1. Ngoeak a ngera el rolel e kede ngar er a omerael, el ua lolekoi a Mateus 7:13, 14?

KID el rokui a ngar er a omerael. Sel basio el debo er ngii me a lechub e ngturrekong er kid a mo kiei er a beches el blekeradel el ngar cheungel omengederederel a Jehovah. Ngbek el sils el dolasem el oltirakl er tia el rael el mora klengar. Engdi ngua lullekoi a Jesus, tia el rael a obutek e a lebebil e ngmeringel er kid a oltirakl er ngii. (Monguiu er a Mateus 7:13, 14.) Ngdiak demecherrungel me ngbeot er kid el metuchakl el mo cheroid er tia el rael.​—Gal. 6:1, BT.

2. Ngera kede mo mesaod er tia el suobel? (Dirrek el momes er a baks el “ A Klengariourreng a Ngosukid el Mesmechokl er Kid.”)

² Me a lsoad el melemolem el merael er a obutek el rael el mora klengar, e ngkired el kongei el melodech a uldesued, blekerdeled, me a omerelled. A apostol Paulus a millisiich er a Rekristiano el kiei er a Korinth me lolemolem el ‘mesmechokl a blekerdelir.’ (2 Ko. 13:11, BT) Tia el uleklatk a dirrek el melutk er kid. Ngar tia el suobel e kede mo mesaod a rolel a Biblia sebechel ngosukid el mesmechokl er kid me a rolel a rungil kerebai el Kristiano a sebechir el ngosukid el melemolem el merael er a rael el mora klengar. Kede dirrek el mo mesaod er a omelsemai el mo er ngii sel doltirakl a ulekrael el mlara cheldebechelel a Jehovah. Kede mo mesa rolel e a klengariourreng a sebechel ngosukid el sumecheklid e a osisiu el taem e ngdiak doridii a deurreng er kid er a omesiunged el mora Jehovah.

3. A Tekingel a Dios ngngera ngsebechel rullii el kirem?

³ Ngmeringel a di lekid el melasem el merriter a uldesued me aike el domelechesiu. A rengud a cheblad, me ngsebechel rullii el mo meringel er kid a mesa el kmo ngomekrael er kid el bedul ker. (Jer. 17:9) Ngkmal beot a ‘di el kid el mecheblad er kid.’  (Jak. 1:22) Me ngkired el ousbech er a Tekingel a Dios el merriter er kid. A Tekingel a Dios a ochotii sel mera el ngar er a rengud, ngocholt a ‘urunguled ma uldesuel’ a rengud. (Heb. 4:12, 13) Ngoureor el ua mesil er a X-ray el ngosukid el mes aike el mera el ngar er a chelsed. Me nguaisei engdi ngkired el mo ngariou a rengud a lsoad el ngmai a klungioled er a Biblia me a lechub e ngtirke el lousbech er tir a Dios.

4. Ngera ochotii el kmo a King Saul a mlo kedidai a rengul?

⁴ A tekoi el dilubech el mora King Saul a ocholt aike el sebechel duubech sel lak doba klengariourreng. A Saul a kmal mlo imis el kedidai a rengul me ngdimlak lekengei el kmo ngkirel mesmechokl er a uldesuel me a omerellel. (Psa. 36:1, 2; Hab. 2:4) A blekerdelel a ulebeketakl er sel taem el Jehovah uluuchais er ngii aike el kirel meruul sel bo lemesisiich er a rechad er a Amalek. Me nguaisei engdi a Saul a dimlak lolengesenges. A profet Samuel er sera loker er ngii el kirel tia el tekoi e ngdimlak lekengei el kmo ngmlo mekngit. Ngbai millasem el osiik a excuse el kirel a omerellel loeak a lomekbeot er a berredel a omerellel e loltelechakl er a rechad el kirel. (1 Sa. 15:13-24) Ngulechotii a osisiu el blekeradel er a uchei. (1 Sa. 13:10-14) Ngklengiterreng e le ngmlo kedidai a rengul. Ngdimlak lsemecheklii a uldesuel, me a Jehovah chileklii e ultngeklii.

5. Ngera sebeched el suubii er a tekoi el dilubech el mora Saul?

⁵ Ngdiak el soad el mo ua Saul me ngkired el di kid el oker el kmo: ‘Sel kunguiu a uleklatk er a Tekingel a Dios, ngblekerdelek el soak el di osiik a excuse me ngdiak kultirakl er ngii? Ak mengkekerei er a berredel a omerellek? Ak mo oltelechakl er a rechad el kirel a omerellek?’ A lsekum a nger er kid er a ta er aika el ker a chochoi, e ngkired el sumechokl a uldesued me a blekerdeled. E le lak e ngsebechel kmal mo kedidai a rengud me a Jehovah mo otngeklid me ngdiak desechelil.​—Jak. 4:6.

6. Mosaod er a klekakerous er a King Saul me a King David.

⁶ Momtab a klekakerous er a King Saul me ngike el mlo oltechil el King David, el ngii a mle betik a rengul er a “llechul a RUBAK.” (Psa. 1:1-3) A David a mle medengei el kmo a Jehovah olsobel er a rengariou a rengrir e omtok er a remekedidai a rengrir. (2 Sa. 22:28) Me ngkilengei a llechul a Dios me losmechokl a uldesuel. Ngmilluches el kmo: “Ak uldanges er a RUBAK ele ng mengetikaik er ngak, ma le klebesei e a ukltkel a renguk omeklatk er ngak.”​—Psa. 16:7.

7. Ngera bo doruul a lsekum ngariou a rengud?

⁷ A lsekum e ngariou a rengud, e kede kongei er a Tekingel a Dios me ngmesmechokl a mekngit el uldesued er a uchei er a derebet er a klengit. A Tekingel a Dios a mo ua ngor el melekoi er kid el kmo: “Tiakid a rael el bo mokiu ngii.” Ngmo omeklatk er kid sel demetuchakl er a rael el kired el merael er ngii. (Isa. 30:21) Sel dorrenges er a Jehovah, e ngmo uchul a betok el klungioled. (Isa. 48:17) El ua tiang, a chad a diak bo lomeklemalt er kid el mo uchul e kede mo merur. Kede dirrek el mo kmeed er a Jehovah e le kede medengei el kmo ngomekerreu er kid el ua betik a rengul chedam.​—Heb. 12:7.

8. Ngmekera dousbech er a Tekingel a Dios el ua dirk, el ua losaod a Jakobus 1:22-25?

⁸ A Tekingel a Dios a sebechel el oureor el ua dirk. (Monguiu er a Jakobus 1:22-25.) A ruumesingd er kid a omes er tir er a dirk er a uchei er a ltobed er a blirir. Seikid e ngsebeched el mes aike el kired el sumechokl er a uchei er a lesekid a rechad. Me ngdi osisiu, sel donguiu er a Biblia er a bek el sils, e kede mes a rolel e ngsebeched el sumechokl a uldesued me a blekerdeled. Te betok a metik er ngii el kmo ngungil a lechiuii a text er a tutau er a uchei er a ltobed er a blirir. Te mecherei me ngomekrael a uldesuir e osiik a rolel e ngsebechir el loltaut a ulekrael er  ngii el ta el sils. Ngdirrek el kirel mo blekerdeled el menguiu e melatk a Tekingel a Dios er a bek el sils. Tia kora ua lebeot el tekoi, engdi ngta er a kot el klou a ultutelel el tekoi el sebeched el meruul er ngii me dolemolem el merael er a obutek el rael el mora klengar.

9. Ngoingera el taem e a Kristiano a mo mesmechokl er kau?

⁹ Ngmla ta el momuchel el merael er a rael el rirellau el mo cheroid er a Jehovah? (Psa. 73:2, 3) A lsekum a ungil kerebai el Kristiano a mla er ngii a blekengel el mesmechokl er kau, e ke mlo orrenges er ngii e oltaut a tekingel? A leuaisei, e ke rirellii a melemalt el tekoi e ulterekokl el kmal mlo oba omereng el saul e le ngulemeklatk er kau.​—Osi. 1:5.

10. Ngkirem el mekerang a lsekum a sechelim a mesmechokl er kau?

¹⁰ A Tekingel a Dios a omeklatk er kid el kmo: “A ungil sechelim a osiik a klungiolem, el mo lmuut ma le chelebedau.” (Osi. 27:6) Ngmekera tia el tekoi e klemerang? Ka momtab er tia el okesiu: Molatk er kau el dechor el mengiil el mo imuul er a bita el rael e mo mechesang er a dengua er kau. Me ke mocha omakes e diak momes. E seikid e a sechelim a orekedii a chimam e kursau el mei er a tkul a rael. Ngkmal mle meringel el kursau me a chimam a doall engdi tia el omerellel a ulsebelii a klengar er kau me ngdimlak ometuchel er a mlai. Me alta ngmo meringel a chimam el tela el klebesei, engdi ngmo kesib a rengum er a sechelim e le ngkilersau? Ngkmal diak! Ke bai kmal moba omereng el saul el kirel a ngelsuil. Me ngdi osisiu, a lsekum a sechelim a omeklatk er kau el kmo a tekingem me a lechub e ngomerellem a diak loltirakl a melemalt el llechul a Dios, e nglocha mo metirm a rengum er a uchelel. Engdi lak bo el chetim me a lechub e bo el kesib a rengum. E le ngmo klebelung a omerellem. (Oli. 7:9) Bai moba omereng el saul e le ngmla er ngii a blekengel louchais er kau.

11. Ngera sebechel rullii a chad me ngoltngakl a ungil uleklatk el mlara sechelil?

¹¹ Ngera sebechel rullii a chad me ngoltngakl a ungil uleklatk el mlara sechelil? Ngkldidairreng. A remekedidai a rengrir a sorir “a ikel ungil er chorenges er tir.” Te ‘olechib a dingerir era klemerang.’ (2 Ti. 4:3, 4, BT) Te omdasu el kmo ngdiak lousbech a uleklatk e le te kuk mellomes a rengrir e klou a ultutelir er a rebebil. Me nguaisei engdi a apostol Paulus a milluches el kmo: “A chad el diak a belkul, e omdasu el kmo ng ngar ngii a belkul, a di ngii el mengeblad er ngii.” (Gal. 6:3) A King Salomon a kmal mle ungil mesaod er tia el tekoi. Ngmilluches el kmo: “Ng bai ungil a chebuul e mellomes a rengul el ngeasek, er a chuodel e kebelung el king el dikea le renges a tekoi.”​—Oli. 4:13.

12. Ngera kede suubii er a kerebai el bilecherei a apostol Petrus, el ua lolekoi a Galatia 2:11-14?

¹² Momtab er a kerebai el bilecherei a apostol Petrus er sera lomeklemalt er ngii a apostol Paulus. (Monguiu er a Galatia 2:11-14.) A Petrus a mle sebechel mo chetil a tekingel a Paulus e le ngrolel a lullekoi er ngii me a basio el lebla er ngii e melekoi er ngii. Engdi a Petrus a mle mellomes a rengul. Ngkilengei er tia el uleklatk e dimlak longemekl a chetil er a Paulus. A uriul e ngbai ulemekedong er a Paulus el “betik ra rengud lodam.”​—2 Pe. 3:15, BT.

13. Ngera kired el melatk sel domesterir a rebebil a uleklatk?

¹³ Ngera kirem el melatk er ngii a lsekum komdasu el kmo ngkirem el omeklatk er a sechelim? A uchei er a omongedecheduch er ngii, e di el kau el oker, ‘Ngak ak kumdasu el kmo ak kuk kmal melemalt?’ (Oli. 7:16) A chad el omdasu el kmo ngkmal melemalt a oukerrekeriil er a rebebil loltirakl er aike el soal el diak el ike el soal a Jehovah, e locha diak loba klechubechub.  A lsekum ke mla merriter er kau e mtebengii el kmo ngdirk kirem el mo mengedecheduch er a sechelim, e bo bleketakl el ouchais er ngii er a mondai e mousbech a ker el rullii el mo medengei el kmo a tekoi el lerirellii a mle mekngit. A tekingem lemengai a uchetemel er a bades, e lak mobes el kmo ng Jehovah ngike el oukerekeriil el diak el kau. (Rom 14:10) Multuil er a llomeserreng el ngar er a Tekingel a Dios, e sel bo momeklatk er a chad e moukerebai er a klechubechub er a Jesus. (Osi. 3:5; Mt. 12:20) E ngera uchul? E le Jehovah a mo meruul el me er kid el oltirakl er a omerelled el mora rebebil.​—Jak. 2:13.

14. Ngera ngmla kutmokl a cheldebechelel a Dios el kired?

¹⁴ A Jehovah a omekrael er kid er tia el rael el mora klengar loeak a meues el cheldebechelel, el ngii a mengetmokl a video, babier, me a miting el ngosukid el oltaut a uleklatk el dengai er a Tekingel. Aika mengai a uchetemel er a Bades. E a Chelechad er a Ruungerachel sel lolib a rolel e ngmeketmokl a ureor er a berkel a klumech e ngultuil er a chedaol reng. Me nguaisei, engdi ngblechoel el merriter aike el bla letib el kirel a ureor er a berkel a klumech. E ngera uchul? E le “blekeradel er tia el beluulechad a di mengodech” me ngkirel a cheldebechelel a Dios loltirakl a blekeradel el ngar ngii.​—1 Ko. 7:31, NW.

15. Ngera el omelsemai a blo lechelebangel er ngii a rebebil publisher?

¹⁵ Kede ulterekokl el kongei el oltirakl a ulekrael el dengai er a Biblia el kirel a tekoi er a osisechakl me a kldung. Engdi kede mo mekerang a lsekum a cheldebechelel a Dios a rullii a omelodech el ngar ngii a bo el rellii er a kuk bebil telengtengil a klengar er kid? El ua tiang, ngar er aika el mereko el rak e ngkmal mla mo meringel a cheral a okedecherul me a oketmeklel a blil a omengull er kid. Me a Chelechad er a Ruungerachel a mla otebedii a tekingel me a betok el ongdibel bo lousbech er a di osisiu el Blil a Ongdibel. Sei a uchul me a betok el ongdibel a bla lodak me a bebil Blil a Ongdibel a bla loterau. Me a udoud el lengai a lousbech el omekedechor a Blil a Ongdibel el ngar er aike el beluu el kmal lousbech. A lsekum e kau a kiei er a basio el bla lolterau a Blil a Ongdibel me a rechad er a kakerous el ongdibel a bla bo loldak e nglocha meringel er kau tia el beches el omelodech. A rebebil publisher a mla mo ousbech er a klou el taem el omekall el mora miting. A rekuk bebil el uluureor el omekedechor me a lechub e te maintain er a Blil a Ongdibel a locha mo melatk er a uchul me ngkirel moterau. Te locha mo melatk  el kmo a temir me a urerir el milechoit el kirel a di mlo diak a ultutelel. Me nguaisei, engdi te kongei er tia el beches el omelodech me kede chemat er tir el kirel.

16. Ngmekera e a doltaut er a uleklatk el ngar er a Kolose 3:23, 24 e ngosukid el melemolem el dmeu a rengud?

¹⁶ Ngsebeched el melemolem el dmeu a rengud a lsekum ngdiak dobes el kmo kede oureor el kirel a Jehovah e ngii a omekrael er a cheldebechelel. (Monguiu er a Kolose 3:23, 24.) A King David a milecherei a ungil kerebai er sera lolenget a udoud el mo omekedechor er a templo. Ngdilu el kmo: “Ngak ma re chedak a diak a meral ngeral sebecham el meskau, ele bek el klalo a sengk el mlar kau el mei, maki di lmuut el meskau a di mla kloklem.” (1 Kr. 29:14) Sel dolenget a udoud, e kede omsa Jehovah aike el bla lebeskid. Me nguaisei engdi a Jehovah a oba omereng el saul el kirel a temed, klisiched, me a ududed el dousbech el meruul er a urerel.​—2 Ko. 9:7.

17. Ngera me ngdiak el kirel mo mechitechut a rengum a lsekum ngar ngii a kirem el mesmechokl?

¹⁷ A lsoad el melemolem el merael er a obutek el rael el mora klengar, e ngkired el rokui el oltirakl er a kerebil a Jesus. (1 Pe. 2:21) Me a lsekum ke mesa el kmo ngar ngii a kirem el mesmechokl, e lak bo lemechitechut a rengum. Tiang a ungil tekoi e le ngochotii el kmo kau a soam el oltirakl a ulekrael er a Jehovah. Lak mobes el kmo a Jehovah a diak longerechir er kid el diak demecherrungel el chad el mo cherrungel loltirakl er a kerebil a Jesus.

18. Ngera kired el meruul me denguu a turrekong er kid?

¹⁸ Me bo el sebeched el rokui el mo ultaut a osenged er a ngar medad e dekengei el sumechokl a uldesued, blekerdeled, me a omerelled. (Osi. 4:25; Lk. 9:62) E bo doba klengariourreng e ‘ldeu a rengud . . . e dosmechokl a blekerdeled.’ (2 Ko. 13:11, BT) A doruul uaisei, e ‘ngmo obengked a Dios ra bltikerreng ma budech.’ Seikid e ngdiak di bo derekir a omerolled kede dirrek el mo dmeu a rengud er tia el omerael.