1. Kɛ mɔɔ Mateyu 7:13, 14 kile la, duzu ati a yɛbahola yɛaha kɛ yɛlɛtu adenle a?

YƐ MUALA yɛlɛtu adenle. Ɛleka mɔɔ yɛlɛkɔ la anzɛɛ yɛ bodane a le kɛ yɛbadɛnla ewiade fofolɛ ne mɔɔ Gyihova nea zolɛ la anu. Kenle ko biala yɛbɔ mɔdenle kɛ yɛbalua adenle ne mɔ kɔ ngoane nu la azo. Noko kɛ mɔɔ Gyisɛse hanle la, adenle zɔhane le ɛdenraa na zolɛ ɛvalɛ ɛnla aze. (Kenga Mateyu 7:13, 14.) Kɛ mɔɔ yɛnli munli la ati, ɔnyɛ se kɛ yɛbavi adenle ɛhye azo.​—Gal. 6:1.

2. Duzu a yɛbazuzu nwo wɔ edwɛkɛ ɛhye anu a? (Eza nea ɛlɛka “ Mɛlɛbɛnwoaze Boa Yɛ Maa Yɛkakyi Yɛ Adwenle.”)

² Saa yɛbahola yɛalua adenle ɛdenraa ne mɔɔ kɔ ngoane nu la azo dahuu a, ɔwɔ kɛ yɛnyia ɛhulolɛ kɛ yɛbahakyi kɛzi yɛdwenle, yɛ subane nee yɛ nyɛleɛ. Ɛzoanvolɛ Pɔɔlo maanle Kilisienema mɔɔ wɔ Kɔlente la anwosesebɛ kɛ bɛhɔ zo “bɛhakyi bɛ adwenle.” (2 Kɔl. 13:11) Folɛdulɛ zɔhane fale yɛ nwo. Wɔ edwɛkɛ ɛhye anu, yɛbazuzu kɛzi Baebolo ne baboa yɛ yɛamaa yɛayɛ nzenzaleɛ nee kɛzi agɔnwolɛma mɔɔ bɛnyi sunsum nu la baboa yɛ amaa yɛalua ngoane adenle ne azo dahuu la anwo. Eza yɛbazuzu mekɛ mɔɔ ɔyɛ a ɔyɛ se kɛ yɛbali adehilelɛ mɔɔ Gyihova ahyehyɛdeɛ ne fa maa yɛ la azo la anwo. Yɛbanwu kɛzi mɛlɛbɛnwoaze bahɔ azo aboa yɛ amaa yɛayɛ nzenzaleɛ na yɛahɔ zo yɛava anyelielɛ yɛazonle Gyihova la.

3. Kɛzi Nyamenle Edwɛkɛ ne bahola aboa wɔ ɛ?

³ Ɔnla aze kɛ yɛbanwu kɛzi yɛdwenle anzɛɛ kɛzi yɛte nganeɛ la. Duzu ati ɔ? Ɔluakɛ yɛ ahonle le mɛlɛbɛla na ɔmaa ɔyɛ se kɛ  yɛbanwu ɛleka mɔɔ ɔlɛpiepia yɛ yeahɔ la. (Gyɛ. 17:9) Ɔnyɛ se kɛ yɛbava “adalɛ nzuzulɛ” yɛabɛlɛbɛla yɛ nwo. (Gye. 1:22) Ɔti ɔwɔ kɛ yɛfa Nyamenle Edwɛkɛ ne yɛneɛnlea yɛ nu. Nyamenle Edwɛkɛ ne maa yɛnwu kɛzi yɛde la, yɛ ahonle ne “nzuzulɛ nee ye adwenle muala.” (Hib. 4:12, 13) Wɔ adenle bia azo, Nyamenle Edwɛkɛ ne le kɛ milahyinli mɔɔ bɛfa bɛpɛ X-ray la. Ɔboa ɔmaa yɛnwu mɔɔ ɛlɛkɔ zo wɔ yɛ nu la. Noko ɔwɔ kɛ yɛbɛlɛ yɛ nwo aze amaa yɛahola yɛava folɛdulɛ mɔɔ yɛnyia yɛfi Baebolo ne anzɛɛ menli mɔɔ gyi Nyamenle agyakɛ anu la ɛkɛ ne la yɛali gyima.

4. Duzu a kile kɛ Belemgbunli Sɔɔlo rayɛle anwomemaazo a?

⁴ Belemgbunli Sɔɔlo neazo ne maa yɛnwu mɔɔ yɛambɛlɛ yɛ nwo aze a ɔbado yɛ la. Sɔɔlo yɛle anwomemaazo kpole kpalɛ, ɔti yeanlie yeando bɔbɔ kɛ ɔwɔ kɛ ɔkakyi kɛzi ɔdwenle la nee ye nyɛleɛ. (Edw. 36:1, 2; Hab. 2:4) Ɛhye lale ali wɔ mekɛ mɔɔ Gyihova vale adehilelɛ fɔɔnwo bie maanle Sɔɔlo la. Ɔhilele ye debie mɔɔ ɔdi Amalɛkema anwo zo konim ɔwie a ɔwɔ kɛ ɔyɛ la. Noko Sɔɔlo andie Gyihova. Mɔɔ ngapezonli Samoɛle bizale ye nwolɛ edwɛkɛ la Sɔɔlo anlie ye nvonleɛ ne ando nu. Emomu ɔhanle kɛ ɛhye ɛnle edwɛkɛ ɛzulolɛ biala na menli ne a maanle ɔyɛle mɔɔ ɔyɛle la. (1 Sa. 15:13-24) Ɛnee Sɔɔlo ɛlimoa ɛla subane zɔhane bie ali. (1 Sa. 13:10-14) Ɔyɛ alɔbɔlɛ kɛ ɔmaanle anwomemaazo rale ye ahonle nu la. Yeangakyi ye adwenle, yemɔti Gyihova hwile ɔ nyunlu na ɔkpole ye.

5. Duzu a yɛbahola yɛazukoa yɛavi Sɔɔlo neazo ne anu a?

⁵ Amaa yɛanyɛ kɛ Sɔɔlo la ɔwɔ kɛ yɛbiza yɛ nwo kpuya ɛhye mɔ: ‘Saa mekenga folɛdulɛ bie wɔ Nyamenle Edwɛkɛ ne anu a, asoo menwu nvonleɛ bie wɔ nwo mɔɔ ɔti ɔnle kɛ mefa medi gyima ɔ? Asoo menyia adwenle kɛ mɔɔ melɛyɛ la ɛnle ɛtane kpole biala ɔ? Asoo mebɔ awie mɔ somolɛ wɔ mɔɔ meyɛ la anwo?’ Saa yɛbua kpuya ɛhye mɔ bie kɛ ɛhɛe a, ɛnee ɔwɔ kɛ yɛkakyi kɛzi yɛdwenle la ɔ nee yɛ nyɛleɛ. Saa yɛanyɛ ye zɔhane a, ɔbamaa yɛamemaa yɛ nwo zo kpole kpalɛ na Gyihova bakpo yɛ kɛ tɛ ɔ gɔnwo a le yɛ.​—Gye. 4:6.

6. Ngakyile boni a wɔ Belemgbunli Sɔɔlo nee Belemgbunli Devidi avinli a?

⁶ Yɛ ngakyile mɔɔ wɔ Belemgbunli Sɔɔlo nee Belemgbunli Devidi mɔɔ kulo “Gyihova mɛla ne” mɔɔ ralile Sɔɔlo agya la avinli la nzonlɛ. (Edw. 1:1-3) Ɛnee Devidi ze kɛ Gyihova die bɛlɛvoma noko ɔ nye sa anwomemaazoma. (2 Sa. 22:28) Ɔti Devidi maanle Nyamenle mɛla na hakyile kɛzi ɔdwenle la. Ɔhɛlɛle kɛ: “Mebaye Gyihova mɔɔ yedu me folɛ la ayɛlɛ. Me adwenle tenrɛdenrɛ me nɔɔzo.”​—Edw. 16:7.

7. Saa yɛbɛlɛ yɛ nwo aze a duzu a yɛbayɛ a?

⁷ Saa yɛbɛlɛ yɛ nwo aze a, yɛbamaa Nyamenle Edwɛkɛ ne ahakyi adwenle ɛtane biala mɔɔ ɛra yɛ ti anu la amaa yɛanyɛ debie ɛtane. Nyamenle Edwɛkɛ ne bayɛ kɛ ɛnelɛ bie mɔɔ ɛlɛka ahile yɛ kɛ: “Adenle ne ɛne. Bɛlua nu.” Ɔbabɔ yɛ kɔkɔ amaa yɛanvi adenle ne azo yɛangɔ bɛne zo anzɛɛ fema zo. (Aye. 30:21) Saa yɛtie Gyihova a, ɔbaboa yɛ wɔ ndenle dɔɔnwo azo. (Aye. 48:17) Kɛ neazo la ɔnrɛmaa awie ɛnrɛdenrɛdenrɛ yɛ na yɛ ti azi aze. Na ɔbamaa yɛabikye Gyihova kpalɛ ɔluakɛ kɛ yɛbanwu kɛ ɔ nee yɛ ɛlɛdi kɛ ɔ ra mɔɔ ɔkulo ye.​—Hib. 12:7.

8. Kɛ mɔɔ bɛha ye wɔ Gyemise 1:22-25 la, kɛ ɔkɛyɛ na yɛava Nyamenle Edwɛkɛ ne yɛali gyima kɛ neanleɛ ɛ?

⁸ Nyamenle Edwɛkɛ ne kola yɛ kɛ neanleɛ maa yɛ. (Kenga Gyemise 1:22-25.) Yɛ nuhua dɔɔnwo nea neanleɛ nu nwonlomɔ biala kolaa na yɛavi sua nu. Yemɔ maa yɛkola yɛyɛ nzenzaleɛ biala mɔɔ fɛta la kolaa na awie mɔ gyɛne anwu yɛ. Zɔhane ala a saa yɛkenga Baebolo ne kenle ko biala a, ɔmaa yɛnwu kɛzi  yɛbahakyi yɛ adwenle nee yɛ nyɛleɛ a. Menli dɔɔnwo ɛnwu kɛ saa bɛkenga alehyenlɛ ne anu tɛkese ne kolaa na bɛavi sua nu a ɔboa kpalɛ. Bɛmaa mɔɔ bɛkenga la kakyi kɛzi bɛdwenle la. Akee bɛbɔ mɔdenle kɛ bɛbanwu kɛzi bɛbava folɛdulɛ mɔɔ wɔ Nyamenle Edwɛkɛ ne anu la bɛali gyima wɔ alehyenlɛ ne anu amuala la. Eza ɔwɔ kɛ yɛyɛ ngyehyɛleɛ yɛkenga Nyamenle Edwɛkɛ ne dahuu na yɛdwenledwenle nwolɛ. Ɔzɔho kɛ ɛhye ɛyɛlɛ ɛnyɛ se, noko ɔboka ninyɛne mɔɔ anwo hyia mɔɔ yɛyɛ a ɔboa yɛ yɛamaa yɛalua adenle ɛdenraa ne mɔɔ kɔ ngoane nu azo dahuu la anwo.

9. Mekɛ boni a ɔwɔ kɛ agɔnwolɛ bie tenrɛdenrɛ wɔ a?

⁹ Asoo ɛbɔle ɔ bo kɛ ɛyɛ debie mɔɔ anrɛɛ ɔbazɛkye ɛ nee Gyihova avinli agɔnwolɛvalɛ ne la ɔ? (Edw. 73:2, 3) Saa ɛ gɔnwo bie mɔɔ ɛnyi sunsum nu la nyianle akɛnrasesebɛ denrɛle wɔ a, asoo ɛdiele ye na ɛvale ye folɛdulɛ ne ɛlile gyima? Saa ɛyɛle ye zɔ a ɛbɔle mɔdenle kpalɛ na ɔda ali kɛ ɛ nye liele kɛ ɛ gɔnwo ne bɔle wɔ kɔkɔ la.​—Mrɛ. 1:5.

10. Saa ɛ gɔnwo bie tenrɛdenrɛ wɔ a duzu a ɔwɔ kɛ ɛyɛ a?

¹⁰ Nyamenle Edwɛkɛ ne ka kɛ: “Agɔnwolɛ boda wɔ a ɔvi nɔhalɛlilɛ nu.” (Mrɛ. 27:6) Duzu a edwɛkɛ ɛhye kile a? Suzu ndonwo ɛhye anwo nea: Fa ye kɛ ɛkulo kɛ ɛpɛ kale adenle bie mɔɔ alagye ɛnle zo fee la, noko ɛnee ɛ nye ɛbolo ɛlɛtinlitinli wɔ fonu ne. Yemɔti ɛpɛ adenle ne la wɔannea. Arɛlevilɛ nu ala, ɛ gɔnwo bie zɔle ɛ sa na ɔhwenle wɔ ɔhɔle adenle ne anloa. Kɛzi ɔhwenle wɔ la maanle ɛ sa yɛle wɔ nyane noko ɛhye ammaa kale bie ambɔ wɔ. Saa bɔbɔ ɛ sa ne yɛ wɔ nyane kyɛ ekyi a asoo ɛbava ɛ gɔnwo ne anwo ɛya kɛ ɔhwenle wɔ la ɔ? Kyɛkyɛ! Ɔbayɛ wɔ fɛ kɛ ɔboale wɔ la. Zɔhane ala a saa ɛ gɔnwo bie bɔbɔ kɔkɔ kɛ wɔ ɛdendɛlɛ anzɛɛ wɔ nyɛleɛ nee Nyamenle tenlene ngyinlazo ne ɛnyia a, bie a mɔlebɛbo ne ɔbagyegye wɔ. Noko mmafa ɔ nwo ɛya kɛ ɔdule wɔ folɛ la. Nrɛlɛbɛ ɛnle nu kɛ ɛbayɛ zɔ. (Nol. 7:9) Emomu, maa ɛ nye ɛlie kɛ ɛ gɔnwo ne nyianle akɛnrasesebɛ hanle nwolɛ edwɛkɛ hilele wɔ la.

11. Duzu a bamaa awie akpo folɛdulɛ kɛnlɛma mɔɔ ɔ gɔnwo bie bava amaa ye la a?

¹¹ Duzu a bamaa awie akpo folɛdulɛ kɛnlɛma mɔɔ ɔ gɔnwo bie mɔɔ ɔkulo edwɛkɛ la bava amaa ye la a? Anwomemaazo ɔ. Anwomemaazoma kulo kɛ ‘bɛkoto bɛ nzo nu. Bɛgyakyi nɔhalɛ ne ɛdielɛ.’ (2 Tim. 4:3, 4) Bɛsuzu kɛ bɛngyia folɛdulɛ biala ɔluakɛ bɛdwenle kɛ bɛze nrɛlɛbɛ anzɛɛ bɛ nwo hyia tɛla awie mɔ. Noko ɛzoanvolɛ Pɔɔlo hɛlɛle kɛ: “Saa awie dwenle kɛ ɔ nwo hyia wɔ mekɛ mɔɔ ɔnle zɔ la a, ɛnee ɔlɛbɛlɛbɛla ɔ nwo.” (Gal. 6:3) Belemgbunli Sɔlɔmɔn hilele edwɛkɛ ɛhye anu kpalɛ. Ɔse: “Kakula ehyianli mɔɔ ze nrɛlɛbɛ la le kpalɛ tɛla belemgbunli kpanyinli koasea mɔɔ ɛnlɛ adwenle ɛndie kɔkɔbɔlɛ bieko la.”​—Nol. 4:13.

12. Duzu a yɛsukoa yɛfi ɛzoanvolɛ Pita neazo ne mɔɔ wɔ Galeehyeama 2:11-14 wɔ la anu ɛ?

¹² Yɛ mɔɔ ɛzoanvolɛ Pita yɛle wɔ mekɛ mɔɔ ɛzoanvolɛ Pɔɔlo denrɛdenrɛle ye wɔ menli dɔɔnwo anyunlu la nzonlɛ. (Kenga Galeehyeama 2:11-14.) Anrɛɛ Pita bahola ava ye adwenle azie kɛzi Pɔɔlo hanle edwɛkɛ ne nee ɛleka mɔɔ ɔhanle ye la azo na yeava nwolɛ ɛya. Noko ɛnee Pita ze nrɛlɛbɛ. Ɔliele folɛdulɛ ne ɔdole nu na yeanva Pɔɔlo anwo ɛya yeanzie ye nu. Nzinlii bɔbɔ ɔvɛlɛle Pɔɔlo kɛ ɔ “diema kulovolɛ.”​—2 Pita 3:15.

13. Duzu a ɔwɔ kɛ ɛsuzu nwo kolaa na wɔadu awie folɛ a?

¹³ Saa ɛte nganeɛ kɛ ɔwɔ kɛ ɛtu ɛ gɔnwo bie folɛ a, duzu a ɔwɔ kɛ ɛsuzu nwo a? Kolaa na wɔahɔ ɛ gɔnwo ne ɛkɛ la, biza ɛ nwo kɛ, ‘Melɛyɛ me nwo “tenlenenli somasoma” ɔ?’ (Nol. 7:16) Awie mɔɔ ɔyɛ ɔ nwo tenlenenli somasoma  la gyinla ɔdaye mumua ne ye ngyinlazo zo bua awie mɔ ndɛne na tɛ Gyihova ɛdeɛ zo ɔ yɛɛ bie a ɔnze anwunvɔne. Saa ɛsuzu edwɛkɛ ne anwo kpalɛ ɛwie na ɛnwu ye kɛ ɔwɔ kɛ ɛ nee ɛ gɔnwo ne tendɛ a, maa ɔnwu ngyegyelɛ ne na dua kpuya zo boa ɛ gɔnwo ne maa ɔnwu deɛmɔti yevo la. Nea kɛ ɛbamaa wɔ edwɛkɛ ne agyinla Ngɛlɛlera ne azo, kakye kɛ ɔnle wɔ gyima kɛ ɛbabua ɛ gɔnwo ne ndɛne emomu Gyihova ɔ. (Wlo. 14:10) Fa ɛ nwo to nrɛlɛbɛ mɔɔ wɔ Nyamenle Edwɛkɛ ne anu la azo, na sukoa Gyisɛse anwunvɔnezelɛ ne wɔ mekɛ mɔɔ ɛlɛtu awie folɛ la. (Mrɛ. 3:5; Mat. 12:20) Duzu ati ɔ? Ɔluakɛ kɛzi yɛ nee awie mɔ di la zɔhane ala a Gyihova nee yɛ bali a.​—Gye. 2:13.

14. Kɛzi Nyamenle ahyehyɛdeɛ ne boa yɛ ɛ?

¹⁴ Gyihova dua ye ahyehyɛdeɛ ne foa mɔɔ wɔ azɛlɛ ye azo la boa yɛ maa yɛdua ngoane adenle ne azo. Ahyehyɛdeɛ ɛhye dua vidio ngakyile, mbuluku yɛɛ debiezukoalɛ ɛhɔlɛ zo boa yɛ maa yɛfa folɛdulɛ mɔɔ wɔ Nyamenle Edwɛkɛ ne anu la yɛdi gyima. Edwɛkɛ ɛhye amuala gyi Ngɛlɛlera ne azo. Saa Neazo Eku ne ɛlɛsi kɛzi yɛbayɛ edwɛkɛhanlɛ gyima ne kpalɛ la anwo kpɔkɛ a, ɔfa ɔ nwo ɔto sunsum nwuanzanwuanza ne azo. Noko Neazo Eku ne ta neɛnlea kpɔkɛzilɛ ɛhye mɔ anu. Duzu ati ɔ? “Ɔluakɛ ewiade ɛhye subane ɛlɛkakyi” na ɔwɔ kɛ Nyamenle ahyehyɛdeɛ ne dua ndenle fofolɛ zo yɛ ninyɛne.​—1 Kɔl. 7:31.

15. Ngyegyelɛ boni a nolobɔlɛma bie mɔ ɛyia a?

¹⁵ Nɔhalɛ nu saa ahyehyɛdeɛ ne gyinla Baebolo ne zo yɛ nzenzaleɛ wɔ yɛ ngilehilelɛ nu anzɛɛ fa ɛbɛlabɔlɛ kpalɛ nwo ngyinlazo fofolɛ maa yɛ a yɛdie yɛto nu na yɛfa yɛyɛ gyima. Noko saa ahyehyɛdeɛ ne yɛ nzenzaleɛ bie mɔɔ ka yɛ ɛbɛlabɔlɛ wɔ adenle gyɛne zo a, kɛzi yɛyɛ yɛ nyɛleɛ ɛ? Kɛ neazo la, kenlensa ye kakɛ mɔɔ yɛbɔ kolaa na yɛazi azua mɔɔ yɛsonle wɔ nu anzɛɛ yɛanlea zolɛ la ɛhɔ ɔ nyunlu kpalɛ. Yemɔti Neazo Eku ne ɛha kɛ ɔwɔ kɛ asafo dɔɔnwo kɔ debiezukoalɛ wɔ Belemgbunlililɛ Asalo ko ne ala anu. Ɔlua nzenzaleɛ ɛhye ati bɛha asafo bie mɔ bɛbɔ nu na bɛndɔne Belemgbunlililɛ Asalo bie mɔ. Bɛlɛfa zɔhane ezukoa bɛasisi asalo wɔ ɛleka mɔɔ bɛhyia nwolɛ kpalɛ la. Saa ɛde ɛleka mɔɔ bɛlɛtɔne bɛ Belemgbunlililɛ Asalo ne ɔti ɔwɔ kɛ bɛka asafo bie mɔ bɛbɔ nu la a, bie a ɔbayɛ se kɛ ɛbali adehilelɛ fofolɛ ɛhye azo. Kɛkala, ɔwɔ kɛ nolobɔlɛma  bie mɔ pɛ adenle tendenle na bɛahɔ debiezukoalɛ. Bie a menli mɔɔ yɛle gyima ɛsesebɛ maanle bɛzile Belemgbunlililɛ Asalo bie anzɛɛ bɛnea zo la ɛnrɛde deɛmɔti bɛlɛtɔne ye la abo. Bie a bɛbade nganeɛ kɛ bɛzɛkye bɛ mekɛ yɛɛ bɛ ɛvɛlɛ ɛyɛ mgbane. Noko bɛdie ngyehyɛleɛ fofolɛ ɛhye bɛto nu na bɛfɛta nganvolɛ.

16. Saa yɛfa folɛdulɛ mɔɔ wɔ Kɔlɔsaema 3:23, 24 la yɛdi gyima a, kɛzi ɔbaboa yeamaa yɛ nye alie dahuu ɛ?

¹⁶ Saa yɛkakye kɛ yɛlɛ gyima yɛamaa Gyihova na ɔdaye a ɔlɛkile ye ahyehyɛdeɛ ne adenle a ɔbamaa yɛ nye alie dahuu. (Kenga Kɔlɔsaema 3:23, 24.) Belemgbunli Devidi yɛle neazo kɛnlɛma wɔ mekɛ mɔɔ ɔye ezukoa yeaboa yeamaa bɛazi ɛzonlenlɛsua ne la. Ɔhanle kɛ: “Medame a le nwane, yɛɛ me menli ne a le nwane mɔ mɔɔ yɛnyia nwolɛ adenle yɛlɛfi yɛ ɛhulolɛ nu yɛabɔ afɔle mɔɔ le kɛ ɛhye a? Ɔluakɛ debie biala vi wɔ ɛkɛ, yɛɛ yɛva mɔɔ vi ɛdawɔ mumua ne ɛ sa nu la yɛmaa wɔ.” (1 Ek. 29:14) Saa yɛlɛye ndoboa a ɛnee yɛdayɛ noko yɛlɛfa debie mɔɔ Gyihova mumua ne ɛva ɛmaa yɛ la yɛamaa ye. Noko Gyihova anye sɔ yɛ mekɛ, yɛ anwosesebɛ nee yɛ ezukoa mɔɔ yɛfa yɛboa yɛmaa bɛyɛ gyima mɔɔ ɔkulo kɛ bɛyɛ la.​—2 Kɔl. 9:7.

17. Saa ɔhyia kɛ ɛyɛ nzenzaleɛ bie a duzu ati a ɔnle kɛ ɛmaa ɛ sa nu to a?

¹⁷ Amaa yɛahɔ zo yɛalua adenle ɛdenraa ne mɔɔ kɔ ngoane nu la azo dahuu la, ɔwɔ kɛ yɛ muala yɛdi Gyisɛse agyakɛ anzi kpalɛ. (1 Pita 2:21) Saa ɛnwu kɛ ɔwɔ kɛ ɛyɛ nzenzaleɛ a, mmamaa ɛ sa nu to. Yemɔ kile kɛ ɛlɛ ɛhulolɛ kɛ ɛbali Gyihova adehilelɛ zo. Kakye kɛ Gyihova ze kɛ yɛnli munli, yemɔti ɔ nye ɛnla kɛ yɛbali Gyisɛse agyakɛ anzi pɛpɛɛpɛ.

18. Duzu a ɔwɔ kɛ yɛyɛ na yɛadwu ɛleka mɔɔ yɛlɛkɔ la a?

¹⁸ Bɛmaa yɛ muala yɛva yɛ adwenle yɛzie mɔɔ yɛbanyia ye kenle bie la azo na yɛnyia ɛhulolɛ kɛ yɛbahakyi kɛzi yɛdwenle, yɛ subane nee yɛ nyɛleɛ. (Mrɛ. 4:25; Luku 9:62) Bɛmaa yɛbɛlɛ yɛ nwo aze dahuu, ‘yɛhɔ zo yɛli fɛlɛko, yɛhakyi yɛ adwenle.’ (2 Kɔl. 13:11) Saa yɛyɛ zɔ a, “ɛlɔlɛ nee anzodwolɛ Nyamenle ne nee [yɛ] badɛnla.” Na nye balie yɛ adendulɛ ne anwo na yɛadwu ɛleka mɔɔ yɛlɛkɔ la.