1. Yɛ nɔ ni awie yɛ Mateo 7:13, 14 lɛ naa lɛ, mɛni hewɔ wɔbaanyɛ wɔwie yɛ mfonirifeemɔŋ gbɛ nɔ akɛ wɔmiifã gbɛ?

WƆ FƐƐ wɔmiifã gbɛ, ni he ni wɔyaa ji jeŋ hee lɛ mli koni wɔhi Yehowa nɔyeli lɛ shishi. No hewɔ lɛ, daa gbi lɛ, wɔbɔɔ mɔdɛŋ akɛ wɔbaahi gbɛ ni kɛ mɔ yaa wala mli lɛ nɔ. Shi Yesu wie akɛ ‘gbɛ nɛɛ elɛɛɛ,’ ni enɛ hewɔ lɛ, bei komɛi lɛ, enɔ nyiɛmɔ wa. (Kanemɔ Mateo 7:13, 14.) Agbɛnɛ hu, wɔyeee emuu, ni no hewɔ lɛ, ewaaa akɛ wɔbaakpalaŋ kɛje gbɛ lɛ nɔ.​—Gal. 6:1.

2. Mɛni he wɔbaasusu yɛ nikasemɔ nɛɛ mli? (Kwɛmɔ akrabatsa ni yitso ji, “ Heshibaa Baawa Wɔ Ni Wɔhi Wala Gbɛ Lɛ Nɔ” lɛ hu.)

² Kɛ́ wɔmiisumɔ ni wɔhi gbɛ ni kɛ mɔ yaa wala mli lɛ nɔ lɛ, no lɛ kɛ́ ehe bahia ni wɔtsake wɔnifeemɔ ko loo wɔsubaŋ ko, loo ehe bahia ni wɔjaje susumɔ ko ni wɔhiɛ lɛ, wɔshashaoŋ shi kwraa akɛ wɔbaafee nakai. Bɔfo Paulo kɛɛ Kristofoi ni yɔɔ Korinto lɛ akɛ ‘amɛhã ajaje amɛ.’ (2 Kor. 13:11) Nɔ ni bɔfo Paulo kɛɛ amɛ lɛ kɔɔ wɔ hu wɔhe. Yɛ nikasemɔ nɛɛ mli lɛ, wɔbaakwɛ bɔ ni Biblia lɛ kɛ wɔnanemɛi ni edara yɛ mumɔŋ lɛ baanyɛ aye abua wɔ ni wɔjaje wɔnajifamɔi koni wɔhi gbɛ ni kɛ mɔ yaa wala mli lɛ nɔ. No sɛɛ lɛ, wɔbaakwɛ nɔ hewɔ ni bei komɛi lɛ, wɔnáaa lɛ mlɛo akɛ wɔkɛ gbɛtsɔɔmɔi ni Yehowa asafo lɛ kɛhãa wɔ lɛ baatsu nii, kɛ agbɛnɛ hu, bɔ ni heshibaa baanyɛ aye abua wɔ ni wɔya nɔ wɔsɔmɔ Yehowa kɛ miishɛɛ, kɛ́ ehe bahia ni wɔfee tsakemɔi komɛi po.

3. Mɛɛ gbɛ nɔ Nyɔŋmɔ Wiemɔ lɛ baanyɛ aye abua bo?

³ Bei komɛi lɛ, ewa hã wɔ akɛ wɔbaale nɔ tuuntu ni yɔɔ wɔtsui kɛ wɔjwɛŋmɔ mli. Mɛni hewɔ? Ejaakɛ tsui lɛ lakaa mɔ, ni ewaaa akɛ wɔbaaná nibii gbohii ahe miishɛɛ ni wɔyɔseee po. (Yer. 17:9) Ewaaa akɛ wɔkɛ “amale susumɔi” baalaka  wɔ diɛŋtsɛ wɔhe. (Yak. 1:22) Enɛ hewɔ ehe miihia ni wɔkɛ Nyɔŋmɔ Wiemɔ lɛ apɛi wɔmli lɛ. Bɔ ni tsɔne ni akɛshaa X-ray lɛ yeɔ ebuaa ni anaa nɔ ni yaa nɔ yɛ mɔ ko gbɔmɔtso mli lɛ, nakai nɔŋŋ Nyɔŋmɔ Wiemɔ lɛ baanyɛ aye abua wɔ ni wɔna nɔ ni yɔɔ wɔtsui mli, ejaakɛ “enyɛɔ ekɔɔ tsui lɛ mli susumɔi kɛ yiŋtoi asɛɛ.” (Heb. 4:12, 13) Shi ja wɔba wɔhe shi dani wɔbaaná gbɛtsɔɔmɔi ni yɔɔ Biblia lɛ mli lɛ, loo gbɛtsɔɔmɔi ni mɛi ni nyiɛɔ hiɛ lɛ kɛhãa wɔ lɛ ahe sɛɛ.

4. Mɛni hãa wɔnaa akɛ Saul wó ehe nɔ?

⁴ Maŋtsɛ Saul sane lɛ hãa wɔnaa nɔ ni baanyɛ aba wɔnɔ kɛ́ wɔbaaa wɔhe shi. Saul wó ehe nɔ waa, aahu akɛ ekpɛlɛɛɛ nɔ akɛ esa akɛ etsake esusumɔ kɛ enifeemɔ. (Lala 36:1, 2; Hab. 2:4) Akɛ nɔkwɛmɔnɔ lɛ, be ko lɛ, Yehowa tsɔɔ Saul nɔ ni efee Amalekbii lɛ kɛ́ eye amɛnɔ kunim. Shi Saul kɛ gbɛtsɔɔmɔ ni Yehowa hã lɛ tsuuu nii. Be ni gbalɔ Samuel gbala Saul jwɛŋmɔ kɛtee etɔmɔ lɛ nɔ lɛ, Saul ekpɛlɛɛɛ nɔ. Ekɛ saji jiejie enaa, ebuuu nɔ ni efee lɛ akɛ hiɛdɔɔ sane, ni eshwa mɛi krokomɛi moŋ. (1 Sam. 15:13-24) Enɛ jeee klɛŋklɛŋ be ni Saul efee nɔ ko tamɔ nakai. (1 Sam. 13:10-14) Dɔlɛ sane ji akɛ, Saul baaa ehe shi ni etsakeee etsui. No hewɔ lɛ, Yehowa kã ehiɛ ni ekpoo lɛ.

5. Mɛni wɔkaseɔ yɛ Saul sane lɛ mli?

⁵ Wɔteŋ mɔ ko mɔ ko sumɔŋ ni efee enii tamɔ Saul. No hewɔ lɛ, esa akɛ wɔbi wɔhe akɛ: ‘Kɛ́ mikane nɔ ko yɛ Nyɔŋmɔ Wiemɔ lɛ mli, ni mina akɛ esa akɛ matsake susumɔ ko ni mihiɛ lɛ, ani mifeɔ nakai, aloo mikɛɔ akɛ yiŋtoi komɛi ahewɔ lɛ, ekɔɔɔ mihe? Kɛ́ mifee nɔ ko ni ejaaa lɛ, ani mibuɔ lɛ hiɛdɔɔ sane, aloo minuɔ he akɛ efeee nɔ ko? Ani mishwaa mɛi krokomɛi yɛ mitɔmɔi ahewɔ?’ Kɛ́ sanebimɔi nɛɛ ateŋ ekome po yɛ ni ewa hã wɔ akɛ wɔbaahã hetoo lɛ, belɛ esa akɛ wɔfee nɔ ko yɛ he. Kɛjeee nakai lɛ, wɔtsui baakpiliŋ, wɔbaawó wɔhe nɔ, ni Yehowa kɛ wɔ ebɔŋ naanyo dɔŋŋ.​—Yak. 4:6.

6. Mɛni hã esoro Maŋtsɛ David kwraa yɛ Maŋtsɛ Saul he?

⁶ Maŋtsɛ David, mɔ ni baye Maŋtsɛ Saul sɛɛ lɛ, sumɔɔ “Yehowa mla lɛ,” ni efeee enii tamɔ Saul. (Lala 1:1-3) David hã ehi ejwɛŋmɔ mli akɛ, ‘Yehowa hereɔ heshibalɔi, shi ekɛ hiŋmɛi ko kwɛɔ henɔwolɔi.’ (2 Sam. 22:28) David hã Nyɔŋmɔ mla lɛ ye ebua lɛ ni ejie susumɔi ni ejaaa kɛje ejwɛŋmɔ mli. Eŋma akɛ: “Majie Yehowa, mɔ ni woɔ mi ŋaa lɛ yi. Nyɔɔŋnyɔɔŋ po lɛ, mimligbɛ susumɔi lɛ jajeɔ mi.”​—Lala 16:7.

7. Kɛ́ wɔbaa wɔhe shi lɛ, mɛni wɔbaafee?

⁷ Kɛ́ wɔbaa wɔhe shi lɛ, wɔbaahã Nyɔŋmɔ Wiemɔ lɛ aye abua wɔ ni wɔjie susumɔi ni ejaaa kɛje wɔjwɛŋmɔ mli koni wɔkayafee esha. Nyɔŋmɔ Wiemɔ lɛ baakudɔ wɔ, ebaatsɔɔ wɔ gbɛ ni wɔkɔ, ni kɛ́ wɔmiikɔ gbɛ fɔŋ ko lɛ, ebaabɔ wɔ kɔkɔ. (Yes. 30:21) Kɛ́ wɔbo Yehowa toi, ni wɔhã e-Wiemɔ lɛ jaje wɔ lɛ, wɔbaaná he sɛɛ. (Yes. 48:17) Akɛ nɔkwɛmɔnɔ lɛ, kɛ́ wɔyafee nɔ ko gbonyo ni mɔ ko jaje wɔ lɛ, efeɔ wɔ hiɛgbele. Shi kɛ́ Nyɔŋmɔ Wiemɔ lɛ jaje wɔ lɛ, no lɛ hiɛgbele bɛ mli. Agbɛnɛ hu, kɛ́ wɔhã Nyɔŋmɔ Wiemɔ lɛ jaje wɔ lɛ, wɔ kɛ lɛ teŋ naanyobɔɔ lɛ mli baawa, ejaakɛ wɔbaana akɛ, ekɛ wɔ miiye akɛ ebii ni esumɔɔ.​—Heb. 12:7.

8. Tamɔ bɔ ni awie yɛ Yakobo 1:22-25 lɛ, mɛɛ gbɛ nɔ wɔbaanyɛ wɔkɛ Nyɔŋmɔ Wiemɔ lɛ ato ashwishwɛ he?

⁸ Nyɔŋmɔ Wiemɔ lɛ tamɔ ashwishwɛ. (Kanemɔ Yakobo 1:22-25.) Wɔteŋ mɛi pii kwɛɔ ashwishwɛ mli dani wɔshiɔ shĩa. Enɛ yeɔ ebuaa wɔ ni wɔnaa kɛji nɔ ko yɛ wɔhe ni esa akɛ wɔjaje, koni wɔkɛkaje kpo. Nakai nɔŋŋ kɛ́ wɔkane Biblia lɛ daa gbi lɛ, ebaaye ebua wɔ ni wɔna kɛji wɔhiɛ susumɔ ko ni ejaaa, ni wɔjaje. Nyɛmimɛi pii ena akɛ, kɛ́ amɛkwɛ daa gbi ŋmalɛ lɛ leebi dani amɛshi shĩa lɛ, eyeɔ ebuaa amɛ waa, ejaakɛ amɛnyɛɔ amɛjwɛŋɔ nɔ  ni amɛkane lɛ nɔ, ni amɛkwɛɔ bɔ ni amɛbaafee amɛkɛtsu nii yɛ gbi lɛ mli. Agbɛnɛ hu, esa akɛ wɔkase Nyɔŋmɔ Wiemɔ lɛ ni wɔjwɛŋ nɔ daa gbi. Ekolɛ wɔbaanu he akɛ enɛ jeee nɔ ko. Shi yɛ anɔkwale mli lɛ, eji nibii ni he hiaa waa ni baanyɛ aye abua wɔ ni wɔhi gbɛ ni elɛɛɛ ni kɛ mɔ yaa naanɔ wala mli lɛ nɔ lɛ ateŋ ekome.

9. Mɛɛ be ekolɛ wɔnaanyo ko baajaje wɔ?

⁹ Ani okaiɔ be ko ni obɔi nɔ ko ni baanyɛ afite okɛ Yehowa teŋ naanyobɔɔ lɛ feemɔ? (Lala 73:2, 3) Ani onaanyo ko ni eda yɛ mumɔŋ lɛ fee ekãa ni ejaje bo? Ni ani obo lɛ toi ni okɛ eŋaawoo lɛ tsu nii? Kɛ́ ofee nakai lɛ, belɛ obɔ mɔdɛŋ waa, ni ŋwanejee ko bɛ he akɛ, ohiɛ sɔɔ onaanyo lɛ waa akɛ ebɔ bo kɔkɔ.​—Abɛi 1:5.

10. Kɛ́ onaanyo ko jaje bo lɛ, te esa akɛ ofee onii ohã tɛŋŋ?

¹⁰ Nyɔŋmɔ Wiemɔ lɛ kɛɔ akɛ: “Naanyo pilamɔi lɛ, anɔkwayeli ni.” (Abɛi 27:6) Mɛni ŋmalɛ nɛɛ tsɔɔ? Naa nɔkwɛmɔnɔ ko ni baanyɛ aye abua wɔ ni wɔnu shishi. Ŋɔɔ lɛ akɛ, oyaafo gbɛ lɛ mli ni mɔ ko tswa bo. Owó foŋ lɛ nɔ ni oyi gbɛ lɛ nɔ ni okwɛɛɛ kɛji tsɔne ko miiba lo. Shi asomoaŋ tsɔne miiba. Kɛkɛ ni onaanyo ko mɔ onine mli waa ni egbala bo kɛje gbɛ lɛ nɔ. Bɔ ni onaanyo lɛ kpiti bo waa lɛ hewɔ lɛ, oniji ahe titi, shi no here oyiwala. Kɛ́ onine lɛ wa ohe gbii pii po lɛ, ani omli baafu onaanyo lɛ akɛ epila bo? Dabi kwraa, obaada lɛ shi moŋ. Yɛ gbɛ ni tamɔ nakai nɔŋŋ nɔ lɛ, kɛ́ nɔ ko ni owie, loo nɔ ko ni ofee lɛ teɔ shi ewoɔ Yehowa mlai kɛ eshishitoo mlai lɛ, ni onaanyo ko gbala ojwɛŋmɔ kɛtee nɔ lɛ, ekolɛ ebaadɔ bo. Shi kaahã omli fu lɛ, ejaakɛ kɛ́ ofee nakai lɛ, oofee buulu. (Jaj. 7:9) Moŋ lɛ, daa lɛ shi akɛ efee ekãa ni ewie.

11. Mɛni baanyɛ ahã mɔ ko atswa ŋaa kpakpa ni enaanyo ko ewo lɛ lɛ eshɛ efɔ̃?

¹¹ Mɛni kwraa baanyɛ ahã mɔ ko atswa ŋaa kpakpa ko ni enaanyo ko ewo lɛ lɛ eshɛ efɔ̃? No ji, henɔwomɔ. Mɛi ni wóɔ amɛhe nɔ lɛ miisumɔ ni daa nɛɛ akɛɛ amɛ nɔ ni ŋɔɔ amɛtoi naa, ni kɛ́ akɛɛ amɛ anɔkwale lɛ, amɛsumɔɔɔ. (2 Tim. 4:3, 4) Amɛnaa amɛhe tsɔ, ni amɛnuɔ he akɛ amɛle nii fe mɔ fɛɛ mɔ. Shi bɔfo Paulo wie akɛ: “Kɛji gbɔmɔ ko susuɔ akɛ mɔ ko ji lɛ be ni ejeee mɔ ko lɛ, eelaka ehe.” (Gal. 6:3) Nɔ ni Maŋtsɛ Solomon wie yɛ Jajelɔ wolo lɛ mli lɛ muɔ sane lɛ fɛɛ naa. Ewie akɛ: “Gbekɛ ohiafo ni hiɛ kã shi lɛ, ehi fe maŋtsɛ ni eda ni eji kwashia ni booo kɔkɔbɔɔ toi dɔŋŋ.”​—Jaj. 4:13.

12. Mɛni wɔkaseɔ yɛ nɔkwɛmɔnɔ kpakpa ni bɔfo Petro fee ni abɔ he amaniɛ yɛ Galatiabii 2:11-14 lɛ mli?

¹² Bɔ ni bɔfo Petro fee enii ehã be ni bɔfo Paulo jaje lɛ yɛ mɛi pii ahiɛ lɛ ji nɔkwɛmɔnɔ kpakpa kɛhã wɔ. (Kanemɔ Galatiabii 2:11-14.) Petro mli fuuu Paulo yɛ bɔ ni ewie sane lɛ ehã kɛ he ni eyawie yɛ lɛ hewɔ, ni enɛ hãa wɔnaa akɛ ehiɛ kã shi. Petro bo ŋaawoo lɛ toi, ni ebɛɛɛ Paulo ewooo emli. Sɛɛ mli po lɛ, etsɛ Paulo akɛ “wɔnyɛmi ni wɔsumɔɔ.”​—2 Pet. 3:15.

13. Kɛ́ wɔyaawo mɔ ko ŋaa lɛ, mɛni esa akɛ wɔfee dã?

¹³ Kɛ́ onu he akɛ esa akɛ owo onaanyo ko ŋaa lɛ, mɛni esa akɛ ofee dã? Bi ohe akɛ: ‘Ani miibu mihe jalɔ kɛmiiteke nɔ?’ (Jaj. 7:16) Mɛi ni buɔ amɛhe jalɔi kɛtekeɔ nɔ lɛ kɛ Yehowa mlai lɛ fɔ̃ɔ afã ni amɛdamɔɔ amɛ diɛŋtsɛ amɛsusumɔ nɔ amɛkojoɔ mɛi, ni bei pii lɛ, amɛfeɔ kpɛŋŋ. Shi kɛ́ osusu sane lɛ he, ni loloolo lɛ oona akɛ esa akɛ owo onaanyo lɛ ŋaa lɛ, tsɔɔmɔ lɛ nɔ pɔtɛɛ ni efeɔ ni ejaaa lɛ, ni okɛ sanebimɔi aye obua lɛ ni enu shishi. Jɛɛ Ŋmalɛ lɛ mli owo lɛ ŋaa lɛ, ni ohã ehi ojwɛŋmɔ mli akɛ, ebaabu enifeemɔi lɛ ahe akɔntaa ehã Yehowa, jeee bo. (Rom. 14:10) Be fɛɛ be ni obaawo  mɔ ko ŋaa lɛ, jɛɛ Nyɔŋmɔ Wiemɔ lɛ mli ofee nakai, ni agbɛnɛ hu, ofee nakai kɛ musuŋtsɔlɛ, tamɔ bɔ ni Yesu fee lɛ. (Abɛi 3:5; Mat. 12:20) Mɛni hewɔ? Ejaakɛ bɔ ni wɔkɛ mɛi yeɔ wɔhãa lɛ, nakai Yehowa hu kɛ wɔ baaye ehã.​—Yak. 2:13.

14. Mɛni Yehowa asafo lɛ feɔ ehãa wɔ?

¹⁴ Yehowa tsɔɔ egbɛjianɔtoo lɛ fã ni yɔɔ shikpɔŋ lɛ nɔ lɛ nɔ ekɛ gbɛtsɔɔmɔi hãa wɔ koni wɔhi gbɛ ni kɛ mɔ yaa wala mli lɛ nɔ. Yehowa asafo lɛ toɔ kpeei ahe gbɛjianɔ, ni efeɔ vidioi kɛ woji ni yeɔ ebuaa wɔ koni wɔkɛ Nyɔŋmɔ Wiemɔ lɛ atsu nii yɛ wɔshihilɛ mli. Saji ni yɔɔ wɔwoji lɛ amli kɛ saji ni wɔsusuɔ he yɛ wɔkpeei lɛ ashishi lɛ jɛ Biblia lɛ mli, ni no hewɔ lɛ, wɔle akɛ amɛja. Gbɛtsɔɔmɔ Kuu lɛ hãa mumɔ krɔŋkrɔŋ lɛ kudɔɔ amɛ kɛ́ amɛmiikpɛ yiŋ yɛ gbɛ ni hi fe fɛɛ ni abaanyɛ atsɔ nɔ atsu shiɛmɔ nitsumɔ lɛ he. Fɛɛ sɛɛ lɛ, yɛ be kɛ beiaŋ lɛ, amɛsusuɔ yiŋ srɔtoi ni amɛkpɛ lɛ ahe ekoŋŋ, ni amɛkwɛɔ kɛji esa akɛ amɛfee tsakemɔi yɛ mli. Mɛni hewɔ? Ejaakɛ ‘je nɛŋ shihilɛ lɛ miitsake,’ ni esa akɛ Yehowa asafo lɛ atsake ehe ewo shihilɛ lɛ mli.​—1 Kor. 7:31.

15. Mɛɛ naagbai nyɛmimɛi komɛi kɛkpe?

¹⁵ Kɛ́ Yehowa asafo lɛ hã wɔ gbɛtsɔɔmɔi yɛ saji ni kɔɔ Biblia tsɔɔmɔi loo jeŋba he lɛ ahe lɛ, wɔkpɛlɛɔ nɔ ni wɔkɛtsuɔ nii oya. Shi ani nakai nɔŋŋ wɔfeɔ kɛ́ ahã wɔ gbɛtsɔɔmɔi yɛ nibii krokomɛi ahe? Akɛ nɔkwɛmɔnɔ lɛ, nyɛsɛɛ nɛɛ shika abɔ ni afiteɔ yɛ Maŋtsɛyeli Asai amaamɔ kɛ amɛkuramɔ he lɛ etee ŋwɛi waa. No hewɔ lɛ, Gbɛtsɔɔmɔ Kuu lɛ eto gbɛjianɔ koni kɛ́ ebaahi lɛ, asafoi pii anyɛ amɛkɛ Maŋtsɛyeli Asa kome atsu nii. Enɛ hewɔ lɛ, ahã asafoi komɛi eyafata asafoi krokomɛi ahe ni ahɔ̃ɔ Maŋtsɛyeli Asai komɛi, ni akɛ shika lɛ miimamɔ Maŋtsɛyeli Asai yɛ hei ni Maŋtsɛyeli Asai ahe ehia waa yɛ lɛ. Ani tsakemɔi nɛɛ eko esa ohe? Ani afee asafoi komɛi ekome yɛ he ni oyɔɔ lɛ loo ahɔ̃ɔ Maŋtsɛyeli Asai komɛi? Kɛ́ nakai ni lɛ, ekolɛ ebaanyɛ ewa kɛhã bo akɛ obaakpɛlɛ tsakemɔ nɛɛ nɔ. Akɛ nɔkwɛmɔnɔ lɛ, ekolɛ he ni oyaa asafoŋ kpeei yɛ bianɛ lɛ jekɛ fe he ni kulɛ oyaa yɛ lɛ. Aloo ekolɛ nyɛgbo deŋme kɛma Maŋtsɛyeli Asa ko loo nyɛkɛkura shi amrɔ nɛɛ ahɔ̃ɔ ni ekolɛ oonu he akɛ nyɛdeŋmegbomɔ lɛ efee efolo. Kɛ̃lɛ, okpɛlɛ tsakemɔi nɛɛ anɔ ni okɛmiitsu nii, ni osa yijiemɔ waa.

16. Kɛ́ wɔkɛ ŋaa ni awo yɛ Kolosebii 3:23, 24 lɛ tsu nii lɛ, mɛɛ gbɛ nɔ ebaaye ebua wɔ ni wɔkahã nɔ ko fite wɔmiishɛɛ?

 ¹⁶ Kɛ́ wɔhã ehi wɔjwɛŋmɔ mli akɛ, nɔ fɛɛ nɔ ni wɔtsuɔ lɛ, Yehowa wɔtsuɔ wɔhãa, ni akɛ, lɛ ekudɔɔ asafo lɛ, nɔ ko bɛ ni baafite wɔmiishɛɛ. (Kanemɔ Kolosebii 3:23, 24.) Maŋtsɛ David fee enɛ he nɔkwɛmɔnɔ kpakpa. Be ni ekɛ nibii hãa kɛhã sɔlemɔ shĩa lɛ maa lɛ, ewie akɛ: “Namɔ ji mi, ni namɛi ji mimaŋbii lɛ, ni wɔɔjɛ wɔsuɔmɔ mli wɔhã nii tamɔ nɛkɛ? Ejaakɛ nɔ fɛɛ nɔ jɛ oŋɔɔ, ni nɔ ni wɔná kɛjɛ odɛŋ lɛ, no ji nɔ ni wɔkɛhã bo nɛɛ.” (1 Kro. 29:14) Oniai fɛɛ ni wɔtsuɔ lɛ, Yehowa dɛŋ wɔná kɛjɛ. Kɛ̃lɛ ehiɛ sɔɔ, ni ehiɛ sɔɔ wɔbe kɛ wɔhewalɛ ni wɔkɛfiɔ enitsumɔ lɛ sɛɛ lɛ hu.​—2 Kor. 9:7.

17. Kɛ́ ona akɛ esa akɛ ofee tsakemɔ ko lɛ, mɛni hewɔ esaaa akɛ ohãa no jeɔ onijiaŋ wui?

¹⁷ Kɛ́ wɔsumɔɔɔ ni wɔjeɔ gbɛ ni elɛɛɛ ni kɛ mɔ yaa wala mli lɛ nɔ lɛ, belɛ esa akɛ wɔnyiɛ Yesu nanemaahei lɛ asɛɛ kpaakpa. (1 Pet. 2:21) Kɛ́ ona akɛ esa akɛ ofee tsakemɔi komɛi lɛ, kaahã no je onijiaŋ wui. Yɛ anɔkwale mli lɛ, na ni ona akɛ esa akɛ ofee tsakemɔi lɛ po tsɔɔ akɛ, oosumɔ ni okɛ Yehowa gbɛtsɔɔmɔi atsu nii. Esa akɛ wɔhã ehi wɔjwɛŋmɔ mli akɛ, bei abɔ ni wɔyeee emuu nɛɛ, Yehowa le akɛ wɔnyɛŋ wɔnyiɛ Yesu nanemaahei lɛ asɛɛ pɛpɛɛpɛ ni wɔtɔ̃ɔɔ shi kome po.

18. Mɛni baaye abua wɔ ni wɔná miishɛɛ bianɛ, kɛ naanɔ wala hu yɛ jeŋ hee lɛ mli?

¹⁸ Nyɛhãa wɔ fɛɛ wɔkɛ wɔjwɛŋmɔ amaa jɔɔmɔi ni wɔbaaná wɔsɛɛ lɛ anɔ, ni wɔjɛ wɔsuɔmɔ mli wɔfee tsakemɔi yɛ bɔ ni wɔsusuɔ nii ahe wɔhãa, wɔsubaŋ, kɛ bɔ ni wɔfeɔ wɔnii wɔhãa lɛ mli. (Abɛi 4:25; Luka 9:62) Nyɛhãa wɔbaa wɔhe shi daa, ni wɔkɛ ŋaa nɛɛ ni bɔfo Paulo wo lɛ atsu nii akɛ, ‘be fɛɛ be lɛ, wɔná miishɛɛ, ni wɔhã ajaje wɔ.’ (2 Kor. 13:11) Kɛ́ wɔfee nakai lɛ, ‘suɔmɔ kɛ toiŋjɔlɛ Nyɔŋmɔ lɛ kɛ wɔ baahi shi,’ ni ebaawa wɔ ni wɔná miishɛɛ bianɛ, kɛ naanɔ wala hu yɛ jeŋ hee lɛ mli.