47-زەرتتەۋ ماقالاسى
ٴسىز ٵرى قاراي دا تۇزەلە بەرەسىز بە؟
«سونىمەن، باۋىرلاستار، قۋانا بەرىڭدەر، تۇزەلە بەرىڭدەر» (قور. 2-ح. 13:11).
54-ٵن مىنە، جول!
اڭداتپا *
1. ماتاي 7:13، 14 كە ساي، ٴبىز قاي ماعىنادا جول ٴجۇرىپ كەلە جاتىرمىز؟
بارلىعىمىز جول ٴجۇرىپ كەلە جاتىرمىز. ٴبىزدىڭ دىتتەگەن جەرىمىز، ياعني كوزدەگەن ماقساتىمىز — ەحوبا سۇيىسپەنشىلىكپەن بيلىك ەتەتىن جاڭا دۇنيەگە جەتۋ. ٴبىز ٵر كۇنى سول ومىرگە جەتەلەيتىن جولمەن جۇرۋگە تىرىسامىز. ٴبىراق يسا ايتىپ كەتكەندەي، بۇل جول تار، سوندىقتان ونىمەن ٴجۇرۋ كەيدە قيىن (ماتاي 7:13، 14 وقىڭىز). ٴبىز كەمەلسىز بولعاندىقتان، بۇل جولدان وپ-وڭاي اۋىتقىپ كەتۋىمىز مۇمكىن (عال. 6:1).
2. ٴبىز بۇل ماقالادا نەنى قاراستىرامىز؟ (« كىشىپەيىلدىلىك وزگەرىستەر جاساۋعا كومەكتەسەدى» دەگەن قورشاۋدى دا قاراڭىز.)
2 ومىرگە جەتەلەيتىن تار جولمەن جۇرە بەرۋ ٷشىن، ٴبىز ويىمىزدى، كوزقاراسىمىزدى جانە ارەكەتتەرىمىزدى وزگەرتۋگە ىقىلاستى بولۋىمىز كەرەك. ەلشى پاۋىل قورىنت قالاسىنداعى ماسىحشىلەردى ٵرى قاراي دا «تۇزەلە بەرۋگە» شاقىرعان (قور. 2-ح. 13:11). بۇل كەڭەس بىزگە دە قاتىستى. بۇل ماقالادا بىزگە وزگەرىستەر جاساۋعا كيەلى كىتاپتىڭ قالاي كومەكتەسەتىنىن جانە ٶمىر جولىنان اۋىتقىماۋعا رۋحاني تولىسقان دوستارىمىز قالاي قولعابىس بولا الاتىندارىن قاراستىرامىز. سونداي-اق ەحوبانىڭ ۇيىمىنان كەلىپ جاتقان نۇسقاۋلارعا مويىنسۇنۋ قاي كەزدە قيىن بولۋى مۇمكىن ەكەنىن تالقىلايمىز جانە كىشىپەيىلدىلىك ەحوباعا قىزمەت ەتۋگە دەگەن قۋانىشىمىزدى جوعالتپاستان وزگەرىستەر جاساۋعا قالاي كومەكتەسەتىنىن دە كورەمىز.
قۇداي ٴسوزىنىڭ ٴسىزدى تۇزەتۋىنە جول بەرىڭىز
3. قۇداي ٴسوزى سىزگە قالاي كومەكتەسە الادى؟
3 ٶز ويلارىمىز بەن سەزىمدەرىمىزدى تەكسەرۋ بىزگە وڭاي ەمەس. ويتكەنى ٴبىزدىڭ جۇرەگىمىز الدامشى جانە ونىڭ ٴبىزدى قاي جاققا ەلىكتىرىپ اكەتەتىنىن ٴتۇسىنۋ كەيدە قيىن (ەرم. 17:9). ٴبىزدىڭ ٶز-ٶزىمىزدى «جاڭساق پىكىرمەن» الداپ كەتۋىمىز دە وڭاي (جاق. 1:22). سوندىقتان ٶزىمىزدى تەكسەرۋ ٷشىن، قۇداي ٴسوزىن قولدانۋىمىز قاجەت. قۇداي ٴسوزى ىشتەي قانداي ادام ەكەنىمىزدى جانە جۇرەگىمىزدە تەرەڭ جاتقان «وي-نيەتىمىزدى» ايان ەتەدى (ەۆر. 4:12، 13). قۇداي ٴسوزى ىشتەگى كوزگە كورىنبەيتىن نارسەلەردى كورسەتەتىن رەنتگەن سياقتى. ٴبىراق ٴبىز كىشىپەيىل بولساق قانا، كيەلى كىتاپتاعى سوزدەردىڭ جانە باسشىلىقتى قولعا العان باۋىرلاستاردان ەستىگەن كەڭەستەردىڭ پايداسىن كورە الامىز.
4. ساۋل پاتشانىڭ كوكىرەكتەنىپ كەتكەنى نەدەن كورىندى؟
4 بىزگە كىشىپەيىلدىلىك جەتىسپەسە نە بولاتىنىن ساۋل پاتشانىڭ وقيعاسىنان كورەمىز. ساۋلدىڭ كوكىرەك بولىپ كەتكەنى سونشا — ول ٶزىنىڭ وزگەرۋى كەرەكتىگىن ٴتىپتى ىشتەي دە مويىندامادى (ٴزاب. 36:1، 2؛ ابق. 2:4). بۇل ەحوبا وعان كەلەسىدەي نۇسقاۋ بەرگەندە ايقىن كورىندى. ەحوبا ساۋلعا امالەكتىكتەردى جەڭگەننەن كەيىن نە ىستەۋ كەرەكتىگىنە قاتىستى ناقتى نۇسقاۋ بەردى. ٴبىراق ساۋل ەحوباعا مويىنسۇنبادى. ال سامۋيل پايعامبار وسى قاتەلىگى جايلى ايتقاندا، ساۋل كىناسىن مويىندامادى. ول سونشالىقتى اۋىر ٸس جاسامادىم دەپ اقتالىپ، كىناسىن وزگەلەرگە جاپتى (سام. 1-ج. 15:13—24). ساۋل بۇعان دەيىن دە وسىلاي ارەكەت ەتكەن بولاتىن (سام. 1-ج. 13:10—14). وكىنىشكە قاراي، ساۋل ٶز جۇرەگىنىڭ كوكىرەكتەنىپ كەتۋىنە جول بەردى. ول ٶز وي-نيەتىن تۇزەمەگەندىكتەن، ەحوبا وعان قاتاڭ سوگىس ايتىپ، ودان باس تارتتى.
5. ساۋلدىڭ وقيعاسىنان قانداي ساباق الامىز؟
5 ساۋلدىڭ وقيعاسىنان ساباق الىپ، وزىمىزدەن بىلاي دەپ سۇرايىق: «كيەلى كىتاپتا جازىلعان قانداي دا ٴبىر كەڭەستى وقىعاندا، ٶزىمدى اقتاپ، سول كەڭەستى قولدانباۋدىڭ جولىن ىزدەيمىن بە؟ مەنىڭ جاساعان ٸسىم سونشالىقتى جامان ەمەس دەپ ويلايمىن با؟ ٶز قاتەلىكتەرىم ٷشىن وزگەلەردى ايىپتاۋعا بەيىممىن بە؟» وسى سۇراقتاردىڭ بىرەۋىنە بولسا دا «ٴيا» دەپ جاۋاپ بەرسەك، وندا ويىمىز بەن كوزقاراسىمىزدى وزگەرتۋىمىز قاجەت. ايتپەسە جۇرەگىمىز كوكىرەكتەنىپ كەتۋى مۇمكىن. مۇندايدا ەحوبا بىزبەن دوستىعىن ٷزىپ، بىزدەن باس تارتادى (جاق. 4:6).
6. ٴداۋىت پاتشانىڭ ساۋل پاتشادان ايىرماشىلىعى قانداي بولدى؟
6 ٴداۋىت پاتشانىڭ ساۋل پاتشادان ايىرماشىلىعىنا نازار اۋدارىڭىزشى. ٴداۋىت «ەحوبانىڭ زاڭىن» سۇيگەن (ٴزاب. 1:1—3). ول ەحوبانىڭ كىشىپەيىل جانداردى امان ساقتاپ، ال تاكاپپارلارعا قارسى شىعاتىنىن بىلگەن (سام. 2-ج. 22:28). سوندىقتان ٴداۋىت قۇداي زاڭىنا ٶزىنىڭ ويىن وزگەرتۋگە جول بەرگەن. ول: «ماعان اقىل-كەڭەس ايتقان ەحوبانى ماداقتايمىن، ٴتىپتى تۇندە دە كوڭىل تۇبىندەگى ويلارىم مەنى تۇزەتەدى»،— دەپ جازعان (ٴزاب. 16:7).
قۇداي ٴسوزى
جولدان اۋىتقىپ كەتسەك، قۇداي ٴسوزى ٴبىزدى ەسكەرتەدى. ەگەر كىشىپەيىل بولساق، قۇداي سوزىنە بۇرىس ويلارىمىزدى تۇزەتۋگە جول بەرەمىز. (7-ابزاستى قاراڭىز)
7. كىشىپەيىل بولساق، ٴبىز نە ىستەيمىز؟
7 ەگەر كىشىپەيىل بولساق، بۇرىس ويلارىمىز ٸس-ارەكەتكە ۇلاسپاي تۇرىپ، قۇداي سوزىنە وي قالپىمىزدى وزگەرتۋگە جول بەرەمىز. قۇداي ٴسوزى بىزگە «جول — مىناۋ، وسى جولمەن جۇرىڭدەر!» دەيتىن داۋىس سياقتى بولادى. جولدان وڭعا نە سولعا اۋىتقىپ كەتسەك، ول ٴبىزدى ەسكەرتىپ تۇرادى (يشايا 30:21). ەحوبانى تىڭداساق، بۇنىڭ كوپ پايداسىن كورەمىز (يشايا 48:17). مىسالى، بىرەۋدەن ەسكەرتۋ ەستىپ، الدىندا ىڭعايسىزدانىپ تۇرمايمىز. سونداي-اق ەحوباعا جاقىنداي تۇسەمىز، ويتكەنى ول ٴبىزدى سۇيىكتى بالاسىنداي قامقورلايتىنىن تۇسىنەمىز (ەۆر. 12:7).
8. جاقىپ 1:22—25-تارماقتاردا ايتىلعانداي، قۇداي ٴسوزىن قالاي اينا سياقتى قولدانا الامىز؟
8 قۇداي ٴسوزى ٴبىز ٷشىن اينا ىسپەتتى بولا الادى (جاقىپ 1:22—25 وقىڭىز). كوبىمىز تاڭەرتەڭ ۇيدەن شىعاردا ايناعا قارايمىز. وسىلاي وزگەلەر ٴبىزدى كورمەس بۇرىن، قاجەت جەرلەرىمىزدى جوندەپ الامىز. سول سياقتى، كيەلى كىتاپتى كۇندە وقىساق، ويىمىز بەن كوزقاراسىمىزدى قاي جاعىنان وزگەرتۋىمىز كەرەكتىگىن كورەمىز. كوبىسى كۇندە تاڭەرتەڭ ۇيدەن شىقپاس بۇرىن، كۇندەلىكتى تارماقتى وقۋدىڭ كوپ پايداسىن كورىپ ٴجۇر. ولار وقىعاندارى جايلى وي جۇگىرتەدى جانە كۇنى بويى قۇداي سوزىندەگى كەڭەستى قولدانۋدىڭ جولدارىن ىزدەيدى. بۇعان قوسا، ٴبىز قۇداي ٴسوزىن كۇندەلىكتى وقىپ، وي جۇگىرتۋدى دە ادەتكە اينالدىرۋىمىز كەرەك. بۇل قاراپايىم ٸس بولىپ كورىنۋى مۇمكىن. ٴبىراق بۇل — ومىرگە جەتەلەيتىن تار جولدا قالا بەرۋگە كومەكتەسەتىن ەڭ ماڭىزدى جايتتاردىڭ ٴبىرى.
رۋحاني تولىسقان دوستارىڭىزدى تىڭداڭىز
رۋحاني تولىسقان دوستار
قانداي دا ٴبىر رۋحاني تولىسقان ٴماسىحشى بىزگە جۇمساقتىقپەن ەسكەرتۋ جاساۋى مۇمكىن. مۇندايدا باۋىرلاسىمىزدىڭ باتىلدىق تانىتىپ، بىزبەن سويلەسكەنىنە ريزا بولامىز با؟ (9-ابزاستى قاراڭىز)
9. دوسىڭىز ٴسىزدى قاي كەزدە تۇزەتۋى مۇمكىن؟
9 ٴسىزدىڭ جولدان اۋىتقىپ، ەحوبادان الشاقتاپ كەتكەن كەزىڭىز بولعان با؟ (ٴزاب. 73:2، 3). سونداي كەزدە رۋحاني تولىسقان دوسىڭىز باتىلدىقپەن ٴسىزدى تۇزەتكەن بولسا، ٴسىز ونى تىڭداپ، اقىل-كەڭەسىن قابىلدادىڭىز با؟ ەگەر ٴسىز سولاي ەتكەن بولساڭىز، وندا دۇرىس ىستەدىڭىز. ەسكەرتۋ جاساعانى ٷشىن دوسىڭىزعا ريزا ەكەنىڭىزدە داۋ جوق (ناق. س. 1:5).
10. دوسىڭىز ٴسىزدى تۇزەتىپ جاتسا، بۇعان قالاي قاراۋىڭىز كەرەك؟
10 قۇداي سوزىندە «دوسىڭنىڭ جارالاعانى — ادالدىعى» دەگەن ٴسوز بار (ناق. س. 27:6). بۇل سوزدەر نەنى بىلدىرەدى؟ مىناداي مىسالدى قاراستىرايىق. ٴسىز كولىكتەر ىعى-جىعى كوشەدەن وتپەكشى بولىپ، جولدىڭ جيەگىندە تۇرسىز دەلىك. ٴبىراق تەلەفونىڭىزعا الاڭداپ، جان-جاعىڭىزعا قاراماي العا جۇرە بەردىڭىز. سول ساتتە دوسىڭىز قولىڭىزدان شاپ بەرىپ ۇستاپ، ٴسىزدى ارتقا قاراي تارتادى. ونىڭ قولىڭىزدى مىقتاپ ۇستاعانى سونشا — قولىڭىز كوگەرىپ قالادى. ٴبىراق ونىڭ دەرەۋ ارەكەت ەتكەنى ٴسىزدى كولىكتىڭ استىنا تۇسۋدەن ساقتاپ قالدى. كوگەرگەن قولىڭىز بىرنەشە كۇن اۋىرىپ جۇرسە، وسى ٷشىن دوسىڭىزعا رەنجيسىز بە؟ ارينە، رەنجىمەيسىز! قايتا، كومەگى ٷشىن ريزا بولاسىز. سول سياقتى، دوسىڭىز ٴسىزدىڭ ٴسوزىڭىز نە ٸسىڭىز قۇدايدىڭ ٵدىل تالاپتارىنا ساي كەلمەيتىنىن ايتىپ ەسكەرتسە، بۇل سىزگە باسىندا اۋىر ٴتييۋى مۇمكىن. ٴبىراق بۇل ٷشىن نارازى بولۋدان نە رەنجۋدەن اۋلاق بولىڭىز، ويتكەنى بۇل اقىماقتىق بولادى (ۋاع. 7:9). قايتا، دوسىڭىزعا ٴسىزدى باتىلدىقپەن ەسكەرتكەنى ٷشىن راقمەت ايتىڭىز.
11. دوسىنىڭ بەرگەن كەڭەسىنە ادام نە سەبەپتى قۇلاق اسپاۋى مۇمكىن؟
11 دوسىنىڭ سۇيىسپەنشىلىكپەن بەرگەن كەڭەسىنە ادام نە سەبەپتى قۇلاق اسپاۋى مۇمكىن؟ كوكىرەكتىكتىڭ كەسىرىنەن. كوكىرەك ادامدار «قۇلاقتارىنا جاعاتىن» سوزدەردى جاقسى كورەدى، ولار «شىندىققا قۇلاق سالمايدى» (ٴتىم. 2-ح. 4:3، 4). ولار وزدەرىن تىم اقىلدى جانە وزگەلەردەن جوعارى ساناعاندىقتان، بىرەۋدىڭ كەڭەسىنە مۇقتاج ەمەسپىن دەپ ويلايدى. الايدا ەلشى پاۋىل: «كىم شىن مانىندە ەشكىم ەمەس بولا تۇرا، ٶزى تۋرالى جوعارى ويدا بولسا، ٶز-ٶزىن الدايدى»،— دەپ جازعان (عال. 6:3). سۇلەيمەن پاتشا دا وسىعان قاتىستى: «قارت بولسا دا، ەسكەرتۋدى ەلەمەيتىن اقىلسىز پاتشادان گورى جارلى بولسا دا، اقىلدى جاس جىگىت ارتىق»،— دەگەن (ۋاع. 4:13).
12. عالاتتىقتارعا 2:11—14-تارماقتاردا ايتىلعان وقيعادا ەلشى پەتىر بىزگە قانداي ۇلگى قالدىردى؟
12 ەلشى پەتىردىڭ بىزگە قانداي ۇلگى قالدىرعانىنا نازار اۋدارايىق. ەلشى پاۋىل ونى جۇرتتىڭ كوزىنشە تۇزەتكەن (عالاتتىقتارعا 2:11—14 وقىڭىز). پاۋىلدىڭ كەڭەستى قالاي ايتقانىنا جانە قاي جەردە ايتقانىنا قادالىپ، پەتىردىڭ وعان نارازى بولۋىنا بولار ەدى. ٴبىراق پەتىر اقىلمەن ارەكەت ەتتى. ول كەڭەستى قابىل الىپ، پاۋىلعا ەشقانداي رەنىش ساقتامادى. كەيىنىرەك ول پاۋىل جايلى «سۇيىكتى باۋىرلاسىمىز» دەپ جازدى (پەت. 2-ح. 3:15).
13. بىرەۋگە كەڭەس بەرگەندە، نەنى ەستە ۇستاۋىمىز كەرەك؟
13 ال ەگەر ٴسىز ٶزىڭىز دوسىما كەڭەس بەرۋىم قاجەت دەپ ويلاپ جاتساڭىز، نەنى ەستە ۇستاعانىڭىز ٴجون؟ دوسىڭىزعا بارماس بۇرىن، «مەن تىم ٵدىل بولىپ جاتقان جوقپىن با؟» دەپ ويلانىپ كورىڭىز (ۋاع. 7:16). تىم ٵدىل ادام وزگەلەردى ەحوبانىڭ تالاپتارى بويىنشا ەمەس، ٶز تالاپتارى بويىنشا سوتتايدى جانە ونداي ادام مەيىرىمدىلىكپەن ارەكەت ەتپەۋى مۇمكىن. وسىلاي وي جۇگىرتكەننەن كەيىن دە دوسىڭىزبەن سويلەسۋ قاجەت دەپ ويلاساڭىز، وندا پروبلەمانى ناقتى انىقتاپ، دوسىڭىزعا ونىڭ ويىن بىلۋگە كومەكتەسەتىن سۇراقتار قويىڭىز. ادامنىڭ نە ويلايتىنىن بىلگەن كەزدە، وعان ٶز قاتەلىگىن تۇسىنۋگە كومەكتەسۋ جەڭىلىرەك بولادى. سوزدەرىڭىزدىڭ جازبالارعا نەگىزدەلگەنىنە كوز جەتكىزىڭىز. دوسىڭىزعا ۇكىم ايتۋ ٴسىزدىڭ ەمەس، ەحوبانىڭ ٸسى ەكەنىن ۇمىتپاڭىز (ريم. 14:10). ٶز اقىلىڭىزعا سۇيەنبەي، قۇداي سوزىندەگى دانالىققا جۇگىنىڭىز جانە بىرەۋگە كەڭەس بەرگەندە، يسا سياقتى جاناشىر بولىڭىز (ناق. س. 3:5؛ مات. 12:20). بۇل نەگە ماڭىزدى؟ ٴبىز وزگەلەرگە قالاي قاراساق، ەحوبا دا بىزگە سولاي قارايدى (جاق. 2:13).
قۇدايدىڭ ۇيىمىنان كەلگەن نۇسقاۋلارعا مويىنسۇنىڭىز
قۇدايدىڭ ۇيىمى
قۇدايدىڭ ۇيىمى ٴبىزدى جينالىستارمەن، ۆيدەولارمەن جانە ادەبيەتتەرمەن قامدايدى. ولار بىزگە قۇداي سوزىندەگى كەڭەستەردى قولدانۋعا كومەكتەسەدى. كەيدە باسقارۋشى كەڭەس ۇيىمداعى ىستەرگە قاتىستى وزگەرىستەر جاسايدى. (14-ابزاستى قاراڭىز)
14. ەحوبانىڭ ۇيىمى ٴبىزدى نەمەن قامدايدى؟
14 ەحوبا ٶمىر جولىندا بىزگە ٶزىنىڭ ۇيىمىنىڭ جەردەگى بولىگى ارقىلى باعىت-باعدار بەرىپ وتىرادى. ۇيىم ٴبىزدى جينالىستارمەن، ۆيدەولارمەن جانە ادەبيەتتەرمەن قامدايدى. سونىڭ ارقاسىندا ٴبارىمىز قۇداي سوزىندە جازىلعان كەڭەستەردى قولدانا الامىز. بۇل مالىمەتتەردىڭ بارلىعى تولىعىمەن جازبالارعا نەگىزدەلگەن. ۋاعىز ٸسىن ەڭ ٴتيىمدى جولمەن اتقارۋعا قاتىستى شەشىمدەر قابىلداعان كەزدە، باسقارۋشى كەڭەس كيەلى رۋحقا جۇگىنەدى. سوندا دا ولار وسى قابىلداعان شەشىمدەرىن جۇيەلى تۇردە قايتا قاراستىرىپ وتىرادى. ولار مۇنى نە ٷشىن ىستەيدى؟ ويتكەنى «بۇل دۇنيە وزگەرۋدە» جانە قۇدايدىڭ ۇيىمى جاڭا جاعدايلارعا بەيىمدەلۋ كەرەك (قور. 1-ح. 7:31).
15. كەيبىر جاريالاۋشىلار قانداي قيىندىققا كەزىكتى؟
15 كۇمان جوق، كيەلى كىتاپ ىلىمدەرىنە قاتىستى قانداي دا ٴبىر تۇسىنىك وزگەرگەندە نەمەسە مورالدىق نورمالارعا قاتىستى نۇسقاۋ العاندا، بىزگە ولاردى قابىلداۋ جەڭىل. ٴبىراق قۇدايدىڭ ۇيىمى ٴبىزدىڭ ومىرىمىزگە باسقالاي اسەر ەتەتىن شەشىمدەر قابىلداعاندا، بۇعان قالاي قارايمىز؟ مىسالى، سوڭعى جىلدارى عيبادات ورىندارىن سوعۋ مەن ولاردى كۇتىپ ۇستاۋ تىم قىمباتقا تۇسە باستادى. سوندىقتان باسقارۋشى كەڭەس ٴبىر پاتشالىق سارايىن مۇمكىندىگىنشە كوپ قاۋىمداردىڭ قولدانۋىنا قاتىستى باسشىلىق بەردى. بۇل وزگەرىستىڭ ناتيجەسىندە قاۋىمدار بىرىكتى جانە كەيبىر پاتشالىق سارايلارى ساتىلدى. جينالعان اقشا اسا قاجەت جەرلەردە عيبادات ورىندارىن سوعۋعا جۇمسالدى. ٴسىزدىڭ پاتشالىق سارايىڭىز ساتىلسا نە قاۋىمىڭىز وزگە قاۋىممەن بىرىكسە، سىزگە جاڭا جاعدايلارعا بەيىمدەلۋ قيىن بولۋى مۇمكىن. قازىر كەيبىر جاريالاۋشىلارعا قاۋىم كەزدەسۋلەرىنە بارۋ ٷشىن ۇزاعىراق جول جۇرۋگە تۋرا كەلەدى. ال پاتشالىق سارايىن سوعۋ نە كۇتىپ ۇستاۋ ٷشىن اۋىر ەڭبەك ەتكەن باۋىرلاستار بولسا ونىڭ نە ٷشىن ساتىلىپ جاتقانىن ويلاپ، ۋايىمداۋى مۇمكىن. ولار جۇمساعان ۋاقىتتارى مەن كۇشتەرى بوسقا كەتكەندەي سەزىمدە بولاتىن شىعار. دەسە دە ولار وسى وزگەرىستى قابىلداپ، مويىنسۇنۋشىلىق تانىتىپ جاتىر. بۇل باۋىرلاستار ماقتاۋعا ابدەن لايىق.
16. قولوستىقتارعا 3:23، 24 تە ايتىلعان كەڭەستى قولدانعانىمىز قۋانىشىمىزدان ايىرىلماۋعا قالاي كومەكتەسەدى؟
16 ەگەر ٴبىز بارلىق نارسەنى ەحوبا ٷشىن جاساپ جاتقانىمىزدى جانە ول ٶز ۇيىمىنا باعىت-باعدار بەرىپ جاتقانىن ەستە ۇستاساق، قۋانىشىمىزدان ايىرىلمايمىز (قولوستىقتارعا 3:23، 24 وقىڭىز). ٴداۋىت پاتشا عيباداتحانانى سوعۋ ٷشىن ساداقا جاساعان كەزدە، بىزگە جاقسى ۇلگى قالدىردى. ول: «ساعان وسىنداي سي-تارتۋ بەرەتىندەي مەن كىممىن سونشا، مىنا حالىق كىم؟! سەبەبى بارلىعى دا سەنەن كەلدى عوي. ٶز قولىڭمەن بىزگە بەرگەنىڭدى وزىڭە اكەلىپ وتىرمىز»،— دەگەن (شەج. 1-ج. 29:14). ٴبىز دە ساداقا جاساعان كەزدە، ەحوبانىڭ ٶز قولىمەن بىزگە بەرگەنىن وزىنە قايتارامىز. سوندا دا ەحوبا ونىڭ ٸسىن قولداۋ ٷشىن جۇمساپ جاتقان ۋاقىتىمىزدى، قاراجاتىمىزدى، كۇشىمىزدى قاتتى باعالايدى (قور. 2-ح. 9:7).
تار جولدا قالا بەرىڭىز
17. قانداي دا ٴبىر وزگەرىس جاساۋ كەرەكتىگىن تۇسىنگەندە، نەگە كوڭىلىڭىز تۇسپەۋ كەرەك؟
17 ومىرگە جەتەلەيتىن تار جولدا قالا بەرۋ ٷشىن، بارلىعىمىز يسانىڭ ىزىمەن تۋرا ٴجۇرۋىمىز قاجەت (پەت. 1-ح. 2:21). ٴبىراق ٴسىز قانداي دا ٴبىر وزگەرىس جاساۋ كەرەكتىگىن بايقاساڭىز، كوڭىلىڭىز تۇسپەسىن. نەگىزى، وزگەرىس جاساۋىڭىز كەرەكتىگىن بايقاعانىڭىزدىڭ ٶزى ٴسىزدىڭ ەحوبانىڭ نۇسقاۋلارىنا ساي ارەكەت ەتكىڭىز كەلەتىنىن كورسەتەدى. ەسىڭىزدە بولسىن، ەحوبا ٴبىزدىڭ كەمەلسىز ەكەنىمىزدى بىلەدى، سوندىقتان ول بىزدەن يساعا كەمەلدى تۇردە ەلىكتەيدى دەپ كۇتپەيدى.
18. دىتتەگەن جەرىمىزگە جەتۋ ٷشىن نە ىستەۋىمىز كەرەك؟
18 ٴبارىمىز دە بار نازارىمىزدى بولاشاققا تىگىپ، ويىمىزدى، كوزقاراسىمىزدى، ارەكەتتەرىمىزدى وزگەرتۋگە ىقىلاستى بولايىق (ناق. س. 4:25؛ لۇقا 9:62). سونداي-اق كىشىپەيىل بولىپ قالايىق، «قۋانا بەرەيىك، تۇزەلە بەرەيىك» (قور. 2-ح. 13:11). وسىلاي ەتەر بولساق، «سۇيىسپەنشىلىك پەن تىنىشتىقتىڭ قۇدايى [بىزبەن] بىرگە بولادى». سوندا دىتتەگەن جەرىمىزگە جەتىپ قانا قويماي، جول ٴجۇرۋدىڭ وزىنەن دە قۋانىش الامىز.
34-ٵن مىنسىزدىك جولىمەن ٴجۇرۋ
^ 5-ابزاس كەيبىرىمىزگە ويىمىزدى، كوزقاراسىمىزدى، ارەكەتتەرىمىزدى وزگەرتۋ قيىن بولىپ جاتادى. ٴبىز بۇل ماقالادان نە ٷشىن بارلىعىمىز وزگەرۋىمىز قاجەتتىگىن جانە وزگەرىستەر جاساعان كەزدە قالاي قۋانىشىمىزدى جوعالتىپ الماۋعا بولاتىنىن قاراستىرامىز.
^ 76-ابزاس سۋرەت سيپاتتاماسى: جاس ەر باۋىرلاس بۇرىس شەشىمىنىڭ سالدارىن ايتىپ بەرىپ جاتقاندا، جاسى ۇلكەن ەر باۋىرلاس (وڭ جاقتا) ونى ۇندەمەي تىڭداپ، وعان كەڭەس بەرۋ شىنىمەن قاجەت پە، جوق پا — سول جايلى ويلانىپ وتىر.
