1. Nk’oku olwandiko lwa Matayo 7:13, 14 luderhere, bulagurhe rhwakaderha oku rhuli omu lugenzi?

RHWESHI rhuli omu lugenzi. Emunda rhuli rhwayerekeza, changwa omuhigo gwerhu, kuli kugera omu gulu lihyahya lirhambwirwe n’oburhegesi bwa Yehova b’obuzigire. Buli lusiku, rhunachihangana kukulikira enjira eyerekeze oku kalamo. Aliko nk’oku Yesu aderhaga, elyola barabara lili ligeke-geke, na mango maguma byakarhukomerera okulikulikira. (Osome Matayo 7:13, 14.) Rhurhali bashinganyanya, binarhuyorohera kurhenga mw’eyola njira.​—Gal. 6:1.

2. Bichi rhwashambalako mu gunola mwazi? (Olole n’echisanduku “ Obwirhohye Bunarhurhabala Kuhindamula Entambu Zerhu.”)

² Akaba rhulonzeze rhubere omu barabara ligeke-geke liyerekeze oku kalamo, rhukwanene okuhindamula amawazo, engeso, n’ebijiro byerhu. Entumwa Paulo yalihirire Abakristu b’omu Korinto omurhima bagenderere “kuyunva ehano.” (2 Ko. 13:11) Nerhu rhukwanene rhukolese elyola hano. Mu gunola mwazi, rhwaganira nka gurhe Ebiblia yakarhurhabala rhuhindamuke na nka gurhe abera bakulikire ekiroho bakarhurhabala rhugenderere kubera omu njira eyerekeze oku kalamo. Rhwashuba kubona amango by’akaba bikomere kukulikira ehano rhulirhwapata kugerera olubaga lwa Yehova. Rhwabona nka gurhe obwirhohye bwakarhurhabala rhuhindamuke buzira kuheza obusime bwerhu omu kasi ka Yehova.

3. Nka gurhe Echinwa cha Mungu chakakurhabala?

³ Rhunahurana n’echibazo amango rhuli rhwachihangana kugerereza amawazo n’okuntu rhuli rhwachiyunva. Omurhima gwerhu guba gudarhi, n’echola chakarhuma byarhukomerera okumenya ngahe guli gwarhuyerekeza. (Yer. 17:9) Rhwakaba juba-juba kuchirhebeka “n’amawazo g’obubeshi.” (Yak. 1:22) Bobola rhukwanene kukolesa Echinwa cha Mungu omu  kuchigerereza. Echinwa cha Mungu chinayerekana rhuli bantu nya-bashi ndani, “amawazo merhu ma ndani” m’omu murhima gwerhu. (Ebr. 4:12, 13) Rhwakaderha oku, Echinwa cha Mungu lili nka radiyo abanganga banakolesa omu kumenya obulwala buli omu mubiri, k’okuderha, oku chakarhurhabala rhumenye bichi bili omu murhima gwerhu. Aliko rhukwanene kuba berhohye akaba rhulonzeze kuyunguka n’ehano lili omu Chinwa cha Mungu changwa lirhengere emwa bakozi bage.

4. Bichi biyerekene oku Omwami Sauli aliyinjire kuba muntu w’echiburi?

⁴ Omufano g’Omwami Sauli guyerekene echakarhengerera amango rhwamabula obwirhohye. Sauli abaga akala agwerhe echiburi bwenene kugera ahalahiriraga oku arhakwanene kuhindamula amawazo mage n’ebijiro byage. (Zb. 36:1, 2; Hab. 2:4) Echola chalibonekene amango Yehova aha Sauli ehano ligwerhe echi limalire oku bilolere ech’alikwanene ajire enyuma y’okuhima Abamaaleki. Aliko Sauli arhakengaga Yehova. Chiro n’amango omulebi Samweli amubwiraga oku ajirire amagosa, Sauli arhayemerega oku hali echibi ajirire, aliko ashonda kuhamiriza ebijiro byage omu kuderha oku birhavire byabiha n’okushwekera abandi kw’amola magosa. (1 Sa. 15:13-24) Embere w’aho kandi, Sauli abaga ajirire echintu chili nk’echola. (1 Sa. 13:10-14) Echokugayisa, aleka omurhima gwage gugwarhe echiburi. Arhahindamulaga amawazo mage, n’echola charhuma Yehova amukalihira n’okumujahika.

5. Bichi omufano gwa Sauli gwakarhuyigiriza?

⁵ Y’omufano gwa Sauli gurhuyigiriza, kuli kwinja rhuchibaze ntya: ‘Amango namasoma ehano omu Chinwa cha Mungu, kananshonda kuhamiriza amawazo mani? Kananshonda kuwaza oku ebinajirire birhavire byabiha? Kananshwekera amagosa mani okuwindi muntu?’ Akaba hali echibazo mw’ebyola rhwakashubizako nechi, rhukwanene rhuhindamule amawazo n’engeso zerhu. Bulala nka rhurhajirire ntyo, omurhima gwerhu gwakayunjulirana chiburi, n’echola chanarhuma Yehova arhujahika rhurhachibaga bera bage.​—Yak. 4:6.

6. Bichi biyerekene oku Omwami Sauli n’Omwami Daudi barhaliri kuguma?

⁶ Lolaga etofauti eli ahakagarhi k’Omwami Sauli n’Omwami Dauli wamugombolaga, muntu walisimire “erhegeko lya Yehova.” (Zb. 1:1-3) Daudi alimenyere oku Yehova anayokola aberhohye, s’aliko anagaya abagwerhe echiburi. (2 Sa. 22:28) Bobola Daudi aliyemerere erhegeko lya Mungu lyahindamula amawazo mage. Ayandika ntya: “Nakuza Yehova, onampa ehano. Chiro n’omu budufu amawazo mani m’andani manampanula.”​—Zb. 16:7.

7. Bichi rhwakajira akaba rhuli berhohye?

⁷ Akaba rhuli berhohye, rhwaleka Echinwa cha Mungu chihindamule amawazo merhu mabi yi marharhuma rhwajira ebintu bibi. Echinwa cha Mungu chaba nka mulenge guli gwarhubwira ntya: “Enola y’enjira. Mulambagiremo.” Charhuhanula amango rhulirhwalonza kujira echintu chibi. (Isa. 30:21) Nka rhuyunvirhe Yehova, rhwapata enyungu mu njira zinene. (Isa. 48:17) Omufano, rhurhachichibona ba busha bulala owindi muntu amabona oku bihemere arhuhanule. Kandi rhwagwarha obwira bukomere haguma na Yehova bulala rhumenyere oku ali arhukolera kulala omuzere w’obuzigire akolera omwana wage.​—Ebr. 12:7.

8. Nk’oku olwandiko lwa Yakobo 1:22-25 luderhere, nka gurhe rhwakakolesa Echinwa cha Mungu nka chiyo?

⁸ Rhwakakolesa Echinwa cha Mungu nka chiyo. (Osome Yakobo 1:22-25.) Banene mu rhwewe banalola omu chiyo esezi embere barhenge ahambuga. Omu kujira ntyo, rhwakabona akaba hali aha bihemere rhukwize embere abandi bantu barhubone. Konakuguma, amango rhuli rhwasoma Ebiblia buli lusiku, rhwabona njira zichi rhwakahindamula mw’amawazo n’engeso zerhu. Banene banabona oku kuli kwinja bwenene okusoma olwandiko  l’olusiku esezi embere barhenge ahambuga. Banaleka ebi basomere bihume oku mawazo mabo. Ahola lero, omu lusiku loshi, banajabalola mu njira zihe bakakolesa ehano basomaga omu Chinwa cha Mungu. Kandi, rhukwanene kugwarha eprograme y’okusoma n’okuwaza oku Chinwa cha Mungu buli lusiku. Rhwakabona nka bilembere okujira ntyo, aliko echola chili chiguma omu bintu by’akamaro rhwakajira byakarhurhabala rhubere omu barabara ligeke-geke liyerekeze oku kalamo.

9. Mango mahe mwira wawe akaba ey’alikuhanwire?

⁹ Wachigerere kulambagira omu njira yakakuheka hale na Yehova si? (Zb. 73:2, 3) Akaba hali mwira wawe okulire ekiroho waligwerhe obushiru b’okukuhanula, walimuyunvirhe, wanakolesa ehano lyage si? Akaba ntyo ku bili, walijirire bwinja; n’okuderha okuli, osimire bulala oyola mwira wawe alikuhanwire.​—Mezali 1:5.

10. Nka gurhe wakajira amango mwira wawe amakuhanula?

¹⁰ Echinwa cha Mungu chirhuyibwise ntya: “Ebihulu bilerhwa n’omwira biba by’obwimana.” (Mez. 27:6) Bichi ebyola binwa biderhere? Waza k’ogula mufano: Rhuderhe oku oli washonda kuyambuka ebarabara lili lyagera mu mitugari minene, onahugisizwe n’etelefone yawe. Wanava waja omu barabara buzira kulola eyi n’eyi. Han’aho, mwira wawe anakufarha okuboko n’oku kukululira eburhambi. Okuntu akukululaga bwenene kwanarhuma okuboko kwawe kwalabuka, aliko okola ajiraga juba-juba kwanarhuma omutugari gurhakukonga. Chiro akaba okola kuboko kwawe kwakagenderera kuluma mu siku zinene, kawagaya oyola mwira wawe bulala alikukulwire? Kweri nanga! Okwanene kusima bwenene eju y’obola burhabale. Konakuguma, wakarhanga yunva bikulumire oku murhima amango mwira wawe amakuhanula okw’ebinwa changwa ebijiro byawe birhafarhene n’amakanuni ma Mungu m’okunali. Aliko orhamubikiraga omujinya, changwa mp’omugaye bulala akuhere elyola hano. Bwakaba buhwinja okujira ntyo. (Muh. 7:9) Ahali h’okujira ntyo, osime mwira wawe bulala aligwarhire obushiru b’okukubwira.

11. Bichi byakarhuma omuntu alahira ehano mwira wage amuhere?

¹¹ Bichi byakarhuma omuntu alahira ehano omwira w’obuzigire amuhere? Chiburi. Abantu bagwerhe echiburi basima “amarhwiri mabo mashishirizwe.” ‘Banaleka kuyunva okuli.’ (2 Ti. 4:3, 4) Banawaza oku barhakenere hano, bulala banawaza oku bayengehere bwenene changwa bali bantu b’akamaro kulusha abandi. Aliko, entumwa Paulo yaliyandikire ntya: “Nk’omuntu amawaza oku ali wakamaro n’obola arhali chintu, ali achirhebeka yenyine.” (Gal. 6:3) Omwami Sulemani alifasiriye echola bwinja. Aliyandikire ntya: “Omwana okenere aliko ogwerhe obwengehe, ali mwinja bwenene kulusha omwami oshajire w’echihwinja orhanakulikira hano.”​—Muh. 4:13.

12. Nk’oku olwandiko wa Wagalatia 2:11-14 luderhere, bichi omufano gwa Petro gwakarhuyigiriza?

¹² Waza okuntu Petro ajiraga amango Paulo amuhanula embere z’abandi. (Osome Wagalatia 2:11-14.) Petro akabikire Paulo omujinya eju y’ebintu aderhaga, nk’achisezaga okuntu Paulo abiderhaga n’ahantu abiderheraga. Aliko Petro aliri mwengehe. Ayemera ehano Paulo amuhaga, arhanamubikiraga omujinya. Ahubwe buzinda, ayirika Paulo “mwene-werhu muzigirwa.”​—2 Pe. 3:15.

13. Bichi rhukwanene kuwazako embere rhuhane ehano?

¹³ Nka hamagera amango wabona oku bihemere ohanule mwira wawe, bichi okwanene kuyibuka? Embere oje emunda ali, ochibaze ntya, ‘Indi muntu w’okunali “kurhaluka olugero”?’ (Muh. 7:16) Omuntu w’okunali kurhaluka  olugero arhachira abandi olubanja nk’oku amakanuni ma Yehova w’okunali maderhere, s’ahubwe kugerera eby’awazize, akanaba eyi nta lukogo ajira. Akaba wawazize bwenene eju y’empanvu yarhuma wahanula mwira wawe, onagenderere kubona oku bihemere ojire ntyo, omuyereke echibazo agwerhe, onakolese ebibazo omu kumurhabala ayunve bulagurhe ech’ajiraga chili chibi. Ochizere oku eby’oli waderha biyumangire oku Mandiko, oyibuke oku Yehova y’ekwanene achire mwira wawe olubanja s’arhali woyo. (Ro. 14:10) Okolese obwengehe bwe Chinwa cha Mungu, n’amango oli wahanula omuntu, oyige olukogo lwa Yesu. (Mez. 3:5; Mt. 12:20) Bulagurhe? Bulala Yehova arhukolera kuguma n’okurhunakolera abandi.​—Yak. 2:13.

14. Bichi olubaga lwa Mungu luli lwarhuha?

¹⁴ Yehova ali arhuyerekeza omu barabara liganire oku kalamo, kugerera echigabi ch’oku gulu ch’olubaga lwage, luli lwarhuha amavideo, ebitabu, n’embuganano, by’okurhurhabala rhukolese amahano mali omu Chinwa chage. Rhwakalangalira eyola myazi bulala eyumangire oku Biblia. Ebaraza Lirhambwire linachizera oku roho lichesibwa, amango lili lyarhola omuhigo gulolere okuntu akasi k’okuhubiri kakajirwa bwinja. Aliko chiro akaba ntyo, chirhabuza Ebaraza Lirhambwire lirhagenderera kugerereza emihigo lyarholere omu kulola akaba bihemere bayihindamule. Bulagurhe? Bulala egulu lili lyahindamuka, n’olubaga lwa Mungu nalo lukwanene kuhindamula ebintu nk’oku egulu lili lyagenda.​—1 Ko. 7:31.

15. Bibazo bihe bahubiri baguma bali bahurana nabyo?

¹⁵ Amango olubaga lwa Mungu lwamarhuha amafasiriyo mahya-hya oku bilolere enyigirizo ze Biblia, changwa oku bilolere okuntu rhwakachigendesa omu kalamo, rhunayemera n’okukolesa amola mahano juba-juba. Aliko si, gurhe rhunajira amango olubaga lwa Mungu lwamahindamula ebintu omu bulyo bwakahuma oku zindi hali z’akalamo kerhu? Omufano, omu myaka echizindire kugera, rhwakoleseze furanga zinene omu kuyumbaka n’okukwiza ahantu h’okuraharamiza. Bobola Ebaraza Lirhambwire lyaderha oku amola Machumbi m’Obwami mayinje makoleswa bwenene. Che chirhumire bibaga biguma byachangirwe haguma, na Machumbi maguma m’Obwami maguzwa. Efuranga zapatikene zili zakoleswa omu kuyumbaka amandi machumbi omu maeneo  makenere oburhabale. Akaba olamire omu eneo Amachumbi mali maguzwa n’ebibaga bili byachangwa haguma, wakabona oku bikomere kukomera ehola ehali mpyahya. Bahubiri baguma bakola bali baja hale oku mbuganano. Abandi bakolaga bwenene omu kuyumbaka n’okukwiza amola Machumbi m’Obwami bakachibaza bulagurhe amola machumba mali maguzwa. Bakawaza oku emisi n’ebisanzi byabo byafire busha. Aliko bali bayemera ogola mupango guhya-hya banakwanene babwirwe koko.

16. Nka gurhe okukolesa ehano lili omu Wakolosai 3:23, 24 kwakarhurhabala rhugenderere kugwarha omwishingo?

¹⁶ Rhwagenderera kugwarha omwishingo akaba rhuyibukire oku Yehova yi rhulirhwakolera, n’oku yeli ayerekeza olubaga lwage. (Osome Wakolosai 3:23, 24.) Omwami Daudi arhulekere omufano gwinja omu kuhana enshololo y’efuranga omu kuyumbaka ehekalu. Aderhaga ntya: “Nyono indi nde n’abantu bani bali bande mpu yi rhugala kuhana enshololo y’obulonza nk’eyila? Bulala buli chintu chirhengere emwawe, rhunali rhwakuha ebirhengere emwawe.” (1 Ny. 29:14) Amango nerhu rhwamahana enshololo y’efuranga, rhunaba eyi rhulirhwaha Yehova ebirhengere omu fune yage. Aliko binasimisa Yehova bwenene, amango rhwamahana akasanzi, emisi, n’efuranga zerhu omu kukola akasi kage.​—2 Ko. 9:7.

17. Bulagurhe orhakwanene kuvunika omurhima akaba hali ebintu okwanene kuhindamula omu kalamo kawe?

¹⁷ Rhweshi rhukwanene okukulikira omufano gwa Yesu yi rhubera omu barabara ligeke-geke liyerekeze oku kalamo. (1 Pe. 2:21) Akaba bibonekene oku hali engeso okwanene kuhindamula, orhavunikaga omurhima. Okumenya oku hali eby’okwanene kuhindamula omu kalamo, kuyerekene oku oli wayunva ehano lya Yehova. Oyibuke oku Yehova amenyere oku rhurhali bashinganyanya; che chirhumire arhalangalire oku rhwayiga Yesu oku bushinganyanya.

18. Bichi rhwakajira yi rhuhikira omuhigo gwerhu?

¹⁸ Rhweshi rhuchisezage oku mango mayinjire, rhunabe tayari kuhindamula amawazo, engeso, n’ebijiro byerhu. (Mez. 4:25; Lu. 9:62) Rhugendererage kuba berhohye, “rhunagenderere kugwarha obusime, n’okuyunva ehano.” (2 Ko. 13:11) Nka rhujirire ntyo, “Mungu w’obuzigire n’omurhula aba haguma [nerhu].” Arharhurhabala rhugwarhe obusime konyine, s’aliko arhurhabala rhumale n’olugenzi lwerhu.