1. Hi ku ya hi Mattheo 7:13, 14, ha yini nga hlayaka leswaku hi le liyendzrweni?

HINKWEZRU hi le ku yendzreni. Nkongometo wezru i ku tlhasa a misaveni leyimpswha lani hi taka fumiwa hi Yehovha, Xikwembu Nkulukumba wa lizrandzru. Siku dzrin’wana ni dzrin’wana hi dzringisa ku famba a ndleleni leyi yisaka a wuton’wini. Kambe hi lani Yesu a hlayiki ha kone, a ndlela leyo yi khumile nakone swa kazrata ku famba ka yone. (Dondzra Mattheo 7:13, 14.) Leswi hi kalaka hi nga hetisekanga, swa nabyala ku va hi hambuka a ndleleni leyo.​—Ga 6:1.

2. Hi ta bula hi yini ka nhlokomhaka leyi? (Tlhela u vona bokisi ledzri liki “Ku Titsrongahata Swi Hi Pfuna Ku Tama Hi Famba A Ndleleni Leya Ku Khuma”.)

² Loko hi djula ku tama hi famba a ndleleni leya ku khuma leyi yisaka a wuton’wini, hi fanela ku tiyimisela ku txintxa mapimisela yezru, matitwela yezru ni swiyentxo swezru. Mupostola Pawulo a kutxe vakriste va le Korinte akuva va tama yentxa ku txintxa. (2Ko 13:11) Xitsratsriyo lexo xa tizra ni ka hine namunhla. Ka nhlokomhaka leyi hi ta dondzra ndlela leyi Bibele dzri nga hi pfunaka ha yone akuva hi yentxa ku txintxa ni ndlela leyi vamakwezru lava wupfiki va nga hi pfunaka ha yone akuva hi tama hi famba a ndleleni ya wutomi. Hi ta tlhela hi vona leswaku hi kwini lani swi nga ha hi kazratelaka ku landzra nkongomiso wa nhlengeletanu ya Yehovha. Hi ta tlhela hi vona ndlela leyi ku titsrongahata swi nga hi pfunaka ha yone akuva hi tama hi tizrela Yehovha na hi nyonxile nambi loko hi yentxa ku txintxa ka kukazri.

3. Xana Zritu dzra Xikwembu Nkulukumba dzri nga ku pfuna hi ndlela yini?

³ Swi nga ha hi kazratela ku kambisisa mapimisela ni matitwela yezru. Ha yini? Hikusa mbilu yezru ya kanganyisa, nakone minkama yin’wana swa kazrata ku vona lomu yi hi yisaka kone. (Yr 17:9) Swa nabyala akuva hi tikanganyisa. (Yk 1:22) Xileswo, hi fanela ku tizrisa Zritu dzra Xikwembu Nkulukumba akuva hi tikambela.  Dzrone dzri paluxa ‘makungu ni miyanakanyu’ leyi nga ndzrenindzreni kwezru. (Hb 4:12, 13) Hi ndlela leyo, Zritu dzra Xikwembu Nkulukumba dzri fana ni mutxhini wa ku hamba raio-X, lowu wu hi pfunaka ku vona mintxhumu leyi nga vonekiki leyi nga ndzreni kwezru. Kambe hi fanela ku titsrongahata akuva hi yamukela swilayu leswi hi swi kumaka a Bibeleni kumbe leswi hi nyikiwaka swone hi lava Xikwembu Nkulukumba a va tizrisaka.

4. I yini leswi kombisaka leswaku Hosi Sawulo a ndzruluke wanuna wa ku tikulisa?

⁴ Leswi yentxekeliki Hosi Sawulo swi hi komba leswi nga yentxekaka loko hi nga titsrongahati. Sawulo a sungule ku tikulisa lakakuva a yala leswaku a a fanela ku lulamisa mapimisela ni swiyentxo swakwe. (Ps 36:1, 2; Hb 2:4) Hi xikombiso, loko Yehovha a byele Sawulo leswi a a fanela ku swi yentxa ntsrhaku ka ku hlula va-Amaleki, Sawulo a nga mu yingisetanga. Nakone loko muprofeta Samuwele a khanele na yene hi mhaka leyo, Sawulo a nga pfumelanga xihoxo xakwe. A matsrhan’wini ya leswo, a dzringise ku tiyimelela ni ku hlaya leswaku a swi nga li swa ntxhumu a tlhela a txukumetela nandzru ka vambeni. (1Sa 15:13-24) Phela Sawulo a wo phindha ku yentxa leswo. (1Sa 13:10-14) Swa vavisa ku vona leswaku a pfumeleli mbilu yakwe yi tikulisa. Leswi a kalaka a nga txintxanga mapimisela yakwe, Yehovha a nga ha mu yamukelanga.

5. Hi nga dondzra yini ka xikombiso xa Hosi Sawulo?

⁵ A hi swi djuli ku fana na Sawulo. Xileswo, hi fanela ku tivutisa leswi: ‘Loko ni kuma xilayu xa kukazri a Zritwini dzra Xikwembu Nkulukumba, xana ni talisa ku tiyimelela? Xana ni talisa ku pimisa leswaku leswi ni swi yentxaka a hi swa ntxhumu? Xana ni txukumetela nandzru ka vambeni?’ Loko nhlamulo yezru ka xin’we xa swivutiso leswi ku li ina, hi fanela ku txintxa mapimisela yezru ni swiyentxo swezru. Loko hi nga yentxi leswo, mbilu yezru yi nga ha tikulisa lakakuva Yehovha a nga ha hi yamukeli swanga vanghanu vakwe.​—Yk 4:6.

6. He kwini ku hambana loku nga kone a xikazri ka Hosi Sawulo na Hosi Davhida?

⁶ Vona ku hambana loku nga kone a xikazri ka Hosi Sawulo na Hosi Davhida, wanuna lweyi a a zrandzra ‘nawu wa Yehovha’. (Ps 1:1-3) Davhida a a swi tiva leswaku Yehovha a huluxa lava titsrongahataka a venga lava tikulisaka. (2Sa 22:28) Xileswo, Davhida a pfumeleli nawu wa Xikwembu Nkulukumba wu mu pfuna ku lulamisa mapimisela yakwe. Yene a tsrale leswi: ‘Ndzri ta twalisa Yehovha, hikusa a vi mutlhavukanyisi wanga; Ni le wusikwini a mbilu yanga yi ndzri mamulela.’​—Ps 16:7.

7. I yini leswi hi taka swi yentxa loko hi titsrongahata?

⁷ Loko hi titsrongahata, hi ta pfumelela Zritu dzra Xikwembu Nkulukumba dzri hi pfuna ku lulamisa mimpimiso yezru ya ku biha na hi nga si na doha. Bibele dzri ta fana ni zritu ledzri hi byelaka leswi: ‘Ndlela hi leyi, fambani hi yone.’ Dzrone dzri ta hi basopisa loko hi sungula ku yentxa mintxhumu leyi hoxekiki. (Eza 30:21) Hi ku yingiseta Yehovha, hi ta pfuneka hi tindlela tinyingi. (Eza 48:17) Hi xikombiso, a swi nge ti vilela leswaku mhunu mun’wana a hi lulamisa, nakone leswo swi ta hi pfuna akuva hi nga daniseki. Nakone hi ta ya hi tsrhindzrekela kusuhi na Yehovha hikusa ha swi tiva leswaku yene a hi khoma swanga vanakwe lava zrandzrekaka.​—Hb 12:7.

8. Hi lani swi kombisiwiki ha kone ka Yakob 1:22-25, hi nga dzri tizrisa hi ndlela yini Zritu dzra Xikwembu Nkulukumba swanga xivonivoni?

⁸ Zritu dzra Xikwembu Nkulukumba dzri nga tizra swanga xivonivoni ka hine. (Dondzra Yakob 1:22-25.) Ku tala kwezru ha tilangusa ka xipelhu mixo wun’wana ni wun’wana na hi nga si na suka kaya. Hi ndlela leyo, hi nga vona leswi hi fanelaka ku swi lulamisa na van’wana va nga si na hi vona. Hi ku fanana loko hi dondzra Bibele siku ni siku, hi ta vona tindlela leti hi nga lulamisaka ha tone mapimisela yezru ni swiyentxo swezru. Vanyingi va swi vona na swi pfuna ku dondzra tsralwa dzra siku na va nga si na suka kaya. Va pfumelela leswi va swi dondzraka swi khumba  mapimisela yavu. Kutani loko siku dzri ya dzri famba, va vona tindlela ta ku tizrisa leswi va swi dondzriki a Zritwini dzra Xikwembu Nkulukumba. Ku yengetela ka leswo, hinkwezru hi fanela ku va ni xiyimiso xa ku dondzra lexi patsraka ku dondzra ni ku yanakanyisisa hi Zritu dzra Xikwembu Nkulukumba siku ni siku. Leswo swi nga tikomba ingiki i ntxhumu wutsrongo, kambe i wun’we wa mintxhumu leyi nga hi pfunaka akuva hi tama hi famba a ndleleni leya ku khuma leyi yisaka wuton’wini.

9. Xana munghanu waku a nga ha ku lulamisa loko swi te yini?

⁹ Xana wa same u yentxa mintxhumu leyi a yi hona wuxaka byaku na Yehovha? (Ps 73:2, 3) Loko munghanu waku hi xixixi a ku lulamisile, xana u mu yingisetile u va u yentxa leswi a ku byeliki swone? Loko swi li tanu, u yentxe ntxhumu wa ku xonga ngopfu swinene. Nakone handle ka ku ganaganeka, u nyonxe ngopfu swinene hi leswi munghanu waku a ku pfuniki.​—Pr 1:5.

10. Xana u fanela ku yentxa yini loko munghanu waku a ku lulamisa?

¹⁰ Zritu dzra Xikwembu Nkulukumba dzri hi dzrimuxa leswi: ‘A timbanga leti yentxiwiki hi nakulobye ti kombisa lizrandzru lakwe.’ (Pr 27:6) Xana leswo swi tlhamuxela yini? Vona xikombiso lexi: A hi nge u djula ku tsremakanya xitaratu lexi taliki hi mimovha. Nakone wa dzrivateka hi ku deketela telefone dzraku. Kutani u sungula ku tsremakanya na u nga langusanga a matlhelweni. Hi nkama wolowo, munghanu waku a buya hi ku kahlula a ku khoma voko a ku koka. Yene a ku koka hi ntamu hinkwawu lakakuva a voko dzraku dzri tsrinyaka, kambe swoleswo swi ku huluxile akuva u nga biwi hi movha. Nambi loko a wo tama u twa ku vavisa hi masiku ya kukazri, xana a wu ta tsrhama na u mu kwatelile hi leswi a ku kokiki? Handle ka ku ganaganeka a wu nge ti mu kwatela! A wu ta nyonxa hi leswi a ku pfuniki. Hi ndlela leyi fanaka, loko munghanu waku a ku basopisa hi mhaka ya leswi u swi hlayiki kumbe u swi yentxiki, leswi nga fambisanikiki ni milawu ya Yehovha ya ku lulama, u nga ha vaviseka a ku sunguleni. Kambe u nga kwati kumbe u khunguvanyeka. Ku yentxa leswo a swi ta kombisa ku pfumala wutlhazri. (Ekl 7:9) A matsrhan’wini ya ku kwata, tlangela hi leswi munghanu waku a viki ni xixixi xa ku khanela na wene.

11. I yini leswi nga yentxaka mhunu a yala xilayu lexinene lexi a nyikiwaka xone hi munghanu wakwe?

¹¹ I yini leswi nga yentxaka mhunu a yala xilayu lexinene lexi pfaka ka munghanu lweyi a nga ni lizrandzru? I ku tikulisa. Vhanu lava tikulisaka va zrandzra ku ‘nyonxisiwa tindleve’. Va ‘fulazrisa tindleve tavu a xihlayelamfuzrini’. (2Tm 4:3, 4) Vhanu lava tikulisaka va tivona na va tlhazrihile kumbe na va li va lisima ku tlula vambeni. Nambitanu, mupostola Pawulo a tsrale a ku: ‘Loko mhunu a tipimisa leswaku i ntxhumu, a nge ntxhumu wa ntxhumu, a ku tikanganyisa.’ (Ga 6:3) Hosi Solomomi a hi tlhamuxele ha hombe mhaka leyo. A tsrale leswi: ‘A ndzrisanyana wa xisiwana ni wa ku tlhazriha a tlula hosi leyi duhwaliki leyi phuntiki, leyi nge heke na ku yingela tlhavukanyisiwo.’​—Ekl 4:13.

12. Hi ku ya hi Ba-le-Galatia 2:11-14, xana hi dondzra yini ka xikombiso xa mupostola Petro?

¹² Vona xikombiso lexinene lexi hi bekeliwiki xone hi mupostola Petro. Nkama lowu a khwaveliwiki hi mupostola Pawulo a mahlweni ka vhanu vambeni. (Dondzra Ba-le-Galatia 2:11-14.) Petro a a ta va a kwatele Pawulo hi mhaka ya leswi a swi hlayiki na va li mahlweni ka vhanu vambeni. Kambe Petro a a tlhazrihile. Yene a xi yamukelile xilayu nakone a nga mu kwatelanga mfuzri a nga mu hlundzrukelanga Pawulo. A matsrhan’wini ya leswo, yene a tlhele a hlaya leswaku ‘Pawulo a a li makwezru lweyi a zrandzriwaka’.​—2Pe 3:15.

13. I yini leswi hi fanelaka ku swa dzrimuka na hi nga si nyikela xilayu xa kukazri?

¹³ Loko u djula ku nyika xilayu munghanu waku, i yini leswi u fanelaka ku swi dzrimuka? Na u nge si na vulavula ni munghanu waku, tivutise: ‘Xana ni tiyentxa lweyi a tlhazrihiki ku tlulisa?’  (Ekl 7:16) Mhunu lweyi a tlhazrihiki ku tlulisa a yavanyisa vambeni ku nga li hi ku ya milawu ya Yehovha kambe hi milawu yakwe. Nakone hakanyingi a nga kombisi timpswalu. Loko ntsrhaku ka ku tikambela u tama u vona leswaku u fanela ku ya khanela ni munghanu waku, djula ku tiva leswaku xikazratu xa kone hi xini. Mu hambe swivutiso leswi taka mu pfuna leswaku a swi vona ha byakwe lani a fanelaka ku yampswisa kone. Tiyiseka leswaku leswi u swi hlayaka swi seketeliwi a Matsralweni na wu dzrimuka leswaku a munghanu waku a ta tihlamulela ka Yehovha ku nga li ku wene. (Ro 14:10) Tizrisa wutlhazri lebyi nga Zritwini dzra Xikwembu Nkulukumba nakone yetisela ntwelawusiwana wa Yesu loko u nyika mhunu xilayu. (Pr 3:5; Mt 12:20) Ha yini? Hikusa Yehovha a ta hi khoma hi ndlela leyi fanaka ni leyi hi khomaka van’wana ha yone.​—Yk 2:13.

14. I yini leswi nhlengeletanu ya Xikwembu Nkulukumba yi hi nyikaka swone?

¹⁴ Yehovha a hi kongomisa a ndleleni ya wutomi hi ku tizrisa xiyenge xa nhlengeletanu yakwe xa lani misaveni, lexi hi nyikaka mabuku, ma-vídeo ni mintlhanganu leyi hi pfunaka ku tizrisa swilayu leswi kumekaka a Zritwini dzra Xikwembu Nkulukumba. Hi nga dumba hinkwaswu leswi xi hi nyikaka swone hikusa swi seketeliwe a Matsralweni. Loko vamakwezru va Huvo leyi Zrangelaka va djula ku teka swiboho swa ndlela leyi ntizro wa ku zrezra wu nga yentxiwaka ha yone, va kombela mpfunu wa moya wa ku xwenga. Nambi swi li tanu, vamakwezru va Huvo leyi Zrangelaka nkama ni nkama va pfuxeta swiboho leswi va swi tekiki mayelanu ni ndlela leyi ntizro wa ku zrezra wu nga yentxiwaka ha yone. Ha yini va yentxa leswo? Hikusa ‘mavonekela ya misava leyi ma khaluta kumbe ma txintxa’, nakone nhlengeletanu ya Xikwembu Nkulukumba yi fanela ku titwananisa ni swiyimu leswimpswha.​—1Ko 7:31.

15. Hi xini swikazratu leswi vazrezri van’wana va kumaniki na swone?

¹⁵ Loko nhlengeletanu ya Xikwembu Nkulukumba yi hi nyika ntlhamuxelo lowumpswha wa matsralwa kumbe wu hi nyika nkongomiso wa mahanyela, hi ku kahlula ha wu yamukela hi tlhela hi wu landzra. Kambe hi yangulisa kuyini loko ku tekiwa swiboho swin’wana leswi khumbaka wutomi byezru hi ku kongoma? Hi xikombiso, ka malembenyana ya swoswi madixpeza ya ku yaka ni ku hlayisa mimbangu ya wugandzreli ma yengetelekile ngopfu swinene. Xileswo, Huvo leyi Zrangelaka yi nyikele nkongomiso wa leswaku Tiyindlu ta Mfumu ti tizrisiwa ha hombe. Ku txintxa koloko ku yentxe leswaku mabandla manyingi ma tizrisa Tiyindlu ta Mfumu leta tin’we nakone Tiyindlu  timbeni ta Mfumu ti xavisiwile. Mali ya kone yi tizrisiwa akuva ku yakiwa Tiyindlu ta Mfumu a mimbangwini leyi ti vilelekaka ngopfu. Loko wu tsrhama a mbangwini lowu Tiyindlu ta Mfumu ti xavisiwiki ni lomu mabandla ma patsriwaka ka Yindlu yin’we ya Mfumu, u nga ha swi vona na swi kazrata ku titwananisa ni swiyimu leswimpswha. Vazrezri van’wana swoswi va famba mpfhuka wa ku leha akuva va ya mintlhanganwini. Van’wana lava tizriki ngopfu akuva va yaka kumbe ku hlayisa Yindlu ya Mfumu va nga ha tivutisa leswaku ha yini swoswi yi xavisiwa. Va nga ha vona leswaku a nkama wavu ni ku tikazrata kwavu a swi pfunaka ntxhumu. Nambitanu va ma yamukela malulamiselo lamampswha nakone va fanela ku kulungeliwa hi mhaka ya leswo.

16. Hi kuya hi 2 Ba-le-Korinte 6:1, i yini swi taka hi pfuna ku tama hi ya mahlweni hi tsrhava?

¹⁶ Hi ta tama hi tsrhava loko hi dzrimuka leswaku hi tizrela Yehovha nakone hi yene a kongomisaka nhlengeletanu yakwe. (Dondzra 2 Ba-le-Korinte 6:1.) Hosi Davhida a hi bekele xikombiso lexinene. A humexe leswi a swi vileleka akuva ku yakiwa tempele. Yene a te: ‘Kambe ndzri mani xana ni tiko dzranga hi dzrini xana akuva hi tiva ku humexa hi ku swi zrandzra swa ku nhati? Hikusa hinkwaswu swi huma ku wene. Kutani hi ku humexele a swaku.’ (1Mk 29:14) Loko hi nyikela swihanano, na hine hi nyika Yehovha leswi a hi nyikiki swone. Nambitanu, Yehovha awa wu tlangela nkama, ntamu, ni mintxhumu leyi hi yi humexiki akuva hi seketela ntizro wakwe.​—2Ko 9:7.

17. Ha yini hi nga fanelanga ku hela ntamu loko hi xiya leswaku hi fanela ku lulamisa swa kukazri?

¹⁷ Akuva hi tama hi famba a ndleleni ya xihlayelamfuzri, hinkwezru hi fanela ku landzra mintila ya Yesu hi le kusuhi. (1Pe 2:21) Loko u xiya leswaku u fanela ku lulamisa xa kukazri, u nga heli ntamu. Ku pfumela leswaku u fanela ku lulamisa, swi kombisa leswaku u djula ku landzra kongomiso wa Yehovha. Dzrimuka leswaku Yehovha a nga yimeli leswaku hine vhanu va ku kala ku hetiseka hi kota ku yetisela mintila ya Yesu hi ndlela leyi hetisekiki.

18. I yini leswi hi fanelaka ku swi yentxa akuva hi heta liyendzro dzrezru?

¹⁸ Ingiki hinkwezru hi nga tama hi langusisa misaveni leyimpswha, lani hi yaka kone, na hi tibekiseli ku lulamisa mapimisela yezru ni ku txintxa matitwela ni swiyentxo swezru. (Pr 4:25; Lk 9:62) A hi tameni hi titsrongahata, hi ya ‘mahlweni hi hetiseka kumbe hi yentxa ku txintxa’. (2Ko 13:11) Loko hi yentxa leswo, Xikwembu Nkulukumba wa lizrandzru a ta tama a va na hine. Yene a ta hi pfuna leswaku hi tsrhava swoswi a tlhela a hi nyika wutomi a misaveni leyimpswha.