1. Матфейы 7:13, 14 стихтӕм гӕсгӕ цӕмӕн ис зӕгъӕн, ӕмӕ фӕндагыл цӕуӕм?

НЕ ’ППӔТ дӕр цӕуӕм фӕндагыл. Нӕ нысан у ног дунейы Йегъовӕйы Паддзахады дӕлбар цӕрын. Мах алы бон дӕр архайӕм, цардмӕ чи кӕны, уыцы фӕндагыл цӕуыныл. Фӕлӕ, Йесо куыд загъта, афтӕмӕй уыцы фӕндаг уынгӕг у, ӕмӕ йыл цӕуын иуӕй-иу хатт зын вӕййы. (Бакӕс Матфейы 7:13, 14.) Ӕмӕ, ӕнӕххӕст кӕй стӕм, уымӕ гӕсгӕ дзы, гӕнӕн ис, адзӕгъӕл уӕм (Гал. 6:1).

2. Ацы статьяйы цӕуыл аныхас кӕндзыстӕм? (Ноджыдӕр кӕс рамкӕ « Сӕрныллӕгдзинад нын ӕххуыс кӕны уынгӕг фӕндагыл цӕуынӕн».)

² Кӕд нӕ фӕнды, цардмӕ чи кӕны, уыцы уынгӕг фӕндагыл дарддӕр цӕуын, уӕд хъуамӕ цӕттӕ уӕм нӕ зондахаст ӕмӕ нӕхи ивынмӕ. Апостол Павел Коринфы чырыстӕттӕн уынаффӕ радта, «цы хъӕуы, уый-иу аивут», зӕгъгӕ (2 Кор. 13:11). Ӕмӕ йӕ ныхӕстӕ махмӕ дӕр хауынц. Ацы статьяйы аныхас кӕндзыстӕм, Библи нын куыд ӕххуыс кӕны, цы хъӕуы, уый ивынӕн, стӕй нын фӕлтӕрдджын ӕмбӕлттӕ куыд ӕххуыс кӕнынц, цӕмӕй дарддӕр царды фӕндагыл цӕуӕм. Аныхас ма кӕндзыстӕм, Йегъовӕйы организацийы разамындмӕ гӕсгӕ архайын нын иуӕй-иу хатт зын цӕмӕн вӕййы, ууыл. Базондзыстӕм, сӕрныллӕгдзинад нын куыд баххуыс кӕндзӕн, цӕмӕй-иу, исты фӕивын куы хъӕуа, уӕд дарддӕр Йегъовӕйӕн цингӕнгӕйӕ лӕггад кӕнӕм.

3. Хуыцауы Ныхас дын куыд баххуыс кӕндзӕн?

³ Нӕ зонды ӕмӕ нӕ зӕрдӕйы цы ис, уый бамбарын ӕнцон нӕ вӕййы, уымӕн ӕмӕ нӕ зӕрдӕ мӕнгард у. Ӕмӕ нын хатт зын вӕййы бамбарын, кӕдӕм нӕ акӕндзӕн, уый (Йер. 17:9).  Гӕнӕн ис, ӕмӕ нӕхи «алы мӕнг хъуыдытӕй» сайӕм (Иак. 1:22). Уӕдӕ-иу хъуамӕ нӕ зӕрдӕтӕм ныккӕсӕм Хуыцауы Ныхасы фӕрцы. Библи раргом кӕны, мидӕгӕй цавӕр стӕм, уый – «зӕрдӕйы хъуыдытӕ ӕмӕ фӕндтӕ» (Дзут. 4:12, 13). Библи абарӕн ис рентгенимӕ. Фӕлӕ хъуамӕ уӕм сӕрныллӕг, цӕмӕй нын йӕ уынаффӕтӕ, стӕй нын разамынд чи дӕтты, уыдоны уынаффӕтӕ пайда хӕссой.

4. Паддзах Саул сӕрбӕрзонд кӕй сси, уый цӕмӕй у бӕрӕг?

⁴ Паддзах Саулы хабарӕй бӕрӕг у, адӕймаг сӕрныллӕг куы нӕ вӕййы, уӕд цы ’рцӕуы, уый. Саул ахӕм сӕрбӕрзонд сси, ӕмӕ йӕ ивын кӕй хъуыд, ууыл сӕтгӕ дӕр нӕ кодта (Пс. 36:1, 2; Ав. 2:4). Уый рабӕрӕг, амаликӕгтыл куы фӕуӕлахиз, уӕд. Йегъовӕ йын радта бӕлвырд амындтӕ, цы хъуамӕ сарӕзтаид, уый фӕдыл, фӕлӕ йӕм Саул нӕ байхъуыста. Ӕмӕ йын пехуымпар Самуил йӕ рӕдыдмӕ куы бацамыдта, уӕд дӕр Саул нӕ басаст, рӕдигӕ кӕй фӕкодта, ууыл. Уый йӕхи рӕстытӕ кӕнынмӕ фӕци. Цы сарӕзта, уый ахӕм ӕвзӕр хъуыддагыл нӕ нымадта, стӕй ма йӕ иннӕты аххос дӕр кодта (1 Сам. 15:13–24). Уый размӕ дӕр ма афтӕ бакодта (1 Сам. 13:10–14). Хъыгагӕн, Саул бауагъта, цӕмӕй йӕ зӕрдӕ схъал уыдаид. Уый йӕ зондахаст нӕ аивта. Уый тыххӕй йын Йегъовӕ бауайдзӕф кодта ӕмӕ йыл йӕ къух систа.

5. Цӕмӕй Саулау сӕрбӕрзонд ма суӕм, уый тыххӕй нӕ цы хъӕуы саразын?

⁵ Цӕмӕй Саулау сӕрбӕрзонд ма суӕм, уый тыххӕй хорз уаид, ахӕм фарстатыл куы ахъуыды кӕниккам: «Библийы цавӕрдӕр уынаффӕ куы бакӕсын, уӕд мӕхи рӕстытӕ кӕнын нӕ райдайын? Афтӕ нӕ фӕхъуыды кӕнын, ӕмӕ, цы аразын, уый афтӕ ӕвзӕр нӕу? Цы саразын, уый иннӕты аххос нӕ фӕкӕнын?» Кӕд ацы фарстатӕй иуӕн дӕр, «о», зӕгъгӕ, дзуапп радтам, уӕд нӕ хъӕуы нӕ зондахаст ивын. Науӕд нӕ зӕрдӕ афтӕ схъал уыдзӕн, ӕмӕ ныл Йегъовӕ йӕ къух сисдзӕн ӕмӕ нӕ йӕ хӕлӕрттыл нал нымайдзӕн (Иак. 4:6).

6. Давид Саулӕй цӕмӕй хицӕн кодта?

⁶ Саулы фӕстӕ паддзах сси Давид. Уый Саулӕй тынг хицӕн кодта. Давид уарзта «Йегъовӕйы закъон» (Пс. 1:1–3). Уый зыдта, Йегъовӕ сӕрныллӕг адӕмы кӕй ирвӕзын кӕны, сӕрбӕрзонд чи у, уыдонӕн та сӕ ныхмӕ кӕй у (2 Сам. 22:28). Ӕмӕ Хуыцауы закъонӕн бар лӕвӕрдта, цӕмӕй йын йӕ зондахаст ивтаид. Уый ныффыста: «Ӕз арфӕ кӕндзынӕн Йегъовӕйӕн, мӕнӕн уынаффӕ чи дӕтты, уымӕн. Суанг мын ӕхсӕвы дӕр мӕ арфӕмбӕхст хъуыдытӕ фӕамонынц зонд» (Пс. 16:7).

7. Сӕрныллӕг куы уӕм, уӕд-иу куыд бакӕндзыстӕм?

⁷ Сӕрныллӕг куы уӕм, уӕд Хуыцауы Ныхасӕн бар дӕтдзыстӕм, цӕмӕй нын нӕ зондахаст ива, цалынмӕ нӕ нӕ хъуыдытӕ ӕвзӕр хъуыддӕгтӕм не ’ркодтой, уӕдмӕ. Уӕд-иу нын Хуыцауы Ныхас дзурдзӕн: «Мӕнӕ фӕндаг. Цӕут ацы фӕндагыл». Ӕмӕ-иу уыцы фӕндагӕй рахизырдӕм кӕнӕ галиуырдӕм куы фӕзилӕм, уӕд-иу нӕ бафӕдзӕхсдзӕн (Ис. 30:21). Йегъовӕмӕ куы хъусӕм, уӕд нын уый бирӕ хъуыддӕгты уыдзӕн стыр ӕххуыс (Ис. 48:17). Зӕгъӕм, исчи нын нӕ рӕдыдмӕ куы бацамоны, уӕд куыддӕр фӕкъӕмдзӕстыг вӕййӕм. Фӕлӕ, Йегъовӕмӕ куы хъусӕм, уӕд-иу ахӕм уавӕры нӕ бахаудзыстӕм. Стӕй-иу Йегъовӕмӕ баввахсдӕр уыдзыстӕм, уымӕн ӕмӕ ӕмбардзыстӕм, нӕ уарзӕгой Фыд кӕй у ӕмӕ ныл кӕй тыхсы (Дзут. 12:7).

8. Иаковы 1:22–25 стихтӕм гӕсгӕ нын Хуыцауы Ныхас кӕсӕны хуызӕн куыд у?

⁸ Хуыцауы Ныхас нын у кӕсӕны хуызӕн. (Бакӕс Иаковы 1:22–25.) Нӕ фылдӕр сӕхимӕ кӕсӕнмӕ бакӕсынц алы райсом дӕр, цалынмӕ хӕдзарӕй нӕ рацӕуынц, уӕдмӕ. Ӕмӕ нӕ цалынмӕ иннӕтӕ нӕ фенынц, уӕдмӕ нӕхи бадзӕбӕхтӕ кӕнӕм. Раст афтӕ, Библи алы бон дӕр куы фӕкӕсӕм, уӕд фенӕм, фӕивын нӕ цы хъӕуы, уый. Бирӕтӕ алы райсом дӕр, цалынмӕ хӕдзарӕй нӕ рацӕуынц, уӕдмӕ бакӕсынц боны стих. Цы бакӕсынц, ууыл фӕхъуыды кӕнынц ӕмӕ афтӕмӕй сӕ бон вӕййы сӕ  зондахаст ивын. Ӕмӕ уый фӕстӕ боны дӕргъы фӕагурынц фадӕттӕ уыцы уынаффӕмӕ гӕсгӕ архайынӕн. Уымӕй уӕлдай ма-иу хъуамӕ алы бон дӕр рӕстӕг рахицӕн кӕнӕм Библи иртасынӕн ӕмӕ йыл хъуыды кӕнынӕн. Чи зоны, исчи зӕгъа, уым зынӕй ницы ис, зӕгъгӕ. Фӕлӕ уый у, уынгӕг фӕндагыл цӕуынӕн нын чи ’ххуыс кӕны, уыцы ахсджиаг хъуыддӕгтӕй сӕ иу.

9. Хатт цӕмӕн бахъӕуы, цӕмӕй-иу нын не ’мбӕлттӕ нӕ рӕдыдмӕ бацамоной?

⁹ Мыййаг, искуы раст фӕндагӕй адзӕгъӕл дӕ? (Пс. 73:2, 3). Ӕмӕ дын кӕд фӕлтӕрдджын ӕмбал ис ӕмӕ йӕм ахӕм ныфс разынд, цӕмӕй дын дӕ рӕдыдмӕ бацамыдтаид, уӕд ӕм байхъуыстай ӕмӕ йӕ уынаффӕмӕ гӕсгӕ бацархайдтай? Кӕд о, уӕд раст бакодтай. Ӕмӕ дзы, ӕвӕццӕгӕн, бузныг дӕ, демӕ ӕргом кӕй аныхас кодта, уый тыххӕй (Ӕмб. 1:5).

10. Де ’мбал дын дӕ рӕдыдмӕ куы бацамона, уӕд уымӕ цы цӕстӕй хъуамӕ ракӕсай?

¹⁰ Библийы фыст ис: «Чи дӕ уарзы, уымӕн йӕ цӕфтӕ сты йе ’нувыд зӕрдӕйӕ» (Ӕмб. 27:6). Ацы ныхӕстӕ куыд ӕмбаргӕ сты? Дӕ цӕстытыл-ма ауайын кӕн, цыма дӕ хъӕуы, машинӕтӕ дыууӕрдӕм кӕм кӕнынц, ахӕм фӕндаджы сӕрты ахизын. Уыцы рӕстӕг дӕм чидӕр телефонӕй фӕдзырдта, ӕмӕ дӕ телефоныл фӕдӕ. Ӕмӕ фӕндагмӕ нӕ кӕсыс, афтӕмӕй размӕ цӕуыс. Уӕд дын де ’мбал дӕ цонгмӕ фӕлӕбурдта ӕмӕ дӕ фӕстӕмӕ раскъӕфта. Дӕ цонг дын афтӕ нылхъывта, ӕмӕ дын сцъӕх. Фӕлӕ ракӕ-бакӕ куы кодтаид, уӕд дӕ машинӕ скъуырдтаид. Ӕмӕ кӕд дӕ цонг цалдӕр боны риссы, уӕддӕр де ’мбалмӕ не смӕсты дӕ. Афтӕ кӕй бакодта, уый тыххӕй дзы тынг бузныг дӕ. Раст афтӕ, де ’мбал дын куы зӕгъа, дӕ ныхӕстӕ кӕнӕ дӕ хъуыддӕгтӕ Хуыцауы зӕрдӕмӕ кӕй нӕ цӕуынц, уӕд дӕм уый, чи зоны, фыццаг хъыг фӕкӕса. Фӕлӕ йӕм куы смӕсты уай кӕнӕ йӕм куы фӕтӕргай уай, уӕд уый уыдзӕн ӕнӕзонд ми (Еккл. 7:9). Хъуамӕ дзы бузныг уай, ахӕм ныфс ӕм кӕй разынд, цӕмӕй дын дӕ рӕдыдмӕ бацамыдтаид.

11. Адӕймаджы цы фӕхъыгдары йе ’мбалы уынаффӕмӕ байхъусын?

¹¹ Адӕймаджы цы фӕхъыгдары йе ’мбалы уынаффӕмӕ байхъусын? Сӕрбӕрзонддзинад. Сӕрбӕрзонд адӕм уарзынц, «сӕ хъустӕн ӕхсызгон» чи сты, ахӕм ныхӕстӕ. Уыдон «рӕстдзинадмӕ» нӕ фӕхъусынц (2 Тим. 4:3, 4). Афтӕ сӕм фӕкӕсы, ӕмӕ уынаффӕхъуаг не сты, стӕй искӕй уынаффӕ сӕ сӕрмӕ дӕр нӕ фӕхӕссынц. Фӕлӕ апостол Павел ныффыста: «Кӕд исчи йӕхицӕй цыдӕр ӕнхъӕл у, ницы у, афтӕмӕй, уӕд йӕхи сайы» (Гал. 6:3). Паддзах Соломон дӕр уый хорз бамбарын кодта. Уый ныффыста: «Мӕгуыр, фӕлӕ зондджын лӕппу хуыздӕр у, уынаффӕмӕ чи нал хъусы, ахӕм зӕронд, фӕлӕ ӕнӕзонд паддзахӕй» (Еккл. 4:13).

12. Галатӕгтӕм 2:11–14 стихты цавӕр хабары кой ис ӕмӕ Петрӕй цӕуыл ахуыр кӕнӕм?

¹² Иухатт Павел апостол Петрӕн иннӕты раз бауайдзӕф кодта. Цымӕ Петр уымӕ цы цӕстӕй ракаст? (Бакӕс Галатӕгтӕм 2:11–14.) Павел йемӕ куыд ныхас кодта ӕмӕ йын се ’ппӕты раз кӕй бауайдзӕф кодта, ууыл куы хъуыды кодтаид, уӕд ӕм смӕсты уыдаид. Фӕлӕ Петр Павелы уынаффӕ йӕ зӕрдӕмӕ айста ӕмӕ йӕм маст хӕссын нӕ райдыдта. Ӕмӕ уымӕй равдыста, зондджын адӕймаг кӕй у. Фӕстӕдӕр Павелы схуыдта «нӕ уарзон ӕфсымӕр» (2 Пет. 3:15).

13. Уынаффӕ дӕтгӕйӕ дӕ зӕрдыл цы хъуамӕ дарай?

¹³ Афтӕ дӕм куы кӕса, ӕмӕ де ’мбалӕн уынаффӕ раттын хъӕуы, уӕд дӕ зӕрдыл цы хъуамӕ дарай? Цалынмӕ йемӕ нӕ аныхас кӕнай, уӕдмӕ ахъуыды кӕн: «Ӕцӕгдӕр ын хъӕуы уынаффӕ раттын? Мыййаг, „ӕгӕр раст“ нӕ дӕн?» (Еккл. 7:16). Адӕймаг «ӕгӕр раст» куы вӕййы, уӕд иннӕтӕн Йегъовӕйы уагӕвӕрдтӕм гӕсгӕ нӕ фӕтӕрхон кӕны, фӕлӕ йӕхи уагӕвӕрдтӕм гӕсгӕ. Ӕмӕ, фӕлмӕнзӕрдӕ кӕй хъуамӕ уа, уый дӕр дзы, чи зоны, ферох вӕййы. Кӕд уыцы фарстатыл ахъуыды кодтай, ӕмӕ дӕм уӕддӕр афтӕ кӕсы, ӕмӕ дӕ де ’мбалимӕ аныхас  кӕнын хъӕуы, уӕд-иу ын бӕлвырд бамбарын кӕн, цӕмӕн дӕ фӕнды йемӕ аныхас кӕнын. Стӕй-иу ӕм ратт фарстатӕ, цӕмӕй йын баххуыс кӕнай йӕ рӕдыд бамбарынӕн. Хъуамӕ дӕ ныхӕстӕн сӕ бындур уа Фыстад. Дӕ зӕрдыл дар: де ’мбал дзуапп дӕ разы нӕ дӕтты, фӕлӕ Йегъовӕйы раз (Ром. 14:10). Искӕмӕн уынаффӕ куы дӕттай, уӕд-иу дӕхи зондӕй ныфсджын ма у ӕмӕ-иу Йесойау фӕлмӕнзӕрдӕ у (Ӕмб. 3:5; Матф. 12:20). Уый ахсджиаг цӕмӕн у? Уымӕн ӕмӕ, иннӕтӕн куыд стӕм, Йегъовӕ дӕр махӕн афтӕ уыдзӕн (Иак. 2:13).

14. Хуыцауы организаци нын куыд ӕххуыс кӕны Библийы уынаффӕтӕм гӕсгӕ архайынӕн?

¹⁴ Йегъовӕ нӕ царды фӕндагыл кӕны йӕ организацийы зӕххон хайы фӕрцы. Хуыцауы организаци уадзы видеороликтӕ, кинотӕ, публикацитӕ ӕмӕ бацӕттӕ кӕны фембӕлдты программӕ. Уыцы ӕрмӕг иууылдӕр арӕзт у Библийыл ӕмӕ не ’ппӕтӕн дӕр ӕххуыс кӕны Библийы уынаффӕтӕм гӕсгӕ архайынӕн. Разамонӕг советы чи ис, уыцы ӕфсымӕртӕ уынаффӕтӕ куы фӕхӕссынц, ӕнтыстджындӕрӕй хъусын кӕнӕн куыд ис, уый фӕдыл, уӕд Хуыцауӕй фӕкурынц йӕ сыгъдӕг тых. Фӕлӕ уӕддӕр рӕстӕгӕй-рӕстӕгмӕ уыцы уынаффӕтӕм ногӕй ӕркӕсынц. Цӕмӕн? Уымӕн ӕмӕ «ацы дунейӕн йӕ хуыз ивы, театры нывтӕ куыд фӕивынц, афтӕ», ӕмӕ Хуыцауы организацийы дӕр фӕхъӕуы архайын, уавӕртӕ куыд ивынц, уымӕ гӕсгӕ (1 Кор. 7:31).

15. Иуӕй-иу хъусынгӕнджытӕн зын цы вӕййы?

¹⁵ Хуыцауы организаци Библийы ахуырӕдтӕй искӕцы ӕндӕрхуызон куы бамбарын кӕны кӕнӕ та нын нӕ цард ӕмӕ не ’гъдауы фӕдыл уынаффӕтӕ куы ратты, уӕд цӕттӕ вӕййӕм йӕ разамындмӕ гӕсгӕ архайынмӕ. Фӕлӕ организаци ӕндӕр хъуыддӕгты исты куы фӕивы, уӕд уымӕ та цы цӕстӕй ракӕсӕм? Зӕгъӕм, Хуыцауӕн кӕм кувӕм, уыцы бынӕттӕ аразынӕн ӕмӕ сӕм зилынӕн фӕстаг азты бирӕ фылдӕр ӕхца хардз кӕнын бахъуыд. Гъемӕ Разамонӕг совет уынаффӕ рахаста, цӕмӕй иу Паддзахады залы, гӕнӕн уӕвгӕйӕ, фылдӕр ӕмбырдтӕ уадзой сӕ фембӕлдтӕ. Ӕмӕ уымӕ гӕсгӕ иуӕй-иу ӕмбырдтӕ баиу кӕнынц ӕмӕ кӕцыдӕр залтӕ ауӕй кӕнынц. Уый фӕрцы организацийӕн йӕ бон вӕййы Паддзахады залтӕ саразын, залтӕ ӕппӕты тынгдӕр кӕм хъӕуы, уым. Кӕд сымахмӕ дӕр иуӕй-иу залтӕ ауӕй кодтой ӕмӕ уын уе ’мбырд ӕндӕр ӕмбырдимӕ баиу кодтой, уӕд дӕ хъӕуы ног уавӕртыл ахуыр кӕнын. Ӕмӕ дын, чи зоны, уый ӕнцон нӕу. Ныр иуӕй-иу хъусынгӕнджыты фембӕлдтӕм дарддӕр  хъӕуы цӕуын. Кӕнӕ, Паддзахады зал арӕзт куы цыд, уӕд дзы зӕрдиагӕй чи фыдӕбон кодта ӕмӕ йӕм чи зылд, уыдон, гӕнӕн ис, ма ӕмбарой, уӕй кӕнын ӕй цӕмӕн хъӕуы, уый. Чи зоны сӕм афтӕ кӕсы, ӕмӕ сӕ фыдӕбон дзӕгъӕлы фӕци. Фӕлӕ уӕддӕр уыдон архайынц разамындмӕ гӕсгӕ, ӕмӕ уый тыххӕй сты раппӕлинаг.

16. Колоссӕгтӕм 3:23, 24 стихты цы уынаффӕ ис, уый нын куыд ӕххуыс кӕндзӕн, цӕмӕй дарддӕр цингӕнгӕйӕ лӕггад кӕнӕм?

¹⁶ Цӕмӕй дарддӕр цингӕнгӕйӕ лӕггад кӕнӕм, уый тыххӕй хъуамӕ нӕ зӕрдыл дарӕм, цы аразӕм, уый Йегъовӕйӕн кӕй аразӕм ӕмӕ йӕ организацийӕн разамынд йӕхӕдӕг кӕй дӕтты. (Бакӕс Колоссӕгтӕм 3:23, 24.) Паддзах Давид кувӕндон аразынӕн мысайнӕгтӕ куы радта, уӕд афтӕ загъта: «Чи дӕн ӕз ӕмӕ чи сты мӕ адӕм, цӕмӕй нӕ бон уа ахӕм лӕвӕрттӕ кӕнын? Алцыдӕр дӕуӕй цӕуы, ӕмӕ дӕ къухӕй цы райстам, уый дын дӕттӕм» (1 Аз. 29:14). Ӕмӕ мах дӕр мысайнӕгтӕ дӕтгӕйӕ Йегъовӕйӕн фӕдӕттӕм, йӕ къухӕй цы райстам, уый. Фӕлӕ уый тынг аргъ кӕны, йӕ хъуыддаг аразынӕн нӕ рӕстӕг, нӕ хъарутӕ ӕмӕ не ’хца кӕй не ’вгъау кӕнӕм, уымӕн (2 Кор. 9:7).

17. Царды фӕндагыл цӕугӕйӕ дӕ цыдӕртӕ аивын куы хъӕуа, уӕд дӕ ныфс цӕуылнӕ хъуамӕ асӕтта?

¹⁷ Не ’ппӕт дӕр хъуамӕ цӕуӕм Йесойы къахвӕдтыл, цӕмӕй, цардмӕ чи кӕны, уыцы уынгӕг фӕндагӕй ма ахизӕм (1 Пет. 2:21). Кӕд дӕм афтӕ кӕсы, ӕмӕ дӕ, уыцы фӕндагыл цӕугӕйӕ, цыдӕртӕ аивын хъӕуы, уӕд дӕ ныфс ма асӕттӕд. Уый ууыл дзурӕг у, ӕмӕ дӕ фӕнды Йегъовӕйы разамындмӕ гӕсгӕ архайын. Дӕ зӕрдыл дар: Йегъовӕ зоны, ӕнӕххӕст кӕй стӕм ӕмӕ нын алы хатт кӕй нӕ уайдзӕн Йесойы фӕзмын.

18. Цы нӕ хъӕуы аразын, цӕмӕй кӕронмӕ бахӕццӕ уӕм?

¹⁸ Цӕй уӕдӕ не ’ппӕт дӕр нӕ хъуыдытӕ фидӕнмӕ саразӕм ӕмӕ цӕттӕ уӕм нӕ зондахаст ӕмӕ нӕхи ивынмӕ (Ӕмб. 4:25; Лук. 9:62). Хъуамӕ сӕрныллӕг уӕм ӕмӕ «дарддӕр дӕр цин кӕнӕм», стӕй, «цы хъӕуы, уый-иу аивӕм» (2 Кор. 13:11). Афтӕ куы кӕнӕм, уӕд «уарзондзинады ӕмӕ фарны Хуыцау уыдзӕн [немӕ]». Ӕмӕ уӕд ӕрмӕст кӕронмӕ нӕ бахӕццӕ уыдзыстӕм, фӕлӕ ма нын нӕ балц циндзинад дӕр хӕсдзӕн!