1. Mukuzwirana na Mateu 7:13, 14, ngenyi tingananga kuti itusu tiri pa hwendo?

TESE tiri pa hwendo, no cido co kuda kuguma mu nyika imbza inotongwa ndi Jehovha. Njiku jese, tinoeja kuteveja gwanja rinotiendesa ku upenyu. Asi Jesu wakananga kuti gwanja iri rakadodoka zve nguva jimweni tinosongana no zvineso. (Verenganyi Mateu 7:13, 14.) Zvecivoneka kuti atizivi kukwana, zvakareruka kusiya gwanja iri.—VaGalàsia 6:1.

2. Tinozovonenyi pa musoro uno? (Vonanyi bhokiso rinoti: “ Kujidodokesa Kunotibesera Kuti Tiite Cinjo.”)

² Kudari tecida kuramba tiri mu gwanja rakadodoka rinoendesa ku upenyu, itusu tinodikana kuva no cido co kucinja murangariro wedu no zviito. Mupostori Pauro wakavangisa Makristu aigara ku Korinto kuti arambe ‘ecirungamiswa.’ (2 VaKorinto 13:11, Shanduro yeNyika Itsva) Mbhangiro iyi, inoshandavo kwatiri. Pa musoro uwu, tinozojija kuti Bhaibheri ringatibeseresa kudini kuti tiite cinjo no kuvona kuti shamwari jakaivha kumujimu jingatibeseresa kudini kuti tirambe tiri mu gwanja rinoendesa ku upenyu. Tinozovonazve kuti ngenyi zvinonesa kuteveja ndhungamiro jatinopuwa ngo sangano ra Jehovha. Pejisire, tinozovona kuti, kujidodokesa kungatibeseresa kudini kuti tiite cinjo ticikaruzi mudakaro pa kushandira kwedu Jehovha.

3. Soko ra Mwari ringatibeseresa kudini?

³ Azvizivi kureruka kupopora murangariro no mazwiro edu. Ngenyi? Ngokuti mwoyo wedu unocengeja zve ungatiita kuti tinesehwe kuziva zvatiri kuita. (Jeremia 17:9) Zvakareruka maningi kujicengeja tega ngo murangariro jo kunyepa. (Jakobo 1:22) Ngokudaro, tinodikana kushandisa Soko ra Mwari kuti tijipopore. Soko ra Mwari rinokwanisa kutivhunja zviya zvatiri ngo mukati, “murangariro no bziri mu mwoyo.” (Vaheberi 4:12,  13) Ngo divi rimweni, Soko ra Mwari rakadari inga mucini wo Raio-x, unokwanisa kupopora zviro zvaticikakwanisi kuvona. Kudari tecida kubesereka ngo mbhangiro inovha mu Bhaibheri kana ku vashandiri va Mwari, tinodikana kujidodokesa.

4. Tinozvizivisa kudini kuti Mambo Sauri wakaguma pa kujikuja?

⁴ Muezaniso wa Mambo Sauri unokhombija zviro zvingaitika kudari tikatama kujidodokesa. Sauri wakatanga kujikuja, wotama kutendera kuti murangariro no zviito zvake zvaidikana kurungamiswa. (Nduyo 36:2, 3; Habakuki 2:4) Izvo zvakanasa kuvoneka Jehovha paakapera kupa ndhungamiro jaaidikana kuita pakupera kuhwisana no Vaamareki. Zvokadi kamare, Sauri aazivi kuzwira Jehovha. Cimwenizve, muporofita Samueri paakaenda kobhuya naye ngo zvaainga akaita, iyena aazivi kutendera kuti wainga washaisha. Kusiyapo zvondhozvo, wakatogumira pa kunanga kuti aicaengepi shwiro huru zve vandhu ndivona vainga vakamuvangirija kuita zvondhozvo. (1 Samueli 15:13-24) Izvi zvicito zvaitika, Sauri wainga wakaitazve zvimweni zvakafanana. (1 Samueli 13:10-14) Zvinosuruvarisa ngo zvokuti iyena wakatendera kuti mwoyo wake ujikuje. Iyena aazivi kucinja manera ake okurangarira zvoita kuti Jehovha amurambe.

5. Tingajijenyi ngo muezaniso wa Sauri?

⁵ Kuti tijije ngo muezaniso wa Sauri, tinodikana kujiita muvhunjo iji: ‘Pandinonga ndeciverenga mbhangiro inovha mu Soko ra Mwari, ndinojiinikira here? Ndinorangarira kuti zvondaitaro azvizivi kushata maningi here? Kunanga kuti ndinopa ndava vamweni ngo zvandiri kuitari here?’ Kudari tikadavira kuti hina pa muvhunjo japerari kuitwa, tinodikana kucinja murangariro wedu. Ngo divi rimweni, mwoyo wedu ungaguma pa kuzvikuja zvoita kuti Jehovha atirambe inga shamwari jake.—Jakobo 4:6.

6. Mambo Sauri na Mambo Dhavhidhi vainga vakasiyana papi?

⁶ Vonanyi musiyano uripo kuvhira ka Mambo Sauri na wiya wakazotevera, Mambo Dhavhidhi, uwo waida “mupango wa Mwari.” (Nduyo 1:1-3) Dhavhidhi waiziva kuti Jehovha anoponesa vese vanozvidodokesa, wonyenya vanozvikuja. (2 Samueli 22:28) Dhavhidhi wakatendera kuti mupango wa Mwari ucinje murangariro wake. Iyena wakatara kudari: “Ndinoromberera Tenji Mwari, mupangiri wangu, no usiku kamare, hwiru hwangu hunondijijisa.”—Nduyo 16:7.

7. Zvicinyi zvatinozoita kudari tikazvidodokesa?

⁷ Kudari tikazvidodokesa, tinozotendera kuti Soko ra Mwari rirungamise murangariro wedu wakashata ucito watiitisa zviro zvakashata. Soko ra Mwari rinozodari inga izwi rinotivhunja kudari: “Nga iri gwanja: fambai ndirona.” Irona rinozotingwaja kudari tikatanga kuita zviro zvakashata. (Isaia 30:21) Ngo kuzwira Jehovha, tinozobesereka pacedu, mu njira jakasiyana-siyana. (Isaia 48:17) Inga muezaniso, atizonyowejeki kudari ari wese akatirungamisa. Cimwenizve, tinozova no ushamwari wakavanga na Jehovha, ngokuti tinoziva kuti iyena anotitaja inga mwana anodiwa.—Vaheberi 12:7.

8. Inga zvinonangwa pana Jakobo 1:22-25, tingashandisa kudini Soko ra Mwari inga supeya?

⁸ Soko ra Mwari ringashanda inga supeya kwatiri. (Verenganyi Jakobo 1:22-25.) Uzinji wedu tinosota pa supeya co mangwanani ticito tabuda pa muzi. Ngo kuita kudaro, tinokwanisa kusota patinodikana kuitisa nani ticito tavoniwa ngo vamweni. Mukuezanavo, patinoverenga Bhaibheri njiku jese, tinokwanisa kuvona manera atingaitisa nani murangariro wedu. Vamweni vanovona zviri nani kuverenga vhesi yo njiku comangwanani vacito vabuda pa muzi. Ivona vanotendera kuti zvovaverengaro zvipsase murangariro wavo. Perapo, pa njiku yese, vanoeja kupsaka manera okushandisa mbhangiro  jinovha mu Soko ra Mwari. Mukuengejera, tinodikana kuva no cirovejeso co kuverenga no kurangarijisisa njiku jese. Izvi zvingatovoneka inga kuti azvinesi kuzviita, asi i ciro cinosisira maningi catingaita, cingatibesera kuti tirambe tiri mu gwanja rinoendesa ku upenyu.

9. Ngenyi shamwari yenyu yakadikana kumurungamisa?

⁹ Makamboeja kuita zviro zvaizokhuvaza ushamwari hwenyu na Jehovha here? (Nduyo 73:2, 3) Kudari shamwari yakaivha kumujimu yakaeja kumurungamisa, kunanga kuti makaipurukira no kushandisa mbhangiro yayo here? Kudari makazviita, makaita ushoni kamare zve munobonga maningi ngo ngwajo yo makapuwa ngo shamwari yenyu.—Mazwi Akangwara 1:6.

10. Maizoitenyi kudari shamwari yenyu ikamupangira?

¹⁰ Soko ra Mwari rinotingwaja kudari: “Kutakwa ngo xamwari akunyepi.” (Mazwi Akangwara 27:6) Izvi zvinoda kurevenyi? Vonanyi muezaniso uwu: Amborangariranyi kuti munoda kudarika citaka cinofamba maningi karu zve mophingaijika ngo foni yenyu. Imwimwi mutopinda kamare mucizivi kuringa-ringa. Shamwari yenyu yo mubata mukono kuti mutame kutakwa ngo karu. Iyena anomukweva ngo hasha zvokuti munonyeya mukono, asi izvo zvinomuita kuti mutame kutakwa ngo karu. Pikija kunyeya uku, kungamuhwaja ko njiku jakati kuti, kunanga kuti maizonyangajwa ngo shamwari yakamuponesaya kuti mutame kutakwa ngo karu? Zvokadi kamare haiwa! Imwimwi maizobongesera kamare ngo kumubesera kwaakaita. Mukufananavo, kudari shamwari yenyu ikamungwaja kuti mavereketero enyu kana zviito zvenyu azviripi kuzwirana no ndhungamiro jakarungama ja Mwari, imwimwi pa kutanga mungatohwajihwa. Asi mucadonyangajwa ngo mbhangiro yomapuwaro. Ngokuti izvo zvaizova zvo upenji. (Mucumaeri 7:9) Kusiyapo zvondhozvo, bonganyi ngokuti shamwari yenyu yava no cingunge co kumuvhunja.

11. Ngozvapi zvingaita kuti ari wese arambe kuashira mbhangiro yo shamwari yake?

¹¹ Ngozvapi zvingaita kuti ari wese arambe mbhangiro yo shamwari yake? Kujikuja. Vandhu vanojikuja vanodakarira “kuzwa bzinonakira njeve.” Ivona “vanozoreesa njeve yavo ku bzokadi.” (2 Timoti 4:3, 4) Ivona vanorangarira kuti avadi mbhangiro, ngokuti vanojivona inga kuti vanosisira maningi kupinda vamweni. Ngokudaro, mupostori Pauro wakatara kudari: “Dangani ariwese anorangarira kuti ari mukuru, yena aciripi ciro, anojicengeja ega.” (VaGalàsia 6:3) Mambo Soromona wakanasa kuzvisanangura ushoni. Iyena wakati: “Riri nane jaha rino urombo no uzivi, kupinda mambo waamuxaruka [naari] benji, acikatendi kupangihwa.”—Mucumaeri 4:13.

12. Mukuzwirana no VaGalàsia 2:11-14, tinojijenyi ngo muezaniso wakagajwa ndi mupostori Pedhru?

¹² Vonanyi muezaniso wakagajwa ndi mupostori Pedhru paakapangihwa pa kawanda vandhu ngo mupostori Pauro. (Verenganyi VaGalàsia 2:11-14.) Pedhru waizocamwa ngo zvakanangaro mupostori Pauro, wotobatikana maningi ngo manera aakazvinangaro no pa ndau yaakazvinangaro. Asi Pedhru wainga no ungwaru. Iyena wakatendera mbhangiroyo nee aazivi kuva no bundu na Pauro. Mukusiyana, iyena wakazonanga kuti Pauro wainga “hama . . . [inodiwa].”—2 Pedru 3:15.

13. Tinodikana kurangarirenyi ticito tapa mbhangiro ari wese?

¹³ Kudari mukavona kuti munodikana kupa mbhangiro shamwari yenyu, ngozvapi zvamunodikana kurangarira? Mucito mabhuya naye, munodikana kujivhunjisa kudari: ‘Ndiri kuva “wakaruramisisa” here?’ (Mucumaeri 7:16) Mundhu wakaruramisisa paanonga ecitonga vamweni anoteveja ndhungamiro jake kusiyapo ja Jehovha zve kazinji anova mundhu acina  unyasha. Kudari mukapera kamare kujipopora pacenyu, movona kuti munodikana kwenda kobhuya no shamwari yenyu, nasanyi kujekesa cinesoco zve moshandisa muvhunjo kuti mubesere shamwari yenyu ivone kuti zvoyaitaro zvakashata. Ivanyi no cokwadi co kuti zvamuri kunangaro zvakacijikira mu matahwa, moceuja kuti shamwari yenyu inozodavira ndava kuna Jehovha kuciripi kwamuri. (VaRoma 14:10) Shandisanyi uzivi hunowanika mu Soko ra Mwari zve pamunonga mecipa mbhangiro ari wese, tevejeranyi usizi hwa Jesu. (Mazwi Akangwara 3:5; Mateu 12:20) Ngenyi? Ngokuti Jehovha anozotitaja mu njira yatinotajavo vamweni.—Jakobo 2:13.

14. Sangano ra Jehovha riri kutipa cinyi nyamasi uno?

¹⁴ Jehovha anotitungamirira mu gwanja ro upenyu ecishandisa divi ro pasi pano ro sangano rake, rinotipa mavhidhiyo, mabhuku no musongano jinotibesera kuti tishandise zvese zvatinowana mu Soko rake. Zvese zvatinopuwari zvinothembeka ngokuti zvakacijikira mu Matahwa. Hama jo Mukhumbi Unotonga pajinoda kutema zvivaringo ngo pa musoro po basa ro kucumaera, ijona jinothemba mujimu mucena. Cimwenizve, hama iji, nguva jese jinogara jecisota dangani ndhungamiro jovakatemaro jinodikana kucinjwa kana kuti haiwa. Ngenyi? Ngokuti “muyemo wo nyika ino [uri kucinja]” zve sangano ra Mwari rinodikana kucinja mukuzwirana no mugariro jinonga jiripowaro.—1 VaKorinto 7:31.

15. Ngocapi cineso ciri kusongana no vacumaeri vamweni?

¹⁵ Sangano ra Mwari parinotipa zwisiso imbza ngo pamusoro po jijiso jo Bhaibheri kana ngo pamusoro po mufambiro wedu, itusu tinocinja, tozvishandisa. Asi ngozvapi zvatinoita kudari sangano ra Mwari raita cinjo inopsasa upenyu hwedu? Inga muezaniso, pa makore aperari mutengo wo mare yaipeja kuvaka no kunasirira-nasirira ndau jo kunamatira, wakaengejeka maningi. Ngokudaro, Mukhumbi Unotonga wakananga kuti, kudari zvecikwanisika ungano jakawanda jaidikana kushandisa Nyumba yo Umambo yondhoyo. Inga muviyo, ungano jimweni jakabatanijwa zve Nyumba jo Umambo jimweni jakaguma pa kutengeswa. Mare yondhoyo, yakashandiswa pa kuvaka Nyumba jo Umambo ku ndau jimweni jainga no Nyumba jo Umambo shoma. Kudari muri kupona mu ndau jo kuti Nyumba jo Umambo jimweni jakatengeswa kana jakabatanijwa, kangaije  mungavona kuti zvinonesa kuhwisana no cinjo jakadari. Wari, vacumaeri vamweni vanodikana kufamba mumango wakakura kuti vaende kumusongano. Vamweni vakashanda ngo simba kuti vavake no kubesera kunasirira-nasirira Nyumba jo Umambo iji, vangatotama kuzwisisa kuti ngenyi ijona jiri kutengeswa. Ivona vangatoguma pakurangarira kuti simba no nguva yo vakapeja pa kuita basa iri zvava zvabiresi. Asi pikija zvakadaro, ivona vari kutendera kuti nasiriro iyi ienderere mberi zve vanodikana kusimbwa ndizvona.

16. Kuitisa kudini kushandisa mbhangiro inowanika pana VaKolosi 3:23, 24, inobesera kuti tirambe takadakara?

¹⁶ Tinozoramba tino mudakaro wedu, kudari tikaceuja kuti basa ratiri kuitari ngo ra Jehovha zve iyena ari kutungamirira sangano rake. (Verenganyi VaKolosi 3:23, 24.) Mambo Dhavhidhi wakapa muezaniso waushoni maningi paakapa mare kuti abesere kuvakwa ko themberi. Iyena wakati: “Ndiri ani inini, vari ani vandhu vangu, kuti tikwanise kuita bzipiro ibzi ngo kuda kwedu? Ngokuti bzese bzinobva komuri, tinomupa bzotakapuwa ngo nyara yenyu.” (1 Kronike 29:14) Patinopa mare yedu, itusu tinonga tecipa Jehovha zviya zvakavha kwaari. Pikija zvakadaro, Jehovha anodakara maningi, patinopa simba redu, nguva no mare kuti tiite basa rake.—2 VaKorinto 9:7.

17. Ngenyi amudikani kuremba kudari mukavona kuti pano zviri zvese zvamunodikana kuitisa nani?

¹⁷ Kuti tirambe tiri mu gwanja ro upenyu tese tinodikana kutevejera muezaniso wa Jesu. (1 Pedru 2:21) Kudari mukavona kuti pano zviri zvese zvamunodikana kuitisa nani, mucadoremba. Izvo zvingava zvaushoni, ngokuti zvinovonesa kamare kuti imwimwi munoda kamare kuteveja ndhungamiro ja Jehovha. Ceujanyi kuti Jehovha aaveteri kuti tive vandhu vakakwana kuti tinase kutevejera muezaniso wa Jesu.

18. Zvicinyi zvatinodikana kuita kuti tikwanirise cido cedu?

¹⁸ Kumbejiyo, kangaije tese tinozodikana kucinja manera atinorangarira no kuita zviro. (Mazwi Akangwara 4:25; Luka 9:62) Ngative vandhu vanojidodokesa ‘toenderera mberi takadakara no kurungamiswa.’ (2 VaKorinto 13:11, Shanduro yeNyika Itsva) Tikaita kudaro, “Mwari wo rudo no wo rugarisiko anozogara [na itusu].” Iyena anozotibesera kuti tive no mudakaro wari no kutipa upenyu mu nyika imbza.