1. Tëm noo Mateus 7:13, 14, warom khene mer saan tas mer in een rees sin?

MEYER sin al in een rees. Woo wole mer hin keen? Was is unser tsiil? In te naye welt leepe unich Yeehoowa sayn liiplich rechiirung! Yeete taach, fersuuche mer im weech fons leepe keen. Awer, wii Yeesus kesaat hot, tiise weech is xmaal un als mool es is xweyer aan tëm keen. (Lees Mateus 7:13, 14.) * Un wayl mer imperfëkt sin, es is laycht uns fon tiise weech ap lënke. (Gál. 6:1)

2. Iwer was tuun mer in tiise artikel xpreche? (Kuk aach te khaste “ Ti teemuut heleft uns aan tëm xmaal weech plaype”.)

² Wën mer wole in tëm xmaal weech fom leepe plaype, mise mer wilich sin fer unser ketanke, aanxtelung un aktsyoone ënere. Te aphostel Phaul hot ti kriste in Korinto uf kemuut: “Lost aych wayter korikiire.” (2 Cor. 13:11) Tiise aanreet tiint fer uns aach. In tiise artikel, tuun mer xpreche iwer wii khan ti Piipel uns helfe ënerunge mache, un wii froynte, woo rayfe kriste sin, khene uns helfe wayter im weech fom leepe plaype. Meyer tuun aach lërne iwer was khan es xweyer lose ti lënkung fon Yeehoowa sayn orkanisatsyoon noo keen. Meyer tuun siin wii ti teemuut khan uns helfe ënerunge mache oone ti frayt aan Yeehoowa sayn tiinst ferliire.

3. Wii khan Kot sayn Wort tich helfe?

³ Es is net laycht fer uns unser ketanke un xpiirunge noo kuke. Weeche was? Wayl unser hërts hinerlistich is, un tas lost es xweyer se wise woo hin tuut tas uns lënke. (Jer. 17:9) Es is laycht uns mit “falxe aanunge” hiner keen. (Tia. 1:22) Tan, mer mise Kot sayn Wort penutse fer uns selepst noo kuke. Kot sayn Wort tsaycht was mer inerlich sin — ti tiifste ‘ketanke un pleene’ fon unser hërts.  (Heb. 4:12, 13) Meyer khene saan tas Kot sayn Wort is wii een raio-X maxiin — tii lost uns siin was inerlich is. Awer fer ti aanreete fon te Piipel un fon tëne woo Kot sayn orkanisatsyoon fiire aan wëne, mise mer teemuutich sin.

4. Was tsaycht uns tas te kheenich Saul is hoochmuutich kep?

⁴ Tas payxpiil fon tëm kheenich Saul tsaycht was khan pasiire wën mer net teemuutich sin. Saul is soo hoochmuutich kep tas eyer wolt net erkhëne, soo kaar fer sich selepst, tas eyer praucht sayn ketanke un aktsyoone ënere. (Sal. 36:1, 2; Hab. 2:4) Tsum payxpiil, wën Yeehoowa hot Saul kesaat was praucht eyer mache noo ti amalekiiter ap kewine, Saul hot net Yeehoowa aan keheert. Un wën te profeet Samuël hot mit tëm iwer sayn unfolichkheet kexproch, Saul wolt net erkhëne tas eyer ferkheert waar. Xtats tas, tee hot kesaat tas es net soo ërnst waar, un tas anere ti xult hate. (1 Sam. 15:13-24) Xon eente, hat Saul was eenliches kemacht. (1 Sam. 13:10-14) Es is traurich, awer eyer hot kelos sayn hërts hoochmuutich wëre. Tee hot net sayn ketanke keënert, soo Yeehoowa hot tëm kextrof un ap kextos.

5. Was khene mer lërne mit Saul sayn payxpiil?

⁵ Meyer wole net soo wii Saul sin; tes weeche thërfe mer uns frooe: ‘Wën ich een aanreet fon Kot sayn Wort leese, fersuuche ich een ausweech fine fer tas net aan wëne? Tuun ich tenke tas was ich am mache sin net soo xlecht is? Tuun ich ti xult fer anere kepe weeche was ich am mache sin?’ Wën unser antwort fer kwalkee eene fon tiise frooche ‘yaa’ is, mise mer unser ketanke un aanxtelung ënere. Wën net, unser hërts khan soo hoochmuutich wëre tas Yeehoowa tuut uns wii sayn froynte ap xtose. (Tia. 4:6)

6. Pexrayp ti unerxiit tswixich te kheenich Saul un te kheenich Tawi.

⁶ Kuk ti unerxiit tswixich te kheenich Saul un te kheenich Tawi. Tawi waar eene man woo hot “Yeehoowa sayn kesets” keliipt. (Sal. 1:1-3) Tawi wust tas Yeehoowa tuut ti teemuutiche rete, awer tuut sich keeche ti hoochmuutiche xtele. (2 Sam. 22:28) Tan, Tawi hot erlaupt tas Kot sayn kesets sayn ketanke ënere teet. Tee hot kexrip: “Ich tuun Yeehoowa loope, woo mich aan kereet hot. Soo kaar in te nacht mayn tiifste ketanke tuun mich korikiire.” (Sal. 16:7)

7. Was tuun mer mache wën mer teemuutich sin?

⁷ Wën mer teemuutich sin, erlaupe mer tas Kot sayn Wort unser ferkheerte ketanke ënert eep se pis ferkheerte aktsyoone nëme. Kot sayn Wort tuut wii een xtim sin, woo saat uns: “Tas is te weech. Laaf aan tëm.” Tii tuut uns aan saan wën mer uns fom weech am ap lënke sin — noo te rechts orer te links sayt. (Isa. 30:21) Wën mer Yeehoowa horiche, tuun mer fiil nutse kriin. (Isa. 48:17) Tsum payxpiil, mer wëre net kexeemt wayl yemant uns korikiire praucht. Un meyer tuun uns tichter pay Yeehoowa xafe, wayl mer erkhëne tas eyer tuut uns wii liipe khiner pehantele. (Heb. 12:7)

8. Tëm noo Tiago 1:22-25, wii khene mer Kot sayn Wort wii een xpiichel penutse?

⁸ Kot sayn Wort khan wii een xpiichel fer uns sin. (Lees Tiago 1:22-25.) * Ti meyerste fon uns tuun sich moynts frii aan tëm xpiichel kuke, eep mer naus tsus keen. Soo, khene mer kuke op mer prauche etwas ënere, eep ti anere uns siin. In te selwich aat, wën mer ti Piipel yeete taach leese, tuun mer ënerunge siin woo mer prauche in unser ketanke orer aanxtelung mache. Fiile fine es kuut te tekst fom taach yeete moynt leese, eep se ausm haus keen. Tii lose was se keleest hon tëne sayn ketanke mustere. Tan, torich te taach, suuche se aate fer te aanreet fon Kot sayn Wort in fiire. Un meyer prauche aach een xtuutyum  rutiin hon — too tepay Kot sayn Wort yeete taach leese un too triwer tenke. Es khan keweenlich aus siin, awer is eene fon te haupste tinge woo mer khene mache woo heleft uns in tëm xmaal weech fom leepe plaype.

9. Wanee fiilaycht praucht een froynt tich korikiire?

⁹ Host tuu xon aan kefang in een weech laafe woo waar am tich ap lënke fon Yeehoowa? (Sal. 73:2, 3) Wën een froynt, woo een rayfe krist is, ti koraaj hat fer tich korikiire, host tuu tëm kehoricht un tëm sayn aanreet aan kewënt? Wëns yaa, tuu host richtich kemacht! Un sicher, tuu pist petanklich tas tayn froynt hot tich aan kesaat. (Pro. 1:5)

10. Wii solst tuu tich aan xtele wën een froynt tich korikiirt?

¹⁰ Kot sayn Wort erinert uns: “Troy sin ti wee woo fon een froynt kemacht sin.” (Pro. 27:6) Was wil tas saan? Tenk aan tiise ferklaychung traan: Tuu wilst pis te aner sayt fon een xtroos keen — awer es kept fiile khare woo tat torich keen. Awer, tuu tuust tayn acht fer te selulaar kepe, un — oone se kuke — kepst tuu een xrit in te xtroos. Kraat tan, een froynt krayft aan tayn aarm un tsiit tich tsurik! Tee tuut soo foxt tsiie tas eyer macht tayn aarm wee. Awer, wën eyer net xnel weyer... teet een khare iwer tich faare. Soo kaar wën tayn aarm teet wee fer phaar taache, teest tuu tich pelaytiche tas tayn froynt hot aan tayn aarm foxt kekrif? Kewis net! Tuu teest petanklich fer sayn hilef sin. In te selwich aat, am aanfang, es khan wee mache wën een froynt tich aan saat tas tayn wërter orer aktsyoone phase net mit was Kot saat richtich is. Awer tuu tich net ëriche orer pelaytiche weeche sayn aanreet. Tas weyer een tumheet. (Ecl. 7:9) Xtats tas, say petanklich tas tayn froynt hat ti koraaj fer iwer tas mit tich xpreche.

11. Warom teet yemant een kuut aanreet fon een froynt ap xtose?

¹¹ Warom teet yemant een kuut aanreet fon een liiplich froynt ap xtose? Hoochmuut. Hoochmuutiche layt hon kërn tas ti anere “khitsle in sayn oore mache”. Tii “tuun sayn oore tsu te woerheet ap lënke”. (2 Tim. 4:3, 4) Hoochmuutiche layt tenke tas se fiil kluucher orer fiil wichticher wii ti anere sin. Awer te aphostel Phaul hot kexrip: “Wën yemant tenkt tas eyer etwas is, wën in woerheet tee kaar niks is, tuut eyer sich selepst hinerkeen.” (Gál. 6:3) Te kheenich Salomon tuut tas kans xeen aus leye. Tee hot kexrip: “Rechter een aarme yung, awer woo kluuch is, wii een alte kheenich, awer woo tum is, woo khee mee ferninftichkheet hot fer aanreete aan nëme.” (Ecl. 4:13)

12. Was lërne mer fon Pheeter sayn payxpiil, woo in Gálatas 2:11-14 xteet?

¹² Tenk aan was Pheeter kemacht hot wii Phaul tëm foer ti anere korikiirt hot. (Lees Gálatas 2:11-14.) * Pheeter khent sich ëriche mit was Phaul kesaat hot, weeche ti aat wii eyer tas kesaat hot, orer wayl eyer tas foer ti anere kemacht hot. Awer Pheeter waar kluuch kewees. Tee hot te aanreet aan kenom un is net motsich mit Phaul keplip. Xtats tas, hot eyer xpeeter Phaul wii “liipe pruuter” keruuft. (2 Ped. 3:15)

13. Wën mer aanreete kepe, was sole mer in unser khop hale?

¹³ Wëns tuu mënst tas tuu prauchst een aanreet fer een froynt kepe, was solst tuu in tayn khop hale? Eeps tuu mit tayn froynt xprechst, froo tich selepst: ‘Tuun ich “tsu kerecht” sin?’ (Ecl. 7:16) Een persoon woo tsu kerecht is, tuut ti anere  richte, net tëm noo was Yeehoowa saat richtich is, awer tëm noo was eyer selepst mënt richtich weyer. Un, tsiimlich sicher, is eyer net parmhërtslich. Wëns tuu tich xon noo kekukt host un, noch soo, mënst tuu tas tuu prauchst mit tayn froynt xpreche, saa tëm kans taytlich was te propleem is un mach tëm frooche woo iim helfe ferxteen tas was eyer kemacht hot, ferkheert is. Say tich sicher tas was tuu saast xtaypt sich aan was ti Piipel saat. Un eriner tich tas tayn froynt tuut aprechnunge mache mit Yeehoowa, net mit tich. (Rom. 14:10) Penuts ti kluucheet woo in Kot sayn Wort xteet. Un wëns tuu aanreete tsu yemant kepst, say mitlaytich soo wii Yeesus. (Pro. 3:5; Mat. 12:20) Warom? Wayl Yeehoowa tuut mit uns um keen in te selwich aat wii meyer mit te anere um keen. (Tia. 2:13)

14. Was tuut Kot sayn orkanisatsyoon uns xenke?

¹⁴ Yeehoowa lënkt uns in tëm weech fom leepe torich tas eyertlich teel fon sayn orkanisatsyoon. Tii xenkt uns wiiteos, puplikatsyoone un fersamlunge woo helfe uns ti aanreete woo in Kot sayn Wort xteen, aan wëne. Meyer khene aan tiise informatsyoone traue, wayl se xtaype sich aan was ti Piipel saat. Wën ti priiter fon te Rechiirente Khërperxaft etwas ëntxlise iwer ti pest aat fer ti preetich aarwayt mache, traue se aan tëm hayliche kayst. Soo wii soo, ti Rechiirente Khërperxaft tuut reekelmeesich sayn ëntxlise noch mool noo kuke fer se siin ep se etwas ënere mise. Weeche was? Wayl “ti welt wii se hayt is, is am sich ënere” un Kot sayn orkanisatsyoon praucht tsu te naye situatsyoone noo kepe. (1 Cor. 7:31)

15. Was fer kefoere hon welche puplikatoore mit keleept?

¹⁵ Wën Kot sayn orkanisatsyoon kept uns een nay ausleyung iwer een piiplix inlërnung orer iwer moraalixe sache, tuun mer tas klaych aan nëme un in fiire. Awer, wii tuun mer uns aan xtele wën Kot sayn orkanisatsyoon een ënerung macht woo unser leepe in anere aate petreft? Tsum payxpiil, in te letste yoore, te prays fer aanpeetung pletse paue un uf phase hot sich fiil ferkreest. Tes weeche, ti Rechiirente Khërperxaft hot een nay lënkung kep: wii fiil kemaynte wiis meechlich is, selte te selwich Raych Saal penutse. Weeche tas, fiile kemaynte waare samer ketuun un welche Raych Saale waare ferkhaaft. Tas kelt woo kexpaart is, is penutst fer Saale paue in pletse woo tëne wërklich fiil prauche. Wëns tuu in een plats leepst woo Saale ferkhaaft waare un kemaynte samer ketuun waare, fiilaycht finst tuu es  xweyer tsu te nay situatsyoon noo kepe. Welche puplikatoore prayche yets wayter laafe orer faare fer pis aan te fersamlunge keen. Anere woo xtram kexaft hon fer Raych Saale paue orer hale, tuun yets sich frooe warom waare se ferkhaaft. Fiilaycht, xpiire se tas sayn tsayt un aanxtrengung waare umsonst kewees. Soo wii soo, tuun se ti ëntxlise aan nëme un aan heere. Weeche tas, fertiine se loop kriin.

16. Wii te aanreet fon Colossenses 3:23, 24 aan wëne heleft uns unser frayt hale?

¹⁶ Meyer tuun unser frayt hale wën mer net ferkese tas mer fer Yeehoowa xafe un tas eyer sayn orkanisatsyoon fiirt. (Lees Colossenses 3:23, 24.) * Te kheenich Tawi hot een kuut payxpiil kelos wii eyer kelt kep hot fer te thempel paue. Tee hot kesaat: “Weer sin ich, un weer is tiise folek, tas mer khene tiise fraywiliche opfere mache? Wayl ales khomt fon tich, un meyer hon tich ploos kep was fon tayn aychne hënt khomt.” (1 Crô. 29:14) Wën mer kontripuytsyoone mache, tuun mer aach tsu Yeehoowa kepe etwas woo eyer xon uns kep hat. Soo wii soo, Yeehoowa tuut weyert xetse fer ti tsayt, kraft un kelt woo mer kepe fer sayn aarwayt xtitse. (2 Cor. 9:7)

17. Warom sole mer net oone muut plaype wën mer unser xrite korikiire mise?

¹⁷ Fer uns in tëm xmaal weech fom leepe hale, prayche meyer al Yeesus sayn xrite ticht noo keen. (1 Ped. 2:21) Wën siit es aus tas tuu tayn xrite korikiire must, tuu net oone muut plaype. Tas tuut fiilaycht etwas kuutes iwer tich tsayche — tuu mërkst was Yeehoowa sayn lënkung is. Ferkes net tas Yeehoowa wees tas mer imperfëkt sin. Tan, eyer waart net tas mer Yeesus sayn payxpiil perfëkt noo mache.

18. Was mise mer mache fer unser tsiil trëfe?

¹⁸ Wole mer al unser aue in te futuer hale un wole mer wilich sin fer unser ketanke, aanxtelung un aktsyoone ënere. (Pro. 4:25; Luc. 9:62) Wole mer wayter teemuutich plaype un ‘wayter uns fraye un korikiire lose’. (2 Cor. 13:11) Wën mer es mache tuun, ‘te Kot fon liip un fon friit wërt pay uns sin’. Un meyer tuun net ploos hin khome pis woo mer wole, awer aach uns torich ti rees fraye.