1. Mahte 7:13, 14 hku nga yang anhte gaw hkrun lam hkawm nga ai ngu hpa majaw lu tsun ai kun?

ANHTE yawng hkrun lam hkawm nga ga ai. Bandung gaw, Yehowa a tsawra myit hte uphkang ai mungkan nnan hta asak hkrung na matu re. Asak lam hta hkawm sa lu na matu shani shagu shakut ra ai. Raitim, Yesu tsun wa ai hte maren, dai lam gaw gyip nna, hkawm sa na matu kalang lang yak chye ai. (Mahte 7:13, 14 hpe hti u.) Anhte gaw n hkum tsup ai majaw, dai lam kaw nna yit mat na matu loi ai.​—Gal 6:1.

2. Ndai sumhpa hta hpa lam hkaja lu na kun? (“ Shagrit Shanem Ai Gaw Galai Shai Lu Hkra Karum Ya” ngu ai lawk hpe mung yu u.)

² Asak lu shangun ai gyip ai lam ntsa hta matut nga mayu yang, myit mang ai lam, myit jasat hte galaw ai lam ni hpe sharawng awng let galai shai ra ai. Kasa Pawlu gaw, Korinhtu Hkristan ni hpe matut nna “ra ang ai hku galai shai” na matu n-gun jaw ai. (2 Ko 13:11, NW) Dai gaw anhte hte mung seng ai. Galai shai lu hkra Chyum Laika gaw gara hku karum ya lu ai, asak lam hta matut nga lu hkra kung hpan ai manang ni gaw gara hku karum ya lu ai hpe ndai sumhpa hta hkaja lu na re. Yehowa a uhpung jaw ai lam matsun ni hpe hkan sa na matu gara aten hta yak chye ai hpe mung hkaja lu na re. Galai shai ai lam ni galaw nga let kabu gara lam mung lu na matu, shagrit shanem ai gaw gara hku karum ya ai hpe hkaja lu na re.

3. Chyum Laika gaw nang hpe gara hku karum ya lu ai kun?

³ Myit mang ai lam ni, hkamsha ai lam ni hpe san jep na matu n loi ai. Myit masin gaw magaw nna, gara de lam woi ya nga ai hpe chye na matu yak ai majaw re. (Yer 17:9) Tinang hkum tinang  hkalem na matu grai loi ai. (Yak 1:22) Tinang hkum tinang san jep na matu Chyum Laika hpe akyu jashawn ra ai. Myit hta nga ai lam, “kraw lawang na myit mamyit hte maw mawn ai” lam hpe Chyum Laika gaw madun ya lu ai. (Heb 4:12, 13) Chyum Laika gaw dat man kayat ai jak (X-ray) hte bung nna, myit kata hta hpa ni nga ai hpe mu lu ai. Raitim, Chyum Laika (sh) Karai a dat kasa ni hku nna lu la ai hpaji jaw ga ni kaw nna akyu lu mayu yang shagrit shanem ra ai.

4. Shawlu gumrawng wa ai hpe gara hku chye lu ai kun?

⁴ Shagrit shanem ai myit n nga yang, gara hku byin chye ai hpe Hkawhkam Shawlu a mabyin gaw madun dan ai. Tinang a myit mang ai lam, galaw ai lam ni hpe galai shai ra ai ngu ai hpe n hkap la lu ai du hkra gumrawng wa ai. (Shk 36:1, 2; Hab 2:4) Amalek ni hpe awng dang ngut ai hpang, hpa galaw ging ai hpe Yehowa lam matsun ai aten hta, gumrawng ai lam dan dawng wa ai. Yehowa a ga hpe Shawlu n madat ai. Myihtoi Samuela shading sharai ya ai shaloi hta mung, shi a mara ni hpe n yin la ai. N madat mara ai lam hpe ahpa atang sawn la nna, kaga ni hpe mara shagun ai. (1 Sa 15:13-24) Lai wa sai aten hta mung dai zawn galaw ga ai. (1 Sa 13:10-14) Shawlu gaw gumrawng wa nna, myit mang ai lam hpe n galai shai ai. Dai majaw, shi hpe Yehowa sharin shaga nna nyet kau ai.

5. Shawlu a mabyin kaw nna hpa sharin la lu ai kun?

⁵ Shawlu hte n bung mayu yang, tinang hkum tinang ndai ga san ni san ging ai: ‘Chyum Laika hti ai shaloi, galai shai ra ai hpe mu yang ngai lawt ga tsun ai kun? N madat mara ai lam hpe ahpa atang sawn la nga ai kun? Kaga ni hpe mara shangun ai kun?’ Dai zawn byin yang, tinang a myit mang ai lam hte myit jasat hpe galai shai ra ai. N galai shai yang, gumrawng wa chye ai. Yehowa gaw shi a jinghku byin ai kaw nna nyet kau na re.​—Yak 4:6.

6. Hkawhkam Shawlu hte Hkawhkam Dawi gaw gara hku shai ai kun?

⁶ Hkawhkam Shawlu hte shi hpang hkaw dung ai Hkawhkam Dawi gara hku shai ai hpe yu yu ga. Dawi gaw “Yehowa a tara ni” hpe tsawra ai. (Shk 1:1-3) Shagrit shanem ai ni hpe Yehowa hkye la nna, gumrawng ai ni hpe shagrit kau ai lam shi chye ai. (2 Sa 22:28, JCLB) Dai majaw, tinang a myit mang ai lam ni hpe Karai a tara hte maren, galai shai ai. Shi ndai hku ka wa ai: “Ngai hpe hpaji daw ya ai Yehowa hpe ngai shaa na nngai, Shana e pyi nye a myit masin ngai hpe sharin ya nga ai.”​—Shk 16:7.

7. Shagrit shanem ai wa gaw hpa galaw na kun?

⁷ Shagrit shanem ai wa gaw, shut shai ai myit mang lam hte maren n galaw shi yang, Chyum Laika hte maren galai shai na re. “Ndai gaw lam rai nga ai, ndai hku hkan mu” ngu tsun nga ai zawn, pai de, hkra de yit mat ai shaloi, Chyum Laika gaw sadi jaw na re. (Esa 30:21) Yehowa a ga madat yang akyu law law lu na re. (Esa 48:17) Ga shadawn, marai langai ngai shading sharai ya ai majaw, kaya hkrum ai baw byin sana n re. Tinang hpe tsawra ai kasha langai zawn, Karai Kasang kanawn mazum ai hpe chye ai majaw, Karai hte grau ni htep wa na re.​—Heb 12:7.

8. Yaku 1:22-25 hta tsun da ai hte maren Chyum Laika hpe jamna zawn gara hku akyu jashawn mai ai kun?

⁸ Chyum Laika gaw jamna hte bung ai. (Yaku 1:22-25 hpe hti u.) Jahpawt shagu nta kaw na garai n pru shi yang, law malawng jamna yu ai. Rai yang she, kaga ni n mu shi yang, galai shai ra ai lam ni hpe galai shai lu na re. Dai hte maren, shani shagu Chyum Laika hti ai shaloi, tinang a myit mang ai lam hte myit jasat hta galai shai ra ai lam ni hpe mu wa na re. Jahpawt shagu nta kaw na garai n pru shi yang, shani shagu na Chyum daw hti ai gaw  akyu nga ai lam masha law law chye wa ai. Dai Chyum daw hpe shani tup myit sumru nna, hkan sa na matu shakut ai. Dai sha n-ga, anhte gaw shani shagu Chyum Laika hti nna myit sawn sumru ai akyang nga ra ai. Loi na zawn san tim, asak lu shangun ai gyip ai lam ntsa matut nga lu hkra anhte galaw lu ai ahkyak htum ai lam langai re.

9. Gara aten hta nang hpe manang gaw shading sharai ya chye ai kun?

⁹ Yehowa kaw nna tsan mat shangun ai lam hta hkawm ga ai kun? (Shk 73:2, 3) Nden marai rawng let shading sharai ya ai kung hpan ai manang a ga hpe madat nna, dai hte maren hkan sa ai kun? Rai yang, jaw ai hpe galaw ai re. Sadi jaw ai manang hpe chyeju dum na gaw teng sha re.​—Gsh 1:4-5.

10. Manang langai shading sharai ya yang gara hku bai htang ging ai kun?

¹⁰ “Jinghku ni gaw nang hpe machyi shangun tim pyi, na a ntsa e kaja ai myit rawng nga ai” ngu Chyum Laika hta tsun da ai. (Gsh 27:6, JCLB) Hpa hpe tsun mayu ai kun? Ndai ga shadawn hpe myit yu u: Mawdaw lam hpe lai na matu la nga ai shaloi, phone de nang myit du taw ai. Pai, hkra n yu ai sha lai hkrup dat ai. Manang langai gaw nang hpe lam makau de du hkra gang dat ai. Aging agang gang dat ai majaw, lata machyi mat tim, dai hku galaw ai majaw sha, mawdaw n dawt hkrum ai re. Nhtoi loi na hkra lata machyi nga tim pyi, shi hpe nang pawt na kun? Pawt na n re. Karum ya ai majaw, chyeju dum na re. Dai hte maren, nang tsun ai ga, galaw ai lam ni gaw Karai a tsang madang ni hte nhtan shai nga ai majaw, manang langai sadi jaw ai shaloi, nnan hta gaw myit n pyaw byin chye ai. Raitim, pawt ai majaw, masin n si ai baw hkum galaw. Dai gaw hpaji n rawng ai hte bung ai. (Hpj 7:9) De a malai, nden marai hte sadi jaw ai majaw chyeju dum u.

11. Manang wa shading sharai ya ai hpe hpa majaw n hkap la chye ai kun?

¹¹ Manang wa shading sharai ya ai hpe hpa majaw nyet kau hkrup chye ai kun? Gumrawng ai majaw re. Gumrawng ai wa gaw, “madat la mayu ai lam ni hpe” sha madat nna, “tengman ai lam hpe” gaw n madat mayu ai. (2 Tm 4:3, 4, JCLB) Tinang a ningmu sha jaw dum chye ai. Raitim, ‘hpa mung garai n re ai wa gaw, ngai mung langai ngai rai nga nngai, nga nna rai dum a yang gaw, tinang . . . hkum hpe hkalem’ ai wa re ngu Pawlu ka wa ai. (Gal 6:3) Hkawhkam Shawlumon mung “sharin achyin n chye hkam ai, dingla ugut gu nna, angawk ai hkawhkam wa hta, hpaji byeng-ya rawng ai matsan mayan ma gaw, grau hpu nga ai” ngu asan sha tsun da ai.​—Hpj 4:13.

12. Galati 2:11-14 hta lawm ai kasa Petru a kasi ningli kaw nna hpa sharin la lu ai kun?

¹² Kasa Petru hpe kasa Pawlu masha hpawng hta shading sharai ya ai aten hpe myit yu u. (Galati 2:11-14 hpe hti u.) Pawlu tsun ai ga, tsun ai ladat, tsun ai aten a majaw Petru masin pawt chye ai. Raitim, Petru hpaji rawng ai. Hpaji jaw ga hpe hkap la ai. Pawlu hpe matai htang mayu ai myit n nga ai. Hpang e, Pawlu hpe “tsaw ra ai hpu nau Pawlu” ngu nna pyi shaga wa ai.​—2 Pe 3:15.

13. Manang wa hpe hpaji jaw ra wa yang hpa ni hpe myit shalawm ging ai kun?

¹³ Manang langai hpe hpaji jaw ra wa yang, gara lam ni hpe dum ging ai kun? Garai n tsun shi yang, ngai gaw ‘ladu lai hkra ding hpring dum ai’ kun? ngu nna tinang hkum tinang san u. (Hpj 7:16) Dai hku byin ai wa gaw, Yehowa a tsang madang ni hte maren n re ai sha, tinang a tsang madang ni hte maren kaga ni a malai n myit ya ai sha dawdan hkrup chye ai. Tinang hkum tinang san jep ngut ai hpang hta pyi,  manang wa hpe hpaji jaw ra ai ngu shadu yang, manghkang gaw hpa re ai hpe asan sha tsun dan u. Ga san san nna, shi a mara hpe mu wa hkra karum ya u. Chyum Laika hpe madung tawn nna tsun u. Manang wa gaw tinang kaw n re ai sha, Yehowa kaw jahpan dan ra na hpe dum u. (Rom 14:10) Chyum Laika hpaji jaw ga hpe kamhpa u. Yesu a matsan dum myit hpe kasi la u. (Gsh 3:5; Mat 12:20) Hpa majaw kun? Kaga ni hpe kanawn mazum ai lam hte maren, anhte hpe Yehowa kanawn mazum na majaw re.​—Yak 2:13.

14. Karai a uhpung gaw hpa ni hpe lajang da ya ai kun?

¹⁴ Asak lam hta matut nga lu hkra, Yehowa gaw uhpung a ginding aga daw hku nna lam matsun ya nga ai. Uhpung lajang ya ai Chyum Laika hte seng ai video ni, laili laika ni, zuphpawng ni gaw Chyum Laika lam matsun ni hpe hkan sa lu hkra karum ya ai. Uphkang hpung gaw, hkaw tsun bungli hpe kaja htum gara hku lajang na ngu ai hpe dawdan shagu chyoi pra ai wenyi hpe kamhpa ai. Dai pyi, dawdan ai lam ni hpe ayan sawn maram ai. Hpa majaw kun? Ndai mungkan gaw ayan galai shai nga ai majaw, masa lam nnan ni hte maren htap htuk ai hku galai shai ra ai.​—1 Ko 7:31.

15. Hkaw tsun masha nkau gaw gara mayak mahkak hkrum chye ai kun?

¹⁵ Chyum Laika sanglang dan ai lam nnan ni (sh) akyang lailen hte seng ai Chyum Laika lam matsun ni hpe anhte sharawng awng let hkap la ai. Raitim, uhpung a galai shai ai lam ni gaw tinang hpe hkra machyi wa yang, gara hku bai htang ai kun? Ga shadawn, kade n na shi ai shaning ni hta, Nawku Htingnu ni hpe gawgap ai, gram lajang ai hta jai jarik ni grai law wa ai. Dai majaw, Nawku Htingnu ni hpe jawm lang na matu Uphkang Hpung matsun ai. Dai zawn galai shai ai lam ni a majaw, nawku hpung nkau hpe pawng kau ra ai. Nkau mi hpe gaw dut kau ra ai. Lu wa ai gumhpraw ni hpe Nawku Htingnu grai ra ai shara ni hta gawgap na matu jai ai. Na a buga hta Nawku Htingnu ni hpe dut kau ai, nawku hpung ni hpe pawng dat ai nga yang, masa lam nnan hte maren galai shai na matu yak chye ai. Hkaw tsun masha nkau mi a matu, zuphpawng lung ai shara grau tsan mat chye ai. Nawku Htingnu gawgap ai, gram lajang ai hta shang lawm wa ai ni mung hpa majaw dut kau ai kun? ngu myit nna, shanhte a aten, n-gun atsam ni majoi byin mat ai ngu hkamsha chye ai. Raitim,  lamang nnan hte maren hkan sa ai majaw shakawn hpa re.

16. Kolose 3:23, 24 hta lawm ai hpaji jaw ga hpe hkan sa ai gaw gara hku nna kabu gara lam lu la ai kun?

¹⁶ Uhpung hpe Yehowa lam matsun ya nga ai, shi a matu anhte galaw nga ai hpe dum yang ngwi pyaw lu na re. (Kolose 3:23, 24 hpe hti u.) Nawku Htingnu gawgap na matu alu jaw ai hta, Hkawhkam Dawi kasi kaja madun wa ai. ‘Tsaw ra ai myit hte ndai daram jaw ya lu hkra, ngai mung, nye a amyu masha ni mung, hpa wa mi rai nga a ta? Yawng mayawng nang kaw na rai nga nna, nang kaw na arung arai hkrai, anhte nang hpe jaw ga ai’ ngu nna shi tsun wa ai. (1 Hl 29:14) Anhte alu jaw ai shaloi mung, Yehowa jaw da ai kaw nna sha bai jaw ai re. Dai pyi, shi a magam bungli galaw na matu aten, n-gun atsam hte arung arai ni hpe jaw ai shaloi, Yehowa manu shadan ai.​—2 Ko 9:7.

17. Galai shai ra ai hpe mu yang hpa majaw myit n daw ging ai kun?

¹⁷ Gyip ai lam ntsa matut hkawm sa lu hkra, Yesu a hpang htep lahti hkan sa ra ai. (1 Pe 2:21) Tinang hta galai shai ra ai lam ni nga ai hpe sadi hkrup yang, myit hkum daw. Dai gaw kaja ai lam re. Galai shai ra ai ngu ai hpe chye ai gaw, Yehowa a lam matsun hte maren hkan sa mayu ai ngu ai lachyum re. Anhte n hkum tsup ai hpe chye ai majaw, Yesu a kasi ningli hpe hpring tup hkan sa na matu Yehowa n myit mada ai.

18. Bandung de du na matu hpa galaw ra ai kun?

¹⁸ Htawm hpang hpe sha myit maju jung u. Myit mang ai lam, myit jasat hte galaw ai lam ni hpe galai shai mayu ai myit nga u. (Gsh 4:25; Luk 9:62) Shagrit shanem u. “Tut nawng kabu gara nga mu, ra ang ai hku galai shai nga mu.” (2 Ko 13:11, NW) Rai yang, “tsaw ra myit rawng ai hte ngwi pyaw shangun ai Karai Kasang gaw [anhte] hte rau a nga nga na ra ai.” Bandung de du ai sha n-ga, hkrun lam hkawm nga ai shaloi hta mung kabu gara lam lu na re.