1. Kuliza naMateusa 7:13, 14, morugendo musinke tuna kugenda?

NATUVENYE kuna kara morugendo. Sitambo setu twa hara tu ka sike mouzuni woupe ou nga pangera Karunga gwetu geharo. Ose kukondja nkenye ezuva, tu gende monzira ezi azi twara komwenyo gwanarunye. Nye ngomu ga yi uyungire Jesus, nzira ozo za likokera ntani pamwe udigu kugenda mo. (Resa Mateusa 7:13, 14.) Ose kapi twa sikilira mo ntani ureru tu zapuke monzira ozo.—Gar. 6:1.

2. Yisinke natu ka zogera mosirongwa esi? (Tara kakende “ Elinunupiko kutuvatera tu ture po malitjindjo.”)

² Nsene tuna hara kutwikira kugenda monzira zokutwara komwenyo gwanarunye, twa hepa kutjindja nkareso zetu, yirugana yetu ntani monkedi omu atu gazara. Mupositoli Paurusa kwa korangedere Vakriste ava va tungire moKolinte va twikire ‘kuzuvha’ ndi va ture po marunduruko. (2 Kol. 13:11) Epukururo eli mulyo kwetu nose. Mosirongwa esi, tatu ka zogera omu Bibeli nazi tu vatera tu ture po malitjindjo ntani nomu vakaume ava va kura pampepo nava tu vatera tu twikire kugenda monzira zokutwara komwenyo gwanarunye. Ntani natu ka zogera hena maukaro aga aga tu ninkisa pamwe yi tu karere udigu kukwama mavyukiso gokutunda kombunga zaJehova. Natu ka dimburura omu elinunupiko na li tu vatera tu rundurure nkareso zetu nokutwikira kukarera Jehova noruhafo.

3. Ngapi nadi kuvatera Nonkango daKarunga?

³ Ayo kukara udigu apa atu hetekere ko kukonakona magazaro nomalizuvho getu. Mutjima gwetu gwa vera, ano eyi kutudigopera tu dive eyi nagu tu tumangeda tu rugane. (Jer. 17:9) Ureru tu “likumbagere” nyamwetu. (Jak. 1:22) Yipo nye, twa hepa kuruganesa Nonkango daKarunga tu likonakone nyamwetu. Nonkango daKarunga nga di tu vatera yipo tu  dive muntu gomonda ntani “matedo noyigazo yokomutjima.” (Heb. 4:12, 13) Nonkango daKarunga kwa fana ngwendi efano eli ava ruganesa mokuminikira monda zorutu romuntu. Mokulifana, Nonkango daKarunga kutuvatera tu dive eyi ya kara monomutjima detu. Nye twa hepa kulinunupika nsene tuna hara kugwanena mo mauwa momapukururo aga atu gwana moNonkango daKarunga.

4. Yisinke yina kulikida asi hompa Sauru kwa tamekere kulinenepeka?

⁴ Sihonena sahompa Sauru kulikida eyi nayi horoka nsene tu dira kulinunupika. Sauru kwa linenepekere ntani kapi ga here kuyitambura asi ga hepa kurundurura magazaro noyirugana yendi. (Epis. 36:1, 2; Hab. 2:4) Eyi kwa lihorwere apa Jehova ga pere Sauru mapukururo kuhamena eyi ga hepere kurugana konyima zokufunda Vaamareki. Sauru kapi ga limburukwire Jehova. Ano apa muporofete Samwere ga vyukisire Sauru, age kapi ga tambwire epuko lyendi. Age kwa ligusa-gusire mo ntani nokugava usima kwava wopeke. (1 Sam. 15:13-24) Komeho yi ya horoke oyo, Sauru kwa likidire nkareso zokulifana. (1 Sam. 13:10-14) Sauru kwa linenepekere. Ano Jehova ga mu piswire nokumunyoka morwa kapi ga tjindjire magazaro gendi.

5. Yisinke natu lirongera ko kosihonena saSauru?

⁵ Kapi tuna hara kukara ngwendi Sauru. Yipo nye, twa hepa kulipura asi: ‘Apa ani resa Nonkango daKarunga, ame kuligusa-gusa mo yipo ni dire kudisikisa mo ndi? Ame kugazara asi eyi nina kurugana kapisi yidona ndi? Ame kuligusa-gusa mo nokugava usima kwava wopeke ndi?’ Nsene asi elimbururo komapuro ogo nhi, twa hepa kurundurura magazaro noyirugana yetu. Nsene tu dira kuyirugana, ngatu linenepeka ntani kapi ngatu kara vakaume vaJehova.—Jak. 4:6.

6. Faturura malisigo pokatji kahompa Sauru nahompa Ndafita?

⁶ Koneka malisigo pokatji kahompa Sauru nahompa Ndafita mugara ogu ga here “Veta zaHOMPA.” (Epis. 1:1-3) Ndafita ga yi divire asi Jehova kupopera valinunupiki, nye ga nyenga valinenepeki. (2 Sam. 22:28) Yipo nye, Ndafita kwa pulisilire veta zaKarunga zi tjindje magazaro gendi. Age kwa tjenge asi: “Tani pandura HOMPA ogu a rongo nge nondunge nomomasiku ezwi lyange lyokomutjima kurondora nge.”—Epis. 16:7.

7. Yisinke ngatu rugana nsene twa linunupika?

⁷ Nsene tu linunupika, ngatu pulisira Nonkango daKarunga di vyukise magazaro getu, komeho tu rugane yininke yoyidona. Nonkango daKarunga kwa fana ngwendi ezwi lina kututantera asi: “Nzira zezi. Zi kwameni.” Ado ngadi tu pukurura nsene tuna hara kuzapuka monzira tu vyuke korulyo ndi korumoho. (Jes. 30:21) Nsene tu purakena kwaJehova, ngatu gwanena mo mauwa gomanzi. (Jes. 48:17) Ose kapi ngatu kara nonomuga nsene gumwe nga tu pukurura. Ntani ose ngatu hedera unene kwaJehova morwa ngatu dimburura asi age kututekura ngwendi guhya geharo.—Heb. 12:7.

8. Ngomu va yi tumbura mwaJakopo 1:22-25, ngapi natu ruganesa Nonkango daKarunga ngwendi ntarero?

⁸ Nonkango daKarunga kwa fana ngwendi ntarero zetu. (Resa Jakopo 1:22-25.) Sinzi setu kulitara montarero nkenye ngurangura komeho tu tunde membo. Ose kuyirugana yipo tu dive nsene koyili twa hepa kutjindja komeho wopeke va ka yi mone. Mokulifana, apa atu resa Bibeli nkenye ezuva, ose ngatu dimburura nonkedi omu natu tjindja magazaro getu nonkareso zetu. Vamwe kugwanena mo mauwa pokuresa Konakona Matjangwa nkenye ezuva komeho va tunde mo membo. Awo kupulisira eyi ava resa yi gume magazaro gawo. Ano mwaza ezuva, awo kupapara nonkedi omu nava tura pasirugana mapukururo  gomoNonkango daKarunga. Twa hepa kuresa Bibeli nkenye ezuva nokuteda ko. Eyi kuvhura yi moneke ngwendi ureru kuyirugana, nye aso kuna kara sininke simwe somulyo unene esi nasi tu vatera tu twikire kugenda monzira zokutwara komwenyo gwanarunye.

9. Yisinke ayi ninkisa wopeke va tu pukurure?

⁹ Wa genda rumwe monzira ezi nkare zi ku guse ko kwaJehova ndi? (Epis. 73:2, 3) Nsene asi ogu ga kura pampepo ga ku pukwilire, wa mu purakenene nokutura pasirugana mapukururo aga ga ku pere ndi? Nsene yiyo wa rugene, kulikida asi ove kwa rugene sininke sosiwa ntani wa hefe kweyi ga ku pukwilire.—Yis. 1:5.

10. Yisinke no rugana nsene mukweni a ku pukurura?

¹⁰ Nonkango daKarunga kutudiworokesa asi: “Mukweni nsene ta ku zuvhisa kukora komutjima, nawa tupu.” (Yis. 27:6) Yisinke adi tanta nonkango edi? Konekeni sifanekeso esi. Gazara asi ove kuna sikama konontere dositaura, ono hara kutaguruka nye matuwa gomanzi kuna kupita, siruwo oso ove kuna kuruganesa serefoni zoge. Makura to tameke kutaguruka mositaura wa hana kutara matuwa. Ano poopo ngoso, kaume koge ta ku kwata kewoko a ku koke o tengure konontere dositaura. Makura ewoko lyoge ta lisongonyoka morwa ana kudere unene, nye age ana ku popere morwa ngano lya ku lyata etuwa. Kuvhura nye o mu handukire kweyi ka ku kokere nampili ngomu ewoko lyoge nali kora mazuva gongandi? Hawe! Ove no hafa morwa ka ku poperere. Mokulifana, nsene mukweni ta kupukurura asi mbuuyungiso noyirugana yoge kapi ya kuliza nonompango daJehova, kuvhura yi ku korese. Nye wa ha handuka. Ayo ugova nsene oyi rugana. (Muud. 7:9) Nye hafa kweyi ana kupukurura.

11. Morwasinke vamwe ava nyokere kutambura mapukururo govakwawo?

¹¹ Morwasinke vamwe ava nyokere kutambura mapukururo gokutunda kovakwawo? Morwa elinenepeko. Vantu wokulinenepeka kwa hara ‘kuvatantera eyi yina kuvatovarera.’ Awo ‘kunyoka kupurakena yosili.’ (2 Tim. 4:3, 4) Awo kunyoka mapukururo morwa kulimona vene asi awo mulyo. Nye mupositoli Paurusa kwa tjenge asi: “Yeeyi ogu a gazara asi age yige po nye, age nye ga hana mutompo, ogo mwene tupu a likumbagere.” (Gar. 6:3) Hompa Saromo kwa fatwilire nawa egano olyo. Age kwa tjenge asi: “Muntu kuvhura a tunde moupika ta kara hompa gosirongo sawo ndi a tunde modorongo a ze kosipundi ano moukurupe wendi nye a kare mugova mokumupukurura, ga mu pitakana mumati gomuhepwe gonondunge.”—Muud. 4:13.

12. Kuliza noVagarata 2:11-14, yisinke tuna lirongere ko kosihonena saPeturusa?

¹² Tu tareni sihonena ga tulire po mupositoli Peturusa apa mupositoli Paurusa ga mu pukwilire moyitarameho. (Resa Vagarata 2:11-14.) Mokumona asi Paurusa kwa pukwilire Peturusa moyitarameho yovantu, eyi ngano ya handukisire Peturusa. Nye Peturusa kwa kere muntu gomunongo. Age ga tambwire epukururo ntani kapi ga nyengere Paurusa. Nye age kwa mu tumbwire asi Paurusa ‘mukwetu ogu na hara.’—2 Pet. 3:15.

13. Yisinke wa hepa kudiworoka nsene ono hara kugava epukururo kwagumwe?

¹³ Yisinke wa hepa kudiworoka nsene ono hara kugava epukururo kwagumwe? Komeho o uyunge nage, lipura nyamoge asi: ‘Ame kulimona asi mouhunga ani kara nkenye apa ndi? (Muud. 7:16) Muntu ogu a limono uhunga unene, kupangura vakwawo kuliza nomutaro gwamwene nye kapisi kuliza nonompango daJehova ntani age kwato nkenda. Nsene asi konyima zokulikonakona nyamoge simpe ono mono hepero zokuuyunga  namukweni, mu tantera kuvyukilira udigu wendi ntani ruganesa mapuro aga naga mu vatera a dimburure epuko lyendi. Ntani divilisa asi nkenye eyi nouyunga ya hepa kuliza noMatjangwa ntani diworoka asi age mulyo kwaJehova. (Rom. 14:10) Demenena kounongo ou wa kara moNonkango daKarunga ntani nsene kwa kugava mapukururo, honena Jesus pokulikida nkenda. (Yis. 3:5; Mat. 12:20) Morwasinke? Morwa Jehova nga tu tekura nose monkedi ezi a tu tekura vakwetu.—Jak. 2:13.

14. Yisinke za tu wapaikira mbunga zaJehova?

¹⁴ Jehova kutuvyukisa monzira zokutwara komwenyo, pokuruganesa ruha rombunga zendi zepevhu. Azo kwa tu wapaikira novidiyo, yimbapiratjangwa ntani mapongo. Ano eyi kutuvatera tu sikise mo mapukururo gomoNonkango daKarunga. Apa vanavazinyetu womoMbungagendesi ava tokora monkedi omu natu zuvhisa, awo kukwama mavyukiso gompepo zokupongoka. Nye nampili ngoso, Mbungagendesi simpe kutarurura matokoro ogo yipo va dive nsene asi kuvhura va ture po malitjindjo. Morwasinke? Morwa ‘uzuni ou neyi nayinye yamo kuna kulitjindja.’ Yipo nye, mbunga zaJehova nazo kutura po malitjindjo kuliza nomaukaro gomape.—1 Kol. 7:31.

15. Maudigu musinke va ligwanekerere nago vazuvhisi vamwe?

¹⁵ Apa mbunga zaJehova azi pwagesa ekwatogano lyepe kuhamena usili womoBibeli, ose kuutambura. Nye ngapi omu a tu lizuvhu apa mbunga zaJehova azi tura po marunduruko aga naga kundama ruha rumwe rweparu lyetu? Pasihonena, monomvhura edi dantantani, yimaliwa eyi ava ruganesa mokutunga nokupakera mbili mavango getu goukareli kwa zeruka unene. Ano Mbungagendesi yipo za tokwere asi nombungakriste dongadi di pongere moSinyanga simwe soUhompa. Eyi yiyo nye nombungakriste dimwe adi ruganesere Sinyanga simwe tupu. Ntani etokoro olyo kwa ninkisa Yinyanga yimwe va yi randese. Yimaliwa oyo kuyiruganesa mokudika Yinyanga komavango oku vana yi hepa unene. Nsene asi ove kwa tunga komavango oku vana kurandesa Yinyanga ntani oku nombungakriste dokulisiga-siga dina kuruganesa Sinyanga simwe tupu, kuvhura yi ku karere udigu kutambura ukaro woupe. Vazuvhisi vamwe ngesi kugenda sinano sosire va ze komapongo. Ano vamwe ava va litulire mo unene mokutunga nokupakera mbili Sinyanga soUhompa nampo kuvhura va lipure asi morwasinke  va kusirandesera? Kuvhura va lizuvhe ngwendi kwa hepekere tupu nonkondo nosiruwo sawo. Nye awo simpe kuna kukwatesa ko marunduruko aga gomape ntani awo va hepa epandadeko.

16. Uwa musinke ngatu gwanena mo nsene tu tura pasirugana epukururo eli lya kara moVakorosi 3:23, 24?

¹⁶ Ose ngatu twikira kuhafa nsene tu diworoka asi ose kuna kuruganena Jehova ntani age kuna kugendesa mbunga zendi. (Resa Vakorosi 3:23, 24.) Hompa Ndafita kwa tura po sihonena sosiwa apa ga geve yimaliwa mokudikisa ko ntembeli. Age kwa uyungire asi: “Mbunga zange name nokuvhura si nawa-nawa kukupa yuma, yeeyi asi nkenye esi uhwi wa tunda koge. Ose kuna ku tengwidire tupu eyi ya kara nare yoge.” (1 Hist. 29:14) Apa atu gava yigava, nose kutengwida eyi ya tunda kwendi. Nye nampili ngoso, Jehova kumuhafesa apa atu ruganesa siruwo setu noyiweka yetu ntani nononkondo detu, yipo tu kwatese ko yirugana yendi.—2 Kol. 9:7.

17. Morwasinke no dilira kudompa mutjima nsene koyili wa hepa kutjindja?

¹⁷ Mokutwikira kugenda monzira zokutwara komwenyo gwanarunye, natuvenye twa hepa kuhonena Jesus. (1 Pet. 2:21) Nsene o dimburura asi koyili eyi wa hepa kutjindja, ya ha kuguvisa. Aso silikidiso sosiwa asi ove ono hara kulimburukwa mavyukiso gaJehova. Diworoka asi Jehova kapi a ndindire ko kwetu ngovantu wokudira kusikilira mo, tu rugane nawa-nawa ngamoomu ga yi rugene Jesus.

18. Yisinke twa hepa kurugana yipo ngatu ka sike mouzuni woupe?

¹⁸ Ngano natuvenye tu demenene komeho zongwa ntani nokukara neharo lyokurundurura nkareso zetu, yirugana yetu ntani monkedi omu atu gazara. (Yis. 4:25; Ruk. 9:62) Tu twikireni kulinunupika nokuhafa ntani nokutura po marunduruko. (2 Kol. 13:11) Nsene tu yi rugana, ‘Karunga geharo nombili nga kara nose.’ Ntani age nga tu vatera tu hafe ngesi ntani nokukagwana eparu lyewa mouzuni woupe.