1. Mateub 7:13, 14 ǃoagu da tae-i ǃaroma a mî ǁkhā daob ai da ge garu di?

HOADA ge daob ai hâ. Tsî da ge ǃgarise ra sîsen Jehovaba ǃoabasa. Î da ǀasa ǃhūbaib ǃnâ Jehovab di ǀnamǀnamxa ǂgaeǂguis ǃnāka ûi. Tsēs hoasa da ge ǀamo ûib ǃoa garu daoba ra sao-ai. Xawe i ge Jesub ge mî khami ǁnā daoba sao-aisa kaise a ǃgom ǁkhā. (Khomai re Mateub 7:13, 14.) ǀOasa kurusa da ūhâ tama amaga, i ge kaise a supu sida ǁnā daoba ǁnāxūsa.—Gal. 6:1.

2. Tae-e da nē ǁkhāǁkhāǃâs ǃnâ nî ǃhoaǃgao? (“ ǃGamǃgamsens ge ra huida î da ǀkharaǀkharana dī” di hâ boksisa mû re.)

² ǂŌ daob hîna ǀamo ûiba ǃoa garub ai ta ga ra hâ ǂgao o, o da ge sida di ǂâiǀgaub, taen xa ta a ǃgâibahes tsî ǃgâibahe tamas, tsî sida di tanisen ǀgauga ǀkharaǀkharasa nî mā-amsen. Apostel Paulub ge Xristeǁîn hîna ge Korintes ǃnâ gere hâna ge mîba în “ǁnamakaisen.” (2Kor. 13:11) Nē ǀapemās ge sada ǃoas tsîna hâ. Nē ǁkhāǁkhāǃâs ǃnâ da ge nî ǁkhāǁkhāsen matis Elobmîsa a huida ǁkhāsa î da ǀkharaǀkharana dī. Tsî matin ǃgâi aiǁgaude ūhâ Xristeǁî ǀhōsana a huida ǁkhāsa, î da nē daob ûib dib ai hâ. Jehovab di ǀapeǂhomis xa ra māhe daoǁgaude sao-ais tae-i xa a ǃgom kaihe ǁkhās tsîna da ge nî ǃhoaǃgao. Mû da ge nî mati i ǃgamǃgamsenxasiba nî huidasa î da ǀkharaǀkharana dī Jehovaba ǃoabas ǃnâ. Sida di ǂkhîba ǂoaǃnâ tamase.

3. Elobmîsa mati a hui du ǁkhā?

³ Sida di ǂâidi tsî tsâsin tsîna ôaǃnâs ge supu tama hâ. Sida di ǂgaogu ra gāxaǃnâ da amaga. Kaise i ge a ǃgom ǂansa tae-eb ǂgaoba a dī kai da ǁkhāsa. (Jer. 17:9) Kaise i ge a supu “aitsama” gâre ǂâidi ǀkha ǂgaeǂhapu  kaisensa. (Jak. 1:22) Elobmîsa da ge nî sîsen-ū î da aitsama ôaǃnâsen. Elobmîs ge ǂganaga da mati ī sa ra ǁgau, sida di “ǂâidi tsî ǀapeǀapedi ǂgaob” di di mati ī sa. (Heb. 4:12, 13) ǁNās ǁkhās khamis ge Elobmîsa X-ray masins khami ī, hîna ra huidasa î da tae-i ǂganaga hâsa mû. Xawe da ge nî ǃgamǃgamsen î da Elob di mîs tsî ǁÎba ra ǃoaba khoena xu ǃgâiba hō.

4. Tae-e ra ǁgau Gao-aob Sauli ge ǀgapiǂâixa i ǃkhaisa?

⁴ Gao-aob Sauli di aiǁgaus ge ra ǁgau tae-i a īǁkhāsa ǃgamǃgamsenxasiba da ga ūhâ tama ga ra io. Sauli ge ge ǀgapiǂâixa tsoatsoa tsîb ge ǁîba ge ǂanǃgâ tama hâ-i, ǁîb di ǂâiǀgaub tsî tanisen ǀgaub tsînab nî ǀkharaǀkharasa. (Psa. 36:1, 2; Hab. 2:4) Aiǁgauseb ge Jehovaba Saula ge mîba tae-eb nî dīsa Amalekǁînab ga ra ǃgam toa o. Xaweb ge Saula Jehovaba ge ǁnâuǀnam tama hâ-i. Tsî kēbo-aob Samueli ge ǁîb di ǀnâuǀnamoǃnâsîb xa ǁîb ǀkha a ǃhoa, ob ge ǂanǃgâ tama ge i tsūxū-eb ge dīsa. Xaweb ge ǁîb di ǁnâuǀnamoǃnâsiba ǂkhariǂkhari tsî gere mî, kai xū-eb dī tama tsîb ge khoen xa a ǁgarihe di. (1Sam. 15:13-24) ǀNaib ge Saula ǁnāti ī xū-e ge dī hâ-i. (1Sam. 13:10-14) Sauli ge ǁîb di ǂgaoba ge mā-am îb ǀgapiǂâixa. ǁÎb di ǂâiǀgaubab ge ge ǃgâiǃgâi tama hâ-i. ǁNā-amagab ge Jehovaba ge ǁnamabi tsî ūǃoabi tama ge hâ-i.

5. Sauli di aiǁgausa xu da tae-e ra ǁkhāǁkhāsen?

⁵ Sauli khami da ge ī ǂgao tama hâ. ǁNā-amaga da ge saora dîde nî dîsen: ‘Elobmîsa xu hâ ǀapemāsa ta ga ra khomai o, o da ǀkhara ǃaromade ra ôa, dī ta go xū-e mûǃkharus ǃgao? Tita ra dī xūn ge kaise ǁgâi tama di ta ra ǂâi? Nau khoena ta tita ra dī xūn ǃgao ra ǂgā-am?’ Nē dîde da ga, î di ga ra ǃeream o, o da ge sida di ǂâiǀgauba nî dawa. Nēsa da ga dī tama ga ra io, o da ge nî ǀgapiǂâixa tsîb ge Jehovaba ǁîb ǀhōsa-i ase ūǃoa da tide.—Jak. 4:6.

6. Gao-aob Sauli tsî Gao-aob Davib ǁaegu hâ ǃkharagagusiba mîǃā re.

⁶ Gao-aob Sauli tsî Gao-aob Davib ǁgaegu hâ ǃkharagagusiba ǃgaoǃgâ re. Davib ge ‘ǃKhūb di ǂhanuba’ ge ǀnam-i. (Psa. 1:1-3) Davib ge ge ǂan i Jehovab ǃgamǃgamsen rana nî sâusa tsîb ǀgapiǂâixana ra māǃoa ǃkhaisa. (2Sam. 22:28) Davib ge ge mā-am îb Jehovab di ǂhanuba ǁîb ǂâiǀgauba dawa. ǁÎb ge ge xoa: “Tita ge ǃKhūba nî kare, ǁîb ǀapemā te geba; ǁkhāti tsuxub ǃnâ ra ge ti ǃnaira ra ǁgau te.”—Psa. 16:7.

7. Tae-e da nî dī ǃgamǃgamsenxa da ga ra o?

⁷ ǃGamǃgamsenxa da ga ra o, o da ge Elobmîsa ra mā-am is sida di ǃgâi tama ǂâiǀgauba ǃgâiǃgâi, tsūdī da nîs ais-ai. Elobmîs ge: “Nēb ge daoba, ǃgû re ǁîb ai” dira mî dommi khami nî. Tsūxū-e da ga ra dī os ge ǁîsa nî mîbada. (Jes. 30:21) Jehovaba ǃgâs ǃnâ-ū da ge ǂgui ǀgaugu ǃnâ ǃgâiba nî hō. (Jes. 48:17) Aiǁgause da ge khoe-i ga ra ǁnama da o ǁgâise tsâ tide. Tsî da ge Jehovab ǃoa nî ǀgū. ǂAn da a ǁîb ǀnamxaǃnâ ǁgûb khami sada ra tsâba amaga.—Heb. 12:7.

8. Jakobub 1:22-25 ǃnâ i mîsa khami da mati Elobmîsa spiels ase nî sîsen-ū?

⁸ Elobmîs ge spiels ase a īǁkhā. (Khomai re Jakobub 1:22-25 sa.) ǂGui khoeda ge mâ ǁgoas hoasa, omsa xu da nî īs aiǃâ spiels ǃnâ ra kōsen. ǁNā ǀgaub ai da ge ra mû hî-ūnu da nî xū-e nau khoen nî mûdas aiǃâ. ǁNās ǁkhās khami da ge Elobmîsa da ga tsēs hoasa ga ra khomai o, ra mû ǀgaugu hîna da a ǀkharaǀkhara ǁkhāga, sida di ǂâiǀgaub tsî tanisen ǀgaub  ǃnâ. ǂGuin ge tsēkorobe mîsa mâ ǁgoas hoasa omsa xūn nî īs aiǃâ khomais xa ra huihe. ǁÎn ge ra mā-am i i khomain ta xū-e ǁîn ǂâiǀgauba tsâǀkhā. Tsîn ge tsēs ǃnâ matin Elobmîsa xun ko hō xū-en nî sîsen-ūsa ra kō. ǁNâs xōǀkhā da ge Elobmîsa ǁkhāǁkhāsen tsî ǁîs xa nî ǂâiǃâ tsēs hoasa. Nēsa dīs ge supuse a mûsen ǁkhā, xawe i ge a ǂhâǂhâsa. ǁÎ-i ge nî huida î da nē ǂō daob ûib dib ai hâ.

9. Tae-i ǃaroma i kaiǀoa hâ ǀhōsa-e nî mî-ūnuba du?

⁹ Jehovab ǀkha du ūhâ ǀhōsagusisa nî tsâǀkhā xū-e dī tsâ i du hâ? (Psa. 73:2, 3) Kaiǀoa hâ ǀhōsa i ge ǁkhoaǂgaosiba hō tsî a mîba du o, ǁî-e ǃgâ tsî mā-e du ge ǀapemāsa sao i du ge? ǁNās ga ra io du ge ǃgâi xū-e ge dī tsî du ge kaise ra ǃgôaǃgâ sadu ǀhō i huiba.—ǂKhm. 1:5.

10. Tae-e du nî dī sadu ǀhō i xa du ga mî-ūnubahe o?

¹⁰ Elobmîs ge ra hōhōǃnâ da: “ǀHapiǂnûidi ǀnamsabeb didi ge a îǂhôa.” (ǂKhm. 27:6) Nēsa tae-e ra ǂâibasen? Nē aiǁgaus xa ǂâi re: ǀNîsi du ge ǂgui audode ūhâ daoba ra ǃkharu ǂgao tsî selfoni xa ra ǂhanihe tsî du ge kō tamase ra ǃgû. Sadu ǀhō i ge ǁôab ai ǃkhō du tsî daoba xu ge ǂgaeǂui du. ǁÎ-i ge kaise ǃgarise ge ǂgaedu tsî sadu ǁôaba ge tsûtsû. Xawe du ge ge hui-e tsî du ge ǂgâu-e tama ge i. Sadu ǁôab ge gaixuse ge tsû. ǁÎ-i ge ǂgae du ǀgaub xa du ǁgâise nî tsâ? Tā tsēs tsîna. ǁÎ-i di huiba du ge kaise nî ǃgôaǃgâ. ǁNās ǁkhās khami i ga sadu ǀhōsa-e mîba du o, sadu di ǃhoa tamas ka io tanisen ǀgaub Elob di ǀgaugu ǀkha ǀgui tama hâ di, o i ge tsoatsoas ǃnâ a tsû ǁkhā. Xawe tā ǁî-i ge ǀapemādu ǃkhais ǃgao ǁaixa re. ǁNāb ge gâre ǀgauba. (Aoǁn. 7:9) Sadu ǀhō i go ǁkhoaǂgaosiba hō tsî sadu ǀkha a ǃhoa ǃkhaisa ǃgôaǃgâ re.

11. Tae-e a ǃaroma ǁkhā i i khoe-e ǃgâi ǀapemāsa ǀhōsa-e xu ūǃoa tama i?

¹¹ Tae-i ǃaroma i khoe-e mā-e i go ǀapemāsa ūǃoa tama? ǀGapiǂâixasib. ǀGapiǂâixa khoen ge ‘ǀkhonaǂgaes’ xa a ǃgâibahe. ǁÎn ge ‘amaba xu ra ǂgōbē.’ (2Tim. 4:3, 4) ǁÎn ge ra ǂâi ǀapemāhesan ǂhâ tama di. ǁÎn a gā-ai tamas ka io ǂhâǂhâsa amaga. Xaweb ge apostel Pauluba ge xoa: “Khoe-i ga: xū ta a, ti ǂâi, xū tama i hâ hîa, ǁnā-i ge ǁî-aitsama ra garasen.” (Gal. 6:3) Gao-aob Salomob ge nēsa ǃamkuse ge mîǃā. ǁÎb ge ge xoa: “ǀGâsa tsî gā-ai ǂkhamkhoeb ge kaira tsî gâre gao-aob hîa aiǃâb ǃoa ǂgōǀaukaisen ǁoab ǃgâ-ai a ǃgâi.”—Aoǁn. 4:13.

12. Tae-e da apostel Petrub ge mā aiǁgausa xu ra ǁkhāǁkhāsen, Galateǁîn 2:11-14 ǃnâ i xoasa khami?

¹² Petrub ge dī xū-e ǂâi re, Paulub ge ǁîba khoen ais ai a mî-ūnuba o. (Khomai re Galateǁîn 2:11-14 sa.) Petrub ge ga ǁaixa hâ Paulub ge a mî xū i ǃgao tsî ǃhoa-ūheb ge ǀgaub ǃnâ. Tsî nox khoen ais aib ge nēsa a dī o. Xaweb ge Petruba ge gā-ai i. ǁÎb ge Paulub ǀkha ge ǁaixa tama hâ i, tsî nēs xa gere ǂâiǃâ. Tsîb ge ega Pauluba “ǀnamǀnamsa ǃgâsab” dī ge ǂgai.—2Pet. 3:15.

13. Tae-e da nî ǂâiǃgâ khoe-e da nî ǁnamas aiǃâ?

¹³ Sadu ǀhō-e du ga ra ǁnama ǂgao o, tae-e du ǂâis ǃnâ nî ūhâ? Sadu ǀhō i ǀkha du nî ǃhoas ais-ai dīsen re, ‘hoaǁae ta a “ǂhanu-ai”?’ (Aoǁn. 7:16) Kaise ǂhanu-ai khoe-i ge nau khoe-e ra ǀgoraǃgâ, Jehovab ǀgaugu ais ose xawe ǁî-i digu ai. ǁÎ-i ge ǀkhomxaǂgao tama hâ. Sadu ǀhō-e du tae-i ǃaroma ra ǀapemāsa du ga ǂâi toas khaoǃgâ tsî du ga ǁî-i ǀkha ǃhoas di ǂhâsiba ga ra mû o, tae-i a ǃgomsisa ǁî-e mîba re tsî dîde  dîre. I-i ǁnâuǃā Jehovab mati dī î ra xū-i xa ra tsâsa. ǂÂis ǃnâ du ūhâ re, mî du ra xū-i ge Elobmîsa xu nî hā. Sadu ǀhō-e du ge ǀgoraǃgâ ǂgao tama hâ. Xawe du ge ǁî-e ra hui ǂgao, i-i ǁnâuǃā matib Jehovaba dī î ra xū-i xa ra tsâsa. (Rom. 14:10) Elobmîsa xu hâ gā-aisiba sîsen-ū re. Tsî Jesub di ǀkhomxaǂgaosiba ǁgae re khoe-e du ga ǁnama o. (ǂKhm. 3:5; Mat. 12:20) Tae i ǃaroma? Jehovab ge nau khoena da ra hâ-ū khami sada nî hâ-ū.—Jak. 2:13.

14. Elob di ǀapeǂhomisa taena ra māda?

¹⁴ Jehovab ge ûib ǃoa garu daob ai ǁîb ǀapeǂhomis ǃnâ-ū ra daoǁgauda. ǀApeǂhomis ge vidion, ǂkhanin tsî ǀhaodi hîna ra huidade ra māda, î da Elobmîs ǃnâ da ra hō ǀapemāde sîsen-ū. Nē xūna da ge a ǂgomǃgâ ǁkhā xoadi ain a ǃgaoǃgaosa amaga. ǂGaeǂguira soros ǃgâsagu ga aoǁnâ sîsen-i mati nî dīhesa ga ra mîǁgui ǂgao o, o gu ge ǃanu gagab ai ra ǂgomaiǂnûi. ǂGaeǂguira soros ǃgâsagu ge hoaǁae ra kōǃgâ nē mîǁguigu a ǀkharaǀkharahe ǁkhāsa. Tae-i ǃaroma? “Nē ǃhūbaib di īsib ra ǃgû-ī” amaga. Tsîs ge Elob di ǀapeǂhomisa ǀasa ǀkharaǀkharana nî dī.—1Kor. 7:31.

15. ǀNî ǃgâsana tae-i ǃgomsina ra hōǃâ?

¹⁵ Elob di ǀapeǂhomis ga ǀasa Elobmîs ǁkhāǁkhāde ga ra māda o, tamas ka ra io ǃgâi tsoatsoade ga ra māda o, da ge ǁnāsa ra ūǃoa tsî ra dī. Xawe tae-e da nî dī Elob ǀapeǂhomis ga ǀkharaǀkharana ga ra dī o sada ûiba ra tsâǀkhāna? Aiǁgause i ge nē kurigu ǃnâ oman tsî ǃoaba ǃkhaide dī-ūnus dī ǂganǀgauga ge ǀarosen. ǁNā-amagas ge ǂGaeǂguira sorosa ge mîǁgui i i ǂgui ǀhaohâga ǀgui sala sîsen-ū. Nē ǀkharaǀkharan xa ǃaromahe hâse i ge ǀhaohâga ǀhaoǀhaohe tsî ǀnî salga ge ǁamaxūhe. Sâu-e ge mari i ge ra sîsen-ūhe i i kai ǂhâsiba ūhâ ǃādi ǃnâ salga omhe. Salgu ge ǁamaxūhe tsî ǀhaohâga a ǀhaobehe ǃādi ǃnâ du ge ǀnîsi ra hâ. ǀAsa ǀgauga ǁnaedis ge ǀnîsi a ǃgom. ǀNî ǃgâsan ge ǀnîsi nēsisa ǃnūse ra ǃnari ǀhaode hâǃnâs ǃgao. Tsî ǀnîn ge ra ǂâi ǃgarise sîsen tsîn ge a om tamas ka io hî-unu sali tae-i ǃaroma ra ǁamaxū-esa. ǁAeǁoren ge khamin ge ra tsâ. Xawen ge ǁîna ra sîsenǀhao tsî nē ǀasa ǀkharaǀkharana  ra ūǃoa. Nēs ǃgaon ge kaise a koahe ǁkhā.

16. Koloseǁîn 3:23, 24 sa mati ra huida î da ǂkhîba ūhâ ǀgara?

¹⁶ ǂKhîba da ge nî ūhâ ǀgara ǂâis ǃnâ da ga ra ūhâ o Jehovaba da ra sîsenbasa. Tsîb ǁîb ǀapeǂhomisa ra sîsen-ūse ra daoǁgauda ǃkhaisa. (Khomai re Koloseǁîn 3:23, 24 sa.) Gao-aob Davib ge ǃgâi aiǁgausa ge ǁgau māsenxaseb ge marisa mā tsî i ge tempela a omhe o. ǁÎb ge ge mî: “Tari ta tita, tsî taresa ti ǁaesa, o da ǀgaiba go hō, māsenxase da nî ǀkhaega nē dommi ai? Hoan ge satsa xu go ǀkhī xui-ao, tsî sida ge ǁîna sa ǃomǁaeba xu ra mā tsi.” (1Kro. 29:14) Sada tsîn ge māsenxase da ga mari-e ga ra mā o, o ǀnaib ge māda xū-e ra mā oabi. ǁNās ga hâ xaweb ge Jehovaba kaise ra ǂkhî sada ǁaeb, ǁkhāsib tsî mari-e da ga ǁîb di sîsen-i ǃgao a mā o.—2Kor. 9:7.

17. Tae-i ǃaroma du tā nî ǂkhabuǂâi ǀkharaǀkharana du ga ra dī o?

¹⁷ ǁNā ǂō daob ai hâ ǀgaras ǃaroma da ge Jesub di aiǁgausa nî sao-ai. (1Pet. 2:21) ǀNîsi du ga ǀkharaǀkharana ga ra dī-o, tā ǂkhabuǂâi re. Nēsa du ra dīs ge ra ǁgau Jehovab di daoǁgausa du ra sao ǂgaosa. ǂÂis ǃnâ du ūhâ re, Jehovab ge sadu ǀoasa tama hâsa a ǂan. Tsîb ge ǃâubasen tama hâ Jesub di aiǁgausa du dīsā tamase nî sao-aisa.

18. Tae-e da nî dī i da sida di mîǁguiba sīǃnâ?

¹⁸ A da hoada sida ǂâisa hānîǁaeb ai mâi re. Tsî māsenxase sida ǂâiǀgaub, tae-i xa da ǃgâibahes tsî ǃgâibahe tamas tsî sada tanisen ǀgauga dawa. (ǂKhm. 4:25; Luk. 9:62) A da ǃgamǃgamsen, “ǃgâiaǂgao tsî ǁnamakaisen re.” (2Kor. 13:11) “Elob ǀnammi tsî ǂkhîb tsîkha dib ge sadu ǀkha nîra hâ,” nēsa da ga ra dī-o. ǁÎb ge nî huida î da ǂkhîba ūhâ nēsi tsîb ge ûiba ǀasa ǃhūbaib ǃnâ nî māda.