1. Ha gutadila Matayo 7:13, 14, mukunda natshi tuajiya guzuela egi tudi mulandula gutshita vuayaje?

MUKUT’ETU agasue tudi mulandula gutshita vuayaje. Tuana tshita ngolo ha gukombelela Yehowa, hagula mbatujinge mu mavu ahe-ahe mu uhinyinyi wa Yehowa. Lusugu nu lusugu tuana tshita ngolo ha gulandula njila yana gubata gu monyo. Uvi Yesu wazuelele egi njila yene yana khala yakama nu yana khala nji lamba ha guyilandula. (Tanga Matayo 7:13, 14.) Luholo tushigo athu atagana, yajiya gukhala yaleba ha gubemba gulandula njila yene.—Gal. 6:1.

2. Itshi tuza muzuelela mu longo edi? (Tala nji galuanda “ Khadilo dia Gudibulumuisa Diana Gutukuatesa ha Gusombegesa.”)

² Gula tudi mutshigina gulandula njila idi mubata gu monyo, tudi naye gukhala hehi ha gusombegesa matangi’etu, makalegelo etu nu luholo luetu lua gutshita ndaga. Mupostolo Phaula wawambelele Aklisto a gu Kolinto ha gulandula ‘gutshita usombegeshi.’ (2 Kol. 13:11) Longo diene didi nji gututadila esue mangino. Mu longo edi tuza muzuelela luholo Biblia yajiya gutukuatesa ha gusombegesa nu luholo Aklisto agukula mu nyuma ajiya gutukuatesa ha gulandula njila ya monyo. Tuza mumona nji ndaga yajiya gutshita egi ikhale lamba ha gulandula utuameji wa ulondegi wa Yehowa. Tuza mumona luko luholo khadilo dia gudibulumuisa diajiya gutukuatesa ha gusombegesa nu ha gubamba gusuanguluga guetu tangua tudi mukombelela Yehowa.

3. Luholo lutshi Mbimbi ya Nzambi yajiya gutukuatesa?

³ Gukamba gujiya matangi’etu nu luholo tuana gudivua yana khalago ndaga yaleba. Mukunda natshi? Handaga mutshima wetu wana guhuiga. Hene, yajiya gukhala lamba gudi esue ha gujiya ndaga mutshima udi gututuma ha gutshita. (Yel. 17:9) Ngenyi, tuajiya gudihuiga esue hakhetu nu ‘matangi abola.’ (Yak. 1:22) Gishina  giene, tudi naye gukalegela Mbimbi ya Nzambi ha gujiya ndaga tudi ‘mutangiza nu ha gukotelesa nzala jietu’ tudi najio mu mutshima. (Heb. 4:12, 13) Gifua luholo apareyi ana gutamegewa egi radiographie ana gutukuatesa ha gumona muila wetu wa mukatshi, Mbimbi ya Nzambi nji yana gutukuatesa ha gujiya umuthu wetu wa mukatshi. Uvi, tudi naye gukhala athu a gudibulumuisa ha gukalegela malongo a Biblia nu a aphangi atombewe gudi Yehowa ha gututuameza.

4. Itshi idi mumonesa egi Fumu Saula wabuile muenya lulendo?

⁴ Gifezegeselo gia Fumu Saula gidi mumonesa ndaga yajiya gutubuila gula tushigo nu khadilo dia gudibulumuisa. Luholo Saula wabuile muenya lulendo luakola, gatshiginyinego nga hazonda gusombegesa matangi’enji nu makalegelo enji. (Ngi. 36:1, 2; Hab. 2:4) Ndaga yene yamonegele haphelo tangua Yehowa wamuwambelele ndaga ya gutshita gungima dia gubinga enya gu Amaleke. Uvi, Saula watumagelego Yehowa. Tangua profete Samuele wamuhudile ndaga yene, Saula gatshiginyilego gubola guenji. Ha fundo dia gutshigina gubola guenji, wazuelele egi gakalegelego gubola guakoma. Wazuelele luko egi athu amushinjigile ha gutshita ndaga yene. (1 Sam. 15:13-24) Gutuama egi aye aluise enya Amaleke, Saula wamonesele nji khadilo dia lulendo. (1 Sam. 13:10-14) Ndaga ya gikenene idi egi, mutshima wenji wazalele pha nu lulendo. Yehowa wamubalediele nu wamutunyile handaga gasombegeselego matangi’enji.

5. Longo ditshi tuajiya guzula mu gifezegeselo gia Saula?

⁵ Hagula tukhadigo gifua Saula, tudi naye gudihula mihu eyi: ‘Gula ngudi mutanga malongo a mu Biblia, nganakamba gudibingisa ha gutuna gukalegela malongo ene ba? Ngana tangiza egi ndaga ngudi mukalagala ishigo genji diago yabola ba? Ngana tshigina gubola guami gula ngakalagala ndaga yabola ba?’ Gula mvutu gu mihu eyi idi ayi, tudi naye gusombegesa luholo luetu lua gutangiza, nu makalegelo etu. Handaga gula tuakalegele ndo ngenyi, mutshima wetu wajiya guzala pha nu lulendo. Ngenyi, Yehowa mbaatshiginago egi tukhale mafuta enji.—Yak. 4:6.

6. Gudisha gutshi gudi mukatshi dia Fumu Saula nu Fumu Davidi?

⁶ Tala gudisha gudi mukatshi dia Fumu Saula nu Fumu Davidi munu wakhalele muzumba ‘mikhuala ya Yehowa.’ (Ngi. 1:1-3) Davidi wakhalele mujiya egi Yehowa wana huluisa athu a gudibulumuisa uvi wana tuna enya lulendo. (2 Sam. 22:28) Hene, Davidi wabembele egi Mbimbi ya Nzambi isombegese matangi’enji. Wasonegele egi: ‘Mbangugutumbuisa handaga wana gunguhana malongo. Ikhale mu phipha, mutshima wami wana gungutemesa.’—Ngi. 16:7.

7. Itshi mbatushita gula tudi mumonesa khadilo dia gudibulumuisa?

⁷ Gula tudi nu khadilo dia gudibulumuisa, mbatubemba egi Mbimbi ya Nzambi isombegese matangi’etu hagula tutshitshigo ndaga yabola. Mbimbi ya Nzambi mbayikhala gifua dijui didi gutuwambela egi: “Njila yenyeyi. Yilandulenu.” Mbayitutemesa gula tuasendesa gutshita ndaga yabola. (Yesh. 30:21) Gula tudi mutegelela Yehowa mbatuheta gubonga. (Yesh. 48:17) Mbatuvuigo musonyi, gula phangi mumoshi watuhana longo. Ngenyi mbatusala ya gujinginyina gudi Yehowa handaga tudi mujiya egi wana gutuzula gifua mona wa guzumba.—Heb. 12:7.

8. Luholo Yakoba 1:22-25 idi guyimonesa, luholo lutshi tuajiya gukalegela Mbimbi ya Nzambi gifua nganza?

⁸ Mbimbi ya Nzambi yajiya gukhala gifua nganza (thalathala). (Tanga Yakoba 1:22-25.) Athu avula mukatshi dietu ana guditala gu nganza mu gimenegena gutuama egi azoge. Ngenyi, ajiya gumona gula adi nu gima gia gusombegesa gutuama egi athu ako a amone. Luholo lumoshi nji gula tudi mutanga Biblia lusugu nu lusugu, mbatumona luholo tuajiya gusombegesa matangi nga makalegelo etu. Athu avula ana suanguluga gutanga mukhapho wa lusugu mu gimenegena gutuama egi azoge. Ana gubemba egi ndaga atangi jituameze matangi awo. Gutshita ngenyi  guana guakuatesa ha gukalegela malongo adi mu Mbimbi ya Nzambi lusugu lua mudidi. Tudi naye gukhala nu programe ya gutanga nu gutangigiza Mbimbi ya Nzambi lusugu nu lusugu. Yajiya gumonega gifua idi ndaga yaleba uvi, idi mukatshi dia ndaga jia gubalega ndando tuajiya gutshita ha gulandula guwenda mu njila ya monyo.

9. Ndaga itshi yajiya gutuma futa diaye mumoshi wa gukula mu nyuma ha guguhana longo?

⁹ Wakalegele ndaga imoshi yagutumile ha gubolesa ufuta waye nu Yehowa ba? (Ngi. 73:2, 3) Gula futa diaye mumoshi wa gukula mu nyuma waguhanele longo mukunda nu ndaga yene, wamutegelele nu wakalegele longo diene ba? Gula idi ngenyi, wakalegele diago ndaga yawaha nu wana hana mersi luholo futa diaye agutemesele.—Ish. 1:5.

10. Itshi udi naye gutshita gula futa diaye waguhana longo?

¹⁰ Mbimbi ya Nzambi idi gutuwambela egi: “Futa udi mugubela udi mudijiga gutshigina guenji gudi aye.” (Ish. 27:6) Ndaga eyi idi mukotelesa itshi? Tutadilenu gifezegeselo egi: Tangiza egi udi mutshigina guzawuga njila yana balega tumiyo (mashinyi), uvi wawunganesa matangi aye gu telefone. Wasendesa gubatula njila gutala ndo khanda nu khanda. Mutangua diene, futa diaye mumoshi wa gukuata gu koko mangololo, wa gunana ha guguvutula gungima. Wajiya guvua gubala gu koko handaga wagukuatshi mangololo, uvi gutshita ngenyi guaguhuluisa hagula gamiyo gagudiatshigo. Na wajiya guvuila futa diaye khabu luholo wagunanyi gungima ngatshima udi mulandula guvua gubala masugu avula ba? Ndo sha! Mbawumuhana mersi avula mukunda nu ukuateshi wenji. Luholo lumoshi nji, gula futa diaye waguwambela egi ndaga udi muzuela nga udi mutshita jishigo gudivua nu mikhuala yatagana ya Nzambi, mu tangua diene wajiya guvua khabu. Uvi mu guzuela guabonga, ushigo naye gumuvuila khabu mukunda nu longo dienji, handaga gutshita ngenyi ishigo gutema. (Mulo. 7:9) Hene, udi naye guhana futa diaye mersi luholo wamonesa gikhesa ha guguhana longo diene.

11. Itshi yajiya gutuma muthu ha gutuna longo diabonga dia futa dienji?

¹¹ Itshi yajiya gutshita egi muthu atune longo diabonga dia futa dienji wa guzumba? Lulendo. Enya lulendo ana zumba “mbimbi jidi guabongela gu matshui.” Ana “katula matshui awo gu ndaga ya giamatshidia.” (2 Tim. 4:3, 4) Ana mona gifua ashigo nu funu ya malongo handaga ana tangiza egi adi atema, nga ndo ana khala nu ndando yavula gubalega. Hene, mupostolo Phaula wasonegele egi: ‘Gula muthu udi mutangiza egi udi nu ndando uvi muene gashigo nu ndando, udi gudihuiga.’ (Gal. 6:3) Fumu Solomo wakotelesele ndaga yene muabonga. Wazuelele egi: ‘Mona yonu udi phutu uvi muene watema udi muabonga gubalega fumu wagukola uvi muene waheya, yonu gashigo luko nu ndunge ha gutegelela malongo.’—Mulo. 4:13.

12. Ha gutadila Galatiya 2:11-14, gifezegeselo gia mupostolo Phetelo gidi gutuhana longo ditshi?

¹² Tangiza ndaga yatshitshile mupostolo Phetelo tangua mupostolo Phaula wamuhanele longo ha meso a athu agasue. (Tanga Galatiya 2:11-14.) Phetelo wakhalele naye guvua khabu mukunda nu ndaga jiazuelele Phaula nu luholo wamuwambelele ndaga yene ha meso a athu agasue. Uvi Phetelo wamonesele gutema. Watshiginyile longo diamuhanele Phaula, gamuvuidilego khabu nga gulandula gutangiza ndaga yene. Gungima, watamegele Phaula egi ‘phangi’etu wa guzumba.’—2 Phet. 3:15.

13. Ndaga jitshi tudi naye gutangiza gutuama dia guhana phangi longo?

¹³ Gula khenji utangijilego ha guhana futa diaye longo, itshi yajiya gugukuatesa? Gutuama dia gumuhana longo, dihule egi, ‘Ngana gudimona gifua ngudi “muthu wabonga gubalega ba”?’ (Mulo. 7:16, NWT) Muthu udi gudimona gifua udi muthu wabonga gubalega, wana zolela athu ako mikhuala yenji hakhenji ha fundo dia gulandula mikhuala  ya Yehowa. Yajiya gukhala egi ganago guvuila athu ako khenda. Gula wamona egi udi naye guhana futa diaye longo, kamba gujiya muabonga ndaga idi gugutuma ha gumuhana longo diene. Ndaga udi naye guzuela jidi naye guzoga mu Biblia. Kalegela mihu yajiya gumukuatesa ha gujiya gubola guenji. Tushigo naye gujimbila egi gusophesa muthu gushigo ginemo gietu, uvi tudi naye gumukuatesa ha gukotelesa luholo ludi gudivua Yehowa mukunda nu ndaga yakalagala muene. (Lomo 14:10) Tangua tudi muhana phangi’etu longo, tudi naye gulandula khadilo dia Yesu dia khenda. Tudi naye nji gukalegela ndunge jia Mbimbi ya Nzambi. (Ish. 3:5; Mat. 12:20) Mukunda natshi? Handaga Yehowa mbawutukalegela ndaga gifua luholo tuana kalegela athu ako ndaga.—Yak. 2:13.

14. Ima itshi ulondegi wa Nzambi wana gutuhana?

¹⁴ Yehowa wana kalegela gitshinyi gia ha mavu gia ulondegi wenji ha gututuameza mu njila ya monyo. Ulondegi wene wana gutuhana bavideo nu mikanda. Wana gutukuatesa nji ha gudibungisa. Ima eyi yana gutukuatesa ha gukalegela malongo a Biblia. Malongo agasue ana zoga mu Biblia. Aphangi a Hunji dia Akulu Atuameji ana landula utuameji wa nyuma ya Nzambi tangua ana zula badesizio atadila luholo luabonga lua gutshita mudimo wa gulongesa. Uvi, ana tadila luko badesizio awo ha gujiya gula adi naye guasombegesa nga ndo. Mukunda natshi? Handaga ‘ndaga jia ha mavu awa jidi musombegesa,’ nu ulondegi wa Yehowa udi naye nji gusombegesa ndaga.—1 Kol. 7:31.

15. Malamba atshi alongeshi ako adi mutagana nawo?

¹⁵ Tangua ulondegi wa Yehowa wana gutuhana ukoteleshi uhe-uhe mu ndaga imoshi idi mu Biblia nga atuhana utuameji gu mikuala yatagana, tuana gutshigina nu tuana kalegela ndaga yene. Uvi itshi tuana tshita gula ulondegi wa Yehowa wasombegesa ndaga imoshi idi mutadila ndaga jiko jia monyo wetu? Ha gufezegesa mu ivo yabalega, mutango wa makuta wazolewe ha gutunga nu gulondega jinzo jia Ufumu nu mafundo ako agukombelela wakanduga diago. Hene, Hunji dia Akulu Atuameji diazudile desizio egi Inzo imoshi ya Ufumu yajiya gukalegewa gudi mahungu avula. Gishina giene mahungu avula abungishiwe, Jinzo jiko jia Ufumu jiadigiwe. Makuta ene a akuatesele ha gutunga Jinzo jia Ufumu mu mafundo ako. Gula wakhalele fundo dia digiwe Jinzo jia Ufumu nga fundo diabungishiwe mahungu, yajiya gukhala egi yakhalele lamba mukunda nu aye ha gujidila nu usombegeshi wene. Mangino, alongeshi ako ana kalagala vuayage jialeha ha guya  mu gudibungisa gua mu hungu. Aphangi ako ana gutunga nu gulondega Jinzo jia Ufumu, ajiya gudihula egi mukunda natshi adi mudiga Jinzo jia Ufumu? Ajiya gumona egi abalegesele tangua nu ngolo jiawo jia githuhu. Uvi ana gutshigina usombegeshi uhe-uhe nu tudi naye guashimana.

16. Luholo lutshi longo didi mu Kolosai 3:23, 24 diajiya gutukuatesa ha gubamba gusuanguluga guetu?

¹⁶ Mbatulandula gubamba gusuanguluga guetu gula tudi mujiya egi mudimo tudi mutshita udi mukunda nu Yehowa nu muene udi mutuameza ulondegi wenji. (Tanga Kolosai 3:23, 24.) Fumu Davidi wahanele gifezegeselo giabonga tangua ahanele makuta mukunda nu gutungiwa gua tempelo. Wazuelele egi: ‘Ame ngudi nanyi nu athu ami adi akhuatshi hagula tuguhane musomonyi wa luholo elu? Handaga ima yagasue yana katuga gudi aye nu esue tudi guguvutudila ima wana gutuhana.’ (1 Gudi. 29:14) Tangua tuana hana Yehowa musomonyi, tuana gumuvutudila ima ana gutuhana. Ikhale ngenyi, muene wana suanguluga nu tangua nu ngolo nu ima tuana hana ha gukuatesa mudimo wenji.—2 Kol. 9:7.

17. Mukunda natshi tushigo naye guleba muila gula idi mutoga egi tusombegese ndaga imoshi mu monyo wetu?

¹⁷ Hagusala mu njila yakama yana gubata gu monyo, mukut’etu agasue tudi naye gulandula gifezegeselo gia Yesu. (1 Phet. 2:21) Gula yatoga egi gudi nu ndaga udi naye gusombegesa mu monyo waye, ulebigo muila. Ngenyi mbawumonesa diago egi wana gulandula utuameji wa Yehowa. Yehowa wana jiya egi tushigo athu atagana hene, anago gututoga ha gukalagala ndaga jiagasue mu luholo luatagana gifua Yesu.

18. Itshi tudi naye gutshita ha gutagenesa felela dietu?

¹⁸ Tulandulenu gusha matangi mu felela dia masugu adi muza nu tukhalenu hehi ha gusombegesa matangi’etu, makalegelo nu ndaga tuana tshita. (Ish. 4:25; Luka 9:62) Tulandulenu gukhala athu a gudibulumuisa nu ‘tukhalenu nu gusuanguluga, tubembenu egi atuvutule mu njila.’ (2 Kol. 13:11) Gula tuatshita ngenyi, “Nzambi wa guzumba nu wa guhuima mbawukhala nu [esue].” Mbawutukuatesa ha gukhala nu gusuanguluga mangino, nu mbawutuhana monyo wa mayilago mu mavu ahe-ahe.