1. E tusa ai o le Mataio 7:13, 14, aiseā e tatou te faapea atu ai o loo tatou iai i se faigāmalaga?

O LOO tatou iai uma i se faigāmalaga. O le nofoaga e tatou te taunuu i ai po o lo tatou sini, o le ola lea i le lalolagi fou i lalo o le pulega alofa a Ieova. I aso taʻitasi e tatou te taumafai e mulimuli i le ala e tau atu i le ola. Ae na fetalai Iesu e lauitiiti le auala, ma e iai taimi e faigatā ona mulimuli i ai. (Faitau le Mataio 7:13, 14.) Ona e tatou te lē lelei atoatoa, e faigofie la iā i tatou ona ō ese mai i lenā auala.​—Kala. 6:1.

2. O le ā o le a tatou talanoaina i lenei suʻesuʻega? (Tagaʻi i le pusa “ O le Lotomaulalo e Fesoasoani iā i Tatou e Faaauau ai Pea Ona Faia Suiga.”)

² Pe a tatou fia savavali pea i le auala lauitiiti e tau atu i le ola, e tatau ona tatou lotomalilie e faaauau ona faia suiga i o tatou mafaufauga, uiga ma gaoioiga. Na faalaeiau e le aposetolo o Paulo Kerisiano na nonofo i Korinito, ina ia faaauau pea ʻona toe faasaʻo o latou manatu.’ (2 Kori. 13:11) E faatatau foʻi iā i tatou lenā fautuaga. I lenei suʻesuʻega, o le a talanoaina ai le auala e fesoasoani ai le Tusi Paia iā i tatou e faaauau ona faia suiga, ma le auala e fesoasoani mai ai uō taʻumatuaina ina ia tatou iai pea i le ala i le ola. O le a tatou talanoaina ai foʻi le taimi e ono faigatā ai ona tatou mulimuli i taʻiala mai i le faalapotopotoga a Ieova. O le a tatou aʻoaʻoina ai foʻi le auala e fesoasoani ai le lotomaulalo iā i tatou e faia suiga, e aunoa ma le aveesea ai o lo tatou olioli e auauna iā Ieova.

3. O le ā e mafai ona fai e le Afioga a le Atua mo oe?

³ E tatou te fesagaʻia se luʻi pe a tatou taumafai e iloilo o tatou mafaufauga ma faalogona. Ona e faaʻoleʻole o tatou loto, e faigatā ai la ona iloa le mea e taʻitaʻia ai i tatou e o tatou loto.  (Iere. 17:9) E faigofie lava ona faasesēina i tatou i “manatu sesē.” (Iako. 1:22) O lea la, e manaʻomia ona tatou faaaogāina le Afioga a le Atua e iloilo ai i tatou lava. E mafai e le Afioga a le Atua ona faaalia mai le ituaiga tagata moni lava e iai i tatou, o “manatu ma faanaunauga” lilo o tatou loto. (Epe. 4:12, 13) E tai pei le Afioga a le Atua o se masini e fai ai faata lea e mafai ona tatou iloa ai totonu o tatou tino. Peitaʻi e tatau ona tatou lotomaulalo, ina ia aogā ai iā i tatou fautuaga mai i le Tusi Paia pe e mai i sui o le Atua.

4. O le ā e iloa ai na iʻu ina avea le tupu o Saulo o se tagata faamaualuga?

⁴ O le faaaʻoaʻoga leaga a le tupu o Saulo, ua faaalia ai le mea e oo iā i tatou pe a tatou lē lotomaulalo. O le faamaualuga o Saulo, na musu ai e taʻutino mai, pe taʻutino foʻi iā te ia lava, e manaʻomia ona suia ona mafaufauga ma ana gaoioiga. (Sala. 36:1, 2; Sapa. 2:4) Na faamaonia le moni o lenei mea, ina ua avatu e Ieova iā Saulo faatonuga patino i le mea e tatau ona ia faia pe a ia faatoʻilaloina tagata Ameleka. Peitaʻi, e leʻi usitaʻi Saulo iā Ieova. Ae ina ua talanoa atu i ai Samuelu i lona lē usitaʻi, e leʻi taʻutino mai e Saulo lona faia o se mea sesē. Ae na ia taumafai e taʻutonuina ana gaoioiga e ala i lona manatu māmā i āuga o lona lē usitaʻi ma na ia tuuaʻia isi. (1 Samu. 15:13-24) I se taimi muamua atu, na faaalia ai foʻi e Saulo lenā uiga. (1 Samu. 13:10-14) O se mea e faanoanoa ai, ona na faataga e Saulo lona loto e faamaualuga. E na te leʻi faia se suiga e faasaʻo ona mafaufauga, o lea na aʻoaʻia ai o ia e Ieova ma teena o ia.

5. O le ā e tatou te aʻoaʻoina mai i le mea na tupu iā Saulo?

⁵ E tatou te lē mananaʻo e pei o le tupu o Saulo, o lea, e tatau ona tatou fesili ifo i fesili nei: ʻPe a ou faitau i fautuaga mai i le Afioga a le Atua, po ou te taumafai e fai faamolemolega ina ia ou lē usitaʻia ai na fautuaga? Po ou te manatu māmā i āuga o loʻu lē usiusitaʻi? Po ou te tuuaʻia isi ona o aʻu gaoioiga?’ Pe afai o le ioe lau tali i se tasi o na fesili, e tatau la ona suia o tatou mafaufauga ma uiga. Pe a tatou lē faia faapea, o le a iʻu ai ina matuā faamaualuga o tatou loto, ma teena ai e Ieova i tatou o ni ana uō.​—Iako. 4:6.

6. Ia faamatala le eseesega o le tupu o Saulo ma le tupu o Tavita?

⁶ Ia mātau le eseesega o le tupu o Saulo ma le tupu na sosoo ane iā te ia o Tavita, o se tasi na fiafia i le “tulafono a Ieova.” (Sala. 1:1-3) Na iloa e Tavita, e faaolaina e Ieova i latou o ē lotomaulalo, ae e na te teena ē e faamaualuluga. (2 Samu. 22:28) O lea, na faataga ai e Tavita le tulafono a le Atua, e faia suiga i ona mafaufauga. Na ia tusi: “Ou te vivii atu iā Ieova o lē na fautuaina aʻu. Ma i le pō e faasaʻoina ai aʻu e oʻu manatunatuga loloto.”​—Sala. 16:7.

7. O le ā e tatou te faia pe a lotomaulalo?

⁷ Pe a tatou lotomaulalo, o le a tatou faatagaina le Afioga a le Atua e faasaʻo o tatou mafaufauga sesē, a o leʻi oo ina tatou faia ni gaoioiga sesē. E pei le Afioga a le Atua o se leo o loo taʻu mai iā i tatou: “O le ala lenei. Ia outou savavali ai.” O lea, e lapataʻia i tatou e le Afioga a le Atua pe a tatou sē ese mai i le ala saʻo. (Isa. 30:21) E tatou te maua le tele o aogā pe a tatou faalogo iā Ieova. (Isa. 48:17) O se faataʻitaʻiga, e tatou te ʻalofia ai le faalumaina ona ua faasaʻo i tatou e se tasi. O le a tatou vavalalata atu ai foʻi iā Ieova, ona ua tatou iloa o loo ia feutagaʻi ma i tatou o se fanau pele.​—Epe. 12:7.

8. E pei ona taʻua i le Iakopo 1:22-25, e faapefea ona tatou faaaogāina le Afioga a le Atua o se faata?

⁸ E tai pei foʻi le Afioga a le Atua o se faata. (Faitau le Iakopo 1:22-25.) O le toʻatele o i tatou, e tilotilo muamua i le faata i taeao uma a o leʻi tuua le fale. O le faia faapea, e mafai ai ona tatou iloa suiga e manaʻomia ona fai i o  tatou foliga vaaia a o leʻi iloa mai e isi. E faapena foʻi pe a tatou faitauina le Tusi Paia i aso uma, o le a tatou iloa ai auala e faia ai suiga i o tatou mafaufauga ma uiga. E toʻatele ua iloa le aogā o le faitau o le mau i taeao taʻitasi a o leʻi tuua le fale. E latou te faatagaina mea ua latou faitau i ai e suia ai o latou mafaufauga. A o faagasolo le aso, e latou te saʻilia auala e faatatau ai fautuaga mai i le Afioga a le Atua. E tatau foʻi ona iai se faasologa o le faia o suʻesuʻega a le tagata lava ia, e aofia ai le faitauina o le Afioga a le Atua ma manatunatu loloto i ai i aso taʻitasi. E ui e foliga e faigofie ona fai nei mea, ae e lē tatau ona tatou manatu māmā i ai. Talu ai ona o nisi nei o mea e sili ona tāua e tatau ona tatou faia, ina ia fesoasoani iā i tatou e savavali pea i le auala lauitiiti lea e tau atu i le ola.

9. O le ā le taimi e ono faasaʻo ai oe e sau uō?

⁹ Pe na iai se taimi na amata ai ona e savali i se ala e taʻitaʻia ese ai oe mai iā Ieova? (Sala. 73:2, 3) Pe afai na lototele se uō taʻumatuaina e faasaʻo oe, pe na e faalogo iā te ia ma faatatau lana fautuaga? Afai na e faia, na e faia la le mea saʻo. E mautinoa lou matuā lotofaafetai ina ua lapataʻia oe e lau uō.​—Faata. 1:5.

10. O le ā le auala e te tali atu ai pe a faasaʻo oe e sau uō?

¹⁰ Ua faamanatu mai e le Afioga a le Atua iā i tatou: “O le manuʻa mai i lē e alofa, e faamaoni ia.” (Faata. 27:6) O le ā le uiga o lenei faamatalaga? Seʻi manatu i le faataʻitaʻiga lenei: Seʻi faapea o loo e taumafai e kolosi se auala pisi, ae faafuaseʻi ona tatagi lau telefoni. Ua mua ona alu lou mafaufau i lau telefoni, a o e kolosi i le auala. Ae o le taimi lava lenā na mau ai lau uō i lou lima, ma toso mai oe i tua. Na totoulia lou lima ona o le malosi tele o lana uu, ae o le vave o lana gaoioi na faasaoina mai ai oe i le lavea i le taavale. E tusa lava pe totoulia lou lima ma tigā ai mo ni aso ona o le gaoioiga na faia e lau uō, ae po o le a e ita ai ona ua toso ese oe e lau uō mai i le auala? E mautinoa e leai! E te matuā lotofaafetai i lana fesoasoani. E faapena foʻi pe a lapataʻia oe e sau uō ona o se tala po o se gaoioiga na e faia, e lē talafeagai ma tapulaa amiotonu a le Atua. E te ono lagona le tigā i le taimi muamua. Ae aua e te teena pe e te ita ona ua ia fautuaina oe. E lē atamai lenā gaoioiga. (Fai. 7:9) Nai lo o lea, ia lotofaafetai ona o le lototele o lau uō e taʻu atu lau mea sesē.

11. O le ā e ono teena ai e se tasi se fautuaga lelei mai i se uō alofa?

¹¹ O le ā e ono teena ai e se tasi se fautuaga lelei mai i se uō alofa? O le faamaualuga. O tagata faamaualuluga e fia “faalogo o latou taliga i mea e logolelei iā i latou lava” ma e “liliuese foʻi o latou taliga mai i le upu moni.” (2 Timo. 4:3, 4) Ua latou soona faatāua naʻuā o latou lava manatu, ma mafaufau ai e sili atu lo latou poto ma lo latou tāua nai lo o isi. Peitaʻi na tusi le aposetolo o Paulo: “Afai e manatu se tasi o ia o se tagata tāua ae e leai, ua faasesēina ai e ia o ia lava.” (Kala. 6:3) Na faamatala manino e Solomona lenei mataupu i lona faapea mai: “E sili ona lelei o se tamaitiiti mativa ae e atamai, nai lo o le tupu e toeaina ae e valea, e lē lava lona poto e amanaʻia ai lapataʻiga.”​—Fai. 4:13.

12. O le ā e tatou te aʻoaʻoina mai i le faaaʻoaʻoga na faataatia e le aposetolo o Peteru o loo i le Kalatia 2:11-14?

¹² Seʻi manatu i le faaaʻoaʻoga na faataatia e le aposetolo o Peteru, ina ua faasaʻo o ia e le aposetolo o Paulo i luma o le lautele. (Faitau le Kalatia 2:11-14.) Na ono ita Peteru iā Paulo ona o le auala ma le nofoaga na faasaʻo ai o ia. Ae na atamai Peteru. Na ia talia le fautuaga ma e na te leʻi teulotoina le ita iā Paulo. Nai lo o lea, na ia taʻua mulimuli ane Paulo o se “uso pele.”​—2 Pete. 3:15.

13. O ā mea e tatau ona tatou manatua a o leʻi avatu se fautuaga?

¹³ O ā mea e tatau ona e manatua pe afai ua e lagona e tatau ona avatu se fautuaga i sau uō?  A o leʻi talanoa atu i lau uō, ia fesili ifo, ʻPo o aʻu o se tagata ua “amiotonu naʻuā”?’ (Fai. 7:16) O le tagata e amiotonu naʻuā, e na te faamasinoina isi e fua i ana tapulaa ae lē o tapulaa a Ieova ma e na te ono lē faaalia le alofa mutimutivale. Pe afai ua uma ona e iloiloina oe lava ma e iloa ai e manaʻomia ona e talanoa i lau uō, ia faailoa manino atu iā te ia le faafitauli, ma ia faaaogā fesili faatupu manatu e fesoasoani ai i lau uō ia iloa lana mea sesē. Ia faamautinoa o mea e te fai atu ai e faavae mai i le Tusi Paia, ma ia manatua e tali lau uō ia Ieova ae lē o oe. (Roma 14:10) Ia faalagolago i le atamai o loo i le Afioga a le Atua, ma pe a fautua i se tasi ia faaaʻoaʻo i le alofa mutimutivale o Iesu. (Faata. 3:5; Mata. 12:20) Aiseā? Ona o le auala e tatou te feutagaʻi ai ma isi, o le auala foʻi lenā o le a feutagaʻi ai Ieova ma i tatou.​—Iako. 2:13.

14. O le ā ua saunia e le faalapotopotoga a le Atua mo i tatou?

¹⁴ E taʻitaʻia e Ieova i tatou i le ala i le ola e ala mai i le vaega i le lalolagi o lana faalapotopotoga lea e saunia vitiō, lomiga ma sauniga e fesoasoani ai iā i tatou e faatatau fautuaga o loo i le Afioga a le Atua. E maufaatuatuaina faamatalaga o loo i vitiō, sauniga ma lomiga ona e faavae mai i le Tusi Paia. E faalagolago le Vaega Pule i le agaga paia ina ia filifili le auala e sili ona lelei e faia ai le galuega talaʻi. Ae e iloilo e lē aunoa e le Vaega Pule a latou faaiʻuga, pe e iai ni suiga e manaʻomia ona fai i le auala e faamaopoopo ai le galuega. Aiseā? Ona “o loo suia le tulaga o mea a lenei lalolagi,” e tatau la i le faalapotopotoga a le Atua ona fetuutuunaʻi i suiga o tulaga o mea a le lalolagi.​—1 Kori. 7:31.

15. O ā luʻi ua fesagaʻia e nisi o tagata talaʻi?

¹⁵ E mautinoa e tatou te lotomalilie e usitaʻia taʻiala ua tatou maua e faavae mai i le Tusi Paia, e faatatau i o tatou talitonuga po o tapulaa tauamio. Ae o le ā le auala e tatou te tali atu ai pe a faia e le faalapotopotoga a le Atua se suiga e aafia ai isi vala o tatou olaga? O se faaaʻoaʻoga, i nai tausaga talu ai, ua matuā taugatā le fausiaina ma le tausiaina o maota mo tapuaʻiga. O lea, na faatonuina ai e le Vaega Pule ia taumafai le tele o faapotopotoga e faaaogā se Maota mo Sauniga se tasi pe a talafeagai. Ona o lenei suiga, na mafai ai ona tuufaatasi nisi faapotopotoga ae faatau ese nisi Maota mo Sauniga. Na faaaogā le tupe e fesoasoani e fausia ai  Maota mo Sauniga i vaipanoa na manaʻomia tele ai. Pe afai e te nofo i se vaipanoa ua faatau ese Maota mo Sauniga ma ua tuufaatasi faapotopotoga, atonu la o se luʻi iā te oe le faamasani i na suiga fou. O nisi o tagata talaʻi ua mamao le mea ua latou faimalaga atu ai ina ia auai i sauniga. O nisi na galulue mamafa e fausia pe tausia na Maota mo Sauniga, atonu e latou te taumānatu pe aiseā ua faatau ese ai. Atonu e latou te lagona ua maʻimau lo latou taimi ma taumafaiga na alu ai. Peitaʻi, o loo latou lagolagosua pea i lenei faatulagaga fou, ma e tatau ona faamalō atu iā i latou na.

16. E faapefea ona faatumauina lo tatou olioli pe a faatatauina le fautuaga o loo i le Kolose 3:23, 24?

¹⁶ E faatumauina lo tatou olioli, pe a tatou manatua o loo tatou galulue mo Ieova ma o loo ia taʻitaʻia lana faalapotopotoga. (Faitau le Kolose 3:23, 24.) Na faataatia e le tupu o Tavita se faaaʻoaʻoga lelei, o le foaʻi lea o tupe e fausia ai le malumalu. Na ia faapea mai: “O ai ea aʻu nei ma o ai ea loʻu nuu, ina ua matou mafaia ona foaʻi atu meaalofa tauofo faapenei? Auā e mai iā te oe mea uma, ma ua matou foaʻiina atu iā te oe mea uma mai i lou aao.” (1 No. 29:14) Pe a tatou faia foaʻi tau tupe, ua tatou toe faafoʻi iā Ieova mea na ia foaʻi mai iā i tatou. E ui i lea, e talisapaia e Ieova o tatou taimi, malosi ma meafaitino ua tatou foaʻi atu e lagolago ai le galuega e finagalo o ia e tatou te faia.​—2 Kori. 9:7.

17. Aiseā e lē tatau ai ona e lotovaivai pe a manaʻomia ona e faia ni suiga ina ia mulimulituʻi ai i tulaga aao o Iesu?

¹⁷ Ina ia savavali pea i le auala lauitiiti e tau atu i le ola, e tatau iā i tatou uma ona mulimulituʻi i tulaga aao o Iesu. (1 Pete. 2:21) Ae afai e manaʻomia ona e faia ni suiga ina ia mulimulituʻi ai i tulaga aao o Iesu, aua e te lotovaivai. O lou iloa e manaʻomia ona e faia suiga, atonu o se faailoga lelei lenā e faailoa mai ai lou faatāuaina o le taʻitaʻiga a Ieova. Ia manatua, e lē faatalitalia e Ieova i tatou o ni tagata e lē lelei atoatoa, ina ia atoatoa ona tatou faaaʻoaʻo iā Iesu.

18. O le ā e tatau ona tatou faia ina ia taunuu manuia ai la tatou faigāmalaga?

¹⁸ Tau ina ia tatou taulaʻi uma atu i le lumanaʻi ma ia lotomalilie e faia pea suiga i o tatou mafaufauga, uiga ma gaoioiga. (Faata. 4:25; Luka 9:62) Seʻi faaauau pea ona tatou lotomaulalo, “ia faaauau ona . . .  olioli, ia toe faasaʻo o [tatou] manatu.” (2 Kori. 13:11) Pe a tatou faia faapea, “ona faatasi lea iā [i tatou] o le Atua o le alofa ma le filemu.” O lea, e lē gata o le a tatou olioli ai i le faigāmalaga ae o le a tatou taunuu ai foʻi i le nofoaga o loo tatou malaga i ai.