1. Ль гора Мәтта 7:13, 14, әм ль сәр кʹижан рʹе нә?

ӘМ ГЬШК ль сәр рʹейәке дьмәшьн. Нета мә әв ә кӧ әм бьн һʹӧкӧмдарийа Йаһоԝада дьнйа тʹәзәда бьжин. Рʹож бь рʹож, әм хирәт дькьн кӧ ль сәр рʹийа жийане бьминьн. Ле ԝәк Иса Мәсиһ готьбу, әв рʹе тәнг ә, у щарьна ль мә зор те кӧ әм ль сәр ве рʹе бьминьн (Мәтта 7:13, 14 бьхунә). Жь бәр кӧ әм ԛьсурдар ьн, әм һеса дькарьн жь ве рʹе дәркʹәвьн (Галт. 6:1).

2. Ве готареда, әме ль сәр чь хәбәр бьдьн? (Чаргошә бь наве « Мьлукти Али Мә Дькә кӧ Әм сәр Хԝә Бьхәбьтьн» бьньһерʹә.)

² Сәва кӧ әм ль сәр рʹийа жийане бьминьн, гәрәке әм һазьр бьн кӧ фькьр, ньһерʹандьн у рʹабун-рʹуньштьна хԝә бьгӧһезьн. Паԝлосе шанди хушк у бьред ль бажаре Корьнтʹерʹа готьбу кӧ бьра әԝ «сәр хԝә бьхәбьтьн» (2 Корн. 13:11, ДТʹ). Әв ширәт бона мә жи фәрз ә. Ве готареда, әме бьвиньн кӧ Кʹьтеба Пироз чаԝа дькарә али мә бькә кӧ әм сәр хԝә бьхәбьтьн у хушк-бьред гьһишти чаԝа дькарьн али мә бькьн, ԝәки әм жь рʹийа тәнг дәрнәкʹәвьн. Ӧса жи, щарьна бәлки ль мә зор те кӧ әм гӧһ бьдьн рʹебәрийа тʹәшкиләта Йаһоԝа. Әме бьвиньн кӧ мьлукти чаԝа дькарә али мә бькә, ԝәки әм хԝә рʹаст бькьн у дь хьзмәта Йаһоԝада дьлхԝәшийа хԝә ӧнда нәкьн.

3. Хәбәра Хԝәде чаԝа дькарә али мә бькә?

³ Һеса нинә кӧ әм фькред хԝә бьщерʹьбиньн, чьмки дьле мә «хапинок» ә, ләма әм щарьна фәʹм накьн кӧ дьле мә, мә дьбә кʹӧ дәре (Йерәм. 17:9). Гәрәке әм һаш жь хԝә һәбьн кӧ әм бь фькьред шаш хԝә нәхапиньн (Аԛуб 1:22). Ләма, һәгәр әм дьхԝазьн хԝә бьщерʹьбиньн, гәрәке әм Хәбәра Хԝәде бьдьнә хәбате. Хәбәра Хԝәде әшкәрә дькә  кӧ әм мәрьвед чаԝа нә у «нет у фькьред» дьле мә чь нә (Ибрн. 4:12, 13). Хәбәра Хԝәде ԝәк рентгене йә, йа кӧ нишани мә дькә кӧ нав дьле мәда чь һәйә. Ле бәле, сәва кӧ әм ширәтед Кʹьтеба Пироз у йед тʹәшкиләта Хԝәде ԛәбул кьн у кʹаре бьстиньн, гәрәке әм мьлук бьн.

4. Әм жь кʹӧ заньн кӧ Шаԝул Пʹадша бу мәрьвәки ԛӧрʹә?

⁴ Сәрһатийа Шаԝул Пʹадша мә һин дькә кӧ кемасийа мьлуктийе чь ахьри пәй хԝә тинә. Шаԝул һаԛас ԛӧрʹә бу кӧ әԝи ԛәбул нәкьр ԝәки әԝ гәрәке фькьр у рʹабун-рʹуньштьна хԝә рʹаст бькә (Зәб. 36:1, 2; Һәбԛ. 2:4). Паши кӧ Шаԝул ордийа Амаләкийа бьндәст кьр, ԛӧрʹәтийа ԝи әшкәрә бу. Йаһоԝа рʹастә-рʹаст готьбу кӧ гәрәке әԝ чь бькә, ле Шаԝул гӧһ нәда ԝи. Гава Самуйел пʹехәмбәр сәр ԝи һерс кʹәт жи, Шаԝул Пʹадша шашийа хԝә бьчʹук һʹәсаб кьр у дьхԝәст суще хԝә бавежә сәр кәсед дьн (1 Сам. 15:13-24). Әв йәк нә щара пешьн бу кӧ Шаԝул ньһерʹандьнәкә ӧса әʹйан кьр (1 Сам. 13:10-14). Чь һʹәйф ә кӧ ԝи изьн да кӧ ԛӧрʹәти бькʹәвә дьле ԝи. Әԝи фькред хԝә рʹаст нәкьр, ләма Йаһоԝа сәр ԝи һерс кʹәт у әԝ рʹәд кьр.

5. Әм дькарьн жь сәрһатийа Шаԝул чь дәрсе бьстиньн?

⁵ Сәва кӧ әм жь сәрһатийа Шаԝул дәрсе бьстиньн, ԝе баш бә кӧ әм жь хԝә бьпьрсьн: «Гава әз ширәтәкә жь Хәбәра Хԝәде дьхуньм, гәло әз мәʹнийа дьгәрʹьм кӧ гӧһ нәдьм ԝан ширәта? Гәло әз шашийед хԝә бьчʹук һʹәсаб дькьм? Гәло әз суще хԝә давежьм сәр кәсед дьн?» Һәгәр дь ван алийада кемасийед мә һәбьн, гәрәке әм ньһерʹандьн у фькред хԝә рʹаст бькьн. Һәгәр әм ве йәке нәкьн, ԛӧрʹәти дькарә бькʹәвә дьле мә, у әм дькарьн достийа хԝә тʹәви Йаһоԝа ӧнда бькьн (Аԛуб 4:6).

6. Даԝьд Пʹадша чаԝа жь Шаԝул Пʹадша щӧдә бу?

⁶ Даԝьд Пʹадша нә мина Шаԝул Пʹадша бу. Даԝьд ԛануна Йаһоԝа пʹьрʹ һʹьз дькьр (Зәб. 1:1-3). Әԝи заньбу кӧ Йаһоԝа кәсед мьлук хьлаз дькә, ле кәсед ԛӧрʹә нәфрʹәт дькә (2 Сам. 22:28). Ләма Даԝьд изьн да кӧ ԛануна Хԝәде фькред ԝи рʹаст бькә. Әԝи ӧса ньвиси: «Пәсьне Тә әзе бьдьм, Хӧдане ширәткʹар, һʹәта шәв жи дьл нав мьнда дьбә дәрсдар» (Зәб. 16:7).

7. Мьлукти чаԝа дькарә али мә бькә?

⁷ Һәгәр әм мьлук бьн, әме изне бьдьн кӧ Хәбәра Хԝәде фькред мә йед шаш рʹаст бькә пешийа кӧ әм шашике бькьн. Хәбәра Хԝәде ԝе мәрʹа ӧса бежә: «Рʹе әв ә, дь ве рʹейада бьмәшьн!» Гава әм жь рʹийа рʹаст шаш бьбьн, әԝе мә һʹьшйар бькә (Иша. 30:21). Һәгәр әм гӧһ бьдьн Йаһоԝа, әме гәләк кʹаре бьстиньн (Иша. 48:17). Мәсәлә, ԝе нә лазьм бә кӧ кәсәки дьн мә рʹаст бькә. Ӧса жи, әме дьһа незики Йаһоԝа бьбьн, чьмки әме фәʹм бькьн кӧ әԝ мә ԝәк зарʹед хԝә дьвинә (Ибрн. 12:7).

8. Ль гора Аԛуб 1:22-25, Хәбәра Хԝәде чаԝа бәрамбәри нәйнькәке дьбә?

⁸ Хәбәра Хԝәде бәрамбәри нәйнькәке дьбә (Аԛуб 1:22-25 бьхунә). Сьбәһе, пешийа кӧ әм жь мале дәрдькʹәвьн, ма әм дь нәйнькеда ль хԝә наньһерʹьн? Бь ви аԝайи, әм дьвиньн кӧ гәрәке әм чь рʹаст бькьн пешийа кӧ кәсед дьн мә бьвиньн. Мина ве йәке, һәгәр әм Кʹьтеба Пироз һәр рʹож бьхуньн, әме бьвиньн кӧ гәрәке әм кʹижан ньһерʹандьн у фькред хԝә рʹаст бькьн. Гәләк хушк у бьра һәр сьбәһе рʹеза рʹоже дьхуньн пешийа кӧ әԝ жь мале дәрдькʹәвьн. Паше, әԝ тʹәмамийа рʹоже дьфькьрьн кӧ әԝ чаԝа дькарьн ве ширәта Хәбәра Хԝәде пек  биньн. Ӧса жи, гәрәке әм хԝәрʹа бәрнамәкә леколине чекьн, Хәбәра Хԝәде һәр рʹож бьхуньн у ль сәр ԝе кʹур бьфькьрьн. Дьбәкә әм дьфькьрьн әԝ тьштед һеса нә, ле бь рʹасти гәләк фәрз ә ԝан тьшта бькьн, ԝәки әм ль сәр рʹийа жийане бьминьн.

9. Ԝе бәлки кʹәнге лазьм бә кӧ кәсәк мә ширәт бькә?

⁹ Гәло тә ԛәт шашикә ӧса кьрийә, йа кӧ тӧ жь Йаһоԝа дур хьсти? (Зәб. 73:2, 3) Һәгәр хушк йан бьраки гьһишти тӧ ширәт кьри, гәло тә гӧһ да ԝи у ль гора ширәта ԝи кьр? Һәгәр тә ӧса кьр, тә баш кьр, у тӧ бешьк шекьрдар и кӧ һәвале тә тӧ һʹьшйар кьри (Мәтʹлк. 1:5).

10. Һәгәр һәваләки тә ширәте бьдә тә, тӧ гәрәке ча сәр ве йәке бьньһерʹи?

¹⁰ Хәбәра Хԝәде дьбежә кӧ бьринед жь һәвале ԛәнщ, амьнийа ԝи дьдьнә кʹьфше (Мәтʹлк. 27:6). Әв йәк чь те һʹәсабе? Ве мәсәле бинә бәр чʹәʹве хԝә: Тӧ дьхԝази дәрбази ԝи алийе рʹе бьби, ле ԝи ԝәхти кәсәк тәрʹа тʹеле дьхә. Тӧ дина хԝә дьди тʹеле, у ль дәрдора хԝә наньһерʹи у дьки кӧ дәрбаз бьби. Ԝе гаве, һәваләки тә мьле тә дьгьрә у тә дьдә сәкьнандьн. Әԝ мьле тә ӧса ԛайим дьгьрә кӧ мьле тә дешә, ле бь сайа аликʹарийа ԝи, тӧ сах дьмини. Ԛә тӧйе бьхәйидийайи сәр ԝи, кӧ әԝи мьле тә ешанд? Һьлбәт на! Тӧйе бона аликʹарийа ԝи шекьрдар буйайи. Мина ве йәке, һәгәр һәваләк тәрʹа бежә кӧ готьн йан кьрьнед тә нә ль гора принсипед Хԝәде нә, дьбә кӧ тӧ дь сәрида һьнәк әʹщьз бьби. Ле бәле, жь бо ширәта ԝи һерс нәкʹәвә у нәхәйидә. Әв йәк ԝе беаԛьлайи бә (Ԝаиз 7:9). Гәрәке тӧ шекьрдар би кӧ һәвале тә бь мерхаси ширәт да тә.

11. Һьнә кәс чьма ширәтед һәвалед хԝә ԛәбул накьн?

¹¹ Һьнә кәс чьма ширәтед баш йед дост у һәвалед хԝә ԛәбул накьн? Чьмки әԝ ԛӧрʹә нә! Мәрьвед ԛӧрʹә һәртʹьм дьхԝазьн тьштед кӧ ль гӧһед ԝан хԝәш тен, бьбьһен, у әԝ гӧһед хԝә жь рʹастийе дьзьвьриньн (2 Тимтʹ. 4:3, 4). Әԝ дьфькьрьн кӧ ньһерʹандьна ԝан, ньһерʹандьна һәри рʹаст ә, у кӧ ԛимәта ԝан жь ԛимәта кәсед дьн бьльндтьр ә. Ле Паԝлосе шанди ӧса ньвиси: «Һәгәр йәк хԝә дәԝса тьштәки датинә у хԝәха нә тʹӧ тьшт ә, әԝ хԝәха хԝә дьхапинә» (Галт. 6:3). Сьлеман Пʹадша жи ньвиси: «Хорте фәԛир у шәһрәза, жь пʹадшайе беаԛьл у калбуйи йе кӧ ида нашеԝьрә четьр ә» (Ԝаиз 4:13, ИМ).

12. Жь сәрһатикә Пәтрус, йа кӧ Галати 2:11-14-да әм дьхуньн, әм чь һин дьбьн?

¹² Бинә бира хԝә кӧ гава Паԝлосе шанди ль бәр һәр кәси шашийа Пәтрусе шанди да рʹуйе ԝи, Пәтрус хԝә ча кʹьфш кьр (Галати 2:11-14 бьхунә). Жь бәр кӧ Пәтрус йәки аԛьлмәнд бу, әԝ нәхәйиди кӧ Паԝлос ль бәр һәр кәси ширәт да ԝи, ле әԝи ширәта ԝи ԛәбул кьр. Паше, әԝи дәрһәԛа Паԝлос гот «бьре . . . дәлал» (2 Пәт. 3:15).

13. Пешийа кӧ әм ширәте бьдьн кәсәки, гәрәке әм ль сәр чь бьфькьрьн?

¹³ Һәгәр тӧ дьфькьри кӧ хушк йан бьрак һʹәԝщәйи ширәте йә, гәрәке тӧ чь бьки? Пешийа кӧ тӧ ширәте бьди кәсәки, жь хԝә бьпьрсә: «Гәло әԝ бь рʹасти һʹәԝщәйи ве ширәте йә?» Һьнә кәс хԝә бь зедәйи рʹаст һʹәсаб дькьн, ләма әԝ мәрьва нә ль гора принсипед Йаһоԝа, ле ль гора ньһерʹандьна хԝә мәрьва сущдар дькьн, у мәрьвед ӧса гәләк щара дьлрʹәʹм ниньн (Ԝаиз 7:16). Һәгәр бь рʹасти лазьм бә кӧ тӧ ширәте  бьди һәвале хԝә, ԝирʹа бь зәлали бежә кӧ проблем чь йә, у бь аликʹарийа пьрса али һәвале хԝә бькә кӧ әԝ шашийа хԝә фәʹм бькә. Бир нәкә кӧ гәрәке һәвале тә нә ль бәр тә, ле ль бәр Йаһоԝа һʹәсабе хԝә бьдә (Рʹом. 14:10). Ләма, гава тӧ ширәте дьди кәсәки, Хәбәра Хԝәде бьдә хәбате у мина Иса Мәсиһ дьлрʹәʹм бә (Мәтʹлк. 3:5; Мәт. 12:20). Гәло чьма? Чьмки һәгәр әм һьндава кәсед дьн дьлрʹәʹм бьн, Йаһоԝа жи ԝе һьндава мәда дьлрʹәʹм бә (Аԛуб 2:13).

14. Тʹәшкиләта Хԝәде чьда али мә дькә?

¹⁴ Йаһоԝа бь сайа тʹәшкиләта хԝә али мә дькә кӧ әм ль сәр рʹийа жийане бьминьн. Видео, әʹдәбйәт у щьвинед кӧ жь алийе тʹәшкиләтева тен һазьр кьрьн, али мә дькьн кӧ әм ширәтед Кʹьтеба Пироз пек биньн. Һʹәму ширәтед кӧ әм жь тʹәшкиләте дьстиньн, ль сәр һʹиме Кʹьтеба Пироз тен дайин. Гава Кʹома Рʹебәрийе сафи дькә кӧ ише бәлакьрьна мьзгине бь кʹижан метода бинә сери, әԝ хԝә дьсперә рʹӧһʹе пироз. Ӧса жи, Кʹома Рʹебәрийе сафикьрьнед хԝә щар щара жь нува дьщерʹьбинә. Гәло чьма? Чьмки һʹале дьнйайе һәр кӧ дьчә те гӧһастьне, у лазьм ә кӧ тʹәшкиләта Хԝәде ль гора һʹале ну пешда һәрʹә (1 Корн. 7:31).

15. Һьнә мьзгинван рʹасти чь тәнгасийа тен?

¹⁵ Бешьк әм һазьр ьн кӧ рʹебәрийа Кʹьтеба Пироз йа ль сәр намусийе ԛәбул бькьн. Ле бәле, гава тʹәшкиләт сафикьрьнәкә ну дьдә, йа кӧ ль сәр жийана мә һʹӧкӧм дькә, гәло әм чь дькьн? Мәсәлә, ль ван сала, хәрще авакьрьн у хԝәйкьрьна Одед Щьвата гәләк зедә буйә. Ләма, Кʹома Рʹебәрийе сафи кьрийә кӧ гәрәке Одед Щьвата дьһа бь економики у бь аԛьлайи бьдьнә хәбате. Бона ве йәке, ль һьнә дәра чәнд щьват кьрьнә йәк, у һьнә Одед Щьвата һатьнә фьротьне. Әԝ пʹәрә бона авакьрьна ода ль щийед кӧ һʹәԝщәти һәйә, тенә хәбьтандьне. Һәгәр ль мьһала тә һьнә одә бен фьротьне у һьнә щьват бькьнә йәк, бәлки ль тә зор бе кӧ тӧ һини һʹале ну бьби. Дьбәкә лазьм ә кӧ һьнә мьзгинван һәрʹьн одед дьһа дур. Һьнә хушк у бьред кӧ бона авакьрьн у хԝәйкьрьна одәке пʹьрʹ хәбат кьрьбун, ньһа бәрхԝә дькʹәвьн кӧ әв одә чьма те фьротьне. Әԝ  бәлки дьфькьрьн кӧ ԝана ԝәхт у ԛәԝата хԝә бадиһәԝа хәрщ кьрийә. Диса жи, әԝ һежайи пʹайа нә, чьмки сафикьрьна ну ԛәбул дькьн.

16. Пеканина ширәта ль Колоси 3:23, 24 чаԝа дькарә али мә бькә кӧ әм шабуна хԝә ӧнда нәкьн?

¹⁶ Бона кӧ әм шабуна хԝә ӧнда нәкьн, гәрәке әм биньн бира хԝә кӧ әм бона Йаһоԝа дьхәбьтьн, у әԝ хԝәха рʹебәрийа тʹәшкиләта хԝә дькә (Колоси 3:23, 24 бьхунә). Гава Даԝьд Пʹадша дьхԝәст бона авакьрьна пʹарьстгәһе пʹәра ԛӧрбан кә, әԝи гот: «Әз кʹи мә у нәтәԝа [щьмәʹта] мьн чи йә кӧ, әм бькарьбьн ӧса пʹешкʹешед жь дьл бьдьн? Жь бәр кӧ һәр тьшт жь тә йә у мә жь дәсте тә дан тә» (1 Дир. 29:14). Гава әм пʹәра ԛӧрбан дькьн, әм жи тьштед кӧ мә жь Йаһоԝа стандьнә, дьдьн ԝи. Ле йәкә Йаһоԝа ԛимәт дькә ԝәхт, ԛәԝат у һәбуна мә кӧ әм бона пьштгьрийа ише ԝи хәрщ дькьн (2 Корн. 9:7).

17. Һәгәр һʹәԝщә бә кӧ тӧ хԝә рʹаст бьки, чьма нә лазьм ә кӧ тӧ әʹщьз бьби?

¹⁷ Сәва кӧ әм ль сәр рʹийа тәнг бьминьн, гәрәке әм пʹегәһа Исада һәрʹьн (1 Пәт. 2:21). Һәгәр һʹәԝщә бә кӧ тӧ хԝә рʹаст бьки, дьлтәнг нәбә. Бь әʹсле хԝә, әв йәк әʹйан дькә кӧ тӧ һазьр и ԝәки рʹебәрийа Йаһоԝа ԛәбул бьки. Йаһоԝа занә кӧ әм гӧнәкʹар ьн, ләма әм нькарьн бь тʹәмами чʹәʹв бьдьнә Иса Мәсиһ.

18. Сәва кӧ әм бьгьһижьн нета хԝә, гәрәке әм чь бькьн?

¹⁸ Һәр кӧ әм ль сәр рʹийа жийане пешда дьчьн, бьра әм һазьр бьн кӧ фькьр, ньһерʹандьн у рʹабун-рʹуньштьна хԝә рʹаст бькьн (Мәтʹлк. 4:25; Луԛа 9:62). Бьра әм мьлук бьминьн, «һәртʹьм ша бьн» у «сәр хԝә бьхәбьтьн» (2 Корн. 13:11, ДТʹ). Һәгәр әм ӧса бькьн, «Хԝәдейе һʹьзкьрьне у әʹдьлайийе ԝе тʹәви [мә] бә». Ӧса жи, әме һьм бьгьһижьн нета хԝә һьм жи жь ве рʹеԝитийе шабуне бьстиньн!