1. Di akuerdo ku Mateo 7:13 i 14, dikon nos por bisa ku nos ta riba un biahe?

NOS tur ta riba un biahe. Nos destinashon, òf meta, ta pa biba den e mundu nobo bou di Yehova su gobernashon amoroso. Tur dia nos ta purba di keda riba e kaminda ku ta hiba na bida. Pero, manera Hesus a bisa, e kaminda ei ta pèrtá i tin biaha ta difísil pa keda riba dje. (Lesa Mateo 7:13, 14.) Debí ku nos ta imperfekto, ta fásil pa nos desviá for di e kaminda ei.—Gal. 6:1.

2. Kiko nos lo analisá den e artíkulo akí? (Wak tambe e kuadro “Humildat Ta Yuda Nos Hasi Kambio.”)

² Si nos ke keda riba e kaminda pèrtá ku ta hiba na bida, nos mester ta dispuesto pa reahustá, esta, kambia, nos pensamentu, aktitut i kondukta. Apòstel Pablo a bisa e kristiannan na Korinto pa “sigui ser reahustá.” (2 Kor. 13:11) E konseho ei ta konta pa nos tambe. Den e artíkulo akí, nos lo analisá kon Beibel por yuda nos hasi kambio, i kon amigu ku ta spiritualmente maduro por yuda nos keda riba e kaminda ku ta hiba na bida. Nos lo analisá tambe ki ora por ta difísil pa sigui guia di Yehova su organisashon. Nos lo mira kon humildat ta yuda nos hasi kambio sin pèrdè nos goso den nos sirbishi na Yehova.

3. Kon Dios su Palabra por yuda nos?

³ No ta fásil pa nos saminá nos pensamentu- i sintimentunan. Dikon nò? Pasobra nos kurason ta engañoso, i p’esei por ta difísil pa nos haña sa kiko lo e motivá nos pa nos hasi. (Yer. 17:9) Ademas, ta fásil pa nos gaña nos mes ku “rasonamentu falsu.” (Sant. 1:22) Pues, nos mester usa Dios su Palabra pa saminá nos mes i realisá kiko ta nos pensamentu- i deseonan di mas skondí. (Heb. 4:12, 13)  Den sierto sentido, Dios su Palabra ta manera un mashin di saka potrèt, ku por mustra kiko nos tin paden. Pero, nos mester ta humilde pa nos por apliká e konseho ku nos ta haña for di Beibel òf for di Dios su representantenan.

4. Kon nos sa ku Rei Saul a bira orguyoso?

⁴ E ehèmpel di Rei Saul ta laga nos mira kiko por pasa ora un hende no ta humilde. Saul a bira asina orguyoso ku e no kier a atmití, ni na su mes, ku e mester a kambia su pensamentu i kondukta. (Sal. 36:1, 2; Hab. 2:4) Por ehèmpel, ora Yehova a bisa Saul kiko e mester a hasi despues di derotá e amalekitanan, e no a obedesé Yehova. Anto ora Profeta Samuel a papia kuné tokante e asuntu, e no kier a atmití su fayo. El a purba di hustifiká loke el a hasi, minimisá e konsekuensianan di su desobedensia i tira falta riba otro hende. (1 Sam. 15:13-24) Anto, no tabata promé biaha ku Saul a hasi algu asina. (1 Sam. 13:10-14) Ta tristu pa bisa ku el a permití su kurason bira orguyoso. E no a korigí su manera di pensa, pues Yehova a reprendé i a rechas’é.

5. Kiko nos por siña for di Saul su ehèmpel?

⁵ Pa nos no bira manera Saul nos mester puntra nos mes: ‘Mi ta buska èksküs pa no apliká sierto konseho di Beibel? Mi ta pensa ku loke mi ta hasi no ta dje grave ei? Mi tin kustumber di tira falta riba otro hende?’ Si nos kontesta pa kualke un di e preguntanan ei ta sí, nos mester kambia nos pensamentu i aktitut. Si nos no hasi esei, nos kurason por bira asina orguyoso ku Yehova lo rechasá nos komo su amigu.—Sant. 4:6.

6. Deskribí e kontraste entre Rei Saul i Rei David.

⁶ Tuma nota ki kontraste tin entre Rei Saul i Rei David. David a stima e lei di Yehova. (Sal. 1:1-3) David tabata sa ku Yehova ta salba hende afligí òf humilde, pero e ta oponé hende orguyoso. (2 Sam. 22:28) P’esei, David a permití Dios su lei kambia su pensamentu. El a skirbi: “Lo mi alabá Yehova, esun ku a duna mi konseho. Asta durante anochi, mi pensamentunan di mas íntimo ta korigí mi.”—Sal. 16:7, NW.

7. Kiko nos lo hasi si nos ta humilde?

⁷ Si nos ta humilde, nos lo permití Dios su Palabra korigí kualke pensamentu robes ku nos tin promé ku esei hiba na kondukta robes. Dios su Palabra lo ta manera un stèm ku ta bisa nos: “Esaki ta e kaminda, kana den dje.” Lo e spièrta nos ora nos desviá for di e kaminda—sea na man drechi òf na man robes. (Isa. 30:21) Si nos skucha Yehova, nos lo benefisiá den vários manera. (Isa. 48:17) Por ehèmpel, nos lo evitá di pasa bèrgwensa debí ku un hende mester korigí nos. I nos lo hala serka Yehova pasobra nos sa ku e ta trata nos manera un yu stimá.—Heb. 12:7.

8. Manera Santiago 1:22-25 ta menshoná, kon nos por usa Dios su Palabra manera un spil?

⁸ Dios su Palabra por ta manera un spil pa nos. (Lesa Santiago 1:22-25) Tur mainta, mayoria di nos ta wak den spil promé ku nos sali kas. Asina ei, nos por mira si nos mester kambia algu promé ku otro hende mira nos. Asina tambe, ora nos ta lesa Beibel tur dia, nos lo mira ki kambio nos mester hasi na nos pensamentu i aktitut. Hopi ruman ta haña ku ta benefisioso pa lesa e teksto di dia promé ku nan sali kas. Nan ta meditá riba loke nan ta lesa, i durante dia, nan ta buska manera pa apliká e konseho for di Dios su Palabra. Ademas, tur dia nos mester  studia i meditá riba Dios su Palabra. Esei por zona simpel, pero esei ta un di e kosnan di mas importante ku nos por hasi pa keda riba e kaminda pèrtá ku ta hiba na bida.

9. Ki ora un amigu lo tin ku korigí bo?

⁹ Bo a yega di kuminsá bai den un direkshon ku lo por a daña bo amistat ku Yehova? (Sal. 73:2, 3) Si un amigu spiritualmente maduro tabatin e kurashi pa korigí bo, bo a skuch’é i apliká su konseho? Si ta asina, bo a hasi loke ta korekto, i sin duda bo ta masha gradisidu ku bo amigu a spièrta bo.—Pro. 1:5.

10. Kiko bo mester hasi ora un amigu korigí bo?

¹⁰ Dios su Palabra ta kòrda nos: “Fiel ta e heridanan di un amigu.” (Pro. 27:6) Kiko esei ke men? Wak e siguiente ilustrashon: Imaginá ku bo ta bai krusa un kaya drùk i bo ta bira wak bo telefòn. Bo ta kuminsá krusa kaya sin paga tinu. Nèt e ora ei, un amigu ta ranka bo na bo brasa i ta hala bo bèk riba asera. El a ranka bo na bo brasa asina duru te ku el a marka bo brasa. Pero, e echo ku el a reakshoná asina lihé a pone ku outo no a dal bo. Asta sí bo keda ku doló na bo brasa pa basta dia, lo bo no rabia ku bo amigu. Al kontrario, lo bo ta masha gradisidu pa su yudansa. Di mes manera, si un amigu bisa bo ku bo abla òf kondukta no ta na armonia ku Dios su normanan hustu, na promé instante esei por hasi bo doló. Pero, no rabia ni bira ofendí pasobra el a duna bo konseho. Esei lo ta masha bobo. (Ekl. 7:9) Mas bien, sea gradisidu ku bo amigu tabatin kurashi pa papia ku bo tokante e asuntu.

11. Kiko lo pone un hende rechasá bon konseho for di un amigu?

¹¹ Kiko lo pone un hende rechasá bon konseho for di un amigu ku ta stim’é? Orguyo. Hende orguyoso gusta pa otro hende “kishikí nan orea.” Nan ta “sera nan orea pa e bèrdat.” (2 Tim. 4:3, 4, nota) Nan ta pensa ku nan no mester di konseho pasobra nan ta mas sabí òf mas importante ku otro hende. Pero, Apòstel Pablo a skirbi: “Si un hende ta kere ku e ta masha kos siendo ku e no ta nada, ta su mes e ta gaña.” (Gal. 6:3) Rei Sálomon a splika esei masha bon. El a skirbi: “Preferibel un mucha hòmber pober, pero inteligente, ku un rei bieu i bobo ku no ta tuma konseho di otro hende.”—Predikador [Ekl.] 4:13, BPK.

12. Di akuerdo ku Galationan 2:11-14, kiko nos ta siña for di e ehèmpel ku Apòstel Pedro a pone?

¹² Wak e ehèmpel ku Apòstel Pedro a pone ora Apòstel Pablo a korigié dilanti otro hende. (Lesa Galationan 2:11-14.) Pedro por a rabia ku Pablo pa e manera i e lugá ku el a skohe pa papia kuné. Pero, komo ku Pedro tabata sabí, el a aseptá e konseho i no a keda tene Pablo na kurason. Al kontrario, despues el a yama Pablo un “ruman stimá.”—2 Ped. 3:15.

13. Kiko nos mester tene na mente promé ku nos duna konseho?

¹³ Si bo ta sinti ku bo mester duna un amigu konseho, kiko bo mester tene na mente? Promé ku bo papia kuné, puntra bo mes: ‘Di bèrdat e persona akí mester di un konseho òf mi ta “demasiado hustu”?’ (Ekl. 7:16) Un hende ku ta demasiado hustu ta husga otro hende, no a base di Yehova su normanan, pero esnan di su mes; i probablemente e no ta masha miserikòrdioso. Si despues ku bo saminá bo mes bo ta sinti ku ainda bo mester papia ku bo  amigu, bis’é presis kiko e problema ta i usa pregunta pa yud’é komprondé ku loke el a hasi tabata robes. Hasi sigur ku loke bo ta bisa ta basá riba Dios su Palabra i kòrda ku no ta bo responsabilidat pa husga bo amigu, pero pa yud’é komprondé kon Yehova ta sinti tokante loke e ta hasiendo. (Rom. 14:10) Usa e sabiduria den Dios su Palabra, i imitá Hesus su kompashon ora bo ta konsehá un hende. (Pro. 3:5; Mat. 12:20) Dikon? Pasobra Yehova lo trata nos na e mesun manera ku nos ta trata otro hende.—Sant. 2:13.

14. Kiko Dios su organisashon ta duna nos?

¹⁴ Yehova ta yuda nos keda riba e kaminda ku ta hiba na bida pa medio di e parti terenal di su organisashon, ku ta duna nos vidio, publikashon i reunion ku ta yuda nos tur apliká e konsehonan ku tin den Dios su Palabra. Nos por konfia tur e informashonnan ei pasobra nan ta basá riba Beibel. Kuerpo Gobernante ta buska guia di spiritu santu pa tuma desishon tokante kon ta e mihó manera pa nos prediká. No opstante, regularmente nan ta evaluá e desishonnan ei pa wak si mester hasi kambio. Dikon? “Pasobra e esena di e mundu akí ta kambiando,” i Dios su organisashon mester adaptá na sirkunstansia nobo.—1 Kor. 7:31.

15. Ki difikultat algun publikadó a haña nan kuné?

¹⁵ Ora Dios su organisashon duna nos splikashon nobo di un siñansa bíbliko òf guia riba norma moral, nos ta aseptá i apliká esei. Pero, kon nos ta reakshoná ora Dios su organisashon hasi un kambio ku tin efekto riba otro aspekto di nos bida? Por ehèmpel, den e último añanan kosto pa traha i mantené lugá di adorashon a oumentá drástikamente. Pues, Kuerpo Gobernante a duna instrukshon pa mas tantu kongregashon posibel usa e mesun Salòn di Reino. Esei a pone ku algun kongregashon mester a djòin ku otro i mester a bende algun Salòn di Reino. E plaka ku a spar a ser usá pa traha Salòn den área ku tin mas mester. Si bo ta biba den un área kaminda a bende Salòn di Reino i e kongregashonnan a djòin otro, kisas ta difísil pa bo adaptá na e sirkunstansia nobo. Awor, algun publikadó tin ku kore  mas largu pa asistí na reunion. Otro publikadó ku a traha duru pa konstruí òf mantené un Salòn di Reino ta puntra nan mes dikon tin ku bende e Salòn. Nan por sinti ku tur nan tempu i esfuerso tabata pòrnada. Pero, nan ta aseptá e desishon ku a tuma i ta obedesé i esei ta di elogiá.

16. Si nos apliká e konseho na Kolosensenan 3:23 i 24, kon esei lo yuda nos mantené nos goso?

¹⁶ Nos lo mantené nos goso si nos kòrda ku nos ta traha pa Yehova i ku e ta guia su organisashon. (Lesa Kolosensenan 3:23, 24.) Rei David a pone un bon ehèmpel ora el a duna plaka pa traha e tèmpel. El a bisa: “Ta ken mi ta, i ta ken mi pueblo ta, ku nos lo por a duna un ofrenda generoso manera esun akí? Pasobra tur kos ta bini for di bo i ta for di bo man nos a duna bo.” (1 Kró. 29:14) Ora nos ta kontribuí ku plaka, nos tambe ta dunando Yehova loke a bini for di su man. Pero, Yehova ta keda masha kontentu ora nos ta duna nos tempu, energia i plaka pa hasi su trabou.—2 Kor. 9:7.

17. Dikon bo no mester sinti bo desanimá si bo mester hasi kambio?

¹⁷ Pa nos keda riba e kaminda pèrtá ku ta hiba na bida, nos tur mester imitá Hesus su ehèmpel. (1 Ped. 2:21) Si bo mira ku bo mester hasi kambio, no desanimá. E echo ku bo ta realisá esei ta demostrá ku bo ke sigui Yehova su guia. No lubidá ku Yehova sa ku nos ta imperfekto. Pues, e no ta ferwagt pa nos imitá Hesus su ehèmpel perfektamente.

18. Kiko nos mester hasi pa logra nos meta?

¹⁸ Laga nos tur enfoká riba futuro i sea dispuesto pa kambia nos pensamentu, aktitut i kondukta. (Pro. 4:25; Luk. 9:62) Laga nos keda humilde, “sigui alegrá [i] sigui ser reahustá.” (2 Kor. 13:11) Si nos hasi esei, “e Dios di amor i di pas lo ta ku [nos].” I nos lo no djis yega nos destinashon, pero nos lo disfrutá di e biahe tambe.