1. Nda̱a̱ táki̱ʼva káchi Mateo 7:13, 14, ¿nda̱chun káʼa̱nyó ña̱ nda̱a̱ táki̱ʼva íyo na̱ ku̱a̱ʼa̱n iin yichi̱ saá íyo miíyó na̱ ndásakáʼnu Ndióxi̱?

MIÍYÓ na̱ ndásakáʼnu Ndióxi̱ nda̱a̱ táki̱ʼva íyo na̱ ku̱a̱ʼa̱n iin yichi̱ saá íyoyó. Chi nu̱ú kúni̱yó xa̱a̱yó kúú ñuyǐví xa̱á nu̱ú kaʼndachíñu Ndióxi̱yó Jehová. Ndiʼi ki̱vi̱ chíka̱a̱yó ndee̱ ña̱ ku̱ʼu̱nyó yichi̱ ña̱ taxi ña̱ kutakuyó. Soo, nda̱a̱ táki̱ʼva ni̱ka̱ʼa̱n ta̱ Jesús iin yichi̱ táñu kúúña, ña̱kán sava yichi̱ íxayo̱ʼvi̱ña xíʼinyó ña̱ ku̱ʼu̱nyó nu̱úña (kaʼvi Mateo 7:13, 14). * Xa̱ʼa̱ ña̱ kúúyó na̱ yiví ku̱a̱chi kivi kamaní sandákooyó yichi̱ yóʼo (Gál. 6:1).

2. ¿Ndáaña ka̱ʼa̱nyó xa̱ʼa̱ nu̱ú artículo yóʼo? (Koto recuadro “ Ña̱ vitá koo iniyó chíndeétáʼanña xíʼinyó ña̱ nasamayó ña̱ kéʼéyó”).

² Ña̱ va̱ʼa ndakundeéyó ku̱ʼu̱nyó chí yichi̱ ña̱ táñu ña̱ taxi ña̱ kutakuyó xíniñúʼu kandíxayó nasamayó ña̱ ndákanixi̱níyó, ña̱ kéʼéyó xíʼin ki̱ʼva ña̱ íyoyó. Xa̱ʼa̱ ña̱yóʼo kúú ña̱ ni̱ka̱ʼa̱n ta̱ apóstol Pablo xíʼin na̱ cristiano na̱ ni̱xi̱yo ñuu Corinto ña̱ ná ndakundeéna nasamana ña̱ kéʼéna (2 Cor. 13:11). Ta nda̱a̱ tiempo vitin kivi kundiku̱nyó consejo yóʼo. Nu̱ú artículo yóʼo kotoyó ndáa ki̱ʼva kivi chindeétáʼan ña̱ Biblia xíʼinyó ña̱ nasamayó ña̱ kéʼéyó, ta saátu ndáa ki̱ʼva kivi chindeétáʼan na̱ migoyó na̱ viíní káchíñu nu̱ú Ndióxi̱ xíʼinyó ña̱ ndakundeéyó ku̱ʼu̱nyó yichi̱ ña̱ taxi ña̱ kutakuyó. Ta kotoyó ama kúú ña̱ kivi ixayo̱ʼvi̱ña xíʼinyó ña̱ kundiku̱nyó ña̱ káʼa̱n na̱ ñuu Ndióxi̱. Ta ka̱ʼa̱ntuyó nda̱chun ndáyáʼviní vitá koo iniyó tá kúni̱yó nasamayó ña̱ kéʼéyó, tasaá kivi kusi̱í-iniyó kachíñuyó nu̱ú Jehová.

3. ¿Ndáa ki̱ʼva chíndeétáʼan tu̱ʼun Ndióxi̱ xíʼinyó?

³ Íxayo̱ʼvi̱ña xíʼinyó kunda̱a̱-iniyó ndáaña kúú ña̱ ndákanixi̱níyó á ña̱ ndóʼoyó. ¿Nda̱chun? Saáchi níma̱yó kivi sandáʼviña miíyó, ña̱kán íxayo̱ʼvi̱ña xíʼinyó ña̱ kunda̱a̱-iniyó ndáaña kivi xa̱a̱yó  keʼéyó (Jer. 17:9). Ta saátu sándaʼviyó miíyó xíʼin ña̱ va̱ása va̱ʼa ndákanixi̱níyó (Sant. 1:22). Xa̱ʼa̱ ña̱yóʼo ndáyáʼviní kuniñúʼuyó Biblia ña̱ va̱ʼa kotoyó ndáa ki̱ʼva íyoyó. Tu̱ʼun Ndióxi̱ chíndeétáʼanña xíʼinyó ña̱ kunda̱a̱-iniyó ndáaña kúú ña̱ ndákanixi̱níyó xíʼin ña̱ kúni̱yó keʼéyó ña̱ íyo se̱ʼé nda̱a̱ níma̱yó (Heb. 4:12, 13). Tu̱ʼun Ndióxi̱ íyoña nda̱a̱ táki̱ʼva íyo iin aparato tú xíniñúʼu na̱ médico ña̱ va̱ʼa kotona ini na̱ yiví, chíndeétáʼanña xíʼinyó ña̱ kotoyó ndáa ki̱ʼva íyoyó. Ña̱kán xíniñúʼu vitá koo iniyó tá kúni̱yó ndakiʼinyó ña̱ va̱ʼa xa̱ʼa̱ consejo ña̱ va̱xi nu̱ú Biblia á ña̱ táxi na̱ ñuu Ndióxi̱ ndaʼa̱yó.

4. ¿Nda̱chun va̱ʼa kúnda̱a̱-iniyó ña̱ ni̱nuní xi̱kuni ta̱ rey Saúl?

⁴ Ña̱ ndo̱ʼo ta̱ rey Saúl náʼa̱ña ndáaña kivi kundoʼoyó tá va̱ása vitá íyo iniyó. Xa̱ʼa̱ ña̱ ni̱nuní xi̱kunira va̱ása níndakunira ña̱ xíniñúʼu nasamara ña̱ ndákanixi̱níra xíʼin ña̱ kéʼéra (Sal. 36:1, 2; Hab. 2:4). Ni̱na̱ʼa̱ra ña̱yóʼo tá ni̱ka̱ʼa̱n káxi Jehová xíʼinra ndáaña kúú ña̱ xíniñúʼu keʼéra tá ná sandíʼi-xa̱ʼa̱ra na̱ ñuu Amalec, soo va̱ása níkeʼéraña. Ta tá ni̱ka̱ʼa̱n ta̱ profeta Samuel xíʼinra xa̱ʼa̱ ña̱ va̱ása va̱ʼa ke̱ʼéra, va̱ása níndakunira ku̱a̱chira. Chi ña̱ ke̱ʼéra kúú ña̱ ni̱ka̱ʼa̱nra ña̱ va̱ása ndeéví ña̱ ke̱ʼéra, ta chi̱ka̱a̱ra ku̱a̱chi inkana xa̱ʼa̱ ña̱yóʼo (1 Sam. 15:13-24). Ta su̱ví ña̱ yichi̱ nu̱ú kúú ña̱ ke̱ʼéra ña̱yóʼo (1 Sam. 13:10-14). Ta̱ Saúl ni̱nuní xi̱kunira ta va̱ása nínasamara ña̱ ndákanixi̱níra. Xa̱ʼa̱ ña̱yóʼo, ni̱ka̱ʼa̱n Jehová xíʼinra ña̱ va̱ása va̱ʼa íyo ña̱ ke̱ʼéra, ta va̱ása nítaxikara koora rey.

5. ¿Ndáaña sákuaʼayó xíʼin ña̱ ndo̱ʼo ta̱ Saúl?

⁵ Ña̱ va̱ʼa sakuaʼayó xíʼin ña̱ ndo̱ʼo ta̱ Saúl, ná ndakanixi̱níyó xa̱ʼa̱ ña̱yóʼo: “¿Á ndákanixi̱níi̱ ña̱ va̱ása xíniñúʼu kundiku̱i̱n consejo ña̱ táxi Biblia? ¿Á ndákanixi̱níi̱ ña̱ va̱ása ndeéví ña̱ kéʼíi̱? ¿Á chíka̱i̱ ku̱a̱chi inkana xa̱ʼa̱ ña̱ kéʼíi̱?”. Tá kéʼéyó sava ña̱yóʼo xíniñúʼu nasamayó ña̱ ndákanixi̱níyó xíʼin ki̱ʼva ña̱ íyoyó. Chi tá ná va̱ása keʼéyó ña̱yóʼo kivi xa̱a̱yó ni̱nuní kuniyó, ta̱ va̱ása kandíxaka Jehová koora migoyó (Sant. 4:6).

6. ¿Ndáa ki̱ʼva síín ni̱xi̱yo ta̱ David nu̱ú ta̱ Saúl?

⁶ Vitin ná kotoyó ndáa ki̱ʼva síín ni̱xi̱yo ta̱ rey David nu̱ú ta̱ rey Saúl, ta̱ David xi̱kuʼvi̱ní-inira xi̱xinira ley Jehová (Sal. 1:1-3). Ta̱yóʼo xi̱kunda̱a̱-inira ña̱ sáka̱ku Jehová na̱ vitá-ini soo kúxíkara nu̱ú na̱ ni̱nu kúni (2 Sam. 22:28). Xa̱ʼa̱ ña̱yóʼo ta̱xira ná nasama ley Ndióxi̱ ña̱ ndákanixi̱níra. Ta ka̱ʼyíra ña̱yóʼo: “Ndasakáʼnui̱ Jehová ta̱ táxi consejo ndaʼíi̱. Ta nda̱a̱ ñuú ndákanixi̱níi̱ xa̱ʼa̱ ña̱ xíniñúʼu nasamai̱” (Sal. 16:7).

7. ¿Ndáaña keʼéyó tá vitá íyo iniyó?

⁷ Tá vitá íyo iniyó taxiyó ña̱ ná nasama Biblia ña̱ va̱ása va̱ʼa ndákanixi̱níyó, tasaá va̱ása xa̱a̱yó keʼéyó ña̱ va̱ása va̱ʼa. Ta ña̱yóʼo ka̱ʼa̱n tu̱ʼun Ndióxi̱ xíʼinyó: “Ña̱yóʼo kúú yichi̱. Nu̱ú ña̱yóʼo ku̱ʼún”. Ka̱ʼa̱nña xíʼinyó tá xa̱a̱ ku̱a̱ʼa̱n sándakooyó yichi̱ yóʼo ta ki̱xáʼayó ku̱a̱ʼa̱nyó chí ndaʼa̱ kúaʼa á chí ndaʼa̱ yítin (Is. 30:21). Tá ná kuniso̱ʼoyó ña̱ káʼa̱n Jehová xíʼinyó ku̱a̱ʼání ña̱ va̱ʼa ndakiʼinyó (Is. 48:17). Tá kúú, va̱ása kukaʼan nu̱úyó xa̱ʼa̱ ña̱ ka̱ʼa̱nna xíʼinyó ndáaña kúú ña̱ va̱ása va̱ʼa kéʼéyó. Ta yatinka kooyó xíʼin Jehová saáchi kunda̱a̱-iniyó ña̱ ndíʼi̱-inira xa̱ʼa̱yó chi kúúyó se̱ʼera na̱ kúni̱níra (Heb. 12:7).

8. Nda̱a̱ táki̱ʼva káchi Santiago 1:22-25, ¿nda̱chun káʼa̱nyó ña̱ nda̱a̱ táki̱ʼva íyo iin espejo saá íyo tu̱ʼun Ndióxi̱?

⁸ Nda̱a̱ táki̱ʼva íyo iin espejo saá íyo tu̱ʼun Ndióxi̱ nu̱ú miíyó (kaʼvi Santiago 1:22-25). * Ndiʼi xi̱ta̱a̱n ndiʼiyó xítoyó miíyó nu̱ú espejo tá kúma̱níka kitayó ku̱ʼu̱nyó. Tasaá kíʼinyó kuenta á xíniñúʼu ndasaviíyó miíyó. Ki̱ʼva saá íyo ña̱ káʼviyó Biblia ndiʼi ki̱vi̱, chi xítoyó á xíniñúʼu nasamayó ki̱ʼva ña̱ íyoyó á ña̱ ndákanixi̱níyó. Ku̱a̱ʼání na̱ hermano káʼvina texto ña̱ káʼviyó ndiʼi ki̱vi̱ tá kúma̱níka kitana veʼena, chi saá kivi ndakanixi̱nína xa̱ʼa̱ ña̱yóʼo. Tasaá ndúkúna ndáa ki̱ʼva keʼéna ña̱  ka̱ʼvina. Ta saátu xíniñúʼu kaʼviyó Biblia ndiʼi ki̱vi̱ ta ndakanixi̱níyó xa̱ʼa̱ ña̱ káʼviyó. Sana kivi ndakanixi̱níyó ña̱ va̱ása ndáyáʼviví keʼéyó ña̱yóʼo, soo ña̱yóʼo kúú iin ña̱ kivi chindeétáʼan xíʼinyó ña̱ va̱ʼa ndakundeéyó ku̱ʼu̱nyó yichi̱ táñu ña̱ taxi ña̱ kutakuyó.

9. ¿Ama kúú ña̱ xíniñúʼu ka̱ʼa̱n na̱ migoyó xíʼinyó xa̱ʼa̱ ña̱ va̱ása va̱ʼa kéʼéyó?

⁹ ¿Á ni̱xi̱yo iin tiempo ña̱ ki̱xáʼayó ku̱a̱ʼa̱nyó inka yichi̱ ña̱ sa̱kúxíka miíyó nu̱ú Jehová? (Sal. 73:2, 3). Tá iin na̱ migoyó na̱ viíní káchíñu nu̱ú Ndióxi̱ ni̱ka̱ʼa̱nna xíʼinyó ña̱ va̱ása va̱ʼa íyo ña̱ kéʼéyó, ¿á xi̱niso̱ʼoyó ña̱ ni̱ka̱ʼa̱nna xíʼinyó ta xi̱ndiku̱nyó consejo ña̱ ta̱xina ndaʼa̱yó? Va̱ʼaníva tá saá ke̱ʼéyó, ta táxiníyó tíxa̱ʼvi ndaʼa̱na xa̱ʼa̱ ña̱ ni̱ka̱ʼa̱nna xíʼinyó (Prov. 1:5).

10. ¿Ndáaña keʼéyó tá káʼa̱n iin na̱ migoyó xíʼinyó xa̱ʼa̱ ña̱ va̱ása va̱ʼa kéʼéyó?

¹⁰ Tu̱ʼun Ndióxi̱ sándakaʼánña miíyó “ña̱ sáxo̱ʼvi̱ iin na̱ migoyó miíyó nda̱kúníña” (Prov. 27:6). ¿Ndáaña kúni̱ kachi ña̱yóʼo? Ná ndakanixi̱níyó ña̱ kúni̱yó ya̱ʼayó iin calle nu̱ú xíkaní carro, soo ki̱xáʼayó xítoyó nu̱ú teléfono ña̱ kúúmiíyó. Ta xa̱ʼa̱ ña̱ xítoyó nu̱ú ña̱yóʼo va̱ása xítoyó á va̱xi iin carro. Soo, iin na̱ migoyó tíinna ndaʼa̱yó ta sítána miíyó chí sa̱tá, xa̱ʼa̱ ña̱ ndeéní ti̱inna ndaʼa̱yó nda̱a̱ sa̱túkue̱ʼe̱naña. Soo xa̱ʼa̱ ña̱ kamaní ke̱ʼéna ña̱yóʼo va̱ása níkani carro miíyó. Sana kuʼvi̱ ndaʼa̱yó ku̱a̱ʼá ki̱vi̱, soo va̱ása sa̱a̱víyó xíʼin na̱ migoyó. Saáchi taxiyó tíxa̱ʼvi ndaʼa̱na xa̱ʼa̱ ña̱ chi̱ndeétáʼanna xíʼinyó. Ki̱ʼva saá íyoña, tá káʼa̱n na̱ migoyó xíʼinyó ña̱ va̱ása va̱ʼa íyo ña̱ káʼa̱nyó á ña̱ kéʼéyó chi va̱ása kítáʼanña xíʼin ña̱ kúni̱ Ndióxi̱, sana va̱ása va̱ʼa kuniyó tá ná ka̱ʼa̱nna xíʼinyó, soo tá ná sa̱a̱yó xíʼinna na̱ʼa̱yó ña̱ kúúyó na̱ kíʼvi (Ecl. 7:9). Ña̱ va̱ʼaka kúú ña̱ taxiyó tíxa̱ʼvi ndaʼa̱na xa̱ʼa̱ ña̱ ndakú ni̱xi̱yo inina ni̱ka̱ʼa̱nna xíʼinyó.

11. ¿Nda̱chun va̱ása xíín savana kuniso̱ʼona consejo ña̱ táxi na̱ migona ndaʼa̱na?

¹¹ ¿Nda̱chun va̱ása xíín savana kuniso̱ʼona consejo ña̱ táxi na̱ migona ndaʼa̱na? Xa̱ʼa̱ ña̱ ni̱nu kúnina. Na̱ ni̱nu kúni kútóona ña̱ ná ka̱ʼa̱nna xíʼinna xa̱ʼa̱ ña̱ kúni̱ miína kuniso̱ʼona, ta va̱ása xíniso̱ʼona ña̱ nda̱a̱ (2 Tim. 4:3, 4). Va̱ása xíniso̱ʼona ña̱ káʼa̱n inkana saáchi ndákanixi̱nína ña̱ xíni̱kana, ta túvina ña̱ ndáyáʼviníkana nu̱ú inkana. Soo ta̱ apóstol Pablo ni̱ka̱ʼa̱nra ña̱yóʼo: “Tá iin na̱ yiví ndákanixi̱nína ña̱ ndáyáʼvinína soo su̱ví ña̱ nda̱a̱ kúú ña̱yóʼo, sándaʼvina miína” (Gál. 6:3). Ta̱ rey Salomón va̱ʼaní ni̱ka̱ʼa̱nra xa̱ʼa̱ ña̱yóʼo: “Va̱ʼaníka iin ta̱ loʼo ta̱ ndáʼvi soo ndíchi íyora, nu̱ú iin rey ta̱ xa̱a̱ ku̱chée soo va̱ása ndíchi íyora, saáchi ta̱yóʼo va̱ása kúúmiíkara ña̱ ndíchi ña̱ va̱ʼa kandíxara ndakiʼinra consejo” (Ecl. 4:13).

12. Nda̱a̱ táki̱ʼva káchi Gálatas 2:11-14, ¿ndáaña sákuaʼayó xíʼin ña̱ ke̱ʼé ta̱ apóstol Pedro?

¹² Va̱ʼaní yichi̱ sa̱ndákoo ta̱ apóstol Pedro nu̱úyó tá ni̱ka̱ʼa̱n ta̱ apóstol Pablo xíʼinra nu̱ú ndiʼina xa̱ʼa̱ ña̱ va̱ása va̱ʼa kéʼéra (kaʼvi Gálatas 2:11-14). * Sana kivi sa̱a̱ ta̱ Pedro xa̱ʼa̱ ña̱ ni̱ka̱ʼa̱n ta̱ Pablo xíʼinra nu̱ú ndiʼina, ta saátu xa̱ʼa̱ ki̱ʼva ña̱ ni̱ka̱ʼa̱nraña. Soo xa̱ʼa̱ ña̱ ndíchi ni̱xi̱yo ta̱ Pedro ka̱ndíxara consejo ña̱ ta̱xira ndaʼa̱ra, ta va̱ása nísa̱a̱-inira kunira ta̱ Pablo. Nu̱úka ña̱ keʼéra ña̱yóʼo, tá ni̱ya̱ʼa tiempo ni̱ka̱ʼa̱nra ña̱ kúúra ñanira ta̱ kúʼvi̱ní-inira xínira (2 Ped. 3:15).

13. ¿Ndáaña xíniñúʼu kiʼinyó kuenta xíʼin tá táxiyó consejo ndaʼa̱ inkana?

¹³ Tá ndákanixi̱níyó ña̱ xíniñúʼu taxiyó iin consejo ndaʼa̱ na̱ migoyó, ¿ndáaña xíniñúʼu kiʼinyó kuenta xíʼin? Tá kúma̱níka ka̱ʼa̱nyó xíʼinna, ná ndakanixi̱níyó xa̱ʼa̱ ña̱yóʼo: “¿Á túvii̱ ña̱ va̱ʼaníka ña̱ kéʼíi̱ nu̱ú inkana?” (Ecl. 7:16). Na̱ yiví  na̱ ndákanixi̱ní ña̱ va̱ʼaní ña̱ kéʼéna, kúni̱na ná keʼé inkana nda̱a̱ táki̱ʼva kéʼé miína ta su̱ví nda̱a̱ táki̱ʼva kúni̱ Jehová, ta ni va̱ása kúndáʼvi-inina xínina inkana. Tá xa̱a̱ nda̱kanixi̱níyó xa̱ʼa̱ ña̱yóʼo soo ni saá túvikavayó ña̱ xíniñúʼu ka̱ʼa̱nyó xíʼin na̱ migoyó, ná ka̱ʼa̱n káxiyó xíʼinna ndáaña kúú ña̱ va̱ása va̱ʼa kéʼéna, ta viíní ná nda̱ka̱tu̱ʼunyóna ña̱ va̱ʼa kiʼinna kuenta ndáaña kúú ña̱ va̱ása va̱ʼa kéʼéna. Ta saátu, nu̱ú Biblia ná kana ndiʼi ña̱ ka̱ʼa̱nyó xíʼinna soo ná ndakaʼányó ña̱ su̱ví miíyó kúú na̱ xíniñúʼu ka̱ʼa̱n á va̱ʼa á va̱ása va̱ʼa íyo ña̱ kéʼéna, saáchi Jehová kúú ta̱ xíniñúʼu keʼé ña̱yóʼo (Rom. 14:10). Ná kuniñúʼuyó tu̱ʼun Ndióxi̱ tá táxiyó consejo ndaʼa̱ inkana, ta saátu ná kundáʼvi-iniyó kuniyóna nda̱a̱ táki̱ʼva ke̱ʼé ta̱ Jesús (Prov. 3:5; Mat. 12:20). Ta ná ndakaʼányó chi nda̱a̱ táki̱ʼva kéʼéyó xíʼin inkana saá keʼé Jehová xíʼinyó (Sant. 2:13).

14. ¿Ndáaña kéʼé na̱ ñuu Ndióxi̱ xa̱ʼa̱ miíyó?

¹⁴ Jehová xíniñúʼura na̱ ñuura ña̱ va̱ʼa ka̱ʼa̱nra xíʼinyó ndáaña xíniñúʼu keʼéyó ña̱ va̱ʼa ndakundeéyó ku̱ʼu̱nyó yichi̱ ña̱ taxi ña̱ kutakuyó. Na̱yóʼo káʼa̱nna ndáa ki̱ʼva koo reunión, ta saátu távána video á tutu ña̱ chíndeétáʼan xíʼinyó kundiku̱nyó consejo ña̱ va̱xi nu̱ú tu̱ʼun Ndióxi̱. Ta ndiʼi ña̱yóʼo nu̱ú tu̱ʼun Ndióxi̱ távánaña. Na̱ Cuerpo Gobernante ndúkúna espíritu santo nu̱ú Ndióxi̱ ña̱ va̱ʼa ndaka̱xinna ki̱ʼva ña̱ natúʼunyó xíʼin na̱ yiví xa̱ʼa̱ra. Soo ni saá, tá yáʼa loʼo tiempo xítona á xíniñúʼu nasamana iin ña̱ nda̱kaxinna keʼéna, saáchi xa̱ʼa̱ ña̱ kamaní nása̱ma ña̱ kúu nu̱ú ñuʼú yóʼo na̱ ñuu Ndióxi̱ xíniñúʼu nasamana ki̱ʼva ña̱ nátúʼunna xíʼin na̱ yiví xa̱ʼa̱ra (1 Cor. 7:31).

15. ¿Ndáaña yáʼa sava na̱ hermano nu̱ú?

¹⁵ Ña̱ nda̱a̱ kúúña, tá káʼa̱n na̱ ñuu Ndióxi̱ xíʼinyó ña̱ nasamayó ña̱ kúnda̱a̱-iniyó xíʼin iin ña̱ va̱xi nu̱ú Biblia á tá káʼa̱nna xíʼinyó ña̱ ná kǒo keʼéyó ña̱ va̱ása va̱ʼa, va̱ása xíka-iniyó ña̱ kandíxayó ña̱yóʼo. Soo, ¿ndáaña ndóʼoyó tá násama na̱ ñuu Ndióxi̱ iin ña̱ʼa ta xa̱ʼa̱ ña̱yóʼo xíniñúʼu nasamayó ku̱a̱ʼá ña̱ kéʼéyó? Tá kúú, loʼo ku̱i̱ya̱ chí sa̱tá na̱ Cuerpo Gobernante ni̱ka̱ʼa̱nna ña̱ ku̱a̱ʼání xu̱ʼún xíniñúʼuyó ña̱ ixava̱ʼayó veʼe nu̱ú ndátakayó á ña̱ kundaayóña. Xa̱ʼa̱ ña̱yóʼo kúni̱na ña̱ viíní ná kuniñúʼuyó veʼe yóʼo. Ña̱kán, na̱ ñuu Ndióxi̱ ni̱xi̱kóna sava veʼe yóʼo ta nda̱chitáʼanna sava congregación. Ta xu̱ʼún yóʼo xíniñúʼunaña ña̱ ixava̱ʼana veʼe nu̱ú kúma̱níña ña̱ ndataka na̱ hermano. Tá ndóoyó ñuu nu̱ú íxi̱kóna salón ta ndáchitáʼanna na̱ congregación, sana ixayo̱ʼvi̱ña xíʼinyó ña̱ ka̱anyó. Vitin, sava na̱ hermano xíkáka xáʼa̱nna reunión, ta na̱ ndeéní ka̱chíñu ña̱ va̱ʼa i̱xava̱ʼana iin salón á  na̱ xi̱ndaaña, sana ndákanixi̱nína nda̱chun íxi̱kó na̱ ñuu Ndióxi̱ ña̱yóʼo. Á sana túvina ña̱ va̱ása vií níxiniñúʼuna tiempona xíʼin ndee̱na ña̱ ke̱ʼénaña. Soo ni saá kándíxavana keʼéna ña̱ káʼa̱n na̱ ñuu Ndióxi̱, ta táxiníyó tíxa̱ʼvi ndaʼa̱na xa̱ʼa̱ ña̱yóʼo.

16. ¿Ndáa ki̱ʼva chíndeétáʼan Colosenses 3:23, 24 xíʼinyó ña̱ ndakundeéyó kusi̱í-iniyó?

¹⁶ Ña̱ va̱ʼa ndakundeéyó kusi̱í-iniyó xíniñúʼu ndakaʼányó ña̱ nu̱ú Jehová kúú ña̱ káchíñuyó ta ta̱yóʼo kúú ta̱ níʼi yichi̱ nu̱ú na̱ ñuura (kaʼvi Colosenses 3:23, 24). * Ta va̱ʼaní yichi̱ sa̱ndákoo ta̱ rey David nu̱úyó tá ta̱xira xu̱ʼún ña̱ va̱ʼa ixava̱ʼana templo. Ka̱chira: “¿Ndáa ta̱a kúi̱ ta ndáana kúú na̱ ñui̱, ña̱ va̱ʼa taxindi̱ ña̱ʼa ndaʼún? Saáchi miíún táxi ndiʼi ña̱ʼa ndaʼa̱ndi̱, ta ña̱ táxiún ndaʼa̱ndi̱ kúú ña̱ táxindi̱ ndaʼún” (1 Crón. 29:14). Ta saátu miíyó tá táxiyó donación, ña̱ ta̱xi mií Jehová ndaʼa̱yó kúú ña̱ táxiyó ndaʼa̱ra. Soo ni saá, Jehová táxiníra tíxa̱ʼvi xa̱ʼa̱ ña̱ xíniñúʼuyó tiempoyó, ndee̱yó xíʼin xu̱ʼúnyó ña̱ va̱ʼa keʼéyó chiñu ña̱ kúni̱ra ná keʼéyó (2 Cor. 9:7).

17. ¿Nda̱chun va̱ása xíniñúʼu ndakava-iniyó tá xíniñúʼu nasamayó ña̱ kéʼéyó?

¹⁷ Ña̱ va̱ʼa ndakundeéyó ku̱ʼu̱nyó chí yichi̱ ña̱ táñu ña̱ taxi ña̱ kutakuyó, ndiʼiyó xíniñúʼu viíní kundiku̱nyó ña̱ ke̱ʼé ta̱ Jesús (1 Ped. 2:21). Tá túviyó ña̱ xíniñúʼu nasamayó ña̱ kéʼéyó ná va̱ása ndakava-iniyó. Va̱ʼaníva tá kúni̱yó keʼéyó ña̱yóʼo, saáchi saá náʼa̱yó ña̱ kúni̱yó kundiku̱nyó ña̱ káʼa̱n Jehová. Ta̱yóʼo xíni̱vara ña̱ kúúyó na̱ yiví ku̱a̱chi, ta xa̱ʼa̱ ña̱yóʼo kúnda̱a̱-inira ña̱ va̱ása kuchiñuyó viíní keʼéyó nda̱a̱ táki̱ʼva ke̱ʼé mií ta̱ Jesús.

18. ¿Ndáaña xíniñúʼu keʼéyó ña̱ va̱ʼa xa̱a̱yó ñuyǐví xa̱á?

¹⁸ Ña̱kán ná ndakanixi̱níyó xa̱ʼa̱ ña̱ ndátuyó ndakiʼinyó chí nu̱únínu, ta ná kandíxayó nasamayó ña̱ ndákanixi̱níyó, ña̱ kéʼéyó xíʼin ki̱ʼva ña̱ íyoyó (Prov. 4:25; Luc. 9:62). Ná ndakundeéyó vitá koo iniyó ta ná keʼéyó ña̱ káʼa̱n 2 Corintios 13:11: “Chika̱a̱ndó ndee̱ ña̱ kusi̱íníka-inindó, ña̱ nasamandó ña̱ kéʼéndó”. Tá ná keʼéyó ña̱yóʼo, Ndióxi̱ ta̱ kúʼvi̱ní-ini xíni miíyó kutáʼanra xíʼinyó. Tasaá kusi̱í-iniyó ku̱ʼu̱nyó chí yichi̱ ña̱ taxi ña̱ kutakuyó ta kivi xa̱a̱yó ñuyǐví xa̱á.