1. Mungya Mateo 7:13, 14, le tudi mu lwendo mu buluji’ka?

BATWE bonso tudi mu lwendo. Kotwenda nansha kitungo kyetu i kya kukekala mu ntanda mipya ikaludikwa na Yehova na buswe. Difuku ne difuku, tuloñanga bukomo bwa kulonda dishinda ditwala ku būmi. Ino monka mwānenene’kyo Yesu, dino dishinda i dityinye kadi kyaba kimo i bikomo kwidilonda. (Tanga Mateo 7:13, 14.) Twi ba kubulwa kubwaninina, kadi i bipēla kusāsuka mu dino dishinda.​—Ngt. 6:1.

2. Le i bika byotusa kwisambila’po mu kino kishinte? (Tala ne kapango kanena’mba “ Kwityepeja Kwitukwashanga Tushinte.”)

² Shi tukimba kushala nyeke mu dino dishinda dityinye ditwala ku būmi, tufwaninwe kwitabija kushinta milangwe yetu, ngikadila ne bilongwa byetu. Mutumibwa Polo wākankamikile bene Kidishitu ba mu Kodinda bekale nyeke bantu “ba kusendululwa.” (2 Ko. 13:11) Ano madingi etutala ne batwe. Mu kino kishinte, tusa kwisambila pa muswelo ubwanya kwitukwasha Bible tushinte, ne pa muswelo ubwanya kwitukwasha balunda batame ku mushipiditu amba tushale nyeke mu dishinda dya būmi. Ne kadi tusa kwisambila’mo pa bintu bibwanya kwitulengeja tukomenwe kulonda buludiki bwitupa bulongolodi bwa Yehova. Tusa kumona muswelo ubwanya kwitukwasha kwityepeja amba tushinte mwiendelejo wetu pampikwa kujimija nsangaji ya kwingidila Yehova.

3. Le Kinenwa kya Leza kibwanya kukukwasha namani?

³ Kitatyi kyotuloñanga bukomo bwa kubandaula milangwe ne mwiivwanino wetu, tukambakanibwanga. Mutyima wetu i ñongojani, kadi ubwanya kwitulengeja tukomenwe kuyuka kwine koukokeja kwitutwala. (Yel. 17:9) I bipēla kwiongola batwe bene na “milangwe ya bubela.” (Yak. 1:22) O mwanda tufwaninwe kwingidija Kinenwa kya Leza pa kwibandaula. Kinenwa kya Leza kisokwelanga patōka mwine motwikadile  munda, “milangwe ne mifwatakanyo” idi mu mutyima wetu. (Bah. 4:12, 13) Mu buno buluji, Kinenwa kya Leza kidi pamo bwa kipimo kya Ladiyo kiyukanga mwikadile munda. Inoko tufwaninwe kwikala betyepeje pa kumwena mu madingi etupa Bible nansha etupa mikendi ya Leza.

4. Le i bika bilombola’mba Mulopwe Solo wāikele muntu wa mitatulo?

⁴ Kimfwa kya Mulopwe Solo kilombola bintu bibwanya kwitufikila shi ketudipo betyepeje. Solo wāikele na mitatulo, wākomenwa kwitabija’mba ufwaninwe kushinta milangwe ne bilongwa byandi. (Ñim. 36:1, 2; Hab. 2:4) Kino kyāmwekele patōka kitatyi kyāmulombwele Yehova bintu byaādi ufwaninwe kulonga pa kupwa kunekenya bene Amaleke. Ino Solo kākōkelepo Yehova. Kadi pākesambīle nandi mupolofeto Samwele pa uno mwanda, Solo kāitabijepo kilubo kyandi. Inoko, wākimbile kwibingija na kupēlula bipa bibi byādi bya kulupuka ku kubulwa kikōkeji, kadi wātopeka bakwabo pa kilubo kyandi. (1 Sa. 15:13-24) Solo wālongele monka kilongwa kya uno muswelo. (1 Sa. 13:10-14) I kya bulanda, mwanda wēzunzwile mu mutyima wandi. Kāshintyilepo milangwe yandi, Yehova nandi wāmutopeka ne kumupela.

5. Le i ñeni’ka yotubwanya kuboila ku kimfwa kya Solo?

⁵ Pa kuboila ñeni ku kimfwa kya Solo, i biyampe twiipangule bino bipangujo: ‘Le nkimbanga kwibingija kitatyi kyontanga madingi adi mu Kinenwa kya Leza? Le ntyepekanga bipa bibi bikalupuka ku kubulwa kikōkeji? Le ntopekanga mukwetu pa bilongwa byami?’ Shi tubalondolola ku kipangujo nansha’tu kimo amba en-en, nabya tufwaninwe kushinta milangwe ne ngikadila yetu. Shi bitupu, mutyima wetu ubwanya kwizunzula bininge, Yehova nandi uketupela twikale balunda nandi.​—Yak. 4:6.

6. Lombola kwishila kwādi kwishidile Mulopwe Solo na Mulopwe Davida.

⁶ Tutalei kwishila kwishidile Mulopwe Solo ne mpingakani wandi, Mulopwe Davida, muntu wādi usenswe “bijila bya Yehova.” (Ñim. 1:1-3) Davida wādi uyukile amba Yehova upandijanga bantu betyepeje, ino ulwanga na boba bezunzula. (2 Sa. 22:28) O mwanda Davida wālekele kijila kya Leza kishinte mulangilo wandi. Wālembele amba: “Nkatendelanga Yehova, mwine waumpa madingi. Enka ne bufuku bwine, milangwe yami ya munda ingololanga.”​—Ñim. 16:7.

7. Le i bika byotukalonga shi twi betyepeje?

⁷ Shi twi betyepeje, tukaleka Kinenwa kya Leza kyolole milangwe yetu mibi kumeso kwa kulonga kintu. Kinenwa kya Leza kikekala pamo bwa diwi ditusapwila’mba: “Dino’di dyo dishinda. Endai’mo.” Kiketudyumuna shi tubasāsuka mu dishinda, ku lundyo nansha ku lunkuso. (Isa. 30:21) Shi tuteja Yehova, tukamwena’mo mu miswelo mivule. (Isa. 48:17) Kimfwa, ketukevwanapo bumvu shi mukwetu wetulemununa. Kadi tukafwena kudi Yehova mwanda tuyukile amba witumwene bu bana baswedibwe.​—Bah. 12:7.

8. Monka mokilombwedilwe mu Yakoba 1:22-25, le i muswelo’ka otubwanya kwingidija Kinenwa kya Leza pamo bwa kiyo?

⁸ Kinenwa kya Leza kibwanya kwikala pamo bwa kiyo. (Tanga Yakoba 1:22-25.) Bavule motudi betalanga lubanga lonso mu kiyo kumeso kwa kutaluka ku njibo. Mu uno muswelo, tubwanya kumona shi kudi potusakilwa kwilongolola kumeso kwa bakwetu kwitumona. Muswelo umo onka, shi tutanga Bible difuku ne difuku, tukamona miswelo yotubwanya kushinta milangwe ne ngikadila yetu. Bantu bavule batañanga kisonekwa kya difuku lubanga ne lubanga kumeso kwa kutaluka ku njibo. Mu uno muswelo, byobya byobatanga bibakwashanga mu milangwe.  Ebiya mu difuku dyonso, bamonanga miswelo mivule ya kwingidija madingi adi mu Kinenwa kya Leza. Ne kadi, tufwaninwe kwikala na kibidiji kya kwifunda, ko kunena’mba kutanga Kinenwa kya Leza difuku ne difuku ne kulangulukila’po. Kulonga namino kukokeja kumweka bu kupēla, inoko i kintu kya mvubu kyotubwanya kulonga kya kwitukwasha tushale nyeke mu dishinda dityinye dya būmi.

9. Le mulunda nobe ubwanya kukulemununa kitatyi’ka?

⁹ Lelo kodi mushilule kwenda mu dishinda dya kukusāsukija kudi Yehova? (Ñim. 73:2, 3) Shi mulunda nobe mutame ku mushipiditu waikele na bukankamane bwa kukulemununa, le wamwivwene ne kulonda madingi andi? Shi i amo, walongele biyampe, kadi bine wafwijije’ko mulunda nobe pa kukudyumuna.​—Nki. 1:5.

10. Le ufwaninwe kulonga namani shi mulunda nobe wakulemununa?

¹⁰ Kinenwa kya Leza kituvuluja’mba: “Bilonda bikutapile mulunda i bikōkele.” (Nki. 27:6) Le bino binenwa bishintulula bika? Tulangulukilei pa kino kimfwa: Langa’po bidi shi wilaije kusambuka mu dishinda dipitakana’mo myotoka, ino telefone yobe ibakulabika. Ubeela mu dishinda pampikwa kutala koku ne koku. Ponkapo mulunda nobe wakukwata ku kuboko, wakukokela kufula kwa dishinda. Wakukwatanga bininge ku kuboko kubakupena, inoko kilongwa kyandi kya bukidibukidi kibakupandija kutyina motoka wakakutyaka. Nansha kuboko kupene byokubwanya kukusansa mafuku mavule, ino le ukafītyilwa mulunda nobe wakukwete ku kuboko? Aa! Ukamufwija’ko pa kukukwasha. Muswelo umo onka, shi mulunda nobe wakudyumuna’mba muneneno obe nansha bilongwa byobe kebikwatañenepo na misoñanya myoloke ya Leza, bibwanya kukusansa dibajinji. Inoko kokamulobela nansha kumufītyilwa pa mwanda wa madingi awakudingila. Mwanda kulonga namino i bulembakane. (Mus. 7:9) Ino fwija’ko mulunda nobe pa kwikala na bukankamane bwa kwisamba nobe.

11. Le i bika bibwanya kulengeja muntu apele madingi mayampe amudingila mulunda nandi?

¹¹ Le i bika bibwanya kulengeja muntu apele madingi mayampe amudingila mulunda nandi na buswe? I mitatulo. Bantu ba mitatulo basenswe bintu “bisangaja matwi abo.” Balamukanga “kebakitejepo bubine.” (2 Tm. 4:3, 4) Bamonanga’mba mumweno wabo ye muyampe ne amba abo ye bantu ba mvubu. Inoko, mutumibwa Polo wālembele amba: “Shi muntu ulanga’mba i muntu mwinemwine aye’ko wa bitupu, wiongolanga aye mwine.” (Ngt. 6:3) Mulopwe Solomone wāshintulwile ino myanda biyampe. Wālembele amba: “Mulanda inoko mwana wa tunangu i mupite buya mukulumpe inoko mulopwe kivila, kakidipo na ñeni mibwane ya kwivwana kidyumu.”​—Mus. 4:13.

12. Le i ñeni’ka yotuboila ku kimfwa kyāshile mutumibwa Petelo kidi mu Bene Ngalatea 2:11-14?

¹² Tulangulukilei bidi pa kimfwa kyāshile mutumibwa Petelo kitatyi kyāmulemunwine mutumibwa Polo pa bantu. (Tanga Bene Ngalatea 2:11-14.) Petelo wādi ubwanya kuloba pa byānenene Polo, na kwimanina’tu pa muswelo waānenene’byo ne pa kifuko kyaānenene’byo. Ino Petelo wādi na tunangu. Wāitabije madingi, kadi kālamīnepo Polo kīji. Inoko wāityile Polo mwenda mafuku bu “mwanetu muswedibwe.”​—2 Pe. 3:15.

13. Le i bika byotufwaninwe kuvuluka kitatyi kyotusaka kudingila muntu?

¹³ Shi umona’mba ufwaninwe kudingila mulunda nobe, le i bika byofwaninwe kuvuluka? Kumeso kwa kudingila mulunda nobe, wiipangule amba, ‘le nemwene bu “moloke kutabuka”?’ (Mus. 7:16) Muntu  moloke kutabuka utyibilanga bakwabo mambo na misoñanya ya aye mwine pa kyaba kya misoñanya ya Yehova, kadi padi kadipo na lusa. Shi ubapu kwibandaula ino ukimwene’nka bu ufwaninwe kwisamba na mulunda nobe, jingulula mwanda senene, kadi ipangula bipangujo bya kuloba tudi mu kanwa bikakwasha mulunda nobe ayuke kilubo kyandi. Byonena bifwaninwe kwimanina pa Bisonekwa, kadi vuluka’mba mulunda nobe keshintulwilangapo kodi, ino i kudi Yehova. (Loma 14:10) Ingidija tunangu tudi mu Kinenwa kya Leza, kadi kitatyi kyodingila muntu, iula lusa lwa Yesu. (Nki. 3:5; Mat. 12:20) Mwanda waka? Mwanda Yehova uketulongela bintu mu muswelo otulongela’byo bakwetu.​—Yak. 2:13.

14. Le bulongolodi bwa Leza bwitupanga bika?

¹⁴ Yehova witwendejanga mu dishinda dya būmi kupityila ku kipindi kya pano panshi kya bulongolodi bwandi, bwine bwitupanga mavideo, mabuku ne kupwila kwitukwasha batwe bonso tulonde madingi adi mu Kinenwa kya Leza. Myanda idi’mo imanine pa Bisonekwa. Kitatyi kyobakwata butyibi bwa mwa kwingidila senene mwingilo wa busapudi, Kitango Kyendeji kilombanga mushipiditu ujila. Inoko, Kitango Kyendeji kibandaulanga kitatyi ne kitatyi butyibi bwakyo pa mwa kuteakanya uno mwingilo. Mwanda waka? Mwanda “mwikadila wa ino ntanda ushintanga,” kadi bulongolodi bwa Leza bulondanga ngikadilo mipya ibwanya kwikala’ko.​—1 Ko. 7:31.

15. Le basapudi bamo bakomenwanga bika?

¹⁵ Na bubine, tulondanga bukidibukidi buludiki bwa mu Bible bobetupa mu myanda ya bufundiji nansha misoñanya ya mwa kwikadila. Ino le tuloñanga namani shi bintu byashinta bulongolodi bwa Leza bibetutenga mu būmi? Kimfwa, mu ino myaka, twalupwile lupeto luvule pa kūbaka ne kulongolola bifuko bya kutōtela’po. Ebiya Kitango Kyendeji kyakwata butyibi amba bipwilo bivule bingidije Njibo ya Bulopwe imo. Pa kushinta uno muswelo, batyangile bipwilo bimo ne kupoteja’ko Mobo a Bulopwe. Lupeto lwa ano Mobo lwakweshe ku kūbaka mobo mu bifuko mobasakilwa’o bininge. Shi udi mu kifuko mupotolojibwa mobo ne mutyangwa bipwilo, ubwanya kukomenwa kwibidila ino mpangiko mipya. Pano basapudi bamo banenwe kwenda kukapwila kulampe. Bakwabo baingile bininge pa  kūbaka nansha kulongolola Njibo ya Bulopwe, babwanya kwiipangula kine kyobapotolweja’yo. Babwanya kulanga’mba bajimije bya bitupu kitatyi kyabo ne bukomo bwabo. Inoko, betabijanga ino mpangiko mipya kadi bafwaninwe kufwijibwa’ko.

16. Le kulonda madingi adi mu Bene Kolose 3:23, 24 kuketukwasha namani twikale nyeke na nsangaji?

¹⁶ Tukekala nyeke na nsangaji shi tuvuluka’mba i Yehova otwingidila ne amba i aye wendeja bulongolodi bwandi. (Tanga Bene Kolose 3:23, 24.) Mulopwe Davida wāshile kimfwa kiyampe paāletele lupeto lwa kūbaka nalo tempelo. Wānenene amba: “Le ami nami ne ani ne bantu bami nabo i bāni amba tubwanye kulambula byamulambu bya kwilanga pamo bwa bino? Mwanda bintu byonso bitambanga kodi, kadi tubakupe byobya bitamba ku kuboko kobe.” (1 Bi. 29:14) Kitatyi kyotuleta lupeto, netu tupanga Yehova byobya bitambile ku kuboko kwandi. Nansha nabya, Yehova usangelanga kitatyi, bukomo, ne bintu byotuleta mwanda wa kukwatakanya mwingilo wasaka wingilwe.​—2 Ko. 9:7.

17. Mwanda waka kufwaninwepo kutyumukwa mutyima shi ubamone amba ufwaninwe kōlola matabula obe?

¹⁷ Pa kushala nyeke mu dishinda dityinye dya būmi, batwe bonso tufwaninwe kulonda senene mu mayo a Yesu. (1 Pe. 2:21) Shi bimweka’mba ufwaninwe kōlola matabula obe, kokatyumukwa mutyima. Bine, kino kibwanya kwikala bu kilomboji kiyampe, kilombola’mba usakanga kulonda buludiki bwa Yehova. Vuluka’mba Yehova ketusakilangapo, batwe bantu bampikwa kubwaninina, twiule kimfwa kya Yesu mu muswelo mubwaninine.

18. Le i bika byotufwaninwe kulonga pa kufikila pa kitungo kyetu?

¹⁸ Nanshi batwe bonso tutei mutyima ku būmi bwa kumeso, kadi twitabijei kushinta milangwe yetu, ngikadila ne bilongwa byetu. (Nki. 4:25; Luka 9:62) Twikalei nyeke betyepeje, “bantu ba kusangala, ba kusendululwa.” (2 Ko. 13:11) Shi tulonge namino, “Leza wa buswe ne wa ndoe ukekala [netu].” Kadi ketukafikapo’tu enka kotwenda, ino tukekala ne na nsangaji mu luno lwendo.