1. Σόσκε βακεράσα ότι κεράσα ταξίδι σαρ βακερένα ο εδάφια Ματθαίος 7:​13, 14;

ΣΑΡΕ κεράσα ταξίδι. Ο τθαν σο μανγκάσα τι ερεσάς ισί ο νεβό ντουνιάς σο κα κερέλ-λες κουμάντος ο Ιεχωβά μανγκιμάσαρ. Κάθε ντιβές, προσπαθίνασα τι ατσσάς κο ντρομ σο γκερέλα κι ζωή. Αλλά μπάζιμα νανέ εύκολος τι κεράς-λες ανταβά σόσκε, σαρ βακερντάς ο Ιησούς, ανταβά ντρομ ισί δύσκολος. (Διαβάνεν Ματθαίος 7:​13, 14) Επειδή ισινάμ ατελείς, ισί εύκολος τι νασάς ανταλέ ντρομέσταρ.​—Γαλ. 6:1.

2. Σο κα ντικχάς ανταλέ μαθημάστε; (Ντικχέν ο πλαίσιος-ντα « Η Ταπεινότητα Βοηθίνελα-αμέν τι Τσσουβάς-αμέν κο Λατσσό Ντρομ»)

² Για τι ατσσάς ανταλέ δύσκολε ντρομέστε σο γκερέλα κι ζωή, πρέπει τι μανγκάς τι αλλάνας οντουλά σο σκεφτίνασα, οντουλά σο μπεϊντίνασα ντα ο πράγματα σο κεράσα. Ο απόστολος Παύλος βακερντάς ι Χριστιανόνγκε κι Κόρινθος μα τι τσσιναβέν “τι τσσουβέν-πες κο λατσσό ντρομ”. (2 Κορ. 13:​11) Ανταγιά συμβουλή ισί αμένγκε-ντα. Ανταλέ μαθημάστε, κα ντικχάς σαρ βοηθίνελα-αμέν η Αγία Γραφή τι αλλάνας ντα σαρ ο γκοντιαβέρ αμαλά βοηθίνενα-αμέν τι ατσσάς κο ντρομ σο γκερέλα κι ζωή. Επίσης, κα ντικχάς κάνα μπορεί τι ισί δύσκολος τι ντας καν οντουλέντε σο βακερέλα η οργάνωση ι Ιεχωβάσκι. Κα ντικχάς σαρ βοηθίνελα-αμέν η ταπεινότητα τι αλλάνας ντα τι ατσσικιαράς αμαρί χαρά καζόμ υπηρετίνασα ι Ιεχωβάς.

3. Σαρ βοηθίνελα-αμέν ο Λάφι ι Ντεβλέσκο;

³ Ισί δύσκολος τι ντικχάς σο τθεράσα αμαρέ γκοντιάτε ντα αμαρέ γκίστε. Αμαρό γκι χουχαβέλα-αμέν, οτθάρ ισί φαρ σο ναστί ντικχάσα κάι γκερέλα-αμέν. (Ιερ. 17:9) Ισί εύκολος τι χουχαβάς αμαρό νεαυτός ντα τι “σκεφτίνας λάθος τροπόσαρ”. (Ιακ. 1:​22) Οτθάρ, πρέπει τι χρησιμοποιήνας ο Λάφι ι  Ντεβλέσκο για τι ντικχάς αμαρό νεαυτός. Ο Λάφι ι Ντεβλέσκο σικαβέλα σο ισινάμ αντρ’ αμέντε, οντουβά «σο σκεφτίνελα ντα σο μανγκέλα τι κερέλ» αμαρό γκι. (Εβρ. 4:​12, 13) Ισί σαρ εκ μηχάνημας σο νικαβέλα ακτινογραφίες επειδή βοηθίνελα-αμέν τι ντικχάς σο ισί αντρ’ αμέντε. Αλλά πρέπει τι αβάς ταπεινοί για τι κεράς ο συμβουλές σο ντέλα-αμέν η Γραφή ντα οντουλά σο τθερένα ευθύνη κι Ντεβλέσκο λαός.

4. Σο σικαβέλα ότι ο βασιλιάς Σαούλ αβιλό μπαρικανό;

⁴ Κατά βασιλιάς Σαούλ σικλιάσα σο μπορεί τι αβέλ-πες άμα να ισινάμ ταπεινοί. Ο Σαούλ αβιλό αζόμ μπαρικανό τζενό σο πακιάλας ότι να χρειαζίντιβελας τι αλλάνελ ο τρόπος σο σκεφτίνελας ντα κερέλας ο πράγματα. (Ψαλμ. 36:1, 2· Αββακ. 2:4) Για παράδειγμας, κάνα ο Ιεχωβά βακερντάς λέσκε σο τι κερέλ αφού κα νικίνελας ι Αμαληκιτέν, να ντινάς καν. Ντα κάνα ο προφήτης Σαμουήλ κερντάς λέσαρ λάφι ανταλέσκε, βοβ να βακερντάς ότι κερντάς λάθος. Αλλά βακερντάς ότι οντουβά σο κερντάς να ισινέ αζόμ μπέτι ντα τσσουντάς ο βάρετα γιαβερέντε. (1 Σαμ. 15:​13-24) Κάτι ασακό κερντάας πιο τζανγκλέ-ντα. (1 Σαμ. 13:​10-14) Δυστυχώς, ο Σαούλ αβιλό μπαρικανό. Να αλλαντάς ο τρόπος σο σκεφτίνελας, οντουλέσκε ο Ιεχωβά χολιασάλο λέσκε ντα να μανγκλάς τι ατσσόλ βασιλιάς.

5. Σο σικλιάσα κατά Σαούλ;

⁵ Να μανγκάσα τι αβάς σαρ ο Σαούλ, οντουλέσκε κα αβέλας λατσσό τι πουτσάς-αμέν: “Κάνα διαβάναβα εκ συμβουλή κατά Λάφι ι Ντεβλέσκο, μήπως αρακχάβα δικαιολογίες για μα τι κεράβ-λα; Μήπως αμντίναβα ότι ανταβά σο κεράβα νανέ αζόμ μπέτι; Μήπως τσσουβάβα ο βάρετα γιαβερέντε;” Άμα βακεράσα «βα» ατζέ-ντα εκχέ ερωτησιάτε, πρέπει τι αλλάνας ο τρόπος σο σκεφτίνασα. Άμα να κα κεράς-λες ανταβά, κα αβάς αζόμ μπαρικανέ σο ο Ιεχωβά να κα μανγκέλ τι αβάς λέσκε αμαλά.​—Ιακ. 4:6.

6. Βακερέν σο διαφορά τθερέλας ο βασιλιάς Σαούλ κατά βασιλιάς Δαβίδ.

⁶ Ντικχέν σο διαφορά τθερέλας ο βασιλιάς Σαούλ κατά βασιλιάς Δαβίδ. Ο Δαβίδ μανγκέλας ο “νόμος ι Ιεχωβάσκο”. (Ψαλμ. 1:​1-3) Ο Δαβίδ τζανέλας ότι ο Ιεχωβά σώνελα ι ταπεινέ τζενέν αλλά τζάλα κόντρα κο μπαρικανέ. (2 Σαμ. 22:​28) Οτθάρ, μουκχέλας ι Ντεβλέσκο νόμος τι αλλάνελ ο τρόπος σο σκεφτίνελας. Γραφιντάς: «Κα δοξάναβ ι Ιεχωβάς, σο ντινάς-μαν συμβουλές. Ατζέ-ντα ιράτ, ο σκέψεις σο ισί ντιπ αντρέ μάντε διορθώνενα-μαν».​—Ψαλμ. 16:7.

7. Σο κα κεράς άμα ισινάμ ταπεινοί;

⁷ Άμα ισινάμ ταπεινοί, κα μουκχάς ο Λάφι ι Ντεβλέσκο τι αλλάνελ ο λάθος πράγματα σο σκεφτίνασα για μα τι κεράς κάτι σο ισί λάθος. Ο Λάφι ι Ντεβλέσκο ισί σαρ τι ντέλα βίκος: «Ακαβά ισί ο ντρομ. Πφιρέν λέστε». Κα προειδοποιήνελ-αμέν κάνα νασάσα κατά ντρομ ντα τζάσα ακατάρ ή οκουτάρ. (Ησ. 30:​21) Άμα ασουνάσα ι Ιεχωβάς, κα βοηθίντιβας μπουτέ τροπόντζαρ. (Ησ. 48:​17) Για παράδειγμας, να κα χρειαζίντιβελ τι βακερέλ αμένγκε εκ γιαβέρ τζενό κάτι σο να κεράσα σωστά ντα αντικάς τι αβάς σε δύσκολη θέση. Ντα κα αβάς πιο πασέ κο Ιεχωβά σόσκε κα αγαβάς ότι πφαμπόλα αμένγκε σαρ εκ μπουτ λατσσό ντατ.​—Εβρ. 12:7.

8. Σαρ μπορίνασα τι χρησιμοποιήνας ο Λάφι ι Ντεβλέσκο σαρ ανιάς σαρ βακερένα ο εδάφια Ιακώβου 1:​22-25;

⁸ Ο Λάφι ι Ντεβλέσκο ισί σαρ ανιάς. (Διαβάνεν Ιακώβου 1:​22-25) Ο πιο μπουτ αμένταρ ντικχάσα-αμέν κο ανιάς κάθε πρωί πριν τι νικιάς κατά κχερ. Αντικάς, ντικχάσα άμα χρειαζίντιβελα τι αλλάνας κάτι πριν τι ντικχέν-αμέν ο γιαβερά. Ανταβά αβέλα-πες ι Γραφιάσαρ-ντα. Κάνα διαβάνασα-λα κάθε ντιβές, ντικχάσα σαρ τι αλλάνας οντουλά σο σκεφτίνασα ντα κεράσα. Κάτι σο βοηθίνελα μπουτέν ισί τι διαβάνεν ο εδάφιος ι ντιβεσέσκο κάθε πρωί πριν τι νασέν κατά κχερ. Μουκχένα ο λάφια σο διαβάνενα τι επηρεάνεν  οντουλά σο σκεφτίνενα. Σοράν, αντρέ κο ντιβές, ρόντενα τρόπους τι κερέν ι συμβουλή σο λιντέ κατά Λάφι ι Ντεβλέσκο. Επίσης, πρέπει κάθε ντιβές τι σικλιαράς-αμέν κατά Ντεβλέσκο Λάφι ντα τι σκεφτίνας λατσσές οντουλά σο σικλιάσα. Καζόμ απλός-ντα τι ντικχίντιβελα, ισί εκ κατά πιο σημαντικά πράγματα σο μπορίνασα τι κεράς για τι ατσσάς κο δύσκολος ντρομ σο γκερέλα κι ζωή.

9. Κάνα μπορεί τι χρειαζίντιβελ τι διορθώνελ-τουμέν εκ αμάλ;

⁹ Λιντέν ποτές εκ ντρομ σο γκερέλας-τουμέν ντουρ κατά Ιεχωβά; (Ψαλμ. 73:2, 3) Άμα εκ γκοντιαβέρ αμάλ αβιλό τι διορθώνελ-τουμέν, ασουντέν λέσκι συμβουλή; Άμα βα, κερντέν ο σωστός ντα σίγουρα ισινέν πφερντέ εκτίμηση σο αβιλό τι κερέλ τουμέντζαρ λάφι.​—Παρ. 1:5.

10. Σο πρέπει τι κερέν άμα εκ αμάλ κα βακερέλ τουμένγκε ότι κερντέν λάθος;

¹⁰ Ο Λάφι ι Ντεβλέσκο ανέλα αμαρέ γκοντιάτε ακαβά: «Ο πληγές εκχέ αμαλέσταρ σικαβένα ότι ισί πιστός». (Παρ. 27:6) Σο μανγκέλα τι βακερέλ ανταβά; Σκεφτίνεν ακαβά παράδειγμας: Ανέν τουμαρέ γκοντιάτε ότι καζόμ μπεκλεντίνενα τι νακχέν εκ ντρομ ντικχένα τουμαρέ κινητόστε. Τζάνα τι νακχέν ο ντρομ χωρίς τι βραντίνεν-τουμέν. Αζομάν εκ αμάλ ασταρέλα-τουμέν κατά μουσί ντα ταρτίνελα-τουμέν. Ασταρέλα-τουμέν αζόμ σικίς σο καλιαρέλα τουμαρί μουσί, αλλά ανταλέσαρ σο κερντάς να ντινάς-τουμέν αυτοκίνητος. Ατζέ-ντα άμα ντουκχάλα-τουμέν μπουτ ντιβεσά, μήπως κα χολιάνεν τουμαρέ αμαλέσκε σο ασταρντάς-τουμέν κατά μουσί; Σίγουρα όχι! Κα αβέν λέσκε πφερντέ εκτίμηση σο βοηθιντάς-τουμέν. Αντικάς, άμα εκ αμάλ κα βακερέλ τουμένγκε ότι οντουλά σο βακερένα ή κερένα νανέ αντικάς σαρ μανγκέλα ο Ντεβέλ, μπορεί κι αρχή τι στεναχωρίντιβεν. Αλλά μα χολιάνεν σο ντινάς-τουμέν συμβουλή ντα μα προσβαλίντιβεν. Ανταβά κα κερέλας-λες εκ τζενό σο να τθερέλα γκοντί. (Εκκλ. 7:9) Τι αβέν πφερντέ εκτίμηση σο αβιλό τουμαρό αμάλ για τι κερέλ τουμέντζαρ λάφι.

11. Σο κα μπορίνελας τι κερέλ εκχέ τζενές μα τι ασουνέλ εκ λατσσί συμβουλή εκχέ αμαλέσταρ;

¹¹ Σο κα μπορίνελας τι κερέλ εκχέ τζενές μα τι ασουνέλ εκ λατσσί συμβουλή εκχέ αμαλέσταρ σο μανγκέλα-λες; Ο μπαρικανιπέ. Ο μπαρικανέ τζενέ μανγκένα «τι γαλίνεν λένγκε κανά». Να μανγκένα «τι ασουνέν ι αλήθεια». (2 Τιμ. 4:3, 4) Αμντίνενα ότι βον ισί πιο γκοντιαβέρ ντα πιο σημαντικοί κατά γιαβερά. Όμως, ο απόστολος Παύλος γραφιντάς: «Άμα εκ τζενό αμντίνελα ότι ισί κάτι ενώ νανέ τίποτα, χουχαβέλα πο νεαυτός». (Γαλ. 6:3) Ο βασιλιάς Σολομών εξηγίνελα-λες μπουτ λατσσές ανταβά ακαλέ λαφίντζαρ: «Πιο λατσσές εκ τσορορό αλλά γκοντιαβέρ τσσαβό παρά εκ πφουρό αλλά ντινιλό βασιλιάς, σο νανέ αζόμ γκοντιαβέρ για τι ασουνέλ ι γιαβερένγκο λάφι».​—Εκκλ. 4:13.

12. Σο σικλιάσα κατά απόστολος Πέτρος σο λέσκο παράδειγμας ισί γραμμέ κο εδάφια Γαλάτες 2:​11-14;

¹² Ντικχέν ο παράδειγμας σο μουκχλάς ο απόστολος Πέτρος κάνα διορθωντάς-λες ανγκλάλ σαριλέντε ο απόστολος Παύλος. (Διαβάνεν Γαλάτες 2:​11-14) Ο Πέτρος κα μπορίνελας τι χολιάνελ ι Παυλόσκε άμα κα σκεφτίνελας σάντε σαρ ντα κάι κερντάς λέσαρ λάφι. Αλλά ο Πέτρος ισινέ γκοντιαβέρ. Ασουντάς ι Παυλόσκι συμβουλή ντα να ασταρντάς λέσκε χολί. Ντα πιο σοράν βακερντάς ότι ο Παύλος ισινέ εκ πφραλ σο μανγκέλας μπουτ.​—2 Πέτρ. 3:15.

13. Σο πρέπει τι ντας-αμέν γκοντί κάνα ντάσα εκ συμβουλή;

¹³ Άμα κα χρειαζίντιβελ τι ντεν συμβουλή εκχέ αμαλέστε, σο πρέπει τι ντεν-τουμέν γκοντί; Πριν τι κερέν λέσαρ λάφι, πουτσέν-τουμέν: “Μήπως αβάβα «μπουτ δίκαιος»;” (Εκκλ. 7:​16) Εκ τζενό σο ισί μπουτ δίκαιος κρίνελα ι γιαβερέν, όχι σαρ μανγκέλα ο Ιεχωβά, αλλά σαρ μανγκέλα βοβ, ντα μάλλον  να σικαβέλα μπουτ έλεος. Άμα σκεφτιντέν σόσκε μανγκένα τι ντεν τουμαρέ αμαλέστε συμβουλή ντα συνεχίνενα τι πακιάν ότι πρέπει τι κερέν-λες, βακερέν λέσκε καβά ισί ο πρόβλημας ντα κερέν λέσκε ερωτήσεις σο κα βοηθίνεν-λες τι αγαβέλ πο λάθος. Τι αβέν σίγουροι ότι οντουβά σο βακερένα ισί κατά Γραφή ντα τι ντεν-τουμέν γκοντί ότι τουμαρό αμάλ να κα ντελ λογαριασμός τουμέντε αλλά κο Ιεχωβά. (Ρωμ. 14:​10) Τι ντεν μπέσα κι σοφία σο ισί κο Λάφι κι Ντεβλέσκο ντα, κάνα ντένα συμβουλή εκχέ τζενέστε, τι τζιτζίνεν λέσκε σαρ ο Ιησούς. (Παρ. 3:5· Ματθ. 12:​20) Σόσκε; Επειδή ο Ιεχωβά κα συμπεριφερίντιβελ αμένγκε αντικάς σαρ συμπεριφερίντιβασα αμέν-ντα ι γιαβερένγκε.​—Ιακ. 2:13.

14. Σο ντέλα-αμέν η οργάνωση ι Ντεβλέσκι;

¹⁴ Ο Ιεχωβά γκερέλα-αμέν κο ντρομ κι ζωγιάκο αντράλ οντουλένταρ σο κερέλα λέσκι οργάνωση κι πφουβ. Η οργάνωση ντέλα-αμέν βίντεα, εκδόσεις ντα συναθροίσεις σο βοηθίνενα-αμέν τι κεράς ο συμβουλές σο ισί κο Λάφι κι Ντεβλέσκο. Σαρέ ανταλά ισί αντράλ κατά Γραφή. Κάνα ο Κυβερνών Σώμας αποφασίνελα καβά ισί ο πιο λατσσό τρόπος τι αβέλ-πες ο έργος, ντέλα μπέσα κο άγιος πνεύμας. Όμως, σκεφτίνελα πάλι ο αποφάσεις σο λιντάς για τι ντικχέλ άμα χρειαζίντιβελα τι κερέλ αλλαγές. Σόσκε; Επειδή «ανταβά ντουνιάς αλλάνελα», ντα η οργάνωση ι Ντεβλέσκι πρέπει τι κερέλ βόι-ντα μερικές αλλαγές.​—1 Κορ. 7:31.

15. Καγιά δυσκολία τθερένα μερικά πφραλά;

¹⁵ Σίγουρα, ντάσα καν κάνα η οργάνωση ι Ιεχωβάσκι αλλάνελα ο τρόπος σο αγαβάσα μερικά πράγματα σο βακερέλα η Γραφή ή ντέλα-αμέν συμβουλές σο ατσσικιαρένα πάκι αμαρί ζωή. Αλλά σο κεράσα κάνα κερέλα εκ αλλαγή σο τθερέλα τι κερέλ γιαβερέ πραγματέντζαρ αμαρέ ζωγιάτε; Για παράδειγμας, ακανά τελευταία έπρεπε τι χαλαβάς πιο μπουτ λοβέ για τι χτίνας ντα τι λατσσαράς ο τθανά σο ντάσα λατρεία. Οτθάρ, ο Κυβερνών Σώμας βακερντάς τι χρησιμοποιήντιβεν σαρέ ο θέσεις κο Αίθουσες Βασιλείας. Αντικάς, μερικά κχανγκιριά αβιλέ γιεκ γιαβερέντζαρ ντα μερικές Αίθουσες Βασιλείας μπικίντιλε. Ο λοβέ σο ατσσόνα ντάσα-λεν για τι λατσσάρντιβεν αίθουσες τθανέντε σο τθερένα-λεν πιο μπαρί ανάγκη. Άμα τουμαρέ τθανέστε μπικίντιβενα αίθουσες ντα κχανγκιριά αβένα γιεκ γιαβερέντζαρ, μπορεί τι αβέλ τουμένγκε δύσκολος τι συνηθίνεν κο νεβέ πράγματα. Μερικά πφραλά ακανά πρέπει τι κερέν πιο μπουτ  ντρομ για τι τζαν κι συνάθροιση. Γιαβερά σο κερντέ μπουτ μπουτί για τι χτίντιβελ ή τι λατσσάρντιβελ εκ Αίθουσα Βασιλείας μπορεί τι σκεφτίνενα σόσκε τι μπικίντιβελ ακανά ανταγιά αίθουσα. Μπορεί τι νιωθίνενα ότι σινανέ ντινέ αζόμ μπουτ πουμαρέ σαατίσταρ ντα πουμαρέ ζοριάταρ. Αλλά ντένα καν οντουλέντε σο βακερέλα η οργάνωση ντα αξίνενα ισαριπέ.

16. Σαρ κα ατσσικιαράς αμαρί χαρά άμα κεράσα ι συμβουλή ι εδαφιόνγκι Κολοσσαείς 3:​23, 24;

¹⁶ Κα ατσσικιαράς αμαρί χαρά άμα ντάσα-αμέν γκοντί ότι κεράσα έργος ι Ιεχωβάσκε ντα ότι βοβ οδηγίνελα πι οργάνωση. (Διαβάνεν Κολοσσαείς 3:​23, 24) Ο βασιλιάς Δαβίδ μουκχλάς λατσσό παράδειγμας κάνα ντινάς λοβέ για τι χτίντιβελ ο ναός. Βακερντάς: «Κον ισινόμ με ντα κον ισί μο λαός για τι μπορίνας τι ντας πράγματα αντράλ αμαρέ γκίσταρ σαρ ισί ανταλά; Σαρέ ο πράγματα ισί τούταρ, ντα σο-ντα ντινάμ τούτε αβέλα τι βαστέσταρ». (1 Χρον. 29:​14) Κάνα ντάσα λοβέ, ντάσα αμέν-ντα κο Ιεχωβά οντουβά σο αβέλα λέσκε βαστέσταρ. Αλλά ο Ιεχωβά εκτιμίνελα ο σαάτι, ι ζορ ντα ο λοβέ σο ντάσα για τι αβέλ-πες λέσκο έργος.​—2 Κορ. 9:7.

17. Σόσκε δεν πρέπει τι χασαρέν τουμαρί ζορ άμα κα αγαβέν ότι πρέπει τι τσσουβέν κο λατσσό ντρομ τουμαρέ βήματα;

¹⁷ Για τι ατσσάς κο δύσκολος ντρομ σο γκερέλα κι ζωή, σαρέ πρέπει τι ακολουθίνας ι Ιησούσκε βήματα πιστά. (1 Πέτρ. 2:​21) Άμα κα αγαβέν ότι πρέπει τι τσσουβέν κο λατσσό ντρομ τουμαρέ βήματα, μα χασαρέν τουμαρί ζορ. Ανταβά μπορεί τι αβέλ λατσσό σημάδι, σόσκε σικαβέλα ότι μανγκένα τι κερέν οντουβά σο βακερέλα ο Ιεχωβά. Τι ντεν-τουμέν γκοντί ότι ο Ιεχωβά να μπεκλεντίνελα αμένταρ​—σο ισινάμ ατελείς—​τι κεράς τέλεια οντουβά σο κερντάς ο Ιησούς.

18. Σο πρέπει τι κεράς για τι ερεσάς οτθέ σο μανγκάσα;

¹⁸ Τι ντικχάς ανγκλάλ ντα τι μανγκάς τι αλλάνας οντουλά σο σκεφτίνασα, οντουλά σο μπεϊντίνασα ντα ο πράγματα σο κεράσα. (Παρ. 4:​25· Λουκ. 9:​62) Τι ατσσάς ταπεινοί, “μα τι τσσιναβάς τι χαιρίνας, τι τσσουβάς-αμέν κο λατσσό ντρομ”. (2 Κορ. 13:​11) Άμα κεράσα-λες ανταβά, «ο Ντεβέλ σο σικαβέλα αγάπη ντα ειρήνη κα αβέλ [αμέντζαρ]». Αντικάς, όχι σάντε κα ερεσάς κο τθαν σο μανγκάσα, αλλά κα μπεϊντίνας-ντα ο ταξίδι σο κα κεράς μέχρι τι ερεσάς οτθέ.