1. Mateo 7:13, 14​pi nishca shinaca ¿Jesusca imatata nirca?

ÑUCANCHICUNACA Jehová Dios cai alpata mandajujpi Paraíso alpagupi causangapami munapanchi. Chaimi Jehovata sirvijcunapa causaica chai Paraíso alpaguman chayangapaj shuj viaje rijuj cuenda can. Jesús nishcashnaca causaiman apaj ñanga quichijimi. Chaimi Paraíso alpagupi causangapaca cada punlla Jehovata sirvingapaj esforzarina capanchi (Mateo 7:13, 14, liingui). Juchayujcuna caimandami Jehová Diosta sirvinataca saquita ushanchiman (Gál. 6:1).

2. Caipica ¿imatata yachajupashun? (“ Cambiocunata rurangapaca humilde canami minishtirin” nishca recuadrota ricupangui).

² Paraíso alpagupi causangapaca ñucanchi yuyaicunata, ruraicunata, ñucanchi imashina canatapash cambiana cashcatami ricupanchi. Chaimi apóstol Pabloca Corinto llactamanda huauquipanicunataca “yachachirishpa” catichun consejarca (2 Cor. 13:11). Cunanbipashmi cai consejoca ninanda ayudan. Caipica Biblia ñucanchi causaipi cambiocunata rurachun imashina ayudajtami yachajupashun. Shinallata Jehovata tucui shunguhuan sirvij huauquipanicunapash ñucanchita ayudajtami yachajupashun. Huaquinbica Jehovapa organización imapash cambiocunata rurajpi imamanda na fácil cazui ushashcatami yachajupashun. Shinallata ñucanchi causaipi cambiocunata rurangapaj humilde cana minishtirishca cashcatapashmi yachajupashun. Shinallami Jehovata cushilla sirvishpa catipashun.

3. Bibliaca ¿imashinata ñucanchitaca ayudan?

³ Ñucanchi shungu umachijlla cashcamandami ñucanchicuna imata yuyajushcata yachanaca na fácil can (Jer. 17:9). Huaquinbica ñucanchillatami imatapash yangata pensashpa ‘umachirinchi’ (Sant. 1:22). Chaimandami ñucanchicuna imashinapacha cashcata yachangapaj ali yuyaita charingapami Biblia ayudachun  saquina capanchi. Bibliaca ñucanchi “yuyaicunatapash, shungu imata yarijujtapash, tucuitami rijsichijun” (Heb. 4:12, 13). Bibliaca radiografiata llujchij cuendami ñucanchillata imashina cajta ali rijsirichun ayudan. Bibliapa consejocuna ayudachunga humilde canami minishtirin.

4. Rey Saulca ¿imashinata orgulloso cashcata ricuchirca?

⁴ Ñucanchicunapash rey Saulshnami orgulloso tucuita ushapanchi. Rey Saulca orgulloso caimandami paipa yuyaipi, ruraicunapi, cambiana cashcataca na cuenta japirca (Sal. 36:1, 2; Hab. 2:4). Rey Saulca amalequitacunahuan macanajushca jipa Jehová Dios imata rurachun mandashcata na cazushpami orgulloso cashcata ricuchirca. Shina rurashcamandami Jehová Diosca profeta Samuelta Saulta consejachun cacharca. Shina consejajpipash paica alimanga na chasquircachu. Pai pandarishcata reconocinapa randica shujcunatarami culparca (1 Sam. 15:13-24). Saulca tauca viajecunatami ña shina rurashca carca (1 Sam. 13:10-14). Rey Saulca paipa shungu umachichunmi saquishca carca. Chaimi Jehová Diosca paita na cazushcamanda ñana rey cachun saquirca.

5. Rey Saulmandaca ¿imatata yachajupanchi?

⁵ Ama Saulshna cangapaca cashna tapuripashunchi: “Bibliapa consejocunata na pactachingapaj munashpachu ¿imacunatapash nijuni? Jehovapa mandashcata na cazushpapash ¿imapash na pasahuangachu yashpachu pensarini? ¿Shujcunatarachu imamandapash culpani?”. Cai tapuicunata ari nishpaca ñucanchi yuyaicunata, ruraicunata cambiana cashcatami ricupanchi. Ñucanchicuna na cambiashpaca ñucanchi shungu pandachichun saquishcatami ricuchinajupanchiman. Shina cajpica Jehová Diosca ñucanchipa amigo cangapapash na munangachu (Sant. 4:6).

6. Rey Saulhuan ricujpica ¿imapita rey Davidca na igual carca?

⁶ Rey Saulhuan ricujpica rey Davidca shujpachami carca. Rey Davidca Jehová “Dios mandashcata pactachishpami cushijun” carca (Sal. 1:1-3). Rey Davidca humilde gentegucunata Jehová Dios salvajtaca alimi yacharca. Cutin orgulloso gentecunata na ricunayachijtapash alimi yacharca (2 Sam. 22:28). Chaimi rey Davidca: “Diostami alicachisha. Paimi, ñucataca alita yarichihuan. Tutacunapashmi, ñuca yuyaipica alita yachachihuan” nircami (Sal. 16:7).

7. Humildecuna cashpaca ¿imatata rurangapaj munashun?

⁷ Ñucanchicuna humilde cashpaca ñucanchi nali yuyaicunata, ruraicunatapash cambiachunmi Bibliapa consejocuna ayudachun saquipashun. Diospa Shimica: “Ñanga caitamari, cai ñanda purichi” nijunshnami can. Jehovapa yachachishcacunaca cai ñandaca ama richu, cai ñanda rina cangui nijuj cuendami can (Is. 30:21). Jehovapa yachachishcacunata cazunaca ñucanchipallatami ali can (Is. 48:17). Por ejemplo Jehovata cazujpica pipash na consejangachu. Shina cazujpica Jehová Diosca paipa juyashca huahuacunatashnami ñucanchitaca tratanga. Shinami Jehovapa alipacha amigocuna caita ushashun (Heb. 12:7).

8. Santiago 1:22-25​pi nishca shinaca ¿imashinata Bibliaca shuj espejoshna ayudaita ushan?

⁸ Bibliaca ñucanchi causaipaca shuj espejoshnami can (Santiago 1:22-25, liingui). Casi tucuicunallatami huasimanda nara llujshishpallata ali o nali cashcataca shuj espejopi ricuripanchi. Shinami cambiarina o na cambiarina cashcatapash cuenta japipanchi. Shina cuendami Bibliata cada punlla liishpaca ñucanchi yuyaicunapi, imashina cashcapi “cambiana” cashcata ricupanchi. Shinallata ashtaca huauquipanicunaca Cada Punlla Diospa Shimita Intindingapaj folletota nara maimanbash rishpallatami tutamandata liin. Shinami punlla entero imata rurajushpa, imata pensajushpapash Bibliapa consejocunata yarishpa paicunapa causaipi pactachin. Shinaca cada punlla Bibliata  liingapaj, liishcapi pensaringapami tiempoguta llujchina capanchi. Caita ruranaca minishtirishcapachami can. Chaimi Paraíso alpagupi causachun ayudanga.

9. ¿Imahorata shuj consejotaca cuchun minishtipanchi?

⁹ ¿Imahorapash nalicunata rurashpachu Jehovamandaca caruyanajupashcanchi? (Sal. 73:2, 3). Jehovata tucui shunguhuan sirvij shuj alipacha amigo consejajpica ¿ñucanchi causaipi pactachipashcanchichu? Chai consejota cazushca cashpaca alitami rurapashcangui. Chaimi chai consejota cushcamandaca chai amigohuanga agradecido sintiripangui (Prov. 1:5).

10. Shuj alipacha amigo ñucanchita consejajpica ¿imatata rurana capanchi?

¹⁰ Bibliapica “juyaj runa rimashpa chugrichinshna saquishcacunami ashtahuan ali” can nijunmi (Prov. 27:6). Cai shimicunaca ¿imatata ningapaj munan? Chaipaca caipi pensaripashunchi. Ashtaca carrocuna yalijuj calleta quiquin celularta ricujuimanda yangata yalijushcanguiman. Shinapi shuj alipacha amigo ama carro sarun shinllita maquimanda aisashcanman. Shina aisashcamandaca maqui morado tucujpica ¿chai amigohuanga culiranguimanllu? Maquita nanachijushpapash na culiranguimanllu. Chai amigo quiquinba causaita salvashcamandaca agradecidomi sintiripanguiman. Shina cuendami shuj alipacha amigo Bibliapa shuj consejota ricuchishpa nalitami yuyajungui, nalitami rurajungui nijpica callaripica nalimi sintirishun. Pero chai consejota na chasquishpaca nalitami ruranajunchiman. Culirajunapa randica alimanmi chasquina canchi (Ecl. 7:9). Chai alipacha amigo quiquinhuan parlashcamandaca ninandami agradecipanguiman.

11. Shuj alipacha amigopa consejota cujpica ¿imamandata huaquingunapaca cazunaca shinlli can?

¹¹ Huaquingunapaca ¿imamandata shuj alipacha amigopa consejota cazunaca shinlli can? Orgulloso caimanda. Orgulloso gentecunaca imatapash uyangapaj munashcatalla nichunmi munan. Chaimi chai gentecunaca ‘na llullashpa villajuj Shimitaca na uyanayachin’ (2 Tim. 4:3, 4). Orgulloso gentecunaca shujcunamanda ashtahuan ali yachajcuna, shujcunamandapash ashtahuan importantemi sintirin. Shinapash apóstol Pabloca: “Napash imapash cashpata, ñucami ali cani nirijushpaca, paillatami pandarijun” nircami (Gál. 6:3). Rey Salomonbash: ‘Rucu jatun mandajca, shinlli shungu cashpami ali yuyaita cujpipash ñana chasquingapaj munan. Chaipa randica, imagutapash na charij huambragu alipacha yachajushca cashpami, ashtahuan ali’ can nircami (Ecl. 4:13).

12. Gálatas 2:11-14​pi nishca shimicunata liishpaca apóstol Pedromandaca ¿imatata yachajupanchi?

¹² Apóstol Pabloca tucuicunapa ñaupajpimi apóstol Pedrotaca shinllita consejarca. Ñucanchicunapaca apóstol Pedroca alipacha ejemplomi can (Gálatas 2:11-14, liingui). Apóstol Pedroca Pablo tucuicunapa ñaupajpi shinllita consejashcamandaca na resentido quidarcachu. Pedroca ali yuyaj caimandami Pablopa consejotaca aliguman chasquishpa cashna nirca: Pabloca ‘ñucanchi juyashca huauquimi’ nishpa (2 Ped. 3:15).

13. Pitapash consejagrijushpaca ¿imapita pensarina capanchi?

¹³ Shuj amigota consejana tucushpaca ¿imapita pensarina capanchi? Paihuan nara parlashpallata tapuripashunchi: “‘Imatapash cashcatapacha ruraj’ o yapa justo cashcatachu?” ricuchijuni nishpa (Ecl. 7:16). Huaquingunaca justo cani yaimandami paicuna pensashcashna pitapash yangata juzgashpa Jehová Dioshnaca na tratan. Shina tratashpaca llaquishcataca na ricuchinajunllu. Cai tapuicunapi pensarishca jipa amigohuan parlana cajpica parlanami tucupangui. Pai pandarishcata cuenta japichunga imapi pandarijujtaca ninallami  capangui. Shinallata paicuna cuenta japichunga huaquin tapuicunatami rurai ushapangui. Ima consejota nina cashpapash Bibliatami utilizana capangui. Shinallata ñucanchihuan ali quidachunga na munapanchichu. Ashtahuangarin Jehová Dioshuan ali canata cuenta japichunmi ayudana capanchi (Rom. 14:10). Pitapash consejajushpaca siempremi Bibliapa nishcacunata ricuchishpa consejana capanchi. Shinami Jesushna paicunataca llaquishpa consejashcata ricuchipashun (Prov. 3:5; Mat. 12:20). Ñucanchi imashna shuj gentecunata tratashcashnallatami Jehová Diospash ñucanchitaca tratanga (Sant. 2:13).

14. Jehovapa organizacionga ¿imashinata ñucanchitaca ayudajun?

¹⁴ Jehová Diosca paipa organizacionda utilizashpami paraíso Alpagupi causachun ñucanchitaca yachachijun. Jehovapa organizacionmi videocunahuan, publicaciongunahuan, tandanajuicunahuan Bibliapa consejocunata pactachichun ayudajun. Cuerpo Gobernantepi sirvij huauquicunaca imashina ashtahuan ali villachinata decidingapaca Jehovapa espíritu santotami mañan. Imapash desiciongunata japishca cashpapash ‘cai pachapi imalla tiajcunapash tucurinlla’ o cambianlla cashcamandami tiempo yalijpica chai decisiongunamandaca cutin parlarin (1 Cor. 7:31). Chaimandami Jehovapa organizacionga ima cambiocuna tiajpipash ali ricushpa cambiocunataca ruranlla.

15. Huaquin huauquipanicunaca ¿ima cambiocunatata ricushca?

¹⁵ Jehovapa organización Bibliapa yachachishcacunata ashtahuan ali intindichijpica alimanmi chasquishpa catipanchi. Pero ñucanchi causaipa imapash cambiocuna nalishnalla cajta ricushpami huaquinbica chai cambiocunata cazunaca na fácil ricurin. Por ejemplo, cai último huatacunapica Tandanajui huasicunata shayachingapaca ashtaca culquimi minishtirishca. Chaimandami Cuerpo Gobernantemanda huauquicunaca Tandanajui Huasicunataca ashtahuan ali utilizachun ricushca. Chai Tandanajui Huasicunapillata huaquin congregacionguna tandanajuchunmi decidishca. Cutin shuj Tandanajui Huasicunata jatushpami chai culquiguhuanga minishtirijuj pushtucunapi Tandanajui Huasicunata shayachishca. Shina cambiocunata ruranajuj pushtucunapi causanajushpaca chai cambiocunata chasquinaca huaquinbica shinllimi ricuringa. Shuj huauquipanicunaca chai Tandanajuicunaman ringapaca caru carutami rina tucushca. Cutin shuj huauquipanicunaca  chai Tandanajui Huasicunata shayachinata ayudashcamandami paicunaca imashpata chai Tandanajui Huasitaca jatunajun, yangami trabajashcani ninajunga. Cashna cambiocuna tiajpipash apoyanajushcamandaca huauquipanicunataca ninandami felicitapanchi.

16. Colosenses 3:23, 24​pi nishca shinaca cushilla catichunga ¿imata ayudanga?

¹⁶ Jehová Dios paipa organizacionda ñaupaman pushajujta yachashpami cushilla paita sirvishpa catipashun (Colosenses 3:23, 24, liingui). Rey Davidca templo huasita shayachingapaj imapash minishtirishca cosascunahuan ayudashpami shuj alipacha ejemplota saquirca. Paica: “Ñucapash, ñuca mandajuj tucui gentecunapash, tucui cai alicunata ñucanchi munaihuan canman carangapaca, ¿imata canchiyari? Tucui imagupash cambajllatami. Can caramujpi japishcatallatami, canman caranajunchi” nircami (1 Crón. 29:14). Ñucanchicunapash Jehovapa organizacionda apoyangapaca, ñucanchi tiempohuan, culquihuan, ima charishca cosascunahuanbashmi apoyaita ushapanchi. Shina ayudachunga Jehová Diosllatami ñucanchimanga imagutapash carashca. Shina rurajpica Jehová Diosca cushillami sintiringa (2 Cor. 9:7).

17. Imapipash cambiana cajpica ¿imamandata na desanimarina capanchi?

¹⁷ Paraíso alpagupi causanata chasquingapaca Jesuspa ejemplotami catina capanchi (1 Ped. 2:21). Imapipash cambiana cashcata cuenta japishpaca na desanimarishpa cambiangapaj esforzaripashunchi. Cambiangapaj esforzarishpami Jehovapa yachachishcata pactachijushcata ricuchipashun. Jehová Diosca ñucanchicuna juchayu cajtaca alimi yachan. Chaimi ñucanchicuna Jesushnapacha catichunga na shuyan.

18. Paraíso alpagupi causangapaca ¿imatata rurana capanchi?

¹⁸ Paraíso alpagupi causangapaca ñucanchi yuyaicunata, ruraicunata, imashina cashcata cambiangapami esforzarina capanchi (Prov. 4:25; Luc. 9:62). Ñucanchicuna humildecuna cashpaca imashinami 2 Corintios 13:11​pi nishca shinami: “ninanda cushijushpa”, “yachachirishpa” ñaupaman catita ushashun. Chaita pactachishpaca “juyarishpa causanata caraj Taita Diosmi cangunahuan canga” nishcatapashmi ricupashun. Shinallata cunanbipash, jipa punllacunapipash cushillami causashun.