1. Mwawiiwanana ni Mateu 7:13, 14, mmukhalelo taani nryaahu vamukwahani?

OOTHENE ahu nri vamukwahani. Yoolakelelaahu, eri okhala mu elapo evyaani, vathi va olamulelo woosivela wa Yehova. Nihiku ti nihiku, ninneererya ochara ephiro yeeyo enakeriha wookumini woohimala. Nave hiiha ntoko Yesu olonceiye, ephiro eyo ti yawuuraanyeeya mu ilukuluku ikina onakhala woovila ochara. (Mwaalakhanye Mateu 7:13, 14.) Nyenya naachu oohiphaameya, ti wookhweya wa hiyo ohiya ochariha mphiro yoowo.—Gal. 6:1.

2. Tiheeni nnahaalaahu othokororya mmwaha yoola? (Moone ekaaxa “ Wiiyeviha Onnanikhaviherya Otoroka Mikhalelo Sahu.”)

² Wakhala wi ninnachuna otitelela weeca mu ephiro yeela yawuuraanyeya enakeriha wookumini woohimala, nnaphwanela okhala ooreheryeya opaka matorokelo mmukhalelo nnuupuwelaahu, ni meerelo ahu. Murummwa Paulo aahaaceenyerya Akristu o Korinto wi yaaphwanela ‘otitelela okhala oorehereya naari opaka matorokelo.’ (2 Kor. 13:11) Nave ekano yeela ennaphariheleya wa hiyo olelo. Mmwaha yoola, nnahaala othokororya mukhalelo Piipiliya oneereiye anikhaviherye opaka matorokelo mmikhalelo sahu ni mukhalelo asinthamwene awiichwelavo omunepani eneeraaya enikhaviherye otitelela weeca mu ephiro enakeriha wookumini. Nave tho nnahaala othokororya elukuluku taani onakhalaaya woovila ochariha ohoolela yoowo nnavahiwaahu mmarehereryo a Yehova. Nnahaala woona ti mwawiihai wiiyeviha oneeraaya onikhaviherye otoroka mikhalelo sahu nihiyelenle ohakalala vaavaa nnamurumeelaahu Yehova.

3. Masu a Muluku eni ewerye hai onikhaviherya?

³ Vaavaa nneereryaahu ovareryela moonelo ni muupuwelo ahu, ninnahoolela nikacamiho. Murima ahu ti woowoka, nave onamweeriha okhala woovila wa hiyo osuwela yeeyo onahaalaaya onceenyerya opaka. (Yer. 17:9) Onamukhala wookhweya wa hiyo “wiiwoka aneene.” (Tiy. 1:22) Mwawiihiiha, nnaphwanela opharihela Masu a Muluku wi niisaalikhele aneene. Masu a Muluku, annuupulula yeeyo eri mpuwa mwahu, “sawuupuwela, ni sawaanyiherya” sa murima  ahu. (Ahe. 4:12, 13) Mmukhalelo mukina, Masu a Muluku ari ntoko maakina a raiyu X, yaawo ananikhaviherya woona yeeyo eri mpuwa mwahu. Nyenya nnaphwanela okhala awiiyeviha wakhala wi ninnachuna ophura orweela wa ikano seiyo inarweela Mpiipiliya naari seiyo inarweela wa yaale anamweemelela Muluku.

4. Tiheeni enooniherya wi Mwene Sawuli aari a wiirumiha?

⁴ Yootakiherya ya Mwene Sawuli ennooniherya yeeyo enahaala weereya vaavaa nnayeleelaahu wiiyeviha. Mwene Sawuli aari awiirumihaxa ophiyerya wi yene mwaneene, heemererya wi aanaphwanela otoroka muupuwelo ni meerelo awe. (Sal. 36:1, 2; Ahe. 2:4) Ela yaahooneya, vaavaa Yehova aamvanheiye Sawuli sooleeliherya seiho aaphwaneleiye ochariha amanle owaniha ni Amalekita. Moohiyana, Sawuli, haamwiiwelenle Yehova. Vaavaa mulipa a miririmu Samuwele aalonceiye sa yoocheka awe, Sawuli heemerenrye. Ohiya yeeyo, owo aaheererya wiisaakiha wa saweera sawe moorweela wa oloca wi hiyaari yoocheka etokotoko nave tho wi akina tiyaamukhinyererya weerano yeeyo. (1 Sam. 15:13-24) Voopacerya, Sawuli aaheerano emohamoha. (1 Sam. 13:10-14) Nave moothananiha, owo aaheemererya murima awe okhala wawiirumiha. Sawuli haatoronke muupuwelo awe, mwawiihiiha Yehova aamukhooca nave haamweemerenrye.

5. Tiheeni nnahuseryaahu moorweela wa yootakiherya ya Mwene Sawuli?

⁵ Wi nihuserye moorweela wa yootakiherya ya Sawuli, nnaphwanela wiipakela makoho ala: ‘Vaavaa kinaalakhanyaaka malakiheryo a Masu a Muluku, apwanne kinneererya waakiha saweera saka? Apwanne kinnuupuwela wi yeeyo kenraaka tahi yoocheka etokotoko? Apwanne kinneererya waaphwanyerya mathowa akina nthowa na saweera saka?’ Waakhanle wi naakhulo na makoho yaala ti nawi aai nnaphwanela otoroka muupuwelo ni meerelo ahu. Wakhala wi hineenreno yeela, murima ahu onahaala okhala wawiirumiha nave Yehova onahaala onikhooca ntoko asinthamwene awe.—Tiy. 4:6.

6. Mutharihe ohiyana orivovo variyari va Mwene Sawuli ni Mwene Tavite.

⁶ Moone ohiyana orivovo variyari va Mwene Sawuli, ni Mwene Tavite, yoowo aamuracenle, muchu yoowo aahakalala “mmalamulo Apwiya.” (Sal. 1:1-3) Tavite aanasuwela wi Yehova onnaakhapelela achu awiiyeviha nto onnaakhoca achu awiirumiha. (2 Sam. 22:28) Mwawiihiiha, Tavite aaheemererya wi malamulo a Yehova etoroke muupuwelo awe. Owo oorepa: “Kinarwa kaathamala Apwiya, ntakhara annakivaha miruku. Nari ohiyu, mmurimani mwaka annakihusiha.”—Sal. 16:7.

7. Tiheeni nnahaalaahu opaka wakhala wi naachu awiiyeviha?

⁷ Wakhala wi naachu awiiyeviha, nnahaala weemererya wi Masu a Muluku yookolole muupuwelo ahu nihaakumve opaka yeeyo nuupuwenlaahu. Masu a Muluku ari ntoko nsu nenlo nnahaalaahu wiiwa nriki: “Ti yola mphiro wawokololowa, mutxhareke!” Masu ala anahaala onlopola vaavaa nnapheruwaahu mu ephiro yeela n’yaaka moono woothiyana naari woolopwana. (Isa. 30:21, BNM.) Moorweela wa onwiriyana Yehova, nnahaala ophura mmikhalelo mincipale. (Isa. 48:17) Ntoko yootakiherya, nnahaala osepa wuuliheya muru nthowa na wookololiwa ni muchu mukina. Nave nnahaala omwaacamela Yehova nthowa na osuwela wi onnanikhaliha ntoko mwanawe oosiveliwa.—Ahe. 12:7.

8. Mwawiiwanana ni Tiyako 1:22-25, nni nipharihele hai Masu a Muluku ntoko eweheryo?

⁸ Masu a Muluku ananwerya ophara muteko ntoko eweheryo wa hiyo. (Mwaalakhanye Tiyako 1:22-25.) Ancipale a hiyo ninniivarerya va eweheryo wooxixelo ori woothene nihaakumve okhuma owaani. Mmukhalelo yoola, ninnawerya woona waakhanle wi ninnaphwanela opaka matorokelo vyakala muchu mukina ahaakumve onoona. Mmukhalelo woolikana, vaavaa nnamwaalakhanyaahu Piipiliya nihiku ti nihiku, nnanwerya woona mmukhalelo taani nneeraahu ntoroke muupuwelo ni meerelo ahu. Ancipale annoona okhala yamphurelo opacerya waalakhanya yoorepa ya nihiku wooxiixelo ori woothene ehaakumve okhumavo vaate. Awo anneemererya wi yeeyo yaalakhannyaaya  evolowele muupuwelo aya. Variyari va nihiku, annoona mukhalelo wa opharihela ikano inarweela Mmasu a Muluku. Mwawaaceererya, nnaphwanela okhalano yookhovelela ya ohuserya ophitaanyerya waalakhanya ni wuupuwelela Masu a Muluku. Ela enanwerya wooneya ntoko echu yookhweya, nyenya echu emoha mwa ichu sookhweleya yeeyo nnaphwanelaahu opaka wi ntitelele weeca mu ephiro yeela enakeriha wookumini.

9. Elukuluku taani nthamwene anyu onahaaleiye owookololaani?

⁹ Apwanne mohintoko opaka echu yeeyo yaahaala onanariha onthamwene anyu ni Yehova? (Sal. 73:2, 3) Waakhanle wi nthamwene anyu awiichwelavo omunepani aahooniherya olipa murima awookololaani, apwanne mwaahinwiriyana ni opharihela ekano awe? Waakhanle wi tihiiha, mwaaheerano echu yoophwanelela nave moohikhwa minikwa mwaahimuthamalela nthamwene anyu ntakhara woolopolaani.—Masi. 1:5.

10. Munaphwanela waakhulela hai vaavaa nthamwene anyu onawookololeiyeni?

¹⁰ Piipiliya onnanuupuxerya wi: “Nthamwene, nari aniphoreiyaka, toororomeleya.” (Masi. 27:6) Ela enataphulela eheeni? Muthokororye niphwanaphwaniho nla: Mwaanyiherye wi munachuna omucupha rampha nyenya munnakhala ooweiwa ni telefone anyu. Nave munneemela veeri wa rampha muhiwenhe mukhwipi nave mwawaakuveya nthamwene anyu onnopharaani nwono ookakhelaani okhwipi wa rampha. Nthowa na wookakhaani mwakuru onnoophoreihaani nwono, nyenya woona wi oheerano eyo mwawaakuveya onnavuluxa okumi anyu wi muhiphitiwe ni ekaaro. Naamwi nikhwaca nlo niwiicelakaani mahiku mancipale, apwanne mwaahaala onyeenyeya ni nthamwene anyu nthowa na wookakhaani? Mweeparipari hooye! Nyuwo mwaahaala othamalela nikhaviheryo nawe. Moolikana, wakhala wi nthamwene anyu ohoolopolaani wi malocelo ni meerelo anyu hari awiiwanana ni malamulo awookololowa a Muluku, eyo enamoohomaani murima woopaceryani. Nyenya muhinanariwe nthowa nawi nthamwene anyu ohoovahaani ekano. Weerano yeela oni okhale ololo. (Ekle. 7:9) Ohiya yeeyo, munaphwanela omuthamalela nthamwene anyu nthowa na wooniherya olipa murima wi aloce ni nyuwo.

11. Tiheeni yaahaala omweeriha muchu okhooca ekano yaphaama ya nthamwene awe?

¹¹ Tiheeni yahaala omweeriha muchu okhooca ekano ya nthamwene awe oosiveliwa? Wiirumiha. Achu awiirumiha annasiveliwa ni “minkhela aya” nave awo annahiya “wiiwa yeeparipari.” (2 Tim. 4:3, 4) Awo anuupuwela wi hanachuna miruku nthowa nawi awo anuupuwela wi tamiruku naari oochuneyaxa waapwaha akina. Mwawiihiiha murummwa Paulo oorepa: “Oomwi mukina aniisoona okhala echu, ahikhanle achu enevo, oniiwoka mwaneene.” (Gal. 6:3) Mwene Solomoni aahithariha yeela phaameene. Owo oorepa: “Mmiravo ohaawa ni amiruku onnareera ompwaha mwene awinnuwa oololo, ni ohichuna miruku.”—Ekle. 4:13.

12. Tiheeni nnahuseryaahu orweela wa yootakiherya ya murummwa Petru, hiiha ntoko erempwalaaya mu Galasya 2:11-14?

¹² Moone yootakiherya ya murummwa Petru yoowo ookololiwe variyari va achu ni murummwa Paulo. (Mwaalakhanye Galasya 2:11-14.) Petru anwerya okuha mathowa ntakhara yeeyo Paulo aalonceiye, atikhithereyaka mu yeeyo Paulo aalonceiye ni mpuro yoowo aalonceiyewo. Nyenya Petru aari amiruku. Petru aaheemererya ekano nave haamuximwenle Paulo ni otitelela wuupuwelela yeeyo aalonceiye. Ohiya yeeyo, ohoolo waya Petru aamuloca Paulo ariki “munnihu oosiveliwa.”—2 Pet. 3:15.

13. Tiheeni nnaphwanelaahu wuupuwela nihaakumve omvaha muchu mukina ekano?

¹³ Wakhala wi munnoona wi ti woochuneya omvaha nthamwene anyu ekano, ichu taani munaphwanelaanyu wuupuwela? Muhaakumve omwaacamela nthamwene anyu, mwiikohe: ‘Apwanne kamuchu a “mirukusha”?’ (Ekle. 7:16) Muchu yoole oniisoona okhala amirukuxa onnaathoriha akina, ohiya moorweela wa malakiheryo a Yehova, nyenya moorweela wa malakiheryo awawe, nave woonaru muchu ntoko yoowo hanakhala ooreera murima.  Nyenya mmanle wiivareryela aneene nave nlelo munoona wi ti woochuneya omvaha ekano nthamwene anyu munaphwanela opharihela makoho yaawo anahaala omuruuhela moonelo wi mmukhaviherye owo osuwela yoohesa awe. Nave munaphwanela wuupuwela wi omuthoriha nthamwene anyu tahi murici anyu, nyenya omukhaviherya wiiwexexa mukhalelo Yehova onooneiye vooloca sa yeeyo opankeiye. (Aro. 14:10) Muroromele miruku sinaphwanyeya Mmasu a Muluku, nave vaavaa munamvahaanyu ekano muchu vyakala, mutakiherye oreera murima wa Yesu. (Masi. 3:5; Mat. 12:20) Ntakhara heeni? Nthowa nawi Yehova onahaala onikhaliha moolikana ni mukhalelo yoowo nnaakhalihaahu akina.—Tiy. 2:13.

14. Tiheeni marehereryo a Muluku ananivahereryaaya?

¹⁴ Yehova onnanihoolela mu ephiro yeeyo enakeriha wookumini moorweela wa marehereryo awe a veelaponi yavathi, yaawo ananivahererya ixilema, soolaleeryiwa, ni mithukumano seiyo inanikhaviherya opharihela ikano inaphwanyeya Mmasu a Muluku. Ikaruma seiya ti soororomeleya nthowa nawi inathipeleya mu Soorempwa. Vaavaa anna a Nikhuuru Noolamulela anapakaaya soolakelela mmukhalelo muteko woolaleerya onahaalaaya weeriwano, awo annaroromela munepa waweela. Naamwi hiihaa, Nikhuuru Noolamulela ninnavareryela moohihiyererya soolakelela seiyo nipankaaya wi noone waakhanle wi annachuneya opakiwa matorokelo vooloca sa muteko woolaleerya. Ntakhara heeni? Nthowa nawi ‘makhalelo a elapo yeela annavira etorokeyaka,’ nave marehereryo a Muluku anaphwanela wiikhoveleliha ni mikhalelo mivyaani.—1 Kor. 7:31.

15. Makacamiho taani alaleeryi akina ahoolenlaaya?

¹⁵ Moohikhwa minikwa, vaavaa marehereryo a Muluku ananivahereryaaya wiiwexexa ovyaani wa mahusiheryo a Piipiliya naari onivaha ohoolela vooloca sa meecelo, ninneemererya ni ochariha. Nyenya nnaakhulela hai vaavaa marehereryo a Muluku anapakaaya matorokelo yaawo anavolowela mukhalelo vyakala wa okumi ahu? Ntoko yootakiherya, hiihaanoru muteko wa oteka ni orehererya Ipa sa malapelo ahu waahaaceereryeya moopwahaxa. Mwawiihiiha, Nikhuuru Noolamulela naahiveka wi miloko mincipale iphariheleke Empa ya Omwene emoharu wakhala wooweryeya. Ntoko yookhumelela ya matorokelo yaala, miloko mikina saaphwanela opwexiiheryiwa nave Ipa sa Omwene ikina saahitumihiwa. Nave ikhorowa hene saahiphariheliwa wi satekeliwe Ipa ikina mmapuro yaawo waariwo othowa otokweene. Waakhanle wi munakhala mmukuma yoowo Ipa sa Omwene itumihiwaaya naari miloko ipwexiiheriwaaya onamukhala woovila wa nyuwo wiikhoveleliha ni mikhalelo  mivyaani. Alaleeryi akina anneeca mikwaha soorekama wi ephiye mmithukumano. Akina a yaawo yaalampe wi eteke Empa ya Omwene naari orehererya akhweya anamwiikoha, ntakhara heeni Empa eyo etumihiwaaya, ananwerya wiisoona wi elukuluku ni ikuru saya ikele vasiiyoni vene. Naamwi hiiha awo anneemererya matorokelo yaala mavyaani nave annaphwanela othamaleliwa.

16. Opharihela ekano enaphwanyeya mu Kolosi 3:23, 24 eni enikhaviherye hai okhapelela ohakalala wahu?

¹⁶ Nnahaala okhapelela ohakalala wahu wakhala wi ninnuupuwela wi nnalapa ntakhara Yehova nave tho wi owo onnahoolela marehereryo awe. (Mwaalakhanye Kolosi 3:23, 24.) Mwene Tavite aahitikitherya yootakiherya yaphaama vaavaa aavelenleiye muhakhu awe wi otekiweno Empa ya Muluku. Owo oriye: “Miyo kaani, nave muloko aka tisheeni wi noovahekeni ichu hiiha moolakelela? Ichu soothene inarweela wa nyuwo nave nnoovahaani seiyo inakhuma mmatatani mwanyu.” (1 Math. 29:14) Hiyo tho, vaavaa nnaveleelaahu sookhalano sahu, nnamvaha Yehova seiyo inakhumela mmatatani mwawe. Nave tho, Yehova onnathamalela elukuluku, ikuru ni muhakhu yoowo nnaveleelaahu wi nikhaviherye muteko yoowo onachuneya wi opakiwe.—2 Kor. 9:7.

17. Ntakhara heeni hamunaphwanela oceecheya wakhala wi munnoona wi ti woochuneya opaka matorokelo?

¹⁷ Wakhala wi ninnachuna otitelela weeca mu ephiro yawuuraanyeeya enakeriha wuukumini, oothene ahu nnaphwanela ochariha vakhiviru khiviru yootakiherya ya Yesu. (1 Ped. 2:21) Wakhala wi muhoona wi ti woochuneya opaka matorokelo vyakala, muhiceecheye. Ela enamukhala eneneeryo yaphaama enooniherya wi munnachuna ochariha ohoolela wa Yehova. Muhicuwale wi Yehova onnasuwela wi—naachu oohiphaameya, mwawiihiiha, hanaweherya wi ncharihe yootakiherya ya Yesu moophaameya.

18. Tiheeni nnaphwanelaahu weera wi naakhwaniherye yoolakelela ahu?

¹⁸ Oothene ahu nnaphwanela otikitheryeya mu omwaahiyu ahu ni okhala ooreheryeya otoroka muupuwelo, ni meerelo ahu. (Masi. 4:25; Luka 9:62) Hankooni ntitelela okhala awiiyeviha, ni okhala “oreherereya.” (2 Kor. 13:11) Neerano hiiha, “Muluku a osivela ni a murecele akakhala ni hiyo.” Nave owo onamunikhaviherya okhala oohakalala hiihaano ni onivaha ekumi mu elapo evyaani.