1. Tintwari na Matie 7:13, 14, mu bungu dia nti tulendi têla ti mu nzietolo twena?

BETO bansoni mu nzietolo twena, mpe kuma ku tuta kwenda, peleko kani dieto ni mu bâ mu nza ya môna yibâ mu lutumu lwa Yehova Yandi we Tata’eto dia luzolo. Bilumbu biabiansoni, mbo tusarilaka ngolo mu landa nzila yinataka ku luzingu. Kâ, ntiana bwa tâ Yezu, nzila yo ya mfinka yena, mpe ntangu zakaka mpasi yibâka mu landa. (Tanga Matie 7:13, 14.) Mu bungu ti ka twena ba lunga ko, ka wena musamu wa mpasi ko kwe beto mu bika mu landa nzila yo.​—Nga. 6:1.

2. Nti tutaluzula mu timoko ti? (Tala mpe kaku tie na mutu-diambu “ Tifu tia kuluka mbo titubakisaka mu sungika ntambi zeto.”)

² Tala ti tuzololo tatatamana mu landa nzila ya mfinka yinataka ku luzingu, tufweti zolo mu sa nsobolo mu mabanza meto, mu ndiatulu’eto na mu nsalulu zeto. Ntumwa Paulo watindisa Bakristo ba ku Korente mu tatamana ‘mu tambulaka babasungika.’ (2 Kor. 13:11, NWT) Malongi mo beto mpe mata tarila. Mu timoko ti mbo tumona bwe Bibila dilendi tu bakisila mu sa nsobolo, mpe bwe ndiku zeto za yela mu timpeve zilendi tu bakisila mu tatamana mu landa nzila ya luzingu. Mbo tutaluzula mpe ntia ntangu wulendi bâ musamu wa mpasi mu landa lutwalusu lu hanaka organizasio ya Yehova. Mbo tumona bwe tifu tia kuluka tilendi tu bakisila mu sa nsobolo na mu tatamana mu sarila Yehova na nsayi yayansoni.

3. Ngano bwe Zu dia Nzambi dilendi ku bakisila?

³ Musamu wa mpasi wubâka, bu tuyêlaka mu taluzula mabanza meto na mio mi tumonaka ku mutima. Mutima’eto ngungu yena, mpe wulendi sa ti wabâ musamu wa mpasi mu zaba ntia nzila wulendi tu nata. (Yer. 17:9) Ka mpasi’â ko mu hunakana beto beni mu “mabanza ma bungungu.” (Zaki 1:22) Ntiangu, tufweti  sarilaka Zu dia Nzambi mu titaluzulaka na mu zabaka mbanzulu zeto na nsatu zeto za ku mutima. (Ebr. 4:12, 13) Mu tifwani, Zu dia Nzambi mbo disalaka ntiana échographie yi basaka ku mukento we na zimi mu zaba tala ti mwana wa bakala peleko wa mukento kabuta. Kâ, tufweti bâ ba kuluka tala ti tuzololo tabaka ndandu ya malongi ma tûkaka mu Bibila na kwe bisari bia Nzambi.

4. Mu bungu dia nti tuta têla ti mutinu Sawule wayizi bâ na lukuta?

⁴ Tifwani tia mutinu Sawule mbo tisongelaka nti bilendi tula tala ti tukondolo tifu tia kuluka. Sawule wayizi tomo bâ na lukuta, mpe keri’â tambulaka ko ti wafweti soba mbanzulu zandi na ndiatulu’andi. (Mik. 36:1, 2; Hab. 2:4) Musamu wo wayizi tomo moneka mu ntangu Yehova kayizi mu têla nti kafweti sa ha manima bu kaketi nunga Bisi-Amaleke. Kâ, Sawule ka tumamana Yehova ko. Mpe mu ntangu mbikuri Samwele kamutungurila mu mbi yi kayirika, Sawule wakala mu tambula fote’andi. Yandi watâ ti musamu wu kayirika ka weri’â wa nkatika wa mbi ko, mpe mbo keri tâka ti bantu bamutuma mu ngolo kayirika musamu wo. (1 Sam. 15:13-24) Musamu wa mpila yo Sawule wa katoko yirika. (1 Sam. 13:10-14) Musamu wa tiari ni wena’eti, wabika mutima’andi wamunatina lulendo. Ka yizi’â soba mabanza mandi ko, mpe Yehova wamulosa.

5. Nti tulendi longoka mu tifwani tia Sawule?

⁵ Ka tuzololo’â ko tabâ ntiana Sawule, ntiangu tufweti tiyulaka biyuvu ebi: ‘Bu nitangaka malongi ma hanaka Bibila, ngano mbo nidingaka musamu ngatu nalembo ma sarila? Ngano mbo nibanzaka ti misamu mi nita yirika ka miena mia nkatika mia mbi ko? Ngano mbo nihanaka bantu bakaka fote tala ti ndirikiri musamu wa mbi?’ Tala ti tifu tie kô tusarilaka mu biyuvu bio, buna tufweti soba mbanzulu zeto na ndiatulu’eto. Tala ti ka tusiri’â bo ko, tulendi kwizi bâ na lukuta, Yehova mbo kakwizi tu losa, mpe ka tuvutu’â bâ ndiku zandi ko.​—Zaki 4:6.

6. Zonzela luswaswanu lwe ha kati dia mutinu Sawule na mutinu Davide.

⁶ Tataleno luswaswanu lwe ha kati dia mutinu Sawule na mutinu Davide weri zoloko “musiku wa Yehova.” (Mik. 1:1-3) Davide wazaba ti Yehova mbo kavukisaka bantu bô bê ba kuluka, kâ mbo katelamanaka bô bê na lulendo. (2 Sam. 22:28) Ntiangu Davide kabika musiku wa Nzambi wasobesa mbanzulu zandi. Watsoneka ti: “Mbo nikembela Yehova, Yandi wakungeni malongi. Ni bu wubâ mu mpimpa, mabanza mani ma ku mutima mbo makunsungikaka.”​—Mik. 16:7.

7. Nti tukwizi sa tala ti ba kuluka twena?

⁷ Tala ti ba kuluka twena, mbo tubika Zu dia Nzambi diasobesa mbanzulu zeto za mbi ntete zatutuma mu yirika musamu wa mbi. Zu dia Nzambi mbo dibâ ntiana zu dita tu têla: “Nzila eku yena. Landeno yo.” Mbo ditulwengesa tala ti tubatikiri mu yirika musamu wa mbi. (Iza. 30:21) Bu tukwe wirikiri Yehova, mbo tubaka ndandu mu mpila zazingi. (Iza. 48:17) Mu tifwani, ka tukwizi kala ko ti muntu wakaka watusungika. Mpe mbo tukwizi bâ penepene na Yehova mu bungu ti mbo tubakula ti mbo katukipaka ntiana bala bandi ba kazololo.​—Ebr. 12:7.

8. Ntiana bu batele wo mu Zaki 1:22-25, bwe Zu dia Nzambi dilendi bêla ntiana titâri kwe beto?

⁸ Zu dia Nzambi dilendi bâ ntiana titâri kwe beto. (Tala Zaki 1:22-25.) Babingi tutalaka titâri bilumbu biabiansoni mu pari ntete taduka. Mu mpila yo, tulendi mona tala ti huma hafwanakane mu delakasa ntete bantu bakaka batumona. Mpila mosi mpe, bu tutangaka Bibila bilumbu biabiansoni, mbo tukwizi monaka mpila zi tulendi sungikila mbanzulu zeto na ndiatulu’eto. Bantu babingi batangaka verse ya tilumbu mu pari ntete baduka, mpe mpila yo mbo yibabakisaka. Mbo babikaka misamu mi batengi  miasobesa mbanzulu zawu. Mpe mu tilumbu tiatiansoni, mbo badingaka mpila zi basarila malongi ma Bibila. Tufweti longokaka mpe tufweti dimbitilaka Zu dia Nzambi bilumbu biabiansoni. Tulendi mona ti musamu wa fioti kwa wena, kâ tiena timosi tia bima bia mfunu bi tulendi sa mu tatamana mu nzila ya mfinka yinataka ku luzingu.

9. Mu ntia ntangu ndiku yilendi ku sungika?

⁹ Ngano wabatikiri mu diatila mu nzila yakuneti mala na Yehova? (Mik. 73:2, 3) Tala ti mpangi ya yela yabakiri butindi mu ku sungika, ngano wamuwirikiri mpe malongi mandi ma wasariri? Tala ti ni bo wasiri, musamu wa mbote wayirikiri, mpe kampe watomono tonda ndiku’aku mu bungu ti wakulwengese.​—Bin. 1:5.

10. Ngano nti fweti sa tala ti ndiku yikusungikiri?

¹⁰ Zu dia Nzambi mbo ditubambulaka: “Mputa yi lwekesaka ndiku mbo yisongelaka kwikama kwandi.” (Bin. 27:6) Musamu wo bwe wuta zolo tâ? Tataleno tifwani eti: Banza’eti, we naku wasabuka nzila yivulu yôkelaka kaminio, mpe mabanza maku mamansoni mu telefone’aku tûriri mo. Batikiri mu kwe yende mu nzila yo, mpe kuta tala ko. Ho nkatika bendo, ndiku yikudzutiri mu koko mpe yikukarisi mu nzila yi yôkelaka bantu. Mu mpila yi kakudzutiriri wizi lwala, kâ manzangu ma kasiri makuvukisi mu bungu ti kaminio ka yikutapiri’â ko. Ni bu sa ti mputa ye naku mbo yikumwisa mpasi bilumbu biabingi, ngano mbo bakila ndiku’aku nkesi mu mpila yi kakudzutiriri? Kampe kâni! Mbo tomo tonda mu bungu dia lubakusu lwandi. Mpila mosi mpe, tala ti ndiku’aku yikulwengese ti nzonzolo’aku peleko nsalulu zaku ka zita delakana na mitieno mia kwikama mia Nzambi ko, diangana wulendi toko ku fwemesa. Kâ, kumubakilandi nkesi mu bungu ti malongi kakuheni peleko kuniongandi. Mbo bubâ buzoba. (Ekl. 7:9) Kani wasila bo, fweti tonda ndiku’aku mu bungu dia butindi bu kasariri mu kwizi ku zonzesa.

11. Ngano nti bilendi sa ti muntu walosa malongi ma mbote ma bamuhanaka kwe ndiku?

¹¹ Ngano nti bilendi sa ti muntu walosa malongi ma mbote ma bamuhanaka kwe ndiku yimuzololo? Lukuta. Bantu bê na lukuta mbo bazoloko ‘babatêla misamu mi bazololo mu wâ.’ Mbo “babikaka mu wâ matieleka.” (2 Tim. 4:3, 4, NWT) Mbo babanzaka ti ka bêna na nsatu malongi ko mu bungu ti mbo bamonaka ti bayôkele mu ndwenga peleko ni bawu bayôkele mfunu. Kâ, ntumwa Paulo watsoneka ti: ‘Muntu, kamana banza ti: ni yandi yôkele, kâ tio kena na kani bwa tâ ko: hunakane.’ (Nga. 6:3) Mutinu Salomo watomo bangula musamu wango, bu katsoneka ti: “Mwana we mputu kâ we na ndwenga wuyôkele mutinu we mbuta kâ we tizoba, wulembolo vutu sâla na mabanza ma delakana mu sarila ndwengosolo.”​—Ekl. 4:13.

12. Ngano nti tuta longoka mu tifwani tia ntumwa Piere ti bazonzele mu Bisi-Ngalate 2:11-14?

¹² Banza’eti tifwani tia Piere mu ntangu Paulo yi kamusungika ha meso ma bantu. (Tanga Bisi-Ngalate 2:11-14.) Piere mbo kaketi bakila Paulo nkesi tala ti wabanza kwa mpila na mbuka ya mu zonzela Paulo. Kâ Piere ndwenga zeri nandi. Watambula malongi, mpe ka yizi’â lundila Paulo diki ko. Piere wayizi tâ Paulo “mpangi ya luzolo.”​—2 Pi. 3:15, NWT.

13. Ntia mabanza mafweti bâka neto bu tuhanaka malongi?

¹³ Tala ti zololo wahana malongi kwe ndiku’aku, ngano ntia mabanza mafweti bâ naku? Ntete we wazonza na ndiku’aku, toko tiyula:‘Ngano “muntu we na buderede wuyôkesaka ndilu” ndiena?’ (Ekl. 7:16) Muntu we na buderede wuyôkesaka ndilu bampwana’andi kafundisaka mu mabanza ma yandi beni, kâ ka mu mabanza ma mitieno mia Yehova ko, mpe muntu wa mpila yo ka wuvulu’â fwilaka bampwana’andi tiari ko.  Bu meni titaluzula, tala ti mweni ti fweti zonzela ndiku’aku, tomo dinga wazaba musamu wuzonzela mpe sarila biyuvu bibakisa ndiku’aku mu mona musamu wa mbi wu kayirikiri. Bâ na lukwikulu ti misamu mi tâ mu Bibila mitûka, mpe bambuka ti ka diena dema diaku ko mu fundisa ndiku’aku, kâ dia Yehova diena. (Rom. 14:10) Sikirila ndwenga zitûkaka mu Zu dia Nzambi, mpe bu hanaka malongi kwe muntu, landaka tiari tia mutima tia Yezu. (Bin. 3:5; Mat. 12:20) Mu bungu dia nti? Mu bungu ti mpila yi tubongelaka bantu, Yehova mpe ni yo katubongelaka.​—Zaki 2:13.

14. Ngano organizasio ya Nzambi nti yisaka mu bungu dia beto?

¹⁴ Mu nzila ya lweka lwa organizasio’andi ye ha mutoto Yehova katutwarisilaka mu nzila yinataka ku luzingu. Organizasio yo mbo yidukisaka video, mabuku na mikanda, mpe mbo yikubikaka tukutakanu tutubakisaka mu sarila malongi me mu Zu dia Nzambi. Tulendi sikirilaka bima bio mu bungu ti mu Zu dia Nzambi bisikamanaka. Mu ntangu Timvuka titwarisaka tibongaka nzengolo zitariri mpila za zibote za sala tisalu tia samuna, mbo tisikirilaka mpeve santu. Kâ, Timvuka titwarisaka, mbo tivulu sobaka nzengolo zandi mu mpila ya sarila tisalu tia samuna. Mu bungu dia nti? Mu bungu ti “tinsamu tia nza yi soba tita soba,” mpe organizasio ya Nzambi yifweti yukunu na misamu mia môna.​—1 Kor. 7:31 NWT.

15. Ntia misamu mia mpasi bisamuni biakaka bitelamanaka?

¹⁵ Ntembe kâni, organizasio ya Nzambi bu yituhanaka mbangululu ya môna mu musamu wutariri ndongosolo ya Bibila peleko bu yituhanaka lutwalusu mu mitieno mia ndiatulu, mbo tutambulaka mu sarila mio. Kâ, nti tusaka mu ntangu organizasio ya Nzambi yisaka nsobolo yisobesaka misamu miakaka mia luzingu lweto? Mu tifwani, mu mivu miayôkele mbongo zazingi zabele dukaka mu bungu dia ntungulu za Nzo za Nsambululu na mu bungu dia kipa kwa nzo zo. Timvuka titwarisaka tialombele ti bimvuka biakaka biasarilaka kwa Nzo ya Nsambululu yimosi. Ntiangu bavukase bimvuka biakaka, mpe batekele Nzo za Nsambululu zakaka. Mbongo zi balundiri mbo basarilaka zo mu tunga Nzo za Nsambululu mu mbuka zitomo dinganaka Nzo za Nsambululu. Tala ti mu tizunga ti batekele Nzo ya Nsambululu peleko  ti bavukiri bimvuka bêlaka, wulendi bâ musamu wa mpasi kwe nge mu yukunu na misamu mia môna. Bisamuni biakaka bwawu bu mala bita tûkaka mu kwendaka ku tukutakanu. Mpangi zakaka zasala tisalu tia ngolo mu tunga Nzo za Nsambululu peleko mu kipaka zo, kampe mbo batiyulaka mu bungu dia nti bata kwe teke Nzo za Nsambululu bwawu bu. Kampe mbo bamonaka ti ntangu’awu na ngolo zawu za mpamba kwa zeri. Kâ, mbo batambulaka nsobolo za môna, mpe tufwefi ba sîka.

16. Bu tusarila malongi me mu Bisi-Kolose 3:23, 24 bwe malendi tu bakisila mu tatamana mu bâ mu nsayi?

¹⁶ Mbo tutatamana mu bâ mu nsayi tala ti tubambukiri ti mu bungu dia Yehova tusalaka mpe ni Yandi twarisaka organizasio’andi. (Tanga Bisi-Kolose 3:23, 24.) Mutinu Davide watuhana tifwani mu ntangu yi kahana mbongo mu bungu dia ntungulu ya Tempelo. Watâ ti: “Ngano meno nani ndiena, mpe bantu ba kanda diani banani bena, ngatu takuhana makabu ma luzolo lwa mutima ntiana mawu ma? Mu bungu ti biabiansoni kwe nge bitûkaka, mpe bi tukuheni, ni bio bitûkiri ha koko kwaku.” (1 Nta. 29:14) Mu ntangu yi tuhanaka makabu, mbo tuhanaka mpe kwe Yehova bio bitûkiri ha koko kwandi. Kâ, makabu mo mbo matomo tâka Yehova nsayi bu tuhanaka ntangu’eto, ngolo zeto, na mbongo zeto mu sala tisalu tiandi.​—2 Kor. 9:7.

17. Mu bungu dia nti fweti lembo bêla wa nôka tala ti mweni ti fweti sungika ntambi zaku?

¹⁷ Mu tatamana mu landa nzila ya mfinka yinataka ku luzingu, beto bansoni tufweti tomo landa ntambi za Yezu. (1 Pi. 2:21) Tala ti benzi ti fweti sungika ntambi zaku, kunôkandi. Tidimbu tia mbote tiena tita songela ti zololo wabâ mu lutwalusu lwa Yehova. Kuzimbakanandi ti Yehova zebi ti ka twena ba lunga ko. Buna ka ta tu lomba ko talanda tifwani tia Yezu mu mpila ya lunga.

18. Nti tufweti sa mu lungisa kani dieto?

¹⁸ Bika beto bansoni tatuleno mabanza meto mu bilumbu bita kwiza mpe tazolo mu sungika mbanzulu zeto, ndiatulu’eto na nsalulu zeto. (Bin. 4:25; Like 9:62) Tatatamaneno mu bâ ba kuluka, ‘tatatamaneno mu bâ mu nsayi, na mu tambulaka batusungika.’ (2 Kor. 13:11, NWT) Tamana sila bo, “Nzambi ya luzolo na ya tidzunu mbo kabâ [neto].” Mbo katubakisa mu bâ na nsayi mpe mbo katuhana luzingu mu nza ya môna.