1. Segun ta Mateo 7:13, 14, ngatta gittana mabbiahe ittam?

MABBIAHE ittam ngamin mappange ta paraiso. Kadaggaw, ikaya tam nga matuttul yatun nga dalan tapenu tadday ittam noka ta pammagurayan ni Jehova. Ngem kagitta na kinagi ni Jesus, asilo anna atazzi yatun nga dalan. (Bibbigan i Mateo 7:13, 14, NW.) Kunne na gapa, imperfekto ittam yayya nga egga ira i tiempo nga ariattam nga matuttul yatun.​—Gal. 6:1.

2. Anni i gigiammuattam taw nga artikulo? (Innan gapa i kahon nga “ Makoffun i Kinapakalinno Tapenu Metunuttam i Dakkua Tam.”)

² Nu kayà tam nga kanayun nga matuttul i dalan mappange ta inango, mawag tu itunuttam i appana-panono anna annangngua tam. Kinagi ni apostol Pablo ta taga-Corinto ira nga mawag tu kanayun ira nga “mappetunung.” (2 Cor. 13:11, NW) Kunnatun gapa nittam ta maddaggun. Gigiammuattam taw nga artikulo nu kunnasi itunung na Biblia i dakkua tam anna nu kunnasi ittam uffunan na manakam ira nga wawwaragi tapenu ari ittam meyawawan ta dalan mappange ta inango. Ammuattam gapa nu ngatta egga ira i tiempo nga marigatan ittam nga tuttulan i direksion nga maggafu ta organisasion ni Jehova. Tapus, ammuattam nu anni i meyuffun na kinapakalinno nu mawag tu mappetunung ittam anna nu kunnasi nga ari mawawan i pagayayya tam ta passerbi kani Jehova.

3. Kunnasi naka moffunan na Uvovug na Dios?

³ Nu sittam laman i mangusito nu fustu i nononopan anna mataga-tageno tam, marigatan ittam. Ngatta? Megafu ta minangngilogo i futu tam yayya nga marigatan ittam nga  mammuan nu sitaw i pangifuntan natun nittam. (Jer. 17:9) Mabi tam laman gapa nga ‘ilogo i baggi tam.’ (Sant. 1:22) Yayya nga mawag tu usattam i Uvovug na Dios tapenu usitakkan i gibbaggiattam anna ammuan i kurug nga “appana-panono anna pakkaraga” tam. (Heb. 4:12, 13) Megitta i Uvovug na Dios ta tadday nga X-ray machine nu sitaw masingattam i kononaggattam. Ngem mawag tu mappakalinno ittam tapenu mabbenefisio ittam ta tabarang na Biblia onu na sinunno ira na Dios.

4. Ngatta makagi tam nga manaki ni Patul Saul i mappetunung?

⁴ Masingattam ta ehemplo ni Patul Saul i mesimmu nu awan nittam i kinapakalinno. Arianna kayà nga metunung i appana-panono anna kukukuanna ira. (Sal. 36:1, 2; Hab. 2:4) Turi ta nangiyawa tu espesipiko nga bilin si Jehova nu anni i kuanna kabalinna nga affutan i Amalekita ira, arianna nga sinuttul yatun. Nivuya yayya ni profeta Samuel ta kiningnguana ngem arianna nga inalawa yatun. Nikatununganna lallagu i baggina anna kinagina tu baddi laman yari nga gannug anna nipaliwana yatun ta tanakuan. (1 Sam. 15:13-24) Nige paga nga nesimmu yatun, dati ngana nga nappakatunung si Saul. (1 Sam. 13:10-14) Kaddaraddam ta matagga i ulu ni Patul Saul. Arianna nga inuli i appana-panonona yatutta si Jehova ngana i nangivuya nisa anna inalsanna i faborna nisa.

5. Anni i magigiammu tam ta nesimmu kani Patul Saul?

⁵ Ariattam kayà nga megitta kani Patul Saul. Yatutta iyavu tam ta baggi tam: ‘Nu egga i mabibbig ku nga tabarang ta Biblia, irasonakku kari i kukukuakku? Nononopakku kari nga baddi laman nga gannug yatun? Ipaliwa ku kari yatun ta tanakuan?’ Nu wan i tabbag tam ta maski tadday tatun ira nga pakkiavu, mawag tu itunuttam i appana-panono tam. Megafu ta nu matagga i ulu tam, manaki ni Jehova nga makikkofun nittam.​—Sant. 4:6.

6. Anni i nadduman ni Patul David kani Patul Saul?

⁶ Dakal i nadduman ni Patul David kani Patul Saul. Kakayàna i ‘dob na YAFU.’ (Sal. 1:1-3) Ammuna nga paliaran ni Jehova danuri minappakalinno ngem ikalussona danuri minappakatannang onu matagga i uluda. (2 Sam. 22:28) Yayya nga nitunung ni David i appana-panonona segun ta kakkagian na dob na Dios. Niturana: “Daya-rayawak-ku i YAFU gafu ta irolluan nà, nu ta gabi i nono ku ay tabarangngan nà.”​—Sal. 16:7.

7. Anni i kuattam nu mapakalinno ittam?

⁷ Mapakalinno ittam nu ipamavuluttam tu itunung na Biblia i marake nga appana-panono tam nige tam paga kuan yatun. Gittana kakkagian na Biblia nittam: “Yaw i dalan. Tatun kamu lumakag.” Tabarangngan ittam natun nu mamegafu ittam ngana nga meyawawan ta fustu nga dalan. (Isa. 30:21) Aru gapa i benefisio na pagginna kani Jehova. (Isa. 48:17) Ari ngana mawag tu mepasiranan ittam ta pangitunung na tanakuan anna mas maddukko ittam kani Jehova megafu ta matageno tam nga ibilanna ittam tu ánana.​—Heb. 12:7.

8. Segun ta Santiago 1:22-25, ngatta negitta i Biblia ta ispefu?

⁸ Megitta i Biblia ta tadday nga ispefu. (Bibbigan i Santiago 1:22-25.) Magispefu ittam nige tam nga manaw ta balay tapenu masingattam nu egga paga i mawag tu uliattam nige paga nga ivuya na tanakuan i itchura tam. Kunnatun gapa nu mabbibbig ittam tu Biblia. Masingattam nu anni i mawag nga uliattam ta appana-panono tam. Aru i mabbibbig tu inaggaw nga teksto nigeda manaw ta baleda. Ipamavuludda nga influwensian  na nabibbigda i appana-panonoda. Tapus nonopadda ta interu aggaw nu kunnasida nga meyaplika i tabarang nga nabibbigda. Mawag gapa tu inaggaw nga mabbibbig ittam tu Biblia anna pannonopattam tu mapia danatun. Awayyana nga makagi tam nga mabi laman yatun ngem kuruga importante yatun tapenu ari ittam nga meyawawan ta atazzi nga dalan mappange ta inango.

9. Ngatta mawag tu tabarangngan naka na tadday nga kofun?

⁹ Napuruebammu ngana kari i lumakag ta tadday nga dalan nga mangiyarayyu ngana nikaw kani Jehova? (Sal. 73:2, 3) Nu nigutu na kofummu nga tabarangngakka, gininnam kari yatun? Makasta nu kunnatun i kingnguam. Siguradu nga mappabalo ka nga nigutu-gutu naka nga kagianan.​—Prov. 1:5.

10. Anni nakuan i reaksiommu nu itununnaka na kofummu?

¹⁰ Kinagi na Biblia: “Ivuya naka na matalo nga kofun maski nu mataki yatun.” (Prov. 27:6) Anni i kebalinan natun? Innattam i tadday nga ilustrasion. Masses-cellphone ka durante nga makkantay ka ta dalan anna ariammu nasingan nga egga i mappange nga takay. Masikan i pinagguggung nikaw na kofummu yayya nga naggafang yatun. Ngem megafu tatun nga kingnguana, ari ka nga nadompi. Maski piga aggaw nga ikataki mu yatun, ikalussom kari i kofummu? Siempre ari! Mappabalo ka paga lallagu. Kunnatun gapa nu itunung ittam na kofuttam megafu ta egga i kinagi onu kingngua tam nga ari metonos ta matunung nga estandarte na Dios. Mataki yatun ngem kolapa nu ikalussom yayya megafu ta panabaranna. (Ecl. 7:9) Pia ngana laman ta nigutu naka nga uffunan.

11. Ngatta panakitan na tolay i makasta nga tabarang na kofunna?

¹¹ Ngatta panakitan na tolay i makasta nga tabarang na minaggiddu nga kofunna? Megafu ta pappakatannang. Mas kayà danuri minappakatannang nga ginnan i “pakkata-katallan na talinga da” ngem ‘pallikuradda i kurug.’ (2 Tim. 4:3, 4) Abboda tu mas malalaki ira anna atatannang i paningadda ta baggida. Ngem nitura ni apostol Pablo: “Nu egga i magabbo tu atannang i kekwentan na maski nu ari, illokowan na laggapa i baggi na.” (Gal. 6:3) Makasta i pinangiyesplika tatun ni Patul Solomon. Kunna: “Mas makasta i pobre ngem mauto nga abbing anne ta patul nga lakay ngana ngem arianna usan i utona anna ari ngana magginna ta tabarang.”​—Ecl. 4:13.

12. Anni i magigiammu tam kani apostol Pedro segun ta Galacia 2:11-14?

¹² Makasta i ehemplo ni apostol Pedro ta pangalawa tu pangitunung ni apostol Pablo nisa. (Bibbigan i Galacia 2:11-14.) Imbes tu mangipappan yayya tu taki na nono kani apostol Pablo megafu ta mataki i pinakkagina anna aru i nakaginna tatun, inalawa lallagu ni Pedro i panabaranna. Inagalanna paga lagu si Pablo nga “iddeddukat-tam nga wagi.”​—2 Ped. 3:15.

13. Anni nakuan i daddammattam nige ittam nga manabarang?

¹³ Anni i mawag tu nonopammu nigem tabarangngan i kofummu? Iyavu mu ta baggim: ‘“Mappakatunung” ngà laman kari?’ (Ecl. 7:16) Husgan na minappakatunung nga tolay i tanakuan base laman ta opinionna, ari tu ta estandarte ni Jehova. Awan gapa tu pagallona. Yayya nga usitakkammu labbi i baggim. Nu talaga kawagan nga itunummu i kofummu, ikagim nisa i problema anna mangiyusa tu mamappanono nga pakkiavu tapenu malippawana i nakkamalianna.  Daddamman nga tattabbaganna yatun kani Jehova, ari tu tanniko. Yari tu iyusam i Biblia ta pangitunummu nisa. (Roma 14:10) Nu manabarang gafu ittam, mattalo ittam ta sirib na Biblia anna parigattam i pangikallo ni Jesus. (Prov. 3:5; Mat. 12:20) Ngatta? Megafu ta nu makasta i pattratu tam ta tanakuan, kunnatun gapa si Jehova ta nittam.​—Sant. 2:13.

14. Anni ira i usu-usan na organisasion na Dios tapenu moffunan ittam?

¹⁴ Usu-usan ni Jehova i organisasionna tapenu igiya ittam ta dalan mappange ta inango. Makoffun nittam i video, publikasion, anna study tam ira tapenu meyaplika tam i tabarang na Biblia. Nebase ngamin danatun ta Katurakan. Mattalo gapa i Manangngal nga Baggi ta masanto nga espiritu nu maddesision ira nu kunnasi nga metuppal i trabahu nga pallayyagayya. Ngem egga ira i tiempo nga innadda uli danatun nga desision tapenu mammuadda nu egga i mawagda nga ulian. Ngatta? Megafu ta “i paddia-paddian naw nga mundo ay manguloli” anna mawag tu makibagay i organisasion na Dios tatun.​—1 Cor. 7:31, NW.

15. Anni ira i neparubang ta karuan nga publisher?

¹⁵ Nu egga ira i panguli nga malawa tam ta organisasion na Dios kagitta na panguli ta pakalippawa tam ta tuddu na Biblia onu ta moral nga estandarte, magga tuttulattam yatun. Ngem kunnasi gapa nu afektadu ittam mismu na tadday nga panguli? Angngariganna, nangngina i magasto ta pamataddag anna pammentena tu Kingdom Hall ira. Megafu tatun, dinesision na Manangngal nga Baggi nga mawag tu meyusa tu mapia danatun. Yari tu napattaradday i karuan nga kongregasion anna egga ira Kingdom Hall nga nelaku. Nakua yatun tapenu meyusa i fundu ira ta pamataddag tu Kingdom Hall ira nu sitaw mas kawagan danatun. Nu kunnatun i nesimmu ta lugarnu, baka marigatakka nga alawatan yatun nga panguli. Mas neyarayyu ngana gare i karuan nga publisher ta Kingdom Hall. Nattaka gapa i karuan nga nappataddag anna nammentena tatun nga Kingdom Hall nu ngatta melaku yatun. Baka nonopadda nga kakenga laman i tiempo anna pinabbabbannagadda. Ngem sinuportadda  lagapa yaw nga bagu nga unnug yatutta makomendan ira.

16. Segun ta Colosas 3:23, 24, kunnasi ittam mabbalin tu magayayya?

¹⁶ Magayayya ittam nu nonopattam nga para kani Jehova i kukukuattam anna idirektana i organisasionna. (Bibbigan i Colosas 3:23, 24, NW.) Makagigiammu ittam ta makasta nga ehemplo ni Patul David ta paddona para ta pappataddag tu templo. Kinagina: “Sinni ngà anna sinni gapa i totolè, nga egga kepangngattammi nga magangngua tu boluntariu nga tavvung? Ta naggafu nikaw i ngamin, anna iyawa mi nikaw i naggafu mismu ta limam.” (1 Cro. 29:14) Maggafu lagapa kani Jehova i ngamin nga idona tam. Ngem kuruga appresianna i tiempo, sikan, anna pakkukua nga iyusa tam tapenu metuppal i pagayatanna.​—2 Cor. 9:7.

17. Ngatta ari nakuan makkafi i nono mu nu egga paga i mawag tu itunummu?

¹⁷ Nu kayà tam nga mattalupaddian ittam ta dalan mappange ta inango, mawag tu tuttulattam si Jesus. (1 Ped. 2:21) Nu egga paga i mawag tu itunuttam, ari nakuan makkafi i nono tam. Makasta lagu yatun ta ipasinganna nga kayà tam nga tuttulan si Jehova. Daddammattam nga ammu ni Jehova nga imperfekto ittam yari tu arianna ekspektan nga perfekto i pamarig tam kani Jesus.

18. Anni i kuattam tapenu makadde ittam ta paraiso?

¹⁸ Nakafokus ittam nakuan ta mappange anna sigga-parattam nakuan nga itunung i appana-panono anna i annangngua tam. (Prov. 4:25; Luc. 9:62) Mattalupaddian ittam nga mapakalinno anna ‘itulu-tuloy tam i magayayya, i mappetunung.’ (2 Cor. 13:11, NW) Nu kuattam yatun, ‘makitappaddian nittam i Dios nga minaggiddu anna mangiyawa tu imammo.’ Kunne na gapa, magayayya ittam sangawe pagalaman anna makadde ittam noka ta paraiso.