1. Olsem Matthew 7:13, 14 storyim, why nao iumi savve sei iumi lo wanfala gogo?

IUMI evriwan insaed lo wanfala gogo. Ples wea iumi laek for kasem, or goal blo iumi, hem for stap lo niu world anda lo rul blo Jehovah. Evriday, iumi trae for followim datfala road for kasem laef. Bat olsem Jesus sei, datfala road hem no isi for wakabaot followim and samfala taem hem hard tumas. (Readim Matthew 7:13, 14.) Iumi no perfect, and hem isi tumas for iumi go difren from datfala road.—Gal. 6:1.

2. Wanem nao bae iumi storyim lo disfala article? (Lukim tu box “ Wei for Hambol Helpem Iumi for Stretem Gogo blo Iumi.”)

² Sapos iumi laek for gohed lo disfala road for laef wea no isi, iumi mas willing for adjustim tingting, wei blo iumi, and wanem iumi duim. Aposol Paul encouragem olketa Christian wea stap lo Corinth for gohed for “stretem bak tingting blo olketa.” (2 Cor. 13:11) Datfala kaonsel hem fitim iumi tu. Lo disfala article, iumi bae storyim hao Bible helpem iumi for stretem gogo blo iumi, and hao olketa mature fren savve helpem iumi for gohed followim disfala road for laef. Iumi bae storyim tu wanem taem nao maet hem no isi for followim olketa direction wea organization blo Jehovah givim. Iumi bae lukim hao wei for hambol bae helpem iumi for stretem gogo blo iumi and for gohed hapi taem iumi servem Jehovah.

3. Hao nao toktok blo God savve helpem iu?

³ Taem iumi trae for ting raonem feeling and tingting blo iumiseleva, iumi feisim wanfala challenge. Hem no isi bikos heart blo iumi savve laea lo iumi, and hem hard for iumi savve wea nao datwan hem leadim iumi. (Jeremaea 17:9) Hem isi tumas for iumi laea lo iumiseleva. (Jas. 1:22) So iumi mas iusim toktok blo God for lukluk gud lo iumiseleva. Bible savve showimaot wanem  nao insaed lo heart blo iumi and hem luksavve lo wanem nao insaed lo tingting blo iumi. (Heb. 4:12, 13) Toktok blo God hem olsem wanfala X-ray machine wea mekem iumi fit for lukim wanem nao insaed lo iumi. Bat sapos iumi laek for kasem gud samting from olketa kaonsel lo Bible, or wea kam from olketa wea Jehovah iusim, iumi mas hambol.

4. Wanem nao showimaot hao gogo King Saul hem kamap praod?

⁴ Example blo King Saul showimaot wanem savve happen sapos iumi no hambol. Saul hem kamap praod tumas so hem no laek for luksavve hem need for stretem tingting blo hem and wanem hem duim. (Sams 36:1, 2; Habakkuk 2:4) Diswan hem showaot klia taem Jehovah givim direction lo hem abaotem wanem hem shud duim taem hem winim olketa Amalekite. Saul hem no obeyim Jehovah. And taem profet Samuel go for story witim hem abaotem datwan, Saul no laek for talemaot mistek blo hem. Bat hem trae for mek excuse lo wei for sei samting wea hem duim hem smol nomoa and hem blamem olketa narawan. (Fas Samuel 15:13-24) Lo narataem bifor, Saul hem duim tu sem samting. (Fas Samuel 13:10-14) Sorre samting nao hem letem heart blo hem for kamap praod. Hem no stretem tingting blo hem, so Jehovah kaonselem hem and rejectim hem.

5. Wanem nao iumi savve lanem from example blo Saul?

⁵ For lane from example blo Saul, iumi savve askem iumiseleva olketa kwestin hia: ‘Taem mi readim kaonsel from Bible, waswe, mi mek excuse for no followim datwan? Waswe, mi tingse wei wea mi no obey hem smol samting nomoa? Waswe, mi blamem olketa narawan for samting wea mi duim?’ Sapos eni ansa blo iumi for olketa kwestin hia hem yes, iumi need for stretem tingting and wei blo iumi, sapos nomoa bae heart blo iumi hem kamap praod and Jehovah bae no acceptim iumi for fren witim hem.—Jas. 4:6.

6. Storyim hao nao King Saul hem difren from King David.

⁶ Lukim hao King Saul hem difren from King David, wea hem man wea lovem olketa ‘law blo Jehovah.’ (Sams 1:1-3) David savve Jehovah sevem olketa wea hambol bat hem no laekem olketa wea praod. (Mektu Samuel 22:28) So David letem olketa law blo God for stretem tingting blo hem. Hem raet olsem: “Bae mi gohed fo preisim [Jehovah], bikos oltaem hemi gohed fo lidim mi, an long naet, hemi givim gudfala tingting long mi.”—Sams 16:7.

7. Sapos iumi hambol, wanem nao bae iumi duim?

⁷ Sapos iumi hambol, iumi bae letem toktok blo God for stretem tingting blo iumi bifor iumi duim eni rong samting. Toktok blo God bae olsem wanfala voice wea sei lo iumi: “Rod blong mi nao ya. Yufala mas falom.” Hem warnim iumi for no go difren from datfala road, maet iumi go lo left or raet. (Aesaea 30:21) Taem iumi lisin lo Jehovah, bae iumi kasem staka gud samting from datwan. (Aesaea 48:17) Olsem example, iumi bae stap klia lo wei for mek shame lo iumiseleva bikos narawan nao mas stretem iumi. And iumi bae kamap moa klos lo Jehovah bikos iumi luksavve hem treatim iumi olsem pikinini wea hem lovem.—Heb. 12:7.

8. Olsem James 1:22-25 storyim, hao nao toktok blo God hem olsem wanfala mirror?

⁸ Toktok blo God hem olsem wanfala mirror for iumi. (Readim James 1:22-25.) Staka lo iumi savve luk lo mirror evri morning bifor iumi lusim haos. Iumi duim datwan bikos iumi laek for savve sapos iumi savve stretem samfala samting bifor olketa narawan lukim iumi. Olsem tu, taem iumi readim Bible each day, iumi bae lukim samfala samting wea iumi need for stretem lo tingting and lo wei blo iumi. Staka faendem hem gud for readim text each morning bifor olketa lusim haos. Olketa letem wanem olketa readim for affectim tingting blo olketa. Then insaed lo datfala day, olketa savve  faendem olketa wei for followim olketa kaonsel wea kam from toktok blo God. And tu, iumi mas garem schedule for study evritaem, wea insaed diswan hem wei for read and ting raonem toktok blo God evriday. Datwan maet hem here simpol nomoa, bat hem wanfala barava important samting for duim bikos hem bae helpem iumi for gohed wakabaot lo road for laef nomata hem no isi.

9. Wanem taem nao maet wanfala fren hem need for stretem iu?

⁹ Waswe, iu start for followim wanfala road wea leadim iu go farawe from Jehovah? (Sams 73:2, 3) Sapos wanfala mature fren hem no fraet for stretem iu, waswe, iu lisin lo hem and followim advaes wea hem talem? Sapos olsem, iu duim stret samting, and iu shud barava hapi bikos fren blo iu hem warnim iu.—Provebs 1:5.

10. Wanem nao iu savve duim sapos wanfala fren blo iu hem stretem iu?

¹⁰ Wanfala man wea hem raetem Psalms hem sei olsem: “Hemi gud nomoa sapos wanfala gudfala man hemi panisim mi an tokstrong long mi fo stretem mi.” (Sams 141:5) Wanem nao datwan minim? Tingim disfala example: Iu weit for akrosim wanfala road wea staka trak nao gogo pas and iu gohed busy lo mobile blo iu. Iu no lukluk moa then iu step go insaed lo road. Seknomoa, wanfala fren blo iu hem grabim hand blo iu and pullim iu go bak lo saed road. From hem hol strong lo iu, hand blo iu hem soa nao, bat from wei wea hem kwiktaem, hem sevem iu for wanfala car no bangam iu. Nomata sapos hand blo iu hem soa for samfala taem, waswe, bae iu feel nogud lo fren blo iu wea pullim iu bak? Nomoa nao! Iu bae barava hapi bikos hem helpem iu. Lo sem wei, sapos wanfala fren hem warnim iu dat wanem iu talem or duim hem no fitim olketa raeteous standard blo God, maet firstaem, iu feel nogud. Bat iu shud no kros or gohed feel nogud lo kaonsel wea hem givim. Datwan hem karangge samting. (Eklesiastes 7:9) Winim wei for feel nogud, iu shud hapi bikos fren blo iu hem no fraet for talem iu samting.

11. Wanem nao savve mekem samwan for les lo gudfala kaonsel wea kam from wanfala fren wea lovem hem?

¹¹ Wanem nao savve mekem samwan for les lo gudfala kaonsel wea kam from wanfala fren blo hem wea lovem hem? Hem nao wei for praod. Praod pipol “laekem tumas for herem” nomoa samting wea here gud lo olketa and “les for lisin long olketa tru teaching.” (2 Tim. 4:3, 4) Olketa tingse olketa nao savve and olketa important winim olketa narawan. Bat, aposol Paul hem raet olsem: “Sapos eniwan tingse hem important, hem laea long hemseleva, bikos hem nating important nomoa.” (Gal. 6:3) King Solomon hem story gud moa abaotem datwan. Hem raet olsem: “Sapos king hemi olo tumas, bat hemi nating save herem waes toktok, ating hemi moabeta fo wanfala yang man hu hemi pua an hemi waes, fo sensim king.”—Eklesiastes 4:13.

12. Wanem nao iumi savve lanem from example blo aposol Peter lo Galatia 2:11-14?

¹² Tingim example blo Peter taem Aposol Paul stretem hem front lo evriwan. (Readim Galatia 2:11-14.) Hem isi nomoa for Peter feel nogud lo wanem Paul talem, sapos hem tingim hao Paul tok strong lo hem and hao hem stretem hem front lo evriwan. Bat Peter hem wise. Hem acceptim datfala kaonsel and hem no gohed kros lo Paul. Bat bihaen, hem storyim Paul olsem brata “wea hem lovem tumas.”—2 Pet. 3:15.

13. Olketa wanem point nao iumi need for tingim taem iumi givim kaonsel?

¹³ Sapos iu feel dat iu need for givim kaonsel lo wanfala fren, olketa wanem point nao iumi need for tingim? Bifor iu story lo fren blo iu, askem iuseleva, ‘Waswe, mi “ova raeteous  tumas”?’ (Eklesiastes 7:16) Man wea ova raeteous hem savve judgem olketa narawan, no followim standard blo Jehovah, bat followim tingting blo hemseleva and hem maet no savve showimaot mercy tu. Sapos bihaen iu lukluk gud lo iuseleva and iu still luksavve iu need for story lo fren blo iu, hem gud for story klia abaotem datfala problem, and iusim gud olketa kwestin for helpem fren blo iu luksavve lo wanem nao mistek blo hem. Mek sure wanem iu talem hem kam from Bible, iu mas remember fren blo iu bae no ansa lo iu, bat bae hem ansa lo Jehovah. (Rome 14:10) Depend lo wisdom wea iu kasem from Bible, and taem iu givim kaonsel lo narawan, followim example blo Jesus for tingim narawan. (Provebs 3:5; Matt. 12:20) Why nao olsem? Bikos Jehovah bae deal witim iumi lo sem wei wea iumi deal witim olketa narawan.—Jas. 2:13.

14. Wanem nao organization blo God givim for iumi?

¹⁴ Jehovah iusim organization blo hem lo earth for leadim iumi lo road for kasem laef, hem givim olketa video, olketa pablikeson, and olketa meeting wea helpem iumi evriwan for followim olketa kaonsel wea stap insaed Bible. Iumi fit for trustim olketa information hia bikos hem kam from Bible. Taem Governing Body disaedem wanem nao best wei for duim disfala waka, olketa depend lo holy spirit. Nomata olsem, Governing Body evritaem reviewim olketa disison abaotem hao olketa organizem waka. Why nao olsem? Bikos “world distaem hem gohed for change,” and organization blo God mas change followim olketa niu situation wea kamap.—1 Cor. 7:31.

15. Wanem challenge nao samfala pablisa feisim?

¹⁵ Iumi evritaem redi for change taem iumi kasem direction saed lo Bible teaching or olketa standard saed lo fasin. Bat, wanem nao iumi duim taem organization blo God mekem olketa change lo olketa nara samting wea affectim laef lo iumi? Olsem example, lo olketa year wea go pas, kost for buildim and duim maintenance lo olketa ples for worship hem barava go ap. So Governing Body hem givim direction hao tu-thri kongregeson savve iusim wanfala Kingdom Hall. From datwan, samfala kongregeson mas join tugeta and olketa mas salem samfala Kingdom Hall. Selen hia olketa bae iusim for buildim Kingdom Hall lo olketa ples wea barava needim. Sapos iu stap lo wanfala area wea olketa salem Kingdom Hall blo iu and olketa  kongregeson mas join tugeta, iu maet faendem hem no isi for change followim datfala niu situation. From datwan, samfala pablisa mas travel farawe for kasem meeting. Olketa narawan wea waka hard for buildim and duim maintenance lo wanfala Kingdom Hall maet ting why nao olketa mas salem datfala Kingdom Hall. Olketa maet feel olsem olketa weistim taem blo olketa for waka hard lo datfala Kingdom Hall. Nomata olsem, olketa acceptim datfala niu arrangement and olketa shud kasem praise for datwan.

16. Hao nao wei for followim kaonsel lo Colossae 3:23, 24 hem helpem iumi for gohed hapi?

¹⁶ Iumi bae gohed for hapi sapos iumi remember hao iumi waka for Jehovah and hem nao leadim organization blo hem. (Readim Colossae 3:23, 24.) King David hem showimaot gudfala example taem hem givim selen for buildim temple. Hem sei: “Bat mi an olketa pipol blong mi, mifala samting nating nomoa bikos mifala no garem enisamting wea i blong mifala seleva, mekem mifala save givim go long yu. Evrisamting wea mifala i givim go long yu i kam from yu nomoa.” (Fas Kronikols 29:14) Taem iumi donatem selen, iumi givim lo Jehovah samting wea hem tu givim lo iumi. Nomata olsem, Jehovah tinghae lo taem, strong and selen wea iumi givim for sapotim waka wea hem laekem for iumi mas duim.—2 Cor. 9:7.

17. Why nao iumi mas no discourage sapos iumi mas lelebet stretem gogo blo iumi?

¹⁷ Iumi mas followim example blo Jesus mekem iumi savve followim disfala road for laef wea no isi. (1 Pet. 2:21) Sapos iumi maet need for stretem lelebet gogo blo iumi, no discourage. Taem iu luksavve hao iu need for stretem bak gogo blo iu, datwan hem showimaot iu laek for followim direction blo Jehovah. Remember Jehovah hem no expectim iumi wea no perfect yet for barava followim example blo Jesus lo perfect wei.

18. Wanem nao iumi mas duim for kasem goal blo iumi?

¹⁸ Iumi evriwan mas tingim nomoa future and willing for adjustim tingting blo iumi, wei blo iumi, and wanem iumi duim. (Provebs 4:25; Luke 9:62) Iumi mas gohed for hambol, ‘gohed for hapi, and stretem bak tingting bilong iumi.’ (2 Cor. 13:11) Sapos iumi duim datwan, “God wea garem love and givim peace bae stap witim [iumi].” And iumi bae no just kasem nomoa end lo gogo blo iumi, bat bae iumi enjoyim tu datfala gogo.