1. Otja ku Mateus 7:13, 14, ongwaye tji matu yenene okutja tu ri mouyenda?

EṰE atuhe tu ri mouyenda. Ondando yetu oyokuhupa mouye oupe kehi yomananeno wa Jehova worusuvero. Eyuva arihe tu kondja okukara mondjira ndji twara komuinyo. Posi yokutja, Jesus wa tja ondjira ndjo ongwaṋi nu povikando tjiva irira ouzeu okukayenda mo. (Lesa Mateus 7:13, 14.) Mena rokutja kaweṱe ohomonena irira oupupu okupita mondjira ndjo.—Gal. 6:1.

2. Matu katara kuye morupa ndwi? (Wina lesa okaongo nga “ Omerisusuparisiro ye tu vatera okutjita omarundurukiro.”)

² Indu tji matu vanga okukara mondjira ndji twara komuinyo, eṱe matu sokurundurura omeripura wetu, ongaro novitjitwa vyetu. Omuapostele Paulus wa tunduuza Ovakriste moKorinte okukayenda komurungu ‘okupaha omekurisiro wombepo.’ (2 Kor. 13:11) Eṱe wina matu yenene okuungurisa erakiza ndo. Morupa ndwi, matu katara komuano Ombeibela mu mai yenene okutuvatera okutjita omarundurukiro, nomuano Ovakriste wovihorera oviwa mu mave tu vatere okukara mondjira ndji twara komuinyo. Nu wina matu katara kutja ovikwaye mbi tjita kutja irire ouzeu okukongorera omuhunga mbu matu pewa i yotjira tja Jehova. Nu matu katara komuano omerisusuparisiro mu ye tu vatera okutjita omarundurukiro nokuhina okupandjara ondjoroka yetu yokukarera Jehova.

3. Omomuano uṋe Embo ra Mukuru mu ma ri yenene okukuvatera?

³ Kaupupu okukonḓonona ouripura poo oumune wetu. Omena raye? Mena rokutja omutima omuwovise nu iho tji tjita kutja irire ouzeu okutjiwa kutja owo mau ku hingi momuhunga uṋe. (Jer. 17:9)  Irira oupupu ‘okuripukisa oveni.’ (Jak. 1:22) Kunao matu sokuungurisa Embo ra Mukuru okurikonḓonona oveni. Embo ra Mukuru ri raisa imbi mbi ri ‘momeripura nomerizemburukiro’ womitima vyetu. (Hebr. 4:12, 13) Ombeibela i tu vatera okutjiwa oviṋa mbi tu ha yenene okumuna ohunga na eṱe oveni, tjimuna omahina ndji tara orutu mu i tu vatera okumuna oviṋa moukoto orutu mbi tu ha yenene okumuna. Posi yokutja, eṱe matu sokurira overisusuparise kutja tu ṱakamise omavyuriro ngu matu munu okuza mOmbeibela poo okuza kovandu mba zikwa i Jehova.

4. Ovikwaye mbi raisa kutja Ombara Saul wa uta okuritongamisa?

⁴ Otjihorera tjOmbara Saul tji tu raisira kutja mape tjitwa ye tji tu hina omerisusuparisiro. Saul wa ri omuritongamise tjinene nga tje hina aa munu kutja ma hepa okurundurura omeripura novitjitwa vye. (Eps. 36:1, 2; Hab. 2:4) Eye wa raisa ongaro ndji, indu Jehova tje mu raera kutja nga tjite vi kombunda yokurwisa Ovaamalek. Posi yokutja, Saul ka puratenene ku Jehova. Nu indu omuprofete Samuel tja hungira kuna ye ohunga notjiṋa ho, eye ka yakurire ondataiziro ndja tjita. Nungwari aa munu kutja ka tjitire ouvi ounene nu wa ṋiṋikiziwa i ovandu varwe okutjita nao. (1 Sam. 15:13-24) Komurungu wanao Saul wina wa raisa ongaro otjingeyo. (1 Sam. 13:10-14) Ouhumandu, eye wa yandjera omutima we okumutongamisa. Saul ka rundururire omeripura we tji tja tjita kutja Jehova me mu ronge nokumunakaura.

5. Matu rihongere tjike okuza kotjihorera tja Saul?

⁵ Kutja tu rihongere okuza kotjihorera tja Saul, matu sokuripura oveni omapuriro nga: ‘Indu tji mba lese otjiṋa okuza mEmbo ra Mukuru hapo mbi muna kutja kavinokuṱuna kwami? Hapo mbi muna kutja oviṋa mbi me tjiti kavivi tjinene? Hapo mbi kuminina varwe koviṋa mbi mba tjiti?’ Indu tji twa itavere ku rimwe romapuriro nga eṱe matu sokurundurura omeripura nongaro yetu. Indu tji tu ha rundururire omeripura wetu, eṱe matu rire overitongamise nu atu ha rire omapanga wa Jehova.—Jak. 4:6.

6. Kahurura ombangu pokati kOmbara Saul nOmbara David.

⁶ Ngatu tare ombangu ndja ri pokati kOmbara Saul nOmbara David ngwa ri omurumendu ngwa suverere “omatwako wa Muhona.” (Eps. 1:1-3) David aa tjiwa kutja Jehova u yama imba overisusuparise nu a nakaura overitongamise. (2 Sam. 22:28) Kunao wa yandjera omatwako wa Mukuru okurundurura omeripura we. David wa tja: “Ami me tanga Muhona, tjinga e ndji pa omaronga omawa; wina ouṱuku, ngunda amba rara, mbi rizemburuka na wo.”—Eps. 16:7.

7. Ovikwaye mbi matu tjiti indu tji tu ri overisusuparise?

⁷ Indu tji tu ri overisusuparise, matu yandjere kutja Embo ra Mukuru ri rundurure omeripura wetu omavi ngunda atu hiya tjita otjiṋa otjivi. Kunao Embo ra Mukuru ma ri rire tjimuna eraka ndi ma ri tja: “Ondjira oyo ndji! Kayende mu yo!” Indu tji matu tjiti otjiṋa otjivi Embo ra Mukuru ri tu rakiza. (Jes. 30:21) Okupuratena ku Jehova ku tu yetera ouwa momiano pekepeke. (Jes. 48:17) Otjotjihorera, eṱe kamaatu hepa okurongwa i yomundu tji mape ya atji tu ṱisa ohoṋi. Nu matu tumbuka popezu na Jehova mena rokutja matu tjiwa kutja eye u rikendera eṱe tjimuna Ihe worusuvero.—Hebr. 12:7.

8. Otja tji pa tamunwa mu Jakobus 1:22-25, omomuano uṋe mu matu yenene okuungurisa Embo ra Mukuru otjotjiritarero?

⁸ Matu yenene okuungurisa Embo ra Mukuru otjotjiritarero poo otjotjispili. (Lesa Jakobus 1:22-25.) Otjingi tjetu tu ritara motjispili omuhukomunene auhe ngunda atu hiya pita mondjuwo. Okutjita nao ku tjita kutja tu riṱune ngunda varwe ave hiye tu muna. Momuano otjingewo, indu tji matu lese Ombeibela eyuva arihe tu muna omiano mu matu yenene okurundurura omeripura nongaro yetu. Ovengi ve muna ouwa okulesa etjangwa reyuva omuhukomunene auhe ngunda ave hiya pita ponganda. Owo ve yandjera  imbi mbi mave lese okurundurura omeripura wawo, nu ave paha omiano vyokuṱakamisa oviṋa mbi va lese mEmbo ra Mukuru eyuva ndo. Eṱe wina matu sokulesa nokuripurira ko oukoto ku imbi mbi matu lese mEmbo ra Mukuru eyuva arihe. Okutjita nao ku munika aayo otjiṋa otjipupu, posi yokutja ootjiṋa tjimwe otjinanḓengu nomasa tji matu sokutjita okutuvatera kutja tu kare mondjira ndji twara komuinyo.

9. Ongwaye epanga tji mape ya a ri ku rongo poo okukuvyura?

⁹ Hapo ove wa rora okutjita otjiṋa tjaa tji ṱuna koupanga woye na Jehova, nu epanga roye nouvanḓe a ri ku raere? (Eps. 73:2, 3) Hapo ove wa puratena kerakiza re ndo? Tjinangara wa puratena ove tjiri wa toora ondando ndji ri yo nu mo kara nondangi kutja epanga roye re ku raera.—Omiano 1:5.

10. Ovikwaye mbi mo yenene okutjita indu epanga roye tji re ku rongo?

¹⁰ Embo ra Mukuru ri tu zemburikisa kutja, “Epanga ri kara nomeripura omawa nandarire kutja maye ku hihamisa.” (Omiano 27:6) Hapo omambo ngo maye hee tjike? Otjihorera, ngatu tje mokondo ondjira nu tjimanga otonenwa ongoze kokayendjezewa koye. Ove nokuhinokutara ozohauto, oziri ongoze ndji nu tjimanga epanga roye a ri ku kambura pokuwoko, nu a ri kupitisa mondjira. Mena rokukupuka e ke ku hihamisirira. Hapo mo pindikire epanga roye mena rokutja we ku hihamisirire? Kako. Ove motjaterwa kutja we ku yama. Momuano otjingewo, indu epanga roye tji re ku raere kutja omambo woye poo ovitjitwa vyoye ka vi nokuhitasana nomirari vya Mukuru, ove mape ya ohihamwa. Posi yokutja, o hakahana okupindika mena romavyuriro ngu wa munu. Okutjita nao ouyova. (Omuzuv. 7:9) Kunao, kara nondangi kutja epanga roye ra yenene okupaturuka okukuraera.

11. Ovikwaye mbi mape ya avi tjiti kutja omundu aha puratene komavyuriro?

¹¹ Ovikwaye mbi mape ya avi tjiti kutja omundu aha puratene komavyuriro okuza kepanga re? Omeritongamisiro. Ovandu overitongamise ve vanga okuraerwa “imbi mbi mave vanga tjinene okuzuva.” Owo ve “rihumburura kokure nouatjiri.” (2 Tim. 4:3, 4) Owo ve muna kutja kave nokuhepa omavyuriro mena rondjiviro yawo, poo mena rokumuna kutja ovananḓengu pu varwe. Posi yokutja, omuapostele Paulus wa tja: “Omundu tji ma tjangovasi eye otjiṋa, ngunda, tjiri, e he ri otjiṋa, indino me riwovisa omuini.” (Gal. 6:3) Ombara Solomo wa kahurura epu ndo nawa. Eye wa tja: “Okokuwa okurira omutanda omusyona, nungwari onongo, komurungu wokurira ombara ongururume, nungwari eyova, nu ndji ha vanga okurongwa.”—Omuzuv. 4:13.

12. Otja kOvagalate 2:11-14, matu rihongere tjike okuza kotjihorera tjomuapostele Petrus?

¹² Tara kongaro omuapostele Petrus ndja raisa indu omuapostele Paulus tje mu vyura mokati kovandu. (Lesa Ovagalate 2:11-14.) Petrus a tja pindikira Paulus komunao mbwe mu vyura mokati kovandu. Posi yokutja Petrus wa ri nozondunge. Eye wa yakura omavyuriro ngo nu kapindikirire Paulus poo okuripurira koviṋa mbya hungire. Nu nandarire kombunda eye wa isana Paulus kutja, “Omukwetu omusuverwa.”—2 Petr. 3:15.

13. Matu sokuripurira kuye ngunda atu hiya yandja omavyuriro komundu?

¹³ Indu tji mo vanga okuyandja omavyuriro kepanga roye, hapo omapu yeṋe ngu mo sokuripurira ko? Ngunda au hiya hungira ku nepanga roye ripura omuini kutja, ‘Hapo me rivara otjomundu “omusemba tjinene”?’ (Omuzuv. 7:16) Omundu ngu rimuna omusemba tjinene pu varwe, eye u pangura varwe otja koumune we nungwari katara komirari vya Jehova nu wina mape ya kutja ka ṱotjari. Indu tji we rikonḓonona omuini nu mo munu kutja mo sokuhungira ku nepanga roye, mu raera ohunga nouzeu mbo  nokuungurisa omapuriro ngu maye mu vatere okumuna kutja wa tataiza. Hungira oviṋa mbi mavi zu mOmbeibela nu zemburuka kutja kamerizirira woye okupangura epanga roye nungwari omerizirira wa Jehova. (Rom. 14:10) Ungurisa ounongo mbu ri mEmbo ra Mukuru, nu tji mo rongo omundu warwe mu raisira otjari tjimuna Jesus. (Omiano 3:5; Mat. 12:20) Ongwaye? Mena rokutja Jehova metu tjindi momuano otjingewo mbu matu tjindi ovakwetu.—Jak. 2:13.

14. Otjira tja Mukuru tji tupa ye?

¹⁴ Jehova u ungurisa otjira tje tjokombanda yehi okutupa oviṋa mbi mavi tu vatere kutja tu kare mondjira ndji twara komuinyo tjimuna ouvidio, omambo nozombongarero zombongo. Oviṋa avihe mbi vi tu vatera kutja tu ṱakamise omirari mbi ri mEmbo ra Mukuru. Matu yenene okuṱaṱera koviṋa mbyo mena rokutja vya zikamena kOmatjangwa. Orutu Orunane ru ṱaṱera kombepo ondjapuke indu tji ma ru sokutya kutja otjiungura tjokuzuvarisa matji kayendisiwa vi. Nandarire nao, Orutu Orunane ru kayenda komurungu okutara kutja ozondando nḓu va toora maze hepa okurundururwa poo indee. Omena raye tji ve tjita nao? Mena rokutja “ouye mbwi otja tji matu u tjiwa u ri pokuyanda,” nu otjira tja Mukuru matji hepa okurundurura omiano vya tjo otja kongaro ndji ri po.—1 Kor. 7:31.

15. Omauzeu yeṋe ovakambure tjiva ngu va muna?

¹⁵ Indu otjira tja Mukuru tji tje tupe omazuviro omape wOmbeibela poo omuhunga ohunga nomuano wetu womeritjindiro, eṱe tu u yakura nokuuṱakamisa mehupo retu. Nu hapo tu raisa ongaro iṋe indu otjira tji tja tjiti omarundurukiro warwe ngu maye ṱunu kehupo retu? Otjotjihorera, mozombura nḓa ovimariva mbi ungurisiwa kokutunga nokuṱuna otuveze twomerikotameneno tja rira otjingi. Kunao, Orutu Orunane rwa ningira kutja ozombongo pekepeke ze ungurise Etuwo rimwe rOmerikotameneno. Nu mena romarundurukiro ngo, Omatuwo tjiva wOmerikotameneno ya randisiwa. Nu ovimariva mbyo vi ungurisiwa okutunga otuveze twarwe twomerikotameneno motuveze mu maye hepwa tjinene. Indu tji wa tura moruveze otuveze twomerikotameneno mu tu randisiwa nu ozombongo pekepeke mu ze ungurisa etuwo rimwe romerikotameneno, ove mape ya omunu ouzeu okurundurura ongaro yoye okuhitasana nongaro ndji ri po. Ovakambure tjiva nai ve hepa okutoora omikato omire okuyenda kozombongarero zombongo. Nu varwe mba ungura oukukutu okutunga poo okuṱuna Etuwo rOmerikotameneno  mape ya ave ripura kutja ongwaye nambano tji ma ri randisiwa. Owo mape ya ave ripura kutja oruveze rwawo nozongondjero nḓu va tjita yari omungandjo uriri. Posi yokutja, owo ve yakura omarundurukiro omape nga nu mave sokutangwa.

16. Omomuano uṋe erakiza ndi ri ri mOvakolose 3:23, 24, mu ma ri tu vatere okukara nondjoroka?

¹⁶ Eṱe matu kayenda komurungu okukara nondjoroka indu tjitwa zemburuka kutja oviungura avihe mbi tu ungura tu ungurira Jehova, nokutja eye u hongorera po otjira tje. (Lesa Ovakolose 3:23, 24.) Ombara David wa raisa otjihorera otjiwa indu tja yandja ovimariva vyouharupu komatungiro wondjuwo ondjapuke ya Muhona. Eye wa tja: “Ami notjiwaṋa tjandje, tjiri, katu nokuyenena okukupa otjiṋa, orondu otjiyandjewa atjihe tji za mOve, neṱe matu ku yarurire imbi mbi ri ovyoye.” (1 Ekuruh. 29:14) Indu tji matu yandja oviyandjewa vyouharupu eṱe wina tu yandja ku Jehova okuza mu imbi eye mbye tupa. Posi yokutja, ku yorokisa omutima wa Jehova indu tji matu yandja oruveze, omasa novimariva vyetu okuungura otjiungura tje.—2 Kor. 9:7.

17. Ongwaye tji wa ha sokuteka ombango indu tji mo hepa okutjita omarundurukiro?

¹⁷ Kutja tu kare mondjira ongwaṋi ndji twara komuinyo waaruhe, eṱe atuhe matu sokuhorera ku Jesus. (1 Petr. 2:21) O teka ombango indu tji mo hepa okutjita omarundurukiro. Indu tji mo munu kutja mo hepa okutjita omarundurukiro, matji raisa kutja ove tjiri mo vanga okukongorerera omuhunga okuza ku Jehova. Katu sokuzemba kutja Jehova u tjiwa kutja kaweṱe ohomonena. Kunao, eye ka undjireko ovingi kweṱe.

18. Ovikwaye mbi matu sokutjita kutja tu yenenise ondando yetu?

¹⁸ Ngatu yandja ombango koruyaveze rwetu nokutjita omarundurukiro ngu maye heperwa po momeripura wetu, ongaro novitjitwa vyetu. (Omiano 4:25; Luk. 9:62) Ngatu kayende komurungu okurira overisusuparise, ‘okunyanda momitima, nokupaha omekurisiro wombepo.’ (2 Kor. 13:11) Indu tji twa tjiti nao, ‘Ndjambi worusuvero nowohange ma kara puna eṱe.’ Eye me tu vatere okukara nondjoroka nai nu me ke tupa omuinyo waaruhe mouye oupe.