1. Mateo 7:13, 14-pi nishca shinaca ¿Diosta sirvijcunapaj causaica imamantataj shuj ñanpi viajacuj shina can?

DIOSTA sirvijcunapaj causaica shuj ñanpi viajacuj shinami can. Ñucanchijca Diospaj Gobierno mandacujpi paraíso Allpapi causanatami munanchij. Cada punllami huiñai causaiman apaj ñanpi puringapaj esforzarinchij. Pero Jesús nishca shinaca cai huiñai causaiman apaj ñanca quichquimi can. Chaimantami chai ñanpi purinaca huaquinpica sinchi can (Mateo 7:13, 14-ta liyipai). Juchayujcuna cashcamantami chai ñanmantaca huaquinpica llujshinchij (Gálatas 6:1).

2. ¿Cai yachaipica imallatataj ricushun? (“ Humildecuna cashpaca consejocunataca allimi chasquishun” nishca recuadrota ricui).

² Apóstol Pabloca Corinto llajtapi Diosta sirvijcunamanca “correginacushpa catichij” nircami. ¿Caica imatataj nisha nin? Huiñai causaiman apaj quichqui ñanpi puringapajca ñucanchij yuyaicunata, ruraicunata, ima munashcata cambiana cashcatami Pabloca nisha nicurca (2 Corintios 13:11, NWT ). Cai consejoca cunan punllacunapajpish valishcami can. Cai yachaipimi Bibliapaj consejocuna ima shina ñucanchij causaipi correginata yachashun. Shinallataj Diosta alli sirvij huauqui panicuna huiñai causaiman apaj ñanpi ima shina ñucanchijta Diosta sirvishpa catichun ayudanatami yachashun. Diospaj organizacionpi ima instruccioncunata cujpi huaquinpica cazuna imamanta sinchi cashcatapishmi ricushun. Chashnallataj ima cambiocunata rurangapaj humilde cana cashcata, Yayitu Diosta cushilla sirvingapaj imata rurana cashcatami ricushun.

3. ¿Bibliapaj consejocunaca ima shinataj ñucanchijta benefician?

³ Ñucanchij yuyaicunata, munaicunata ñucanchijllataj yachanaca sinchimi can. ¿Imamanta? Ñucanchij shunguca umajllami can. Chaimantami ñucanchij shungu munashcata rurashpaca ima tucunata mana yachanchij (Jeremías 17:9). Huaquinpica  ñucanchijllatajmi umachij yuyaicunahuan pandarinchij (Santiago 1:22). Chaimantami ñucanchijllataj ima shina cashcata yachangapajca Bibliapi ricuna canchij. Bibliaca ecota rurangapaj maquina shinami can. Cai maquinaca cuerpo ucupi imalla tiyashcatami ricuchin. Bibliapish chashnallatajmi shungu ucupi imalla yuyashcata, munashcata ricuchin (Hebreos 4:12, 13). Pero Bibliapi tiyaj consejocunamanta, ñaupajman pushaj huauquicunapaj consejocunamanta beneficiaringapajca humildesmi cana canchij.

4. ¿Rey Saúl jatun tucushca cashcataca ima shinataj yachanchij?

⁴ Rey Saulca humilde canatami saquirca. Jehová Diosca Saultaca amalequitacunata mishashpaca imata ruranatami mandarca. Pero paica mana cazurcachu. Profeta Samuel Diosta imamanta mana cazushcata Saulman huillajpica Saulca paipaj pandarishcataca mana reconocircachu. Pai pandarishcata ricunapaj randica Diosta mana cazushcamantami shujtajcunata juchachirca (1 Samuel 15:13-24). Paica achca cutincunami chashna rurarca (1 Samuel 13:10-14). Saulca paipaj shunguta mana cuidashcamantami jatun tucurca. Paipaj yuyaita mana cambiajpica Jehová Diosca consejarcami. Pero mana cazujpica paitaca ña rey shinata mana chasquircachu. Saulmanta yachashpaca Jehová Dios jatun tucujcunata mana chasquinatami yachanchij. Saulca jatun tucushcamantami paipaj yuyaicunapi, ruraicunapi mana cambiasha nirca (Salmo 36:1, 2; Habacuc 2:4).

5. ¿Saúl ima tucushcamantaca imatataj yachanchij?

⁵ Saulhuan ima tucushcata yachashpaca cashna nishpa tapurishunchij: “¿Maipica Bibliapaj consejocunata ñucanchij causaipi mana pajtachingapajca ima pretextocunatachu churanchij? ¿Bibliapaj consejocunata mana cazushpaca mana imachu tucusha nishpachu yuyanchij? ¿Ñucanchijllataj imamanta pandarishpaca shujtajcunatachu juchachinchij?”. Ñucanchij yuyaipi, causaipi cashna cambiocunata rurana cashpaca utcami cambiana canchij. Mana utca cambiajpica ñucanchij shungu jatun tucunga. Jehová Diospish ñucanchij amigo canatami saquinga (Santiago 4:6).

6. ¿Davidca imamantataj rey Saúl shina mana carca?

⁶ Cunanca rey Davidmanta yachashun. Paica rey Saúl shinaca mana carcachu. Davidca Yaya Dios mandashcacunatami cꞌuyarca (Salmo 1:1-3). Davidca Jehová Dios humildecunata quishpichij cashcata, cutin jatun tucushcacunataca mana ricunayachishcataca allimi yacharca (2 Samuel 22:28). Chaimantami Davidca Dios paipaj yuyaicunata, paipaj ruraicunata corregichun saquirca. Paica: “Ñucata cunaj Mandaj Diostaca alli nicushallami. Tuta cajpipish ñuca yuyaita yachachicunguillami” nircami (Salmo 16:7).

7. ¿Humildecuna cashpaca imatataj rurashun?

⁷ Humildecuna cashpaca Bibliapaj consejocuna ñucanchij yuyaicunata cambiachunmi saquishun. Chashnami ñucanchij mana alli yuyaicunataca mana rurashun. Bibliapaj consejocunaca caimari ñan caillapi purichij nicuj shinami canga. Mana alli ruraicunatapish ama rurachun nicuj shinami canga (Isaías 30:21). Jehová Diosta tucuipi cazushpaca achcatami beneficiarishun (Isaías 48:17). Allita rurangapaj esforzarishpaca shujtajcunapaj ñaupajpica mana pingaipi saquirishunchu. Shinallataj Jehová Dioshuanca allimi apanacushun. Paica ñucanchijtaca shuj cꞌuyaj yaya layami ricunga (Hebreos 12:7).

8. Santiago 1:22 al 25-pi nishca shinaca ¿Bibliaca ima shinataj ñucanchijpajca shuj espejo shina can?

⁸ Ñucanchijpajca Diospaj Shimica shuj espejo shinami can (Santiago 1:22-25-ta liyipai). Casi tucuicunami huasimanta llujshingapajca espejopi ricurinchij. Imapi allichirinata cuentata cushpaca shujtajcuna manaraj ricujpimi allichirinchij. Chashnallatajmi Bibliata cada punlla liyishpaca ñucanchij causaipi ima cambiocunata ruranata o allichinata cuentata cunchij. “Diospaj Shimita punllanta yachashunchij”  nishca folletotami achca huauqui panicunaca manaraj huasimanta llujshishpa liyinata yachancuna. Chashna liyishpami paicunapaj yuyaita cambiachun saquin. Ima liyishcatapish paicunapaj causaipi pajtachinatami ricuncuna. Ñucanchijpish Bibliata liyinataca manataj saquinachu canchij. Imata liyishcatapish cada punllami cutin cutin yuyarina canchij. Caita ruranaca mana sinchi layami ricurin. Pero chashna rurashpaca huiñai causaiman apaj ñanpimi purishpa catishun.

9. ¿Ima horataj shuj amigo consejachun minishtinchij?

⁹ ¿Mai ratoca Diosmanta caruyashpachu causai callarishcanchij? (Salmo 73:2, 3). ¿Experienciata charij shuj cꞌuyasha amigo consejajpica paipaj consejotaca uyashpa chasquishcanchijchu? Paipaj consejota cazushpaca alli decisioncunatami agllashcanchij. Chaimantami ñucanchijman consejashcamantaca agradecidos sintirinchij (Proverbios 1:5).

10. ¿Shuj amigo ñucanchijta consejajpica imatataj rurai tucunchij?

¹⁰ Shuj alli amigomanta parlashpaca Proverbios 27:6-pica: “Shunguta chugrishpapish cꞌuyajta runahuanmi apanacuna” ninmi. ¿Cai shimicunaca imatataj nisha nin? Caipi yuyashun. Canchari achca carrocuna tiyanpi caishuj ladoman pasasha ningui. Pero telefonota ricushpachari saquiringui. Telefonota ricushpachari caishuj ladoman pasacungui. Ñapish shuj amigoca rigramanta japishpachari huashaman sinchita aisan. Huashaman sinchita aisashcamantachari rigrataca verdeyachin. Pero utca rigrapi japishpa aisashcamantachari carro ama saruchun ayudan. Tal vez rigraca asha punllacunatachari nananga. ¿Pero ayudaj amigohuanca pꞌiñaringuichu? Mana. Ashtahuanpish pai canta ayudashcamantami agradecido sintiringui. Shinallataj Dios mana munashcata ruracujpi shuj amigo consejajpica paihuanca mana pꞌiñarinachu canchij. Pai corregijpi paihuan pꞌiñarishpaca chꞌahuancuna cashcatami ricuchishun (Eclesiastés 7:9). ¿Pai mana manchashpa ñucanchijta ayudashcamantaca manachu cushilla sintirishun?

11. ¿Huaquinpica imamantataj shuj amigopaj consejota mana chasquincuna?

¹¹ ¿Huaquinpica imamantataj shuj amigopaj consejota mana chasquincuna? Jatun tucushca cashcamantami mana chasquincuna. Jatun tucushcacunaca paicuna mana allita rurashcacunata shujtajcuna uyachunllami mashcancuna. Chashnami “mana llullata uyanamantapish” anchurincuna (2 Timoteo 4:3, 4). Paicunaca tucuitami yachanchij, shujtajcunata yallipishmi canchij nishpami pi consejachunca mana saquincuna. Pero apóstol Pabloca: “Maijanca manapish ima cashpa yachajmi canchij nishpaca paillatajmi umarin” nircami (Gálatas 6:3). Rey Salomonpish: “Yuyaj jatun mandaj cashpapish rumi shungu cashpaca yuyaita cujpipish ña mana chasquisha ninchu. Chaipaj randica huajchalla huambra cashpapish yachaj cashpamari ashtahuan alli” nircami (Eclesiastés 4:13).

12. Gálatas 2:11 al 14-pi nishca shinaca ¿Pedromantaca imatataj yachanchij?

¹² Apóstol Pabloca Pedrotaca tucuicunapaj ñaupajpimi corregirca. ¿Chashna corregijpica Pedroca imatataj rurarca? (Gálatas 2:11-14-ta liyipai). Pedroca Pablo ima shina rimashcamanta, maipi rimashcamantami pꞌiñari tucunman carca. Pero yachaj cashcamantami cai alli consejotaca chasquirca. Risintirishcapish mana saquirircachu. Asha tiempo qꞌuipaca Pedroca Pablotaca “ñucanchij cꞌuyashca huauqui” nircami (2 Pedro 3:15).

13. ¿Shujtajcunaman consejacushpaca imacunapitaj yuyana canchij?

¹³ ¿Shuj amigota consejangapajca imatataj yuyaipi charina canchij? Manaraj paihuan parlashpami cashna nishpa tapurina canchij: “¿Tucuipi cashcata ruraj shinachu cani?” (Eclesiastés 7:16). Tucuitami cashcata rurani nishpa yuyaj gentecunaca Jehová munashca shinaca  mana juzgancunachu. Paicunaca paicuna yuyashca shinami shujtajcunatapish juzgancuna. Shujtajcunaman cꞌuyaitapish ricuchinataca mana yachancunachu. Ñucanchijpish caita yachashca qꞌuipaca ñucanchij amigocunahuan parlana minishtirishca cashcata yachashpaca caita rurashunchij. Imamanta paihuan parlasha nishcata alli intindichishunchij. Imapi pandaricushcata cuentata cuchun tapushunchij. Pero consejacushpaca Biblia yachachishca shinami consejana canchij. Yuyarinami canchij paicunaca paicunapaj pandarishcamantaca mana ñucanchijman cuentata cungacunachu. Ashtahuanpish Jehová Diosmanmi cuentata cungacuna (Romanos 14:10). Picunaman consejacushpaca Biblia yachachishca shina consejashunchij. Shinallataj Jesús shina cꞌuyaihuan consejashunchij (Proverbios 3:5; Mateo 12:20). Yuyarishunchij Jehová Diosca ima shinami ñucanchij shujtajcunata tratanchij. Chashnallatajmi paipish ñucanchijtaca tratanga (Santiago 2:13).

14. ¿Diospaj organizacionca ñucanchijta yachachingapajca imatataj ruran?

¹⁴ Paita sirvijcunata huiñai causaiman apaj ñanpi pushangapajca Jehová Diosca paipaj organizaciontami utilizan. Cai organizacionca videocunahuan publicacioncunahuan, tandanacuicunahuanmi Bibliapaj consejocunata ñucanchij causaipi pajtachichun yachachin. Cai yachaicunaca Bibliamanta japishca yuyaicunami can. Cuerpo Gobernante huauquicunaca ima shina predicashpa decidinata agllangapajca Diospaj espíritu santotami mañancuna. Qꞌuipaca ima decidishcata cambiana cashcata o mana cambiana cashcatami ricuncuna. Paicunaca cai pachapaj causai cambiacushcamantami chashna rurancuna (1 Corintios 7:31, NWT ).

15. ¿Huaquin huauqui panicunapajca ima cambiocunataj sinchi ricurishca?

¹⁵ Diospaj organización mushuj yachachishcacunata Bibliahuan intindichijpi, chuya causaita ima shina charina cashcata yachachijpica tucui chaicunatami alli chasquinchij. ¿Pero shujtaj cambiocuna tiyajpica imatataj ruranchij? Por ejemplo, cai último huatacunapica Tandanacuna Huasicunata shayachingapaj, allichingapajca achca cullquimi minishtirin. Chaimantami Cuerpo Gobernante huauquicunaca shuj Tandanacuna Huasipi huaquin congregacioncuna tandanacuchun decidishcacuna. Chaimi huaquin Tandanacuna Huasicunataca cꞌatushcacuna. Cunanca huaquin congregacioncunaca shujllapimi tandanacuncuna. Shinallataj cai cullquihuanca maipimi Tandanacuna Huasicunata shayachina minishtirin,  chai lugarcunapimi shayachicunchij. Ñucanchij causan lugarpi Tandanacuna Huasicunata cꞌatujpi huaquin congregacioncuna shujllapi tandarijpica tal vez chai arreglota apoyanaca sinchimi ricuringa. Maijan huauqui panicunaca Tandanacuna Huasiman ringapajca achcatachari purina o viajana tucunga. Cutin shujtajcunaca cai Tandanacuna Huasicunata shayachingapaj allichingapajca sinchitami trabajarcanchij. ¿Imamantashi cꞌatuncuna nishpachari tapurincuna? Tal vez paicunaca cai tucuita rurashcaca yangallami can nishpami yuyai tucuncuna. Pero paicunaca sinchi ricurijpipish mushuj arreglocunatami apoyashpa catincuna. Chaimantami paicunataca felicitanchij.

16. 2 Corintios 6:1-pi nishca shinaca ¿Diosta cushilla sirvingapajca imatataj rurana canchij?

¹⁶ Jehová Dios paipaj organizacionta ñaupajman pushacushcata, ñucanchij paipaj trabajacushcata intindishpaca cushillami sirvishun (2 Corintios 6:1-ta liyipai). Rey Davidca templota shayachingapajmi pai charishca cosascunata curca. Paica: “Ñuca mandacun cai tucuicunapish cai tucuicunata ñucanchij cusha nishcamanta canman cungapajca ¿pitaj canchigari? Tucui imapish cambajmi. Cambaj maquimanta japishcallatami canman cunchij” nircami (1 Crónicas 29:14). Ñucanchijca Diospaj obrata apoyangapaj imallacunatapish cushpa, cullquita cushpaca Dios cushcacunallatajmi cunchij. Ñucanchij tiempota, fuerzata, cullquita Jehová Diosman cushpaca paitami cushichinchij (2 Corintios 9:7).

17. ¿Causaipi cambiocunata ruranata cuentata cushpaca imamantataj mana desanimarina canchij?

¹⁷ Huiñai causaiman apaj ñanmanta ama llujshingapajca Jesuspaj ejemplotami catina canchij (1 Pedro 2:21). Ñucanchij causaipi ima cambiocunata ruranata cuentata cushpaca mana desanimarinachu canchij. Ashtahuanpish caicunata cuentata cushpaca Diospaj ayudata minishtishcatami ricuchinchij. Yayitu Diosca juchayujcuna cashcataca allimi yachan. Chaimantami tucuipi Jesús laya cachunca mana shuyan.

18. ¿Huiñai causaita charingapajca imatataj rurana canchij?

¹⁸ Dios cusha nishcacunapi yuyashpa ñucanchij yuyaicunata, ruraicunata, tucui ñucanchij causaipi corregingapaj esforzarishunchij (Proverbios 4:25; Lucas 9:62). Humildecuna cashpa catishunchij. 2 Corintios 13:11-pi nishca shinaca cushicunacushpa, correginacushpa catishunchij. Chaita rurajpica sumaj causaitapish, cꞌuyaitapish cuj Diosca ñucanchijhuanmi canga. Shinallataj Jehová Diosca cunan punllacunapipish cushilla causachunmi ayudanga. Shamuj punllacunapipish paraíso Allpapimi huiñai causaita cunga.