1. Ngokwalokho okutshiwo kuMathewu 7:13, 14, kungani sisithi siphakathi kohambo?

SONKE siphakathi kohambo, silubangise emhlabeni omutsha lapho esizabe sibuswa khona nguNkulunkulu wethu osithandayo. Nsuku zonke siyazama ukuhamba endleleni eya ekuphileni. Kodwa uJesu wathi indlela le incinyane futhi ngezinye izikhathi kunzima ukuhamba kuyo. (Bala uMathewu 7:13, 14.) Silesono yikho kulula ukuthi siphambuke endleleni le.—Gal. 6:1.

2. Sizaxoxa ngani esihlokweni lesi? (Khangela lebhokisi elithi “ Ukuthobeka Kuyasinceda Ukuthi Sitshintshe.”)

² Nxa sifuna ukuhlala sisendleleni encinyane eya ekuphileni, kumele sizimisele ukutshintsha indlela esicabanga lesenza ngayo kanye lalokho esikuthandayo. Umphostoli uPhawuli wakhuthaza amaKhristu aseKhorinte ukuthi aqhubeke ‘elungisiswa.’ (2 Khor. 13:11) Akutshoyo kuyasebenza lakithi. Esihlokweni lesi sizaxoxa ngokuthi iBhayibhili lingasinceda njani ukuthi sitshintshe lokuthi abangane abaqinileyo ekukhonzeni bangasisiza njani ukuthi sihlale sisendleleni eya ekuphileni. Sizafunda lokuthi kuyini okungenza kube nzima ukuthi silalele lokho esikutshelwa yinhlanganiso kaJehova. Kanti njalo sizabona ukuthi ukuthobeka kungasinceda njani ukuthi sitshintshe futhi siqhubeke sithokoza ekukhonzeni uJehova.

3. ILizwi likaNkulunkulu lingakunceda njani?

³ Inhliziyo iyakhohlisa futhi akulula ukwazi ukuthi ingabe isisa ngaphi. (Jer. 17:9) Yikho kungaba nzima ukuthi sihlole lokho esikucabangayo lendlela esizizwa ngayo. Phela kulula ukuziyenga “ngemicabango engamanga.” (Jak. 1:22) Ngakho kumele sizihlole sisebenzisa iLizwi likaNkulunkulu. Liveza lokho esiyikho ngaphakathi, okutsho  “imicabango lenhloso” zenhliziyo zethu. (Heb. 4:12, 13) ILizwi likaNkulunkulu linjenge-X-ray ngoba liyasitshengisa lokho esiyikho ngaphakathi. Kodwa kumele sithobeke ukuze silalele iseluleko esisithola eBhayibhilini kumbe esisiphiwa yilabo abakhokhelayo enhlanganisweni.

4. Kuyini okutshengisa ukuthi iNkosi uSawuli yavumela inhliziyo yayo ukuthi izigqaje?

⁴ Okwenzakala eNkosini uSawuli kusitshengisa ukuthi ukungathobeki kungabangelani. USawuli wayezigqaja kakhulu okokuthi wayengavumi ukuthi kumele alungisise indlela ayecabanga layesenza ngayo. (Hubo. 36:1, 2; Hab. 2:4) Lokhu kwakhanya ngesikhathi uJehova emtshela okwakumele akwenze esenqobe ama-Amaleki. Kodwa uSawuli kazange alalele. Kanti njalo ngesikhathi umphrofethi uSamuyeli emtshela ngokungalaleli kwakhe, kazange avume ukuthi uphambanisile. Wazama ukucatsha ngomunwe esithi ayekwenzile akukubi kangako futhi wesulela icala kwabanye. (1 Sam. 15:13-24) USawuli wayengaqalisi ukwenza njalo. (1 Sam. 13:10-14) Kuyadanisa ukuthi wavumela inhliziyo yakhe ukuthi izigqaje. Kazange atshintshe indlela ayecabanga ngayo futhi uJehova wamsola wasemlahla.

5. Sifundani kulokho okwenzakala kuSawuli?

⁵ Kasifuni ukuba njengoSawuli yikho kumele sizibuze imibuzo le: ‘Ngiyadinga yini izizatho zokungalaleli iseluleko engisibala eLizwini likaNkulunkulu? Ngicabanga ukuthi engikwenzayo akukubi kangako yini? Nxa ngenze iphutha, ngesulela icala kwabanye yini?’ Nxa ukhona umbuzo esiwuphendule ngo-ye, kumele silungisise indlela esicabanga ngayo. Singayekela ukulungisisa singazigqaja futhi lokhu kungenza uJehova asilahle singasabi ngabangane bakhe.—Jak. 4:6.

6. Yiwuphi umehluko owawukhona phakathi kweNkosi uSawuli leNkosi uDavida?

⁶ Kulomehluko phakathi kweNkosi uSawuli leNkosi uDavida. UDavida wayewuthanda ‘umthetho kaJehova.’ (Hubo. 1:1-3) Wayekwazi ukuthi uJehova usindisa abathobekileyo, amelane labazigqajayo. (2 Sam. 22:28) Yikho wavumela umthetho kaNkulunkulu ukuthi ulungisise indlela ayecabanga ngayo. Wabhala wathi: “Ngizamdumisa uJehova, onguye ongelulekayo; lasebusuku inhliziyo yami iyangiqondisa.”—Hubo. 16:7.

7. Sizakwenzani nxa sithobekile?

⁷ Nxa sithobekile sizavumela iLizwi likaNkulunkulu ukuthi liqondise imicabango emibi esingabe silayo, ingakabangeli ukuthi senze okubi. Liyabe linjengelizwi elithi: “Le yiyo indlela; hambani ngayo.” Lizasixwayisa nxa sesiphambuka. (Isaya. 30:21) Ukulalela uJehova kuzasinceda kakhulu. (Isaya. 48:17) Ngokwesibonelo, akusoze kudingakale ukuthi siqondiswe ngomunye okungenza siyangeke. Kanti njalo sizasondela kuJehova ngoba siyabe sinanzelela ukuthi usiphatha njengabantwana abathandwayo.—Heb. 12:7.

8. Ngokwalokho okutshiwo kuJakhobe 1:22-25, iLizwi likaNkulunkulu lingasebenza njani njengesibuko?

⁸ ILizwi likaNkulunkulu lingasebenza njengesibuko. (Bala uJakhobe 1:22-25.) Abanengi bethu sijayele ukuzibuka esibukweni nsuku zonke ekuseni singakaphumi endlini ukuze sibone lapho esidinga ukulungisisa khona abanye bengakasiboni. Lokubala iBhayibhili nsuku zonke kuzasisiza sibone ukuthi singalungisisa njani indlela esicabanga ngayo. Abanengi kuyabanceda ukubala umbhalo wosuku ekuseni bengakaphumi endlini. Bavumela abakubalileyo ukuthi kutshintshe indlela abacabanga ngayo futhi bayadinga izindlela abangakusebenzisa  ngazo ngelanga lelo. Kanti njalo kumele sitaditshe futhi sicabangisise nsuku zonke ngesikubala eLizwini likaNkulunkulu. Lokhu ngokunye okuqakathekileyo okungasinceda ukuthi siqhubeke sisendleleni encinyane eya ekuphileni.

9. Kuyabe sekutheni nxa umngane wakho esekukhuza?

⁹ Kwake kwaba lesikhathi lapho owawusuphambuka khona endleleni eya ekuphileni yini? (Hubo. 73:2, 3) Wasilalela yini iseluleko owasinikwa ngumngane oqinileyo ekukhonzeni owaba lesibindi sokukukhuza? Nxa walalela, wenza kuhle futhi akuthandabuzwa ukuthi uyambonga umngane wakho owakuxwayisayo.—Zaga. 1:5.

10. Kumele wenzeni nxa umngane wakho angakukhuza?

¹⁰ ILizwi likaNkulunkulu lithi: “Amanxeba omngane athembekile.” (Zaga. 27:6, TBS) Atshoni amazwi la? Nanku umzekeliso ongasinceda siwazwisise: Ake sithi ufuna ukuchapha umgwaqo ophithizelayo. Uthi usuchapha ungazange ukhangele izimota ngenxa yokuthi usebenzisa ifoni umngane wakho akudonse ngengalo. Ukudonsa ngamandla okokuthi usala usizwa ubuhlungu, kodwa akwenzileyo kukuncede wangatshaywa yimota. Lanxa uzasala usizwa ubuhlungu okwensuku ezithile, uzamzondela yini umngane wakho ngokuthi ukudonsile? Ngitsho! Uzambonga ngalokho akwenzileyo. Ngendlela efananayo, nxa umngane angakutshela ukuthi okukhulumayo kumbe okwenzayo akuhambelani lezimiso zikaJehova, ungezwa ubuhlungu okwesikhathi esithile. Kodwa ungamzondeli ngoba ukwenza njalo kuyabe kuyibuthutha. (UmTshu. 7:9) Kumele umbonge ngokuthi ube lesibindi sokukukhuza.

11. Kuyini okungenza umuntu angalaleli nxa umngane wakhe emkhuza?

¹¹ Kuyini okungenza umuntu angalaleli nxa umngane wakhe emkhuza? Yikuzigqaja. Abantu abazigqajayo bakholisa ‘ukutshelwa lokho abafuna ukukuzwa.’ Kabafuni “ukulalela iqiniso.” (2 Tim. 4:3, 4) Bacabanga ukuthi kabadingi ukunikwa iseluleko ngenxa yokuthi bazibona behlakaniphile futhi beqakathekile kulabanye. Kodwa umphostoli uPhawuli wabhala wathi: “Loba ngubani ocabanga ukuthi uqakathekile yena engasilutho uyaziyenga.” (Gal. 6:3) INkosi uSolomoni yakuchasisa kuhle lokhu. Yathi: “Lingcono ijaha elingumyanga kodwa lihlakaniphile kulenkosi endala eyisiwula eyalayo ukwamukela izixwayiso.”—UmTshu. 4:13.

12. Ngokwalokho okutshiwo kuGalathiya 2:11-14, sifundani kulokho okwenziwa ngumphostoli uPhetro?

¹² Cabanga ngokwenziwa ngumphostoli uPhetro ngesikhathi umphostoli uPhawuli emnika iseluleko phambi kwabantu. (Bala uGalathiya 2:11-14.) Wayengacatshulwa yindlela uPhawuli ayekhulume ngayo lokuthi umkhuzele ebantwini. Kodwa uPhetro watshengisa ukuthi uhlakaniphile wavuma ukukhuzwa futhi kazange abambe isikhwili. Ngokuhamba kwesikhathi wathi uPhawuli ‘ngumfowabo othandekayo.’—2 Phet. 3:15.

13. Kuyini okumele ucabange ngakho nxa ufuna ukweluleka omunye?

¹³ Kuyini okumele ucabange ngakho nxa ufuna ukweluleka umngane? Ungakamlandi zibuze, ‘Sengilunge ngedlulisa yini?’ (UmTshu. 7:16) Umuntu olunge wedlulisa wahlulela abanye ngendlela yakhe hatshi ekaJehova futhi kalazwelo. Nxa ungathi usuzihlolile ubusubona ukuthi kumele uyekhuluma lomngane wakho, mtshele akuphambanisileyo njalo umbuze imibuzo ezamnceda abone iphutha lakhe.  Woba leqiniso lokuthi okutshoyo kusekelwe eBhayibhilini njalo ukhumbule ukuthi ayisuwe okumele wahlulele umngane wakho kodwa nguJehova. (Rom. 14:10) Sebenzisa iLizwi likaNkulunkulu nxa unika omunye iseluleko njalo ube lozwelo njengoJesu. (Zaga. 3:5; Mat. 12:20) Phela uJehova uzasiphatha ngendlela esiphatha ngayo abanye.—Jak. 2:13.

14. Inhlanganiso kaNkulunkulu isenzeleni?

¹⁴ UJehova usikhokhela endleleni eya ekuphileni esebenzisa ingxenye esemhlabeni yenhlanganiso yakhe. Inhlanganiso le isenzela amavidiyo, amabhuku lemihlangano yebandla esinceda sonke ukuthi sisebenzise iseluleko esiseLizwini likaNkulunkulu. Konke esikufundayo kuliqiniso ngoba kusekelwe eMibhalweni. Abafowethu beQula Elibusayo bathemba umoya ongcwele ukuthi ubancedise nxa besenza izinqumo eziphathelane lomsebenzi wokutshumayela. Lanxa kunjalo bahlala behlola izinqumo abazenzileyo ukuze babone ukuthi kuyadingeka yini ukuthi batshintshe ngoba “umumo womhlaba lo uyantshintsha.” Yikho inhlanganiso kaNkulunkulu kumele ivumelane lotshintsho oselukhona.—1 Khor. 7:31.

15. Kuyini okungathwalisa nzima abanye abamemezeli?

¹⁵ Akuthandabuzwa ukuthi siyalalela nxa inhlanganiso itshintsha lokho ebesikukholwa kumbe isitshela okumele sikwenze endabeni zokuziphatha. Kodwa kuthiwani nxa isenza utshintsho oluphathelane lendlela ebesisenza ngayo izinto? Ngokwesibonelo, khathesi sekudula ukwakha lokunakekela izindawo zokukhonzela. Yikho iQula Elibusayo lathi amabandla amanengi asebenzise iWolu yoMbuso eyodwa. Lokhu kwenze amanye amabandla ahlanganiswa futhi amanye amaWolu oMbuso athengiswa. Imali etholakale lapho isetshenziswa ukwakha amawolu lapho adingakala khona kakhulu. Nxa uhlala endaweni lapho amawolu athengiswa khona lalapho amabandla ahlanganiswa khona kungakuthwalisa nzima ukuthi ujayele utshintsho lolu. Abanye abamemezeli sebehamba imango emide nxa besiya emihlanganweni yebandla. Labo abasebenza nzima besakha kumbe benakekela iWolu yoMbuso bangazibuza ukuthi kungani isithengiswa. Bangabona angani badlalisa isikhathi lamandla abo. Lanxa  kunjalo, bayalwamukela utshintsho lolu futhi siyabancoma.

16. Ukulalela iseluleko esikuKholose 3:23, 24 kuzasinceda njani ukuthi sihlale sithokoza?

¹⁶ Sizahlala sithokoza nxa singakhumbula ukuthi konke esikwenzayo sikwenzela uJehova lokuthi nguye okhokhela inhlanganiso yakhe. (Bala uKholose 3:23, 24.) Ngesikhathi iNkosi uDavida inikela ukuthi kwakhiwe ithempeli yakunanzelela ukuthi konke ekwenzayo ikwenzela uJehova. Yathi: ‘Mina ngiyini, bayini abantu bami, ukuthi sinikele ngenhliziyo yonke na? Konke kuvela kuwe, thina sikunike lokho okuvela esandleni sakho.’ (1 ImiLan. 29:14) Lathi nxa sinikela siyabe sinika uJehova lokho okuvela esandleni sakhe. Lanxa kunjalo uyathokoza nxa esibona sisebenzisa isikhathi, lamandla lemali yethu ukuthi sisekele umsebenzi afuna wenziwe.—2 Khor. 9:7.

17. Kungani kungamelanga udane nxa kumele ulungisise amanyathelo akho?

¹⁷ Sonke kumele silandele eduze amanyathelo kaJesu ukuze sihlale sisendleleni encinyane eya ekuphileni. (1 Phet. 2:21) Nxa ungabona angani kumele ulungisise amanyathelo akho ungadani, ngoba lokhu kungabe kutshengisa ukuthi uzimisele ukulandela lokho uJehova asitshela khona. Khumbula ukuthi uJehova uyakwazi ukuthi silesono, yikho kalindelanga ukuthi silandele isibonelo sikaJesu ngendlela epheleleyo.

18. Kumele senzeni ukuze sifike lapho esilubangise khona?

¹⁸ Kwangathi sonke singawathi nhlo amehlo ethu phambili futhi sizimisele ukutshintsha indlela esicabanga lesenza ngayo kanye lalokho esikuthandayo. (Zaga. 4:25; Luk. 9:62) Kasihlaleni sithobekile, ‘siqhubeke sithokoza, silungisiswa.’ (2 Khor. 13:11) Nxa singenza njalo, “uNkulunkulu wothando lokuthula uzakuba [lathi].” Kanti njalo sizalukholisa uhambo lwethu size siyefika emhlabeni omutsha.