1. Ngokuya ngokomtlolo kaMatewu 7:13, 14, uyini umnqopho wokuba sekhambweneli?

SOKE sinekhambo esikilo. Umnqophwethu kukobana sifumane ukuphila okungapheliko ephasini elitjha elizokubuswa nguJehova. Qobe langa silinga ukukhamba endleleni etjhinga lapho. Kodwana uJesu wathi indlela le yincani begodu kubudisi ukukhamba kiyo. (Funda uMatewu 7:13, 14.) Ngebanga lokobana sinesono, kuba budisi ukuhlala endleleni le.—Gal. 6:1.

2. Sizokucoca ngani esihlokwenesi? (Qala ibhoksi elithi, “ Ukuthobeka Kusisiza Silungise Indlela Esenza Ngayo Izinto.”)

² Nasifuna ukukhamba endleleni encani eya ekuphileni, kufuze sizimisele ukutjhugulula indlela esicabanga ngayo, esibona ngayo izinto, nesenza ngayo. Umpostoli uPowula wakhuthaza amaKrestu ebekaphila nawo eKorinte wathi, ragelani phambili “nilungiseka.” (2 Kor. 13:11) Isiyelelisweso siyasithinta nathi. Isihlokwesi, sizokucoca ngokuthi iBhayibheli lingasisiza njani sitjhugulule indlela esenza ngayo izinto, sibuye sisisize sibone ukuthi abangani abavuthiweko bangasisiza njani sihlale endleleni etjhinga ekuphileni. Sizokubona nokuthi kukuphi la ekungaba sitjhijilo khona ukulandela iinqophiso ezivela ehlanganweni kaJehova. Sizokubona nokuthi ukuthobeka kungasisiza njani sitjhugulule indlela esenza ngayo izinto ngaphandle kokulahlekelwa lithabo ekulotjheni kwethu uJehova.

3. Khuyini iliZwi lakaZimu elingasisiza ngakho?

³ Nasihlolisisa indlela esicabanga ngayo nesizizwa ngayo, singahle sihlangabezane neentjhijilo. Iinhliziyo zethu zingasikhohlisa, zikwenze kube budisi ukulungisa lapho kutlhogeka khona. (Jor. 17:9) Kulula ukuzikhohlisa “ngokucabanga okumamala.” (Jak. 1:22) Yeke kufuze sisebenzise iliZwi lakaZimu  bona sizihlolisise. IliZwi lakaZimu liveza lokho esingikho ngaphakathi, liveza “imicabango neenhloso” zehliziywethu. (Heb. 4:12, 13) Singatjho ukuthi iliZwi lakaZimu liba njengomtjhini ohlolisisa umuntu ngaphakathi liveze lokho angikho. Kodwana kufuze sithobeke nasizokuzuza kilokho iBhayibheli elikufundisako, begodu sizithobe nakilabo uJehova abasebenzisako.

4. Khuyini etjengisa bona iKosi uSawula yazikhakhazisa?

⁴ Isibonelo seKosi uSawula sitjengisa ukuthi khuyini okungenzeka nasingakathobeki. USawula bekazikhakhazisa kangangokobana akhenge abone ngitjho nalokha nakufuze atjhugulule ukucabanga kwakhe nezenzo zakhe. (Rhu. 36:1, 2; Rhab. 2:4) Lokho kwabonakala ngesikhathi uJehova atjela uSawula bona khuyini ekufuze ayenze ngemva kokuhlula ama-Amaleki. USawula akhange amlalele uJehova. Kwathi umphorofidi uSamyela nakambonisako ngobutjhapho abenzileko, akhenge avume bona wenze umtjhapho. Kunalokho walinga ukubeka izaba zokungalaleli kwakhe, asola abanye ngalokho. (1 Sam. 15:13-24) USawula wakhe wenza ngendlela le nangaphambilini. (1 Sam. 13:10-14) Kuyadanisa bona wavumela ihliziywakhe ukuthi iqine. Akhenge alungise imitjhaphwakhe, yeke uJehova akhenge asamthanda begodu wamlahla.

5. Khuyini esiyifundako esibonelweni sakaSawula?

⁵ Bona sifunde esibonelweni sakaSawula, kuhle ukuzibuza imibuzo le: ‘Nangifunda iliZwi lakaZimu, ngiyazithethelela na? Inga-kghani nginciphisa ubumbi bezenzo zami? Kghani ngisola abanye ngemitjhapho engiyenzileko?’ Nangabe uphendula ngo-iye keminye yemibuzo le, kuyakhanya bona kufuze utjhugulule indlela ocabanga ngayo. Nasingenzi njalo, sizokuphuma elawulweni kangangokuthi uJehova angasasithanda begodu asilahle.—Jak 4:6.

6. Yitjho umehluko okhona hlangana kweKosi uSawula neKosi uDavida.

⁶ Tjheja umehluko okhona phakathi kweKosi uSawula neKosi uDavida, indoda ebeyithanda “ifundiso” kaJehova. (Rhu. 1:1-3) UDavida bekazi bona uJehova uyabasindisa abathobekileko kodwana uphikisana nabazikhakhazisako. (2 Sam. 22:28) Yeke uDavida wavumela umthetho kaZimu bona ulawule indlela acabanga ngayo. Watlola wathi: “Ngidumisa uSomnini ongilulekako, ngitjho nebusuku ihliziywami iyangikhalima.”—Rhu. 16:7.

7. Khuyini esizoyenza nasithobekileko?

⁷ Nasibabantu abathobekileko, sizokuvumela iliZwi lakaZimu lisilungise endleleni esicabanga ngayo ngaphambi kokobana senze izinto ezingakalungi. IliZwi lakaZimu lizokuba njengephimbo elithi kithi: “Nasi indlela: Khambani kiyo.” Lizosikhalimela nakungenzeka sihlahlathe endleleni nasiya ngakwesokuncele namkha ngakwesokudla. (Isa. 30:21) Ngokulalela uJehova sizokuzuza ngeendlela ezinengi. (Isa. 48:17) Ngokwesibonelo sizokubalekela ukuhlaziswa kukhalinyelwa ngomunye umuntu. Begodu sizokutjhidelana noJehova silemuke bona usiphatha njengabantwana abathandako.—Heb 12:7.

8. Njengombana kutlolwe kuJakopo 1:22-25, iliZwi lakaZimu lingaba njani njengesiboniboni?

⁸ IliZwi lakaZimu lingaba njengesiboniboni kithi. (Funda uJakopo 1:22-25.) Inengi lethu liziqala esibonibonini ekuseni ngaphambi kokobana liphume ngendlini. Lokho kuyasisiza ngombana sikghona ukubona lapha ekufuze sizilungise khona ngaphambi kokobana sibonwe babanye abantu. Kuyafana nalokha sifunda iBhayibheli qobe langa, sibona iindlela esingalungisa ngazo ukucabanga kwethu kuhlanganise nemikghwethu. Inengi lethu likubona kuzuzisa ukufunda umtlolo welanga ekuseni ngaphambi kokobana likhambe. Livumela  elikufundileko kulawule indlela elicabanga ngayo. Njengombana ilanga likhamba liqala indlela elingasebenzisa ngayo lokho elikufunde eliZwini lakaZimu. Ukungezelela kilokho, kufuze sibe nehlelo elihlanganisa ukufunda iliZwi lakaZimu nokuzindla ngesikufundileko qobe langa. Lokhu kungabonakala kuyinto encani, kodwana kuqakatheke khulu nasizokukghona ukuhlala endleleni encani etjhingisa ekuphileni okungapheliko.

9. Kunini la umngani ekufuze akulungise khona?

⁹ Kwakhe kwenzeka ukhambe endleleni ekutjhidisela kude noJehova? (Rhu. 73:2, 3) Nakwenzeka bona umngani ovuthiweko abenesibindi sokukulungisa, wamlalela na wenza ngendlela akutjele ngayo? Nangabe kunjalo, siyaqiniseka bona kuyakuthabisa ukuthi umnganakho wakghona ukukusiza.—IzA. 1:5.

10. Kufuze wenze njani umnganakho nakakulungisako?

¹⁰ IliZwi lakaZimu liyasikhumbuza: “Amanceba owavezwa mngani ayamukeleka.” (IzA. 27:6) Amezwi la ayiqiniso ngayiphi indlela? Nasi isibonelo: Akhucabange ujame endleleni eneenkoloyi ezinengi begodu uphazanyiswe ngufunjathwakwakho. Weqe indlela ungakaqali bona kuneenkoloyi ezizako. Kuthi kusese njalo, kufike umnganakho akudose ngomkhono akukhuphe endleleni. Ukudose umkhonwakho bewababuhlungu kodwana ukusindisile bona ungatjhayiswa ziinkoloyi. Nanyana kungaphela amalanga umkhonwakho ubuhlungu, lokho angeze kwakwenza usilingekele umnganakho okusindisileko. Kunalokho uzokuthabela ukuthi ukusindisile. Ngendlela efanako, nakungenzeka umnganakho akukhalimele, athi indlela okhuluma ngayo, namkha owenza ngayo izinto ayivumelani neenkambiso zakaZimu, lokho kungakuzwisa ubuhlungu ekuthomeni. Kodwana ungasilingekeli isiyalweso namkha uzwe ubuhlungu. Ukwenza njalo kuzokuba budlhadlha. (UMtj. 7:9) Kunalokho, thokoza bona umnganakho ubenesibindi sokukusiza.

11. Khuyini engenza umuntu ale isiyeleliso somngani onethando?

¹¹ Khuyini engenza umuntu angafuni ukuthatha isiyalo esivela emnganini onethando? Kuzikhakhazisa. Abantu abazikhakhazisako bathanda ‘ukwanelisa ubuzikazikani beendlebe zabo.’ ‘Bafulathela iqiniso.’ (2 Thim. 4:3, 4) Bazibona bangcono kunabanye abantu. Kodwana umpostoli uPowula watlola wathi: “Ngombana umuntu nakazitjela ukuthi ulilitho khisibe akasililitho, uyazikhohlisa.” (Gal. 6:3) IKosi uSolomoni yayiphetha kuhle indaba le. Yatlola yathi: “Ungcono umuntu omutjha ochakileko khisibe uhlakaniphile, kunesidlhadlha sekosi elupheleko engasakwazi nokwamukela isiyeleliso.”—UMtj. 4:13.

12. Khuyini esiyifunda esibonelweni sakampostoli uPitrosi, esitlolwe kwebeGalatiya 2:11-14?

¹² Tjheja isibonelo sakampostoli uPitrosi bona wenzani, lokha nakakhalinyelwa ngumpostoli uPowula hlangana nabantu. (Funda yebeGalatiya 2:11-14.) UPitrosi bekangasilingekela isiyeleliso esivela kuPowula, adzimelele ukutheni ukhalinyelwe njani begodu kuphi. Kodwana uPitrosi bekahlakaniphile. Wasamukela iselulekweso akhenge afukamele amavunda. Wathi uPowula ‘ungumfowethu othandekako.’—2 Pit. 3:15.

13. Ngikuphi ekufuze sicabange ngakho nasinikela abantu iseluleko?

¹³ Nangabe ufuna ukunikela umngani isiyeleliso, ngimaphi amaphuzu ekufuze ucabange ngawo? Ngaphambi kokobana utjhinge kumnganakho, zibuze: ‘Inga-kghani ngizenza “olunge khulu”?’ (UMtj. 7:16) Umuntu ozenza olunge khulu wahlulela abantu ngeenkambiso zakhe ingasi zakaJehova, begodu  kanengi akabi nomusa. Ngemva kokuhlolisisa indaba leyo ulemuke ukuthi vele kufuze ukhulume nomnganakho, zibuze imibuzo ezokusiza ubone ukuthi umtjhapho ukuphi. Qiniseka bona okutjhoko kusekelwe emtlolweni, ukhumbule nokuthi umnganakho akaziphenduleli kuwe kodwana uziphendulela kuJehova. (Rom. 14:10) Thembela ekuhlakanipheni okufumana eliZwini lakaZimu nawukhalimela umuntu, ulingise umusa kaJesu. (IzA. 3:5; Mat. 12:20) Lokho sikwenza ngebanga lokuthi uJehova uzosiphatha ngendlela nathi esiphatha ngayo abantu.—Jak. 2:13.

14. Khuyini ihlangano kaZimu esinikela khona?

¹⁴ UJehova usinqophisa endleleni etjhinga ekuphileni ngokusebenzisa ihlanganwakhe esephasini, ihlangano le isinikela amavidiyo, iincwadi, isilungiselela imihlangano esisiza bona silandele iinqophiso ezivela eliZwini lakaZimu. Zoke izintwezi zisekelwe emiTlolweni. Nasiqunta ukuthi umsebenzi wokutjhumayela ungenziwa njani ngendlela ephumelelako, isiHlopha esiBusako sithembela emmoyeni ocwengileko. Nanyana kunjalo, siqala bona isiqunto esisithathileko lesa sisasebenza na. Lokho kungebanga lokuthi “ubujamo bephaseli buyatjhuguluka.” Yeke ihlangano kaZimu ikhambisana nobujamo obutjha.—1 Kor. 7:31.

15. Ngiziphi iintjhijilo abanye abaqalana nazo?

¹⁵ Siyaqiniseka bona indlela esiziphatha ngayo ikhambisana nalokho esikufumana emiTlolweni. Kodwana senza njani nangabe ihlangano kaJehova yenza amatjhuguluko athinta ipilwethu? Ngokwesibonelo, emnyakeni yamva nje, indlela yokutlhogomela imakhiwo yokulotjha uJehova itjhuguluke khulu. IsiHlopha esiBusako saqunta bona kube namatjhuguluko endleleni ekuhlanganyelwa ngayo. Amatjhuguluko la, enza bona kube namabandla ahlanganiswa namanye, kuthi amaWolo womBuso amanye athengiswe. Imali leyo isetjenziselwa ukwakha amaWolo womBuso lapho atlhogeka khulu khona. Nangabe uhlala endaweni lapho amaWolo womBuso athengiswa khona namkha amabandla ahlanganiswe khona, ungakufumana kubudisi ukwamukela amatjhuguluko anjalo. Abanye kufuze bakhambe ibanga elide bona bafike esifundweni. Kuthi laba abasebenze budisi ukwakha amaWolo womBuso bangazibuza bona kubayini kufuze  athengiswe. Bangazizwa kwanga badlale ngesikhathi sabo. Nanyana kunjalo, basavumelana namathuguluko amatjha la begodu kufuze babukwe.

16. Ukusebenzisa umtlolo webeKolose 3:23, 24, kuzosisiza njani sihlale sithabile?

¹⁶ Sizokuhlala sithabile lokha nasikhumbula bona sisebenzela uJehova nokuthi nguye onqophisa ihlanganwakhe. (Funda yebeKolose 3:23, 24.) Ikosi uDavida yasibekela isibonelo esihle nayizakunikela ngemali bona kwakhiwe ithempeli. Yathi: “Nje-ke bengingubani mina, nesizwe sami besiyini bona singabe sinikele ngehliziyo evumako? Lokhu sikwenze ngombana koke kuvela kuwe Somnini, thina sinikele kwaphela lokho esikuphiwe sisandla sakho.” (1 Kron. 29:14) Nathi nasinikelako, sisuke sipha uJehova lokhu asiphe khona. Nanyana kunjalo, kuyamthabisa nasisebenzisa isikhathi sethu, amandlethu, kunye nezinto esinazo ekusekeleni umsebenzi afuna siwuphethe.—2 Kor. 9:7.

17. Kubayini kungakafuzi siphele amandla nakuna la ekufuze silungise khona?

¹⁷ Bona sihlale endleleni encani eya ekuphileni, kufuze soke silandele isibonelo sakaJesu. (1 Pit. 2:21) Nasibona ukuthi kukhona la ekufuze silungise khona, akukafuzi siphele amandla. Lokho kungaba litshwayo elihle, begodu kutjengise ukuthi siyafuna ukulalela uJehova. Khumbula bona uJehova uyazi ukuthi sinesono begodu angeze sakghona ukulandela isibonelo sakaJesu patsi.

18. Khuyini ekufuze siyenze bona sifike ekhambweni lethu

¹⁸ Kwanga soke singaqala phambili engomusweni elihle begodu sihlale sizimisele ukulungisa indlela esicabanga, esenza, nesiziphatha ngayo. (IzA. 4:25; Luk. 9:62) Asihlaleni sithobekile, ‘sirageleni phambili sithaba, silungiseka.’ (2 Kor. 13:11) Nasenza njalo, “uZimu wethando nokuthula uzokuba [nathi].” Begodu angekhe sifike la esiyakhona kwaphela kodwana sizokuthabela ikhambo lethu.