1. Спрема Матеј 7:13, 14, соске шај те вакера кај сием ко јекх симболично патување?

ШАЈ те вакера кај сарине амен сием ко јекх симболично патување. Амари цел тани те живина ко нево свето коте со ка владинел амаро мангло Девел, о Јехова. Секова диве, трудинаја амен те џа ко друмо со водинела ко живото. Ама, сар со вакерѓа о Исус, адава друмо тано тесно хем понекогаш тано пхаро те џал пе ки лесте. (Читин Матеј 7:13, 14.) Адалеске со сием несовршена, локхесте шај те мукха акава друмо (Гал. 6:1).

2. Со ка дикха ки акаја статија? (Дикх и рамка „ И понизност поможинела аменге те кера промене“.)

² Ако мангаја те ачхова ко тесно друмо со водинела ко живото, мора те ова спремна те менина амаро мислење, ставија хем постапке. О апостол Павле поттикнинѓа е христијанен таро Коринт понадари да те „керен о потребна промене“ (2. Кор. 13:11). Акава совет важинела аменге да. Ки акаја статија ка дикха сар шај и Библија те поможинел аменге те кера промене хем сар о зрела амала шај те поможинен аменге те ачхова ко друмо со водинела ко вечно живото. Освен адава, ка дикха кеда шај те овел аменге пхаро те шуна о водство со дела ле е Јеховаскири организација. Ка дикха сар и понизност шај те поможинел аменге те кера промене бизо те нашава амари радост џикоте служинаја е Јеховаске.

3. Сар шај е Девлескоро Лафи те поможинел туке?

³ Нане локхо те преиспитина амаре мисле хем чувствија. Адалеске со амаро вило тано ховавно, шај те овел  аменге пхаро те џана ко кова правцо шај ка водинел амен (Ерем. 17:9). Локхо тано те ховава коркори амен (Јак. 1:22). Адалеске ваљани те користина е Девлескоро Лафи те шај те преиспитина амен. Е Девлескоро Лафи сикавела саве сием андрал, или откринела саве тане амаре најхор мисле хем о намере амаре вилескере (Евр. 4:12, 13). Ки несави смисла, е Девлескоро Лафи тано сар јекх рендген апарати кова со поможинела амен те дикха со иси андре ки аменде. Ама, мора те ова понизна те шај те овел амен корист таро советија со добинаја лен тари Библија хем таро окола со о Девел користинела лен те водинел пли организација.

4. Котар џанаја кај о цари о Саул уло гордо мануш?

⁴ О пример таро цари о Саул сикавела аменге со шај те овел ако на сием понизна. О Саул уло добором гордо со на мангела сине коркори песке те признајнел кај ваљани сине те менинел пло размислување хем пле постапке (Пс. 36:1, 2; Авак. 2:4). Акава уло јасно кеда о Јехова денѓа ле конкретно упатство башо адава со ваљани те керел кеда ка побединел е Амаличанен. Ама, о Саул на сине послушно. А кеда о пророко о Самоил керѓа леа лафи башо адава, ов на мангља те признајнел кај грешинѓа. Наместо адава, почминѓа те оправдинел пе адалеа со вакерѓа кај на керѓа ништо лошно хем е јаверен керѓа крива (1. Сам. 15:13-24). Англедер да о Саул керѓа нешто слично (1. Сам. 13:10-14). Жално тано со дозволинѓа лескоро вило те овел гордо. Адалеске со на менинѓа пло размислување, о Јехова укоринѓа ле хем отфрлинѓа ле.

5. Со шај те сикљова таро е Саулескоро лошно пример?

⁵ Адалеске со на мангаја те ова сар о Саул, шукар тано те пуча амен: „Кеда читинава несаво совет таро е Девлескоро Лафи, дали родава причине те оправдинав мло размислибе? Дали мислинава кај адава со керава нане добором лошно? Дали керава е јаверен крива башо мле постапке?“ Ако о одговор таро било кова пучибе тано оја, тегани мора те менина амаро стави хем амаро размислибе. Ако на кераја адава, тегани шај те ова добором горда со о Јехова нане те мангел те ова лескере амала (Јак. 4:6).

6. Сави разлика сине машкар о цари о Саул хем о цари о Давид?

⁶ Дикх и разлика машкар о цари о Саул хем о следно цари таро Израел, о Давид, кова со мангела сине „е Јеховаскоро закони“ (Пс. 1:1-3). О Давид џанела сине кај о Јехова спасинела адален сој понизна, а противинела пе е горда манушенге (2. Сам. 22:28). Адалеске о Давид дозволинѓа о Девел те менинел лескоро начин сар размислинела. Ов пишинѓа: „Ка фалинав е Јехова, кова со дела ман советија. Раќате опоменинена ман мле најгаравде чувствија“ (Пс. 16:7).

7. Со ка кера ако сием понизна?

⁷ Ако сием понизна, ка мукха е Девлескоро Лафи те исправинел амаро погрешно размислување англедер те кера нешто сој погрешно. И Библија ка овел сар гласо со вакерела аменге: „Адава тано о друмо, џан ки лесте!“ И Библија ка предупрединел амен ако почминаја те кера нешто погрешно (Иса. 30:21). Ако сием послушна е Јеховаске, адава ка користинел аменге ко бут начинија (Иса. 48:17). На пример, нане те лаџа кеда некој ка исправинел амен. Хем ка ова попаше е Јеховаја адалеске со хаљоваја кај ов грижинела пе аменге сар јекх љубезно дад (Евр. 12:7).

8. Спрема Јаков 1:22-25, ки која смисла е Девлескоро Лафи шај те овел аменге сар ајна?

⁸ Е Девлескоро Лафи шај те овел аменге сар ајна. (Читин Јаков 1:22-25.) Бут џене амендар дикхена пе ки ајна англедер те икљовен кхералдан. Аѓаар шај те дикха дали ваљани те кера несаве промене англедер те дикхен амен о јавера. Слично аѓаар, кеда читинаја  и Библија секова диве, дикхаја саве промене ваљани те кера ко амаро размислибе хем стави. Буте џененге користинела адава со сабајле читинена е дивескоро стихо англедер те икљовен кхералдан. Ола дозволинена адава со читинена те влијајнел упри ленде. Тегани, преку цело диве трудинена пе те применинен о советија таро е Девлескоро Лафи. Освен адава, мора редовно те одвојна аменге време секова диве те проучина и Библија хем те размислина баши лате. Иако дикхјола локхо, акава тано јекх таро најважна буќа со поможинена аменге те ачхова ко тесно друмо со водинела ко живото.

9. Кеда јекх амал шај ка ваљани те дел тут совет?

⁹ Дали некогаш случинѓа пе туке те кере нешто со шај сине те руминел тло амалипе е Јеховаја? (Пс. 73:2, 3). Ако несаво зрело амал сине ле храброст те вакерел туке баши тли грешка, дали шунѓан ле хем применинѓан лескоро совет? Ако оја, тегани постапинѓан исправно, хем сигурно сиан благодарно со предупрединѓа тут (Изр. 1:5).

10. Сар ваљани те постапине ако несаво амал дела тут совет?

¹⁰ Е Девлескоро Лафи вакерела: „О верно амал дела совет чак кеда адава дукхала“ (Изр. 27:6). Со значинела акава? Размислин баши акаја споредба: Замислин туке кај заедно јекхе амалеа аџикереа те накхе тари јекх прометно улица хем тегани ѕвонинела тло телефони. Џикоте дикхеа ко телефони, цидеа те накхе и улица. Ко адава моменти, тло амал силно астарела тло вас хем цидела тут ко тротоари. Добором силно астарѓа тло вас со керѓа туке модрица, ама адалеа со одма реагиринѓа, спасинѓа тут те на кхувел тут о врда. Иако и модрица со керѓа туке ка дукхал тут некобор диве, дали ка хољане леске башо адава? Џанѓола пе кај на! Ка ове леске благодарно со спасинѓа тут. Слично аѓаар, ако јекх амал вакерела туке кај вакерѓан или керѓан нешто со нане спрема е Девлескере мерилија, ко почеток адава шај те дукхал тут. Ама, ма хољан леске хем ма вреџин тут адалеске со денѓа тут совет. Адава би овела сине глупаво (Проп. 7:9). Наместо адава, ов благодарно со тло амал сине ле храброст те вакерел туке која тани тли грешка.

11. Соске некој шај те одбинел о шукар совет таро јекх паше амал?

¹¹ Која шај те овел и причина некој те одбинел о шукар совет таро јекх паше амал? И гордост. О горда мануша мангена те шунен „адава сој угодно ленгере каненге“. Ола на мангена некој те вакерел ленге о чачипе (2. Тим. 4:3, 4). Ола мислинена кај на ваљани ленге совет адалеске со мислинена кај тане помудра хем кај тане поважна таро јавера. Ама, о апостол Павле пишинѓа: „Ако некој мислинела кај тано нешто, а нане ништо, коркори песте ховавела“ (Гал. 6:3). О цари о Соломон бут шукар објаснинѓа акава кеда пишинѓа: „Пошукар тано чороло, ама мудро терно чхаво, него пхуро хем глупаво цари, кова више на мангела те шунел совет“ (Проп. 4:13).

12. Спрема Галатите 2:11-14, со сикљоваја таро е Петарескоро пример?

¹² Дикх саво пример мукхља аменге о апостол Петар кеда о апостол Павле укоринѓа ле англи сариненде. (Читин Галатите 2:11-14.) Ако о Петар концентриринела пе сине ко адава сар хем кеда о Павле денѓа ле совет, ов шај сине те хољанел леске. Ама, о Петар сине мудро. Ов прифатинѓа о совет хем на икерѓа холи. Наместо адава, покасно вакерѓа е Павлеске кај тано лескоро „мангло пхрал“ (2. Пет. 3:15).

13. Башо со ваљани англедер те размислина ако мангаја некаске те да совет?

¹³ Со ваљани те овел тут ки годи ако мислинеа кај ваљани те де совет несаве амалеске?  Англедер те кере леа лафи, пуч тут: „Дали шај сиум преправедно?“ (Проп. 7:16). О преправедно мануш судинела е јаверенге спрема пле мерилија, а на спрема е Јеховаскере, хем шај на сикавела милост. Откеда шукар ка размислине соске мангеа те де совет тле амалеске хем панда мислинеа кај ваљани те кере адава, јасно вакер леске кова тано о проблеми хем пуч ле некобор пучиба те шај те поможине леске коркори те хаљовел соске адава со керѓа тано погрешно. Кеда деа совет, адава ваљани те темелинел пе ки Библија. Ма бистре кај тло амал башо пле постапке нане одговорно англи туте, него англо Јехова (Рим. 14:10). Користин и мудрост со аракхљовела ко е Девлескоро Лафи, хем ов сочувствително сар о Исус (Изр. 3:5; Мат. 12:20). Соске? Адалеске со о Јехова ка постапинел аменцар исто сар амен со постапинаја е јаверенцар (Јак. 2:13).

14. Со дела аменге е Јеховаскири организација?

¹⁴ О Јехова водинела амен ко живото преку пли организација сој теле ки пхув, која дела амен публикацие, видеоклипија хем состанокија со поможинена аменге те применина о советија таро е Девлескоро Лафи. Шај те овел амен целосно доверба ко са о информацие соске темелинена пе ко е Девлескоро Лафи. О пхраља таро Водечко тело родена водство таро свети дух кеда одлучинена кова тано најшукар начин те проповединел пе. Сепак, о Водечко тело редовно преиспитинела пле одлуке те шај те дикхел дали ваљани те керел несаве промене. Соске? Адалеске со о околностија ко акава свето менинена пе, е Девлескири организација да ваљани те прилагодинел пе спрема ленде (1. Кор. 7:31).

15. Сој тано пхаро несаве објавителенге?

¹⁵ Кеда е Девлескири организација дела амен неве објаснувања башо библиска сикљојба или дела амен упатствија башо морална мерилија, амен спремно прифатинаја лен хем применинаја лен. Ама, сар реагиринаја кеда и организација керела промене кола со влијајнена ко јавера аспектија таро амаро живото? На пример, ко последна берша бут бариле о трошакија баши изградба хем башо одржибе о објектија со користинаја лен. Адалеске, о Водечко тело одлучинѓа кобор со шај повише собранија те користинен исто дворана башо состанокија. Адалеске, несаве собранија сине спојме, а несаве дворане сине бикиме. Адале паренцар градинена пе неве  дворане ко тхана коте со иси побари потреба. Ако живинеа ко тхан коте со сине бикими несави дворана хем коте со несаве собранија сине спојме, шај те овел туке пхаро те прилагодине тут ко неве околностија. Акана несаве објавителија мора те патујнен подур те шај те џан ко состанокија. Јавера со керена сине бути ки изградба или те одржинел пе несави дворана шај пучена пе соске адаја дворана бикинела пе. Шај мислинена песке кај џабе трошинѓе пумаро време хем трудо. Сепак, ола прифатинена о неве упатствија хем заслужинена те овен пофалиме.

16. Сар адава со ка применина о совет таро Колошаните 3:23, 24 ка поможинел аменге понадари да те ова бахтале?

¹⁶ Амен понадари да ка ова бахтале ако на бистраја кај са со кераја тано башо Јехова хем кај ов водинела пли организација. (Читин Колошаните 3:23, 24.) О цари о Давид денѓа шужо пример кеда денѓа таро пло барвалипе те шај те градинел пе о храми. Ов вакерѓа: „Кој сиум ме хем сој тано мло народо те шај доброволно те да туке акава? Тутар авела са, хем денѓем туке адава со добинѓем ле таро тле васта“ (1. Лет. 29:14). Кеда даја прилогија, амен да даја е Јеховаске адава со авела таро лескере васта. Сепак, о Јехова бут ценинела о време, и сила хем о паре со трошинаја лен башо активностија со керела лен лескири организација (2. Кор. 9:7).

17. Соске на ваљани те обесхрабрине тут ако хаљовеа кај ваљани те кере несаве промене?

¹⁷ Те шај те ачхова ко тесно друмо со водинела ко живото, сарине амен мора те џа пало е Исусескоро пример (1. Пет. 2:21). Ако хаљовеа кај ваљани те кере несаве промене, ма обесхрабрин тут. Адава тано шукар знако соске сикавеа кај мангеа те џа пало е Јеховаскоро водство. Ма бистре кај о Јехова џанела кај сием несовршена, хем адалеске на очекујнела амендар совршено те џа пало е Исусескоро пример.

18. Со ваљани те кера те шај те реса џи ки амари цел?

¹⁸ Те мислина ко адава со ка авел хем те ова спремна те кера промене ко амаро размислибе, стави хем постапке (Изр. 4:25; Лука 9:62). Те ачхова понизна, те ова бахтале хем те кера о потребна промене (2. Кор. 13:11). Ако кераја акава, тегани „о Девел е мангипаскоро хем е мирескоро ка овел [аменцар]“. Аѓаар, ов ка поможинел аменге те ова бахтале акана хем ка дел амен живото ко нево свето.