1. Matev 7:13, 14-a pormonnem ami koslea vatten choltat?

AMI soglim Jehovachi seva korunk amchean zata titlo proitn kortat. Hem kortat tednam ami tachea odhikara khala aslolea novea sonvsarant jieunk pavtat. Dor disa ami jivitak pavoita tea vatten cholonk vavurtat. Punn Jezun sanglolem toxem ti vatt oxir asa, ani khubxe pavtti tea vatter cholonk kotthin zata. (Matev 7:13, 14 vachat.) Ani oporipurnn aslolean te vatte thaun ami sompeponnim koddsoronk xoktat.—Gal. 6:1.

2. Hea lekhant ami kitem xiktolim? (“ Bodlav Korunk Khaltikai Amkam Modot Korta,” hem boks pasun polloiat.)

² Jivitachea oxir rostear cholot ravonk zai zalear ami amchea chintnant, sobhavant ani korneant ‘sudharnni vo bodlav korunk’ toiar asonk zai. (2 Kor. 13:11) Apostl Paulun Korintant aslolea Kristanvank “odik-odik sudharonk vavrat” mhunn sanglem ani ho sol’lo amkam pasun lagu zata. Amchea jivitant sudharnni korunk Bible amkam koso modot korta ani jivitachea vatten cholot ravonk, sotant ghott aslolim ixttam amkam koxim modot korunk xoktat tea vixim ami hea lekhant xiktolim. Jehovachea songottnne thaun melltta tem margdorxon pallunk kednam kotthin zaunk xokta tem-ui ami xiktolim. Toxench, amkam khaltikai asa zalear Jehovachea sevent amchi khuxalkai unni zaunk dinastana goroz te bodlav korunk amkam koxi modot zata tem pasun ami polloitolim.

3. Devachem Utor tumkam koxem modot korunk xokta?

³ Amchim chintnam ani bhavnam topasunk amkam kotthin zaunk xokta. Karonn amchem kalliz ghatki aslolean tem amkam khoinchea vatten voddun vhorta tem somzonk amkam kotthin zaunk puro. (Jer. 17:9) Tor ami amkanch sompeponnim ‘fosounk xoktat.’ (Jak. 1:22) Taka lagon, Devachem Utor uzar  korun ami amchi topasnni korunk zai. Devachem Utor amchea ‘kallzache otrek vo irade ani chintnam’ zannam zaunk amkam modot korunk xokta. (Heb. 4:12, 13) Devachem Utor eka X-ray machine-a sarkem, ami bhitorlean koxim asat tem zannam zaunk amkam modot korta. Punn Devachea Utra thaun vo fuddakar ghetolea bhavam thaun amkam mellttat te sol’le ami apnnaitolim zalear ami khaltim asop gorjechem.

4. Saulu Raza gorvixtt zalo mhunn amkam koxem kolltta?

⁴ Amkam khaltikai na zalear kitem zaunk xokta tem amkam Saulu Razachea udharonnantlean kollon ieta. Saulu khub gorvixtt aslo ani taka lagon to aplim chintnam ani vagnnunk bodlunk toiar naslo. (St. 36:1, 2; Hab. 2:4) Amalekitank haroilea uprant, Saulun kitem korunk zai aslem tea vixim Jehovan taka margdorxon dil’lem tednam hem dison ailem. Saulun Jehovachem aikonk na. Ani provadi Samuel tea vixim tache lagim ulounk gelo tednam Saulun apli chuk manun gheunk na. Tachea bodlek, ti chuk titli vhodd nasli mhunn sangon, tannem tacho guneanv lokancher thaplo. (1 Sam. 15:13-24) Hachea poili pasun Saulun oxench kel’lem. (1 Sam. 13:10-14) Dukhachem mhunnttlear, Saulu gorvixtt zalo dekhun tannem aplem chintop bodlunk na. Ani taka lagon, Jehovan taka xist dili ani taka nakarlo.

5. Saulu thaun ami kitem xikonk zata?

⁵ Amkam Saulu bhaxen zaunk naka zalear ami amkanch he prosn vicharunk zai. ‘Hanv Devachem Utor vachta tednam tantuntle sol’le mhaka lagu zainant mhunn hanv chintam kai? Hanvem keloli chuk titli vhoddli nhoi mhunn hanv chintam kai? Mhojea chukincho guneanv hanv dusreancher ghaltam kai?’ Hantuntlea khoinchea-i prosnank amcho zobab hoi asa zalear amchea chintpant ani korneant ami bodlav korchi goroz asa. Na zalear ami itlim gorvixtt zatolim ki Jehova amkam aplim ixtt mhunn lekhcho na.—Jak. 4:6.

6. Raza David, Saulu Raza thaun koso vegllo aslo?

⁶ Sauluchea uprant ailolo Raza David koso vegllo aslo tem polloum-ia. David Raza ‘Jehovachea updesancho mog’ kortalo. (St. 1:1-3) Jehova khalteank salvar korta punn gorvixttank nakarta mhunn David zannam aslo. (2 Sam. 22:28) Tor, tannem Devachea Utra pormonnem aplem chintop bodol’lem. Tannem boroilem: “Sorvespor mhaka budh dita: dekhun hanv Taka dhinvastam; ratchem porian mhojem kalliz mhaka xikoita, budh dita.”—St. 16:7.

7. Ami khaltim asat zalear ami kitem kortolim?

⁷ Ami khaltim asat zalear amchim chukichim chintnam amkam chukicheo korneo korunk pavoichea poilim, ami Devachea Utra pormonnem amchea chintpant bodlav kortolim. Tednam Devachem Utor eka avaza sarkem amkam aikonk ietolem: “Hich ti vatt, tech vatten cholun voch.” Ami chukichea vatten cholon voitat tednam Devachem Utor amkam xittkaitolem. (Iz. 30:21) Ami Jehovachem aikotat tednam amkam zaitea vattamnim faido zata. (Iz. 48:17) Udharonnak, oxem kelolean dusreank amkam sol’lo diunk goroz poddchi na ani sol’lo melltta tednam zata ti loz amkam bhogunk poddchi na. Tea bhair, Jehova amchi kallji gheupi ek mogall Bap mhunn ami vollkhon ghetat dekhun ami tachea anik lagim soronk pavtolim.—Heb. 12:7.

8. Jakob 1:22-25-ant sanglolea pormonnem Devachem Utor ami eka harxea sarkem koxem uzar korunk xoktat?

⁸ Devachem Utor eka harxea sarkem zaunk xokta. (Jakob 1:22-25 vachat.) Dor disa ami ghora thaun bhair sorchea poilim amchem tondd harxeant polloitat. Hea toren dusreamnim amchem tondd pollounchea poilim amkam kitem sarkem disona zalear ami tem sarkem kortat. Teach toren, ami dor disa Bible vachtat tednam amchea chintpant ani sobhavant kosle bodlav korunk zai, tem amkam dison ieta. Ghora thaun bhair sorchea poilim, dor disa sokallim daily text vachlolean zaiteank  faido zata. Tannim vachlam tacho, tim aplea chintpacher probhav poddonk ditat. Devachea Utrantlean mell’llolo sol’lo ak’kho dis tim veg-vegllea toren apnnauncho proitn kortat. Tea bhair, ami dor disa Bible vachun tacher niall korunk zai. Hem korop vhoddlem nhoi, oxem amkam disonk puro. Punn jivitak pavoita tea oxir rostear cholot ravonk hem ekdom gorjechem zaun asa.

9. Tumchea ixttak, tumkam kiteak xittkaunchem poddot?

⁹ Jehova sangata asloli tumchi ixttagot pidd’ddear korta toslea vatten cholonk tumi kednam-i suru kel’lem kai? (St. 73:2, 3) Tea vellar, sotant ghott aslolea eka ixttan tumkam xittkailem astolem. Tacho sol’lo aikon to tumi apnnailo kai? Toxem zalear, tumi sarkem tem kelem ani tumchea ixttan tea vellar tumkam xittkailem mhunn tumi tachim upkari astolim.—Mho. 1:5.

10. Tumcho ek ixtt tumkam xittkaita tednam tumi kitem kortolim?

¹⁰ Devachem Utor amchea ugddasak haddtta: “Eka dusmanachea umea poros, eka visvaxi ixttacho mar odik boro.” (Mho. 27:6) Hacho orth kitem? Chintat, tumi rosto par korcho proitn kortat. Tea rostear khub gaddio voitat. Punn tumi tumchea fonacheruch dhean di-it asat dekhun tumi hea-vatten tea-vatten pollounk chuktat ani ek gaddi tumchea vatten ieta. Teach vellar, tumcho ek ixtt tumcho hat ghott dhorun tumkam rosteachea kuxik voddtta. Punn to tumcho hat dhorun voddtta tednam tumchea hatak dukh zata ani ti dukh zaite dis urta. Atam tumchea ixttan tumkam dukhoilem mhunn tumi ragar zatolim kai? Na nhoi. Bodlek, tannem tumkam modot keli mhunn tumi tachim upkari astolim. Teach bhaxen, tumchem ulovop vo vagnnuk Devachea nitichea dorjeam pormonnem na mhunn ek ixtt tumkam xittkaita tednam tumkam survatek dukh zaunk puro. Punn tannem tumkam sol’lo dilo mhunn tumi tacher ragar zalear tem pixemponn zatolem. (Up. 7:9) Tachea bodlek, tannem tumkam xittkailem dekhun tumi tachem upkari asonk zai.

11. Eka borea ixttan dil’lo sol’lo eklo kiteak nakarunk xokta?

¹¹ Eka borea ixttan dil’lo sol’lo eklo kiteak nakarunk xokta? Gorvak lagon. Gorvixtt lokank ‘dusreamnim aple kan korzoil’le’ borem dista ani te ‘sotak aple kan bhere kortat.’ (2 Tim. 4:3, 4) Dusream poros apunn vortim mhunn tim chintat dekhun tanchea sol’leachi apnnak goroz na oxem tankam dista. Punn apostl Paulun boroilem: “Jim konn, apunn kaich nhoi astana, apunn kitem tori mhonn somzotat, tim apnnankuch fosoitat.” (Gal. 6:3) Hem amkam Solomon Razan bore toren somzailem. Tannem boroilem: ‘Ek raza aplea mhatarponnar budhi ghena zalear, eka gorib punn huxar tornattea poros to odik vorto nhoi.’—Up. 4:13, 14.

12. Galasiekarank 2:11-14-ant dilolea apostl Pedruchea udharonnantlean ami kitem xiktat?

¹² Paulun dusream mukhar Pedruk sol’lo dilo tednam Pedrun kitem kelem tea vixim chintat. (Galasiekarank 2:11-14 vachat.) Paulun taka jea toren dusreanchea fuddem sol’lo dilo, tea vixim chintun Pedru rag dhorunk xoktalo. Punn Pedru zannvaiecho munis aslo. Taka dil’lo sol’lo tannem apnnailo ani Paulu add tannem rag dhorunk na. Tachea bodlek, to uprant Pauluk ‘mogacho bhav’ mhunntta.—2 Ped. 3:15.

13. Ami konnakui sol’lo diunchea poilim kitem ugddas dovrunk zai?

¹³ Tumchea eka ixttak sol’lo diunk zai oxem tumkam dista zalear tumi poilim kitem korunk zai? Tanchea lagim ulounchea poilim tumi tumkanch vicharunk zai, ‘Hanv “choddui xannom” mhunn somzota kai?’ (Up. 7:16) Apunn chodd xannom mhunn somzota to munis Jehovachea dorjeam pormonnem  nhoi, punn aplea dorjeam pormonnem dusreanchi nit korta, ani to doiall toren vagona. Tumi tumchea ixttak kiteak sol’lo diunk sodhtat hea vixim chintlea uprant pasun taka sol’lo diunk zai oxem tumkam dista zalear tumi khoinchea vixoi-acher ulounk sodhtat tem taka spoxtt sangat. Ani tannem kelea ti chuk mhunn somzonk taka prosn vicharat. Tachi nit korchi zobabdari tumchi nhoi, mhunn ugddas dovrat. Punn tannem kel’lea chuki vixim Jehovak koxem dista tem somzonk taka modot korat. (Rom. 14:10) Bible-ant aslolea zannvaiechea adarit taka sol’lo diat ani to sol’lo ditana Jezun dakhoili toxi doia-maia dakhoiat. (Mho. 3:5; Mt. 12:20) Kiteak? Karonn ami jea toren dusream sangata vagtat, teach toren Jehova amchea sangata vagtolo.—Jak. 2:13.

14. Devachem songotton amkam kitem dita?

¹⁴ Jehova aplea prithumer aslolea songottnne udexim jivitachea rostear cholonk amkam modot korta. Tachea Utrant aslole sol’le apnnaunk to amkam aplea songottnne udexim viddeo, prokaxonam ani mittingechi manddavoll korun modot korta. Tantuntlean melltta ti mahiti Devachea Utracher adarit asta. Porgottnnechem kam bore toren korchea vixim Sonchalon Monddollintle bhav povitr xoktecher patieun nirnnoi ghetat. Tori astana, tannim te nirnnoi ghetlea uprant pasun tantunt koslo-i tori bodlav korunk zai kai mhunn te vella-vellar chintit astat. Karonn ‘sonvsarachem rup bodlot voita’ toxeo noveo poristhiti upzotat. Tor tea pormonnem Devachea songottnnek bodlav korche poddttat.—1 Kor. 7:31.

15. Thoddea porgottnnarank koslea eka oddchonnecho fuddo korcho poddla?

¹⁵ Bible-achea eka xikounne vixim vo eka noitik dorjea vixim Devachem songotton ek novi somzonni dita tednam ami ti manun gheun apnnaitat. Punn songotton korta te bodlav amkam manun gheunk kotthin zata tednam kitem? Udharonnak, halinchea vorsamnim ami bhoktek lagon uzar kortat teo building-o bandunk ani samballunk lagta to khorch chodd vaddla. Tor zaitea sobhamnim ekuch Raj-ghor uzar korunk Sonchalon Monddollan margdorxon dilam. Hea bodlavak lagon thoddeo sobha anik eke sobhe sangata, ek keleat ani thoddim Raj-ghoram vikleant. Oxem kelolean melltta to poiso chodd goroz asa tea zagear Raj-ghoram bandunk adar zata. Tumi  ravtat tea zagear tumchem Raj-ghor viklam kai vo tumchi sobha dusrea eka sobhe sangata ek kelea kai? Toxem zalear, novea poristhiti pormonnem bodol korunk tumkam kotthin zaunk puro. Thoddea porgottnnarank ghoddie mittingek vochonk chodd pois provas korcho poddot ani thoddeamnim Raj-ghor bandunk ani samballunk zaito vavr kel’lo astolo. Tor atam tem Raj-ghor kiteak viktat kai oxem tankam disonk puro. Tannim ghatlolo soglo vell ani proitn udkant gele mhunn tankam disot. Tori astana, te nove bodlav manun ghetat dekhun tankam xabaski favo.

16. 2 Korintkarank 6:1-ant aslolo sol’lo apnnailolean sodanch khuxal ravonk amkam koxi modot zata?

¹⁶ Ami Jehova pasot kam kortat, ani to aplea songottnnek margdorxon dita mhunn ami ugddas dovortat zalear ami sodanch khuxal astolim. (2 Korintkarank 6:1 vachat.) Devmondir bandunk poixe diun, David Razan amkam ek borem udharonn dovorlam. Tannem mhunnttlem: “He bhaxen khuxemonan bhettovnni korunk hanv konn? Ani mhoji porza kitem? Sogllem Tuje koddsun ailam. Ani Tujem tem tuka dilam.” (1 Itihas. 29:14) Hem khorem ki ami kitem-i dan kortat tednam Jehovan amkam dilam tench ami taka porot ditat. Tori astana, tachea kama pasot ami ditat to vell, xokti ani poixe vo vostuncho Jehova valor korta.—2 Kor. 9:7.

17. Tumkam bodlav korunk zai oxem dista zalear tumi kiteak nirax zaunchem nhoi?

¹⁷ Jivitak pavoita tea oxir rostear cholot ravonk zai zalear ami Jezuchi dekh gheunk zai. (1 Ped. 2:21) Tumi bodlav korchi goroz asa mhunn tumkam dista zalear nirax zainakat. Karonn tumi bodlav korunk sodhtat hacho orth, tumi Jehovachem margdorxon apnnaunk sodhtat. Ami oporipurnn asat dekhun ami poripurnn toren Jezuchi dekh gheunk zai mhunn Jehova opekxa korina, hem ami ugddas dovrunk zai.

18. Ami kitem korop gorjechem?

¹⁸ Ami soglim, fuddaracher dhean diun amchea chintpant, sobhavant ani korneant bodlav korum-ia. (Mho. 4:25; Lukas 9:62) Ami khaltikaien, khuxemonan ‘sudhorot ravum-ia.’ (2 Kor. 13:11) Ami oxem kortat zalear, “mogacho ani xanticho Dev [amche] sovem astolo.” To amkam atam khuxal asonk modot kortolo ani novea sonvsarant sasnachem jivit ditolo.