1. Mateo 7:13, 14 tä niere erere, ¿ñobätä ni kristiano tä näin kä keteiti kokwäre ye kwrere ni raba niere?

METRERE ni kristiano jökrä tä näin kä keteiti kokwäre ye erere. Kä keteiti kokwäre nita näin ye abokän kä bä nuäre känti ni Rün kä kwinbiti Jehová käkwe ni gobrain ye kokwäre nita näin. Köbö kwatire kwatire nita ja di ngwen rikakäre ji niken ni ngwena ja nire kokwäre yebiti. Akwa Jesukwe niebare erere, ruäre ngwane ñaka tä nemen nuäre ni kräke rikakäre ji krä chi yebiti (ñäkädre Mateo 7:13, 14 yebätä). * Ni töi ngite yebätä bäsi käre ni töta nemen kämikaikä ji yebätä (Gál. 6:1).

2. ¿Dre rabai gare nie kukwe ja tötikara nekänti? (Recuadro “ Ja töi mikadre bobre ye tä ni dimike ja töi ükete” ye mikadre ñärärä).

² Ji krä chi niken ni ngwena ja nire kokwäre yebiti ni tädre jankunu yekäre, nita töbike ño, ja ngwanta ño nikwe aune dre tuin kwin nie yebätä ni tädre juto biare ja töi kwitakäre jankunu. Ja töi ükadrete jankunu ye arabätä Pablo nämäne blite, yebätä niebare kwe nitre kristiano Corinto ie, “munkwe ja töi mika nüne kuin metre” (2 Cor. 13:11). Kukwe niebare Pablokwe ye täbe ütiäte ni kräke kä nengwane. Biblia raba ni dimike ño ja töi ükete, nita ja ngwen ño, nita töbike ño aune dre tuin kwin nie yebätä aune ji ja nire kokwäre yebiti ni rikadre jankunu yekäre, ja ketamuko ünä kukwe ja üairebiti raba ni dimike ño ye rabai gare nie kukwe ja tötikara nekänti. Ne ben arato juta Jehovakwe tä kukwe bien nuaindre nie ye kukwe meden känti ñaka raba nemen nuäre ni kräke mikakäre täte yebätä nibike blite. Aune ni tö ja töi kwitabätä aune Jehová mikabätä täte kä jutobiti jankunu yekäre ja töi mikadre bobre ye ñobätä ütiäte krubäte ye rabai gare nie kukwe ja tötikara nekänti.

3. ¿Kukwe Ngöbökwe raba ni dimike dre mike gare jai?

³ Nita töbike ño aune ja ruin ño nie ye kwin o ño ye ñaka tä nemen nuäre ni kräke mikakäre gare jai. ¿Ñobätä? Ñobätä ñan aune ni brukwä ye tä ni ngökö aune tä niken ni ngwena medenkwäre ye ñaka tä nemen nuäre ni kräke mikakäre gare jai (Jer. 17:9). Bä kabre ni ara tä ja ngököta kukwe ngwarbebiti (Sant. 1:22). Ye medenbätä, Ngöbö kukwei yebiti nikwe ja trä tuadre ye ütiäte krubäte. Biblia ye tä ni dimike ne kwe “ni töi amne ni moto” bäri tiebe abokän tä ni brukwäte nguse ye tä ño mike gare jai (Heb. 4:12, 13). Kukwe madabiti, ye abokän rayo X ye erere, ni ño terita metrere ye mikata gare kwe nie. Ne madakäre, kukwe nieta Bibliabätä aune nitre ji ngwanka tä dre niere ye käkwe ni dimikadre yekäre, nikwe ja töi mikadre bobre ütiäte ye krubäte.

4. ¿Saúl nämäne bike kri ye ñokänti gare nie?

⁴ Ni ñaka töi bobre ngwane, dre raba nemen bare nibätä ye kukwe namani bare Saulbätä tä mike gare metre. Nämäne töbike ño aune ja ngwen ño yebätä ja töi kwitadre kwe näre, akwa namani bike kri yebätä ti ja töi kwitadre ye ñaka niebare kwe jai aune ñaka ni mada tuanimetre niere jai (Sal. 36:1, 2; Hab. 2:4). Ñodre, nitre amalequita ganaindre kwe ye bitikäre dre nuaindre kwe bätätre Jehovakwe niebare ie, ye ñaka mikani täte kwe yebiti nämäne bike kri bämikani kwe. Ja mikani ngite kwe yebätä Samuel mäträbarebätä ngwane, ja mikani ngite kwe ye ñaka niebare kwe Samuel ie, ñakare aune kukwe mikani kwe jabiti aune Ngöbö ñaka mikani täte kwe ye köböite kukwe rabai barebätä ye ñaka mikani ütiäte kwe jai aune ngite kitani kwe nitre madabiti (1 Sam. 15:13-24). Akwa, ye ñan krire ja töi mikani kore kwe (1 Sam. 13:10-14). Ja brukwä mikani bike kri kwe. Aune ñaka ja töi ükaninte kwe yebätä Jehovakwe ñäkäbare ie aune ñan kani ngäbiti mada kwe.

5. ¿Kukwe namani bare Saulbätä yebätä dre raba nemen gare nie?

⁵ Dre namani bare Saulbätä ñaka rabadre bare nibätä, yekäre nikwe kukwe ne ngwandretari jai: “¿Tita kukwe mike jabiti ñaka kukwe nieta Bibliabätä ye mikakäre täte? ¿Tita dre nuainne ye ñaka blo ruin tie ya? ¿Tita dre nuainne yebätä tita ngite kite ni madabiti?”. Nikwe jän nini kukwe ngwantarita ne ie ngwane, ni rabadre ja töi kwite kukwe yebätä. Nikwe ñaka nuaindi ngwane, ni brukwä jatai bike kri aune ye köböite Jehová ñaka rabaira ja kete nibe (Sant. 4:6).

6. ¿Ñobätä rei David aune rei Saúl ñaka ja ngwani ja erebe?

⁶ David ñaka ja ngwani Saúl erere, ñobätä ñan aune nämäne “kukwe Jehovakwe ye tarere” ye ani mike gare jai (Sal. 1:1-3). Jehová tä nitre töi bobre ye mike kwäre aune tä ja mike nitre bike kri ye rüere nämäne gare David ie (2 Sam. 22:28). Ye medenbätä kukwe Ngöbökwe ye tuanimetre kwe ja töi ükete. Yebätä tikani kwe: “Tikwe Jehová käikitaikä, niarakwe mäträbare tibätä. Ti töi bäri kaibe ye tä mäträre tibätä deu arato” (Sal. 16:7).

7. ¿Ni töi bobre ngwane nikwe dre nuaindi?

⁷ Ni töi bobre ngwane, nikwe Biblia tuainmetre ja töi käme ye ükete ne kwe nikwe ñaka kukwe käme nuaindre yekäre. Kukwe Ngöbökwe, ye abokän ni mada tä kukwe niere nie ye kwrere, käkwe niedi nie: “Ji ne ara. Näinbiti”. Ni rikai ji blobiti ngwane, küde ruinkri o küde ngeberekri ngwane ni mikai mokre kwe (Is. 30:21). Jehová kukwe nuadre ye käkwe ni dimikai krubäte (Is. 48:17). Ñodre, ni madakwe ni olo kekadrete ye tä ni mike ja gaire ye ñaka rabai bare nibätä. Aune ja rabai ruin bäri Jehová ken nie ñobätä ñan aune niara tä ni mike tuin jai monso tare kwe ye erere (Heb. 12:7).

8. Santiago 1:22-25 tä niere erere, ¿kukwe Ngöbökwe ye raba nemen ño ñuai okwä ye kwrere ni kräke?

⁸ Kukwe Ngöbökwe ye raba nemen ñuai okwä ye kwrere ni kräke (ñäkädre Santiago 1:22-25 yebätä). Dekä dekä, nitre jökrä bäsi tä ja mike ñärärä ñuaite rikadre ye känenkri. Ye köböire ja täbe ükadrete ie o ño tä mike ñärärä ne kwe nitre madakwe ñaka gadre yekäre. Ye erere arato, nita ñäke Bibliabätä köbö kwatire kwatire ngwane, ni  töi aune nita ja ngwen ño ye “täbe ükadrete nie” o ño ye nita mike gare jai. Ja mräkätre kwati tä ñäke texto köbö kwatire kwatire yebätä dekä rikadre ye känenkri, ye köböire tä kukwe ye tuenmetre nemenkä ja töite. Tätre ñäke dekä dekä kukwe yebätä ye bitikäre raba kukwe ye mike ño täte tä dre dre nuainne yebätä, yebätä tätre ja töi mike. Ne madakäre, nikwe ñäkädre Bibliabätä aune töbikadretaribätä köbö kwatire kwatire. Ye raba tuin nuäre nie, akwa ye raba ni dimike krubäte ne kwe ni tädre näin jankunu ji krä chi tä niken ni ngwena nüna yebiti kokwäre.

9. ¿Ja ketamuko nikwe käkwe ni töi ükadrete ye ñongwane nita ribere jai?

⁹ ¿Ji krati raba ni denkä Jehovabätä mentokwäre yebiti nikwe dikakabarera bati ya? (Sal. 73:2, 3). Ja ketamuko iti ünä kukwe ja üairebiti käkwe ni töi ükaninte, ¿ye nikwe kukwe nuabare aune kukwe niebare kwe ye nikwe mikani täte? Nikwe nuainbare ngwane nikwe kukwe kwin diani nuaindre jai aune blitabare kwe nibe yebätä nita debe bien krubäte (Prov. 1:5).

10. ¿Ja ketamuko nikwe ni töi ükadrete ngwane nikwe dre nuaindre?

¹⁰ “Ja ngwanbätä metre nie ja ketamuko nikwe tä ni nuainne tare” ye Kukwe Ngöbökwe tä ngwen törö nie (Prov. 27:6). ¿Kukwe ye dre gärätä? Ani bämike. Karo nöbrö krati yekänti ta ni rikadre ngwane aune ni rabadre ja näkwite teléfono yete. Ni rikadre jiteta aune ñan dokwä kadrekä kwin. Ye ngwane, ja ketamuko nikwe käkwe ni kadre küdebiti aune ni kitadreta ja jiebiti kwe. Ni kadre ja dibiti kwe ye köböite ni küde rabai kremane. Akwa, ni dimikai jötrö kwe yebätä karo ñaka matai ni te. Köbö kabre te ni küde rabai tare, akwa ni ñaka rabai rubun ja ketamuko nikwe kräke ¿ñan ererea? Ñakare aune, ni dimikani kwe yebätä nikwe debe biain ie. Ye erere arato, nita blite ño o nita ja ngwen ño ye ñaka nuainta nikwe kukwe ükaninte Ngöbökwe ño ye ererebätä ye ja ketamuko iti käkwe niedre nie ngwane, kenanbe rabai nemen tare nie, akwa rabadre blo ni kräke o ni rabadre rubun yebiti ni ñaka tä ja ngwen töbätä nita bämike (Ecl. 7:9). Blitabare kwe nibe yebätä nikwe debe biandre ye nuaindre nikwe ye bäri kwin.

11. Ja ketamuko tä mäträre töi kwinbiti nibätä, ¿ye dre ñaka raba ni tuenmetre kukwe ye kain ngäbiti?

¹¹ Ja ketamuko tä mäträre töi kwinbiti nibätä, ¿ye dre raba ñaka ni tuenmetre kukwe ye kain ngäbiti? Bika kri. Nitre tä bike kri ye ñaka tä kukwe metre ye kukwe nuin, ñakare aune kukwe meden niedre ie, ye niedre ie ye aibe töta nemen kukwe nuai (2 Tim. 4:3, 4). Ñaka tä nitre mada kukwe nuin ñobätä ñan aune ja ruin bäri töbätä aune ütiäte ie ni mada kräke. Akwa Gálatas 6:3 yete apóstol Pablo käkwe niebare: “Nire nire abko ütiäte ñakare, akwa ja rabadre ruen kri ie mräkä mda mdabtä mun ngätäite, [...] ye ngwane ni ye tä ja ngököta au”. Aune Eclesiastés 4:13 yete rei Salomón käkwe niebare: “Monso chi bobre akwa töbätä ye bäri kwin rei umbre akwa ñaka töbike metre ye kräke, ñan töbike metre yebätä mäträtabätä ye ñan ka ngäbitita kwe”.

12. Gálatas 2:11-14 tä niere erere, ¿apóstol Pedro käkwe ja ngwani ño yebätä dre raba nemen gare nie?

¹² Apóstol Pablo mäträbare apóstol Pedrobätä nitre kwati ngwärekri ngwane, Pedro ja töi mikani ño yebiti kukwe kwin bämikani kwe ni käne (ñäkädre Gálatas 2:11-14 yebätä). Pablo blitabare ño aune medente ben yebätä raba nemen rubun kräke. Akwa Pedro ja ngwani töbätä, kukwe ye kani ngäbiti kwe aune ñan namani rubun Pablo kräke, ñakare aune ja känenkäre kädekani kwe “ni mräkä tare kri nikwe” (2 Ped. 3:15).

13. ¿Nikwe mäträdre ni madabätä ye känenkri nikwe dre ngwandre törö jai?

¹³ Nikwe mäträdre ja ketamuko nikwebätä rabadre ruin nie ngwane, ¿nikwe dre ngwandre törö jai? Blitadre ben ye känenkri, nikwe ngwandretari jai: “¿Tita bike bäri kwin ya?” (Ecl. 7:16). Nire tä bike bäri kwin, ye ñaka tä ni mada mike tuin jai Jehovata mike tuin jai ye erere, ñakare aune tä mike tuin jai tä töbike ño ye erere aune ñaka tä ni  mada mike tuin bobre jai. Nikwe töbikadre kukwe yebätä aune blitadre nikwe ja ketamuko nikwe yebe raba ruin nie ngwane, kukwe meden tä kisete ye nikwe niedre metre ta ie aune kukwe ruäre ngwandretari ie ne kwe ja töi ükadrete kwe rabadre gare ie. Akwa Biblia tä dre niere ye ererebätä blitadre nikwe aune ja ketamuko nikwe yebe Jehovakwe kukwe ükaite aune ñan nibe ye nikwe ngwandre törö jai (Rom. 14:10). Kukwe Ngöbökwe tä dre niere yebätä nikwe ja ketadrete aune mäträdre nikwe ni madabätä ngwane, Jesús erere nikwe ni mada mikadre tuin bobre jai (Prov. 3:5; Mat. 12:20). Nita ni mada mike tuin ño jai ye erere Jehovakwe ni mikai tuin jai ye nikwe ngwandre törö jai (Sant. 2:13).

14. ¿Juta Ngöbökwe tä dre dre nuainne ni kräke?

¹⁴ Juta Ngöbökwe tä kä tibienbätä yebiti Jehovata ni jie ngwen ne kwe ni rikadre ji niken ni ngwena nüna kokwäre yebiti. Tä video aune täräkwata sribere aune gätä nuainne ni dimikakäre kukwe Bibliabätä ye mikakäre täte. Kukwe jökrä ye tä kukwe nieta Bibliabätä ye ererebätä. Nitre Konkrekasion Jökrä Ngübabitikä tä ja jie ngwamana üai deme ie ne kwe rabadre kukwe ükete bäri kwin kukwe driekäre. Akwa yebiti ta, ruäre ngwane kukwe dianta kwetre jai ye tä miketari ñärärä ñobätä ñan aune kukwe tä nakainkä käbiti tibien kite nikwite bäri jene jene yebätä. Aune dre dre tä nemen bare ye ererebätä juta Ngöbökwe rabadre kukwe ükete jai (1 Cor. 7:31).

15. ¿Ja mräkätre ruäre tä ja tuin kukwe meden ben?

¹⁵ Kukwe mika nämäne ño täte nikwe käne yebätä juta Ngöbökwe tä kukwe mrä mike gare o kukwe meden känti nikwe ja ngwandre ño mikata gare kwe nie ngwane, nita kukwe ye kain ngäbiti ñan töbikara kwärä. Akwa, ¿kukwe mada ükateta yebätä nita ja töi mike ño? Ñodre, bitinkä ju sribedre aune kä känti nita Ngöbö mike täte ye ngübadre kwin yebätä ngwian kitakata krubäte. Yebätä Nitre Konkrekasion Jökrä Ngübabitikä käkwe kukwe ükaninte ne kwe Ju Ja Ükarakrö yete ja ükadrekrö bäri kwin. Yebätä konkrekasion ruäre jene jene ükaninteta keteitibe aune Ju Ja Ükarakrö ruäre rürübäinbare. Ngwian yebiti kä meden känti Ju Ja Ükarakrö ribeta yekänti Ju Ja Ükarakrö sribeta. Nita nüne yekänti Ju Ja Ükarakrö rürübäinta aune konkrekasion jene jene ye ükateta keteitibe ngwane, ñaka raba nemen nuäre ni kräke kukwe ye ka ngäbitikäre raba ruin nie. Ne madakäre, ja mräkätre ruäre raba dikekä mente rükakäre gätäbätä. Nire käkwe sribibare Ju Ja Ükarakrö ye sribebätä o ngübabätä kwin ye raba nemen ngwentari jai, ñobätä Ju Ja Ükarakrö ye rürübäinta. Aune nirekwe kä dianinkä jai aune ja di ngwani ju sribebätä o ngübabätä yebätä ja di  ngwani ngwarbe kwe raba nemen ruin ie. Akwa yebiti ta, kukwe ükaninte mrä ye ka ngäbitita kwetre yebätä nita debe bien ietre.

16. ¿Colosenses 3:23, 24 tä ni dimike ño kä ngwen juto jankunu jabätä?

¹⁶ Nita sribire Jehová kräke aune niarata juta kwe ye jie ngwen ye nikwe ngwandre törö jai ye käkwe ni dimikai kä ngwen juto jankunu jabätä (ñäkädre Colosenses 3:23, 24 yebätä). Rei David käkwe jondron biani ja töi jeñebiti templo ye sribekäre yebiti kukwe kwin bämikani kwe ni käne. 1 Crónicas 29:14 yete niebare kwe: “¿Akwa ti aune juta tikwe ye nire ne kwe tädre jondron ne erere bien mäi ja töi jeñebiti? Ñan ñobätä aune jondron jökrä ye kite mäkri aune jondron kite mäkri ye nunta bienta mäi”. Nita ngwian bien ja töi jeñebiti ngwane jondron kite Jehovakri ye nita bienta niarai. Akwa yebiti ta, nita kä denkä jai, ni die aune jondron mada mada tä nikwe yebiti nita sribi Jehovakwe ye dimike ngwane tä debe bien nie (2 Cor. 9:7).

17. Nikwe ja töi kwitadre nita töbike ño aune nita ja ngwen ño yebätä rabadre gare nie ngwane, ¿ñobätä nikwe ñaka ja di ngwandre nekä?

¹⁷ Ji krä chi tä niken ni ngwena nüna kokwäre yebätä ni ñaka kämikadrekä yekäre, Jesukwe kukwe bämikani ni käne ye jiebiti ni jökrä rikadre (1 Ped. 2:21). Nikwe ja töi ükadrete nita töbike ño aune ja ngwen ño yebätä rabadre gare nie ngwane, nikwe ñaka ja di ngwandre nekä. Yebiti nita kukwe kwin bämike ñobätä ñan aune Jehovakwe ni jie ngwandre ie ni tö ye nita bämike. Ni töi ngite ye gare Jehovai, yebätä Jesukwe kukwe kwin bämikani ye erere nikwe nuaindre metre ta ye ñaka ngübata kwe nie.