1. Kweseka naMateu 7:13, 14, mwomwo ika natwambila ngwetu tuli nakutambuka ungeji?

TUVOSENA tuli haungeji. Ungeji kana wakuya kukuyoya chahaya myaka yosena mukaye kakahya, muchiyulo chaYehova. Hakumbi hakumbi tweji kulinganga vyuma vyakutukafwa tutambuke ungeji kana. Oloze ngana muze ahanjikile Yesu, jila tuli nakutambukamo yapwa yakupalakanya, kaha lwola lumwe yapwa yayikalu kutambukamo. (Tangenu Mateu 7:13, 14.) Hakuwana nge katwakupukako, chapwa chachashi kuseuka mujila.—Ngale. 6:1.

2. Vyuma muka natushimutwila muchihande chino? (Talenu nawa lipwata lyakwamba ngwavo, “ Kulinyisa Nachitukafwa Twalumuneko Vyuma Vimwe Mukuyoya.”)

² Hakusaka tutwaleho kutambuka mujila yakupalakanya, twatela kwalumunangako vishinganyeka navilinga vyetu. Kaposetolo Paulu akolezezele vaka-Kulishitu muKolinde vatwaleho ‘kwitavilanga vavolole.’ (Koli. 2, 13:11) Mazu kana anahase kutukafwa nayetu. Muchihande chino, natushimutwila omwo Mbimbiliya yinahase kutukafwa twalumuneko vyuma vimwe mukuyoya chetu, nomwo masepa vakuhya kushipilitu vanahase kutukafwa tutwaleho lika kutambuka ungeji wakuya kukuyoya. Kaha natushimutwila nawa vyuma vinahase kulingisa chipwenga chachikalu kukavangiza jindongi jakufuma kuliuka lyaYehova. Natushimutwila nawa omwo kulinyisa chinahase kutukafwa twalumuneko vyuma vimwe chakuhona kuhomba omu tuli nakuzachila Yehova.

3. Uno Mazu aKalunga anahase kutukafwa ngachilihi?

³ Chapwa chachikalu kukekesa vishinganyeka vyetu nomwo tweji kwivwanga. Mwomwo ika? Mwomwo muchima wetu wapwa uka-kutangisa, kaha chinahase kutukaluhwila kutachikiza ngwetu uli nakutuhungumwisa. (Yele. 17:9) Ngocho chapwa chachashi kulitangisa etu vavene “navishinganyeka vyamakuli.” (Yako. 1:22) Shikaho twatela kuzachisanga Mazu aKalunga mangana tulikekese.  Kaha anahase kutukafwa tutachikize omwo twapwa, kulumbununa “vishinganyeka nakujina chamumuchima” wetu. (Hepe. 4:12, 13) Mazu aKalunga tunahase kuwafwanyisa kulikina vavuluka ngwavo X-ray, lize veji kupimisanga ukalu uli muvifuhwa namumishisa. Anahase kutukafwa tutachikize vishinganyeka vyetu vyakusweka. Oloze twatela kulinyisa numba tuhase kukavangiza vyuma natulinangula muMbimbiliya chipwe vize navatulweza vatemesa jaKalunga.

4. Vyuma muka vyasolola nge Mwangana Saulu alumukile nakupwa mutu wakulivwimba?

⁴ Vyuma vyasolokele kuli Mwangana Saulu vyatukafwa tutachikize ukalu unahase kwiza nge katweshi kupwa vakulinyisako. Kulivwimba chenyi chamuhonesele kwitavila ngwenyi asakiwile kwalumunako vishinganyeka vyenyi navilinga vyenyi. (Samu 36:1, 2; Hamba. 2:4) Muchima wenyi wakulivwimba wasolokele hatoma omu Yehova amulwezele vyuma atelelele kulinga hanyima yakufungulula vaAmaleke. Saulu kononokele Yehovako. Kahomu kapolofweto Samwele amuhuhumwine hachuma alingile, ikiye ketavilile ngwenyi napihisako. Oloze ahanjikile ngwenyi chuma alingile kachapihile chikumako, kaha nawa ngwenyi vatu vakiko vamushinjililile. (Samwe. 1, 15:13-24) Muchima kana ausolwele nawa shimbu kanda lwola kanelu. (Samwe. 1, 13:10-14) Chaluvinda, echelelele muchima wenyi upwenga wakulivwimba. Kolwele vishinganyeka vyenyiko, ngocho Yehova amuhanjikilile nakumukana.

5. Chishina muka tunalinangula kumujimbu waSaulu?

⁵ Hakusaka tuhone kupwa ngana mwaSaulu, twatela kulihulisa ngwetu: ‘Kachi nge ngunatange mazu akuhuhumuna muMazu aKalunga, kutala ngweji kulihakwilanga nakuhona kukavangiza mazu kana tahi? Kutala ngweji kushinganyekanga ngwami vyuma nguli nakulinga kavyapihile chikumako tahi? Kutala ngweji kuhananga mulonga mutu weka havyuma nguli nakulinga tahi?’ Kachi nge natukumbulula vihula kana ngwetu eyo, kaha twatela kwalumuna vishinganyeka vyetu navilinga vyetu. Nge chiku, kaha michima yetu yinahase kulivwimba, ngocho Yehova keshi kwitavila tupwenga tumasepa jenyiko.—Yako. 4:6.

6. Chihandwa muka chapwile hali Mwangana Saulu naMwangana Ndavichi?

⁶ Talenu chihandwa chapwile hali Mwangana Saulu naMwangana Ndavichi, uze amushishile. Ndavichi azangile “jishimbi jaYehova.” (Samu 1:1-3) Atachikijile ngwenyi Yehova eji kulwilanga vatu vakulinyisa, oloze ahunga vaka-kulivwimba. (Samwe. 2, 22:28) Ngocho etavilile jishimbi jaKalunga jolole vishinganyeka vyenyi. Asonekele ngwenyi: “Nangwalisa Yehova uze nangulweze mangana. Vishinganyeka vyami vyeji kungwololanga numba vene naufuku.”—Samu 16:7.

7. Chuma muka tunahase kulinga kachi nge natupwa vakulinyisa?

⁷ Nge twapwa tuvakulinyisa, kaha natwitavilanga Mazu aKalunga olole vyuma tuli nakushinganyeka shimbu kanda tuvilinge. Kaha nawapwa ngana mwalizu lize lili nakutulweza ngwalyo: ‘Eyi yikiko jila. Tambukangamo.’ Nawatuhuhumunanga kachi nge tuli nakuhanduka mujila nakuya kuchilyo chipwe kuchimoswe. (Isa. 30:21) Nge natwivwililanga kuli Yehova, kaha natunganyala mujijila jajivulu. (Isa. 48:17) Chakutalilaho, nachitukinga kusonyi yize yeji kwizanga mwomwo yakutuhuhumuna kumutu weka. Kaha nawa natupandama chikuma kuli Yehova mwomwo yakutachikiza ngwetu ali nakutuzakama ngana mwachisemi uze azanga mwanenyi.—Hepe. 12:7.

8. Kweseka naWaYakova 1:22-25, natuhasa ngachilihi kuzachisa Mazu aKalunga nge hichitalilo?

⁸ Mazu aKalunga anahase kupwa ngana mwachitalilo. (Tangenu WaYakova 1:22-25.) Etu vavavulu tweji kutalanga muchitalilo chimene hichimene nge tuli nakusaka kufuma hembo. Echi cheji kutukafwanga tuwahise haze hanapihi. Chochimwe nawa, nge natutanganga Mbimbiliya hakumbi hakumbi, kaha nachitukafwa tumone ngwetu twatela kwalumunako vishinganyeka vyetu. Vandumbwetu vavavulu vazanga kukekesa chisoneka chalikumbi nachimene  shimbu kanda vafume hembo. Veji kwitavilanga vyuma vanatange vyalumune vishinganyeka vyavo. Ngocho veji kufwilanga kuwana mwakuvizachishila. Kaha nawa twatela kutanganga Mbimbiliya hakumbi hakumbi nakushinganyekangaho. Numba tuhu chuma kana chinahase kusoloka nge chachashi kuchilinga, oloze chapwa chuma chachilemu chikuma chize twatela kulinga mangana tutwaleho lika kutambuka mujila yakupalakanya yakuya kukuyoya.

9. Lwola muka nahase kutwolola sepa lyetu?

⁹ Uno mwatambukaho lyehi mujila yize yapwile nakumisosolola kuli Yehova tahi? (Samu 73:2, 3) Nge sepa lyenu wakuhya kushipilitu ahamukile nakumyolola, kutala mwamwivwililile nakulinga vyuma amilwezele tahi? Nge mukiko, kaha mwalingile chuma chamwaza. Kaha nawa tunafwelela ngwetu mwamusakwililile chikuma ou sepa lyenu.—Vishi. 1:5.

10. Chuma muka mwatela kulinga nge sepa lyenu namyolola?

¹⁰ Mazu aKalunga ngwawo: “Jimbandu navakutwa kuli sepa lyove jinawahe.” (Vishi. 27:6) Uno mazu kana atalisa mulihi? Achishinganyekenu muli nakusaka kuzomboka mukwakwa, oloze munemana kukulo yajila mwomwo jiminyau jajivulu jili nakuhita. Kahomu namusaka kuvatula mukwakwa, mutu mwamitumina shinga. Ngocho namumukumbulula oku muli nakutambuka. Oloze sepa lyenu mwamikwata kulivoko nakumikokela kukulo yajila. Numba tuhu namikwate mujila yayipi nakumikolesa, olozenyi namipululula kujiminyau. Numba tuhu haze amikwatanga nahakola hamakumbi amavulu, kutala namupihilila hachuma alinganga sepa lyenu tahi? Chiku! Twafwelela ngwetu namumusakwilila hakumikafwa. Chochimwe nawa, nge sepa lyenu mwamilweza ngwenyi hanjikiso yenu chipwe vilinga vyenu vinaputuka kulimbalaka najishimbi jaKalunga jakwoloka, hakavanga munahase kwivwa kupihya. Chipwe ngocho, kanda kumuhunga chipwe kupihililako, mwomwo kulinga ngocho chapwa uheu. (Kwambu. 7:9) Mwatela kumusakwilila sepa lyenu hakuhamuka nakumyolola.

11. Chuma muka chinahase kulingisa mutu akane kumwolola kuli sepa lyenyi?

¹¹ Chuma muka chinahase kulingisa mutu akane kumwolola kuli sepa lyenyi wazangi? Kulivwimba. Vaka-kulivwimba vazanga kwivwa “vize navasaka kwivwa kumatwitwi avo.” Kavasaka ‘kwivwililila kumuchanoko.’ (Chimo. 2, 4:3, 4) Vamona ngwavo kavasakiwa kuvololako mwomwo vatwama namangana kuhambakana vakwavo. Oloze kaposetolo Paulu asonekele ngwenyi: “Kachi nge mutu nashinganyeka ngwenyi wamulemu okunyi wamokomoko, kaha ali nakulyonga ivene.” (Ngale. 6:3) Mwangana Solomone ahanjikile ngwenyi: “Kanyike wamangana wakuhutwa nawahe kuhambakana mwangana wakashinakaji wachileya, uze azeneka mangana akwivwilila vyuma navamuhuhumuna.”—Kwambu. 4:13.

12. Chuma muka tunalinangula kuli kaposetolo Petulu, kweseka naWavaka-Ngalesha 2:11-14?

¹² Achitalenu chuma alingile kaposetolo Petulu, omu vamuhuhumwine hakachi kavatu kuli kaposetolo Paulu. (Tangenu Wavaka-Ngalesha 2:11-14.) Pamo Petulu kachi apihililile hajila vamuhuhumwinyinemo nakuchihela vamuhuhumwinyinyine. Oloze kalingile ngochoko. Etavililile mazu vamuhuhumwine, kaha kalaminyinyine Paulu kokoko. Mukuhita chalwola amuvulukile ngwenyi “ndumbwetu twazanga.”—Petu. 2, 3:15.

13. Vishina muka twatela kwanukanga nge tuli nakusaka kwolola mukwetu?

¹³ Vyuma muka mwatela kuvangila kushinganyekaho, kachi nge munamono ngwenu sepa lyenu ali nakusakiwa kumwolola? Shimbu kanda mumwolole, lihulisenu ngwenu, “Kutala nguli nakulisolola kupwa ‘nguwakwoloka chikuma’ tahi?” (Kwambu. 7:16) Mutu uze alimona kupwa wakwoloka chikuma, apwa muka-kuhana vakwavo milonga. Kaha eji kulinganga ngocho pamo mwomwo yakuhona kupwa muka-kutetela, kaha nawa kweseka nomwo munayi vishinganyeka vyenyi, keshi hakukavangiza jindongi  jaYehovako. Kachi nge munalikekesa lyehi nakumona ngwenu chakutamo kuhuhumuna sepa lyenu, mwatela jino kuwana ukalu wenyi nakuzachisa vihula vize navimukafwa amone ngwenyi chikupu vene alimbenjanga. Vyuma namuhanjika vyatela kufuma muVisoneka. Kaha mwatela kwanuka ngwenu kamwatwama nalisesa lyakumusopesako, oloze mukafwenu amone omwo Yehova amona vyuma ali nakulinga. (Loma 14:10) Pendaminenunga haMazu aKalunga, kaha nawa nge muli nakuhuhumuna mutu, mwatela kulondezeza muchima waYesu wakutetela. (Vishi. 3:5; Mateu 12:20) Mwomwo ika? Mwomwo nge katweshi kutetela vakwetuko, naYehova keshi kukatutetelako.—Yako. 2:13.

14. Liuka lyaKalunga lyeji kutulingilanga vyuma muka?

¹⁴ Yehova eji kututwaminyinanga mujila yakuyoya, kuzachisa chihanda chahamavu chaliuka lyenyi. Eji kutuhananga jivindiyo, namikanda, nakutuwahishila kukunguluka. Vyuma kana vyeji kutukafwanga tukavangizenga jindongi jamuMazu enyi, kaha nawa vyosena vyapendamina haMbimbiliya. Vandumbwetu vamuLizavu lyaKutwaminyina veji kupendaminanga hashipilitu yajila kachi nge vali nakusaka kuwana jijila jakutukafwa tutesemo mulimo wakwambulula. Kaha nawa veji kuhitulukanga muvyuma vanalikase mangana vamone numba nge vali nakusakiwa kwalumunako vimwe. Mwomwo ika? Mwomwo “vyuma vili nakulingiwa mukaye kano vili nakwalumuka,” ngocho liuka lyaKalunga lyeji kwalumunangako vyuma mangana tutesemo kanawa mulimo wetu.—Koli. 1, 7:31.

15. Ukalu muka vanamononga vaka-kwambulula vamwe?

¹⁵ Nge liuka lyaKalunga linalumbununa muchano umwe wamuMbimbiliya mujila yayihya, chipwe linatulweze jindongi jimwe jakutalisa kuchiyoyelo chetu, kaha tweji kwitavilanga vyuma kana nakuvikavangiza. Jino tweji kulinganga ngachilihi kachi nge liuka lyaKalunga linalumunako vyuma vimwe vize vinakwate hakuyoya chetu? Chakutalilaho, mumyaka yakalinwomu liuka linazachisanga jimbongo jajivulu hakutunga nakuwahisa vihela vyetu vyakulemesela Kalunga. Ngocho Lizavu lyaKutwaminyina lyahanjikile ngwalyo Zuvo yaWangana yimwe vatela kuyizachisa kuvikungulwilo vyavivulu. Echi chikiko chinalingisa vikungulwilo vyavivulu vavifutule, kaha jiZuvo jaWangana jimwe vanajilanjisa. Kaha jimbongo veji kulamanga veji kujizachisanga kukutunga jizuvo jakulemesela Kalunga kuvihela kuze kaveshi najoko. Chinahase kumikaluhwila kukavangiza vyuma nalikasa liuka, kachi nge mwatwama kuchihela kuze vali nakulanjisa jizuvo  jakulemesela nakufutula vikungulwilo. Echi chinalingisa vaka-kwambulula vamwe vatambukenga jitunda jajisuku hakuya nakukunguluka. Kaha nawa vakwavo vaze veji kwazananga hakutunga jiZuvo jaWangana veji kwivwanga kupihya hakumona vali nakujilanjisa. Vanahase kushinganyeka ngwavo venyekele lwola lwavo nangolo javo. Chipwe ngocho veji kwitavilanga echi kwalumuka chachihya, ngocho twatela kuvasakwilila.

16. Uno kuzachisa mazu ahali Wavaka-Kolose 3:23, 24 nachitukafwa ngachilihi tupwenga vakuwahilila?

¹⁶ Natutwalaho lika kupwa vakuwahilila nge natwanukanga ngwetu tuli nakuzachila Yehova, kaha nawa ikiye ali nakutwaminyina liuka lyenyi. (Tangenu Wavaka-Kolose 3:23, 24.) Mwangana Ndavichi atuhana chakutalilaho chamwaza omu ahanyine jimbongo jakutungisa tembele. Ambile ngwenyi: “Ami yami iyaze, vatu jami nawa vakiko veyaze numba tukuhane mawana awa akulisakila? Vyuma vyosena vyafuma kuli ove, ngocho tunakuhane vyuma vize vyafuma kulivoko lyove.” (Miji. 1, 29:14) Nge natuhana mawana, kaha nayetu tuli nakuhana Yehova vyuma vize vyafuma kulivoko lyenyi. Chipwe ngocho, Yehova eji kuwahililanga chikuma kachi nge natuzachisa lwola lwetu, nangolo jetu, navikumba vyetu hakukundwiza mulimo wenyi.—Koli. 2, 9:7.

17. Mwomwo ika kamwatela kulitwamina kwalumunangako vyuma vimwe mukuyoya chenuko?

¹⁷ Hakusaka tutambuke mujila yakupalakanya yakuya kukuyoya, twatela kukavangizanga kanawa mujitambo jaYesu. (Petu. 1, 2:21) Kanda kulitwamina kwalumunako vyuma vimwe mukuyoya chenuko, kachi nge chili nakusakiwa kulinga ngocho. Nge namwalumunangako vyuma vimwe mukuyoya chenu, kaha namusolola ngwenu mwazanga kukavangiza jindongi jaYehova. Anukenu ngwenu Yehova atachikiza ngwenyi katwakupukako, ngocho katweshi kuhasa kukavangiza mujitambo jaYesu mujila yakukupukako.

18. Vyuma muka twatela kufwila kulinga omu tuli mujila yakuya kukuyoya chahaya myaka yosena?

¹⁸ Tutwalenuho lika kushishika kulutwe nakwalumunangako lika vishinganyeka vyetu navilinga vyetu. (Vishi. 4:25; Luka 9:62) Tupwenunga vakulinyisa, ‘nakuwahililanga lika, nakwitavila vatwololenga.’ (Koli. 2, 13:11) Nge natulinga ngocho, “kaha Kalunga wazangi wakuunda, mwapwanga [nayetu].” Ngocho natuwahililanga omu tuli nakutambuka ungeji wetu, nakukapwa nakuyoya chahaya myaka yosena mukaye kakahya.