1. Kũringana na Mathayo 7:13, 14, nĩ na njĩra ĩrĩkũ tũkoragwo rũgendo-inĩ?

ITHUOTHE tũrĩ rũgendo-inĩ. Muoroto witũ nĩ gũgaatũũra thĩinĩ wa thĩ njerũ rungu rwa ũtongoria wa Jehova wa wendo. Hĩndĩ ciothe nĩ twĩrutanagĩria kũgerera njĩra-inĩ ya muoyo. Ĩndĩ o ta ũrĩa Jesu ooigire njĩra ĩyo nĩ ngunderu na rĩmwe ndũkoragwo ũrĩ ũndũ mũhũthũ kũmĩgerera. (Thoma Mathayo 7:13, 14.) Tondũ tũrĩ andũ matarĩ akinyanĩru, nĩ ũndũ mũhũthũ rĩmwe gwĩkora nĩ tuumire njĩra-inĩ ĩyo.​—Gal. 6:1.

2. Tũkwarĩrĩria maũndũ marĩkũ gĩcunjĩ-inĩ gĩkĩ? (Ningĩ rora gathandũkũ, “ Wĩnyihia nĩ Ũtũteithagia Gwĩka Mogarũrũku.”)

² Angĩkorũo nĩ tũrenda gũtũũra njĩra-inĩ ya muoyo, no mũhaka tũkorũo twĩhaarĩirie kũgarũrĩra mwĩcirĩrie, mwerekera, na ciĩko citũ. Mũtũmwo Paulo eekĩrire ngoro Akristiano arĩa maaikaraga Korintho metĩkĩre gũthiĩ na mbere “kũrũngagwo.” (2 Kor. 13:11) Ũtaaro ũcio nĩ ũtũhutĩtie o na ithuĩ. Thĩinĩ wa gĩcunjĩ gĩkĩ, tũkwarĩrĩria ũrĩa Bibilia ĩngĩtũteithia kũgarũrĩra mĩthiĩre itũ, na ũrĩa arata agimaru kĩĩroho mangĩtũteithia gũikara njĩra-inĩ ya muoyo. Ningĩ nĩ tũkuona nĩ mahinda-inĩ ta marĩkũ ũngĩkorũo ũrĩ ũndũ mũritũ gwathĩkĩra ũtongoria ũrĩa tũraheo nĩ ithondeka rĩa Jehova. Na nĩ tũkuona ũrĩa wĩnyihia ũngĩtũteithia gwĩka mogarũrũku tũtekũũrũo nĩ gĩkeno tũgĩtungatĩra Jehova.

3. Kiugo kĩa Ngai kĩngĩgũteithia atĩa?

³ Ti ũndũ mũhũthũ gũthuthuria meciria na mĩerekera itũ. Nĩkĩ? Tondũ ngoro itũ nĩ ĩheenanagia, na kwoguo no ũkorũo ũrĩ ũndũ mũritũ kũmenya kũrĩa ĩgũtwerekeria. (Jer. 17:9) Ningĩ nĩ ũndũ mũhũthũ kwĩheenia na “mwĩcirĩrie wa maheeni.” (Jak. 1:22) Kwoguo twagĩrĩirũo gwĩthuthuria tũkĩhũthĩra Kiugo kĩa Ngai. Kiugo kĩa Ngai nĩ gĩtũteithagia kũmenya ũrĩa  tũhaana na thĩinĩ, ũrĩa “meciria na methugunda” ma ngoro itũ mahaana. (Ahib. 4:12, 13) Kwoguo Kiugo kĩa Ngai no kĩringithanio na macini ĩrĩa ĩhũũraga mũndũ mbica nĩguo amenyeke ũrĩa mwĩrĩ wake ũtariĩ na thĩinĩ. No nĩguo tũgunĩke kuumana na ũtaaro ũrĩa tũngĩamũkĩra kuuma Bibilia-inĩ kana kuuma kũrĩ andũ arĩa mamũrĩtwo nĩ Jehova no mũhaka tũkorũo tũrĩ enyihia.

4. Tũmenyaga atĩa atĩ Mũthamaki Saulu nĩ aatuĩkire mũndũ mwĩtĩi?

⁴ Ngerekano ya Mũthamaki Saulu no ĩtũteithie kũmenya ũrĩa kũngĩthiĩ tũngĩkorũo tũtarĩ enyihia. Saulu aakũririe mwĩtĩo nginya akĩambĩrĩria kwĩheenia atĩ ndaabataraga kũgarũrĩra mwĩcirĩrie na ciĩko ciake. (Thab. 36:1, 2; Hab. 2:4) Ũndũ ũcio nĩ woonekire wega rĩrĩa Jehova aaheire Saulu watho wa ĩmwe kwa ĩmwe wĩgiĩ ũrĩa aagĩrĩirũo gwĩka thutha wa kũhoota Aamaleki. No Saulu ndaathĩkĩire Jehova. Na rĩrĩa mũnabii Samueli aamũririe kĩrĩa gĩatũmĩte eke ũguo, Saulu ndetĩkĩrire mahĩtia make. Handũ ha ũguo, aambĩrĩirie gwĩtetera na njĩra ya kũhũthia moimĩrĩro moru ma ũremi wake, na gũcokereria andũ angĩ mahĩtia. (1 Sam. 15:13-24) Saulu nĩ oonanĩtie mwerekera o ta ũcio mbere ĩyo. (1 Sam. 13:10-14) Ũndũ wa kĩeha nĩ atĩ nĩ eetĩkĩrĩtie mwĩtĩo ũingĩre ngoro-inĩ yake. Tondũ ndeetĩkĩrire kũrũnga mwĩcirĩrie wake, Jehova nĩ aamũrũithirie na akĩmũrega.

5. Tũngĩĩruta atĩa kuumana na Saulu?

⁵ Nĩguo tũtikahaane ta Saulu, nĩ twagĩrĩirũo kwĩyũragia ciũria ici: ‘Hĩndĩ ĩrĩa ndathoma ũtaaro kuuma Kiugo-inĩ kĩa Ngai-rĩ, hihi nĩ ngeragia gwetha ciĩgwatio cia kwaga kũwathĩkĩra? Hihi nĩ ngeragia kũhũthia maũndũ moru marĩa ndĩreka? Hihi nĩ ngeragia gũcokereria mũndũ ũngĩ mahĩtia ma ũndũ njĩkĩte?’ Angĩkorũo harĩ kĩũria o gĩothe twacokia ĩĩ, nĩ twagĩrĩirũo gũcenjia mwĩcirĩrie na mwerekera witũ. Tũngĩaga gwĩka ũguo, tũgũkũria mwĩtĩo ngoro-inĩ itũ, na ũndũ ũcio no ũtũme Jehova arege tũtuĩke arata ake.​—Jak. 4:6.

6. Taarĩria ngũrani gatagatĩ ka Mũthamaki Saulu na Mũthamaki Daudi.

⁶ Rora wone ngũrani ĩrĩa yarĩ ho gatagatĩ ka Mũthamaki Saulu na Mũthamaki Daudi ũrĩa wacokire ithenya rĩake. Bibilia yugaga Daudi nĩ eendete “watho wa Jehova.” (Thab. 1:1-3) Daudi nĩ aamenyaga atĩ Jehova nĩ ahonokagia andũ arĩa menyihagia na ndakenagio nĩ arĩa marĩ mwĩtĩo. (2 Sam. 22:28) Kwoguo Daudi nĩ eetĩkagĩria watho wa Ngai ũgarũre mwĩcirĩrie wake. Aandĩkire ũũ: “Nĩ ngũgooca Jehova, o we ũũheete ũtaaro. O na ũtukũ, methugunda makwa ma thĩinĩ biũ nĩ manũngaga.”​—Thab. 16:7.

7. Wĩnyihia ũrĩtũteithagia gwĩka atĩa?

⁷ Tũngĩkorũo tũrĩ enyihia, nĩ tũrĩtĩkagĩria Kiugo kĩa Ngai gĩgatũteithia kũrũnga mwĩcirĩrie mũũru tũngĩkorũo naguo, nĩguo tũtigeke ũndũ ũtagĩrĩire. Kiugo kĩa Ngai kĩrĩkoragwo gĩtariĩ ta mũgambo ũratwĩra: ‘Ĩno nĩyo njĩra. Gera thĩinĩ wayo.’ Nĩ kĩrĩtũkaanagia hĩndĩ ĩrĩa twambĩrĩria gwĩka ũndũ ũtarĩ mwega. (Isa. 30:21) Nĩ tũrĩgunĩkaga na njĩra nyingĩ twathikĩrĩria Jehova. (Isa. 48:17) Kwa ngerekano, tũtirĩbataraga kũrũngwo nĩ mũndũ ũngĩ, na kwoguo tũgethema gĩconoko kĩrĩa kiumanaga na ũndũ ũcio. Ningĩ nĩ tũrĩkuhagĩrĩria Jehova makĩria, tondũ nĩ tũrĩmenyaga atĩ aratũrũmbũiya o ta ũrĩa ithe angĩrũmbũiya mwana wake.​—Ahib. 12:7.

8. O ta ũrĩa Jakubu 1:22-25 yonanĩtie-rĩ, tũngĩhũthĩra Kiugo kĩa Ngai atĩa ta gĩcicio?

⁸ No tũhũthĩre Kiugo kĩa Ngai gĩtariĩ ta gĩcicio. (Thoma Jakubu 1:22-25.) Aingĩ aitũ nĩ twĩroraga gĩcicio-inĩ rũcinĩ tũtanoima mũciĩ. Ũndũ ũcio nĩ ũtũteithagia kuona kana nĩ harĩ ũndũ tũrabatara kũgarũrĩra, andũ arĩa angĩ matanatuona. Ũndũ ũmwe na ũcio, tũngĩthomaga  Bibilia o mũthenya nĩ ĩrĩtũteithagia kũrũnga mwĩcirĩrie na mwerekera witũ. Andũ aingĩ nĩ monaga arĩ ũndũ mwega gũthoma rĩandĩko rĩa o mũthenya o rũcinĩ matanoima mũciĩ. Nĩ marekaga ũhoro ũrĩa mathoma ũhutie mwĩcirĩrie wao. Ningĩ magĩthiĩ na mbere na mĩhang’o yao, nĩ mageragia kũhũthĩra maũndũ marĩa merutĩte Kiugo-inĩ kĩa Ngai. Makĩria ma ũguo, nĩ twagĩrĩirũo gũkorũo na mũtaratara mwega wa gũthoma na gwĩcũrania Kiugo kĩa Ngai o mũthenya. O na gũtuĩka mũndũ no one gwĩka ũguo ta arĩ ũndũ mũnini, nĩ ũndũ ũmwe wa bata mũno ũngĩtũteithia gũthiĩ na mbere njĩra-inĩ ĩno ngunderu ya muoyo.

9. Nĩ hĩndĩ ta ĩrĩkũ mũrata angĩbatara gũkũrũnga?

⁹ Hihi nĩ ũrĩ wambĩrĩria gwĩka ũndũ ũngĩathũkirie ũrata waku na Jehova? (Thab. 73:2, 3) Angĩkorũo nĩ harĩ mũrata mũgimaru kĩĩroho wagĩire na ũmĩrĩru wa gũkũrũnga-rĩ, hihi nĩ wamũthikĩrĩirie na ũkĩhũthĩra ũtaaro wake? Angĩkorũo nĩ wathĩkĩire ũtaaro ũcio nĩ wekire wega, na hatarĩ nganja nĩ ũcokagĩria mũrata ũcio waku ngatho tondũ nĩ agũtaarire.​—Thim. 1:5.

10. Wagĩrĩirũo gwĩka atĩa mũrata waku angĩkũrũnga?

¹⁰ Kiugo kĩa Ngai gĩtũririkanagia ũũ: “Nguraro cia gwĩkĩrũo nĩ mũrata nĩ cia wĩhokeku.” (Thim. 27:6) Hihi ũguo nĩ kuuga atĩa? Ta wĩcirie ngerekano ĩno: Ũrenda gũkĩra barabara ĩrĩ na ngaari nyingĩ na ũkambĩrĩria kũrora ũndũ thimũ-inĩ yaku. Ũkambĩrĩria gũkĩra o na ũtekũrora mwena na mwena. O hĩndĩ ĩyo, mũrata waku agakũnyita guoko agakũguucia na thutha. Agakũguucia na hinya nginya guoko gwaku gũgathenyũka, no ũndũ ũcio eka ũgakũhonokia ndũkaringwo nĩ ngaari. O na guoko kũu gwaku kũngĩikara kũrĩ na ruo thikũ cigana ũna-rĩ, hihi no ũrakarĩre mũrata waku atĩ tondũ nĩ aakũguucirie? Hatarĩ nganja ndũngĩka ũguo! No ũmũcokerie ngatho mũno nĩ ũndũ wa gũkũhonokia. Na njĩra o ta ĩyo, mũrata waku angĩkwĩra atĩ ciugo kana ciĩko ciaku itiratwarana na ithimi cia Ngai cia ũthingu, kĩambĩrĩria-inĩ no ũigue ũũru no ndwagĩrĩirũo kũrakara nĩ ũndũ wa gũkũhe ũtaaro. Ũcio ti ũndũ wa ũũgĩ. (Koh. 7:9) Handũ ha ũguo, wagĩrĩirũo gũkena tondũ mũrata waku arĩ na ũmĩrĩru wa gũkwĩra.

11. Nĩ ũndũ ũrĩkũ ũngĩtũma mũndũ arege gwĩtĩkĩra ũtaaro araheo nĩ mũrata wake?

¹¹ Nĩ ũndũ ũrĩkũ ũngĩtũma mũndũ arege gwĩtĩkĩra ũtaaro araheo nĩ mũrata wake? Nĩ mwĩtĩo. Andũ arĩa etĩi mendaga o kũigua maũndũ ma ‘gũkenia matũ mao.’ Matiendaga “gũthikĩrĩria ũhoro ũrĩa wa ma.” (2 Tim. 4:3, 4) Mationaga ta marabatara gũtaarũo tondũ monaga nĩ ogĩ na nĩ a bata gũkĩra andũ arĩa angĩ. No mũtũmwo Paulo aandĩkire ũũ: “Mũndũ angĩciria atĩ we nĩ kĩndũ na hĩndĩ ĩyo we ti kĩndũ, nĩ kwĩheenia areheenia.” (Gal. 6:3) Ũndũ ũcio ningĩ nĩ ũtaarĩirio wega nĩ Mũthamaki Suleimani. Aandĩkire ũũ: “Nĩ kaba mwana mũthĩni no nĩ mũũgĩ gũkĩra mũthamaki mũkũrũ no nĩ mũkĩgu, o ũcio ũtigĩte kuona bata wa gwathĩkĩra mũkaana.”​—Koh. 4:13.

12. Tũreruta atĩa na kĩonereria kĩa mũtũmwo Petero o ta ũrĩa Agalatia 2:11-14 yonanĩtie?

¹² Ta wĩcirie kĩonereria kĩrĩa mũtũmwo Petero aatũigĩire rĩrĩa aarũngirũo mbere ya andũ nĩ mũtũmwo Paulo. (Thoma Agalatia 2:11-14.) Petero nĩ angĩarakarire nĩ njĩra ĩrĩa Paulo aamũrũngire nayo na harĩa aamũrũngĩire. No Petero aarĩ na ũũgĩ. Nĩ eetĩkĩrire ũtaaro na ndaarakarĩire Paulo kana akĩmũigĩra muku. O na thutha ũcio, eetire Paulo “mũrũ wa Ithe witũ twendete.”​—2 Pet. 3:15.

13. Nĩ maũndũ marĩkũ twagĩrĩirũo kũririkana rĩrĩa tũraheana ũtaaro?

¹³ Ũngĩona atĩ nĩ ũrabatara kũhe mũrata waku ũtaaro-rĩ, nĩ maũndũ marĩkũ wagĩrĩirũo  kũririkana? Mbere ya ũthiĩte kũrĩ mũrata waku wĩyũrie ũũ: ‘Hihi nĩ ndĩretua “mũthingu makĩria”?’ (Koh. 7:16) Mũndũ mũthingu makĩria, atuagĩra andũ arĩa angĩ na ithimi ciake mwene handũ ha ithimi cia Jehova na ndaiguagĩra andũ arĩa angĩ tha. Angĩkorũo o na thutha wa gwĩthuthuria no ũrona bata wa kwaria na mũrata waku, geria kũmenya wega harĩa thĩna ũrĩ na ũmũrie ciũria cia mawoni nĩguo ũmũteithie one mahĩtia make. Tigĩrĩra atĩ ũtaaro ũrĩa ũkũmũhe wĩhocetie harĩ Maandĩko, ũkĩririkanaga atĩ wee tiwe wagĩrĩirũo kũmũtuĩra no nĩ Jehova. (Rom. 14:10) Wĩhokage ũũgĩ ũrĩa ũkoragwo Kiugo-inĩ kĩa Ngai, na rĩrĩa ũrarũnga mũndũ wĩgerekanagie na Jesu harĩ kuonania ũcayanĩri. (Thim. 3:5; Mat. 12:20) Nĩkĩ? Tondũ Jehova akaahiũrania na ithuĩ o ta ũrĩa tũhiũranagia na andũ arĩa angĩ.​—Jak. 2:13.

14. Nĩ indo ta irĩkũ ithondeka rĩa Jehova rĩtũhaaragĩrĩria?

¹⁴ Jehova atũtongoragia njĩra-inĩ ya muoyo, kũgerera gĩcunjĩ gĩa gũkũ thĩ gĩa ithondeka rĩake, rĩrĩa rĩtũhaaragĩrĩria video, mabuku, na mĩcemanio, indo iria itũteithagia kũhũthĩra ũtaaro ũrĩa ũrĩ Kiugo-inĩ gĩake. Maũndũ marĩa tũrutagwo makoragwo marĩ ma kwĩhokeka tondũ moimanĩte na Maandĩko. Kĩama Kĩrĩa Gĩtongoragia kĩrũmagĩrĩra ũtongoria wa roho mũtheru hĩndĩ ĩrĩa kĩratua matua megiĩ njĩra iria njega biũ cia kũhunjia. No kĩama kĩu nĩ gĩikaraga gĩkĩroraga matua macio nĩguo kĩone kana nĩ harĩ ũgarũrũku ũrabatara gwĩkwo. Nĩkĩ? Tondũ thĩ “ĩrathiĩ ĩkĩgarũrũkaga,” na kwoguo ithondeka rĩa Jehova no mũhaka rĩke mogarũrũku nĩguo rĩtigatigwo thutha.​—1 Kor. 7:31.

15. Nĩ ũndũ ũrĩkũ mũritũ ahunjia amwe maracemania naguo?

¹⁵ Hĩndĩ ĩrĩa ithondeka rĩa Jehova rĩatũtaarĩria ũrutani mũna wa Bibilia kana ũhoro wĩgiĩ ithimi cia mĩtugo iria twagĩrĩrũo kũrũmĩrĩra, nĩ twathĩkaga na tũkarũmĩrĩra ũhoro ũcio. No twĩkaga atĩa rĩrĩa ithondeka rĩa Ngai rĩeka ũgarũrũku ũrahutia maũndũ mangĩ ma ũtũũro witũ? Kwa ngerekano, mĩaka-inĩ ya ica ikuhĩ, ngarama ya gwaka na kũmenyerera nyũmba citũ cia ũthathaiya nĩ yongererekete na gĩkĩro kĩnene. Nĩ ũndũ ũcio, Kĩama Kĩrĩa Gĩtongoragia nĩ kĩĩrĩga gũtua atĩ Nyũmba ĩmwe ya Ũthamaki yagĩrĩirũo kũhũthĩrũo nĩ ciũngano nyingĩ o ta ũrĩa kũngĩhoteka. Kwoguo ciũngano imwe nĩ iraturanĩrũo na Nyũmba imwe cia Ũthamaki  ikendio. Mĩhothi ĩrĩa yoneka, ĩrahũthĩka gwaka Nyũmba cia Ũthamaki kũndũ kũrĩa irabatarania biũ. Angĩkorũo kĩũngano kĩanyu nĩ kĩhutĩtio nĩ mogarũrũku macio, no ũkorũo ũtarĩ ũndũ mũhũthũ kũhiũrania na mogarũrũku macio. Ahunjia amwe rĩu marabatara gũthiĩ thabarĩ ndaihu nĩguo makinye mĩcemanio-inĩ. Nao arĩa manaruta wĩra mũnene wa gwaka na kũmenyerera Nyũmba ya Ũthamaki no marigwo kĩrĩa kĩratũma nyũmba ĩyo yendio. No mone ta mahinda na hinya ũrĩa manahũthĩra ciorĩra thĩ. O na kũrĩ ũguo, nĩ manyitaga mbaru mogarũrũku macio, na nĩ magĩrĩirũo gũcokerio ngatho.

16. Kũhũthĩra ũtaaro ũrĩa ũrĩ thĩinĩ wa Akolosai 3:23, 24, kũngĩtũteithia atĩa gũtũũria gĩkeno?

¹⁶ Nĩ tũrĩkoragwo na gĩkeno, twaririkana atĩ tũratungatĩra Jehova na nĩwe ũratongoria ithondeka rĩake. (Thoma Akolosai 3:23, 24.) Mũthamaki Daudi nĩ aaigire kĩonereria kĩega rĩrĩa aarutaga mũhothi wa gwaka hekarũ. Ooigire ũũ: “Niĩ ndĩ ũ na andũ akwa nĩa atĩ nĩguo tũhote kũruta magongona maya ma kwĩyendera? Nĩ gũkorũo indo ciothe ciumaga kũrĩ wee, na twakũhe indo ciumĩte guoko-inĩ gwaku.” (1 Maũ. 29:14) Rĩrĩa tũraruta mĩhothi, o na ithuĩ tũkoragwo tũkĩhe Jehova kĩrĩa kiumĩte guoko-inĩ gwake. Na Jehova nĩ akenaga mũno hĩndĩ ĩrĩa twahũthĩra mahinda, hinya, na indo citũ gũteithĩrĩria wĩra wake.​—2 Kor. 9:7.

17. Nĩkĩ ndwagĩrĩirũo gũkua ngoro angĩkorũo harĩ handũ ũrabatara gwĩka ũgarũrũku?

¹⁷ Nĩgetha tũtũũre njĩra-inĩ ngunderu ya muoyo, ithuothe no mũhaka twĩrutanĩrie biũ kũrũmĩrĩra makinya ma Jesu. (1 Pet. 2:21) Angĩkorũo nĩ ũrona atĩ nĩ harĩ mogarũrũku ũbataire gwĩka, ndũgakue ngoro. Ũndũ ũcio nĩ ũronania wega atĩ nĩ ũrenda mũno gwathĩkĩra ũtongoria wa Jehova. Ririkana atĩ, ihinda-inĩ rĩrĩ tondũ tũtirĩ akinyanĩru, Jehova ndarerĩgĩrĩra tũrũmĩrĩre kĩonereria kĩa Jesu na njĩra nginyanĩru biũ.

18. Nĩ atĩa tũbataire gwĩka nĩguo tũkenere ũtũũro rĩu na mahinda marĩa maroka?

¹⁸ Rekei ithuothe tũige meciria maitũ harĩ mahinda marĩa maroka na tũkoragwo twĩhaarĩirie kũgarũrĩra mwĩcirĩrie, mwerekera, na ciĩko citũ. (Thim. 4:25; Luk. 9:62) Rekei tũthiĩ na mbere ‘gũkenaga na kũrũngwo’ tũrĩ na wĩnyihia. (2 Kor. 13:11) Tweka ũguo, “Ngai mwene wendo na thayũ nĩ arĩkoragwo hamwe na [ithuĩ].” Ningĩ nĩ tũgũkenera ũtũũro mahinda maya na nginya thĩinĩ wa thĩ njerũ.