1. Sigun iti Mateo 7:13, 14, apay a maibagatayo nga arigna addatayo iti maysa a panagdaliasat?

ADDATAYO amin iti maysa a panagdaliasat. Ti destinasion, wenno kalattayo, ket agbiag iti baro a lubong a siaayat nga iturayanto ni Jehova. Inaldaw nga ikagkagumaantayo ti magna iti dalan nga agturong iti biag. Ngem kas imbaga ni Jesus, nailet dayta a dalan ket no dadduma, narigat a pagnaan. (Basaen ti Mateo 7:13, 14.) Imperpektotayo isu a nalaka laeng a suminatayo iti daytoy a dalan.—Gal. 6:1.

2. Ania ti usigentayo iti daytoy nga artikulo? (Kitaen met ti kahon a “ Tulongannatayo ti Kinapakumbaba a Mangilinteg iti Addangtayo.”)

² Tapno agtalinaedtayo iti nailet a dalan nga agturong iti biag, masapul a situtuloktayo a mangbalbaliw iti panagpampanunot, kababalin, ken tigtignaytayo. Pinaregta ni apostol Pablo dagiti Kristiano idiay Corinto nga itultuloyda ti ‘agpailinteg.’ (2 Cor. 13:11) Agaplikar met kadatayo dayta a balakad. Iti daytoy nga artikulo, pagsasaritaantayo no kasano a matulongannatayo ti Biblia a mangilinteg iti addangtayo ken no kasano a makatulong dagiti gagayyem a nataengan iti naespirituan tapno agtalinaedtayo iti dalan nga agturong iti biag. Usigentayo met no kaano a mabalin a narigat a suroten ti bilin ti organisasion ni Jehova. Kitaentayo no kasano a matulongannatayo ti kinapakumbaba tapno makapagbalbaliwtayo a ditay mapukaw ti ragsaktayo nga agserbi ken Jehova.

3. Ania ti maaramidan kenka ti Sao ti Dios?

³ Saan a nalaka a sukimaten ti pampanunot ken rikriknatayo. Ngamin, manangallilaw ti pusotayo, isu a marigatantayo a mangammo no pangituronganna kadatayo. (Jer. 17:9) Nalakatayo nga allilawen ti bagitayo iti “ulbod a panagrasrason.” (Sant. 1:22) Isu a masapul nga usarentayo ti Sao ti Dios a  mangsukimat iti bagitayo. Ipakita ti Sao ti Dios ti kinataotayo, ti “pampanunoten ken tarigagay” ti pusotayo. (Heb. 4:12, 13) Ti Sao ti Dios ket kas iti maysa nga X-ray machine, a makatulong tapno makitatayo ti uneg ti bagitayo. Ngem masapul a napakumbabatayo tapno magunggonaantayo iti balakad ti Biblia wenno dagiti pannakabagi ti Dios.

4. Ania ti mangipakita a nagbalin a napannakkel ni Ari Saul?

⁴ Ipakita ti saan a nasayaat nga inaramid ni Ari Saul ti mapasamak no saantayo a napakumbaba. Nagbalin a napannakkel unay ni Saul nga uray la saanna nga inamin, uray iti bagina, a masapul a malinteg ti panagpampanunot ken tigtignayna. (Sal. 36:1, 2; Hab. 2:4) Nalawag dayta idi adda espesipiko nga imbilin ni Jehova nga aramiden ni Saul kalpasan a maabakna dagiti Amalekita. Ngem saan a nagtulnog ni Saul ken Jehova. Ket idi kinompronta isuna ni propeta Samuel maipapan iti dayta, saanna nga inamin ti kamalina. Inkalinteganna ketdi ti inaramidna ket imbagana a saan unay a nadagsen ti panagsukirna ken pinabasolna ti sabsabali. (1 Sam. 15:13-24) Sakbay dayta, impakitan ni Saul ti kasta a kababalin. (1 Sam. 13:10-14) Makapaladingit ta impalubosna a tumangsit ti pusona. Saanna a binaliwan ti panagpampanunotna, isu a tinubngar ken inlaksid ni Jehova.

5. Ania ti masursurotayo iti inaramid ni Saul?

⁵ Ditay kayat a tuladen ni Saul, isu a nasayaat nga isaludsodtayo iti bagitayo: ‘No adda mabasak a balakad iti Sao ti Dios, adda kadi tendensiak a mangikalintegan iti panagpampanunotko? Tagtagilaglag-anek kadi dagiti epekto ti panagsukir? Ipabpabasolko kadi iti sabali dagiti ar-aramidek?’ No wen ti sungbattayo iti aniaman kadagitoy a saludsod, masapul nga ilintegtayo ti panagpampanunot ken kababalintayo. Ta no saan, agbalin a natangsit unay ti pusotayo ket ilaksidnatayo ni Jehova kas gayyemna.—Sant. 4:6.

6. Ania ti nagdumaan da Ari Saul ken Ari David?

⁶ Paliiwentayo ti nagdumaan ni Ari Saul ken ti simmukat kenkuana, ni Ari David, a mangipatpateg iti “linteg ni Jehova.” (Sal. 1:1-3) Ammo ni David nga isalakan ni Jehova dagiti napakumbaba ngem busorenna dagiti natangsit. (2 Sam. 22:28) Isu nga impalubos ni David a ti linteg ti Dios ti mangilinteg iti panagpampanunotna. Insuratna: “Idaydayawkonto ni Jehova a mangbalbalakad kaniak. Uray iti rabii, dagiti kaunggan a pampanunotko ilintegdak.”—Sal. 16:7.

7. Ania ti aramidentayo no napakumbabatayo?

⁷ No napakumbabatayo, ipalubostayo nga ilinteg ti Sao ti Dios ti di umiso a panagpampanunottayo sakbay a maaramidtayo dayta. Ti Sao ti Dios ket kaslanto iti maysa a timek a mangibagbaga: “Daytoy ti dalan. Magnakayo iti dayta.” Pakdaarannatayo no suminsinatayon iti dalan—no agpakpakannigid wenno agpakpakannawantayon. (Isa. 30:21) Adu ti pagsayaatanna no dumngegtayo ken Jehova. (Isa. 48:17) Kas pagarigan, saantayto a mapabainan gapu ta adda sabali a nangkorehir kadatayo. Kasta met, sumingedtayo ken Jehova gapu ta ammotayo a ti panangtratona kadatayo ket kas iti dungdungnguenna nga anak.—Heb. 12:7.

8. Kas nadakamat iti Santiago 1:22-25, kasanotayo nga usaren ti Sao ti Dios kas sarming?

⁸ Mabalintayo nga usaren ti Sao ti Dios kas sarming. (Basaen ti Santiago 1:22-25.) Kaaduan kadatayo ti binigat nga agsarming sakbay a pumanawtayo iti balaytayo. Iti kasta, makitatayo no adda masapul nga ikkaten wenno urnosentayo sakbay nga adda sabali a makakita. Kasta met, no inaldaw a basaentayo ti Biblia, makitatayo dagiti pamay-an a mailintegtayo ti panagpampanunot ken kababalintayo. Para iti adu, makatulong ti binigat a panagbasa  iti teksto para iti dayta nga aldaw sakbay a pumanawda iti balayda. Ipalpalubosda a ti mabasada ti mangimpluensia iti panagpampanunotda. Sa iti agmalem, bumirokda iti pamay-an a mayaplikarda ti balakad ti Sao ti Dios. Masapul met a regular nga agadaltayo, a pakairamanan ti panagbasa ken panangpampanunot iti Sao ti Dios iti inaldaw. Kasla simple laeng daytoy, ngem maysa dayta kadagiti kapatgan a maaramidantayo tapno makapagtalinaedtayo iti nailet a dalan nga agturong iti biag.

9. Apay a mabalin a korehirennaka ti gayyemmo?

⁹ Napadasam kadin ti nagna iti dalan a mangyadayo kenka ken Jehova? (Sal. 73:2, 3) No adda gayyemmo a nataengan iti naespirituan, a nakaitured a mangkorehir kenka, dimngegka kadi ken inyaplikarmo ti balakadna? No wen, husto ti inaramidmo, ken sigurado nga agyamanka ta pinakdaarannaka ti gayyemmo.—Prov. 1:5.

10. Ania koma ti reaksionmo no korehirennaka ti gayyemmo?

¹⁰ Ipalagip kadatayo ti Sao ti Dios: “Mangtubngar ti matalek a gayyem uray no kasla nasakit.” (Prov. 27:6) Kasano a pudno daytoy? Usigentayo daytoy nga ilustrasion: Ipapanmo a bumallasiwka iti maysa a kalsada nga adu ti lumablabas a lugan, ngem nasingaka gapu ta kitkitaem ti selponmo. Nagnaka a dika kimmitkita iti aglawlawmo. Idi kuan, bigla nga iniggaman ti gayyemmo ti takiagmo ket ginuyodnaka iti igid ti kalsada. Permi ti panangpetpetna iti takiagmo nga uray la limmitem. Ngem gapu iti kinaalistona, saanka a nadungpar iti lugan. Uray no mano nga aldaw a nasakit ti takiagmo gapu iti panangguyod kenka ti gayyemmo, agsakit kadi ti nakemmo kenkuana? Siempre, saan! Agyamanka ketdi ta tinulongannaka. Kasta met, no pakdaarannaka ti gayyemmo gapu ta ti panagsasao ken panagtigtignaymo ket saan a maitunos kadagiti nalinteg a pagalagadan ti Dios, mabalin a masaktanka iti damo. Ngem dika koma makaunget wenno masair iti balakadna. Kinamaag dayta. (Ecl. 7:9) Agyamanka ketdi iti gayyemmo ta naituredna nga ibaga dayta kenka.

11. Ania ti mabalin a rason a saan nga awaten ti maysa ti nasayaat a balakad ti gayyemna?

¹¹ Ania ti mabalin a rason a saan nga awaten ti maysa ti nasayaat a balakad ti naayat a gayyemna? Kinapannakkel. Ti la kayat a denggen dagiti napannakkel ket ti ‘kayatda a mangngeg. Saanda a dumngeg iti kinapudno.’ (2 Tim. 4:3, 4) Ipapanda a nalalaing ken nangatngatoda ngem iti sabsabali. Ngem insurat ni apostol Pablo: “No panunoten ti maysa a tao nga isu ket importante idinto ta saan met, al-allilawenna ti bagina.” (Gal. 6:3) Nagsayaat ti panangilawlawag iti daytoy ni Ari Solomon. Insuratna: “Nasaysayaat ti napanglaw ken masirib nga ubing ngem ti lakay ken maag nga ari, a saanen a mangipangag iti pakdaar.”—Ecl. 4:13.

12. Kas mabasa iti Galacia 2:11-14, ania ti masursurotayo iti ulidan ni apostol Pedro?

¹² Usigentayo ti ulidan ni apostol Pedro idi kinorehir ni apostol Pablo iti sanguanan dagiti tattao. (Basaen ti Galacia 2:11-14.) Mabalin koma a nagsakit ti nakem ni Pedro iti imbaga ni Pablo, a pinampanunotna ti pamay-an a panangibagana iti dayta ken ti lugar a nangibagaanna iti dayta. Ngem masirib ni Pedro. Inawatna ti balakad ket saan a nagipempen iti sakit ti nakem. Imbes ketdi, tinukoyna idi agangay ni Pablo kas ‘patpatgen a kabsat.’—2 Ped. 3:15.

13. Ania dagiti punto a masapul a laglagipentayo no mangbalakadtayo?

¹³ No makitam a masapul a balakadam ti gayyemmo, ania dagiti punto a masapul a laglagipem? Sakbay a kasaritam ti gayyemmo, isaludsodmo iti bagim, “‘Nalintegak kadi unay’?” (Ecl. 7:16) Ti nalinteg unay a  tao ukomenna ti sabsabali maibatay kadagiti bukodna a pagalagadan, saan a kadagiti pagalagadan ni Jehova, ket mabalin a saan a naasi. No nausigmon ti bagim ket makitam latta a masapul a kasaritam ti gayyemmo, silalawag nga ibagam kenkuana ti problema ken mangusarka kadagiti mamagpanunot a saludsod tapno matulongam a mangbigbig iti kamalina. Siguraduem a naibatay iti Kasuratan ti ibagam, a laglagipem a ti gayyemmo ket manungsungbat ken Jehova, saan a kenka. (Roma 14:10) Usarem ti sirib manipud iti Sao ti Dios, ken no mangbalakadka, tuladem ti pannakipagrikna ni Jesus. (Prov. 3:5; Mat. 12:20) Apay? Gapu ta tratuennatayo ni Jehova sigun iti panangtratotayo iti sabsabali.—Sant. 2:13.

14. Ania ti ipapaay kadatayo ti organisasion ti Dios?

¹⁴ Iwanwanwannatayo ni Jehova iti dalan nga agturong iti biag babaen ti naindagaan a paset ti organisasionna, a mangipapaay kadagiti video, publikasion, ken gimong a tumulong kadatayo amin a mangyaplikar iti balakad ti Sao ti Dios. Mapagpannurayan dagita ta naibatayda iti Kasuratan. Agpampannuray ti Bagi a Manarawidwid iti nasantuan nga espiritu no agdesision no kasano ti kasayaatan a pamay-an ti panangasaba. Kaskasdi, regular a reprepasuen ti Bagi a Manarawidwid dagiti desision maipapan iti pannakaorganisar ti trabaho. Apay? Gapu ta “agbaliwbaliw ti pasamak ti lubong,” ket masapul a makidanggay ti organisasion ti Dios kadagiti baro a kasasaad.—1 Cor. 7:31.

15. Ania a pakarigatan ti pakaipaspasanguan ti dadduma nga agibumbunannag?

¹⁵ Awan duadua a sisasaganatayo a sumurot kadagiti maaw-awattayo a naibatay-Biblia a bilin maipapan iti doktrina wenno moralidad. Ngem ania ti reaksiontayo no mangaramid ti organisasion ti Dios iti panagbalbaliw a mangapektar iti dadduma a paset ti biagtayo? Kas pagarigan, iti napalabas a tawtawen, dimmakkel unay ti magastos iti panagbangon ken panangmantener kadagiti lugar a pagdaydayawan. Isu nga imbilin ti Bagi a Manarawidwid a naan-anay a mausar dagiti Kingdom Hall. Gapu iti dayta, napagtitipon ti dadduma a kongregasion ken nailako ti dadduma a Kingdom Hall. Ti naurnong a kuarta ket maus-usar iti panagibangon kadagiti  Kingdom Hall kadagiti lugar nga agkasapulan unay iti dayta. No agnanaedka iti lugar a mailaklako dagiti Kingdom Hall ken mapagtitipon dagiti kongregasion, mabalin a marigatanka a makibagay kadagiti baro a kasasaad. Ad-adayon ti biahien ti dadduma a kakabsat tapno makigimong. Mabalin a masmasdaaw ti dadduma a nagbannog a mangibangon wenno mangmantener iti maysa a Kingdom Hall no apay a mailako dayta. Mabalin a mariknada a sayang ti panawen ken panagreggetda. Ngem makikooperarda latta iti daytoy baro nga urnos isu a makomendaranda.

16. Kasano nga agtalinaedtayo a naragsak no iyaplikartayo ti balakad iti Colosas 3:23, 24?

¹⁶ Agtalinaedtayo a naragsak no laglagipentayo nga agtrabtrabahotayo para ken Jehova ken iwanwanwanna ti organisasionna. (Basaen ti Colosas 3:23, 24.) Mapagulidanan ni Ari David iti panagdonar iti kuarta a pagbangon iti templo. Imbagana: “Asinoak ken asino ti ilik, tapno mangtedkami kadagiti boluntario a daton a kas kadagitoy? Ta naggapu kenka ti amin a banag, ket intedmi kenka ti naggapu iti bukodmo nga ima.” (1 Cron. 29:14) No agdonartayo, it-itedtayo met ken Jehova ti naggapu iti bukodna nga ima. Uray no kasta, ap-apresiaren ni Jehova ti tiempo, pigsa, ken sanikua nga idonartayo kas panangsuporta iti trabaho a kayatna a maaramid.—2 Cor. 9:7.

17. Apay a saanka koma a maupay no kasapulan nga ilintegmo dagiti addangmo?

¹⁷ Tapno agtalinaedtayo amin iti nailet a dalan nga agturong iti biag, masapul a surotentayo a naimbag dagiti addang ni Jesus. (1 Ped. 2:21) No masapul nga ilintegmo dagiti addangmo, dika maupay. Mabalin a nasayaat a pagilasinan dayta, a mangipakita a kayatmo a suroten ti panangiwanwan ni Jehova. Laglagipentayo nga ammo ni Jehova nga imperpektotayo isu a saanna nga ekspektaren a naan-anay a matuladtayo ti ulidan ni Jesus.

18. Ania ti masapul nga aramidentayo tapno maragpattayo ti kalattayo?

¹⁸ Sapay koma ta nakapokustayo amin iti masanguanan ken situtuloktayo a mangilinteg iti panagpampanunot, kababalin, ken tigtignaytayo. (Prov. 4:25; Luc. 9:62) Agtalinaedtayo koma a napakumbaba, ‘itultuloytayo ti agragsak [ken] mailinteg.’ (2 Cor. 13:11) No aramidentayo dayta, “addanto [kadatayo] ti Dios ti ayat ken ti talna.” Ken saantayto laeng a makadanon iti destinasiontayo no di ket matagiragsaktayo pay ti agdaliasat.