1. Kemej kijtoua Mateo 7:13, 14, ¿keyej tiitekitikauan Dios kemej yeskia tiajtokej kansaika?

UELISKIA tikijtoskej ke tiitekitikauan Dios kemej yeskia tiajtokej kansaika. Tiknekij tiajsiskej itech yankuik taltikpak kampa tinemiskej nochipaya uan kampa taixyekanas toDios tetasojtakej, Jiova. Mojmostaj timochikauaj tiksentokaskej itech ojti tein ompa teajxitia. Sayoj ke kemej kijtoj Jesús, nejin ojti amo patauak uan kemansa ouij techkisa itech tiaskej (xikonixtajtolti Mateo 7:13, 14). Kemej titajtakolejkej, kemansa peua oksekopa tiouij (Gál. 6:1).

2. ¿Toni tikitaskej itech nejin tamachtilis? (No xikonita recuadro “ Yolyemanilis techpaleuia maj timopatakan”).

² Komo tiknekij tiksentokaskej itech ojti tein teajxitia itech yankuik taltikpak, moneki tikpataskej kemej titanemiliaj uan tein tikchiuaj. Yejua nejon kijtosnekia tatitanil Pablo keman kiniluij tokniuan akin nemiaj Corinto: “Ximoyojyolmajxitijtiyakan” (2 Cor. 13:11). Tein kiniluij kisentoka tapaleuia axkan. Itech nejin tamachtilis, tikitaskej keniuj Biblia uelis techpaleuis maj tikpatakan seki taman uan keniuj tokniuan akin kuali iniuan timouikaj uan kikauaj se kuali neskayot uelis techpaleuiskej maj tiksentokakan itech ojti tein teajxitia itech yankuik taltikpak. No tikitaskej kemanian uelis ouij techkisas tiktakamatiskej tein kiixtalia inechikol Jiova. Uan no ika titajtoskej keyej moneki tiyeskij tiyolyemankej komo tiknekij tikpataskej seki taman uan tiksentokaskej tiktekitiliskej Jiova ika yolpakilis.

3. ¿Keniuj techpaleuia iTajtol Dios?

³ Ouij techkisa tikmatiskej toni yekmelauj tiknemiliaj uan toni tikmachiliaj. ¿Keyej? Porin kemej toyolo techkajkayaua uelis  ouij techkisas tikmatiskej toni techolinis maj tikchiuakan (Jer. 17:9). Miakpa toselti timokajkayauaj (Sant. 1:22). Yejua ika moneki tikuiskej iTajtol Dios porin techpaleuis maj tikmatikan toni tiknemiliaj uan toni tiknejnekij (Heb. 4:12, 13). Biblia kemej yeskia tepos tein ika kikixtiaj radiografías, tein tapaleuia maj se kimati keniuj se moajsi taijtik. Sayoj ke moneki tiyeskij tiyolyemankej komo tiknekij maj techpaleui tein Biblia tayolmajxitia uan tein techyolmajxitiaj akin Dios kinixtalijtok maj techixyekanakan.

4. ¿Keniuj tikmatij ke tekiuaj Saúl peuak moueyimati?

⁴ Tein kichiuak tekiuaj Saúl kinextia tein uelis panos komo amo tiyolyemankej. Kemej semi moueyimatia, amo kinekik kiajsikamatis ke monekia kipatas kemej tanemiliaya uan tein kichiuaya (Sal. 36:1, 2; Hab. 2:4). Kemej neskayot, keman Jiova kiluij toni monekia kichiuas keman kintaniskia amalequitas, Saúl amo kitakamatik. Uan keman tanauatijkej Samuel kiluij ke amo tatakamatik, Saúl amo kijtoj ke mopoloj, ta motenpaleuij keman kiteajsikamatiltij ke amo kinemiliaya ke kichiujka tein amo kuali uan keman kintajtakoltij oksekin (1 Sam. 15:13-24). Uan amo sayoj ijkuak kichiuak nejon (1 Sam. 13:10-14). Saúl peuak moueyimati, uan kemej amo kipatak kemej tanemiliaya, Jiova kimelauak oso kitakakiltij uan kiixtopeuak.

5. ¿Toni techmachtia tein kipanok Saúl?

⁵ Amo tiknekij tikchiuaskej kemej Saúl, yejua ika moneki timotajtaniskej: “¿Nimotenpaleuia keman nikixtajtoltia teisa tein Biblia tayolmajxitia tein monekiskia nikchiuas? ¿Niknemilia ke tein nikchiujtok amo se taman tein amo kuali? ¿Nikintajtakoltia oksekin tein nejua nikchiua?”. Komo itech semej nejin netajtanilmej titanankilijkej ke kemaj, moneki tikpataskej kemej titanemiliaj. Komo amo tikpataj, uelis semi timoueyimatiskej uan Jiova amo kinekisok mouikas touan (Sant. 4:6).

6. ¿Keyej David amo katka kemej Saúl?

⁶ Tekiuaj David amo kichiuak kemej tekiuaj Saúl. David kipatiuitaya “itanauatil Jiova” (Sal. 1:1-3). Kimatia ke Jiova kinmakixtia akin yolyemankej uan kinixtopeua akin moueyimatij (2 Sam. 22:28). Yejua ika kikauak maj iTajtol Dios kipaleuiani maj kipata kemej tanemiliaya. Kijkuiloj: “Nikueyichiuas Jiova, akin nechyolmajxitiani. Hasta youak, notanemililuan tein moajsij okachi noyolijtik nechmelauaj” (Sal. 16:7).

7. ¿Toni tikchiuaskej komo tiyolyemankej?

⁷ Komo tiyolyemankej, tikauaskej maj Biblia techpaleui maj tikpatakan tein amo kuali tein tiknemiliaj achto ke tikchiuaskej. ITajtol Dios kemej yeskia technotsas uan techiluis: “Yejua nejin ojti. Itech xinentinemi”. Technauatis komo peua oksekopa tiouij (Is. 30:21). Komo tikakij Jiova semi techpaleuis (Is. 48:17). Kemej neskayot, amo timopinaujmatiskej porin amo monekis maj techiluikan ke amo kuali tein tikchiujtokej. Uan okachi timotokiskej iuan Jiova porin tikitaskej ke toka motekipachoua kemej se tepopaj tetasojtakej (Heb. 12:7).

8. Kemej kijtoua Santiago 1:22-25, ¿keniuj iTajtol Dios uelis yeski kemej se espejo?

⁸ ITajtol Dios uelis yeski kemej se espejo oso teskat kampa uelis timoitaskej (xikonixtajtolti Santiago 1:22-25). Mojmostaj kualkan, timiakej timomattokej timoitaskej itech se espejo achto ke tiaskej kansaika. Ijkon tikmatij ox moneki tikyektaliskej teisa achto ke oksekin techitaskej. No ijkon, keman tikixtajtoltiaj Biblia mojmostaj, tikmatij ox moneki tikyektaliskej kemej titanemiliaj. Miakej tokniuan kiixtajtoltiaj mojmostaj kualkan tajkuilol tein ixyetok moixtajtoltis sejse tonal uan itech tanemiliaj. Ompa kitemouaj keniuj uelis kichiuaskej itech nejon tonal tein kiixtajtoltijkej. Uan no, moneki mojmostaj tikixtajtoltiskej Biblia uan itech titanemiliskej. Moneki tikchiuaskej nejin porin  techpaleuis maj tiksentokakan itech ojti tein teajxitia itech yankuik taltikpak.

9. ¿Keyej xa monekis maj tajto touan se akin kuali iuan timouikaj?

⁹ ¿Se tonal peujka tikchiuaj teisa tein techuejkatilijtoya iuan Jiova? (Sal. 73:2, 3). Komo se akin kuali iuan timouikaj akin kikaua se kuali neskayot moyolchikauak techiluis ke amo kuali tein tikchiujtoyaj, ¿tikakkej uan tikchiujkej tein techyolmajxitij? Komo kemaj, semi kuali tein tikchiujkej, uan xa semi tiktasojkamatij maj tajtouani touan (Prov. 1:5).

10. ¿Toni monekiskia tikchiuaskej komo se akin kuali iuan timouikaj techiluia ke amo kuali tein tikchiujtokej?

¹⁰ ITajtol Dios techelnamiktia ke “se tetasojikniuj akin yekmelauj tetasojta teyolkokoua” (Prov. 27:6). ¿Toni kijtosneki nejin? Maj tiknemilikan ke tipanotij itech se ojti kampa panouaj miak carros uan tikchixtokej maj moketsakan. Peua tikitaj tocelular uan peua tiojtokaj sayoj ke amo timoixajokuij. Sepasaj, se akin kuali iuan timouikaj techmatilana. Kemej semi chikauak techtilanak, hasta tileuik kampa techkitskij, sayoj ke ijkon techpaleuij maj amo techtopeuani se carro. Xa techkokojtos tomay seki tonalmej, sayoj ke amo tikualaniskej iuan, ta semi timotasojkamatiskej porin techpaleuij. No ijkon, komo se akin kuali iuan timouikaj techiluia ke tein tikijtouaj oso tein tikchiuaj kitapanauilia itanauatiluan Dios, yekinika xa timoyolkokoskej. Sayoj ke maj amo tikualanikan porin techyolmajxitij. Komo tikualanij tiknextiskej ke amo titamatij (Ecl. 7:9). Tein melauj, monekiskia tiktasojkamatiliskej porin moyolchikauak tajtos touan.

11. ¿Toni ueliskia kichiuas maj amo tikakikan tein techyolmajxitia se akin kuali iuan timouikaj?

¹¹ ¿Toni ueliskia kichiuas maj amo tikakikan tein techyolmajxitia se akin kuali iuan timouikaj? Komo timoueyimatij. Akin moueyimatij kiuelitaj maj kiniluikan tein kinekij kikakiskej uan amo kikakijok “ten melau Tajtoltsin de Dios” (2 Tim. 4:3, 4). Amo kinkakij akin kinyolmajxitiaj porin kinemiliaj ke yejuan kipiaj okachi tamatilis uan okachi ueyichiuanimej. Sayoj ke tatitanil Pablo kijtoj: “Takan se aksa kiyolmachilia ke semi ueyi chiuke maski amo melau teyi chiuke, ijkuakon yejua san moyolkajkayautok” (Gál. 6:3). Tekiuaj Salomón kuali kimelauak toni kijtosneki nejin: “Okachi kuali moajsi se okichpil akin amo teyi kipia sayoj ke tamatkej ke se tekiuaj akin xiuejya sayoj ke amo tamati, akin amo kinekiok kikakis tein kiyolmajxitiaj” (Ecl. 4:13).

12. Keman tikixtajtoltiaj Gálatas 2:11-14, ¿toni techmachtia tein kichiuak tatitanil Pedro?

¹² Tatitanil Pedro techkauilij se kuali neskayot keman tatitanil Pablo kiluij teixtenoj ke amo kuali tein kichiujtoya (xikonixtajtolti Gálatas 2:11-14). Pedro ueliskia kualanis iuan Pablo porin amo kiyeknojnotsak uan keman iuan tajtoj kikaktoyaj oksekin. Sayoj ke kemej Pedro katka tamatkej, kikakik tein Pablo kiyolmajxitij uan amo kualanik iuan, ta keman satepan ika tajtoj kijtoj “totasojikniu Pablo” (2 Ped. 3:15).

13. ¿Toni moneki tikelnamikiskej achto ke titayolmajxitiskej?

¹³ Komo se tonal tiknemiliaj ke moneki tikyolmajxitiskej se akin kuali iuan timouikaj, ¿toni moneki tikelnamikiskej? Achto ke titajtoskej iuan, maj timotajtanikan: “¿Yekmelauj kichiuak tein amo kuali oso ipa niknemilia ke amo moneki se mopolos?” (Ecl. 7:16). Akin kinemilia ke nion tepitsin moneki se mopolos amo kitojtoka itanauatiluan Jiova, ta kemej yejua kiita ke moneki mochiuas teisa, uan yejua ika kinemilia ke oksekin kichiuaj tein amo kuali uan amo teiknelia. Komo satepan ke itech titanemilijkejya nejin, tiksentokaj tiknemiliaj  ke moneki iuan titajtoskej akin kuali iuan timouikaj, maj tikyekiluikan toni tikitaj ke amo kiyekchiujtok uan maj tikchiuilikan netajtanilmej tein ika tikpaleuiskej maj kiita ke mopolojtok. Tein tikiluiskej moneki kisas itech Biblia, uan maj tikelnamikikan ke amo tejuan technamiki tikmelauaskej, ta tikpaleuiskej maj kiajsikamati keniuj momachilia Jiova ika tein kichiujtok (Rom. 14:10). Maj tikuikan iTajtol Dios tein kipia miak tamatilis. Uan keman titayolmajxitiskej, maj titeiknelikan kemej Jesús (Prov. 3:5; Mat. 12:20). ¿Keyej? Porin tein tejuan tikchiuaskej iniuan oksekin, Jiova no ijkon kichiuas touan (Sant. 2:13).

14. ¿Toni kichijchiua inechikol Dios?

¹⁴ Ika inechikol tein moajsi nikan taltikpak, Jiova techixyekana itech ojti tein teajxitia itech yankuik taltikpak. Nejin nechikol kichijchiua videos, amaixmej uan kichiua nechikolmej tein techpaleuiaj maj tikmatikan keniuj tikchiuaskej tein Biblia tayolmajxitia. Ueli titakuaujtamatij itech nejin tamachtilis porin kisa itech iTajtol Dios. Tokniuan Oloch Taojtokaltianij kitemouaj maj yektikatsin espíritu kinixyekana keman kiixejekouaj keniuj uelis okachi kuali motanojnotsas. Maski ijkon, satepan kiitaj ox moneki kipataskej tein kiixtalijkej. ¿Keyej? Porin “tein panoua itech taltikpak mopatatok” uan tein kiixtalia inechikol Dios moneki mouikas ika tein panotok (1 Cor. 7:31, TNM).

15. ¿Toni monekini kichiuaskej seki tokniuan?

¹⁵ Keman inechikol Dios kipata kemej kimelauaya se tamachtilis oso techiluia keniuj uelis tichipaujkanemiskej, niman titatakamatij. Sayoj ke ¿toni tikchiuaj komo tein kiixtaliaj kipata okseki taman itech tonemilis? Kemej neskayot, semi patiyouani se kichijchiuas uan se kiyektalis kalmej kampa tikueyichiuaj Jiova. Yejua ika tokniuan Oloch Taojtokaltianij kiixtalijkej maj kuali mokuikan Kalmej kampa tiMosentiliaj. Nejin kichiuani maj kinnamakakan seki uan maj seki nechikolmej kinsentilikan iniuan oksekin. Ika tomin tein mosentilia mochijchiuaj okseki Kalmej kampa tiMosentiliaj itech xolalmej kampa okachi monekij. Komo kampa tinemij kinnamakatokej seki uan kinsentilijtokej seki nechikolmej, xa ouij techkistok timomatiskej. Seki tokniuan axkan moneki okachi uejka yaskej nechikolmej. Oksekin akin semi tekitikej keman mochijchiuak se Kali kampa tiMosentiliaj oso tapaleuijkej maj kuali moajsi xa motajtaniaj keyej kinamakaj. Xa kinemiliaj ke nenkaj nochi  tein kichiujkej. Maski ijkon, tatakamatij uan semi kuali tein kichiuaj.

16. ¿Keniuj techpaleuia 2 Corintios 6:1 maj tiksentokakan tiyolpakikan?

¹⁶ Tiksentokaskej tiyolpakiskej komo tikelnamikij ke tiktekitiliaj Jiova uan ke yejuatsin kiixyekantok inechikol (xikonixtajtolti 2 Corintios 6:1). Tekiuaj David techkauilij se kuali neskayot keman tapaleuij ika tomin keman mochijchiuaskia templo. Kijtoj: “¿Toni nichiujkej nejua uan toni chiujkej noxolal yejua ika ueli timitsmakaj nejin netetayokolilmej? Porin nochi motech ualeua, uan tein timitsmakakej ualeua momako” (1 Crón. 29:14). Keman titapaleuiaj ika tomin, no tikmakaj Jiova tein yejuatsin techmakak. Maski ijkon, Jiova kitasojkamati maj titapaleuikan ika totiempo, tochikaualis uan tein tikpiaj itech tekit tein yejuatsin kineki maj tikchiuakan (2 Cor. 9:7).

17. ¿Keyej moneki amo timosenkauaskej komo tikitaj ke moneki tikpataskej seki taman?

¹⁷ Komo tiknekij tiksentokaskej itech ojti tein amo patauak tein teajxitia itech yankuik taltikpak, moneki tikchiuaskej kemej Jesús (1 Ped. 2:21). Komo tikitaj ke moneki tikpataskej seki taman, maj amo timosenkauakan. Tein melauj, semi kuali komo tikitaj ke moneki timopataskej porin kinextia ke tiknekij maj Jiova techixyekana. Yejuatsin kimati ke titajtakolejkej, yejua ika amo kichia maj senkis tikchiuakan ijkon kemej Jesús kichiuak.

18. ¿Toni moneki tikchiuaskej komo tiknekij tiajsiskej itech yankuik taltikpak?

¹⁸ Maj itech titanemilikan tein tikseliskej satepan uan maj tikixtalikan tikpataskej kemej titanemiliaj uan tein tikchiuaj (Prov. 4:25; Luc. 9:62). Maj tiksentokakan tiyolyemankej uan maj tikchiuakan tein kijtoua 2 Corintios 13:11: “Ma mokaua ueyi yolpakilis namouan [...]. Uan ximoyojyolmajxitijtiyakan”. Komo ijkon tikchiuaj, Jiova, akin “teyolseuia uan teyoltasojta”, yetos touan. Uan amo sayoj tinemiskej itech yankuik taltikpak, ta tiyolpakiskej keman tiajtoskej itech ojti tein ompa teajxitia.