1. Ia Mataio 7:13, 14, eaa tatou ka tuatua ai e te teretere nei tatou ki tetai ngai?

TE TERETERE nei tatou katoatoa ki tetai ngai. To tatou akakoroanga, kia ora e kia noo ki roto i te ao ou i raro ake i ta Iehova tutaraanga. I te au rā, te tauta nei tatou i te aaere na runga i teia arataa ki te ora. Mei ta Iesu i tuatua, o iti te arataa ka ngata rai i te aaere na runga. (E tatau ia Mataio 7:13, 14.) E aronga ara tatou, e ka māmā ua tatou i te tatipake mei te reira arataa.—Gala. 6:1.

2. Eaa ta tatou ka uriuri i roto i teia atikara? (Akara katoa i te pia “ Tauturu te Tu Akaaka ia Tatou Kia Akatikatika i te Aerenga.”)

² Me ka aaere tatou na runga i te arataa o iti ki te ora, ka anoanoia tatou kia akatikatika i to tatou aerenga manako, te tu e ta tatou e rave ra. Kua akamaroiroi te apotetoro ko Paulo i te au Kerititiano o Korinetia “kia tika rava” koia oki kia rave i te akatikatika anga. (2 Kori. 13:11) Kua tau rai teia akoanga kia tatou. I roto i teia atikara, ka uriuri tatou akapeea te Pipiria me tauturu ia tatou kia akatikatika i to tatou aerenga e akapeea te au taeake tukatau me tauturu ia tatou kia aaere ua atu na runga i te arataa ki te ora. Ka uriuri katoa tatou eaa ka ngata ai ia tatou i te aru i te aratakianga a te akaaerenga a Iehova. Ka apii tatou akapeea te tu akaaka me tauturu ia tatou kia akatikatika i to tatou aerenga e te rekareka i te tavini ia Iehova.

3. Eaa ta te Tuatua a te Atua ka akakeu ia tatou kia rave?

³ Me akara meitaki tatou i to tatou au manako e te au manako ngakau, ka tupu te tu ngata. E pikikaa maata to tatou ngakau, e ka akataii te reira ia tatou kia kore e kite e te aere nei tatou kiea. (Iere. 17:9) Māmā ua i te reira i te akavare ia tatou kia “pikikaa ua.” (Iako. 1:22) No reira ka akara  tatou ki te Tuatua a te Atua kia akatikatika ia tatou. Te akaari maira te Tuatua a te Atua eaa tikai to tatou tu o roto, “te manako e te vananga” o to tatou ngakau. (Ebe. 4:12, 13) Tera te tu, kua riro te Tuatua a te Atua mei te matini X-ray, kitea a roto tikai ia tatou. Kia akaaka tatou, e puapingaia ai mei te akoanga a te Pipiria e te aronga ta te Atua i taangaanga.

4. Eaa tei akaari e e tangata ngakau parau te Ariki ko Saula?

⁴ Apii maira te akaraanga o te Ariki ko Saula e eaa te ka tupu me kare tatou e akaari i te tu akaaka. Ngakau parau a Saula e kare rava aia i āriki ana e ka anoanoia aia kia akatikatika i tona aerenga manako e tana e rave ra. (Sala. 36:1, 2; Haba. 2:4) Kua tupu teia i te akaue anga a Iehova ia Saula i tana ka rave kia autu aia i to Amaleka. Kare a Saula i akarongo ana kia Iehova. Te tuatua anga te peroveta ko Samuela kiaia, kare a Saula i āriki e kua tarevake aia. Mari ra, kua akamārama aia kare i kino tana i rave e kua akaapa katoa aia i te tangata no tona tarevake. (1 Samu. 15:13-24) I mua ana, kua akaari a Saula i teia tu. (1 Samu. 13:10-14) Ma te maromaroa, kua tupu te ngakau parau kiaia. Kare aia i akatikatika i tona aerenga manako, kua ako atura a Iehova iaia e kua akaruke iaia.

5. Eaa te apiianga ka kite tatou mei te akaraanga o Saula?

⁵ Te apiianga ka kite tatou mei te akaraanga o Saula, ka ui tatou i teia au uianga: ‘Me tatau au i te akoanga i roto i te Tuatua a te Atua, ka tuatua ainei au kare teia noku? Ka manako ainei au kare e kino roa ana taku i rave? Ka akaapa ainei au i tetai ke no toku tarevake?’ Me ae ta tatou pauanga ki teia au uianga, ka anoanoia tatou kia akatikatika i to tatou aerenga manako e to tatou tu. Me kare ra, ka nengonengo to tatou ngakau e ka patoi a Iehova ia tatou ei oa nona.—Iako. 4:6.

6. Akamārama mai i te tuke i rotopu i te Ariki ko Saula e te Ariki ko Davida.

⁶ Akara ana i te tuke i rotopu i te Ariki ko Saula e tei aru mai iaia, te Ariki ko Davida, e tangata inangaro i “te ture a Iehova.” (Sala. 1:1-3) Kite a Davida e ka akaora a Iehova i te aronga akaaka kareka ra te aronga nengonengo ka patoi aia. (2 Samu. 22:28) No reira kua ariu a Davida ki ta te Atua ture kia akatikatika i tona aerenga manako. Kua tata aia: “Ka akameitaki au ia Iehova, ko tei ako mai iaku; te apii maira toku manako iaku i te po.”—Sala. 16:7.

7. Eaa ta tatou ka rave me akaaka tatou?

⁷ Me akaaka tatou, ka ariu tatou ki te Tuatua a te Atua kia akatikatika i to tatou manako tarevake i mua ake ka akatupu ei tatou i te reira. Te Tuatua a te Atua mei te reo te tu, ka akakite mai kia tatou: “Teia te ara, e na reira te aere.” Ka akamatakite mai te reira ia tatou me aere tatipake tatou—ki te kaui e ki te katau. (Isa. 30:21) Na te akarongo anga kia Iehova, ka puapinga maata tatou. (Isa. 48:17) Ei akaraanga, kare tatou e akama me akoia mai tatou e tetai ke. Ka akavaitata tatou kia Iehova no te mea te akono maira aia ia tatou mei tetai tamaiti akaperepere ra.—Ebe. 12:7.

8. Ia Iakobo 1:22-25, akapeea tatou me taangaanga i te Tuatua a te Atua mei te io rai?

⁸ Mei te io rai, te Tuatua a te Atua kia tatou. (E tatau ia Iakobo 1:22-25.) Ka akara ana te maata anga ia tatou i te io i te au popongi ravarai mua ake ka akaruke ei i te kainga. Na te reira tu ka kite tatou i te ngai ka akatikatikaia i mua ake ka kite mai tetai. Aiteite katoa, me tatau tatou i te Pipiria i te au rā, ka kite tatou i te ngai ka akatikatika i to tatou aerenga manako e to tatou tu. E riro ana te tatauanga i te tia o te rā ei tauturu i tetai pae, i mua ake ka  akaruke ei i te kainga. Akakeu ta ratou i tatau kia akamanako ratou i te reira. I te rā katoa, ka akara ratou i te au ngai ka taangaanga i te akoanga no roto mai i te Tuatua a te Atua. Pera katoa, ka riro te tatauanga e te akamanakoanga i te Tuatua a te Atua i te au rā, ei tuanga apiianga na tatou. Penei e mea māmā teia, inara e tuanga puapinga maata ka rave tatou kia aaere na runga i te arataa o iti ki te ora.

9. Aea tetai oa me akatikatika ia koe?

⁹ Kua aaere ana koe na runga i tetai arataa e kua tatipake to aerenga mei ia Iehova? (Sala. 73:2, 3) Me kua akatikatika mai toou oa ngakau toa ia koe, kua akarongo ainei koe kiaia e te taangaanga i tana akoanga? Me kua pera koe, kua rave koe i tei tau e kua mareka i te akamatakite anga a toou oa.—Mase. 1:5.

10. Akapeea koe me ariu atu me akatikatika mai toou oa ia koe?

¹⁰ Akamaara maira te Tuatua a te Atua kia tatou: “E mea meitaki te putaputa no te taunga.” (Mase. 27:6) Eaa te aiteanga o teia tuatua? Akara ana i teia akatutuanga: Akamanako ana e te tiaki ra koe i te tikoti i te mataara akaoro putuputuia, e toou manako tei runga i taau tereponi apaipai. Ka aere koe ki runga i te mataara kare e akara aere. I tera taime ra, kua mou viviki mai toou oa i toou rima e kua tāpū ia koe. No tana mou piri i toou rima kua uri kerekere te reira, inara kua ora mai koe i te u anga motoka. Noatu kua mamae koe no tetai nga mea rā, ka riri ainei koe e kua tāpū toou oa ia koe? Kare! Āriki mareka koe i tana tauturu. Mei tera katoa, me akamatakite mai tetai oa ia koe kare e rotai ana taau tuatua e taau angaanga ki te au kaveinga tuatua tika a te Atua, ka mamae koe i te akamataanga. Inara eiaa e akavaavaa e te riri i tana akoanga. E neneva te reira. (Kohe. 7:9) Mari ra, e āriki ua e kua tuatua ngakau toa toou oa kia koe.

11. Eaa te ka akakeu i tetai kia patoi i te akoanga meitaki a tetai oa?

¹¹ Eaa te ka akakeu i tetai kia patoi i te akoanga meitaki a te oa akaperepere? Ngakau parau. E reka ana te aronga ngakau parau i “te navenave o to ratou taringa.” E “ariu ke oki to ratou taringa i te tuatua-mou.” (2 Timo. 4:3, 4) Manako ratou e aronga maata ratou e te puapinga. Inara, kua tata te apotetoro ko Paulo e: “Kia manako tetai iaia uaorai e, e tangata maata aia, e kare ua ana e puapinga.” (Gala. 6:3) Akamārama meitaki mai te Ariki ko Solomona i teia. Tata aia: “E ngari oki te tamaiti ao ra ma te pakari i te ariki ruaine ma te neneva ra, te kore roa e akarongo mai i te ako ra.”—Kohe. 4:13.

12. Eaa ta tatou ka apii mei te akaraanga o te apotetoro ko Petero, ia Galatia 2:11-14?

¹² Akamanako ana i te akaraanga o te apotetoro ko Petero i te ako angaia aia e te apotetoro ko Paulo i te ngai tangata. (E tatau ia Galatia 2:11-14.) Ka akamoupuku rai a Petero i ta Paulo i tuatua, no tona tu i te tuatua anga e te ngai i tuatua ai aia. Inara, e tangata pakari a Petero. Āriki ua aia i te akoanga e kare i akamopuku ia Paulo. Mari ra, kua kapiki aia ia Paulo e “taeake akaperepere.”—2 Pete. 3:15.

13. Eaa ta tatou ka akamanako i mua ake ka ako ei i tetai?

¹³ Me ka ako koe i tetai oa, eaa taau ka akamanako? Mua ake ka aravei koe i toou oa, e ui kia koe, ‘E “maata ua [ainei au] i te ketaketa kia tika”?’ (Kohe. 7:16) Ka akava tetai tangata ngakau parau i tetai kia tau ki tona manako, kare ki ta Iehova au kaveinga, e penei kare aia e tangi atura iaia. Muri mai i te akaraanga e ka anoano rai koe i te tuatua ki toou oa, e akakite  eaa te manamanata, e oti e ui i te au uianga, te ka tauturu i toou oa kia kite i tona tarevake. Akapapu i taau ka tuatua no roto mai i te au Irava, te akamaara anga e ka tu toou oa ki mua ia Iehova. (Roma 14:10) E irinaki ki runga i te pakari o te Tuatua a te Atua, me ako i tetai, e aru i te aroa o Iesu. (Mase. 3:5; Mata. 12:20) No teaa ra? Ka akono mai a Iehova ia tatou mei ta tatou akono anga i tetai ke.—Iako. 2:13.

14. Eaa ta te akaaerenga a te Atua e oronga maira kia tatou?

¹⁴ Te arataki ra a Iehova ia tatou ki runga i te arataa o te ora na roto i tana akaaerenga i te enua nei, te oronga maira i te au vitio, au puka, au uipaanga tei tauturu ia tatou kia taangaanga i te au akoanga i roto i te Tuatua a te Atua. Akatumuia teia ki runga i te au Tuatua Tapu. Me iki akapeea me rave meitaki i te angaanga tutu aere, ka irinaki te Pupu Akaaere ki runga i te vaerua tapu. Noatu rai, ka akara putuputu te Pupu Akaaere i ta ratou ikianga akapeea me akaaere i te angaanga. No teaa ra? No te mea “te ngaro ke nei oki te tu o teianei ao,” e ka akatanotano ta te Atua akaaerenga ki te au turanga ou.—1 Kori. 7:31.

15. Eaa te au turanga ngata tei tupu ki tetai au papuritia?

¹⁵ E āriki ua ana tatou me orongaia mai te au akamārama anga ou e te apiianga tumu no roto mai i te Pipiria. Inara eaa ta tatou ka rave me oronga mai ta te Atua akaaerenga i te au tauianga o te oraanga? Ei akaraanga, i ou ua akenei e ākā moni ka pou no te akonokono i to tatou ngai akamorianga. No reira, kua oronga mai te Pupu Akaaere i te aratakianga e kia taangaanga meitakiia te Are Uipaanga Patireia e te au putuputuanga. No teia tumu, kua kapitiia tetai putuputuanga ki tetai e kua okoia te Are Uipaanga Patireia. Kua akaputuia mai te moni no te pātu i te au are uipaanga ou ki te au ngai te anoano ra i te reira. Me e noo ana koe ki te au ngai e te okoia ra te are uipaanga e kua kapitiia tetai putuputuanga ki tetai, penei ka ngata ia koe i te akatanotano ki teia au turanga ou. Ka teretere mamao tetai au papuritia kia tae ki te au uipaanga. Tetai pae tei angaanga maroiroi i te pātu e te akonokono i te Are Uipaanga Patireia ka umere i te tumu i  okoia ai te reira. Penei ka manako ratou e kua kaimoumou to ratou taime e te maroiroi. Noatu rai, ka āriki ua ratou i teia akanoonooanga ou e kia akameitakiia ratou.

16. Akapeea te akoanga ia Kolosa 3:23, 24 me tauturu ia tatou kia vai rekareka?

¹⁶ Ka vai ua to tatou rekareka me akamaara tatou e te angaanga nei tatou na Iehova e te arataki nei aia i tana akaaerenga. (E tatau ia Kolosa 3:23, 24.) Akaari mai te Ariki ko Davida i te akaraanga meitaki i te oronga anga i te moni tauturu no te pātu i te iero. Karanga aia: “Koai ra au nei, e eaa toku nei au tangata, e tikaʼi ia matou kia apai ua atu mei teianei te tu? No ko na mai ia koe na te au mea katoa nei, e no roto i taau ta matou i apai atu kia koe na.” (1 Para. 29:14) Me oronga tatou i te moni tauturu, te oronga ra tatou kia Iehova tana i oronga mai kia tatou. Noatu rai te akaperepere ra a Iehova i to tatou taime, maroiroi, e te au apinga oronga ua ei turuturu i tana angaanga.—2 Kori. 9:7.

17. Eaa te tumu kare tatou e taitaia me ka akatikatika i to tatou aerenga?

¹⁷ E noo ua rai ki runga i te arataa o iti ki te ora, ka anoanoia tatou katoatoa kia aru vaitata i to Iesu takainga vaevae. (1 Pete. 2:21) Me ka anoanoia e kia akatikatika koe i to aerenga, eiaa e taitaia. Penei e akairo meitaki te reira, te inangaro ra koe i te aru i ta Iehova aratakianga. E akamaara kare a Iehova e umuumu mai ana ia tatou—te aronga apa ua—kia aru tiama i to Iesu akaraanga.

18. Eaa ta tatou ka rave kia tae ki to tatou akakoroanga?

¹⁸ Kia akamou tatou te manako ki te tuatau ki mua e kia rave ua rai i te akatikatika i to tatou manako, te tu, e ta tatou e rave ra. (Mase. 4:25; Luka 9:62) E akaari ua tatou i te tu akaaka, “kia ora na. Kia tika rava.” (2 Kori. 13:11) Me rave tatou i te reira, “e noo ïa te Atua nona te aroa e te au i rotopu ia [tatou].” Kare anake e ka tae tatou ki to tatou akakoroanga mari ra ka rekareka tatou i te teretere anga ki reira.