faga?

¹⁷ Walisa ka to ɲɛnamaya sira kan, an kelen kelen bɛɛ ka ɲi ka tugu Yezu ka ɲɛyirali kɔ (1 Piyɛri 2:21). N’i y’a ye ko i ka ɲi ka yɛlɛmaniw don i ka kokɛcogow la, kana i fari faga. N’i sɔnna a ma ko i ka ɲi ka yɛlɛmaniw kɛ, o b’a yira ko i b’a fɛ ka tugu Jehova ka cikanw kɔ. Kana ɲinɛ ko Jehova b’a lɔn ko an ye mɔgɔ dafabaliw ye. O kama, a t’a ɲini an fɛ an ka Yezu ladegi cogo dafanin na.

18. An ka ɲi ka mun lo kɛ walisa k’an ka laɲinita dafa?

¹⁸ An kelen kelen bɛɛ ka to ka miiri siniɲasigi koo la ani ka sɔn ka yɛlɛmaniw don an ka miiriyaw n’an ka kokɛcogow la (Talenw 4:25; Luka 9:62). An k’an jija walisa an majiginin ka to ani ka “to ninsɔndiya la, ka to ka yɛlɛmaniw kɛ.” (2 Kor. 13:11, NW). N’an y’o kɛ, ‘Kanutigi ni Hɛɛrɛtigi Ala bena to n’an ye.’ A bena an dɛmɛ fana ka ninsɔndiya sɔrɔ sisan ani a bena ɲɛnamaya banbali di an ma duniɲa kura kɔnɔ.