1. Kurugiirira ahari Matayo 7:13, 14, ni mu muringo ki ogu turi omu rugyendo?

TWENA turi omu rugyendo. Ei turikuza, nari ekigyendererwa kyaitu n’eky’okutuura omu nsi ensya turikwebemberwa Yehova. Buri izooba, nituteeraho kugyendera omu muhanda ogurikuhitsya omu magara. Kwonka nk’oku Yesu yaagambire, omuhanda ogu n’ogw’akamigano kandi gugumire kugugyenderamu. (Shoma Matayo 7:13, 14.) Ahabw’okugira ngu turi abatahikiriire, nikibaasa kutworobera kuteishuka omu muhanda ogu.​—Gal. 6:1.

2. Nituza kushwijuma ki omu kicweka eki? (Reeba n’akabokusi “ Obucureezi Nibutuhwera Kukora Empindahinduka.”)

² Twaba turi ab’okuguma omu muhanda ogurikuhitsya omu magara, twine kuhindura emiteekateekyere yaitu, emireebere yaitu y’ebintu, n’ebikorwa byaitu. Entumwa Paulo akahiga Abakristaayo b’omuri Korinso kugumizamu ‘nibahuguurana.’ (2 Kor. 13:11) Obuhabuzi obwo naitwe nibutukwataho. Omu kicweka eki, nituza kureeba oku Baibuli erikubaasa kutuhwera kukora empindahinduka, n’oku abanywani abakuzire omu by’omwoyo barikubaasa kutuhwera kuguma omu muhanda ogurikuhitsya omu magara. Nituza n’okureeba obu kirikubaasa kuguma kukuratira obuhabuzi obu ekibiina kya Yehova kirikutuha. Nituza kureeba oku obucureezi burikubaasa kutuhwera kukora empindahinduka tutarugirweho okushemererwa kwaitu omu kuheereza Yehova.

3. Ekigambo kya Ruhanga nikibaasa kutuhwera kita?

³ Twaba nitweshwijuma tikyorobi kumanya ebiteekateeko byaitu n’enyehurira zaitu. Omutima gwaitu n’engobya, kandi ekyo nikibaasa kutureetera kugumirwa kumanya yaaba guriyo nigutuhabya. (Yer. 17:9) Kyorobi kwebeiha turikwihirira aha miteekateekyere egwire. (Yak. 1:22) N’ahabw’ekyo twine kukoresa Ekigambo kya Ruhanga kweshwijuma. Ekigambo kya Ruhanga nikyoreka eki turi omunda omu ‘biteekateeko n’ebi tumaririire omu mutima’ gwaitu kukora. (Heb. 4:12, 13) Omuringo ogwo, Ekigambo kya Ruhanga  nikikora nka X-ray, kutubaasisa kureeba ebiri omunda. Kwonka twine kuba abacureezi twaba turi ab’okugasirwa omu buhabuzi obu turikutunga kuruga omu Baibuli nari kuruga ahari abo abarikujwekyera Ruhanga.

4. Niki ekirikworeka ngu Omugabe Saulo akaba naayetunguura?

⁴ Ebyahikire aha Mugabe Saulo nibyoreka ekirikubaasa kubaho twaba tutari bacureezi. Saulo akagira omwetunguuro gw’amaani gwamuremesa n’okwikiriza ngu emiteekateekyere ye n’ebiteekateeko bye biine kuhindurwa. (Zab. 36:1, 2; Hab. 2:4) Eki kikeeyoreka gye obu Yehova yaaha Saulo eby’okukuratira butunu ebirikukwata aha ki yaabaire aine kukora bwanyima y’okusingura Abaamaleki. Kwonka Saulo tarayorobeire Yehova. Kandi nabi Samueli ku yaamubuurize aha nshonga egyo, Saulo taraikiriize enshobe ye. Omu mwanya gw’ekyo, akateeraho kwehozaho arikworeka ngu obugomi bwe ti bw’amaani, kandi orubanja yaaruta aha bandi. (1 Sam. 15:13-24) Enyimaho, Saulo akaba yaayorekire emiteekateekyere niyo emwe. (1 Sam. 13:10-14) Eky’obusaasi, akaikiriza omutima gwe kugira amaryo. Tarahindwire emiteekateekyere ye, n’ahabw’ekyo Yehova akamuhana kandi yaamwihamu engaro.

5. Ebyahikire ahari Saulo nitubaasa kubyegyeraho ki?

⁵ Kubaasa kwegyera aha byahikire ahari Saulo, twine kwebuuza ebibuuzo ebi: ‘Ku ndikushoma ebiri omu Kigambo kya Ruhanga, ninteeraho kusherura rwekwatso kushwekyerera emiteekateekyere yangye? Ninteekateeka ngu ebirugire omu bugomi bwangye tibiri bibi? Orubanja rw’ebikorwa byangye niinduta aha bandi?’ Twagarukamu kimwe aha bibuuzo ebyo ngu eego, nituba twine kuhindura emiteekateekyere yaitu n’oku turikureeba ebintu. Kitari ekyo, omutima gwaitu nigubaasa kugira amaryo, Yehova abe atakitubara nka banywani be.​—Yak. 4:6.

6. Shoboorora oku Omugabe Daudi yaabaire naataana aha Mugabe Saulo.

⁶ Yetegyereze oku Omugabe Saulo yaabaire naataana n’Omugabe Daudi owaamuhunguriire, owaabaire naakunda “ebiragiro bya” Yehova. (Zab. 1:1-3) Daudi akaba naamanya ngu Yehova naajuna abacureezi, kwonka ngu naayanga abanyamaryo. (2 Sam. 22:28) N’ahabw’ekyo Daudi akaikiriza ebiragiro bya Ruhanga kuhindura emiteekateekyere ye. Akahandiika ati: ‘Ninsiima [Yehova] owaampaire obwengye, kandi nyekiro omutima gwangye niguunyegyesa.’​—Zab. 16:7.

7. Nitwija kukora ki twaba turi abacureezi?

⁷ Twaba turi abacureezi, nitwija kwikiriza Ekigambo kya Ruhanga kuhuguura emiteekateekyere yaitu egwire tutakakozire ebitahikire. Ekigambo kya Ruhanga nikiija kuba kiri nk’eiraka eririkutugira ngu “ogu nigwo muhanda, mube nigwo mwahamya.” Nikiija kuturabura twaba nituza kuhaba kutoora aha rubaju rwa bumosho nari orwa buryo. (Isa. 30:21) Twahurikiza Yehova, nitwija kwegasira omu miringo mingi. (Isa. 48:17) Nk’eky’okureeberaho, nitwija kwetantara okuhemuka okurikubaho omuntu ondiijo yaatuhabura. Kandi nitwija kwirira haihi Yehova ahabw’okugira ngu nitumanya ngu naatutwariza nk’abaana be abakundwa.​—Heb. 12:7.

8. Nk’oku kirikugambwaho omuri Yakobo 1:22-25, nitubaasa kukoresa tuta Ekigambo kya Ruhanga nk’endeeberwamu?

⁸ Ekigambo kya Ruhanga nikibaasa kukora nk’endeeberwamu. (Shoma Yakobo 1:22-25.) Baingi ahariitwe nitwereeba omu ndeeberwamu tutakarugire omuka. Reero, nitubaasa kureeba yaaba twine kwetereeza abandi batakatureebire. Nikyo kimwe, twashoma Baibuli buri izooba, nitwija kureeba emiringo ei turikubaasa kuhindura omu miteekateekyere yaitu nari endeeba yaitu y’ebintu. Baingi nibashanga kirikuhwera munonga kushoma ekyahandiikirwe ky’eizooba buri kasheeshe batakarugire omuka. Nibaikiriza ebi barikushoma kuhindura emiteekateekyere yaabo. Reero omu izooba ryona, nibasherura oburyo bw’okugyendera aha buhabuzi kuruga omu Kigambo kya Ruhanga. Okwongyera ahari ekyo, twine kugira  entebeekanisa nungi y’okweyegyesa otwariiremu okushoma Ekigambo kya Ruhanga buri izooba n’okukiteekateekaho. Eki nikibaasa kureebeka nk’ekyorobi kukora, kwonka eki ni kimwe aha bintu bikuru ebirikubaasa kutuhwera kuguma omu muhanda ogufunzire ogurikuhitsya omu magara.

9. Ni ryari obu kirikubaasa kwetengyesa omunywani kukuhabura?

⁹ Orateishukireho aha muhanda oguhikire okahaba kuruga ahari Yehova? (Zab. 73:2, 3) Munywani waawe ku araabe yaagizire obumanzi bw’okukuhabura, okamuhurikiza waikiriza obuhabuzi bwe? Kyaba kiri kityo, okakora ekihikire, kandi hatariho kubangaanisa okasiima ngu munywani waawe akakurabura.​—Enf. 1:5.

10. Noobaasa kutwaza ota munywani waawe yaakuhabura?

¹⁰ Ekigambo kya Ruhanga nikitwijutsya kiti: ‘Obuhuta obu orikuhutaazibwa omunyamukago n’obuhikire.’ (Enf. 27:6) Ebigambo ebyo nibimanyisa ki? Teekateeka aha ky’okureeberaho eki: Teera akashushani oriyo nooza kucwekanisa oruguuto oruriho ebiiruka bingi, kandi okahugibwa esimu yaawe. Otaaha omu ruguuto otabandize kuranzya oku n’oku. Ahonaaho, munywani waawe akujakura omukono akugarura enyima aha rubaju. Omukono agukwata munonga guhika n’aha kugira obuhuta, kwonka ekikorwa kye eky’ahonaaho kyakuhwera kutateerwa emotoka. Mbwenu shi n’obu obuhuta obwo bwakumara ebiro bingi, noija kuguubwa kubi ahabw’oku munywani waawe yaakujakura? Ngaaha buzima! Kureka noija kusiima obuhwezi bwe. Nikyo kimwe, munywani waawe yaakurabura ngu emigambire yaawe nari ebikorwa byawe tibirikuhikaana n’emitindo ya Ruhanga ehikiriire, omu kubanza noobaasa kuhurira kubi. Kwonka otanga obuhabuzi bwe nari okaguubwa kubi. Ekyo n’eky’obushema waaguubwa kubi. (Mub. 7:9) Omu mwanya gw’ekyo, shemererwa ahabw’okugira ngu munywani waawe yaagira obumanzi bw’okukugambira.

11. Niki ekirikubaasa kureetera omuntu kwanga obuhabuzi burungi bwa munywani we?

¹¹ Niki ekirikubaasa kureetera omuntu kwanga obuhabuzi bwa rukundo obwa munywani we? N’omwetunguuro. Ab’omwetunguuro nibakira kuba baine “amatu agarikubarya.” Nibakira kwanga ‘kuhurira amazima.’ (2 Tim. 4:3, 4) Nibateekateeka ngu n’abanyabwengye kurugiirira aha ndeeba yaabo. Kwonka, entumwa Paulo akahandiika ati: “Omuntu orikweteekateekaho ngu n’ekintu, haza kunu ataine ku ari, naaba naayebeiha.” (Gal. 6:3) Omugabe Sulemaani akashoboorora gye enshonga egi. Akahandiika ati: “Omutsigazi omworo ow’obwengye naakira omugabe okuzire omushema, otakyenda kuhaburwa.”​—Mub. 4:13.

12. Nitwegyera ki aha ky’okureeberaho ky’entumwa Petero, ekiri omu Abagalatia 2:11-14.

¹² Yetegyereze eky’okureeberaho ky’entumwa Petero obu entumwa Paulo yaamuhana butunu. (Shoma Abagalatia 2:11-14.) Petero naabaasa kuba yaagizire ekiniga ahabw’ebi Paulo yaagambire, arikuta omutima aha muringo ogu yaamuhaniremu, n’ahu yaamuhaniire. Kwonka Petero akaba ari omunyabwengye. Akaikiriza okuhanwa kandi taragumire ainiire Paulo enziika. Omu mwanya gw’ekyo, akagamba ahari Paulo nka ‘mugyenzi we orikukundwa.’​—2 Pet. 3:15.

13. Ni nshonga ki ezi twine kuguma nitwijuka twaba nituha obuhabuzi?

¹³ Waareeba ngu nikyetengyesa kuhana munywani waawe, ni nshonga ki ezi oine kuguma noijuka? Otakagiire kugaaniiraho na munywani waawe, yebuuze oti: ‘Ndiyo ‘nindengyesereza okuhikiirira’?’ (Mub. 7:16) Omuntu orikurengyesereza okuhikiirira naacwera abandi orubanja, atarikwihirira aha mitindo ya Yehova kureka eye, kandi obundi naaba ataine mbabazi. Bwanyima y’okweshwijuma kandi nabwo okashanga ngu oine kugamba na munywani waawe, yetegyereze  gye oburemeezi kandi okorese ebibuuzo kuhwera munywani waawe kumanya enshobe ye. Hamya ngu ebi orikugamba nibyegamira aha Byahandiikirwe, orikwijuka ngu munywani waawe naajunaanwa ahari Yehova ahabw’enshobe ze, beitu hatari ahariiwe. (Rom. 14:10) Waaba noohana omuntu muhane kurugiirira aha bwengye oburi omu Kigambo kya Ruhanga, kandi ogire embabazi nk’eza Yesu. (Enf. 3:5; Mat. 12:20) Ahabw’enki? Ahakuba Yehova naija kututwariza omu muringo ogu turikutwarizamu abandi.​—Yak. 2:13.

14. Ekibiina kya Ruhanga nikituha bintu ki?

¹⁴ Yehova naatwebembera omu muhanda ogurikuhitsya omu magara agatahwaho kurabira omu kicweka eky’omu nsi eky’ekibiina kye, ekirikutuha vidiyo nyingi, ebitabo, n’enteerane kutuhwera kugyendera aha buhabuzi oburi omu Kigambo kya Ruhanga. Ebintu ebi byona nibyegamira aha Byahandiikirwe. Akakiiko Akareeberezi nikahwerwa omwoyo gurikwera kaaba nikacwamu oku turikubaasa kuhikiiriza gye omurimo gw’okubuurira. Kwonka, Akakiiko Akareeberezi butoosha nikaguma nikashwijuma okucwamu kwako aha bikwatiraine n’oku omurimo gutebeekanisiibwe. Ahabw’enki? Ahabw’okugira ngu “omuhango gw’ensi egi” niguhinduka, ekibiina kya Ruhanga nikihinduramu kuhikaana n’embeera ensya.​—1 Kor. 7:31.

15. Ababuurizi abamwe batungire mbeera ki ezigumire?

¹⁵ Hatariho kubangaanisa, niturahuka kukuratira obuhabuzi oburikwegamira ahari Baibuli oburikukwata aha nyikiriza nari enshonga z’emicwe. Kwonka shi nitutwaza tuta ekibiina kya Ruhanga kyakora empindahinduka ezirikutukwataho omu mbeera zaitu? Nk’eky’okureeberaho, omu myaka egi omuhendo gw’esente ogw’okwombeka ebyombeko by’okuramizamu n’okubireeberera gweyongyereire kimwe. N’ahabw’ekyo Akakiiko Akareeberezi kakaha obuhabuzi ngu Ebyombeko by’Obukama bikoresibwe omu bwijwire. Ahabw’empindahinduka egi, babaasize kugaita hamwe ebibiina, kandi n’Ebyombeko by’Obukama ebimwe byaguzibwa. Esente ezo nizikoresibwa omu kwombeka ebyombeko by’okuramizamu omu myanya ahu birikwetengwa munonga. Ku oraabe nootuura omu mwanya ahu ebyombeko nk’ebyo birikuguzibwa kandi n’ebibiina bikagaitwa hamwe, nikibaasa kukugumira kumanyiira embeera nsya. Ababuurizi abamwe hati baine kugyenda engyendo ndaingwa kuza omu nteerane. Abamwe abaakozire n’amaani kwombeka Ekyombeko ky’Obukama ekyo nari  kukihuunduuza nibabaasa kwebuuza ahabw’enki kiriyo nikiguzibwa hati. Nibabaasa kuteekateeka ngu obwire bwabo n’amaani gaabo bikafa busha. Kwonka nabwo, nibakikwatanisa n’entebeekanisa egi ensya kandi nitubasiima.

16. Okugyendera aha buhabuzi oburi omu Abakolosai 3:23, 24 nikutuhwera kuta kuguma twine okushemererwa?

¹⁶ Nitwija kuguma twine okushemererwa twaijuka ngu nitukorera Yehova, kandi ngu naayebembera ekibiina kye. (Shoma Abakolosai 3:23, 24.) Omugabe Daudi akataho eky’okureeberaho kirungi obu yaabaire naahayo esente kwombeka eihema. Akagira ati: “Mbwenu nkaanye ndi oha, nyowe n’abantu bangye, okubaasa kukuhongyera tuti n’omutima gwekundiire? Ahakuba byona biruga ahariiwe, kandi ebi twakuha n’ebyawe.” (1 Bus. 29:14) Naitwe ku turikuhayo sente, nituba nituha Yehova ebirugire omu ngaro ze. N’obu kiraabe kiri kityo, Yehova naatusiima ahabw’obwire bwaitu, amaani gaitu, n’ebintu ebi turikuhayo kushagika omurimo ogu arikwenda ngu gukorwe.​—2 Kor. 9:7.

17. Ahabw’enki otashemereire kuhwamu amaani waashanga ngu oine kukora empindahinduka?

¹⁷ Kubaasa kuguma omu muhanda ogufunzire, twena twine kuteeraho kukuratira entambwe za Yesu. (1 Pet. 2:21) Waashanga ngu oine kuhindura entambwe ezaawe, otahwa amaani. Nangwa ako nikabaasa kuba akamanyiso karungi, akarikworeka ngu noofayo kukora empinduka kukuratira obuhabuzi bwa Yehova. Ijuka ngu Yehova naakimanya ngu obu turi abatahikiriire hati, titurikubaasa kutooreza Yesu omu muringo oguhikiriire.

18. Twine kukora ki kubaasa kuhika aha kigyendererwa kyaitu?

¹⁸ Twena ka tuteereho kuta omutima aha biro by’omumaisho kandi tube tweteekateekire kuhindura emiteekateekyere yaitu, emireebere yaitu y’ebintu, n’ebikorwa byaitu. (Enf. 4:25; Luk. 9:62) Ka tugume turi abacureezi, tugumizemu twine okushemererwa, kandi turikwikiriza kuhuguurwa. (2 Kor. 13:11) Twakora tutyo, “Ruhanga ow’okukunda n’obusingye [naija kuguma naitwe].” Kandi titurikwija kuhika ei turikuza kyonka, beitu nitwija n’okuguma tushemereirwe omu rugyendo rwaitu.