1. Metwokumwe naMateus 7:13, 14, omeityo lilipi tu li mondjila?

ATUSHENI otu li molweendo. Efikilo ile elalakano letu, otwa hala oku ka kala mounyuni mupe, oo u li koshi yewiliko laJehova lopahole. Efiku keshe otwa pumbwa okukendabala okukala mondjila oyo tai twala komwenyo waalushe. Ngaashi Jesus a popya, ondjila oyo oya fimana, nomafimbo amwe otashi dulika shi kale shidjuu oku i shikula. (Lesha Mateus 7:13, 14.) Ndele molwaashi inatu wanenena, oshi na oupu tu kanduke mo mondjila oyo. — Gal. 6:1.

2. Oshike hatu ka kundafana moshitukulwa eshi? (Tala oshimhungu “ Elininipiko otali ke tu kwafela tu lundulule eenghatu detu.”)

² Ngeenge otwa hala okukala mondjila ya finana, oyo tai twala komwenyo waalushe, otwa pumbwa okukala twa halelela okulundulula okudiladila kwetu, oikala neenghatu detu. Omuyapostoli Paulus okwa li a ladipika Ovakriste vomuKorinto va twikile okuninga “omalunduluko.” (2 Kor. 13:11) Omayele oo otaa longo yo nokufye. Moshitukulwa eshi ohatu ka kundafana nghee Ombiibeli tai dulu oku tu kwafela tu lundulule eenghatu detu, nanghee ookaume va pyokoka tava dulu oku tu kwafela tu ende mondjila oyo tai twala komwenyo waalushe. Ohatu ka kundafana yo nghee tashi dulu okukala eshongo okushikula ewiliko olo hatu pewa kehangano laJehova. Ohatu ka tala yo nghee elininipiko tali tu kwafele tu ninge omalunduluko notuha kanife ehafo letu eshi hatu longele Jehova.

3. Eendjovo daKalunga otadi dulu oku tu kwafela ngahelipi?

³ Ohashi kala eshongo ngeenge hatu kendabala okukonakona omadiladilo nomaliudo etu. Omutima wetu ou na omakoto, nomafimbo amwe otashi dulu okukala shidjuu okushiiva kutya otau tu shingile peni. (Jer. 17:9) Oshipu okulipukifa “nomatomhafano ongaho.” (Jak. 1:22) Onghee hano, natu longifeni Eendjovo daKalunga tu likonakone fye vene. Eendjovo daKalunga otadi ke  tu kwafela tu mone kutya fye ovanhu va tya ngahelipi meni, ‘momadiladilo nomahalo’ omutima wetu. (Heb. 4:12, 13) Oku shi popya noitya imwe, Eendjovo daKalunga oda fa eshina loX-ray, olo hali tu minikile meni. Onghee hano, otwa pumbwa okukala ovalininipiki ngeenge otwa hala okumona ouwa momayele oo taa hangwa mOmbiibeli ile a dja kovakalelipo vaKalunga.

4. Oshike tashi ulike kutya ohamba Saul oya li i na ounhwa?

⁴ Oshihopaenenwa shohamba Saul otashi ulike osho tashi dulu oku tu ningilwa ngeenge katu na elininipiko. Molwaashi Saul okwa li e na ounhwa, ka li a hala okudimina kutya okwa pumbwa okulundulula okudiladila neenghatu daye. (Eps. 36:1, 2; Hab. 2:4) Osho oshi liwetikile mo nawa eshi Saul a li a pewa omalombwelo okondadalunde kuJehova konima eshi a finda Ovaamaleki. Onghee Saul ka li a dulika kuJehova. Saul ka li a dimina epuko laye nokuli naashi omuprofeti Samuel a li e uya oku mu lombwela kombinga yoshinima osho. Ponhele yaasho, okwa li ta tomhafana kutya epuko laye inali kwata moiti nokwa li ta vele vamwe ombedi. (1 Sam. 15:13-24) Nolwanima, Saul okwa ka ulika oikala ya faafana. (1 Sam. 13:10-14) Shinyikifa oluhodi, okwa li a efa omutima waye u kwatwe kounhwa. Saul ka li a lundulula okudiladila kwaye, na Jehova ka li vali e mu hokwa nokwe mu ekelashi.

5. Oshike hatu lihongo koshihopaenenwa shaSaul?

⁵ Opo tu mone ouwa moshihopaenenwa shaSaul, otwa pumbwa okulipula omapulo taa shikula: ‘Ngeenge handi lesha omayele mEendjovo daKalunga, mbela ohandi kendabala okuyukifa omadiladilo ange? Mbela ohandi kendabala okudiladila kutya osho handi ningi inashi kwata naanaa moiti? Mbela ohandi kendabala okupa vamwe ombedi omolweenghatu dange? Ngeenge enyamukulo letu limwe komapulo oo oheeno, otashi ulike kutya otwa pumbwa okulundulula okudiladila noikala yetu. Ngeenge hasho, omutima wetu otau ka kala u na ounhwa noitatu ka kala vali ookaume kaJehova. — Jak. 4:6.

6. Yelifa eyooloko olo li li pokati kohamba Saul nohamba David?

⁶ Didilika eyooloko olo li li pokati kohamba Saul nosho yo oo e mu pingena po, ohamba David, omulumenhu oo a li e hole “omhango yOmwene.” (Eps. 1:1-3) David okwa li e shii kutya Jehova oku hole ovalininipiki, ashike oku tonde ovalinenepeki. (2 Sam. 22:28) Onghee hano, David okwa li a efa omhango yaKalunga i lundulule okudiladila kwaye. Okwa shanga a ti: “Ohandi pandula, Omwene, eshi wa pukulula nge; moufiku omutima wange tau shi dimbulukifa nge.” — Eps. 16:7.

7. Oshike hatu ka ninga ngeenge otu li ovalininipiki?

⁷ Ngeenge otu li ovalininipiki, ohatu ka efa Eendjovo daKalunga di yukife omadiladilo etu a puka, ofimbo inatu katuka metwokumwe nao. Eendjovo daKalunga otadi ka kala onga ondaka oyo tai tu lombwele tai ti: “Apa ondjila, ei mu nokweenda nayo!” Otadi ke tu londwela ngeenge hatu kendabala okulonga osho inashi yuka. (Jes. 30:21) Ngeenge otwa kala hatu pwilikine kuJehova, ohatu ka mona ouwa meenghedi dihapu. (Jes. 48:17) Pashihopaenenwa, itatu ka handuka ngeenge umwe e tu pukulula. Ohatu ka ehena yo popepi elela naJehova, molwaashi otu shii kutya oha ungaunga nafye ngaashi ovana ovaholike. — Heb. 12:7.

8. Metwokumwe naasho sha popiwa muJakob 1:22-25, ongahelipi hatu dulu okulongifa Eendjovo daKalunga ngaashi esipili?

⁸ Eendjovo daKalunga otadi dulu okukala ngaashi esipili kufye. (Lesha Jakob 1:22-25.) Vahapu vomufye ohatu litalele mesipili ongula keshe ofimbo inatu dja mo meumbo. Osho ohashi tu kwafele tu mone kutya openi twa pumbwa okuliwapeka ofimbo vamwe inave tu mona. Sha faafana, ngeenge ohatu lesha Ombiibeli efiku keshe, ohatu ka mona kutya omeenghedi dilipi hatu dulu okulundulula okudiladila kwetu nosho yo oikala yetu. Vahapu ohava mono oshiwa okulesha omushangwa wefiku ongula keshe ofimbo inava dja mo meumbo. Ohava efa  osho va lesha shi wilike okudiladila kwavo. Opo nee momukokomoko wefiku, ohava tale kutya omeenghedi dilipi tava dulu okutula moilonga omayele oo va lesha mEendjovo daKalunga. Shikwao vali, nafye otwa pumbwa okukala hatu konakona nokudilonga kEendjovo daKalunga efiku keshe. Osho otashi monika shanafangwa, ashike oshi li shimwe shomoinima oyo ya fimanenena oyo tu na okuninga, opo i tu kwafele tu kale mondjila ya finana oyo tai twala komwenyo waalushe.

9. Onaini kaume koye ta dulu oku ku pukulula?

⁹ Mbela ope na efimbo wa li wa hovela okuninga oshinima osho tashi dulu okunyona po ekwatafano loye naJehova? (Eps. 73:2, 3) Ngeenge kaume koye a pyokoka okwa li e ku pa omayele, mbela owa li ngoo wa pwilikina nokutula moilonga omayele aye? Ngeenge osho, owa ninga nawa, nopehe na omalimbililo ou na okukala wa li wa pandula eshi kaume koye e ku londwela. — Omayel. 1:5.

10. Oto ke linyenga ngahelipi ngeenge kaume koye okwe ku pukulula?

¹⁰ Eendjovo daKalunga otadi tu dimbulukifa tadi ti: ‘Omadengo ookaume oku shii okulineekelwa.’ (Omayel. 27:6) Osho osha hala okutya ngahelipi? Natu taleni kefaneko tali shikula: Diladila nee ngeno wa teelela okutauluka opate oyo i yadi eetuwa neenghono nowa piyaanekwa kongodi yoye yopeke. Owa taulukila mopate ofimbo ino tala keembinga adishe. Diva kaume koye okwe ku shila mo neenghono mopate. Molwaashi okwe ku diinina, okwe ku domona mokwooko, ashike eshi e ku shila mo mepakumo leisho, okwe ku amena uha pumwe kohauto. Nonande eshi e ku domona mokwooko okwe ku ehameka unene, mbela oto ka kala wa handuka eshi e ku shila mo mopate? Hasho nandenande! Oto ke mu pandula omolwekwafo laye. Sha faafana, ngeenge kaume koye okwe ku londwele kutya okupopya ile eenghatu doye kadi li metwokumwe nomifikamhango douyuki daKalunga, otashi dulika u ka ude nai potete. Ashike ino mu handukila molwaashi e ku pukulula. Osho otashi ka kala sha nyika oulai. (Omuud. 7:9) Ponhele yaasho, kala u na olupandu eshi kaume koye a popya naave kombinga yoshinima osho.

11. Oshike hashi ningifa umwe aha tambule ko omayele mawa kukaume kaye?

¹¹ Oshike hashi ningifa umwe aha tambule ko omayele mawa okudja kukaume omuholike? Ounhwa. Ovanhu ovo ve na ounhwa ove hole “oinima oyo tai nyuwifa omatwi avo.” Ohava “efa po okupwilikina koshili.” (2 Tim. 4:3, 4) Ohava diladila kutya inava pumbwa okupukululwa molwaashi ovanaendunge ve dule vamwe. Ponhele yaasho, omuyapostoli Paulus okwa popya a ti: “Ngeenge ope na ou ta diladila kutya okwa fimana ndele hasho, ote lifufya.” (Gal. 6:3) Ohamba Salomo oye shi yelifa nawa. Oya ti: “Omumati ohepele nomunaendunge e dule ohamba ilai noya kulupa, yo kai shii kupukululwa.” — Omuud. 4:13.

12. Oshike hatu lihongo moshihopaenenwa shomuyapostoli Petrus osho tashi hangwa mOvagalati 2:11-14?

¹² Didilika oshihopaenenwa shomuyapostoli Petrus eshi a li a pukululwa moipafi komuyapostoli Paulus. (Lesha Ovagalati 2:11-14.) Petrus okwa li ta dulu okuhandukila Paulus osho a popya, monghedi omo e shi popila, naapo e shi popila. Ashike Petrus okwa li omunaendunge; okwa li a tambula ko epukululo nokali a kwatela Paulus onghone. Ponhele yaasho, lwanima okwa ka ifana Paulus e li “omumwatate omuholike.” — 2 Pet. 3:15.

13. Ngeenge hatu yandje omayele otwa pumbwa okukaleka oitwa ilipi momadiladilo?

¹³ Ngeenge owa diladila oku ka yandja omayele kukaume koye, oitwa ilipi u na okukaleka momadiladilo? Fimbo ino popya nakaume koye, lipula kutya, ‘Mbela ohandi litale ko “unene omuyuki”?’ (Omuud. 7:16) Omunhu oo e lishii unene ouyuki oha tokola vamwe, ndele ihe va tokola  metwokumwe nomifikamhango daJehova, ndele odaye mwene. Omunhu a tya ngaho otashi dulika ke na onghenda. Konima eshi we likonakona ngeenge owa mono kutya owa pumbwa okupopya nakaume koye, mu lombwela shi na sha noupyakadi waye, noku mu pula omapulo u mu kwafele a mone kutya osho a ninga osha puka. Shilipaleka kutya osho to popi osha kanghamena kOmishangwa, nokudimbuluka kutya kaume koye oku na oshilonga kwoove, ndele nokuJehova. (Rom. 14:10) Ngeenge to yandje omayele kuumwe, longifa ounongo oo tau hangwa mEendjovo daKalunga, opo u hopaenene onghenda yaJesus. (Omayel. 3:5; Mat. 12:20) Omolwashike mbela? Omolwaashi Jehova ota ka ungaunga nafye monghedi omo hatu ungaunga navamwe. — Jak. 2:13.

14. Ehangano laJehova ohali tu longekidile shike?

¹⁴ Jehova ohe tu wilike eshi hatu ende mondjila oyo tai twala komwenyo waalushe okupitila moshitukulwa shokombada yedu shehangano laye, osho hashi tu nyanyangidile ouvidio, oishangomwa noku tu longekidila omakwoongala oo hae tu kwafele tu tule moilonga omayele oo e li mEendjovo daye. Ouyelele oo ou shii okulineekelwa filufilu, molwaashi owa kanghamena kOmishangwa. Olutuwiliki ohali wilikwa komhepo iyapuki ngeenge tali ningi omatokolo oo hae tu kwafele tu pondole moilonga yokuudifa. Natango, Olutuwiliki ohali talulula pandjikilile omatokolo oo la ninga e na sha nokuunganeka oilonga yokuudifa. Omolwashike mbela? Omolwaashi “onghalo younyuni ou otai ende tai lunduluka,” nehangano laJehova ohali ende tali lunduluka she likolelela keenghalo dipe — 1 Kor. 7:31.

15. Ovaudifi vamwe ova taalela eshongo lilipi?

¹⁵ Nopehe na omalimbililo, otwe lilongekida okushikula ewiliko olo la kanghamena kOmbiibeli li na sha nomahongo opakalunga ile nomifikamhango dopaenghedi. Ndele ohatu linyenge ngahelipi ngeenge ehangano laJehova tali ningi omalunduluko oo a kuma vamwe monghalamwenyo yavo? Pashihopaenenwa, omido opo da di ko, eefuto di na sha nomatungo nosho yo di na sha nokukaleka po eenhele detu dokwoongalela oda li da londa neenghono. Onghee hano, Olutuwiliki ola li la yandja ewiliko opo Omalupale Ouhamba a longifwe pauyadi. Omolwelunduluko olo, omaongalo amwe okwa li a tulwa mumwe, nOmalupale Ouhamba amwe okwa landifwa po. Oimaliwa oyo ya dja mo oya li ya kwafela mokutunga omalupale moitukulwa omo a li a pumbiwa  unene. Ngeenge ou li moitukulwa omo omalupale amwe a landifwa po nosho yo omaongalo a tulwa mumwe otashi dulika u mone shidjuu okutambula ko omalunduluko oo mape. Ovaudifi vamwe paife ohava ende oinano opo va ye kokwoongala. Vamwe ovo va li va longa noudiinini moilonga yokutunga Omalupale Ouhamba ile moku a kaleka monghalo iwa otashi dulika ve lipule kutya omolwashike omalupale a landifwa po. Otashi dulika va kale ve udite kutya efimbo neenghono davo oda hepa. Ashike nande ongaho ova tambula ko elunduluko olo lipe notava pandulwa.

16. Ongahelipi okutula moilonga omayele oo taa hangwa mOvakolossi 3:23, 24, tashi tu kwafele tu kale twa hafa?

¹⁶ Ohatu ka kala twa hafa ngeenge otwa dimbuluka kutya ohatu longele Jehova, noye ta wilike ehangano laye. (Lesha Ovakolossi 3:23, 24.) Ohamba David oye tu tulila po oshihopaenenwa shiwa eshi ya li tai yandje oikwafa i na sha nokutunga otembeli. Oya ti: “Osheshi aame omushike, noshiwana shange oshishike, tu dule keenghono detu vene okuyandja eeshali da tya ngaha dehalo liwa? Ndelenee ashishe eshi tashi di kwoove, ndele meke loye twe shi yandja kwoove.” (1 Omaf. 29:14) Nafye ngeenge hatu yandje omayambidido, kungaho ohatu yandje kuJehova osho sha dja meke laye. Ashike nande ongaho, Jehova okwa lenga efimbo letu, eenghono detu nosho yo oiniwe yetu, oyo hatu yandje opo tu yambidide oilonga oyo a hala i longwe. — 2 Kor. 9:7.

17. Omolwashike tuhe na okuteka omukumo ngeenge hatu ningi omalunduluko?

¹⁷ Opo tu kale mondjila ya finana oyo tai twala komwenyo waalushe, atusheni otwa pumbwa okushikula filufilu oshihopaenenwa shaJesus. (1 Pet. 2:21) Ino teka omukumo ngeenge owa pumbwa okuninga omalunduluko meenghedi donhumba. Osho otashi ka ulika filufilu kutya oto shikula ewiliko laJehova. Dimbuluka kutya Jehova ina teelela tu shikule oshihopaenenwa shaJesus monghedi ya wanenena, molwaashi otu li ovanhu inava wanenena.

18. Oshike twa pumbwa okuninga opo tu hange elalakano letu?

¹⁸ Atusheni natu yandjeni elitulemo konakwiiwa nokukala twa halelela okuninga omalunduluko monghedi yetu yokudiladila, moikala nomeenghatu detu. (Omayel. 4:25; Luk. 9:62) Natu kaleni ovalininipiki, ‘okutwikila okukala twa hafa nokuninga omalunduluko.’ (2 Kor. 13:11) Ngeenge otwa ningi ngaho, “Kalunga kohole nokombili ota ka kala pamwe [nafye].” Ote ke tu kwafela tu kale twa hafa, nohatu ka hafela yo omwenyo waalushe mounyuni mupe.