1. Kej kiijtoua Mateo 7:13, 14, ¿kenke tikijtouaj Cristo itokilijkauaj kejuak yauij ipan se ojtli?

NOCHI tojuantij kejuak tiauij ipan se ojtli. Uan timosentlalijtokej tinemisej nopaya pampa techpaleuia tiitstosej ipan yankuik Tlaltipaktli kampa Jehová tlanauatis. Yeka, mojmostla tijchiuaj kampeka tinemisej ipan nopa ojtli. Maske kiampa tijchiuaj, kemantika eli ouij pampa kej Jesús kiijtok, nopa ojtli amo eli patlauak (xijpoua Mateo 7:13, 14 *). Nojkia, pampa titlajtlakolejkej kemantika uelis tichikokisasej ipan nopa ojtli (Gál. 6:1).

2. ¿Tlake tikitasej ipan ni tlamachtili? (Xikita recuadro “ Tlaj amo timoueyimati mitspaleuis timoxitlauas”).

² Tlaj tijnekij nochipa tinemisej ipan nopa ojtli tlen amo patlauak, moneki tijnekisej tijpatlasej kej timoiljuiaj uan tlen tijchiuaj. Ya nopa kinejki kiijtos apóstol Pablo kema kiniljuik toikniuaj tlen Corinto: “Xijsenkauakaj nochi tlen axkuali” (2 Cor. 13:11). Tlen kintlajtolmakak nojua techpaleuia. Ipan ni tlamachtili tikitasej kenijkatsa Biblia uelis techpaleuis tijxitlauasej toojui uan kenijkatsa uelis techpaleuisej touampoyouaj katli kuali tlaneltokaj, nojua ma tinemikaj ipan nopa ojtli tlen techpaleuis tiitstosej nochipa. Nojkia, tikitasej kema tijmatij ouij tijchiuasej tlen Jehová itlanechikol techiljuia, uan tikitasej kenke kema amo timoueyimatij techpaleuia tijpatlasej kej timonejnemiltiaj uan kiampa nojua tijtekipanosej Jehová.

3. ¿Kenijkatsa techpaleuia Biblia?

³ Kemantika eli ouij tikitasej tlen timoiljuiaj uan tlen tijyolmatij. ¿Kenke? Pampa toyolo techkajkayaua, uan ouij  tijmatisej kanke techuikas (Jer. 17:9). Nojkia, kemantika nima timokajkayauaj ika tlen amo kuali (Sant. 1:22). Yeka, tlauel ipati tijtekiuisej Biblia uan kiampa tikitasej tlen tijyolmatij. Biblia “kipannextia intla kuali o axkuali tlen timoyoliljuiaj uan kipannextia tlen tijnekij tijchiuasej”, uan tlen eltok ipan toyolijtik (Heb. 4:12, 13). Ni amochtli eli kej se tepostli kampa kikixtiaj rayos X, kinextia tlen tijpiaj tlajtik. Uajka, moneki amo timoueyimatisej tlaj tijnekij ma techpaleui tlen Biblia tetlajtolmaka uan tlen techiljuiaj toikniuaj katli techyakanaj.

4. ¿Kenke tikijtouaj tlanauatijketl Saúl moueyimatki?

⁴ Ika tlen kipanok tlanauatijketl Saúl, kinextia tlake uelis panos tlaj timoueyimatij. Ya tlauel moueyimatiyaya, uan amo kema moiljuik o kiijtok kipatlaskia kej moiljuiyaya o kej eliyaya (Sal. 36:1, 2; Hab. 2:4). Kinextik moueyimati kema Jehová kiiljuik tlake kichiuaskia ika amaleqeuanij, uan ya amo kichijki tlen kiiljuijkej. Kema tlajtolpanextijketl Samuel kiiljuik kenke kiampa kichijtoya, ya amo kiijtok tlaj kena mokuapolojtoya. Saúl kiijtok amo tleno kiixpanotoya uan amo kenijki tlaj kiampa kichijki, uan sekinok kintlajtlakoltik (1 Sam. 15:13-24). Ya ipa kiampa kichijtoya (1 Sam. 13:10-14). Saúl kikajki ma tetiya iyolo. Uan pampa amo kixitlajki kej moiljuiyaya, Jehová kiajuak uan kitlauelkajki.

5. ¿Tlake techmachtia tlen kipanok Saúl?

⁵ Tlaj amo tijnekij tielisej kej Saúl, ma timotlatsintokikaj: “¿Nimotextia uan kiampa amo nijchiuas tlen nijpoua ipan Biblia? ¿Nikijtoua amo kenijki tlaj nitlaixpanos? ¿Nikintlajtlakoltia sekinok ika tlen nijchiua?”. Tlaj tikijtouaj kena ika ni tlajtlanili, moneki tijpatlasej kej timoiljuiaj uan tlen tijchiuaj. Tlaj amo tijpatlaj, uajka toyolo nojkia elis tetik uan Jehová ayokmo kinekis mouampojchijtos touaya (Sant. 4:6).

6. ¿Kenijkatsa eliyaya Saúl uan kenijkatsa eliyaya David?

⁶ Saúl tlauel moueyimatiyaya, amo kej David katli kitekipatlak. ¿Kenke? Pampa ya tlauel kiikneliyaya “itlanauatiljuaj toTeko” (Sal. 1:1-3). David kimatiyaya Jehová kinmakixtia katli moechkapantlaliaj uan kinuejkatlalia katli moueyimatij (2 Sam. 22:28). Yeka, kikajki toTeotsij itlanauatil ma kixitlaua itlalnamikilis. Uan kiijtok: “Nimitsueyichiuas, toTeko, pampa tinechkonsejomaka. Tlajkoyoual tinechmaka motlalnamikilis uan tinechnextilia ipan noyolo tlachke moneki nijchiuas” (Sal. 16:7).

7. ¿Tlake tijchiuasej tlaj amo timoueyimatij?

⁷ Tlaj amo timoueyimatij tijkauasej Biblia ma kixitlaua totlalnamikilis kema nojua ayamo tijchiuaj tlen amo kuali. Biblia eli kejuak itos se akajya katli kiijtoua: “Axya ni nopa ojtli. Uajka ximokuepakaj uan xijtokilikaj ne ojtli”. Techiljuis kema nechka tichikokisasej (Is. 30:21). Yeka, kema tijtlakakiliaj Jehová, tlauel techpaleuia (Is. 48:17). Nojkia, techpaleuia amo timoixpinaualtisej kema se akajya monekis techtlajtolmas. Uan tijmatisej tiitstokej nechka Jehová pampa techtlalnamiktia kej tiikoneuaj (Heb. 12:7).

8. Kej kiijtoua Santiago 1:22-25, ¿kenijkatsa Biblia elis kej se teskatl tlen techpaleuis?

⁸ Biblia eli kej se teskatl tlen techpaleuia (xijpoua Santiago 1:22-25). Mojmostla kema tijnekij tiasej kanajya nochi timotlachiliaj ipan se teskatl, kiampa tikitaj tlaj kuali tinesij o tlaj nojua moneki timoyejyektlalisej. Nojkia, kema tijpouaj Biblia kejuak tikitaj tlaj moneki tijxitlauasej tlen timoiljuiaj o tlen tijchiuaj. Miakej toikniuaj kipouaj ika ijnalok pilamochtsi Mojmostla timomachtiaj toTeotsij iTlajtol kiampa  se tonal uelis moyoliljuijtinemisej ipan tlen kipojkej uan kiitaj kenijkatsa uelis kichiuasej ipan ininnemilis. Yeka, mojmostla ma tijpouakaj Biblia uan ma timoyoliljuikaj ipan tlen tijpouaj. Amo ma timoiljuikaj amo techpaleuis pampa ni kichiuas ma tinemikaj ipan ojtli tlen techpaleuis tijpiasej nemilistli.

9. ¿Kema moneki techtlajtolmakas se touampo?

⁹ ¿Nechka tijchiuaskia se tlamantli tlen mitsiyokatlaliskia tlen iojui Jehová? (Sal. 73:2, 3). Tlaj se mouampo katli kuali tlaneltoka kichijki kampeka mitstlajtolmakas, ¿tijtlakakilik uan tijchijki tlen mitsiljuik? Tlaj kena, tlauel kuali tlen tijchijki uan uelis tijtlaskamatilik pampa kamanaltik mouaya (Prov. 1:5).

10. ¿Tlake moneki tijchiuasej kema se touampo techtlajtolmakas?

¹⁰ Biblia techilnamikilia “achi más temachtli touampo tlen techkokoua kema moneki techajuas” (Prov. 27:6). ¿Tlake kiijtosneki? Ma timoiljuikaj tijnekij titlaixkotonasej kampa tlauel nemij carros, uan kema nopaya timochixtokej peuaj tijtlachiliaj toteléfono uan titlaixkotonaj maske amo tikitaj tlaj uala se carro. Kema kiampa tijchiuaj, se touampo chikauak techajkoltilana uan pampa chikauak techtilanki techajkolkokok, maske kiampa kichijki tijtlaskamatij pampa techpaleuik amo tleno ma techpano. Maske uelis se keski tonali nojua tiajkolkuajkualotokej, amo tikualanij iuaya, tojuantij tijtlaskamatij pampa techpaleuik. Nojkia, kema se touampo techiljuia uelis kej tikamanaltij o tlen tijchiuaj uelis amo mouika ika toTeotsij itlanauatiljuaj, amo kinamiki timoyolkokosej pampa “ya nopa tlen kichiuaj uiuitlakamej” (Ecl. 7:9). Moneki tijtlaskamatisej pampa amo majmajki kamanaltis touaya.

11. ¿Tlake ueliskia kichiuas se akajya amo ma kitlakakili tlen iuampo kitlajtolmaka?

¹¹ Tlaj timoueyimati uajka amo tijnekis tijtlakakilis tlen mouampo mitstlajtolmaka. Katli moueyimatij kinpaktia “kitlakakilisej san tlen kinpaktis” uan amo kinpaktia “kitlakakilisej tlen melauak” (2 Tim. 4:3, 4). Amo kinekij kintlakakilisej sekinok pampa moiljuiaj san inijuantij tlauel tlalnamikij uan mopatiitaj. Pablo kiijtok: “Intla se tlakatl moiljuia yajaya más ueyi kej sekinok [...] yajaya nelia mokajkayaua” (Gál. 6:3). Nojkia tlanauatijketl Salomón kiijtok: “Más kuali se telpokatl tlen teikneltsi uan tlalnamiki que se rico tlanauatijketl tlen ueuentsi uan uiuitik, uan ayok kineki kikakis consejos” (Ecl. 4:13).

12. Ipan Gálatas 2:11-14, ¿tlake tijyekouaj tlen kichijki Pedro?

¹² Apóstol Pedro technextilia se kuali neskayotl kema Pablo kitlajtolmakak ininixpa sekinok (xijpoua Gálatas 2:11-14). Ueltoskia kualanis ika Pablo pampa kitlajtolmakaj kampa itstoyaj miakej uan uelis amo kichijki kej kinamiki. Pedro amo moyolkokok, uan kinextik tlalnamiki, kiselik tlen kitlajtolmakakej uan amo kualanki ika Pablo. Uan yeka teipa kiitak kej se iikni (2 Ped. 3:15).

13. ¿Tlake moneki tikilnamikisej kema tijtlajtolmakasej se akajya?

¹³ Tlaj kemantika monekis tijtlajtolmakasej se touampo, ¿tlake moneki tikilnamikisej? Kema tijtlajtolmakasej moneki timotlatsintokisej: “¿Nimochiua ‘neltlauel’ nixitlauak?” (Ecl. 7:16). Kema se akajya mochiua tlauel xitlauak, san kintlajtolmaka ipan tlen ya moiljuia uan amo kintlajtolmaka ika Jehová itlanauatil uan nojkia amo tetlasojtla. Tlaj ya timonejneuilijkej  ipan ni tlajtlanili uan tikitaj moneki tikamanaltisej ika touampo, uajka xitlauak ma tikamanaltikaj iuaya uan ma tijchiuakaj se keski tlajtlanili tlen kipaleuis ma kiita kanke mokuapolojtok. Tlen tikiljuisej moneki tijkixtisej ipan Biblia uan tikilnamikisej touampo monextis iixpa Jehová uan ‘yajaya kitlajtolsenkauas’ uan amo tojuantij (Rom. 14:10). Ma tijtekiuikaj toTeotsij iTlajtol tlen kipia miak tlalnamikilistli, uan kema tijtlajtolmakasej se akajya moneki tijtlasojtlasej kej Jesús kichijki (Prov. 3:5; Mat. 12:20). Kej titetlajtolmakaj, Jehová nojkia kiampa kichiuas ika tojuantij (Sant. 2:13).

14. ¿Tlake kichiua toTeotsij itlanechikol tlen tlauel techpaleuia?

¹⁴ Jehová kitekiuia itlanechikol uan kiampa techpaleuia tinemisej ipan nopa ojtli tlen techpaleuis tijpiasej nemilistli nochipa. Jehová itlanechikol kikualchijchiua videos, pilamochtsitsij uan tlanechikoli tlen techpaleuia tijchiuasej tlen Biblia tetlajtolmaka. Katli kinyakanaj Jehová itlajtoltemakauaj, kiitaj ika toTeotsij itonal kenijkatsa kuali titlajtolmoyauasej. Maske kiampa kichiuaj, kema pano se keski tonali sampa kiitaj tlaj kuali tlen kitlapejpenijkej, “pampa nopa tlamantli tlen pano ipan Tlaltipaktli mopatlatia” uan yeka toikniuaj moneki kiitasej tlake nojua kichiuasej (1 Cor. 7:31).

15. ¿Tlake kiixnamiktokej se keskij toikniuaj?

¹⁵ Kema Jehová itlanechikol kiixtoma se yankuik tlamachtili o kema techiljuia kenijkatsa timonejnemiltisej, tijseliaj ika pakilistli. Uan, ¿kenijkatsa tikitaj kema kitlapejpeniaj se tlamantli tlen tojuantij amo techpaktia? Ipan se keski xiuitl tlen panotok toikniuaj kiitstokej moneki miak tomij uan kiampa kichijchiuasej uan kikualchijchiuasej kali kampa timosentiliaj. Yeka, Katli kinyakanaj Jehová itlajtoltemakauaj kiijtojkej kuali ma tijtekiuikaj nopa kali kampa timosentiliaj. Nama, ipan se keski tlanechikoli kinsansejkotilijtokej toikniuaj uan kinamakatokej se keski kali kampa timosentiliaj, uan ika nopa tomij kichijchijtokej sekinok ipan altepemej kampa tlauel moneki. Tlaj kampa timosentiliyayaj kinamakakej nopa kali o techsansejkotilijkej ininuaya sekinok toikniuaj, uelis ouij tijmatij timomatisej. Yeka, uelis se  keskij toikniuaj moneki kichiuasej se ueyi kampeka yasej tlanechikoli pampa tlauel uejka itstokej. Sekij katli chikauak tekitikej uelis moiljuiaj kenke kinamakakej uan san tlapik tekitikej. Maske kiampa kiyolmatij inijuantij kichiuaj tlen toikniuaj kitlapejpenijtokej, yeka tlauel tikintlaskamatiliaj.

16. ¿Kenijkatsa tlen kiijtoua Colosenses 3:23, 24 techpaleuia titlatekipanosej ika pakilistli?

¹⁶ Tlauel techpaleuis nojua titlatekipanosej ika pakilistli tlaj tikilnamikij tijchiuaj Jehová iteki uan ya kiyakana itlanechikol (xijpoua Colosenses 3:23, 24). David, kinextik se kuali neskayotl kema kichijchijkej teokali, ya tlapaleuik ika tomij uan kiijtok: “¿Niajkeya na? Uan ¿ajkeya inijuantij ni notlakauaj para tinechkauilis ma timitsmakakaj tlamantsitsij? Nochi ta moaxka uan san timitsmakaj tlamantli tlen ta tinechmakatok” (1 Crón. 29:14). Kema titemakaj tomij, san tijmakaj Jehová tlen ya techmakatok. Maske kiampa tijchiuaj, ya tlauel kitlaskamati pampa tijkauaj tonali, tijmakaj tochikaualis uan totomij uan kiampa titlapaleuiaj ma mochiua nopa tekitl tlen ya kineki (2 Cor. 9:7).

17. ¿Kenke amo timoyolkokosej tlaj tikitaj moneki tijpatlasej kej timonejnemiltiaj?

¹⁷ Tlauel techpaleuis tijchiuasej kej Jesús kichijki, kiampa amo tikisasej ipan nopa ojtli tlen techpaleuia tijpiasej nemilistli nochipa (1 Ped. 2:21). Amo ma timoyolkokokaj tlaj tikitaj moneki tijpatlasej kej timonejnemiltiaj. Tlauel kuali tlaj kiampa tijchiuasej pampa tijnextisej tijnekij Jehová ma techyakana. Ya kimati titlajtlakolejkej, yeka amo techchiualtia ma tijchiuakaj sanse kej Jesús, katli amo tlajtlakole.

18. ¿Tlake moneki tijchiuasej uan kiampa tiasisej kampa timosentlalijtokej?

¹⁸ Yeka, ma timosentlalikaj ipan tlen tijselisej teipa uan ma tijchiuakaj kampeka tijpatlasej kej timoiljuiaj uan tlen tijchiuaj (Prov. 4:25; Luc. 9:62). Amo ma timoueyimatikaj, ma ‘tijpiakaj pakilistli’ uan ma ‘tijsenkauakaj nochi tlen axkuali’ (2 Cor. 13:11). Tlaj kiampa tijchiuaj “toTeko Dios tlen teiknelia uan tlen temaka tlaseuilistli” itstos touaya. Uan amo san tiasitij kampa timosentlalijtokej, nojkia tiyolpakisej ika nopa nemilistli tlen tijselisej.