1. Dapre Matie 7:13, 14, kifer nou kapav konpar lavi enn Kretien ar enn vwayaz?

NOU kapav konpar lavi enn Kretien ar enn vwayaz. Nou destinasion, ouswa nou lobzektif, se pou rant dan lemond nouvo ki pou dirize par Zeova, nou Bondie ki ena boukou lamour. Sak zour, nou fer boukou zefor pou mars lor sa semin ki amenn ver lavi la. Me parey kouma Zezi ti dir, sa semin-la li tipti ek parfwa li kapav difisil pou nou swiv li. (Lir Matie 7:13, 14, NW. *) Ek akoz nou inparfe, li fasil pou nou elwagn nou ar sa semin-la.​—Gal. 6:1.

2. Ki nou pou examine dan sa lartik-la? (Get lankadre “ Limilite Ed Nou pou Fer Bann Sanzman.”)

² Si nou anvi res lor semin ki amenn ver lavi, nou bizin dispoze pou sanz nou fason panse, nou latitid, ek nou bann aksion. Lapot Pol ti ankouraz bann Kretien ki ti res Korint pou kontign “les zot redrese.” (2 Kor. 13:11, NW) Sa konsey-la aplik ar nou osi azordi. Dan sa lartik-la, nou pou examine kouma Labib kapav ed nou pou fer bann sanzman, ek kouma bann Kretien ki ena matirite kapav ed nou pou res lor semin ki amenn ver lavi. Nou pou osi examine kan eski nou kapav trouv sa difisil pou swiv bann instriksion ki nou gagne ar lorganizasion Zeova. Nou pou aprann osi kouma limilite kapav ed nou pou fer bann sanzman, san ki nou perdi nou lazwa dan nou servis pou Zeova.

3. Kouma Parol Bondie kapav ed twa?

³ Li pa fasil pou nou examinn nou bann panse ek nou  bann santiman. Kifer? Parski nou leker tret, ek nou pa touletan kone si li pe pous nou pou azir dan enn bon fason. (Zer. 17:9) Li fasil pou nou anbet noumem ar bann “fos rezonnman.” (Zak 1:22, NW) Akoz sa, nou bizin servi Parol Bondie pou examinn noumem. Labib kapav revel nou seki nou ete dan fon noumem, setadir “bann panse ek bann lintansion” ki ena dan nou leker. (Ebre 4:12, 13, NW) Dan enn sertenn fason, Labib li koumadir enn masinn X-ray. Li ed nou pou trouve kouma nou ete andan. Me pou ki nou kapav met an pratik bann konsey ki nou gagne dan Labib ouswa ar bann dimounn ki Zeova servi, nou bizin ena limilite.

4. Ki kitsoz montre ki Lerwa Sail ti vinn orgeye?

⁴ Lexanp Lerwa Sail montre nou seki kapav arive kan nou pena limilite. Sail ti vinn telman fier ki li pa ti rekonet, mem anver limem, ki li ti bizin sanz so fason panse ek so bann aksion. (Ps. 36:1, 2; Abak. 2:4) Par exanp, kan Zeova ti dir Sail seki li bizin fer apre ki li gagn laviktwar lor bann Amalekit, Sail pa ti obeir Zeova. Ek kan profet Samiel ti vinn koz avek li, li pa ti rekonet so erer. Okontrer, li ti dir ki seki li ti fer pa ti sa kantite grav-la, ek ki se lepep ki ti fors li pou fer sa. (1 Sam. 15:13-24) Inpe avan, Sail ti deza ena sa latitid-la. (1 Sam. 13:10-14) Malerezman, Sail ti les so leker vinn orgeye. Zeova ti koriz li ek rezet li, parski li pa ti sanz so fason panse.

5. Ki nou kapav aprann ar lexanp Sail?

⁵ Nou pa anvi vinn kouma Sail. Alor, nou bizin poz noumem sa bann kestion-la: ‘Kan mo gagn enn konsey ki sorti dan Labib, eski mo rod enn pretext pou pa met li an pratik? Eski mo panse ki seki mo pe fer li pa sa kantite grav-la? Kan mo fer enn erer, eski mo met tor lor lezot?’ Si nou reponn wi pou enn parmi sa bann kestion-la, alor nou bizin sanz nou fason panse ek nou latitid. Sinon, nou leker kapav vinn orgeye ek nou pou perdi nou lamitie avek Zeova.​—Zak 4:6.

6. Ki diferans ti ena ant Lerwa Sail ek Lerwa David?

⁶ Anou get diferans ki ti ena ant Lerwa Sail ek Lerwa David. David ti enn kikenn ki ti kontan ‘lalwa Zeova.’ (Ps. 1:1-3) David ti kone ki Zeova sap bann dimounn ki ena limilite, me Li kont bann ki ena lorgey. (2 Sam. 22:28) Alor, David ti les lalwa Zeova sanz so fason panse. Li ti ekrir: “Mo loue LESEGNER parski li konsey mwa; mem aswar mo leker averti mwa.”​—Ps. 16:7.

7. Ki nou pou fer si nou ena limilite?

⁷ Si nou ena limilite, nou pou les Parol Bondie sanz nou fason panse avan ki nou fer bann move aksion. Parol Bondie pou koumadir enn lavwa ki pe dir nou: “Ala semin-la. Mars ladan.” Li pou averti nou si nou pe koumans fer enn move kitsoz. (Iza. 30:21) Kan nou ekout Zeova, nou pou gagn boukou benediksion. (Iza. 48:17) Par exanp, nou pa pou anbarase parski enn lot dimounn pe bizin koriz nou. Anplis, nou pou vinn pli pros ar Zeova, parski nou kone ki Li gagn nou traka, parey kouma enn papa ki kontan so zanfan.​—Ebre 12:7.

8. Dapre Zak 1:22-25, kouma nou kapav servi Parol Bondie kouma enn laglas?

⁸ Nou kapav servi Parol Bondie kouma enn laglas. (Lir Zak 1:22-25.) Normalman, nou get nou dan laglas avan ki nou sorti kot nou. Lerla, nou pou trouve si nou bizin sanz sertin kitsoz dan nou laparans avan ki lezot trouv nou. Dan mem fason, kan nou lir Labib toulezour, nou trouve kouma nou kapav sanz nou  fason panse ek nou latitid. Boukou dimounn kontan lir zot brosir Anou Examinn Labib Toulezour toule gramatin avan ki zot kit lakaz. Ek zot les seki zot lir inflians zot fason panse. Lerla, pandan lazourne, zot met an pratik bann konsey ki zot finn aprann dan Parol Bondie. Anplis, nou bizin osi etidie ek medit lor Parol Bondie toulezour. Kitfwa sa paret sinp pou fer, me se enn parmi bann kitsoz pli inportan ki pou ed nou pou res lor semin lavi.

9. Kan eski enn kamarad kitfwa pou bizin donn twa enn konsey?

⁹ Eski to’nn deza fer enn kitsoz ki ti pe gat to relasion avek Zeova? (Ps. 73:2, 3) Si enn kamarad ki ena matirite finn gagn kouraz pou donn twa enn konsey, eski to’nn ekout li ek to’nn met an pratik so konsey? Si to’nn fer sa, to’nn azir dan enn bon fason, ek pena dout ki to rekonesan ki to kamarad finn averti twa.​—Prov. 1:5.

10. Kouma to pou reazir si enn kamarad donn twa bann konsey?

¹⁰ Labib dir: “Mem si repros enn kamarad li blesan, sa prouv so fidelite.” (Prov. 27:6) Ki sa verse-la pe rod dir? Anou pran enn lexanp: Fer koumadir to pe atann pou travers enn semin kot ena boukou sirkilasion ek to portab koumans sone. Lerla, san ki to pran kont, to koumans traverse. Dan sa ler-la, to kamarad ris to lebra pou fer twa revinn lor trotwar. Li’nn ris twa telman for ki li’nn fer twa dimal. Me si li pa ti fer sa, to ti kapav tap avek enn loto. Mem si sa dimal-la inn fer twa soufer pandan plizir zour, eski to pou ankoler avek to kamarad parski li’nn ris twa? Non! Okontrer, to pou rekonesan ki li’nn ed twa. Dan mem fason, si enn kamarad donn twa bann konsey parski seki to’nn dir ouswa seki to’nn fer, li pa an-akor avek bann prinsip Bondie, kitfwa o-koumansman sa kapav fer twa dimal. Me fode pa to ankoler ouswa ofanse. Li pou bien bet si to azir koumsa! (Ekle. 7:9) Okontrer, to bizin ena rekonesans ki to kamarad finn ena kouraz pou donn twa bann konsey.

11. Ki kitsoz kapav fer enn kikenn rezet konsey enn bon kamarad?

¹¹ Ki kitsoz kapav fer enn kikenn rezet konsey enn bon kamarad? Lorgey. Bann dimounn ki ena lorgey kontan kan lezot “met dan zot zorey seki zot anvi tande.” Zot “tourn ledo ar laverite.” (2 Tim. 4:3, 4) Zot panse ki zot pa bizin konsey, parski zot panse ki zot pli malin ouswa pli inportan ki lezot. Selman, lapot Pol ti ekrir: “Si kikenn panse ki li enn gran dimoun alor ki li nanye ditou, li pe anbet limem.” (Gal. 6:3) Lerwa Salomon ti explik sa dan enn bon fason. Li ti dir: “Vomie enn zanfan ki pov me ki ena sazes, ki enn vie lerwa ki bet ek ki nepli ena ase bon sans pou ekout bann konsey.”​—Ekle. 4:13.

12. Kouma Pier ti reazir kan Pol ti donn li enn konsey? (Galat 2:11-14)

¹² Reflesi lor seki Pier ti fer kan Pol ti koriz li devan lezot. (Lir Galat 2:11-14.) Pier ti kapav gard Pol dan leker, akoz fason ki Pol ti koz ar li ek osi parski li ti fer sa devan lezot. Me Pier ti ena sazes. Li ti aksepte konsey-la, ek li pa ti ankoler ar Pol ek kontign pans lor la. Okontrer, kan plitar Pier ti koz lor Pol, li ti apel li “nou frer ki nou bien kontan.”​—2 Pier 3:15, NW.

13. Lor ki kitsoz nou bizin reflesi avan ki nou donn enn kikenn enn konsey?

¹³ Lor ki kitsoz nou bizin reflesi avan ki nou donn enn kikenn enn konsey? Avan ki to koz avek to kamarad, to bizin demann  tomem, ‘Eski mo pa inpe “tro zis”?’ (Ekle. 7:16) Enn kikenn ki tro zis, li pa ziz lezot dapre bann prinsip Zeova, me dapre so bann prop prinsip, ek kitfwa li inpe dir avek lezot. Si apre ki to’nn examinn tomem, to ankor panse ki to bizin donn to kamarad enn konsey, koz lor problem-la avek li ek servi bann kestion pou ed li konpran ki erer li’nn fer. To bizin fer sir ki seki to dir li baze lor Labib, ek rapel ki se pa ar twa ki to kamarad bizin rann bann kont, me ar Zeova. (Rom. 14:10) Kont lor sazes ki ena dan Parol Bondie, ek kan to konsey enn kikenn, imit konpasion ki Zezi ti ena. (Prov. 3:5; Mat. 12:20) Kifer? Parski Zeova pou tret twa dan mem fason ki to tret lezot.​—Zak 2:13.

14. Ki kitsoz lorganizasion Bondie donn nou?

¹⁴ Zeova gid nou lor semin ki amenn ver lavi gras-a parti so lorganizasion ki lor later. Sa lorganizasion-la donn nou bann video, bann piblikasion, ek bann renion ki ed nou pou aplik bann konsey ki ena dan Parol Bondie. Lansegnman ki li donn nou baze lor Labib. Kan bann frer dan Komite Santral pran bann desizion konsernan nou laktivite predikasion, zot kont lor lespri sin. Me kanmem sa, Komite Santral souvan reflesi lor bann desizion ki zot inn pran pou kone si zot bizin fer bann sanzman. Kifer? Parski sa lemond-la pe sanze ek lorganizasion Bondie bizin adapte li ar sa bann sanzman-la.​—1 Kor. 7:31.

15. Ar ki sanzman sertin frer ek ser inn bizin adapte?

¹⁵ Kan lorganizasion Bondie donn nou enn nouvo lexplikasion lor enn lansegnman Biblik, ouswa donn nou bann konsey lor bann prinsip moral, nou aksepte li deswit ek nou met li an pratik. Me kouma nou reazir kan lorganizasion pran bann desizion ki ena enn lefe lor bann lezot domenn nou lavi? Par exanp, sa bann dernie lane-la, sa kout pli ser pou konstrir ek fer mintenans bann Lasal Renion. Alor, Komite Santral inn pran desizion pou ki plizir lasanble servi mem Lasal pou fer renion. Se akoz sa ki plizir lasanble finn zwenn ansam, ek ki finn vann sertin Lasal Renion. Avek sa larzan-la, lorganizasion inn ranz bann Lasal Renion dan bann landrwa kot ti vremem bizin. Si to res dan enn landrwa kot finn vann bann Lasal  Renion ek kot inn fer plizir lasanble zwenn ansam, kitfwa to trouv sa difisil pou adapte ar sa sanzman-la. Asterla, sertin proklamater bizin vwayaz pli lontan pou asiste renion. Ena lezot osi ki’nn travay bien dir pou konstrir ek fer mintenans sa bann lasal-la, ek zot pa konpran kifer inn bizin vann sa bann lasal-la. Kitfwa zot panse ki zot inn gaspiy zot letan ek ki zot zefor ti dan vid. Me kanmem sa, zot inn aksepte sa sanzman-la ek nou felisit zot pou sa.

16. Kouma konsey ki trouv dan Kolosien 3:23, 24 kapav ed nou pou gard nou lazwa?

¹⁶ Nou pou kontign gard nou lazwa si nou rapel ki tou seki nou pe fer, se pou Zeova ek ki se Li ki pe diriz so lorganizasion. (Lir Kolosien 3:23, 24.) Lerwa David finn les nou enn bon lexanp kan li ti fer bann donasion pou konstrir tanp. Li ti dir: “Ki mo ete ek ki mo pep ete, pou ki nou kapav reisi fer bann don volonter koumsa? Parski tou kitsoz sorti kot twa, ek seki nou finn donn twa sorti dan to lame mem.” (1 Kro. 29:14) Nou osi, kan nou fer bann don, nou pe donn Zeova seki Limem Li’nn donn nou. Me kanmem sa, Zeova bien kontan kan nou donn Li nou letan, nou lenerzi, ek nou larzan pou nou fer so travay.​—2 Kor. 9:7.

17. Kifer fode pa nou dekouraze si nou ena bann sanzman pou fer?

¹⁷ Pou ki nou res lor semin ki tipti ek ki amenn ver lavi, nou tou nou bizin swiv lexanp Zezi. (1 Pier 2:21) Si to panse ki to bizin fer bann sanzman dan to fason panse ek azir, pa dekouraze. Kan to rekonet ki to ena bann sanzman pou fer, sa montre ki to anvi swiv bann instriksion Zeova. Pa bliye ki Zeova kone ki nou inparfe. Alor, Li pa atann ki nou swiv lexanp Zezi dan enn fason parfe.

18. Ki nou bizin fer pou nou ariv dan nou destinasion?

¹⁸ Anou res konsantre lor lavenir ek dispoze pou sanz nou fason panse, nou latitid, ek nou bann aksion. (Prov. 4:25; Lik 9:62) Anou kontign ena limilite, “kontign ena lazwa, kontign les [nou] redrese.” (2 Kor. 13:11, NW) Si nou fer sa, “Bondie lamour ek lape pou avek [nou].” Lerla, nou pa pou zis ariv dan nou destinasion, me nou pou osi apresie sa vwayaz-la.