1. Kwesakana na byaamba Mateo 7:13, 14, mu ñanyi jishinda mo twaikela pa lwendo?

ATWEBA bonse tuji pa lwendo. Ko tubena kuya nangwa’mba kikonkwanyi kyetu ke kwikala na bumi mu ntanda ipya mu bukalama bwawama bwa Yehoba. Pa juba pa juba, twibikako kwenda mu jishinda ja ku bumi. Bino byonka byaambile Yesu, jino jishinda jakepa kabiji bimye bimo jikatazha kwendamo. (Tangai Mateo 7:13, 14.) Twibambulwa kulumbuluka, kabiji kyapeela bingi kusendukamo mu jino jishinda.—Nga. 6:1.

2. Ñanyi bintu byo tusakufunda mu uno mutwe? (Monai ne kakitenguluzha ka kuba’mba “ Kwipelula Kwitukwasha Kupimpula Byubilo Byetu.”)

² Pa kuba’mba tutwajijile kwenda mu jino jishinda jakepa ja ku bumi, twafwainwa kutwajijila kupimpula milanguluko, miteeto ne byubilo byetu. Mutumwa Paulo watundaikile bena Kilishitu bajinga mu Kolinda kutwajijila ‘kupimpula milanguluko yabo.’ (2 Ko. 13:11) Luno lujimuno lwingila ne kwi atweba. Mu uno mutwe, tusakufunda pa Baibolo byo akonsha kwitukwasha kupimpula byubilo byetu, ne balunda netu bakoma mu lwitabilo byo bakonsha kwitukwasha kutwajijila kwenda mu jishinda jaya ku bumi. Kabiji tusakufunda ne ene mambo o kyakonsha kukatezha kulondela lutangijilo lwa jibumba ja Yehoba. Tusakumona kwipelula byo kwakonsha kwitukwasha kupimpula byubilo byetu ne kutwajijila kwikala na lusekelo pa kwingijila Yehoba.

3. Mambo a Lesa akonsha kwimukwasha byepi?

³ Inge twapimapima biji milanguluko yetu, kuji lukatazho lumo lo twikala nalo. Muchima wetu uji bingi na bujimbijimbi, kabiji wakonsha kwitulengela kukankalwa kuyuka ko abena kwitutangijila. (Yele. 17:9) Kyapeela bingi kwijimbaika atweba bene “na milanguluko yatama.” (Yako. 1:22) Onkao mambo, twafwainwa kwingijisha Mambo a Lesa pa kwipimapima atweba bene. Mambo a Lesa asolola  byo tuji mukachi, “milanguluko ne bikeba muchima” wetu. (Hebe. 4:12, 13) Mambo a Lesa ajitu nobe mashinyi wa mu kipatela ye bengijisha pa kumona muntu byo aji mukachi. Bino twafwainwa kwipelula pa kuba’mba tulondele lujimuno luji mu Baibolo nangwa lufuma ku bemenako Lesa.

4. Ki ka kimwesha’mba Mfumu Saulo wajinga na bwitote?

⁴ Kyamwekejile Mfumu Saulo kimwesha kintu kyakonsha kwitumwekela inge twabula kwipelula. Saulo witotele bingi kya kuba kechi waswile kuba’mba wafwainwe kupimpula milanguluko yanji ne byubilo byanji ne. (Sala. 36:1, 2; Ha. 2:4) Kino kyasolokele patoka kimye Yehoba kyo apele Saulo mikambizho ya kulondela inge washinda bena Ameleki. Saulo kechi wakookejile byamukambizhe Yehoba ne. Kabiji ngauzhi Samwela byo amusolomokele ne kwisamba nanji pa kino, Saulo kechi waswile’mba walubankenye ne. Pakuba wikangaizhe ne kubingisha byubilo byanji ne kupamo bakwabo mambo. (1 Sam. 15:13-24) Panyuma kacheche, Saulo wamwesheshe bino byonka byubilo. (1 Sam. 13:10-14) Kya bulandatu ke kya kuba’mba, waswishishe muchima wanji kwitota. Kechi wapimpwile milanguluko yanji ne, onkao mambo, Yehoba wamunenawine ne kumukana.

5. Twakonsha kufunjilako ka kwi Saulo?

⁵ Pa kuba’mba tufunjileko ku kyamwekejile Saulo, twafwainwa kwiipuzha ano mepuzho: ‘Inge natanga lujimuno mu Mambo a Lesa, nanchi nji na muteeto wa kubingisha milanguluko yami nyi? Nanchi ndanguluka’mba byubilo byami kechi byatama nenyi? Abya nebingisha ne kupamo bakwetu mambo nyi?’ Inge twakumbula’mba ee, ku bwipuzho bumo pa ano mepuzho, ko kuba’mba twafwainwa kupimpula milanguluko ne miteeto yetu. Inge twabula kwingijilapo, muchima wetu uketoota kabiji Yehoba uketukana, kechi tukekala balunda nanji ne.—Yako. 4:6.

6. Lumbululai lupusano lwajinga pe Mfumu Saulo ne Mfumu Davida.

⁶ Monai lupusano lwajinga pe Mfumu Saulo ne wamuswaine aye Mfumu Davida, mwanamulume watemenwe bingi “mizhilo ya Yehoba.” (Sala. 1:1-3) Davida wayukile’mba Yehoba upulusha bantu bepelula kabiji ukana bantu betota. (2 Sam. 22:28) Onkao mambo, Davida waswishishe mizhilo ya Lesa kupimpula milanguluko yanji. Wanembele’mba: “Nkamutotanga Yehoba, yenka wambuula bya kuba. Nangwatu mu kimye kya bufuku, milanguluko yami ya mukachi mwine, imfunjisha.”—Sala. 16:7.

7. Tukobanga byepi inge twipelula?

⁷ Inge twipelula, tukaswisha Mambo a Lesa kolola ndangulukilo yetu yatama saka ikyangye kwitulengela kuba bintu byatama. Mambo a Lesa akekala nobe jiwi jibena kwitubuula’mba: “Jino jo jishinda, jo mwafwainwa kuyamo.” Aketujimunangako inge ke tufume mu jishinda ne kuya ku kipiko nangwa ku kilujo. (Isa. 30:21) Inge ke tumvwine Yehoba, tukamwenamo byawama bingi. (Isa. 48:17) Bimo byo tukamwenamo ke bino: Kechi tukomvwa bumvu bwiya na mambo a kwitololako ku muntu mukwabo ne. Kabiji tukafwenya kwipi ne Yehoba, mambo twayuka’mba ubena kwitulama byonkatu nsemi byo alama baana banji bo atemwa.—Hebe. 12:7.

8. Kwesakana na byaamba Yakoba 1:22-25, twakonsha kwingijisha byepi Mambo a Lesa nobe kimbonyi?

⁸ Mambo a Lesa akonsha kwikala nobe kimbonyi kwi atweba. (Tangai Yakoba 1:22-25.) Atweba bavula tutala mu kimbonyi saka tukyangye kufuma pa nzubo. Tuba bino pa kuba’mba tumone inge paji po twafwainwa kuwamishako bantu bakwabo saka bakyangye kwitumona. Kyo kimotu, inge saka tutanga Baibolo pa juba pa juba, tukamonangapo mashinda mo twakonsha kupimpwilako ndangulukilo ne byubilo byetu. Bavula bataana kuba’mba kibakwasha bingi kutanga kinembelo kya juba lukelo saka bakyangye kufuma pa Nzubo. Boba bino pa kuba’mba byo batanga  bitangijilenga milanguluko yabo pa jo jo juba. Kabiji pa jo jo juba jonse, bamonapo mashinda a kwingijishishamo lujimuno lwa mu Mambo a Lesa. Kikwabo, twafwainwa kwikala na mutanchi wawama wa kutanga Mambo a Lesa pa juba pa juba. Kino kyakonsha kumweka nobe kintu kyapeela kuba, bino ke kintu kyanema kyo twafwainwa kubanga pa kuba’mba tutwajijile kwenda mu kajishinda kakepa kaya ku bumi.

9. Ñanyi kimye mulunda netu po akonsha kwitujimunako?

⁹ Abya mwakyubapo kala kintu kyakonsheshe kwimonawina bulunda bwenu ne Yehoba nyi? (Sala. 73:2, 3) Inge mulunda nenu wakoma mu lwitabilo wimujimwineko, abya mwaumvwijile ne kulondela lujimuno lwanji nyi? Inge byo byo mwaubile, ko kuba’mba mwaubile kintu kyawama, kabiji mwafwainwa kusanchila mulunda nenu pa kwimujimunako.—Maana 1:5.

10. Mwafwainwa kuba byepi inge mulunda nenu wimololako?

¹⁰ Mambo a Lesa etuvululamo amba: “Muntu wa kishinka ololako mukwabo nangwa kya kuba kyakonsha kumukozha ku muchima.” (Maana 27:6) Bino byambo bilumbulula ka? Langulukai pa kino kimwesho: Fwanyikizhai kuba’mba mubena kupembelela kwabuka mukwakwa mubena kupita myotoka yavula bingi kabiji mwalabama na kutala pa foni wenu. Mwatendeka ne kuya mu mukwakwa kwa kubula kukenkenta. Bino mulunda nenu wimukwata pa kuboko ne kwimukokela kunsa ya mukwakwa. Wimukwata na bulume bukatampe kya kuba mwaumvwa ne mukoko wakola, bino kino kyo auba kimupulusha ku motoka wajingatu pa bwipi kuba’mba emupake. Nangwa kya kuba bikozha biji pa mukoko wenu bikatwajijila kukola pa moba avula na mambo a kuba’mba mulunda nenu wimukwachile bingi na bulume, abya mukamuzhingijila nyi? Ine. Mukamusanchila pa kwimupulusha. Kyo kimotu, inge mulunda nenu wimujimunako pa ñambilo yenu nangwa byubilo byapusenamo na mizhilo yaoloka ya Lesa, kimye kitanshi kyakonsha kwimukola ku muchima. Bino kechi mwafwainwa kuzhingila nangwa kwituntula pa kwimujimunako ne. Kuzhingila kumwesha kukosama. (Sapwi. 7:9) Pakuba mwafwainwa kusanchila mulunda nenu pa kuchinchika ne kwiya na kwisamba nenu.

11. Ki ka kyakonsha kulengela muntu kukana lujimuno kufuma ku mulunda nanji?

¹¹ Ki ka kyakonsha kulengela muntu kulengulula lujimuno lwafuma ku mulunda nanji? Bwitote. Bantu betota batemwa “bintu byo bakebatu abo bene kumvwa.” Kechi bakeba “kumvwa bintu bya bukine [ne].” (2 Timo. 4:3, 4) Kechi bakeba kumvwa lujimuno ne, mambo balanguluka’mba baji na maana kabiji banema kukila bakwabo. Pano bino, mutumwa Paulo wanembele’mba: “Umvwe muntu kealanguluke’mba wakila bakwabo bino saka aji watu, ubena kwijimbaika mwine.” (Nga. 6:3) Mfumu Solomone walumbulwile bingi bulongo kino kishinka. Wanembele’mba: “Mwanyike muyanji uji na maana wawama kukila mfumu mukote wakosama ukana kulondela byo bamujimunako.”—Sapwi. 4:13.

12. Kwesakana na byaamba Ngalatiya 2:11-14, tufunjilako ka ku byaubile mutumwa Petelo?

¹² Langulukai pa byaubile mutumwa Petelo byo bamujimwineko pa bantu kwi mutumwa Paulo. (Tangai Ngalatiya 2:11-14.) Petelo wakonsheshe kuzhingijila Paulo, ne kuta muchima pa jishinda jo aambijilemo ne pa mpunzha po aambijile. Bino Petelo wajinga muntu wa maana. Waumvwijile lujimuno, kabiji kechi wazhingijile Paulo ne. Mu kuya kwa kimye, watelele Paulo amba “mulongo wetu ye twatemwa.”—2 Pe. 3:15.

13. Ñanyi bishinka byo twafwainwa kulangulukapo saka tukyangye kuya na kufundako mukwetu?

¹³ Inge kya kuba mwamona’mba mwafwainwa kujimunako mulunda nenu, ñanyi bishinka byo mwafwainwa kulangulukapo? Saka mukyangye kusolomoka mulunda nenu, ishikishai anwe bene amba, ‘Abya mbena “kukizhamo kwimona koloka  nyi”?’ (Sapwi. 7:16) Muntu ukizhamo kwimona koloka watemwa kuzhachisha bakwabo na mizhilo yo elengela mwine, kechi ulondela mizhilo yaoloka ya Yehoba ne, kabiji kechi ubila bakwabo lusa ne. Bino inge mwipimapima anwe bene kabiji mwamona’mba mulunda nenu ubena kukebewa kumujimunako, patanshi yukai lukatazho ne kwingijisha mepuzho akwasha muntu kalanguluka pa kuba’mba mukwashe mulunda nenu kuyuka kintu kyo alubankanya. Mwafwainwa kumona kuba’mba byo mubena kwamba byaimena pa Binembelo, ne kuvuluka’mba mulunda nenu uketotolwela kwi Yehoba kechi kwi anweba ne. (Loma 14:10) Ingijishai maana aji mu Mambo a Lesa, kabiji pa kufundako mukwenu, mweshainga kifyele byonka byaubanga Yesu. (Maana 3:5; Mat. 12:20) Mambo ka? Mambo byonka byo tuba na bakwetu, Yehoba naye byo byo aketuba.—Yako. 2:13.

14. Ñanyi bintu jibumba ja Lesa byo jitunengezhezha?

¹⁴ Yehoba ubena kwitutangijila mu jishinda jaya ku bumi kupichila mu lubaji lwa pano pa ntanda lwa jibumba janji. Jino jibumba jinengezha mavidyo, mabuku, ne kupwila, bino byonse bitukwasha atweba bonse kulondela lujimuno luji mu Mambo a Lesa. Abino byonse byaimena pa Binembelo. Jibumba Jitangijila jilondela lutangijilo lwa mupashi wazhila pa kufuukula jishinda jawama kwingijilamo mwingilo wa kusapwila. Nangwa byonkabyo, Jibumba Jitangijila pa kimye pa kimye jipitulukamo mu byo jifuukula pa kuba’mba jimone inge pabena kukebewa kupimpulako. Mambo ka? Mambo “bintu pano pa ntanda bibena kwaluka,” ne jibumba ja Lesa najo jafwainwa kupimpulako mashinda a kwingijisha kwesakana nabiji bintu mu ntanda.—1 Ko. 7:31.

15. Ñanyi lukatazho lumo lwapitamo basapwishi bamo?

¹⁵ Inge jibumba ja Lesa japimpulako ndumbulwilo ya mafunjisho etu amo a mu Baibolo, nangwa jitupa mikambizho yaamba pa byo twafwainwa kumweshanga byubilo byawama, tuswa ne kulondela. Bino tuba byepi inge jibumba ja Lesa japimpulako bintu bimo byakunza mbaji imo ya bwikalo bwetu? Mu myaka ya kulutwe kuno, pabena kutaiwa mali avula bingi pa kuwamisha ne kushimika mapunzha o tupopwelapo Lesa. Onkao mambo, Jibumba Jitangijila japana mukambizho wa kuba’mba Nzubo ya Bufumu imo bafwainwa kwiingijisha ku bipwilo byavula. Na mambo a luno lupimpu, bipwilo bimo bebivwanga pamo kabiji Mazubo a Bufumu amo beapoteshe. Ano mali babena kwiengijisha kutunga Mazubo a Bufumu ku mapunzha ko abena kukebewa bingi. Inge mwikala  mu mpunzha mo babena kupotesha Mazubo a Bufumu amo ne kuvwanga bipwilo, kampe kyakonsha kwimukatazha kupimpula milanguluko ne kulondela lutangijilo. Basapwishi bamo luno babena kwenda miseke yalepa kuya kuji Nzubo ya Bufumu na kupwila. Bakwabo baingijile na ngovu kushimika nangwa kulama bulongo Nzubo ya Bufumu bakonsha kutendeka kwiipuzha pa ene mambo o babena kupotesha yo yo Nzubo ya Bufumu. Bakonsha kulanguluka’mba baonawinetu kimye kyabo ne ngovu. Pano bino, babena kulondela lupimpu lwaubiwa, kabiji tubena kwibasanchila bingi.

16. Kulondela lujimuno luji pa Kolose 3:23, 24 kwitukwasha byepi kutwajijila kwikala na lusekelo?

¹⁶ Tukatwajijila kwikala na lusekelo umvwe saka tuvuluka’mba tubena kwingijila Yehoba, kabiji ye ubena kutangijila jibumba janji. (Tangai Kolose 3:23, 24.) Mfumu Davida wapaine mali a kushimikila nzubo ya Lesa. Ne atweba twafwainwa kulondela byo aubile. Waambile’mba: “Amiwa yami ñanyi, ne bantu bami bo bañanyi, kuba’mba tupane milambo ya kwifuukwila iji nobe ino? Mambo bintu byonse bifuma kwi anweba, kabiji twimupa bintu bifuma mu kuboko kwenu.” (1 Moba 29:14) Inge twapanako bupe bwa mali, ko kuba’mba ne atweba tubena kupa Yehoba bintu bifuma mu kuboko kwanji. Nangwa byonkabyo, Yehoba usanta bingi inge twaingijisha kimye kyetu, ngovu yetu, ne kupanako mali a kwingijisha mu mwingilo ye akeba’mba engijiwe.—2 Ko. 9:7.

17. Mambo ka o mwafwainwa kubujila kumvwa bibi ku muchima inge mwamona’mba mubena kukebewa kupimpulako bintu bimo byo muba?

¹⁷ Pa kuba’mba tutwajijile kwenda mu jishinda jakepa jaya ku bumi, atweba bonse twafwainwa kulondela bulongo mu ngayo ya kwa Yesu. (1 Pe. 2:21) Inge mwamona’mba mubena kukebewa kupimpulako bintu bimo byo muba, kumvwa kutama ku muchima ne. Kino kyakonsha kwikala kiyukilo kyawama kibena kumwesha kuba’mba mubena kulondela lutangijilo lwa Yehoba. Vulukainga kuba’mba Yehoba wayuka’mba twibambulwa kulumbuluka. Onkao mambo, kechi uketekela’mba twakonsha kulondelatu suka mu ngayo ya kwa Yesu ne.

18. Twafwainwa kuba byepi pa kuba’mba tukatambule bumi mu ntanda ipya?

¹⁸ Mwane atweba bonse twayai tute muchima pa bintu byawama biji kulutwe ne kuswa kupimpulangako milanguluko, miteeto, ne byubilo byetu. (Maana 4:25; Luka 9:62) Twayai tutwajijile kwipelula, ‘kusekela, ne kupimpula milanguluko yetu.’ (2 Ko. 13:11) Inge twauba bino, “Lesa wa butemwe kabiji wa mutende ukekala ne [atweba].” Kabiji uketukwasha kwikala na lusekelo luno, ne kwitupa bumi mu ntanda ipya.