1. Premalo Matej 7:13, 14, sose šaj te phena so hijam ko jekh putovanje?

SARE amen hijam ko jekh putovanje. Amaro cilj tano te živina ko nevo sveto kuri o Jehova ka ovel vladari. Svako dive, amen daja sa amendar te aćhova ko drumo kova legari ko životi. Ama sar so o Isus phenđa, odova drumo tano tesno hem disavo puti tano pharo te aćhova ko odova drumo. (Čitin Matej 7:13, 14.) Sebepi so hijam nesavršena, šaj te ovel lokho te cida amen ando odova drumo (Gal. 6:1).

2. So ka dikha ko akava članko? (Dikh o okvir „ I poniznost pomožini amen te menjina amen“.)

² Ako mangaja te aćhova ko tesno drumo kova legari ko životi, amen mora te ova spremna te menjina amaro razmišljanje, amare stavija hem postupkija. O apostol Pavle ohrabrinđa e hrišćanen ko Korint te nastavinen „te ispravinen pe“ (2. Kor. 13:11). Odova savet odnosini pe hem upro amende. Ko akava članko, ka dikha sar i Biblija šaj te pomožini amen te menjina amen hem sar šaj amare zrela amala te pomožinen amen te aćhova ko drumo kova legari ko životi. Isto ađahar, ka dikha sose šaj disavo puti te ovel amenđe pharo te ićera amen ko smernice kola dobinaja prekali e Jehovasi organizacija. Ka dikha hem sar i poniznost šaj te pomožini amen te menjina amen hem sar šaj te aćhova radosna đi služinaja e Jehovase.

3. Sar šaj te pomožini amen e Devleso Lafi?

³ Ked mangaja te ispitina amare mislija hem osećanja, valjani te pazina. Sose? Odolese so amaro vilo tano hovavno, hem sebepi odova šaj te ovel amenđe pharo te haljova kuri šaj te legari amen (Jer. 17:9). But tano lokho te hovava kokri amen (Jak. 1:22). Odolese amen mora te koristina e  Devleso Lafi te šaj te dikha save hijam. E Devleso Lafi mothovi amenđe save hijam andral, amare najhor „mislija hem o namere“ ando amaro vilo (Jevr. 4:12, 13). I Biblija tani sar rendgen sose pomožini amen te dikha o buća kola tane ano amende. Ama, amen mora te ova ponizna te šaj te primenina o savet kova dobinaja andi Biblija hem ando okola kola predvodinena.

4. So mothovi amenđe so o kralj Saul ulo ponosno manuš?

⁴ O primer ando kralj Saul mothovi amenđe so šaj te desini pe ako na hijam ponizna. O Saul ulo odobor ponosno so na manglja čak ni kokri pese te priznajini so valjani te menjini po razmišljanje hem pe postupkija (Ps. 36:1, 2; Avak. 2:4). Odova dićhilo ked o Jehova dinđa e Saulese jekh jasno smernica so valjani te ćerel palo odova so ka pobedini e amaličansko vojska. Ama, o Saul na hine poslušno e Jehovase. Ked o prorok Samuilo vaćerđa oleja ando odova, o Saul na priznajinđa pi greška. Umesto odova, ov phenđa so odova nane odobor ozbiljno buti hem so o manuša ćhivđe le te ćerel odova (1. Sam. 15:13-24). Angleder, o Saul već mothovđa slično stav (1. Sam. 13:10-14). Nažalost, ov dozvolinđa ko oleso vilo te razvijini pe o ponos. Ov na ispravinđa po razmišljanje hem odolese o Jehova ukorinđa le hem odbacinđa le.

5. So šaj te sikljova ando e Sauleso primer?

⁵ Amen na mangaja te ova sar o Saul hem odolese valjani te puća amen akala pućiba: „Ked čitinava disavo savet ando e Devleso Lafi, da li rodava izgovorija te na primeninav le? Da li mislinava so odova so ćerava nane odobor lošno? Da li averen krivinava aso odova so me ćerava?“ Ako amaro odgovor ko bilo kova ando akala pućiba tano ja, tegani mora te menjina amaro razmišljanje hem amare stavija. Ako na ćeraja odova, amaro vilo šaj te ovel odobor ponosno so o Jehova ka odbacini amen hem više na ka dikhel amen sar pe amalen (Jak. 4:6).

6. Koja razlika hine maškaro kralj Saul hem o kralj David?

⁶ Zapazin i razlika maškaro kralj Saul hem oleso nasledniko, o kralj David, o manuš kova manglja „e Jehovaso zakon“ (Ps. 1:1-3). O David đanđa so o Jehova spasini okolen soj tane ponizna, a suprotstavini pe okolenđe soj tane ponosna (2. Sam. 22:28). Odolese o David mukhlja e Devleso zakon te oblikujini oleso razmišljanje. Ov pisinđa: „Ka hvalinav e Jehova, kova savetujini man. Raćate opominena man mekle najhor mislija“ (Ps. 16:7).

7. So ka ćera ako hijam ponizna?

⁷ Ako hijam ponizna, amen ka mukha e Devleso Lafi te ispravini amaro pogrešno razmišljanje angleder te ćera diso pogrešno. E Devleso Lafi ka ovel sar glaso kova phenela amenđe: „Odova tano o drumo, đan odole drumeja.“ E Devleso Lafi ka upozorini amen ako počminaja te ćera diso soj tano pogrešno (Is. 30:21). Amare šukaripase tano te šuna e Jehova (Is. 48:17). Na primer, na ka osetina amen neprijatno sebepi so neko ispravini amen. Isto ađahar, amen ka ova popaše e Jehovaja odolese so haljovaja so ponašini pe premalo amende sar premalo pe ćhave (Jevr. 12:7).

8. Sar so pomini pe ki Jakovljeva 1:22-25, sar šaj te koristina e Devleso Lafi sar ogledalo?

⁸ E Devleso Lafi šaj te ovel amenđe sar jekh ogledalo. (Čitin Jakovljeva 1:22-25.) Svako sabale, angleder te ikljova ando ćher dikhaja amen ko ogledalo. Tegani šaj te dikha da li valjani te popravina diso angleder so avera ka dikhen amen. Isto ađahar, ked svako dive čitinaja i Biblija, amen ka dikha kuri valjani te menjina amaro razmišljanje hem  amare stavija. Butenđe pomožini so svako sabale angleder te ikljon ando ćher, razmotrinena o citati aso odova dive. On dozvolinena odova so čitinena te utičini ko olengo razmišljanje. Palo odova, on razmislinena sar šaj odova dive te primeninen o savet ando e Devleso Lafi. Uzo odova, amen valjani redovno te proučina, so uključini te čitina hem te razmislina ando e Devleso Lafi svako dive. Akava šaj te izgledini lokho, ama odija tani jekh andi najvažno buti koja šaj te ćera, a koja šaj te pomožini amen te aćhova ko tesno drumo kova legari ko životi.

9. Ked to amal šaj ka valjani te ispravini tut?

⁹ Da li iked počminđan te phire ko drumo kova cidinđa tut kotar o Jehova? (Ps. 73:2, 3). Ako to zrelo amal hine hrabro te ispravini tut, da li šunđan le hem primeninđan oleso savet? Ako ja, tegani but šukar ćerđan hem sigurno hijan but zahvalno so to amal upozorinđa tut (Posl. 1:5).

10. Sar valjani te reagujine ako to amal savetujini tut?

¹⁰ E Devleso Lafi setinćeri amen: „O udarcija ando amal mothovena olesi vernost“ (Posl. 27:6). So značinena akala lafija? Te dikha jekh primer: Zamislin so valjani te nakhe i ulica ki koja nakhena but vorda hem ko odova trenutko zvonini to telefoni. Pođinđan te nakhe i ulica bizo te dikhe. Ko odova trenutko, to amal dolela tut kotar vas hem cidela tut palal. Ov odobor steginđa to vas so pojavinđa pe tuće modrica, ama odova so ćerđa spasinđa tut te na khuven tut o vorda. Iako to vas sebepi odija modrica šaj ka dukhal tut nekobor dive, da li ka holjane sebepi odova so ćerđa to amal? Sigurno na! Tu ka ove zahvalno sebepi so pomožinđa tuće. Isto ađahar, ako to amal upozorini tut so to govor ja te postupkija nane premalo e Devlese pravedna merilija, ki početka šaj ka osetine tut so hijan povredimo. Ama, ma odbin oleso savet niti ma holjan. Odova na bi ovela mudro (Prop. 7:9). Umesto odova, ov zahvalno te amalese so hine hrabro te vaćeri tuvaja.

11. Sose neko na prihvatini o šukar savet ando po amal?

¹¹ Sose neko na prihvatini o šukar savet ando po amal? Sebepi o ponos. O ponosna manuša mangena te šunen samo odova so olenđe pasujini. On „na mangena te šunen o ćaćipe“ (2. Tim. 4:3, 4). On mislinena so olenđe na valjani savet odolese so mislinena soj tane pomudra hem považna ando avera. Ama, o apostol Pavle pisinđa: „Ako neko mislini soj tano diso, a u stvari nane ništa, hovavi kokri pes“ (Gal. 6:3). O kralj Solomon šukar objasninđa so značini akava. Ov pisinđa: „Pošukar tano o ćororo a o mudro terno ćhavo, nego o phuro a bezumno kralj, kova više na đanela te prihvatini o savet“ (Prop. 4:13).

12. So sikljovaja ando primer kova mothovđa o apostol Petar, sar so pisini ko Galatima 2:11-14?

¹² Zapazin o primer kova mothovđa o apostol Petar ked o Pavle ispravinđa le anglo avera. (Čitin Galatima 2:11-14.) O Petar šajinđa te na prihvatini e Pavleso savet sebepi o način ko kova o Pavle dinđa le hem sebepi so odova ćerđa anglo avera. Ama, o Petar hine mudro. Ov prihvatinđa o savet hem na holjanđa upro Pavle. Umesto odova, ov kasnije vićinđa le „manglo phral“ (2. Petr. 3:15).

13. Sostar valjani te razmisline angleder so nekase ka de savet?

¹³ Sostar valjani te razmisline ako valjani te de savet te amalese? Angleder te vaćere te amaleja, puć tut: „Da li hijum ’but pravedno‘“? (Prop. 7:16). O manuš kova tano but pravedno prosudini averen, na premalo e Jehovase merilija, nego premalo pekle  hem verovatno nane but milosrdno. Najangleder, razmislin sose mangeja te de savet te amalese. Ako palo odova hem ponodri mislineja so valjani te ćere odova, tegani vaćer lese soj tano o problemi hem koristin pućiba te pomožine lese te haljol kaj pogrešinđa. Odova so ka vaćere lese valjani te temeljini pe ko e Devleso Lafi. Uvek ićer ki godi so to amal tano odgovorno, na tuće, nego e Jehovase (Rimlj. 14:10). Koristin o mudra lafija ando e Devleso Lafi. Isto ađahar, ked nekase deja savet, ov saosećajno sar o Isus (Posl. 3:5; Mat. 12:20). Sose? Odolese so o Jehova ka postupini amencar ko isto način sar amen postupinaja averencar (Jak. 2:13).

14. So dela amen e Jehovasi organizacija?

¹⁴ O Jehova legari amen ko drumo ando životi prekali pi organizacija koja dela amen filmija, publikacije hem sastankija. Sa akala buća kola pomožinena amen te primenina o savetija ando e Devleso Lafi temeljinena pe ki Biblija. O phralja ando Vodeće telo osloninena pe upro sveti duh ked valjani te odlučinen kova tano najšukar način te propovedini pe i šukar vest. Pa ipak, o Vodeće telo redovno razmislini ando odluke kola anđa te dikhen da li valjani te ćerel pe disavi promena. Odolese so „menjini pe i scena ando akava sveto“, e Devlesi organizacija mora te prilagodini pe ko neve okolnostija (1. Kor. 7:31).

15. Ko kola neve okolnostija disave objaviteljija morandilje te prilagodinen pe?

¹⁵ Ked e Devlesi organizacija dela amen neve objašnjenja ando e biblijake sikljoviba ja smernice kola utičinena ko amaro ponašanje, amen prihvatinaja hem primeninaja len. Ama, sar reagujinaja ked e Devlesi organizacija anela disave odluke kola utičinena ko avera buća ko amaro đivdipe? Ko poslednja berša tano but poskupo te ćeren pe hem te održinen pe amare dvorane. Odolese o Vodeće telo odlučinđa nekobor skupštine te koristinen jekh dvorana. Sebepi odova, disave skupštine morandilje te spojinen pe, a disave dvorane morandilje te biknen pe. Odola pare koristinđe pe te gradinen pe o dvorane odothe kuri hine potrebno. Ako živineja ko than kuri o dvorane bikinđe pe hem o skupštine spojinđe pe, šaj hine tuće pharo te prilagodine tut ko neve okolnostija.  Disave objaviteljija akana valjani but te putujinen te šaj te oven ko sastankija. A avera kola učestvujinđe ko odova te gradini pe ja te održini pe i dvorana, šaj pućena pe sose i dvorana bikinđa pe. Šaj te mislinen so uzaludno trošinđe po vreme hem pi snaga. Ama, ipak on prihvatinena odola neve smernice hem sebepi odova zaslužinena te oven pohvalime.

16. Sar odova so ka primenina o savet ando Kološanima 3:23, 24 ka pomožini amen te aćhova bahtale?

¹⁶ Amen ka aćhova bahtale ako na bistraja so sa so ćeraja, e Jehovase ćeraja hem so ov vodini pi organizacija. (Čitin Kološanima 3:23, 24.) O kralj David mothovđa amenđe šukar primer ked dinđa prilog te ćerel pe o hram. Ov phenđa: „Sose ko hijum me hem soj tano mo narodo te bi šaj tuće dobrovoljno te da sa akava? Tutar sa avela, hem amen tuće daja odova so ando to vas dobinđam“ (1. Let. 29:14). Isto ađahar, ked amen daja prilog, hem amen daja e Jehovase odova so avela ando e Jehovaso vas. Ama, o Jehova cenini amaro vreme, amari snaga hem o materijalna buća kola daja te šaj te podupirina odova so olesi organizacija ćerela (2. Kor. 9:7).

17. Sose na valjani te obeshrabrine tut ako valjani te ćere disave promene?

¹⁷ Te šaj te aćhova ko tesno drumo, sare amen mora te oponašina e Isuseso primer (1. Petr. 2:21). Ako primetinđan so valjani te ćere disave promene koro tute, ma obeshrabrin tut. Odova šaj te ovel jekh šukar znak, so mangeja te šune e Jehovase smernice. Ma bistri so o Jehova na očekujini amendar akana sar nesavršena manuša, savršeno te oponašina e Isuseso primer.

18. So mora te ćera te šaj te resa đi amaro cilj?

¹⁸ Odolese hajde te razmislina kotar i budućnost hem te ova spremna te menjina amaro razmišljanje, amare stavija hem postupkija (Posl. 4:25; Luka 9:62). Aćhoven ponizna, „radujinen tumen, ispravinen tumen“ (2. Kor. 13:11). Ako ćeraja odova, „o Devel ando mangipe hem ando mir ka ovel [amencar].“ Tegani na samo so ka resa ko amaro cilj, već hem ka uživina đi putujinaja.