1. Itech tlen kijtoua Mateo 7:13, 14, ¿tleka uelis tikijtoskej ika akin tikchiuaj ken Cristo kentla tinejnentiuej ipan se ojtli?

UELIS tikijtoskej ika tinochimej akin tikchiuaj ken Cristo kentla tinejnentiuej ipan se ojtli. Ompa tiauej pampa tiknekij tinemiskej ipan se yenkuik tlaltikpaktli kampa tlayekanas toTajtsin Jehová akin melak techtlasojtla. Mojmostla tokojtilijtokej tiaskej ipan “on ojtli tlen teuika ipan nemilistli”. San ika, ijkon ken okijto Jesús, yejuin ojtli “pitsauak” niman kemantika ouijtika tikitaj ompa tinejnemiskej (xpoua Mateo 7:13, 14, TNM). * Pampa titlajtlakolejkej, kemantika tikisasnekij itech yejuin ojtli (Gál. 6:1).

2. ¿Tlenon tikitaskej ipan yejuin tlamachtijli? (Noijki xkita recuadro “ Uelis topatlaskej tla tiyolyemankej”).

² Tla nochipa tiknekij tinejnentiaskej ipan yejuin ojtli “pitsauak”, kipiya ika tikasikamatiskej ika kemantika nonekis tikpatlaskej ken titlanemiliaj, tlen tikchiuaj niman tlen tikuelitaj. Yejuin tlen apóstol Pablo kinekiya kimasikamachiltis tokniuan akin chantiyaj Corinto ijkuak okimijli: “Xmopatlatiakan” (2 Cor. 13:11, TNM). Niman aman noijki noneki ijkon matikchiuakan. Ipan yejuin tlamachtijli, tikitaskej kenon Biblia uelis techpaleuis matoyektlalikan niman kenon tokniuan akin chikauak kipiyaj intlaneltokil uelis techpaleuiskej maka matiktlalkauikan yejuin ojtli tlen teuika ipan nemilistli. Noijki, tikitaskej tleka kemantika techtekiyomaka tiktlakamatiskej tlen technauatia ikalpan Jehová. Niman tikitaskej tleka melak noneki matiyolyemankej tla tiknekij topatlaskej niman tla tiknekij tiktekichiuiliskej Jehová ika toyojlo.

3. ¿Kenon techpaleuiya iTlajtol toTajtsin?

³ ¿Xmelak ika kemantika ouijtika tikitaj toixtlaloskej niman tikitaskej tlen tiknemiliaj niman tlen tikpiyaj ipan toyojlo? ¿Tleka ijkon panoua? Pampa toyojlo tekajkayaua niman uelis kichiuas maka kuajli matitlanemilikan (Jer. 17:9). Niman miyekpa san no tejuamej tokajkayauasnekij (Sant. 1:22). Yejua ika, melak noneki matijkuikan Biblia niman ijkon uelis toixtlaloskej. ITlajtol toTajtsin techpaleuiya matikitakan “tlinon kinemilia niman tlinon kineki” toyojlo (Heb. 4:12, 13). Uelis tikijtoskej ika Biblia yeskia kentla se máquina tlen kinkixtia radiografías, tlen techpaleuiya matikitakan tlen tikpiyaj tlaijtik. San ika, tla tiknekij matechpaleui Biblia niman tlen techijliskej tokniuan akin Jehová kintekitiltia, noneki tiyolyemankej yeskej.

4. ¿Kenon tikmatstokej ika tekiuaj Saúl opeuj noueyimati?

⁴ Tlen ipan onochiuj tekiuaj Saúl techititia tlenon uelis topan nochiuas tla xtiyolyemankej. Yejua opeuj noueyimati niman xokinek kipatlas ken tlanemiliaya niman tlen kichiuaya (Sal. 36:1, 2; Hab. 2:4). Se tonajli, yejua xokichiuj tlen Jehová okinauati makichiua sakin ika kintlaniskia amalequitas. Ijkuak teotlajtoketl Samuel okichikajkanots ipampa yejuin, Saúl xokinek kijtos ika onopopolojka, yej san tlemach ika onotlajtlami niman opeuj kintlajtlakoltia oksekimej (1 Sam. 15:13-24). Niman maka matikilkauakan ika sejpatipan noijki ijkon yokichiujka (1 Sam. 13:10-14). Melak xkuajli ika Saúl opeuj noueyimati. Jehová okajuak niman xok okipaleui pampa xokinek noyektlalis.

5. ¿Tlenon tiuelij itech Saúl?

⁵ Tla xtiknekij topan manochiua ijkon ken Saúl, noneki matotlajtoltikan: “¿San tlemach ika ninotlajtlamiya niman ijkon xnikchiuas tlen kijtoua Biblia? ¿Niknemilia ika xtlaj nopan nochiuas tla xnitetlakamati? ¿Nikintlajtlakoltia oksekimej ijkuak ninopopoloua?”. Tla tikitaj ika kema ijkon tikchiuaj, noneki tikpatlaskej ken titlanemiliaj. Tla xtopatlaj, toyojlo uelis kichiuas melak matoueyimatikan niman Jehová xok kinekis touan nouikas (Sant. 4:6).

6. ¿Tleka tikijtouaj ika tekiuaj David xijkon katka ken tekiuaj Saúl?

⁶ Aman matitlajtokan itech tekiuaj David, se tlakatl akin xokichiuj ijkon ken tekiuaj Saúl. David yolyemanki katka niman kuelitaya “itlanauatil toTEKO” (Sal. 1:1-3). David kimatiya ika Jehová kinmakixtia akin yolyemankej niman ika kintlauelita akin noueyimatij (2 Sam. 22:28). Ika yejon, onokauili ika iTlajtol toTajtsin makiyektlali. Okijkuilo: “Nikyekteneuas noTEKO, pampa yejua nechyekana; hasta ijkuak tlayoua nechijlia kenijki kuajli ninouikas” (Sal. 16:7).

7. ¿Tlenon tikchiuaskej tla tiyolyemankej?

⁷ Tla tiyolyemankej, tokauiliskej ika Biblia makiyektlali tlen xkuajli tiknemiliaj niman ijkon maka tikchiuaskej tlen xkinamiki. ITlajtol toTajtsin nochiuas kentla se tlajtojli tlen techijlis: “Nikan onkaj in kuajli ojtli, yejua xtokakan”. Techijlis tla yopeuj tiktlalkauiyaj noso tikajsij okse ojtli (Is. 30:21). Melak techpaleuis tla tijkakij Jehová (Is. 48:17). San matikonnemilikan yejuin, tla tejuamej tokauiliaj ika Biblia matechyektlali, oksekimej kitaskej ika kuajli toyekanaj niman xnonekis yakaj okse matechyektlali. Niman más tiknisiuiskej Jehová pampa tikitaskej ika yejua se Tajtli akin melak techtlasojtla (Heb. 12:7).

8. Itech tlen kijtoua Santiago 1:22-25, ¿tleka Biblia yeskia kentla se espejo?

⁸ ITlajtol toTajtsin yeskia kentla se espejo (xpoua Santiago 1:22-25). ¿Xmelak ika tinochimej toitaj ipan se espejo achto kanaj tiaskej? Ijkon tikchiuaj pampa tiknekij tikitaskej tla itlaj nonekis tikyektlaliskej achto yakaj techitas. Noijki ijkon, ijkuak mojmostla tikamapouaj Biblia, ueli tikitaj tla nonekis tikyektlaliskej noso tikpatlaskej ken titlanemiliaj noso tlen tikchiuaj. Miyekej tokniuan mojmostla ika kualkan kiamapouaj yejon tlaxelojli tlen uajnestiuj ipan amatlajkuilojli  Mojmostla matomachtikan iTlajtol toTajtsin. Pampa ijkon kichiuaj, yejuamej ueli tlanemiliaj itech yejon tlaxelojli nochi tonajli niman kitaj kenon uelis kichiuaskej tlen okipoujkej. Maka matikilkauakan ika noneki mojmostla tikamapouaskej Biblia niman itech titlanemiliskej. Maski yejuin nesiskia kentla xueyi kijtosneki, melak techpaleuis nochipa matinejnentiakan ipan ojtli tlen techuikas ipan nemilistli.

9. ¿Kanaj kemanon nonekis matechyektlali se toamigo?

⁹ ¿Yopeujka tikchiuaj itlaj tlen xkuelita Jehová? (Sal. 73:2, 3). Tla se toamigo akin kipiya chikauak itlaneltokil onoyolchikauj techyektlalis, ¿otijkakej niman otikchiujkej tlen otechijli? Melak kuajli tla ijkon otikchiujkej, niman kanaj hasta tiktlasojkamatij pampa touan otlajto (Prov. 1:5).

10. ¿Tlenon kinamikiskia matikchiuakan tla se toamigo techyektlalia?

¹⁰ ITlajtol toTajtsin techilnamiktia ika melak kuajli ijkuak techajua se toamigo (Prov. 27:6). ¿Tleka ijkon kijtoua Biblia? Matikonnemilikan ika tiknekij tipanoskej ipan se carretera kampa nojuitiaj melak miyekej carros niman, chika titlamachiaj, peua tikitaj toteléfono. Pampa tiknemiliaj ika iuelis tipanoskej, peua tinejnemij niman nion xtikonitaj tla ok uajlauej carros. Kuakon, se toamigo chikauak techajsi ipan toma niman techtilana. Melak chikauak techajsi hasta timaxoxouiyaj. San ika, pampa ijkon okichiuj, xotechantikis carro. Melauak ika kanaj uejkauis techkokojtos toma, san ika ¿tiktlauelitaskiaj toamigo? Ka, melak tiktlasojkamachiliskiaj ika ijkon okichiuj. Noijki ijkon, tla se toamigo techijlia ika noneki tikyektlaliskej ken titlajtouaj noso tlen tikchiuaj, kanaj xmás tikuelkakiskej. San ika, melak xkuajli yeskia tla iuan tikualanij noso tla melak toyolkokouaj (Ecl. 7:9). Más kuajli tla tiktlasojkamachiliaj pampa onoyolchikauj touan tlajtos niman pampa otechpaleui maka matikyolkokokan Jehová.

11. ¿Tleka sekimej xkinekij kikakiskej se iminamigo ijkuak kimijlia ika noneki noyektlaliskej?

¹¹ ¿Tleka sekimej xkinekij kikakiskej se iminamigo ijkuak kimijlia ika noneki noyektlaliskej? Pampa yejuamej noueyimatij. Akin noueyimatij san kikakisnekij “on tlen yejuamej” kinekij niman xkinekij kimatiskej “on tlen melauak” (2 Tim. 4:3, 4). Yejuamej xakaj kikakisnekij pampa kinemiliaj ika más tlamachilisejkej niman más uejueyixtokej xijkon ken oksekimej. San ika, apóstol Pablo okijto: “Tla yakaj kinemilia ueyixtikaj, niman xmelauak ueyixtikaj, tla ijkon, sano yejua nokajkayaua” (Gál. 6:3). Niman tekiuaj Salomón noijki okijto: “Sen telpochtli mayanki yejuan tlamatki más ueyi kitosneki xken sen rey ye ueuentsin, yejuan tonto niman xkineki ma kitlakanonotsakan” (Ecl. 4:13).

12. ¿Tlenon tiuelij itech apóstol Pedro ijkuak tikamapouaj Gálatas 2:11-14?

¹² Matikitakan tlen kuajli okichiuj apóstol Pedro ijkuak apóstol Pablo okiyektlali (xpoua Gálatas 2:11-14). Pedro ueliskia iuan kualanis Pablo pampa okichikajkanots niman pampa ijkon okichiuj imixpan oksekimej. San ika, Pedro tlamachilise katka, ika yejon, kuajli okikak Pablo niman xokitlauelitak. Pedro hasta okijto ika Pablo itlasojkaikniuj katka (2 Ped. 3:15).

13. ¿Tlenon noneki tikchiuaskej achto tikijliskej se toamigo ika noneki noyektlalis?

¹³ Tla kemantika tikitaj ika noneki tikijliskej se toamigo ika noneki noyektlalis, ¿tlenon noneki tikchiuaskej? Achto iuan titlajtoskej, matotlajtoltikan: “¿Nikteititijtoskia ika xnikneki nion achijtsin manopopolo?” (Ecl. 7:16). Akin xkinekij ika oksekimej nion achijtsin manopopolokan xnoyekanaj ijkon ken Jehová kineki niman kiteititiaj ika xteikneliaj. Tla yotitlanemilijkej itech yejuin niman tikitaj ika ok noneki titlajtoskej iuan toamigo, kuajli matikijlikan tlenon noneki kipatlas niman matiktlanemililtikan, uelis ijkin tikchiuaskej tla tiktlajtoltiaj seki tlemach tlen kipaleuis makasikamati ika melauak nopopolojtika. Maka matikilkauakan ika Jehová yejua akin  kinamiki tetlajtlakolmakas, tejuamej san tiknekij tikasikamachiltiskej toamigo kenon nomachilia Jehová ijkuak kita tlen yejua kichiua (Rom. 14:10). Matiktekitiltikan Biblia ijkuak yakaj tikijliskej ika noneki noyektlalis niman matiteiknelikan ijkon ken Jesús (Prov. 3:5; Mat. 12:20). Matikilnamikikan ika Jehová techiknelis ijkon ken tejuamej tikimikneliaj oksekimej (Sant. 2:13).

14. ¿Kenon techpaleuiya ikalpan toTajtsin?

¹⁴ Jehová kitekitiltia ikalpan tlen onka ipan yejuin tlaltikpaktli niman ijkon techyekanas ipan yejon ojtli tlen teuika ipan nemilistli. Yejua ika, ikalpan Jehová kichiua matikinpiyakan tlanechikoltin, kinchijchiua videos niman amatlajkuiloltin kampa techititia kenon tikchiuaskej tlen kijtoua Biblia. Nochi tlen techijlia uelis tikneltokaskej pampa nokixtia itech iTlajtol toTajtsin. Grupo akin Tlayekana ipan nochi tlanechikoltin nochipa kitlajtlanilia Jehová makinmaka espíritu santo niman ijkon kuajli kiyekanaskej tenojnotsalistli. Yejuin tokniuan noijki miyekpa kitaj tla nonekis kipatlaskej ken kiyekanaj tenojnotsalistli. ¿Tleka ijkon kichiuaj? Pampa nochi tlen onka nopatlatiuj, niman ikalpan toTajtsin noneki kitas kenon más kuajli kichiuas itekiyo (1 Cor. 7:31).

15. ¿Tlenon yononek kichiuaskej sekimej tokniuan?

¹⁵ Kemantika, ikalpan toTajtsin techijlia ika noneki tikpatlaskej ken tikasikamatij se tlaxelojli itech Biblia noso techijlia kenon más kuajli tikteititiskej ika yemelak tikchiuaj ken Cristo. Ijkuak ijkon panoua, tejuamej tikchiuaj tlen techijlia niman nochipa itech titlaneltokaj. San ika ¿tlenon panoskia tla ikalpan Jehová techijlia matikpatlakan itlaj tlen tejuamej yotomatkaj tikchiuayaj? Matitlanemilikan itech yejuin, yonoitak ika aman más miyek tomin noneki nopopolos niman ijkon nochijchiuaskej noso noyektlaliskej Kaltin kampa tosentlaliaj. Ika yejon, Grupo akin Tlayekana yokijto ika aman noneki más kuajli notekitiltiskej Kaltin kampa tosentlaliaj. Ipampa yejuin, yonosetilijkej seki tlanechikoltin niman yononemakakej seki Kaltin kampa tosentlaliaj. Ika yejon tomin nochijchiujtokej Kaltin kampa tosentlaliaj kampa yemelak noneki. Tla tejuamej tichantij kampa yonosetilijkej seki tlanechikoltin noso yononemakakej seki Kaltin kampa tosentlaliaj, kanaj ouijtika tikitaj tikchiuaskej ijkon ken yotechijli ikalpan toTajtsin. Aman, sekimej tokniuan achijtsin más uejka kipiyaj intlanechikol. Oksekimej tokniuan akin otlapaleuijkej kichijchiuaskej noso kiyektlaliskej se Kajli kampa tosentlaliaj kanaj xkasikamatij tleka kinekij kinemakaskej yejon kajli. Kanaj kinemiliaj ika san nenka  ompa otlapaleuijkej. Maski ijkon, yejuamej ok ika inyojlo kipaleuijtokej ikalpan Jehová, niman melak tikintlasojkamachiliaj ipampa yejon.

16. ¿Kenon techpaleuiya Colosenses 3:23, 24 nochipa matiyolpakikan?

¹⁶ Nochipa tiyolpakiskej tla xtikilkauaj ika tejuamej titekitij para Jehová niman ika yejua kiyekantika ikalpan (xpoua Colosenses 3:23, 24). Tekiuaj David melak kuajli tlen okichiuj ijkuak okitemakak tomin niman ijkon manochijchiua iteopan Jehová. Yejua okijli Jehová: “¿Nejua niakinon niman akinon nokalpan niman ijkon xtechkauili matimitsmakakan yejuin uentin tlen tiktemakaj ika toyojlo? Pampa nochi motech ualeua, niman yotimitsmakakej tlen san no tejua yotitechmakak” (1 Crón. 29:14, TNM). Ijkuak tiktemakaj totomintsin, tejuamej noijki tikmakatokej Jehová tlen san no yejua yotechmakak. Maski ijkon, Jehová melak kitlasojkamati ika tiktekitiltiaj totiempo, tokojtilis niman totomintsin niman ijkon tikchiuaskej tlen yejua kineki manochiua (2 Cor. 9:7).

17. ¿Tleka xkipiya ika tajmanaskej tla tikitaj ika noneki itlaj tikpatlaskej?

¹⁷ Tla xtiknekij tiktlalkauiskej on ojtli “pitsauak” tlen teuika ipan nemilistli, noneki tikchiuaskej ijkon ken Jesús okichiuj (1 Ped. 2:21). Tla tikitaj ika noneki itlaj tikpatlaskej, maka matajmanakan. Ijkuak tikasikamatij ika noneki topatlaskej, kijtosneki ika tiknekij matechyekana Jehová. ¡Niman yejuin itlaj tlen melak kuajli! Matikilnamikikan ika Jehová kimatstika ika titlajtlakolejkej niman xkichia nochi kuajli matikchiuakan ijkon ken Jesús.

18. ¿Tlenon noneki tikchiuaskej tla tiknekij tajsiskej kampa ontlami on ojtli “pitsauak”?

¹⁸ Kuakon, nochipa matitlanemilijtokan itech tlen tikseliskej ika tlayekapan niman nochipa matiknektokan tikpatlaskej ken titlanemiliaj niman tlen tikchiuaj (Prov. 4:25; Luc. 9:62). Nochipa matiyolyemankej niman matikchiujtokan tlen kijtoua 2 Corintios 13:11. Itech Traducción del Nuevo Mundo yejuin tlaxelojli kijtoua: “Nochipa xyolpaktokan, xmopatlatiakan”. Tla ijkon tikchiuaj, toTajtsin Jehová, “akin itech ualeua tlasojtlalistli niman yolseuilistli”, touan nemis. Niman xsan tajsiskej kampa ontlami on ojtli “pitsauak” tlen teuika ipan nemilistli, noijki ika toyojlo ompa tinejnentiaskej.